តើមានហេតុឲ្យសង្ឃឹមថា យើងនឹងបានសង្គ្រោះទេ?
តើមានហេតុឲ្យសង្ឃឹមថា យើងនឹងបានសង្គ្រោះទេ?
សតវត្សទី២០បានត្រូវហៅជាសតវត្សដែលមានការបង្ហូរឈាមច្រើនជាងគេបំផុត។ ក្នុងកំឡុងប៉ុន្មានទសវត្សចុងក្រោយនេះ មានបទឧក្រិដ្ឋ សង្គ្រាម ភាពចលាចលរវាងពូជសាសន៍ផ្សេងៗ ការប្រើគ្រឿងញៀនផ្ដេសផ្ដាស ភាពមិនទៀងត្រង់ និងអំពើហិង្សាចំរើនឡើងជាដើម។ បន្ថែមទៅទៀត ក៏មានការរងទុក្ខនិងការឈឺចាប់ដែលជាលទ្ធផលពីជម្ងឺ ភាពចាស់ជរា និងសេចក្ដីស្លាប់។ គ្រប់គ្នាប្រាថ្នាចង់រួចពីបញ្ហាដ៏ធំក្រៃលែងដែលមានក្នុងពិភពលោកនេះ មែនទេ? ពេលយើងសម្លឹងទៅមើលអនាគតកាល តើមានហេតុឲ្យសង្ឃឹមថា យើងនឹងបានសង្គ្រោះទេ?
សូមយកមកពិចារណានូវចក្ខុនិមិត្តដែលសាវ័កយ៉ូហានបានទទួលប្រមាណ២.០០០ឆ្នាំមុននេះ។ គាត់បានសរសេរថា៖ «មើល! រោងឧបោសថរបស់ព្រះ បាននៅជាមួយនឹងមនុស្សហើយ ទ្រង់នឹងគង់នៅជាមួយនឹងគេ គេនឹងធ្វើជារាស្ត្ររបស់ទ្រង់។ ហើយព្រះអង្គទ្រង់ក៏នឹងធ្វើជាព្រះដល់គេ។ ព្រះទ្រង់នឹងជូតអស់ទាំងទឹកភ្នែក ពីភ្នែកគេចេញ នឹងគ្មានសេចក្ដីស្លាប់ ឬសេចក្ដីសោកសង្រេង ឬសេចក្ដីយំទួញ ឬទុក្ខលំបាកណាទៀតឡើយ។ ដ្បិតសេចក្ដីមុនទាំងប៉ុន្មាន បានកន្លងបាត់ទៅហើយ»។ (វិវរណៈ ២១:៣, ៤) ព្យាការីអេសាយក៏បានទាយដូចគ្នាដែរថា៖ «ទ្រង់នឹងបំផ្លាញសេចក្ដីស្លាប់ឲ្យសូន្យបាត់ទៅជាដរាប នោះព្រះអម្ចាស់យេហូវ៉ា ទ្រង់នឹងជូតទឹកភ្នែកពីមុខមនុស្សទាំងអស់។ ហើយទ្រង់នឹងដកសេចក្ដីត្មះតិះដៀលចំពោះរាស្ត្រទ្រង់ ពីផែនដីទាំងមូលចេញ ដ្បិតព្រះយេហូវ៉ាទ្រង់បានមានបន្ទូលដូច្នេះហើយ»។—អេសាយ ២៥:៨
សូមគិតទៅមើល ថាការសម្រេចតាមទំនាយរបស់ព្រះនឹងមានន័យយ៉ាងណា! មនុស្សជាតិនឹងត្រូវបានប្រោសឲ្យរួច គឺរំដោះចេញពីការគាបសង្កត់និងអំពើឃោរឃៅ ដែលជាដើមហេតុបណ្ដាលឲ្យរងទុក្ខនិងតប់ប្រមល់។ សូម្បីតែជម្ងឺ ជរាភាព និងសេចក្ដីស្លាប់និងលែងធ្វើបាបយើងទៀតហើយ! ព្រះបន្ទូលរបស់ព្រះ គឺព្រះគម្ពីរ សន្យាអំពីជីវិតជារៀងរហូតនៅលើផែនដី ក្រោមស្ថានការណ៍ដ៏គ្រប់ល័ក្ខណ៍។ (លូកា ២៣:៤៣; យ៉ូហាន ១៧:៣) ហើយអស់អ្នកណាដែលចង់បាននោះ អាចទទួលបាន។ «[ព្រះ]ទ្រង់សព្វព្រះហឫទ័យ ឲ្យមនុស្សទាំងអស់បានសង្គ្រោះ ហើយឲ្យបានស្គាល់សេចក្ដីពិត»។—ធីម៉ូថេទី១ ២:៣, ៤
ក៏ប៉ុន្តែ ដើម្បីទទួលគុណប្រយោជន៍ពីសេចក្ដីសន្យារបស់ព្រះ យើងត្រូវតែយល់អំពីមុខនាទីរបស់ព្រះយេស៊ូ ក្នុងការសង្គ្រោះយើង ហើយយើងត្រូវតែអនុវត្តជំនឿទៅលើទ្រង់។ ព្រះយេស៊ូបានមានបន្ទូលដោយអង្គទ្រង់ផ្ទាល់ថា៖ «ព្រះទ្រង់ស្រឡាញ់មនុស្សលោក ដល់ម្ល៉េះបានជាទ្រង់ប្រទានព្រះរាជបុត្រាទ្រង់តែ១ ដើម្បីឲ្យអ្នកណាដែលជឿដល់ព្រះរាជបុត្រានោះ មិនត្រូវវិនាសឡើយ គឺឲ្យមានជីវិតអស់កល្បជានិច្ចវិញ»។ (យ៉ូហាន ៣:១៦) ក្នុងការបញ្ជាក់អំពីមុខនាទីដ៏ចាំបាច់របស់ព្រះយេស៊ូគ្រីស្ទក្នុងរឿងនេះ សាវ័កពេត្រុសបានស្រដីថា៖ «គ្មានសេចក្ដីសង្គ្រោះ ដោយសារអ្នកណាទៀតសោះ ដ្បិតនៅក្រោមមេឃ គ្មាននាមឈ្មោះណាទៀតបានប្រទានមកមនុស្សលោក ឲ្យយើងរាល់គ្នាបានសង្គ្រោះនោះឡើយ»។ (កិច្ចការ ៤:១២) សាវ័កប៉ុលនិងសហការីរបស់គាត់ ឈ្មោះស៊ីឡាស បានដាស់តឿនអ្នកសួរសំនួរស្មោះអស់ពីចិត្តម្នាក់ថា៖ «ចូរជឿដល់ព្រះអម្ចាស់យេស៊ូវគ្រីស្ទទៅ នោះនឹងបានសង្គ្រោះហើយ ព្រមទាំងពួកគ្រួសារលោកផង»។—កិច្ចការ ១៦:៣០, ៣១
មែនហើយ ព្រះយេស៊ូគ្រីស្ទគឺជា‹ព្រះអម្ចាស់នៃជីវិត› ហើយមានសេចក្ដីសង្គ្រោះតាមរយៈតែទ្រង់ប៉ុណ្ណោះ។ (កិច្ចការ ៣:១៥) ប៉ុន្តែ តើដោយដូចម្ដេចបានជាមានតែបុរសម្នាក់ប៉ុណ្ណោះ ជាបុគ្គលសំខាន់ម្ល៉េះក្នុងការសង្គ្រោះយើង? ការយល់យ៉ាងច្បាស់លាស់អំពីមុខនាទីដូចនោះរបស់ទ្រង់ គួរពង្រឹងនូវសេចក្ដីសង្ឃឹមរបស់យើងឲ្យបានសង្គ្រោះ។
[អ្នកផ្ដល់សិទ្ធិឲ្យប្រើរូបភាពនៅទំព័រ២]
ទំព័រទី៣: យន្តហោះទម្លាក់គ្រាប់បែក: USAFphoto; កូនក្មេងអត់បាយហូប: UNITED NATIONS/J. FRAND; នាវាចម្បាំងកំពុងតែឆេះ: U.S.Navy photo