ការឈានទៅមុខឲ្យបានជ័យជំនះផ្ដាច់ព្រាត់!
ការឈានទៅមុខឲ្យបានជ័យជំនះផ្ដាច់ព្រាត់!
«ខ្ញុំក៏ក្រឡេកទៅឃើញសេះស១ ឯអ្នកដែលជិះក៏កាន់ធ្នូ ហើយមានគេឲ្យមកុដដល់អ្នកនោះ រួចអ្នកនោះចេញទៅទាំងមានជ័យជំនះ ហើយឲ្យបានឈ្នះតទៅ»។—វិវរណៈ ៦:២
១. តាមរយៈចក្ខុនិមិត្តនោះ តើយ៉ូហានបានឃើញព្រឹត្ដិការណ៍អ្វីខ្លះ នៅពេលអនាគត?
ដោយបានបណ្ដាលមកពីព្រះ នោះសាវ័កយ៉ូហានអាចឃើញប្រមាណ១.៨០០ឆ្នាំទៅមុខ និងរៀបរាប់អំពីការចាប់ផ្ដើមសោយរាជ្យនៃព្រះគ្រីស្ទជាស្តេច។ យ៉ូហានត្រូវការជំនឿដើម្បីជឿទៅលើអ្វីដែលគាត់បានឃើញក្នុងចក្ខុនិមិត្ត។ សព្វថ្ងៃនេះ យើងមានទីសំអាងយ៉ាងច្បាស់ថា ការទាយអំពីការឡើងសោយរាជ្យនេះ បានកើតឡើងនៅឆ្នាំ១៩១៤។ ដោយភ្នែកចិត្តដែលជឿ នោះយើងឃើញព្រះយេស៊ូគ្រីស្ទកំពុងតែ«ចេញទៅទាំងមានជ័យជំនះ ហើយឲ្យបានឈ្នះតទៅ»ទៀតផង។
២. តើអារក្សបានប្រព្រឹត្តយ៉ាងណាចំពោះកំណើតនៃព្រះរាជាណាចក្រ? ហើយតើនេះជាទីសំអាងអំពីអ្វី?
២ ក្រោយពីកំណើតនៃព្រះរាជាណាចក្រ នោះសាតាំងបានត្រូវបោះទម្លាក់ចេញពីស្ថានសួគ៌ ដែលបានបណ្ដាលឲ្យវាខំប្រឹងតយុទ្ធខ្លាំងឡើងៗទាំងមានកំហឹងកាន់តែខ្លាំងឡើងទៀតផង។ ប៉ុន្តែនេះមិនពង្រីកលទ្ធភាពឲ្យមានជ័យជំនះបានឡើយ។ (វិវរណៈ ១២:៧-១២) កំហឹងរបស់វាបានបណ្ដាលឲ្យស្ថានភាពក្នុងពិភពលោកនេះ ទៅជាមានគ្រោះថ្នាក់កាន់តែខ្លាំងឡើង។ មើលទៅដូចជាសង្គមមនុស្សកំពុងតែបាក់បែកខ្ទេចខ្ទីទៅ។ ចំពោះស្មរបន្ទាល់ព្រះយេហូវ៉ាវិញ នេះជាទីសំអាងយ៉ាងច្បាស់ថា ស្តេចរបស់គេ កំពុងតែខិតទៅមុខ«ឲ្យបានឈ្នះតទៅ»។
សង្គមពិភពលោកថ្មីដែលកំពុងតែកើតមានឡើង
៣, ៤. (ក) តាំងពីកំណើតនៃព្រះរាជាណាចក្រមក តើមានការផ្លាស់ប្ដូររបៀបរៀបចំណាខ្លះ ក្នុងក្រុមជំនុំគ្រីស្ទាន? ហេតុអ្វីបានជាចាំបាច់ធ្វើអ៊ីចឹង? (ខ) ដូចបានទាយទុកមកនៅអេសាយ តើការផ្លាស់ប្ដូរទាំងនេះមានផលប្រយោជន៍យ៉ាងណា?
៣ ក្រោយពីព្រះរាជាណាចក្របានមានកំណើតមក នោះគឺដល់គ្រាដើម្បីនាំក្រុមជំនុំគ្រីស្ទានដែលបានត្រូវស្ដារឡើងវិញ ដែលឥឡូវនេះមានភារកិច្ចច្រើនជាងខាងព្រះរាជាណាចក្រ ឲ្យបានស្របតាមលំនាំក្រុមជំនុំគ្រីស្ទាននៅសតវត្សទីមួយ។ ដូច្នេះហើយ ទស្សនាវដ្ដីប៉មយាម ពីថ្ងៃទី១ និងទី១៥ ខែមិថុនា ឆ្នាំ១៩៣៨ បានធ្វើវិភាគនូវរបៀបដែលអង្គការគ្រីស្ទានគួរមានដំណើរការយ៉ាងណា។ ក្រោយមក ទស្សនាវដ្ដីប៉មយាម ពីថ្ងៃទី១៥ ខែធ្នូ ឆ្នាំ១៩៧១ បានសម្គាល់កាន់តែច្បាស់ឡើងនូវគណៈអភិបាលនាសម័យទំនើបនេះ ក្នុងអត្ថបទដែលមានចំណងជើងថា៖ «របៀបដែលគណៈអភិបាលគឺផ្សេងពីសាជីវកម្មតាមច្បាប់»។ នៅឆ្នាំ១៩៧២ ក្រុមអ្នកចាស់ទុំបានត្រូវតែងតាំងឡើង ដើម្បីផ្ដល់ជំនួយនិងការដឹកនាំសំរាប់ក្រុមជំនុំតាមតំបន់។
៤ ការស្ដារឡើងវិញនូវរបៀបមើលខុសត្រូវដ៏ត្រឹមត្រូវ បានពង្រឹងក្រុមជំនុំគ្រីស្ទាននោះយ៉ាងខ្លាំង។ អ្វីទៀតដែលបានជួយធ្វើដូច្នេះ គឺសំវិធានការដែលគណៈអភិបាលបានរៀបចំ ដើម្បីបង្ហាត់បង្រៀនពួកអ្នកចាស់ទុំស្តីអំពីភារកិច្ចរបស់គេ ដែលរួមបញ្ចូលការអប់រំពួកអ្នកចាស់ទុំអំពីរឿងខាងការវិនិច្ឆ័យ។ ការរីកចំរើនជាបណ្ដើរៗ ដែលទាក់ទងនឹងរបៀបរៀបចំខាងអង្គការរបស់ព្រះលើផែនដីនេះ និងលទ្ធផលដ៏ល្អនោះ បានត្រូវទាយប្រាប់ជាមុននៅអេសាយ ៦០:១៧ ដែលថា៖ «អញនឹងនាំមាសមកឲ្យជំនួសលង្ហិន ប្រាក់ជំនួសដែក លង្ហិនឲ្យជំនួសឈើ ហើយដែកឲ្យជំនួសថ្មផង អញនឹងយកសេចក្ដីសុខធ្វើជារដ្ឋបាលឯង ហើយឲ្យសេចក្ដីសុចរិតជាអ្នកគ្រប់គ្រងលើឯងផង»។ ការផ្លាស់ប្ដូរដ៏វិជ្ជមានទាំងនេះ បានបង្ហាញឲ្យឃើញនូវប្រសិទ្ធិពរពីព្រះ និងជាទីសំអាងថា ព្រះទ្រង់យល់ព្រមនឹងអស់អ្នកដែលបានគាំទ្រយ៉ាងខ្នះខ្នែងចំពោះព្រះរាជាណាចក្ររបស់ទ្រង់។
៥. (ក) តើសាតាំងមានប្រតិកម្មយ៉ាងណា នឹងប្រសិទ្ធិពររបស់ព្រះយេហូវ៉ាចំពោះរាស្ត្រទ្រង់នោះ? (ខ) សមស្របនឹងភីលីព ១:៧ តើរាស្ត្ររបស់ព្រះយេហូវ៉ាប្រព្រឹត្តយ៉ាងណាដើម្បីជំទាស់នឹងកំហឹងរបស់សាតាំង?
៥ សាតាំងបានកត់សម្គាល់នូវការយកចិត្តទុកដាក់និងការណែនាំ ដែលប្រកបដោយសេចក្ដីស្រឡាញ់របស់ព្រះចំពោះរាស្ត្រទ្រង់ ក្រោយពីកំណើតនៃព្រះរាជាណាចក្រ។ ជាឧទាហរណ៍ នៅឆ្នាំ១៩៣១ក្រុមគ្រីស្ទានតូចនេះបានបង្ហាញជាសាធារណៈថា គេមិនគ្រាន់តែជាសិស្សព្រះគម្ពីរប៉ុណ្ណោះទេ។ ស្របទៅតាមអេសាយ ៤៣:១០ នោះពួកគេជាស្មរបន្ទាល់ព្រះយេហូវ៉ា! មិនថាដោយចៃដន្យឬក៏អត់ នោះអារក្សបាននាំឲ្យមានការបៀតបៀនយ៉ាងខ្លាំងទូទាំងផែនដី ដែលពុំធ្លាប់មានពីមុនមកឡើយ។ សូម្បីតែនៅក្នុងប្រទេសដែលគេនិយមទទួលស្គាល់ជាប្រទេសមានសេរីភាពខាងសាសនា ដូចជាសហរដ្ឋអាមេរិក ប្រទេសកាណាដា និងប្រទេសអាល្លឺម៉ង់ នោះម្ដងហើយម្ដងទៀត ស្មរបន្ទាល់បានត្រូវបង្ខំឲ្យតយុទ្ធខាងច្បាប់ ដើម្បីរក្សាទុកនូវសេរីភាពរបស់គេខាងការថ្វាយបង្គំ។ មកដល់ឆ្នាំ១៩៨៨ នោះតុលាការកំពូលនៅសហរដ្ឋអាមេរិក បានសើរើ៧១ករណីឡើងវិញ ដែលទាក់ទងនឹងស្មរបន្ទាល់ព្រះយេហូវ៉ា ហើយគេបានឈ្នះពីរភាគបីនៃករណីទាំងនោះ។ សព្វថ្ងៃនេះ ទូទាំងពិភពលោក គឺមានការតយុទ្ធខាងច្បាប់ ដើម្បី«ការពារហើយស្ថាបនាដំណឹងល្អតាមច្បាប់»ដូចនៅក្នុងសតវត្សទីមួយដែរ។—ភីលីព ១:៧, ព.ថ.
៦. តើបម្រាមនិងល័ក្ខខ័ណ្ឌផ្សេងៗបង្ការរាស្ត្ររបស់ព្រះយេហូវ៉ា ពីការមានដំណើរទៅមុខឬទេ? សូមពន្យល់ជាឧទាហរណ៍។
៦ ក្នុងកំឡុងទសវត្សពីឆ្នាំ១៩៣០ ក្នុងពេលដែលនាំមុខសង្គ្រាមលោកលើកទី២ នោះរដ្ឋាភិបាលដែលប្រើអំណាចផ្ដាច់ការ បានដាក់បម្រាមឬល័ក្ខខ័ណ្ឌផ្សេងៗលើកិច្ចការរបស់ស្មរបន្ទាល់ព្រះយេហូវ៉ានៅប្រទេសអាល្លឺម៉ង់ ប្រទេសអេស្ប៉ាញ និងប្រទេសជប៉ុន។ នេះគឺគ្រាន់តែប្រាប់ឈ្មោះបីប្រទេសប៉ុណ្ណោះ។ ក៏ប៉ុន្តែនៅឆ្នាំ២០០០ គ្រាន់តែបីប្រទេសនេះប៉ុណ្ណោះ មានអ្នកផ្សាយយ៉ាងសកម្មអំពីសារព្រះរាជាណាចក្ររបស់ព្រះ ជិត៥០០.០០០នាក់។ ចំនួននេះគឺសឹងតែច្រើនជាងដប់ដង ចំនួនស្មរបន្ទាល់ព្រះយេហូវ៉ាពេញពិភពលោកក្នុងឆ្នាំ១៩៣៦! យ៉ាងច្បាស់ណាស់ បម្រាមនិងល័ក្ខខ័ណ្ឌផ្សេងៗមិនអាចបង្ការរាស្ត្ររបស់ព្រះយេហូវ៉ា ពីការមានដំណើរទៅមុខក្រោមការដឹកនាំនៃព្រះយេស៊ូគ្រីស្ទ ដែលជាមេដឹកនាំដ៏មានជ័យជំនះនោះឡើយ។
៧. តើមានព្រឹត្ដិការណ៍អ្វីដ៏អស្ចារ្យ នៅឆ្នាំ១៩៥៨? ហើយតើមានការផ្លាស់ប្ដូរយ៉ាងណាដ៏អស្ចារ្យ តាំងពីពេលនោះមក?
៧ មានការសម្ដែងនូវដំណើរទៅមុខមែន នៅឆ្នាំ១៩៥៨ នៅទីក្រុងញូវយ៉ក ពេលដែលមានមហាសន្និបាតដ៏ធំបំផុត ដែលស្មរបន្ទាល់ព្រះយេហូវ៉ាធ្លាប់មាន គឺមហាសន្និបាតអន្តរជាតិ ដែលមានចំណងជើងថា៖ ព្រះហឫទ័យរបស់ព្រះ ហើយមាន២៥៣.៩២២នាក់ ជាចំនួនអ្នកចូលរួមច្រើនបំផុត។ មកដល់ឆ្នាំ១៩៧០នោះ កិច្ចការរបស់គេមានសេរីភាពហើយ នៅប្រទេសទាំងបីនោះដែលបានត្រូវរៀបរាប់ខាងលើនេះ លើកលែងតែប្រទេសដែលពេលនោះបានហៅថា ប្រទេសអាល្លឺម៉ង់ខាងកើត។ ប៉ុន្តែស្មរបន្ទាល់គឺនៅក្រោមបម្រាមក្នុងសហព័ន្ធសូវៀត និងប្រទេសដែលជាសម្ព័ន្ធមិត្តដែលមានក្នុងកតិកាសញ្ញាក្រុងវ៉ាសូវី។ សព្វថ្ងៃនេះ នៅក្នុងអតីតប្រទេសសង្គមនិយមទាំងនេះ គឺមានស្មរបន្ទាល់ដ៏សកម្មជាងប្រាំសែននាក់។
៨. តើអ្វីជាលទ្ធផលនៃពរពីព្រះយេហូវ៉ាលើរាស្ត្រទ្រង់? ហើយតើទស្សនាវដ្ដីប៉មយាម នៅឆ្នាំ១៩៥០ បានចែងយ៉ាងណាអំពីរឿងនេះ?
៨ ស្មរបន្ទាល់ព្រះយេហូវ៉ាបានទទួលពរជាការរីកចំរើននេះ ពីព្រោះគេបានបន្ត«ស្វែងរកនគរ នឹងសេចក្ដីសុចរិតនៃព្រះជាមុនសិន»។ (ម៉ាថាយ ៦:៣៣) ទំនាយរបស់អេសាយបានត្រូវសម្រេចមែនទែនទៅហើយ ដែលថា៖ «អ្នកតូចបំផុតនឹងត្រឡប់ជាមនុស្ស១ពាន់ ហើយពួកមានគ្នាតិច នឹងត្រឡប់ទៅជាសាសន៍១យ៉ាងពូកែ។ អញនេះគឺព្រះយេហូវ៉ា អញនឹងបញ្ជឿនឲ្យការនេះឆាប់កើតឡើងនៅពេលកំណត់»។ (អេសាយ ៦០:២២) ហើយទីបញ្ចប់មិនទាន់មកដល់ទេ។ គ្រាន់តែក្នុងកំឡុងមួយទសវត្សកន្លងទៅនេះ ចំនួនអ្នកគាំទ្រយ៉ាងសកម្មនូវការគ្រប់គ្រងនៃព្រះរាជាណាចក្រ នោះបានកើនបន្ថែមជាង១.៧៥០.០០០នាក់ថែមទៀត។ ពួកនេះបានស្ម័គ្រចិត្តចូលរួមនឹងក្រុមមួយ ដែលទស្សនាវដ្ដីប៉មយាម នៅឆ្នាំ១៩៥០ បានធ្វើការសង្កេតនេះថា៖ «ឥឡូវ ព្រះកំពុងតែបង្កើតសង្គមពិភពលោកថ្មី។ . . . ពួកគេជាស្នូលដែលនឹងឆ្លងកាត់អើម៉ាគេដូន . . . ជាអ្នកដំបូងបង្អស់នៅឯ‹ផែនដីថ្មី› . . . ដែលបានរៀបចំតាមព្រះធិបតេយ្យ ទាំងដឹងអំពីទម្រង់ការខាងអង្គការ»។ អត្ថបទនេះបានបញ្ចប់ដោយថា៖ «ដូច្នេះ ចូរយើងរាល់គ្នាបន្តទៅមុខបន្ដិចម្ដងៗ ជាសង្គមនៃពិភពលោកថ្មី!»។
៩. តើរបស់ដែលស្មរបន្ទាល់ព្រះយេហូវ៉ាបានរៀនដឹងជាច្រើនឆ្នាំមកនេះ បាននាំឲ្យមានប្រយោជន៍ណាខ្លះ?
៩ តាមដំណើរទៅមុខនេះ សង្គមនៃពិភពលោកថ្មីដែលមានចំនួនកាន់តែច្រើនឡើង បានទទួលចំណេះចេះដឹង ដែលសឲ្យឃើញថាមានតម្លៃណាស់សព្វថ្ងៃនេះ ហើយប្រហែលជានឹងមានតម្លៃទៀតក្នុងកំឡុងពេលក្រោយពីអើម៉ាគេដូន ក្នុងកិច្ចការស្ដារឡើងវិញ។ ជាឧទាហរណ៍ ស្មរបន្ទាល់បានរៀនចេះចាត់ចែងមហាសន្និបាតដ៏ធំៗ ក៏ចេះផ្ដល់ជំនួយយ៉ាងឆាប់រហ័សពេលមានគ្រាអាសន្ន និងចេះសាងសង់អាគារយ៉ាងលឿនដែរ។ សកម្មភាពទាំងនេះបានបណ្ដាលឲ្យមនុស្សជាច្រើនសរសើរ និងគោរពដល់ស្មរបន្ទាល់ព្រះយេហូវ៉ា។
ការកែតម្រូវនូវការយល់ខុស
១០, ១១. សូមពន្យល់ដោយឧទាហរណ៍នូវរបៀបដែលការយល់ខុសអំពីស្មរបន្ទាល់ព្រះយេហូវ៉ា បានត្រូវកែតម្រូវវិញ។
១០ ក៏ប៉ុន្តែ គឺនៅមានមនុស្សដែលចោទថា ស្មរបន្ទាល់ព្រះយេហូវ៉ាឥតទាន់សម័យនឹងសង្គមមនុស្សលោកទេ។ នេះច្រើនតែដោយព្រោះជំហររបស់ស្មរបន្ទាល់ ដែលមានមូលដ្ឋានលើព្រះគម្ពីរ ស្តីអំពីរឿងដូចជាការបញ្ចូលឈាម អព្យាក្រឹតភាព ការជក់បារី និងសីលធម៌។ ក៏ប៉ុន្តែ មនុស្សកំពុងតែសារភាពកាន់តែច្រើនឡើងថា ទស្សនៈរបស់ស្មរបន្ទាល់គឺសមនឹងយកមកពិនិត្យមើលមែន។ ជាឧទាហរណ៍ គ្រូពេទ្យម្នាក់នៅប្រទេសប៉ូឡូញ បានទូរស័ព្ទទៅរកការិយាល័យដែលចាត់ចែងការរបស់ស្មរបន្ទាល់ព្រះយេហូវ៉ា និងបានមានប្រសាសន៍ថា លោកស្រីនិងសហការីរបស់គាត់នៅឯមន្ទីរពេទ្យ បានពិគ្រោះអំពីការបញ្ចូលឈាមអស់រយៈពេលបីបួនម៉ោងហើយ។ ការពិគ្រោះនេះបានបណ្ដាលមកដោយអត្ថបទមួយ ដែលនៅថ្ងៃនោះឯងមានក្នុងកាសែតប្រចាំថ្ងៃឈ្មោះ ចាន់នីក ហ្សាហុដនី។ គ្រូពេទ្យនេះបានសារភាពថា៖ «ចំពោះខ្ញុំផ្ទាល់ ខ្ញុំស្ដាយមែនដែលវិស័យខាងពេទ្យបានប្រើឈាមហួសហេតុពេក។ គឺត្រូវតែផ្លាស់ប្ដូរការធ្វើបែបនេះ ហើយខ្ញុំមានចិត្តសប្បាយដែលមានអ្នកណាម្នាក់បានលើកប្រធាននេះឡើង។ ខ្ញុំសូមពត៌មានថែមទៀត»។
១១ ក្នុងកំឡុងសន្និសីទដែលមាននៅឆ្នាំមុននេះ នោះអាជ្ញាធរខាងពេទ្យពីប្រទេសកាណាដា ទ្វីបអឺរ៉ុប ប្រទេសអ៊ីស្រាអែលនិងសហរដ្ឋអាមេរិក បានពិគ្រោះពត៌មានដែលត្រូវជួយឲ្យគ្រូពេទ្យព្យាបាលអ្នកជម្ងឺដោយឥតប្រើឈាម។ នៅឯប្រជុំនោះនៅប្រទេសស្វីស គេបានចង្អុលប្រាប់ថា ផ្ទុយនឹងមតិទូទៅ នោះអាត្រានៃអ្នកជម្ងឺដែលបានត្រូវគេចាក់បញ្ចូលឈាមហើយនៅតែស្លាប់ គឺមានចំនួនច្រើនជាងអ្នកជម្ងឺដែលឥតបានទទួលឈាមទៅវិញ។ ជាធម្មតា អ្នកជម្ងឺដែលជាស្មរបន្ទាល់ អាចចេញពីមន្ទីរពេទ្យលឿនជាងអស់អ្នកដែលបានត្រូវព្យាបាលដោយប្រើឈាម ហើយជាលទ្ធផលនោះ ក៏បន្ថយនូវតម្លៃនៃការព្យាបាលដែរ។
១២. សូមឲ្យឧទាហរណ៍មួយពីអ្នកធំដុំសរសើរជំហររបស់ស្មរបន្ទាល់ព្រះយេហូវ៉ា ស្តីអំពីអព្យាក្រឹតភាពខាងនយោបាយ។
១២ គេបាននិយាយយ៉ាងល្អៗអំពីស្មរបន្ទាល់ព្រះយេហូវ៉ា ចំពោះជំហរជាអព្យាក្រឹតរបស់គេ នៅពីមុននិងក្រោយសង្គ្រាមលោកលើកទី២ កាលដែលពួកគេបានទទួលការវាយប្រហារយ៉ាងសាហាវពីរបបណាត្ស៊ី។ កាសែតវីដេអូ ស្មរបន្ទាល់ព្រះយេហូវ៉ាកាន់ជំហរមាំមួននឹងការប្រយុទ្ធពីរបបណាត្ស៊ី ដែលត្រូវបានផលិតដោយស្មរបន្ទាល់ព្រះយេហូវ៉ា និងបានបញ្ចាំងលើកដំបូងនៅឯជំរំឃុំឃាំងឈ្មោះរ៉ាវិនប្រុក នៅប្រទេសអាល្លឺម៉ង់ នាថ្ងៃទី៦ ខែវិច្ឆិកា ឆ្នាំ១៩៩៦ បាននាំឲ្យគេបញ្ជាក់ទស្សនៈដ៏ល្អជាច្រើន។ នៅឯការបញ្ចាំងជាលើកដំបូងស្រដៀងគ្នានេះដែរ នៅជំរំឃុំឃាំងដ៏ល្បីមួយ ឈ្មោះ ប៊ែហ្កិន-ប៊ែលសិន នៅថ្ងៃទី១៨ ខែមេសា ឆ្នាំ១៩៩៨ នោះលោកបណ្ឌិតឈ្មោះ ហ្វូល្វហ្កាងហ្ស៊ីល ដែលជានាយកនៃមណ្ឌលការអប់រំខាងនយោបាយនៅខេត្តឡូវើសាក្សូនី បានសារភាពថា៖ «ហេតុការណ៍មួយដ៏គួរឲ្យអាម៉ាស់មុខក្នុងប្រវត្ដិសាស្ត្រ គឺថាស្មរបន្ទាល់ព្រះយេហូវ៉ាបានបដិសេធចោលសង្គមនិយមជាតិ ដោយមានការប្ដេជ្ញាជាងសាសនាគ្រីស្ទានឯទៀត។ . . . ទោះជាយើងមានអារម្មណ៍យ៉ាងណាក៏ដោយ អំពីការបង្រៀននិងចិត្តខ្នះខ្នែងកាន់សាសនារបស់ស្មរបន្ទាល់ព្រះយេហូវ៉ា នោះភាពមុតមាំរបស់គេក្នុងកំឡុងរបបណាត្ស៊ី តម្រូវឲ្យគេទទួលការគោរព»។
១៣, ១៤. (ក) តើមានវិនិច្ឆ័យកិច្ចអ្វីប្រយោជន៍ឲ្យពួកគ្រីស្ទានសម័យដើមនោះ? និងតើមកពីប្រភពណាដែលគេមិនគិតស្មានជាមុនបានទេនោះ? (ខ) សូមឲ្យឧទាហរណ៍ខ្លះៗ ពីសំដីដ៏ល្អៗ ដែលគាំទ្រខាងរាស្ត្ររបស់ព្រះសព្វថ្ងៃនេះ។
១៣ នៅពេលដែលអ្នកដ៏ធំដុំ ឬសេចក្ដីសម្រេចពីតុលាការ ចេញមុខគាំទ្រស្មរបន្ទាល់ព្រះយេហូវ៉ាខាងរឿងដែលអាចឲ្យមានវាទប្បដិវាទ នេះអាចបំបាត់នូវបុរេនិច្ឆ័យ និងធ្វើឲ្យគេមានទស្សនៈអំពីពួកស្មរបន្ទាល់តាមសភាពដ៏វិជ្ជមានជាង។ នេះច្រើនតែបើកផ្លូវឲ្យគេនិយាយជាមួយមនុស្ស ដែលពីមុនមិនសុខចិត្តស្ដាប់ឡើយ។ ដូច្នេះសេចក្ដីសម្រេចបែបនេះគឺស្វាគមន៍ជានិច្ច ហើយស្មរបន្ទាល់ព្រះយេហូវ៉ាពិតជាអបអរនឹងសេចក្ដីសម្រេចអ៊ីចឹងមែន។ នេះរំឭកយើងអំពីអ្វីដែលបានកើតឡើងនៅសតវត្សទីមួយក្នុងទីក្រុងយេរូសាឡិម។ នៅពេលដែលតុលាការជាន់ខ្ពស់នៃសាសន៍យូដា ចង់កំទេចចោលពួកគ្រីស្ទានដោយសារការផ្សព្វផ្សាយដ៏ខ្នះខ្នែងរបស់គេ នោះលោកកាម៉ាលាល«ជាអ្នកប្រាជ្ញច្បាប់ ដែលមនុស្សទាំងអស់រាប់អាន» បានព្រមានដោយនិយាយថា៖ «ពួកសាសន៍អ៊ីស្រាអែលអើយ! ចូរប្រយ័តខ្លួន ពីដំណើរមនុស្សទាំងនេះ ដែលអ្នករាល់គ្នាគិតធ្វើអ្វីដល់គេ។ . . . ចូរដកខ្លួនពីមនុស្សទាំងនេះចេញ កុំឲ្យធ្វើអ្វីដល់គេឡើយ ដ្បិតបើសិនជាគំនិតគេ ឬការគេធ្វើនេះ កើតឡើងពីមនុស្ស នោះនឹងត្រូវវិនាសទៅជាមិនខាន តែបើកើតមកពីព្រះវិញ នោះអ្នករាល់គ្នាពុំអាចនឹងធ្វើឲ្យវិនាសបានទេ ក្រែងអ្នករាល់គ្នាជាប់ទោសជាពួកអ្នកតយុទ្ធនឹងព្រះដែរ»។—កិច្ចការ ៥:៣៣-៣៩
១៤ ដូចលោកកាម៉ាលាលដែរ នោះនៅពេលថ្មីៗនេះ ពួកអ្នកធំដុំបានគាំទ្រសេរីភាពខាងសាសនាសំរាប់ស្មរបន្ទាល់ព្រះយេហូវ៉ា។ ជាឧទាហរណ៍ អតីតប្រធាននៃបណ្ឌិតសភាអន្តរជាតិសំរាប់សេរីភាពនិងជំនឿខាងសាសនា បានវែកញែកថា៖ «គេមិនគួរបិទសិទ្ធិខាងសាសនានៃសាសនាមួយ ដោយព្រោះតែសង្គមបានចាត់ទុកជំនឿស៊ប់នៃសាសនានោះ ជាអ្វីដែលមិនគួរយល់ព្រម ឬក៏មិនធម្មតានោះទេ»។ ហើយសាស្ដ្រាចារ្យម្នាក់ខាងការសិក្សាវិទ្យាសាស្ត្រខាងសាសនា នៅឯមហាវិទ្យាល័យនៅទីក្រុងឡែពត្សិក បានសួរសំនួរដ៏សំខាន់មួយ ស្តីអំពីគណៈកម្មការរដ្ឋអាល្លឺម៉ង់ ដែលបានរៀបចំឡើងដើម្បីស៊ើបអង្កេតនិកាយសាសនា ដោយសួរថា៖ «ហេតុអ្វីបានជាគ្រាន់តែពិនិត្យពិច័យសាសនាដែលមានចំនួនភាគតិចទៅវិញ តែមិនពិនិត្យពិច័យសាសនាដ៏ធំៗទាំងពីរគឺ[សាសនាកាតូលិកនិងសាសនាលូហ្សឺរ៉ុង?»។ ចំពោះចម្លើយនេះយើងមិនចាំបាច់ទៅរកនៅឆ្ងាយ ជាងពាក្យនៃអតីតអ្នករាជការជាតិអាល្លឺម៉ង់ ដែលបានសរសេរថា៖ «គ្មានការសង្ស័យទេ ថាអ្នកប្រកាន់ហួសហេតុខាងសាសនានោះ ជាអ្នកបញ្ជាដោយសំងាត់ ឲ្យគណៈកម្មការរដ្ឋយកដំណើរយ៉ាងណាខាងនយោបាយវិញ»។
តើយើងរកជំនួយពីអ្នកណា?
១៥, ១៦. (ក) ហេតុដូចម្ដេចបានជាអ្វីដែលលោកកាម៉ាលាលបានធ្វើនោះ មានប្រសិទ្ធិភាពតែបន្ដិចបន្តួចដូច្នេះ? (ខ) តើដោយដូចម្ដេចដែលបុគ្គលធំដុំបីនាក់ទៀតនោះ មានកំរិតក្នុងអ្វីដែលគេអាចធ្វើដើម្បីគាំទ្រព្រះយេស៊ូ?
១៥ អ្វីដែលលោកកាម៉ាលាលបាននិយាយដូច្នេះ គ្រាន់តែដៅបញ្ជាក់ហេតុការណ៍ពិតដែលថា កិច្ចការដែលព្រះគាំទ្រនោះ គឺមិនអាចទទួលបរាជ័យបានឡើយ។ ពួកគ្រីស្ទានសម័យដើមប្រាកដជាបានទទួលប្រយោជន៍ ពីពាក្យសំដីរបស់លោកជូនចំពោះតុលាការជាន់ខ្ពស់នៃសាសន៍យូដា ប៉ុន្តែ ពួកគេមិនបានភ្លេចថា ពាក្យបន្ទូលរបស់ព្រះយេស៊ូដែលថា អ្នកកាន់តាមទ្រង់នឹងត្រូវគេបៀតបៀន នោះពិតដែរ។ អ្វីដែលលោកកាម៉ាលាលបានធ្វើនោះ បានបញ្ឈប់គម្រោងការរបស់ពួកមេដឹកនាំសាសនា ដែលចង់កំទេចគេចោល តែនេះមិនបានបំបាត់ចោលការបៀតបៀនទាំងស្រុងនោះទេ ដ្បិតយើងដឹងថា៖ «ពួកក្រុមជំនុំក៏យល់ព្រមតាមគំនិតលោក រួចកាលបានហៅពួកសាវកមកវិញ នោះក៏វាយនឹងរំពាត់ ព្រមទាំងហាមឃាត់មិនឲ្យនិយាយពីព្រះនាមព្រះយេស៊ូវទៀត រួចលែងឲ្យទៅ»។—កិច្ចការ ៥:៤០
១៦ នៅពេលដែលគេកាត់ក្ដីព្រះយេស៊ូ នោះលោកប៉ុនទាសពីឡាត់ មិនអាចរកកំហុសឃើញទេ ហើយបានខំរកវិធីដោះលែងព្រះយេស៊ូចេញទៅ។ ប៉ុន្តែ លោកឥតបានជោគជ័យទេ។ (យ៉ូហាន ១៨:៣៨, ៣៩; ១៩:៤, ៦, ១២-១៦) សូម្បីតែសមាជិកពីរនាក់ពីតុលាការជាន់ខ្ពស់នៃសាសន៍យូដា ឈ្មោះនីកូដេមនិងយ៉ូសែបពីស្រុកអើរីម៉ាថេ ដែលបានគាំទ្រខាងព្រះយេស៊ូដែរ គឺមានកំរិតខាងអ្វីដែលគេអាចធ្វើ ដើម្បីបង្ការតុលាការនេះពីការប្រឆាំងព្រះយេស៊ូដែរ។ (លូកា ២៣:៥០-៥២; យ៉ូហាន ៧:៤៥-៥២; ១៩:៣៨-៤០) កាលដែលមនុស្សគាំទ្រខាងរាស្ត្ររបស់ព្រះយេហូវ៉ា ទោះជាមានបំណងអ្វីក៏ដោយ នោះការធូរស្បើយណាដែលគេនាំឲ្យមាន គឺមានកំរិត។ មនុស្សក្នុងលោកីយ៍នេះនឹងបន្តមានចិត្តស្អប់ពួកអ្នកកាន់តាមព្រះគ្រីស្ទ ដូចគេបានស្អប់ទ្រង់ដែរ។ មានតែព្រះយេហូវ៉ាទេ ដែលអាចផ្ដល់ឲ្យមានការធូរស្បើយយ៉ាងពេញលេញនោះ។—កិច្ចការ ២:២៤
១៧. តើស្មរបន្ទាល់ព្រះយេហូវ៉ាមានទស្សនៈដ៏សមហេតុផលណា? ប៉ុន្តែ ហេតុអ្វីបានជាពួកគេមិនអាក់អន់ចិត្តក្នុងការបន្តផ្សព្វផ្សាយដំណឹងល្អនោះ?
១៧ ដោយមានទស្សនៈដ៏សមហេតុផល ស្មរបន្ទាល់ព្រះយេហូវ៉ាដឹងថានឹងមានការបៀតបៀនតទៅមុខទៀត។ នៅពេលដែលរបបសាតាំងបានទទួលបរាជ័យផ្ដាច់ព្រាត់ នោះទើបនឹងលែងមានការប្រឆាំងទៀតហើយ។ ក៏ប៉ុន្តែ ការបៀតបៀននេះ ទោះជាមិនមែនគាប់ចិត្តក៏ដោយ ក៏មិនដែលបណ្ដាលឲ្យស្មរបន្ទាល់ឈប់បំពេញនូវមុខងាររបស់គេ ដែលជាកិច្ចការផ្សព្វផ្សាយដំណឹងល្អនោះទេ។ គ្មានហេតុឲ្យគេឈប់បានឡើយ ដ្បិតពួកគេមានព្រះគាំទ្រ។ ពួកគេបែរទៅរកព្រះយេស៊ូគ្រីស្ទ ដែលជាមេដឹកនាំដ៏ក្លាហានរបស់គេ ទុកជាគំរូដ៏ត្រឹមត្រូវវិញ។—កិច្ចការ ៥:១៧-២១, ២៧-៣២
១៨. តើរាស្ត្ររបស់ព្រះយេហូវ៉ានឹងនៅមានការពិបាកអ្វីនៅពេលខាងមុខ? ប៉ុន្តែ តើពួកគេជឿស៊ប់យ៉ាងណាអំពីលទ្ធផលនោះ?
១៨ តាំងពីដើមរៀងមក នោះសាសនាពិតបានប្រឈមមុខនឹងការប្រឆាំងយ៉ាងខ្លាំង។ បន្ដិចទៀត កុកដែលជាសាតាំងក្នុងសភាពដ៏ថោកទាបរបស់វា តាំងពីបានត្រូវបោះទម្លាក់ពីស្ថានសួគ៌ចេញ នោះនឹងប្រឆាំងវាយលុកពេញទីនឹងសាសនាពិត។ ក៏ប៉ុន្តែ សាសនាពិតនឹងនៅគង់វង្ស។ (អេសេគាល ៣៨:១៤-១៦) រួចមក ក្រោមការដឹកនាំរបស់សាតាំង នោះ«អស់ទាំងស្តេច នៅផែនដីទាំងមូល» «នឹងច្បាំងទាស់នឹងកូនចៀម តែកូនចៀមនឹងឈ្នះគេ ពីព្រោះទ្រង់ជាព្រះអម្ចាស់លើអស់ទាំងព្រះអម្ចាស់ ហើយជាស្តេចលើអស់ទាំងស្តេច»។ (វិវរណៈ ១៦:១៤; ១៧:១៤) ត្រូវហើយ ស្តេចរបស់យើងកំពុងតែយាងទៅមុខ ដើម្បីទទួលជ័យជំនះផ្ដាច់ព្រាត់ ហើយមិនយូរប៉ុន្មានទៀតនឹង«បានឈ្នះតទៅ»។ ការធ្វើដំណើរទៅមុខជាមួយទ្រង់ពិតជាឯកសិទ្ធិដ៏ល្អមែន ដោយដឹងថា មិនយូរប៉ុន្មានទៀត គ្មានអ្នកណានឹងនិយាយប្រឆាំងនឹងពួកអ្នកថ្វាយបង្គំព្រះយេហូវ៉ាទៀតឡើយ ពេលដែលគេនិយាយថា៖ «ព្រះកាន់ខាងយើង!»។—រ៉ូម ៨:៣១; ភីលីព ១:២៧, ២៨
តើអ្នកអាចពន្យល់បានទេ?
• តើព្រះយេហូវ៉ាបានធ្វើអ្វីដើម្បីពង្រឹងក្រុមជំនុំគ្រីស្ទាន តាំងពីកំណើតនៃព្រះរាជាណាចក្រ?
• តើសាតាំងបានធ្វើអ្វីដើម្បីខំប្រឹងបញ្ឈប់ព្រះគ្រីស្ទពីការឈ្នះតទៅ ហើយមានលទ្ធផលយ៉ាងណា?
• តើយើងគួរមានទស្សនៈដ៏ថ្លឹងថ្លែងយ៉ាងណា អំពីការប្រព្រឹត្តដ៏ល្អពីពួកដែលមិនមែនជាស្មរបន្ទាល់នោះ?
• បន្ដិចទៀតនេះ តើសាតាំងនឹងធ្វើអ្វី? ហើយតើនឹងមានលទ្ធផលយ៉ាងណា?
[សំណួរសម្រាប់អត្ថបទសិក្សា]
[រូបភាពនៅទំព័រ១៦]
មហាសន្និបាតនានាជាការសម្ដែងនូវដំណើរទៅមុខនៃរាស្ត្ររបស់ព្រះយេហូវ៉ា
[រូបភាពនៅទំព័រ១៨]
អព្យាក្រឹតភាពរបស់ពួកស្មរបន្ទាល់ក្នុងកំឡុងពេលសង្គ្រាមលោកលើកទី២ គឺនៅតែនាំឲ្យមានការសរសើរថ្វាយព្រះយេហូវ៉ា