ចូរសរសើរព្រះយេហូវ៉ាចំពោះការប្រព្រឹត្តដ៏អស្ចារ្យរបស់ទ្រង់!
ចូរសរសើរព្រះយេហូវ៉ាចំពោះការប្រព្រឹត្តដ៏អស្ចារ្យរបស់ទ្រង់!
«ព្រលឹងខ្ញុំលើកដំកើង[ព្រះយេហូវ៉ា] . . . ពីព្រោះព្រះដ៏មានព្រះចេស្ដា ទ្រង់បានប្រោសសេចក្ដីយ៉ាងល្អវិសេសដល់ខ្ញុំ»។—លូកា ១:៤៦-៤៩
១. តើយើងគួរសរសើរដំកើងព្រះយេហូវ៉ាចំពោះការអស្ចារ្យអ្វីខ្លះ?
ព្រះយេហូវ៉ាគឺគួរនឹងសរសើរដោយព្រោះការប្រព្រឹត្តដ៏អស្ចារ្យរបស់ទ្រង់។ ពេលលោកម៉ូសេដែលជាព្យាការីបានរៀបរាប់ឡើងវិញអំពីការរំដោះនៃអ៊ីស្រាអែលពីស្រុកអេស៊ីព្ទ គាត់បានប្រកាសថា៖ «ភ្នែកឯងរាល់គ្នាបានឃើញការដ៏[អស្ចារ្យ] ដែលព្រះយេហូវ៉ាបានធ្វើទាំងអស់ហើយ»។ (ចោទិយកថា ១១:១-៧) គឺស្រដៀងគ្នាដែរ ពេលទេវតានាមកាព្រីយ៉ែលបានប្រកាសថា នាងម៉ារាដែលជាស្រីព្រហ្មចារីនោះនឹងមានគភ៌ប្រសូតបានព្រះយេស៊ូ ម៉ារាបានមានប្រសាសន៍ថា៖ «ព្រលឹងខ្ញុំលើកដំកើង[ព្រះយេហូវ៉ា] . . . ពីព្រោះព្រះដ៏មានព្រះចេស្ដា ទ្រង់បានប្រោសសេចក្ដីយ៉ាងល្អវិសេសដល់ខ្ញុំ»។ (លូកា ១:៤៦-៤៩) ដោយព្រោះយើងជាស្មរបន្ទាល់ព្រះយេហូវ៉ា នោះយើងក៏សរសើរដំកើងទ្រង់ចំពោះការប្រសើរអស្ចារ្យ ដូចជាការរំដោះអ៊ីស្រាអែលចេញពីសេវកភាពនៅស្រុកអេស៊ីព្ទ និងកំណើតរបស់ព្រះរាជបុត្រាដ៏ស្ងួនភ្ងារបស់ទ្រង់តាមរយៈអព្ភូតហេតុនោះ។
២. (ក) តើ«គំនិតសំរេច»របស់ព្រះដែលទ្រង់បាន«តាំងពីអស់កល្បរៀងមក»រួមបញ្ចូលអ្វីខ្លះសំរាប់មនុស្សដែលស្ដាប់បង្គាប់? (ខ) តើយ៉ូហានបានឃើញអ្វី ពេលដែលគាត់នៅកោះប៉ាត់ម៉ុសនោះ?
២ ការប្រព្រឹត្តភាគច្រើនដ៏អស្ចារ្យរបស់ព្រះយេហូវ៉ានោះ គឺពាក់ព័ន្ធនឹង«គំនិតសំរេច»របស់ទ្រង់ដែលទ្រង់បានគ្រោង«តាំងពីអស់កល្បរៀងមក» គឺជាគោលបំណងចំពោះការប្រទានពរតាមរយៈព្រះមេស្ស៊ីនិងការគ្រប់គ្រងរបស់ព្រះមេស្ស៊ីក្នុងព្រះរាជាណាចក្រ ទៅដល់មនុស្សជាតិដែលស្ដាប់បង្គាប់។ (អេភេសូរ ៣:៨-១៣) គោលបំណងនោះកំពុងតែសម្រេចជាបណ្ដើរៗ ពេលសាវ័កយ៉ូហានមានចក្ខុនិមិត្តមួយដែលអនុញ្ញាតឲ្យគាត់មើលទៅខាងក្នុងនៃទ្វារមួយដែលបើកចំហនៅស្ថានសួគ៌។ គាត់បានឮសម្លេងមួយដែលមានសូរដូចជាត្រែថា៖ «ចូរឡើងមកឯណេះ អញនឹងបង្ហាញឲ្យឯងឃើញការ ដែលត្រូវមកខាងក្រោយទៀត»។ (វិវរណៈ ៤:១) ក្រោយយ៉ូហានត្រូវបណ្ដេញបំបរចេញដោយរដ្ឋាភិបាលរ៉ូមទៅដល់កោះប៉ាត់ម៉ុស«ដោយព្រោះព្រះបន្ទូល នឹងសេចក្ដីបន្ទាល់ពីព្រះយេស៊ូវគ្រីស្ទ» នោះគាត់បានទទួលនូវ«សេចក្ដី ដែលព្រះយេស៊ូវគ្រីស្ទ បានបើកឲ្យឃើញ»។ អ្វីដែលសាវ័កយ៉ូហានបានឃើញនិងឮនោះ ក៏បើកឲ្យដឹងជាច្រើនអំពីគោលបំណងដ៏អស់កល្បរបស់ព្រះ និងហេតុនោះហើយ វាជាប្រភពមួយនៃសេចក្ដីលើកទឹកចិត្តនិងការបំភ្លឺឲ្យចេះដឹងខាងវិញ្ញាណតាមត្រូវពេលចំពោះអស់អ្នកដែលជាគ្រីស្ទានពិត។—វិវរណៈ ១:១, ៩, ១០
៣. ក្នុងចក្ខុនិមិត្តរបស់យ៉ូហាន តើពួកចាស់ទុំ២៤នាក់តំណាងអ្នកណា?
៣ នៅខាងក្នុងនៃទ្វារចំហនោះនៅស្ថានសួគ៌ យ៉ូហានបានឃើញពួកចាស់ទុំ២៤នាក់គង់លើបល្ល័ង្កទាំងពាក់មកុដដូចជាស្តេច។ ពួកគេបានក្រាបថ្វាយបង្គំនៅចំពោះព្រះភក្ដ្រព្រះទាំងពោលថា៖ «ឱព្រះអម្ចាស់ ជាព្រះនៃយើងរាល់គ្នាអើយ! ទ្រង់គួរនឹងទទួលសិរីល្អ កិតិនាម នឹងព្រះចេស្ដា ដ្បិតទ្រង់បានបង្កើតរបស់សព្វសារពើមក ហើយគឺដោយបំណងព្រះហឫទ័យទ្រង់ហើយ ដែលរបស់ទាំងនោះបានកើតមក ហើយមាន នៅផង»។ (វិវរណៈ ៤:១១) អ្នកចាស់ទុំទាំងនោះតំណាងអ្នកចាក់ប្រេងតាំងទាំងអស់ ក្រោយពេលព្រះដំកើងគេឲ្យទទួលឋានៈដែលទ្រង់បានសន្យាផ្ដល់ចំពោះគេ។ អ្នកចាស់ទុំទាំងនោះត្រូវជំរុញឲ្យថ្វាយបង្គំព្រះយេហូវ៉ា ដោយព្រោះការប្រព្រឹត្តដ៏អស្ចារ្យរបស់ទ្រង់ដែលទាក់ទងនឹងការបង្កើត។ យើងក៏នឹកអស្ចារ្យក្នុងចិត្តពេលយើងពិចារណានូវភស្តុតាងដែលបញ្ជាក់នូវ«ព្រះចេស្ដាដ៏នៅអស់កល្បជានិច្ច នឹងនិស្ស័យជាព្រះ»របស់ព្រះយេហូវ៉ា។ (រ៉ូម ១:២០) ពេលយើងរៀនកាន់តែច្រើនអំពីព្រះយេហូវ៉ា នោះយើងក៏នឹងមានហេតុកាន់តែច្រើន ដើម្បីសរសើរដំកើងទ្រង់ចំពោះការដ៏អស្ចារ្យរបស់ទ្រង់។
ចូរប្រកាសអំពីការប្រព្រឹត្តដ៏គួរឲ្យសរសើររបស់ព្រះយេហូវ៉ា!
៤, ៥. សូមជូនឧទាហរណ៍ខ្លះៗពីរបៀបដែលដាវីឌបានសរសើរព្រះយេហូវ៉ា។
៤ ដាវីឌដែលជាអ្នកសរសេរទំនុកដំកើង ក៏បានសរសើរដំកើងដល់ព្រះចំពោះការប្រព្រឹត្តដ៏អស្ចារ្យរបស់ទ្រង់។ ជាឧទាហរណ៍ ដាវីឌបានច្រៀងថា៖ «ចូរច្រៀងទំនុកសរសើរដល់ព្រះយេហូវ៉ា ដែលទ្រង់គង់នៅក្រុងស៊ីយ៉ូនចុះ! ចូរថ្លែងប្រាប់ពីការនៃទ្រង់ នៅក្នុងចំណោមបណ្ដាជនផង។ ឱព្រះយេហូវ៉ាអើយ! សូមទ្រង់មេត្ដាប្រោសទូលបង្គំ សូមទ្រង់ទតមើលសេចក្ដីទុក្ខលំបាករបស់ទូលបង្គំផង ជាការដែលទូលបង្គំទ្រាំរងនេះ ដោយសារពួកអ្នកដែលស្អប់ទូលបង្គំ គឺទ្រង់ហើយ ដែលលើកទូលបង្គំឡើង ឲ្យរួចពីទ្វារនៃសេចក្ដីស្លាប់ ដើម្បីឲ្យទូលបង្គំបានសំដែងចេញអស់ទាំងសេចក្ដីសរសើរនៃទ្រង់ នៅគ្រប់ទាំងទ្វារនៃកូនស្រីស៊ីយ៉ូន»។ (ទំនុកដំកើង ៩:១១, ១៣, ១៤) ក្រោយដាវីឌបានប្រទានឲ្យគម្រោងសំរាប់ព្រះវិហារ ទៅដល់រាជបុត្រាទ្រង់ នោះទ្រង់បានសរសើរនិងជូនពរព្រះដោយពោលថា៖ «ឱព្រះយេហូវ៉ាអើយ! ភាពដ៏ធំនឹងព្រះចេស្ដា សិរីល្អ ជ័យជំនះ នឹងតេជានុភាព នោះសុទ្ធតែជារបស់ផងទ្រង់ . . . ឱព្រះយេហូវ៉ាអើយ! រាជ្យនេះក៏ជារបស់ផងទ្រង់ដែរ ហើយទ្រង់បានដំកើងឡើង ជាប្រធានលើទាំងអស់ . . . ឱព្រះនៃយើងរាល់គ្នាអើយ! យើងខ្ញុំអរព្រះគុណដល់ទ្រង់ ហើយក៏លើកសរសើរ ព្រះនាមទ្រង់ដ៏មានសិរីល្អ»។—របាក្សត្រទី១ ២៩:១០-១៣
៥ បទគម្ពីរតែងតែអញ្ជើញទាំងជំរុញយើងឲ្យសរសើរព្រះ ដូចជាដាវីឌបានធ្វើដូច្នោះ។ សៀវភៅទំនុកដំកើង មានពំនោលជាច្រើនដែលជាការសរសើរដំកើងដល់ព្រះ ហើយដាវីឌជាអ្នកសរសេរប្រមាណពាក់កណ្ដាលនៃចំនួនចំរៀងទាំងអស់នោះ។ ដាវីឌបានអរព្រះគុណនិងសរសើរព្រះជានិច្ច។ (ទំនុកដំកើង ៦៩:៣០) ម្យ៉ាងទៀត តាំងពីសម័យបូរាណ សេចក្ដីដែលដាវីឌនឹងអ្នកឯទៀតបានត្រូវបណ្ដាលឲ្យសរសេរនោះ ក៏បានត្រូវប្រើដើម្បីសរសើរដំកើងព្រះយេហូវ៉ាដែរ។
៦. តើទំនុកដំកើងដែលព្រះបានបណ្ដាលឲ្យគេសរសេរនោះមានប្រយោជន៍អ្វីចំពោះយើង?
៦ ទំនុកដំកើងទាំងនោះមានប្រយោជន៍ជាច្រើនណាស់ហ្ន៎! ចំពោះអ្នកដែលថ្វាយបង្គំព្រះយេហូវ៉ា។ ពេលយើងចង់អរព្រះគុណដល់ទ្រង់ចំពោះការប្រព្រឹត្តដ៏អស្ចារ្យដែលទ្រង់បានធ្វើដើម្បីប្រយោជន៍យើង នោះប្រហែលជាយើងផ្ចង់អារម្មណ៍ទៅលើពាក្យពេចន៍ដែលមានក្នុងទំនុកដំកើង។ ជាឧទាហរណ៍ ពេលដែលយើងភ្ញាក់ពីដំណេកជារៀងរាល់ថ្ងៃ នោះចិត្តយើងប្រហែលជានឹងជំរុញឲ្យយើងចេញវាចាដូចតទៅនេះថា៖ «នេះជាការល្អហើយ! គឺដែលនឹងអរព្រះគុណដល់ព្រះយេហូវ៉ា ហើយច្រៀងសរសើរដល់ព្រះនាមនៃទ្រង់ ជាព្រះដ៏ខ្ពស់បំផុត ព្រមទាំងសំដែងពីសេចក្ដីសប្បុរសនៃទ្រង់នៅពេលព្រឹក ហើយពីសេចក្ដីស្មោះត្រង់របស់ទ្រង់រាល់តែយប់ . . . ដ្បិត ឱព្រះយេហូវ៉ាអើយ! ទ្រង់បានឲ្យទូលបង្គំមានសេចក្ដីអំណរ ដោយកិច្ចការរបស់ទ្រង់ ទូលបង្គំនឹងបន្លឺឡើង ដោយអំណរ ចំពោះការនៃព្រះហស្តទ្រង់»។ (ទំនុកដំកើង ៩២:១-៤) ពេលយើងឈ្នះលើឧបសគ្គណាមួយដែលបានរារាំងនូវការលូតលាស់របស់យើងខាងវិញ្ញាណ នោះប្រហែលជាយើងមានចំណង់ចង់សម្ដែងពីអំណរនិងកតញ្ញូធម៌របស់យើងតាមរយៈសេចក្ដីអធិស្ឋាន ដូចជាអ្នកសរសេរទំនុកដំកើងអ៊ីចឹង ពេលគាត់បានច្រៀងថា៖ «មកចុះ! យើងនឹងច្រៀងថ្វាយព្រះយេហូវ៉ា ចូរយើងឡើងសំឡេងដោយអំណរ ដល់ថ្មដានៃសេចក្ដីសង្គ្រោះរបស់យើង ចូរយើងចូលទៅចំពោះទ្រង់ ដោយអរព្រះគុណ ចូរយើងឡើងសំឡេងថ្វាយទ្រង់ ដោយទំនុកដំកើងចុះ!»។—ទំនុកដំកើង ៩៥:១, ២
៧. (ក) តើអ្វីដែលគួរឲ្យកត់សម្គាល់អំពីចំរៀងជាច្រើនដែលគ្រីស្ទានច្រៀងនោះ? (ខ) ហេតុអ្វីបានជាល្អបើសិនជាយើងមកប្រជុំមុនម៉ោងនិងនៅរហូតដល់ចប់នោះ?
៧ ជារឿយៗ យើងបន្លឺសម្លេងឡើងដោយច្រៀងសរសើរដល់ព្រះយេហូវ៉ានៅឯកិច្ចប្រជុំ សន្និបាត និងមហាសន្និបាត។ គឺគួរឲ្យកត់សម្គាល់មែនថា គំនិតជាច្រើនទាំងនេះ គឺមានមូលដ្ឋានទៅលើបទដែលព្រះបានបណ្ដាលឲ្យសរសេរមកក្នុងសៀវភៅទំនុកដំកើង។ យើងគឺសប្បាយយ៉ាងណាទៅហ្ន៎! ដែលសម័យយើងនេះមានចំរៀងទាំងប៉ុន្មានដែលធ្វើឲ្យមានអារម្មណ៍កក់ក្ដៅបានត្រូវសន្សំទុកឲ្យយើងដើម្បីច្រៀងសរសើរដល់ព្រះយេហូវ៉ា។ ហេតុមួយដែលគួរជំរុញយ៉ាងខ្លាំងឲ្យយើងមកឯកិច្ចប្រជុំមុនម៉ោងនិងនៅរហូតដល់ប្រជុំចប់ គឺដើម្បីច្រៀងសរសើរដល់ព្រះ។ នោះយើងអាចចូលរួមសរសើរព្រះយេហូវ៉ាដោយច្រៀងចំរៀងនិងរួមអធិស្ឋានជាមួយនឹងអ្នកដែលថ្វាយបង្គំជាមួយយើងផងដែរ។
«ចូរសរសើរដល់ព្រះយេហូវ៉ា . . . ចុះ!»
៨. តើអ្វីជាខ្លឹមសារនៃពាក្យ«ហាលេលូយ៉ា»? ហើយតើនោះច្រើនតែត្រូវបកប្រែយ៉ាងដូចម្ដេច?
៨ ការសរសើរព្រះយេហូវ៉ាគឺជាខ្លឹមសារនៃពាក្យ«ហាលេលូយ៉ា» ដែលជាការសរសេរប្រកបសូរសម្លេងនៃពាក្យមួយជាភាសាហេព្រើរ ដែលច្រើនតែត្រូវបកប្រែថា«ចូរសរសើរដល់យ៉ា»។ ជាឧទាហរណ៍ នៅទំនុកដំកើង ១៣៥:១-៣ យើងអាចអាននូវការអញ្ជើញមួយដោយសំឡេងដ៏រំពងនិងកក់ក្ដៅថា៖ «ចូរសរសើរ! ដល់ព្រះយេហូវ៉ា ចូរសរសើរ! ដល់ព្រះនាមព្រះយេហូវ៉ា ឱពួកអ្នកបំរើរបស់ព្រះយេហូវ៉ាអើយ! ចូរសរសើរទ្រង់ចុះ! ពួកអ្នករាល់គ្នាដែលឈរនៅក្នុងដំណាក់នៃព្រះយេហូវ៉ា គឺក្នុងទីព្រះលាននៃដំណាក់របស់ព្រះនៃយើងខ្ញុំអើយ ចូរសរសើរ! ដល់ព្រះយេហូវ៉ា ដ្បិតព្រះយេហូវ៉ាទ្រង់ល្អ ចូរច្រៀងសរសើរដល់ព្រះនាមទ្រង់! ដ្បិតនោះពីរោះហើយ»។
៩. តើអ្វីដែលជំរុញឲ្យយើងសរសើរដំកើងព្រះយេហូវ៉ា?
៩ ពេលដែលយើងគិតពិចារណាអំពីការប្រព្រឹត្តដ៏ប្រសើរអស្ចារ្យរបស់ព្រះក្នុងការបង្កើត ព្រមទាំងអ្វីៗដែលទ្រង់បានធ្វើដើម្បីប្រយោជន៍ដល់យើង នោះការអបអរជំរុញឲ្យចិត្តយើងចង់សរសើរទ្រង់ផងដែរ។ ពេលយើងគិតពិចារណាអំពីអព្ភូតហេតុទាំងប៉ុន្មានដែលទ្រង់បានប្រព្រឹត្តដើម្បីរាស្ត្រទ្រង់ពីសម័យមុនៗ នោះចិត្តរបស់យើងក៏ជំរុញឲ្យយើងសរសើរដំកើងទ្រង់ផងដែរ។ ពេលយើងរំពឹងគិត អំពីសេចក្ដីសន្យាទាំងឡាយចំពោះអ្វីដ៏អស្ចារ្យដែលទ្រង់នឹងប្រព្រឹត្តនាពេលអនាគត យើងខំស្វែងរកវិធីដែលយើងអាចសម្ដែងនូវសេចក្ដីសរសើរនិងកតញ្ញូធម៌។
១០, ១១. តើហេតុអ្វីបានជាហេតុការណ៍ដែលថា យើងមានជីវិតរស់នៅ គឺជាហេតុមួយដែលយើងគួរសរសើរដល់ព្រះ?
១០ ហេតុការណ៍ដែលថា យើងមានជីវិតរស់នៅ គឺជាហេតុមួយដែលយើងគួរសរសើរដល់ព្រះយេហូវ៉ា។ ដាវីឌបានច្រៀងថា៖ «ទូលបង្គំនឹងអរព្រះគុណដល់ទ្រង់[ព្រះយេហូវ៉ា] ដ្បិតទ្រង់បានបង្កើតទូលបង្គំមកយ៉ាងគួរកោត គួរអស្ចារ្យ។ ឯស្នាដៃនៃទ្រង់ ក៏សុទ្ធតែអស្ចារ្យទាំងអស់ ព្រលឹងទូលបង្គំក៏ដឹងច្បាស់ហើយ»។ (ទំនុកដំកើង ១៣៩:១៤) គឺត្រឹមត្រូវហើយដែលថា យើង‹ត្រូវបង្កើតយ៉ាងគួរកោត គួរអស្ចារ្យ› ទាំងមានវិញ្ញាណ៥យ៉ាងដែលប្រៀបដូចជាអំណោយវិសេសវិសាលគឺជាចក្ខុវិញ្ញាណ សោតវិញ្ញាណ ថែមទាំងសមត្ថភាពគិតគូរ។ ហេតុនេះហើយ យើងគួររស់នៅតាមរបៀបមួយដែលនាំឲ្យមានសេចក្ដីសរសើរទៅដល់អ្នកបង្កើតរបស់យើង មែនទេ? សាវ័កប៉ុលបាននិយាយដូច្នេះ ពេលគាត់សរសេរថា៖ «ទោះបើស៊ី ឬផឹក ឬធ្វើការអ្វីក៏ដោយ នោះចូរធ្វើទាំងអស់សំរាប់ចំរើនសិរីល្អដល់ព្រះចុះ!»។—កូរិនថូសទី១ ១០:៣១
១១ យើងនឹងធ្វើអ្វីៗទាំងអស់ដើម្បីចំរើនសិរីល្អដល់ព្រះយេហូវ៉ា បើសិនជាយើងស្រឡាញ់ទ្រង់ពិត។ ព្រះយេស៊ូបានមានបន្ទូលថា បញ្ញតទី១គឺ៖ «ឯងត្រូវស្រឡាញ់ ដល់ព្រះអម្ចាស់ ជាព្រះនៃឯង ឲ្យអស់អំពីចិត្ត អស់អំពីព្រលឹង អស់អំពីគំនិត ហើយអស់អំពីកំឡាំងនៃឯង នោះហើយជាបញ្ញត្តទី១»។ (ម៉ាកុស ១២:៣០; ចោទិយកថា ៦:៥) យើងប្រាកដជាគួរស្រឡាញ់ព្រះយេហូវ៉ានិងសរសើរទ្រង់ជាអ្នកបង្កើតរបស់យើង និងជាអ្នកដែលប្រទាន«គ្រប់ទាំងរបស់ដ៏ល្អ . . . នឹងអស់ទាំងអំណោយទានដ៏គ្រប់លក្ខណ៍»។ (យ៉ាកុប ១:១៧; អេសាយ ៥១:១៣; កិច្ចការ ១៧:២៨) គឺជាសមហេតុសមផលដែលយើងធ្វើអ៊ីចឹង ពីព្រោះញាណសតិ សមត្ថភាពថ្វាយបង្គំ និងសមត្ថភាពយល់ដឹងអ្វីខាងវិញ្ញាណ ថែមទាំងកម្លាំងខាងរាងកាយរបស់យើង អស់ទាំងគុណសម្បត្ដិ និងសមត្ថភាពដែលយើងមានសុទ្ធតែមកពីព្រះយេហូវ៉ាទាំងអស់។ ដោយព្រោះទ្រង់គឺជាអ្នកបង្កើតយើង នោះទ្រង់គឺគួរនឹងទទួលសេចក្ដីស្រឡាញ់និងសេចក្ដីសរសើរពីយើង។
១២. តើអ្នកមានអារម្មណ៍យ៉ាងណាចំពោះការប្រព្រឹត្តដ៏អស្ចារ្យរបស់ព្រះយេហូវ៉ា និងបន្ទូលដែលមានក្នុងទំនុកដំកើង ៤០:៥?
១២ ការប្រព្រឹត្តដ៏អស្ចារ្យរបស់ព្រះយេហូវ៉ា នោះជាហេតុដ៏ល្អដែលនាំឲ្យយើងសរសើរដល់ទ្រង់! ដាវីឌបានច្រៀងថា៖ «ឱព្រះយេហូវ៉ាដ៏ជាព្រះនៃទូលបង្គំអើយ! ការអស្ចារ្យដែលទ្រង់បានធ្វើ នោះមានច្រើនណាស់ ព្រមទាំងគំនិតដែលទ្រង់នឹកដល់យើងខ្ញុំផង គ្មានអ្នកណាអាចនឹងរៀបរាប់ដោយលំដាប់ ពីការទាំងនោះ នៅចំពោះទ្រង់បានឡើយ បើទូលបង្គំនឹងចង់និទានប្រាប់ នោះមានច្រើនហួសកំណត់នឹងរាប់បាន»។ (ទំនុកដំកើង ៤០:៥) ដាវីឌមិនអាចរៀបរាប់គ្រប់ទាំងការប្រព្រឹត្តដ៏អស្ចារ្យរបស់ព្រះយេហូវ៉ាឲ្យអស់បានទេ ហើយយើងក៏មិនអាចធ្វើដូច្នេះដែរ។ ក៏ប៉ុន្តែ ចូរឲ្យយើងសរសើរដល់ព្រះ ពេលយើងត្រូវរំឭកអំពីការអស្ចារ្យរបស់ទ្រង់។
ការប្រព្រឹត្តដែលជាប់ទាក់ទងនឹងគោលបំណងដ៏អស់កល្បរបស់ទ្រង់
១៣. តើដោយដូចម្ដេចដែលសេចក្ដីសង្ឃឹមរបស់យើងគឺជាប់ជំពាក់នឹងការប្រព្រឹត្តដ៏អស្ចារ្យរបស់ព្រះ?
១៣ សេចក្ដីសង្ឃឹមរបស់យើងចំពោះអនាគត គឺពាក់ព័ន្ធនឹងការប្រព្រឹត្តដ៏អស្ចារ្យហើយគួរឲ្យសរសើររបស់ព្រះយេហូវ៉ាថែមទាំងគោលបំណងដ៏អស់កល្បរបស់ទ្រង់។ ក្រោយពីការបះបោរក្នុងសួនច្បារអេដែន នោះព្រះយេហូវ៉ាបានមានបន្ទូលប្រាប់ទំនាយលើកដំបូង ដែលប្រកបទៅដោយសេចក្ដីសង្ឃឹមនោះ។ ព្រះបានមានបន្ទូលកាត់ទោសពស់ថា៖ «អញនឹងធ្វើឲ្យឯងហើយនឹងស្ត្រី គឺទាំងពូជឯងនឹងពូជនាងមានសេចក្ដីខ្មាំងនឹងគ្នា ពូជនាងនឹងកិនក្បាលឯង ហើយឯងនឹងចឹកកែងជើងគេ»។ (លោកុប្បត្តិ ៣:១៥) សេចក្ដីសង្ឃឹមទៅលើពូជសន្យារបស់ស្ត្រីនោះ បានស្ថិតក្នុងចិត្តរបស់មនុស្សជាតិដ៏ស្មោះត្រង់ក្រោយពីព្រះយេហូវ៉ាបានប្រព្រឹត្តការអស្ចារ្យមួយ ជាការសង្គ្រោះលោកណូអេនិងក្រុមគ្រួសាររបស់គាត់ឲ្យរួចជីវិតពីទឹកជំនន់ដែលបានលិចផែនដីទាំងមូលព្រមទាំងកំទេចចោលលោកីយ៍ដ៏អាក្រក់នោះ។ (ពេត្រុសទី២ ២:៥) សេចក្ដីសន្យាតាមរយៈទំនាយដែលលោកអ័ប្រាហាំនិងដាវីឌបានទទួល ក៏បានផ្ដល់នូវការយល់ធ្លុះដ៏កាន់តែជ្រៅទៅក្នុងអ្វីដែលព្រះយេហូវ៉ានឹងសម្រេចតាមរយៈពូជនោះ។—លោកុប្បត្តិ ២២:១៥-១៨; សាំយូអែលទី២ ៧:១២
១៤. តើអ្វីជាការសម្ដែងតាមរបៀបដ៏ឧត្តមបំផុតថា ព្រះយេហូវ៉ាគឺជាអ្នកដែលប្រព្រឹត្តការដ៏អស្ចារ្យដើម្បីប្រយោជន៍មនុស្សជាតិ?
១៤ ព្រះយេហូវ៉ាបានសម្ដែងតាមរបៀបដ៏ឧត្តមបំផុតថាទ្រង់គឺជាអ្នកដែលប្រព្រឹត្តការដ៏អស្ចារ្យដើម្បីប្រយោជន៍មនុស្សជាតិ ពេលទ្រង់បានប្រទានពូជសន្យា ដែលជាព្រះយេស៊ូគ្រីស្ទ ជាព្រះរាជបុត្រាតែមួយគត់របស់ទ្រង់ ថ្វាយជាតម្លៃលោះមនុស្សជាតិ។ (យ៉ូហាន ៣:១៦; កិច្ចការ ២:២៩-៣៦) តម្លៃលោះនោះបានផ្ដល់នូវមូលដ្ឋានសំរាប់ការផ្សះផ្សានូវទំនាក់ទំនងរវាងមនុស្សជាតិនឹងព្រះ។ (ម៉ាថាយ ២០:២៨; រ៉ូម ៥:១១) ព្រះយេហូវ៉ាបានប្រមូលអ្នកដំបូងដែលបានត្រូវផ្សះផ្សានឹងទ្រង់ក្នុងក្រុមជំនុំគ្រីស្ទាន ដែលបានត្រូវស្ថាបនានៅឆ្នាំ៣៣ ស.យ.។ អ្នកទាំងនោះបានផ្សព្វផ្សាយដំណឹងល្អនៅកន្លែងជាច្រើនដោយមានជំនួយពីព្រះវិញ្ញាណបរិសុទ្ធ ទាំងបង្ហាញថាការសោយទិវង្គតរបស់ព្រះយេស៊ូនិងការប្រោសឲ្យទ្រង់រស់ឡើងវិញនោះ បានបើកផ្លូវឲ្យមនុស្សជាតិដែលស្ដាប់បង្គាប់ទទួលនូវពរជារៀងរហូតនៅក្រោមការគ្រប់គ្រងនៃព្រះរាជាណាចក្រស្ថានសួគ៌របស់ព្រះ។
១៥. តើព្រះយេហូវ៉ាបានប្រព្រឹត្តតាមរបៀបដ៏ប្រសើរណានៅសម័យយើងនេះ?
១៥ នៅសម័យយើងនេះ ព្រះយេហូវ៉ាបានប្រព្រឹត្តតាមរបៀបដ៏ប្រសើរមែន ដើម្បីប្រមូលអ្នកចាក់ប្រេងតាំងឲ្យគ្រប់ចំនួន។ សេចក្ដីហិនវិនាសដែលប្រៀបដូចជាខ្យល់ដែលនឹងបក់មក បានត្រូវទប់ ដើម្បីអនុញ្ញាតឲ្យមានការប្រមូលនិងបោះត្រាអ្នកដែលបង្គ្រប់ចំនួន១៤៤.០០០នាក់ដែលនឹងគ្រប់គ្រងជាមួយព្រះគ្រីស្ទនៅស្ថានសួគ៌។ (វិវរណៈ ៧:១-៤; ២០:៦) ព្រះបានចាត់វិធានការរំដោះអ្នកចាក់ប្រេងតាំងពីសេវកភាពខាងវិញ្ញាណក្នុង«បាប៊ីឡូនដ៏ជាធំ»ដែលជាចក្រភពនៃសាសនាមិនពិត។ (វិវរណៈ ១៧:១-៥) ដោយព្រោះអ្នកសំណល់ចាក់ប្រេងតាំងបានត្រូវរំដោះនៅឆ្នាំ១៩១៩ ថែមទាំងត្រូវព្រះការពារតាំងតែពីពេលនោះមកម្ល៉េះ នោះគេបានមានឱកាសធ្វើអ្វី? គេបានមានឱកាសធ្វើបន្ទាល់ផ្សព្វផ្សាយជាលើកចុងក្រោយ មុនព្រះយេហូវ៉ានាំមកនូវទីបញ្ចប់នៃរបបលោកីយ៍ដ៏អាក្រក់របស់សាតាំង ក្នុងគ្រា«សេចក្ដីវេទនាជាខ្លាំង»ដែលជិតដល់ហើយនោះ។—ម៉ាថាយ ២៤:២១; ដានីយ៉ែល ១២:៣; វិវរណៈ ៧:១៤
១៦. សព្វថ្ងៃនេះ តើអ្វីកំពុងតែកើតឡើងដោយសារការផ្សព្វផ្សាយទូទាំងពិភពលោកអំពីព្រះរាជាណាចក្រ?
១៦ ស្មរបន្ទាល់ចាក់ប្រេងតាំងរបស់ព្រះយេហូវ៉ា បានត្រួសត្រាយយ៉ាងខ្នះខ្នែងនូវកិច្ចការផ្សព្វផ្សាយអំពីព្រះរាជាណាចក្រទូទាំងពិភពលោក។ ឥឡូវ ជាលទ្ធផល «ចៀមឯទៀត»កាន់តែច្រើនកំពុងតែទៅជាអ្នកថ្វាយបង្គំព្រះយេហូវ៉ា។ (យ៉ូហាន ១០:១៦) យើងអរសប្បាយដែលនៅតែមានឱកាសឲ្យមនុស្សរាបសារួបរួមជាមួយនឹងយើងហើយសរសើរដំកើងព្រះយេហូវ៉ា។ អ្នកដែលប្រព្រឹត្តតបនឹងការពោលថា៖ «អញ្ជើញមក» ក៏នឹងទទួលសេចក្ដីសង្គ្រោះឲ្យរួចរស់ជីវិតផុតពីសេចក្ដីវេទនាជាខ្លាំង ទាំងមានសេចក្ដីសង្ឃឹមសរសើរព្រះយេហូវ៉ាជានិច្ចជាកាល។—វិវរណៈ ២២:១៧
រាប់លាននាក់កំពុងតែចូលរួមក្នុងការថ្វាយបង្គំពិត
១៧. (ក) តើតាមរបៀបណាដែលព្រះយេហូវ៉ាកំពុងតែសម្រេចការដ៏អស្ចារ្យតាមរយៈកិច្ចផ្សព្វផ្សាយរបស់យើង? (ខ) តើដូចម្ដេចដែលសាការី ៨:២៣ កំពុងតែត្រូវសម្រេច?
១៧ សព្វថ្ងៃនេះ ព្រះយេហូវ៉ាកំពុងតែប្រព្រឹត្តការដ៏អស្ចារ្យនិងគួរឲ្យសរសើរតាមរយៈកិច្ចផ្សព្វផ្សាយរបស់យើង។ (ម៉ាកុស ១៣:១០) នៅឆ្នាំថ្មីៗនេះ ទ្រង់បានឲ្យ«ទ្វារបើកចំហយ៉ាងធំសំរាប់ . . . បំពេញកិច្ចការ»។ (កូរិនថូសទី១ ១៦:៩, ព្រះគម្ពីរភាសាខ្មែរសម្រាយ) នេះបានបើកផ្លូវឲ្យមានការផ្សព្វផ្សាយដំណឹងល្អទូទាំងតំបន់ដ៏ធំទូលាយដែលធ្លាប់មានអ្នកដែលប្រឆាំងនឹងសេចក្ដីពិតឃាត់ឃាំង។ មនុស្សជាច្រើនដែលធ្លាប់ស្ថិតក្នុងសេចក្ដីងងឹតខាងវិញ្ញាណកំពុងតែប្រព្រឹត្តតបនឹងការអញ្ជើញឲ្យមកថ្វាយបង្គំព្រះយេហូវ៉ា។ ពួកគេកំពុងតែសម្រេចទំនាយដែលថា៖ «ព្រះយេហូវ៉ានៃពួកពលបរិវារ ទ្រង់មានបន្ទូលដូច្នេះថា‹នៅគ្រានោះមនុស្ស១០នាក់ពីភាសាផ្សេងៗនឹងចាប់តោង ជាយអាវរបស់សាសន៍យូដាម្នាក់ ដោយ ពាក្យថា«យើងខ្ញុំនឹងទៅជាមួយនឹងអ្នកដែរ ពីព្រោះយើងខ្ញុំបានឮថា ព្រះទ្រង់គង់ជាមួយនឹងអ្នករាល់គ្នា»›»។ (សាការី ៨:២៣) អ្នកដែលមនុស្ស១០នាក់នោះកំពុងតែនិយាយទៅកាន់ គឺជាសាសន៍យូដាខាងវិញ្ញាណ ដែលជាអ្នកសំណល់ចាក់ប្រេងតាំង។ ដោយព្រោះលេខ១០អាចតំណាងអ្វីមួយនៅលើផែនដីដែលគ្រប់លក្ខណៈ នោះ«មនុស្ស១០នាក់»នេះតំណាង«មនុស្ស១ហ្វូងយ៉ាងធំ» ដែលត្រូវនាំមកឲ្យរួមជាមួយ«អ៊ីស្រាអែលនៃព្រះ»ឲ្យទៅជា«ហ្វូងតែ១»។ (វិវរណៈ ៧:៩, ១០; កាឡាទី ៦:១៦) គឺជាអ្វីដែលនាំឲ្យមានអំណរយ៉ាងណាទៅហ្ន៎! ពេលដែលយើងឃើញមនុស្សជាច្រើនកំពុងតែរួបរួមគ្នាបំពេញកិច្ចបំរើដ៏បរិសុទ្ធដោយថ្វាយបង្គំព្រះយេហូវ៉ា។
១៨, ១៩. តើមានភស្តុតាងអ្វីដែលបញ្ជាក់ថា ព្រះយេហូវ៉ាកំពុងតែប្រទានពរទៅលើកិច្ចផ្សព្វផ្សាយ?
១៨ យើងមានចិត្តអរជាខ្លាំងដោយព្រោះមានរាប់ម៉ឺនរាប់សែននាក់កំពុងតែក្រសោបយកសេចក្ដីពិតនៅប្រទេសខ្លះដែលធ្លាប់ប្រកាន់យកសាសនាមិនពិតខ្លាំងដល់ម្ល៉េះបានជាមើលទៅដូចជាមនុស្សនឹងមិនព្រមទទួលសេចក្ដីពិតសោះ។ សូមអញ្ជើញមើលសៀវភៅប្រចាំឆ្នាំនៃស្មរបន្ទាល់ព្រះយេហូវ៉ា និងកត់សម្គាល់ប្រទេសណាខ្លះដែលកំពុងតែរាយការណ៍ថា មានអ្នកផ្សាយព្រះរាជាណាចក្ររវាង១០០.០០០រហូតដល់ជិត១.០០០.០០០នាក់។ នេះគឺជាភស្តុតាងដ៏ជាក់លាក់ដែលបញ្ជាក់ថា ព្រះយេហូវ៉ាកំពុងតែប្រទានពរទៅលើកិច្ចផ្សព្វផ្សាយអំពីព្រះរាជាណាចក្រ។—សុភាសិត ១០:២២
១៩ ដោយព្រោះយើងជារាស្ត្ររបស់ព្រះយេហូវ៉ា នោះយើងអរព្រះគុណដល់ព្រះវរបិតានៅស្ថានសួគ៌ ដោយសារយើងមានគោលបំណងពិតមួយក្នុងជីវិត និងដោយសារយើងមានកិច្ចបំរើដែលនាំឲ្យយើងពេញចិត្ត ហើយដោយសារយើងមានសេចក្ដីសង្ឃឹមមួយចំពោះអនាគតដ៏ភ្លឺស្វាង។ យើងកំពុងតែទន្ទឹងចាំទាំងមានចិត្តរំភើបចំពោះការសម្រេចនៃសេចក្ដីសន្យាទាំងប៉ុន្មានរបស់ព្រះ ហើយយើងក៏បានតាំងចិត្ត‹រក្សាខ្លួនក្នុងសេចក្ដីស្រឡាញ់របស់ព្រះ ព្រមទាំងរង់ចាំឲ្យបានជីវិតអស់កល្បជានិច្ចវិញ›។ (យូដាស ២០, ២១) យើងមានអំណរខ្លាំងណាស់ហ្ន៎! ដោយឃើញថា មនុស្ស១ហ្វូងធំដែលកំពុងតែដំកើងសរសើរព្រះនោះ ឥឡូវមានគ្នាប្រមាណ៦.០០០.០០០នាក់។ អ្នកចាក់ប្រេងតាំងរួមទាំងចៀមឯទៀតដែលជាគូកនរបស់គេបានត្រូវរៀបចំជាប្រមាណ៩១.០០០ក្រុមជំនុំនៅក្នុង២៣៥ប្រទេស ទំនងជាដោយសារការទទួលពរពីព្រះយេហូវ៉ា។ យើងទាំងអស់គ្នាបានទទួលនៅម្ហូបអាហារខាងវិញ្ញាណដ៏បរិបូរ ដោយសារការខិតខំមិនចេះនឿយហត់របស់‹អ្នកបំរើស្មោះត្រង់មានវិនិច្ឆ័យល្អ›។ (ម៉ាថាយ ២៤:៤៥)។ អង្គការមួយដែលត្រូវដឹកនាំដោយព្រះព្រមទាំងកំពុងតែរីកចំរើននោះ ហើយដែលមានការត្រួតពិនិត្យដែលប្រកបទៅដោយសេចក្ដីស្រឡាញ់ កំពុងតែចាត់ចែងសកម្មភាពព្រះរាជាណាចក្រតាមរយៈការិយាល័យសាខាជាង១១០របស់ស្មរបន្ទាល់ព្រះយេហូវ៉ា។ យើងមានអំណរគុណចំពោះព្រះយេហូវ៉ាដែលទ្រង់បានជំរុញចិត្តរាស្ត្ររបស់ទ្រង់ឲ្យ‹ថ្វាយកិត្ដិនាមដល់ទ្រង់ ដោយទ្រព្យសម្បត្ដិរបស់គេ›។ (សុភាសិត ៣:៩, ១០) ជាលទ្ធផល កិច្ចផ្សព្វផ្សាយរបស់យើងដែលត្រូវធ្វើឡើងទូទាំងពិភពលោក នោះកំពុងតែបន្តទៅមុខ ដោយកសាងកន្លែងធ្វើការបោះពុម្ព ទីស្នាក់ការសាខាបេតអែលនិងទីស្នាក់ការរបស់ពួកសាសនទូត សាលព្រះរាជាណាចក្រនិងសាលសន្និបាតដែលគឺត្រូវការជាចាំបាច់នោះ។
២០. ពេលយើងគិតអំពីការប្រព្រឹត្តដ៏អស្ចារ្យនិងគួរឲ្យសរសើររបស់ព្រះយេហូវ៉ា តើនេះគួរមានឥទ្ធិពលយ៉ាងណាទៅលើយើង?
២០ យើងគ្មានសមត្ថភាពនោះទេក្នុងការរៀបរាប់អំពីអស់ទាំងកិច្ចការដ៏អស្ចារ្យនិងគួរឲ្យសរសើរដែលព្រះវរបិតារបស់យើងបានប្រព្រឹត្ត។ ក៏ប៉ុន្តែ បើសិនជាមនុស្សម្នាក់មានចិត្តត្រឹមត្រូវនោះ តើគេពិតជាអាចទប់អារម្មណ៍មិនរួមជាមួយបណ្ដាមនុស្សដែលជាអ្នកសរសើរព្រះយេហូវ៉ាបានទេ? ពិតជាទប់អារម្មណ៍មិនបានសោះ! ម្ល៉ោះហើយ ចូរឲ្យអស់អ្នកដែលស្រឡាញ់ព្រះ ស្រែកដោយអរថា៖ «ចូរសរសើរ! ដល់ព្រះយេហូវ៉ា ចូរសរសើរ! ដល់ព្រះយេហូវ៉ាពីលើស្ថានសួគ៌ ចូរសរសើរ! ដល់ទ្រង់នៅអស់ទាំងទីដ៏ខ្ពស់ អស់ទាំងទេវតានៃទ្រង់អើយ! . . . ចូរសរសើរដល់ទ្រង់ចុះ! ទាំងមនុស្សកំឡោះ នឹងស្រីក្រមុំ ទាំងចាស់ទាំងក្មេងអើយ! ត្រូវឲ្យទាំងអស់សរសើរដល់ព្រះនាមព្រះយេហូវ៉ាចុះ! ដ្បិតមានតែព្រះនាមទ្រង់១ដែលខ្ពស់ប្រសើរ សិរីល្អនៃទ្រង់ខ្ពស់ជាងផែនដី នឹងផ្ទៃមេឃទៅទៀត»។ (ទំនុកដំកើង ១៤៨:១, ២, ១២, ១៣) អ៊ីចឹងហើយ ចាប់ពីពេលឥឡូវនេះ ហើយតទៅពេលអស់កល្បទៅមុខទៀត ចូរឲ្យយើងសរសើរព្រះយេហូវ៉ាចំពោះការប្រព្រឹត្តដ៏អស្ចារ្យរបស់ទ្រង់!
តើអ្នកនឹងឆ្លើយយ៉ាងដូចម្ដេច?
• តើអ្វីខ្លះជាការប្រព្រឹត្តដ៏គួរឲ្យសរសើររបស់ព្រះយេហូវ៉ា?
• ហេតុអ្វីបានជាចិត្តរបស់អ្នកត្រូវជំរុញឲ្យសរសើរដល់ព្រះយេហូវ៉ា?
• តើដូចម្ដេចដែលសេចក្ដីសង្ឃឹមរបស់យើងគឺជាប់ទាក់ទងនឹងការប្រព្រឹត្តដ៏អស្ចារ្យរបស់ព្រះ?
• តើដូចម្ដេចដែលព្រះយេហូវ៉ាកំពុងតែប្រព្រឹត្តការដ៏គួរឲ្យសរសើរចំពោះកិច្ចផ្សព្វផ្សាយពីព្រះរាជាណាចក្រ?
[សំណួរសម្រាប់អត្ថបទសិក្សា]
[រូបភាពនៅទំព័រ១៩]
តើអ្នកចូលរួមច្រៀងចំរៀងសរសើរដល់ព្រះយេហូវ៉ាឲ្យអស់អំពីចិត្តឬទេ?