ព្រះយេស៊ូជាព្រះអង្គសង្គ្រោះ តើតាមរបៀបណា?
ព្រះយេស៊ូជាព្រះអង្គសង្គ្រោះ តើតាមរបៀបណា?
«ព្រះយេស៊ូជាព្រះអង្គសង្គ្រោះ!»។ «ព្រះអង្គព្រះយេស៊ូសង្គ្រោះយើង!»។ នៅប្រទេសជាច្រើនទូទាំងផែនដី មានឃ្លាដូចនេះសរសេរតាមជញ្ជាំងអាគារនិងកន្លែងសាធារណៈផ្សេងៗ។ មនុស្សរាប់លាននាក់ជឿយ៉ាងស្មោះអស់ពីចិត្តថា ព្រះយេស៊ូជាព្រះអង្គសង្គ្រោះរបស់គេ។ ប្រសិនបើអ្នកសួរគេថា៖ «តើព្រះយេស៊ូជួយសង្គ្រោះយើងតាមរបៀបណា?»។ គេប្រហែលជានឹងឆ្លើយថា៖ «ព្រះយេស៊ូបានសុគតជំនួសយើង» ឬ «ព្រះយេស៊ូបានសោយទិវង្គតដើម្បីលាងបាបយើង»។ ការសោយទិវង្គតរបស់ព្រះយេស៊ូពិតជានាំឲ្យយើងបានសង្គ្រោះមែន។ ប៉ុន្តែតើដោយរបៀបណាដែលការសោយទិវង្គតរបស់បុរសតែម្នាក់ អាចលោះបាបមនុស្សរាប់សិបលាននាក់បាន? បើគេសួរអ្នកថា៖ «តើការសោយទិវង្គតរបស់ព្រះយេស៊ូអាចសង្គ្រោះយើងបានតាមរបៀបណា?» តើអ្នកនឹងឆ្លើយយ៉ាងណា?
ចម្លើយចំពោះសំនួរនេះគឺមានក្នុងព្រះគម្ពីរ និងមិនពិបាកយល់ទេ ហើយក៏មានខ្លឹមសារច្បាស់លាស់ផង។ ក៏ប៉ុន្តែ ដើម្បីយល់នូវសារៈសំខាន់នោះ មុនដំបូងយើងត្រូវតែយល់ដឹងពីព្រះជន្មទ្រង់ និងការសោយទិវង្គតរបស់ទ្រង់សំរាប់មនុស្សជាតិ ដែលជាដំណោះស្រាយតែមួយគត់សំរាប់បញ្ហាមួយដ៏ធំនេះ។ មានតែយល់ដឹងពីនោះទេ ដែលយើងអាចយល់ពីតម្លៃខ្ពង់ខ្ពស់ក្រៃលែងនៃការសោយទិវង្គតរបស់ព្រះយេស៊ូ។
ដោយព្រះឲ្យព្រះយេស៊ូបូជាព្រះជន្មទ្រង់ នោះព្រះបានប្រឈមមុខដោះស្រាយនឹងស្ថានការណ៍ដែលបានកើតឡើងនៅពេលដែលអ័ដាមបានធ្វើបាប។ អំពើបាបនោះឯងជាការគួរឲ្យសោកស្ដាយមែន! បុរសមុនគេបង្អស់និងភរិយារបស់គាត់ឈ្មោះអេវ៉ា ជាមនុស្សគ្រប់ល័ក្ខណ៍។ សួនច្បារដ៏ស្រស់បំព្រង ឈ្មោះអេដែន ជាទីលំនៅរបស់គេ។ ព្រះបានឲ្យគេធ្វើការងារដែលមានអត្ថន័យ ជាកិច្ចការថែរក្សាទីលំនៅរបស់គេជាសួនច្បារមួយនោះ។ គេត្រូវថែរក្សាជីវិតទាំងឡាយនៅលើផែនដីដោយសេចក្ដីស្រឡាញ់។ ហើយនៅពេលដែលមនុស្សលោកមានកំនើនកើនឡើងពេញផែនដី នោះទីមនោរម្យក៏ត្រូវពង្រីកឲ្យពេញផែនដីដែរ។ (លោកុប្បត្តិ ១:២៨) ការងារដែលគេបានទទួលនោះ គួរឲ្យរីករាយនិងរំភើបចិត្តណាស់ហ្ន៎! ម្យ៉ាងទៀត គេក៏មានគូដ៏ជាទីស្រឡាញ់ផងដែរ។ (លោកុប្បត្តិ ២:១៨) គេមិនខ្វះអ្វីសោះឡើយ។ គេអាចរស់ជានិច្ចនិរន្តរ៍ទាំងមានសុភមង្គលបាន។
គឺគួរឲ្យពិបាកនឹងយល់ណាស់ នូវមូលហេតុអ្វីដែលអ័ដាមនិងអេវ៉ាបានធ្វើបាបនោះ។ ជាមនុស្សមួយគូដំបូងនោះ គេបានបះបោរប្រឆាំងទាស់នឹងព្រះយេហូវ៉ាជាព្រះអង្គដែលបានបង្កើតគេមក។ បុគ្គលវិញ្ញាណមួយរូប ដែលមានឈ្មោះថាអារក្សសាតាំង វាបានប្រើសត្វពស់មួយបញ្ឆោតនាងអេវ៉ាកុំឲ្យស្ដាប់បង្គាប់ព្រះយេហូវ៉ា និងអ័ដាមបានធ្វើតាមនាងដែរ។—លោកុប្បត្តិ ៣:១-៦
គឺគ្មានអ្វីគួរឲ្យភ្ញាក់ផ្អើលឡើយ ដែលអ្នកបង្កើតត្រូវធ្វើដល់អ័ដាមនិងអេវ៉ា។ ទ្រង់បានបញ្ជាក់រួចទៅហើយអំពីលទ្ធផលពីការមិនស្ដាប់បង្គាប់ ដោយមានបន្ទូលថា៖ «ឯងនឹងស៊ីផ្លែឈើទាំងអស់ក្នុងសួនច្បារនេះបានតាមចិត្ត។ តែឯត្រង់ដើមដឹងខុសត្រូវ នោះមិនត្រូវឲ្យឯងស៊ីផលឡើយ ដ្បិតនៅថ្ងៃណាដែលឯងស៊ី នោះនឹងត្រូវស្លាប់ជាមិនខាន»។ (លោកុប្បត្តិ ២:១៦, ១៧) តាំងពីពេលនោះមក ក៏មានសំនួរដ៏សំខាន់ជាងនេះទៅទៀតដែលត្រូវការចម្លើយ។
មនុស្សជាតិប្រឈមមុខនឹងបញ្ហាមួយដ៏ពិបាក
អំពើបាបដំបូងនោះបានបណ្ដាលឲ្យមនុស្សជាតិមានបញ្ហាដ៏ធំមួយ។ អ័ដាមបានចាប់ផ្ដើមមានឡើងដោយមានជីវិតជាមនុស្សគ្រប់ល័ក្ខណ៍ម្នាក់។ អាស្រ័យដោយហេតុនេះហើយ កូនចៅរបស់គាត់តាមត្រូវគួរទទួលជីវិតគ្រប់ល័ក្ខណ៍ជារៀងរហូតបាន។ ក៏ប៉ុន្តែ អ័ដាមបានធ្វើបាប មុនពេលដែលគាត់បង្កើតកូនចៅនោះ។ អ័ដាមមិនទាន់បានបន្តពូជឡើយ ពេលដែលគាត់បានទទួលទោសពីព្រះដោយមានបន្ទូលថា៖ «ឯងនឹងបានអាហារស៊ីដោយការបែកញើស ដរាបដល់ឯងត្រឡប់ទៅជាដីវិញ ពីព្រោះអញបានយកឯងពីដីមក។ ដ្បិតឯងជាធូលីដី ក៏ត្រូវត្រឡប់ទៅជាធូលីដីវិញ»។ (លោកុប្បត្តិ ៣:១៩) ដូច្នេះ ដូចព្រះបានមានបន្ទូលហើយ នៅពេលដែលអ័ដាមបានធ្វើបាប នោះគាត់ចាប់ផ្ដើមដើរឆ្ពោះទៅរកមាគ៌ានៃសេចក្ដីស្លាប់ ហើយមនុស្សជាតិទាំងឡាយត្រូវបានផ្ដន្ទាទោសឲ្យស្លាប់ជាមួយគាត់ដែរ។
ក្រោយៗមក សាវ័កប៉ុលបានសរសេរយ៉ាងសមត្រឹមត្រូវថា៖ «បាបបានចូលមកក្នុងលោកីយ ដោយសារមនុស្សតែម្នាក់[គឺអ័ដាម] ហើយក៏មានសេចក្ដីស្លាប់ចូលមកដែរ ដោយសារអំពើបាបនោះជាយ៉ាងណា នោះសេចក្ដីស្លាប់បានឆ្លងរាលដាល ដល់មនុស្សគ្រប់គ្នាយ៉ាងនោះដែរ ដ្បិតគ្រប់គ្នាបានធ្វើបាបហើយ»។ (រ៉ូម ៥:១២) ត្រូវមែន កូនចៅតាមត្រូវគួរកើតមកយ៉ាងល្អគ្រប់ល័ក្ខណ៍ ទាំងមានជីវិតដ៏មិនចេះចប់នៅខាងមុខគេ តែដោយព្រោះអំពើបាបដំបូងនោះ ពួកគេបានកើតមកដោយមានជម្ងឺ ជរាភាព និងសេចក្ដីស្លាប់ទៅវិញ។
អ្នកណាម្នាក់ប្រហែលជានិយាយថា៖ «ធ្វើដូច្នេះគឺអយុត្ដិធម៌ណាស់! ពួកយើងមិនបានជ្រើសរើសផ្លូវមិនស្ដាប់បង្គាប់ព្រះនោះទេ ជាអ័ដាមទៅវិញទេដែលបានធ្វើដូច្នេះ។ ម្ដេចក៏យើងត្រូវបាត់បង់សុភមង្គលនិងសេចក្ដីសង្ឃឹមរស់រហូតដូច្នេះ?»។ យើងដឹងថា បើតុលាការកាត់ទោសកូនប្រុសម្នាក់ ដោយព្រោះឪពុកលួចឡានគេ នោះកូនប្រុសមានសិទ្ធិប្រកែកថា៖ «អយុត្ដិធម៌ណាស់! ខ្ញុំមិនបានលួចទេ»។—ចោទិយកថា ២៤:១៦
ដោយញ៉ាំងឲ្យបុរសនិងស្ត្រីដំបូងធ្វើបាបនោះ សាតាំងប្រហែលជាគិតថា វាបានបង្ករឿងឲ្យព្រះដោះស្រាយពុំបានទេ។ អារក្សបានរកសម្រេចការរបស់វានៅដើមប្រវត្ដិសាស្ត្រមនុស្សលោក គឺមុនពេលដែលមនុស្សសំរាលកូន។ ពេលអ័ដាមធ្វើអំពើបាបនោះ មានសំនួរដ៏សំខាន់មួយផុសឡើងភ្លាម។ សំនួរនោះគឺ តើព្រះយេហូវ៉ានឹងធ្វើអ្វី ចំពោះកូនចៅដែលអ័ដាមនិងអេវ៉ាបង្កើតមក?
ព្រះយេហូវ៉ាបានប្រព្រឹត្តដោយយុត្ដិធម៌ និងសមត្រឹមត្រូវ។ មនុស្សសុចរិតម្នាក់ ឈ្មោះអេលីហ៊ូវ បានឧទានថា៖ «កុំឲ្យយើងថាព្រះទ្រង់ធ្វើអាក្រក់ ឬថាព្រះដ៏មានគ្រប់ព្រះចេស្ដា ទ្រង់ប្រព្រឹត្តសេចក្ដីទុច្ចរិតនោះឡើយ!»។ (យ៉ូប ៣៤:១០) ព្យាការីម៉ូសេក៏បានសរសេរអំពីព្រះយេហូវ៉ាថា៖ «ទ្រង់ជាថ្មដា ការរបស់ទ្រង់សុទ្ធតែគ្រប់ល័ក្ខណ៍ ដ្បិតអស់ទាំងផ្លូវទ្រង់ សុទ្ធតែប្រកបដោយយុត្ដិធម៌។ ទ្រង់ជាព្រះដ៏ស្មោះត្រង់ ឥតមានសេចក្ដីទុច្ចរិតណាឡើយ ទ្រង់ក៏ត្រឹមត្រូវ ហើយទៀងត្រង់»។ (ចោទិយកថា ៣២:៤) ដំណោះស្រាយដែលព្រះពិតបានប្រទានដើម្បីដោះស្រាយបញ្ហាបង្កមកពីអំពើបាបរបស់អ័ដាម នោះមិនដកចេញនូវឱកាសឲ្យយើងបានជីវិតជារៀងរហូតនៅលើផែនដីមនោរម្យទេ។
ព្រះទ្រង់រៀបចំឲ្យមានដំណោះស្រាយដ៏ល្អគ្រប់ល័ក្ខណ៍
សូមពិចារណានូវដំណោះស្រាយដែលព្រះបានរៀបរាប់ ដំណាលពេលនឹងទ្រង់កាត់ទោសអារក្សសាតាំង។ ព្រះយេហូវ៉ាបានមានបន្ទូលទៅកាន់សាតាំងថា៖ «អញនឹងធ្វើឲ្យឯងហើយនឹងស្ត្រី[ជាអង្គការរបស់ព្រះនៅស្ថានសួគ៌] គឺទាំងពូជឯង[ដែលជាលោកីយ៍ក្រោមអំណាចរបស់សាតាំង]នឹងពូជនាង[គឺព្រះយេស៊ូគ្រីស្ទ]មានសេចក្ដីខ្មាំងនឹងគ្នា។ ពូជនាងនឹងកិនក្បាលឯង[គឺសាតាំង] ហើយឯងនឹងចឹកកែងជើងគេ[ជាការសោយទិវង្គតរបស់ព្រះយេស៊ូ]»។ (លោកុប្បត្តិ ៣:១៥) តាមបទទំនាយទីមួយនេះក្នុងព្រះគម្ពីរ ព្រះយេហូវ៉ាបានមានបន្ទូលសំដៅទៅលើបំណងព្រះហឫទ័យរបស់ទ្រង់ ឲ្យបុត្រាវិញ្ញាណទ្រង់នៅស្ថានសួគ៌ យាងចុះមកផែនដីនិងរស់ជាមនុស្សគ្រប់ល័ក្ខណ៍ម្នាក់ឈ្មោះយេស៊ូ និងរួចមកត្រូវសោយទិវង្គត ឬក៏ត្រូវចឹកកែងជើងឲ្យជាំនោះ ដែលទ្រង់គ្មានបាបនោះទេ។
ហេតុអ្វីបានជាព្រះតម្រូវឲ្យមនុស្សល្អគ្រប់ល័ក្ខណ៍ម្នាក់សោយទិវង្គតដូច្នេះ? សូមគិតទៅមើលថា តើព្រះយេហូវ៉ាបានផ្ដន្ទាទោសអ្វីលើអ័ដាម បើគាត់ធ្វើបាប? គឺសេចក្ដីស្លាប់ មែនទេ? (លោកុប្បត្តិ ២:១៦, ១៧) សាវ័កប៉ុលបានសរសេរថា៖ «ឈ្នួលរបស់អំពើបាប នោះជាសេចក្ដីស្លាប់»។ (រ៉ូម ៦:២៣) អ័ដាមបានបាត់បង់ជីវិត ដោយព្រោះអំពើបាបរបស់គាត់។ គាត់បានទទួលជីវិត តែបានសម្រេចចិត្តធ្វើបាបវិញ ក៏បានស្លាប់ទៅជាទោសសំរាប់បាបរបស់ខ្លួន។ (លោកុប្បត្តិ ៣:១៩) ចុះយ៉ាងណាវិញមនុស្សជាតិទាំងឡាយ ដែលបានរងទោសដោយព្រោះអំពើបាបគាត់នោះ? គឺត្រូវការនូវការសោយទិវង្គតមួយ ដើម្បីលោះបាបរបស់គេ។ ប៉ុន្តែ តើការសោយទិវង្គតរបស់អ្នកណា ដែលអាចគ្របបាំងយ៉ាងសមត្រឹមត្រូវលើអំពើរំលងនានារបស់មនុស្សជាតិទាំងឡាយ?
ក្រិត្យវិន័យរបស់ព្រះជូនចំពោះសាសន៍អ៊ីស្រាអែលពីបុរាណនោះ បានតម្រូវឲ្យ«សងជីវិតឲ្យធួននឹងជីវិត»។ (និក្ខមនំ ២១:២៣) យោងទៅតាមនីតិគោលការណ៍មួយនេះ ការសោយទិវង្គតមួយដែលនឹងគ្របបាំងអំពើរំលងរបស់មនុស្សលោក ត្រូវតែមានតម្លៃស្មើនឹងអ្វីដែលអ័ដាមបានបាត់បង់ទៅហើយ។ មានតែការសោយទិវង្គតរបស់បុរសគ្រប់ល័ក្ខណ៍ម្នាក់ប៉ុណ្ណោះ ដែលអាចសងជំនួសឈ្នួលនៃអំពើបាបនេះបាន។ ព្រះយេស៊ូជាបុរសបែបនេះ។ យ៉ាងប្រាកដណាស់ ព្រះយេស៊ូជា‹ថ្លៃលោះដែលស្មើ› សំរាប់មនុស្សជាតិ ជាកូនចៅរបស់អ័ដាមដែលសមនឹងការលោះឲ្យទទួលសេចក្ដីសង្គ្រោះ។—ធីម៉ូថេទី១ ២:៦; រ៉ូម ៥:១៦, ១៧
ការសោយទិវង្គតរបស់ព្រះយេស៊ូមានតម្លៃណាស់
សេចក្ដីស្លាប់របស់អ័ដាមគ្មានតម្លៃសោះ។ គាត់គួរនឹងស្លាប់ដោយព្រោះបាបរបស់គាត់។ ក៏ប៉ុន្តែ ការសោយទិវង្គតរបស់ព្រះយេស៊ូមានតម្លៃណាស់ ពីព្រោះទ្រង់បានសោយទិវង្គតទៅដោយគ្មានបាបទេ។ ព្រះយេហូវ៉ាអាចយល់ព្រមទទួលតម្លៃនៃព្រះជន្មដ៏ល្អគ្រប់ល័ក្ខណ៍របស់ព្រះយេស៊ូ ជាថ្លៃលោះអ្នកស្ដាប់បង្គាប់ជាកូនចៅរបស់អ័ដាមដែលមានបាប។ តម្លៃលោះរបស់ព្រះយេស៊ូនោះមិនគ្រាន់តែគ្របបាំងអំពើបាបរបស់យើងដែលធ្លាប់ធ្វើពីមុនទេ។ ពុំនោះសោត យើងនឹងគ្មានសង្ឃឹមចំពោះអនាគតទេ។ ដោយម្ដាយយើងមានទំងន់ពេលមានបាបដែរ យើងប្រាកដជានឹងធ្វើខុសម្ដងទៀត។ (ទំនុកដំកើង ៥១:៥) យើងពិតជាចង់ដឹងគុណមែន ថាការសោយទិវង្គតរបស់ព្រះយេស៊ូនោះ បើកផ្លូវឲ្យយើងទទួលភាពគ្រប់ល័ក្ខណ៍ឡើងវិញ ដោយតាមបំណងព្រះហឫទ័យដែលព្រះយេហូវ៉ាបានមានពីដើមមក សំរាប់កូនចៅរបស់អ័ដាមនិងអេវ៉ា!
យើងអាចប្រៀបប្រដូចអ័ដាមទៅនឹងឪពុកម្នាក់ដែលស្លាប់ទាំងទុកឲ្យយើងរាល់គ្នាមានបំណុលដ៏សន្ធឹក (គឺជាបាប) ដល់ម្ល៉េះបានជាគ្មានលទ្ធភាពទាល់តែសោះឲ្យយើងសងបំណុលនោះបានទេ។ ផ្ទុយទៅវិញ ព្រះយេស៊ូប្រៀបប្រដូចទៅនឹងបិតាល្អម្នាក់ដែលបានសោយទិវង្គតទៅ ទាំងទុកកេរ្ដិ៍ដំណែលដ៏សន្ធឹកសន្ធាប់ដែលមិនគ្រាន់តែជួយឲ្យយើងរួចពីបំណុលដ៏ច្រើនដែលអ័ដាមបានឲ្យយើងជាបន្ទុកនោះប៉ុណ្ណោះទេ តែថែមទាំងប្រទានរបស់គ្រប់គ្រាន់ឲ្យយើងរស់ជានិរន្តរ៍។ ការសោយទិវង្គតរបស់ព្រះយេស៊ូមិនមែនជាការលុបបំបាត់អំពើបាបដែលយើងធ្លាប់ធ្វើពីមុនប៉ុណ្ណោះទេ តែជាសំវិធានការដ៏ល្អអស្ចារ្យសំរាប់អនាគតរបស់យើងផងដែរ។
ព្រះយេស៊ូជាព្រះអង្គសង្គ្រោះ ពីព្រោះទ្រង់បានសោយទិវង្គតសំរាប់យើង។ ការសោយទិវង្គតនោះ ជាការរៀបចំដ៏មានតម្លៃណាស់ហ្ន៎! នៅពេលយើងទទួលស្គាល់ថាការសោយទិវង្គតនោះ ជាផ្នែកមួយនៃដំណោះស្រាយរបស់ព្រះសំរាប់បញ្ហាស្មុគស្មាញដែលមានមកពីអំពើបាបរបស់អ័ដាម នោះជំនឿរបស់យើងទៅលើព្រះយេហូវ៉ានិងរបៀបដែលទ្រង់សម្រេចការ ក៏ត្រូវពង្រឹងឡើងផងដែរ។ ការសោយទិវង្គតរបស់ព្រះយេស៊ូពិតជារបៀបប្រោសឲ្យ‹មនុស្សទាំងអស់ដែលអនុវត្តជំនឿ›ទៅលើទ្រង់ បានរួចពីបាប ជម្ងឺ ជរាភាព និងសេចក្ដីស្លាប់ជាដើម។ (យ៉ូហាន ៣:១៦) តើអ្នកដឹងគុណព្រះទេ ព្រោះទ្រង់បើកឲ្យមានការរៀបចំនេះដែលប្រកបទៅដោយសេចក្ដីស្រឡាញ់ ប្រយោជន៍ឲ្យយើងបានសង្គ្រោះនោះ?
[រូបភាពនៅទំព័រ៥]
អ័ដាមបានបណ្ដាលឲ្យ មនុស្សលោក មានបាបនិងស្លាប់
[រូបភាពនៅទំព័រ៦]
ព្រះយេហូវ៉ាបានប្រទានដំណោះស្រាយមួយដ៏គ្រប់ល័ក្ខណ៍