តើការសិក្សាព្រះគម្ពីរមានប្រយោជន៍សំរាប់លោកអ្នកទេ?
តើការសិក្សាព្រះគម្ពីរមានប្រយោជន៍សំរាប់លោកអ្នកទេ?
«កុំអាន! បើបព្វជិតគ្មានវត្តមានទេ»។ មានការព្រមាននេះនៅទំព័រមុខព្រះគម្ពីរខ្លះរបស់អ្នកកាន់សាសនាកាតូលិក។ លោកស្រីខេ មើឌី ពីស្ថាប័នព្រះគម្ពីរខាងពួកកាតូលិក នៅទីក្រុងឡូសានចេលីស មានប្រសាសន៍ថា៖ «ពីដំបូងនោះ គេបានបិទបាំងកុំឲ្យយើងជាអ្នកកាន់សាសនាកាតូលិកមើលព្រះគម្ពីរ។ តែស្ថានការណ៍នេះកំពុងតែប្រែប្រួលវិញ»។ គាត់កត់សម្គាល់ថា នៅពេលដែលពួកកាតូលិកទទួលស្គាល់ថា បទគម្ពីរបរិសុទ្ធអាចមានអានុភាពយ៉ាងណាទៅលើជីវិតគេ នោះ«គេនឹងបណ្ដុះបណ្ដាលឲ្យខ្លួនចេះឃ្លាននិងស្រេកចង់បានព្រះគម្ពីរ»។
ស្តីអំពីការប្រែប្រួលនេះ ទស្សនាវដ្ដីសាសនាកាតូលិក ស.រ.អ. ស្រង់ពាក្យរបស់អ្នកចាត់ចែងម្នាក់ ខាងការអប់រំផ្នែកសាសនា ដែលបាននិយាយថា ពួកកាតូលិកដែលចូលរួមកម្មវិធីសិក្សាព្រះគម្ពីរ នោះមានអារម្មណ៍ថា «ខ្លួនដែលជាអ្នកកាន់សាសនាកាតូលិក បានខកខានទទួលប្រយោជន៍ហើយ ព្រោះថា ព្រះគម្ពីរជ្រៅជ្រះពេក។ គេក៏ចង់ទទួលរបស់វិសេសវិសាលខ្លះនោះ ដែលជាអ្វីដែលគេគិតថា ខ្លួនបានខានទទួលហើយ»។
ទោះជាយ៉ាងណាក៏ដោយ តើនិស្សិតព្រះគម្ពីរអាចស្វែងរកភាព«ជ្រៅជ្រះ»ណាខ្លះ? សូមពិចារណាមើល: តើលោកអ្នកចង់ចេះប្រឈមដោះស្រាយនឹងកង្វល់នានា ដែលជាអ្វីដ៏ធម្មតាក្នុងជីវិតយើងឬទេ? តើដោយរបៀបណាដែលអ្នកអាចរក្សាឲ្យមានសន្ដិសុខក្នុងក្រុមគ្រួសារ? ហេតុអ្វីបានជាមនុស្សច្រើនម្ល៉េះ មានមារយាទដ៏ទ្រគោះ និងប្រឆាំងទាស់នឹងសង្គមមនុស្សដូច្នេះ? តើអ្វីដែលបណ្ដាលឲ្យពួកយុវវ័យសព្វថ្ងៃនេះ ប្រព្រឹត្តយ៉ាងឃោរឃៅនឹងគ្នាដូច្នេះ? គឺអាចរកឃើញចំលើយដ៏ទុកចិត្តបាន ចំពោះសំនួរទាំងនេះ និងសំនួរឯទៀតដែលធ្វើឲ្យងឿងឆ្ងល់ ក្នុងព្រះបន្ទូលរបស់ព្រះ គឺព្រះគម្ពីរ។ ចំលើយនោះប្រាកដជានឹងធ្វើជា«របស់ដ៏វិសេសវិសាល» មិនគ្រាន់តែចំពោះពួកកាតូលិក ឬពួកប្រូតេស្តង់ប៉ុណ្ណោះឡើយ តែចំពោះអ្នកកាន់សាសនាព្រះពុទ្ធ ព្រហ្មញ្ញសាសនា សាសនាអ៊ីស្លាម និងស៊ីនតូ ព្រមទាំងចំពោះពួកអ្នកដែលបដិសេធថាគ្មានព្រះទេ និងពួកអ្នកដែលគិតថា គ្មានព្រះអង្គណាមួយដែលយើងអាចស្គាល់នោះឡើយ។ អ្នកតែងបទទំនុកដំកើងបានមានប្រសាសន៍ថា៖ ‹ព្រះបន្ទូលនៃព្រះជាចង្កៀងដល់ជើងគាត់ ហើយជាពន្លឺបំភ្លឺផ្លូវរបស់គាត់ផង›។ ព្រះគម្ពីរក៏មានប្រសិទ្ធិភាពដូច្នេះសំរាប់លោកអ្នកផងដែរ។—ទំនុកដំកើង ១១៩:១០៥