សេចក្ដីបង្រៀនសកលមួយដែលមានជាទូទៅ
សេចក្ដីបង្រៀនសកលមួយដែលមានជាទូទៅ
«ដូច្នេះ អស់ទាំងការអ្វី ដែលអ្នករាល់គ្នាចង់ឲ្យមនុស្សលោក ប្រព្រឹត្តនឹងខ្លួន នោះត្រូវឲ្យអ្នកប្រព្រឹត្តនឹងគេដូច្នោះដែរ»។—ម៉ាថាយ ៧:១២
ពាក្យពេចន៍នេះ ព្រះយេស៊ូបានមានបន្ទូលជិតពីរពាន់ឆ្នាំទៅហើយ ក្នុងធម្មទានដ៏ល្បីល្បាញរបស់ទ្រង់នៅលើភ្នំ។ បន្ទូលខាងលើនេះងាយស្រួលយល់ ហើយក្នុងកំឡុងពេលប៉ុន្មានសតវត្សបន្ទាប់មក មនុស្សបាននិយាយនិងរៀបរាប់អំពីបន្ទូលនោះទូទៅ។ ពាក្យបន្ទូលនោះបានត្រូវគេលើកដំកើងថា ជា «ខ្លឹមសារនៃបទគម្ពីរទាំងឡាយ» «ជាការសរុបនូវកាតព្វកិច្ចនៃគ្រីស្ទបរិស័ទចំពោះអ្នកជិតខាង» និងជា«គោលការណ៍បឋមខាងសីលធម៌»។ ពាក្យបន្ទូលនោះគេនិយមស្គាល់ជាពាក្យពេចន៍របស់ព្រះយេស៊ូ។
ក៏ប៉ុន្តែ មិនមានគំនិតបែបនេះក្នុងពិភពលោកដែលកាន់សាសនាគ្រីស្ទប៉ុណ្ណោះទេ។ សាសនាយូដា សាសនាព្រះពុទ្ធ និងទស្សនៈវិជ្ជារបស់សាសន៍ក្រិច ក៏បានលើកបញ្ជាក់ពីគោលការណ៍បឋមខាងសីលធម៌នេះដែរ តែតាមបែបបទផ្សេងៗ។ មនុស្សជនជាតិអាស៊ីស្គាល់ច្បាស់ជាងគេ នូវសេចក្ដីបង្រៀនរបស់លោកខុងជឺ ជាអ្នកដែលគេគោរពជាបណ្ឌិត និងជាលោកគ្រូដ៏ឧត្តម។ ក្នុងសៀវភៅអាណាឡែក ដែលជាសៀវភៅទីបីក្នុងចំណោមសៀវភៅបួនក្បាលរបស់ខុងជឺ យើងឃើញគំនិតនោះបានត្រូវបញ្ជាក់បីដង។ ពីរដងលោកខុងជឺឆ្លើយសំនួររបស់សិស្សានុសិស្សដោយមានប្រសាសន៍ថា៖ «អ្វីដែលអ្នកមិនចង់ឲ្យអ្នកដទៃប្រព្រឹត្តនឹងអ្នក នោះកុំប្រព្រឹត្តទៅលើគេ»។ មានពេលមួយទៀតដែលសិស្សម្នាក់របស់គាត់ ឈ្មោះហ្សាកូង បានអួតថា៖ «អ្វីដែលខ្ញុំមិនចង់ឲ្យអ្នកដទៃប្រព្រឹត្តនឹងខ្ញុំ ខ្ញុំក៏មិនត្រូវប្រព្រឹត្តចំពោះគេដែរ»។ លោកគ្រូបានមានប្រសាសន៍តបដោយពាក្យស្រគត់ស្រគំថា៖ «មែនហើយ! តែអ្នកមិនទាន់មានសមត្ថភាពធ្វើដូចនោះទេ»។
ពេលអានពាក្យទាំងនេះ យើងអាចឃើញថា ក្រោយៗមកទៀតព្រះយេស៊ូមានបន្ទូលស្រដៀងនឹងអ្វីដែលខុងជឺថ្លែងប្រាប់នោះតែសេចក្ដីដែលខុងជឺថ្លែងប្រាប់ជាអ្វីដែលហាមមនុស្សកុំឲ្យប្រព្រឹត្តប៉ុណ្ណោះ។ ភាពខុសគ្នាស្រឡះគឺថា ពាក្យពេចន៍ដែលព្រះយេស៊ូបានមានបន្ទូលនោះ តម្រូវឲ្យមានការប្រព្រឹត្តដ៏ល្អទៅលើអ្នកដទៃ។ ចុះយ៉ាងណាបើមនុស្សគ្រប់រូបអាចអនុវត្តតាមបន្ទូលដ៏ល្អនោះរបស់ព្រះយេស៊ូ ដោយយកចិត្តទុកដាក់ចំពោះអ្នកឯទៀត ទាំងចាត់វិធានការជួយអ្នកដទៃ និងរស់នៅសមស្របទៅតាមពាក្យពេចន៍នេះប្រចាំថ្ងៃ? តើអ្នកគិតថា នេះអាចធ្វើឲ្យពិភពលោកនាបច្ចុប្បន្នបានប្រសើរជាងទេ? ពិតជាអាចមែន!
មិនថាពាក្យពេចន៍នេះត្រូវថ្លែងជារបៀបហាមមនុស្សកុំឲ្យប្រព្រឹត្ត ឬតាមបែបជំរុញឲ្យប្រព្រឹត្ត ឬក៏តាមរបៀបណាទៀតក៏ដោយនោះ អ្វីដែលយើងគួរកត់សម្គាល់គឺថា សូម្បីតែមនុស្សនៅជំនាន់ខុសគ្នា នៅកន្លែងខុសគ្នា ទាំងមានប្រវត្ដិខុសស្រឡះពីគ្នាយ៉ាងណាក្ដី ក៏គេនៅតែជឿលើគំនិតបែបនេះដែរ។ នេះបង្ហាញយ៉ាងច្បាស់ថា ធម្មទានរបស់ព្រះយេស៊ូនៅលើភ្នំ ជាសេចក្ដីបង្រៀនដែលមានពេញពាសលើពិភពលោក ហើយមានអានុភាពលើជីវិតមនុស្សទូទៅ មិនថាមានអាយុប៉ុន្មានក៏ដោយ។
សូមដណ្ដឹងសួរខ្លួនថា៖ ‹តើខ្ញុំចង់ឲ្យអ្នកដទៃគោរពសិទ្ធិខ្ញុំហើយប្រព្រឹត្តឲ្យសមគួរ និងទៀងត្រង់ទៅលើរូបខ្ញុំទេ? តើខ្ញុំចង់រស់នៅក្នុងពិភពលោកមួយដែលគ្មានការប្រកាន់ពូជសាសន៍ បទឧក្រិដ្ឋនិងសង្គ្រាមទេ? តើខ្ញុំមានចិត្តចង់រស់នៅក្នុងក្រុមគ្រួសារដែលគ្រប់
គ្នាចេះគិតពីអារម្មណ៍អ្នកឯទៀតនិងប្រយោជន៍របស់ពួកគេឬទេ?›។ តាមការពិត តើមានអ្នកណាម្នាក់បដិសេធមិនចង់បានឬទេ? តែហេតុការណ៍ដ៏ពិតគឺគួរឲ្យសោកស្ដាយមែនដែលថា មានមនុស្សតិចណាស់ដែលធ្លាប់ពិសោធស្ថានភាពបែបនេះ។ មនុស្សភាគច្រើន មិនទាំងហ៊ានសង្ឃឹមទៅទៀតផង ថាគេអាចមានស្ថានភាពបែបនេះបាន។ការមិនអើពើចំពោះពាក្យពេចន៍របស់ព្រះយេស៊ូ
ក្នុងប្រវត្ដិសាស្ត្រមនុស្សរហូតមកដល់ពេលនេះ មានឧក្រិដ្ឋកម្មប្រឆាំងនឹងមនុស្សជាតិ ដែលជាការប្រឆាំងនឹងសិទ្ធិមនុស្ស។ ក្នុងនោះក៏មានការចាប់ធ្វើបាបមនុស្សនៅទ្វីបអាហ្វ្រិកឲ្យធ្វើជាខ្ញុំកញ្ជះដាច់ថ្លៃ នៅជំរំឃាតកម្មរបស់ពួកណាត្ស៊ី ការបង្ខំឲ្យកុមារធ្វើជាកម្មករ និងការប្រល័យពូជសាសន៍យ៉ាងឃោរឃៅនៅកន្លែងជាច្រើន។ ការរៀបរាប់ដ៏គួរឲ្យខ្លោចផ្សាទាំងនេះ អាចមានជាបន្តថែមទៀតផងដែរ។
សព្វថ្ងៃនេះ ពិភពលោកដែលមានបច្ចេកវិជ្ជាទំនើបៗប្រកបទៅដោយភាពអាត្មានិយម។ មិនសូវមានមនុស្សដែលគិតអំពីប្រយោជន៍អ្នកដទៃប៉ុន្មានទេ បើនោះប៉ះពាល់ទៅលើភាពសុខស្រួលរបស់ខ្លួនគេផ្ទាល់ ឬលើអ្វីដែលគេចាត់ទុកជាសិទ្ធិរបស់ខ្លួននោះ។ (ធីម៉ូថេទី២ ៣:១-៥) ហេតុអ្វីបានជាមនុស្សជាច្រើនក្លាយជាមនុស្សសួនតួ កាចសាហាវ គ្មានអារម្មណ៍យោគយល់ និងប្រកបទៅដោយភាពអាត្មានិយមដូច្នេះ? ទោះជាមនុស្សស្គាល់ពាក្យពេចន៍ទាំងនេះជាទូទៅក៏ដោយ តើអ្នកមិនឯកភាពទេឬ ថាមូលហេតុគឺមកពីមនុស្សបោះបង់ចោលពាក្យពេចន៍នេះដោយចាត់ទុកនោះជាអ្វីដែលគ្មានប្រយោជន៍ និងជាសីលធម៌ពីសម័យបុរាណនោះ? គួរឲ្យសោកស្ដាយណាស់ ដែលឥឡូវពិតជាមានដូច្នេះមែន សូម្បីតែក្នុងចំណោមមនុស្សជាច្រើនដែលអះអាងថា គេជឿទៅលើព្រះក៏ដោយ។ ដោយស្មានមើលទំនោរចិត្តមនុស្សផងដែរ នោះសឲ្យឃើញថា មនុស្សនឹងទៅជាអាត្មានិយមកាន់តែច្រើនឡើងៗ។
ហេតុដូច្នេះហើយបានជាយើងត្រូវពិចារណាសំនួរដ៏សំខាន់ដែលថា៖ តើការរស់នៅសមស្របទៅតាមពាក្យពេចន៍របស់ព្រះយេស៊ូតម្រូវឲ្យយើងធ្វើអ្វីខ្លះ? តើមានអ្នកណាខ្លះនៅតែអនុវត្តតាមពាក្យពេចន៍នេះនៅឡើយទេ? ហើយតើនឹងមានពេលមួយដែលមនុស្សលោកទាំងឡាយនឹងរស់ឲ្យបានស្របតាមពាក្យពេចន៍នេះឬទេ? ដើម្បីរកចម្លើយពិតសំរាប់សំនួរទាំងនេះ សូមអានអត្ថបទជាបន្ទាប់។
[រូបភាពនៅទំព័រ៣]
លោកខុងជឺនិងអ្នកឯទៀត បានបង្រៀនសេចក្ដីដែល ស្រដៀងគ្នាដែរនឹងពាក្យ ពេចន៍របស់ព្រះយេស៊ូ