មិនដែលចាស់ដល់ម្ល៉េះដែលរៀនមិនបានទេ

លេង

មិនដែលចាស់ដល់ម្ល៉េះដែលរៀនមិនបានទេ

លោកស្រីក្សេញញ៉ាកើតមកនៅឆ្នាំ១៨៩៧។ គាត់មានកូនស្រី៣នាក់ កូនប្រុសម្នាក់ មានចៅ១៥នាក់ និងចៅទួត២៥នាក់។ អស់មួយជីវិតរបស់គាត់ គាត់ធ្វើតែអ្វីដែលមាតាបិតាគាត់បានបង្រៀនឲ្យគាត់ធ្វើប៉ុណ្ណោះ។ គាត់បានភៀសខ្លួនចេញពីសាធារណៈរដ្ឋអាបកាសដែលស្ថិតលើផ្ទៃដីរវាងសមុទ្រខ្មៅនិងជួរភ្នំឃរខេសាស និងបានបែកបាក់គ្នាដោយសារសង្គ្រាម។ ទោះជាគាត់បានមកដល់ទីក្រុងម៉ូស្គូជាជនភៀសខ្លួនក៏ដោយ គាត់នៅតែបានស្កប់ស្កល់ចិត្តនិងជីវភាពរស់នៅរបស់គាត់ ជាពិសេសសាសនាដែលគាត់បានទទួលពីមាតាបិតាមក។

នៅឆ្នាំ១៩៩៣ មែរីជាកូនស្រីរបស់គាត់ បានក្លាយជាស្មរបន្ទាល់ព្រះយេហូវ៉ា។ មែរីចាប់ផ្ដើមនិយាយប្រាប់គាត់អំពីព្រះយេហូវ៉ានិងព្រះគម្ពីរ តែគាត់មិនចង់ស្ដាប់ទេ។ គាត់ចេះតែប្រាប់កូនស្រីថា៖ «ខ្ញុំចាស់ហើយ មិនអាចរៀនអ្វីថ្មីបានទេ»។

យ៉ាងណាក៏ដោយ មែរីដែលជាកូនស្រីរបស់គាត់ ព្រមទាំងឡនដា ជាចៅប្រសារស្រីរបស់គាត់ ហើយណាណានិងហ្សាហ្សា ជាចៅទួតស្រីពីរនាក់របស់គាត់ ពួកគេទាំងអស់បានក្លាយជាស្មរបន្ទាល់ព្រះយេហូវ៉ា ហើយពួកគេបន្តនិយាយប្រាប់គាត់អំពីព្រះគម្ពីរ។ នៅល្ងាចមួយនាឆ្នាំ១៩៩៩ ពួកគេបានអានខគម្ពីរមួយដែលបានមានឥទ្ធិពលទៅលើចិត្តរបស់គាត់យ៉ាងខ្លាំង។ ខនោះជាបន្ទូលរបស់ព្រះយេស៊ូទៅកាន់សាវ័កស្មោះត្រង់ ពេលទ្រង់កំពុងតែចាប់ផ្ដើមពិធីអាហារល្ងាចរបស់ព្រះអម្ចាស់។ (លូកា ២២:១៩, ២០) នៅយប់នោះ ពេលលោកស្រីមានអាយុ១០២ឆ្នាំ គាត់ក៏សម្រេចចិត្តសិក្សាព្រះគម្ពីរ។

គាត់ប្រាប់ថា៖ «ក្រោយខ្ញុំបានរស់អស់១០២ឆ្នាំហើយ ទើបខ្ញុំយល់ខ្លឹមសារនៃជីវិត។ ឥឡូវខ្ញុំទទួលស្គាល់ថា គ្មានអ្វីល្អជាជាងការបំរើព្រះយេហូវ៉ា ដែលជាព្រះដ៏អស្ចារ្យនិងព្រះដែលស្រឡាញ់យើង។ ខ្ញុំនៅតែមានសតិនឹងននិងមានសុខភាពល្អដដែល។ ខ្ញុំអាចអានដោយមិនចាំបាច់ប្រើវ៉ែនតាទេ ហើយខ្ញុំអាចសំណេះសំណាលជាមួយក្រុមគ្រួសាររបស់ខ្ញុំបានច្រើនដែរ»។

នៅថ្ងៃទី៥ ខែវិច្ឆិកា ឆ្នាំ២០០០ គាត់ក៏ទទួលបុណ្យជ្រមុជទឹក។ គាត់ស្រដីថា៖ «ឥឡូវខ្ញុំប្រគល់ជីវិតខ្ញុំថ្វាយចំពោះព្រះយេហូវ៉ា ដើម្បីបំរើទ្រង់ដោយសេចក្ដីស្រឡាញ់។ ខ្ញុំផ្ដល់ទស្សនាវដ្ដីនិងខិត្តប័ណ្ណពេលខ្ញុំអង្គុយនៅកន្លែងចាំឡានក្រុងនៅជិតផ្ទះខ្ញុំ។ ញាតិមិត្តអាសាមកលេងខ្ញុំណាស់ ហើយខ្ញុំប្រាប់គេនូវសេចក្ដីពិតអំពីព្រះយេហូវ៉ាដោយចិត្តសប្បាយ»។

លោកស្រីក្សេញញ៉ាកំពុងតែទន្ទឹងចាំថ្ងៃដែល‹សាច់គាត់នឹងបានស្រស់ជាងសាច់របស់កូនក្មេង ក៏នឹងប្រែទៅដូចកាលនៅក្មេងវិញ›។ (យ៉ូប ៣៣:២៥) បើសិនជាបុគ្គលអាយុជាង១០០ឆ្នាំ មិនចាត់ទុកខ្លួនថាចាស់ពេកមិនអាចរៀនខ្លឹមសារនៃជីវិតពីព្រះគម្ពីរ ចុះយ៉ាងណាវិញចំពោះអ្នក?

ទស្សនាវដ្ដីប៉មយាម សម្រាប់សិក្សា