ហេតុអ្វីយើងទទួលបុណ្យជ្រមុជទឹក?
ហេតុអ្វីយើងទទួលបុណ្យជ្រមុជទឹក?
«ចូរទៅបញ្ចុះបញ្ចូលឲ្យមានសិស្សនៅគ្រប់ទាំងសាសន៍ ព្រមទាំងធ្វើបុណ្យជ្រមុជទឹកឲ្យ»។—ម៉ាថាយ ២៨:១៩
១, ២. (ក) តើធ្លាប់មានបុណ្យជ្រមុជទឹកក្រោមកាលៈទេសៈអ្វីខ្លះ? (ខ) តើយើងត្រូវសួរសំនួរអ្វីខ្លះអំពីបុណ្យជ្រមុជទឹក?
ស្តេចហ្សាឡឺម៉ាញ ស្តេចនៃកុលសម្ព័ន្ធហ្វ្រង បានបង្ខំកុលសម្ព័ន្ធសាកហ្សិនដែលទ្រង់បានបង្ក្រាបនោះ ឲ្យទទួលបុណ្យជ្រមុជទឹកជាសមូហភាព នៅចន្លោះឆ្នាំ៧៧៥-៧៧៧ ស.យ.។ លោកចនឡត ប្រវត្ដិវិទូមួយរូបបានសរសេរថា៖ «ស្តេចហ្សាឡឺម៉ាញបានបង្ខំឲ្យគេផ្លាស់សាសនារបស់គេមកកាន់សាសនាគ្រីស្ទានវិញ តែពួកគេជាគ្រីស្ទានគ្រាន់តែក្នុងនាមប៉ុណ្ណោះ»។ ស្រដៀងគ្នាដែរ នៅឆ្នាំ៩៨៧ ស.យ. ក្រោយពីអ្នកគ្រប់គ្រងនៅប្រទេសរុស្សីឈ្មោះលោកវ្ល៉ាឌីមៀទីមួយ បានរៀបអាពាហ៍ពិពាហ៍ជាមួយនឹងម្ចាស់ក្សត្រីដែលកាន់សាសនាគ្រីស្ទានអូធូដុក្សរបស់សាសន៍ក្រិចនោះ លោកវ្ល៉ាឌីមៀបានសម្រេចចិត្តថា អនុរាស្ត្រគ្រប់រូបត្រូវផ្លាស់សាសនាទៅជាគ្រីស្ទានវិញ។ គាត់ចេញរាជបញ្ជាឲ្យអនុរាស្ត្រទទួលបុណ្យជ្រមុជទឹកសមូហភាព ទោះជាត្រូវបង្ខំគេដោយគំរាមសម្លាប់គេដោយដាវក្ដី!
២ តើបុណ្យជ្រមុជទឹកបែបនេះគឺសមត្រឹមត្រូវទេ? តើបុណ្យជ្រមុជទឹកបែបនេះពិតជាមានន័យទេ? តើមនុស្សណាក៏ដោយអាចទទួលបុណ្យជ្រមុជទឹកឬ?
តើមនុស្សត្រូវទទួលបុណ្យជ្រមុជទឹកយ៉ាងដូចម្ដេច?
៣, ៤. ហេតុអ្វីបានជាការប្រោះឬចាក់ទឹកលើក្បាល គឺមិនសមរម្យសំរាប់បុណ្យជ្រមុជទឹកគ្រីស្ទាន?
៣ ពេលស្តេចហ្សាឡឺម៉ាញនិងវ្ល៉ាឌីមៀទីមួយបានបង្ខំមនុស្សឲ្យទទួលបុណ្យជ្រមុជទឹកនោះ អ្នកគ្រប់គ្រងទាំងពីរនេះមិនបានធ្វើតាមព្រះបន្ទូលរបស់ព្រះឡើយ។ ការពិត បុណ្យជ្រមុជទឹកគ្មានប្រយោជន៍សោះ បើសិនបុណ្យជ្រមុជទឹកនោះត្រូវធ្វើដោយប្រោះទឹក ចាក់ទឹកលើក្បាល ឬក៏ជាការជ្រមុជទឹកមនុស្សដែលមិនទាន់បានរៀនសេចក្ដីពិតពីបទគម្ពីរនៅឡើយ។
៤ សូមពិចារណាអ្វីដែលបានកើតឡើងនៅឆ្នាំ២៩ ស.យ. ពេលព្រះយេស៊ូពីភូមិណាសារ៉ែតបានយាងទៅជួបនឹងលោកយ៉ូហានជាអ្នកធ្វើបុណ្យជ្រមុជទឹកថ្វាយទ្រង់។ នៅពេលនោះយ៉ូហានកំពុងតែធ្វើបុណ្យជ្រមុជទឹកឲ្យមនុស្សក្នុងទន្លេយ័រដាន់។ មនុស្សទាំងនោះបានមកជួបគាត់ដោយស្ម័គ្រចិត្តដើម្បីទទួលបុណ្យជ្រមុជទឹក។ តើយ៉ូហានគ្រាន់តែឲ្យគេឈរក្នុងទឹកទន្លេហើយចាក់ទឹក ឬប្រោះទឹកបន្ដិចបន្តួចលើក្បាលរបស់គេឬ? តើអ្វីបានកើតឡើងពេលយ៉ូហានធ្វើបុណ្យជ្រមុជទឹកថ្វាយព្រះយេស៊ូ? ម៉ាថាយរៀបរាប់ថា ក្រោយពីព្រះយេស៊ូទទួលបុណ្យជ្រមុជទឹក «ទ្រង់យាងឡើងពីទឹកភ្លាម»។ (ម៉ាថាយ ៣:១៦) នេះបានសេចក្ដីថា ទ្រង់បាននៅក្រោមទឹក ពីព្រោះរូបកាយទាំងមូលរបស់ទ្រង់បានត្រូវពន្លិចចូលទៅក្នុងទឹកទន្លេយ័រដាន់។ បុរសកំរៀវជនជាតិអេធីយ៉ូពីម្នាក់ដែលមានចិត្តជឿយ៉ាងស៊ប់ ក៏បានទទួលបុណ្យជ្រមុជទឹកដូចគ្នាដែរនៅក្នុង«ទីទឹក»។ ទីទឹកនេះគឺសំខាន់ ពីព្រោះបុណ្យជ្រមុជទឹករបស់ព្រះយេស៊ូនិងសិស្សរបស់ទ្រង់ ជាការជ្រមុជឲ្យលិចទៅក្នុងទឹកតែម្ដង។—កិច្ចការ ៨:៣៦
៥. តើគ្រីស្ទាននៅសម័យដើមបានធ្វើបុណ្យជ្រមុជទឹកឲ្យមនុស្សឯទៀតតាមរបៀបណា?
៥ ពាក្យភាសាក្រិចដែលបកប្រែថា «ធ្វើបុណ្យជ្រមុជទឹកឲ្យ» ឬក៏«បុណ្យជ្រមុជទឹក»ជាដើម សំដៅទៅលើការសង្កត់ឲ្យលិបទៅក្នុងទឹក ការដាក់ក្នុងទឹក ការលោតចុះក្នុងទឹកឲ្យលិច។ វចនានុក្រមព្រះគម្ពីរសរសេរដោយលោកស្មិត បកស្រាយថា៖ «បុណ្យជ្រមុជទឹកតាមន័យពិតហើយចំៗគឺជា ការពន្លិចឲ្យនៅក្រោមទឹក»។ សេចក្ដីបកប្រែព្រះគម្ពីរខ្លះប្រើពាក្យថា «យ៉ូហានជាអ្នកពន្លិចគេ» និង«យ៉ូហានជាអ្នកដាក់គេទៅក្នុងទឹក»។ (ម៉ាថាយ ៣:១, រ៉ធើហេម; ដែយ៉ូក្លត់ ពាហុភាសា) សៀវភៅប្រវត្ដិសាស្ត្រនៃគ្រីស្ទសាសនាក្នុងកំឡុងបីសតវត្សដំបូង (ជាភាសាអង់គ្លេស) ដែលបាននិពន្ធដោយលោកអូគូស្ទណីអានដឺចែងថា៖ «នៅដើមដំបូង បុណ្យជ្រមុជទឹកត្រូវធ្វើដោយគេពន្លិចចូលក្នុងទឹក»។ សៀវភៅមួយជាភាសាបារាំងចំណងជើងថា ឡារូសឌឺវ៉ាងទាមស្យេក្លឹ (ទីក្រុងប៉ារីស ឆ្នាំ១៩២៨) ចែងថា៖ «គ្រីស្ទានដំបូងបានទទួលបុណ្យជ្រមុជទឹកដោយត្រូវពន្លិចនៅកន្លែងណាដែលមានទឹក»។ សព្វវចនាធិប្បាយកាតូលិចថ្មី (ជាភាសាអង់គ្លេស) ចែងថា៖ «មានភស្តុតាងបញ្ជាក់ថា អ្នកកាន់សាសនាគ្រីស្ទនៅសម័យដើមបានធ្វើបុណ្យជ្រមុជទឹកដោយការពន្លិចទៅក្នុងទឹក»។ (ឆ្នាំ១៩៦៧ ក្បាលទី២ ទំព័រ៥៦) ហេតុនេះហើយ សព្វថ្ងៃនេះការទទួលបុណ្យជ្រមុជទឹកឲ្យក្លាយជាស្មរបន្ទាល់ព្រះយេហូវ៉ា គឺជាជំហានមួយដែលយើងធ្វើស្ម័គ្រពីចិត្ត ដោយត្រូវពន្លិចរូបកាយទាំងមូលចូលទៅក្នុងទឹក។
មូលហេតុថ្មីសំរាប់បុណ្យជ្រមុជទឹក
៦, ៧. (ក) តើយ៉ូហានធ្លាប់ធ្វើបុណ្យជ្រមុជទឹកឲ្យគេសំរាប់គោលបំណងអ្វី? (ខ) តើបុណ្យជ្រមុជទឹករបស់អ្នកកាន់តាមព្រះយេស៊ូមានលក្ខណៈថ្មីអ្វី?
៦ បុណ្យជ្រមុជទឹកដែលយ៉ូហានបានធ្វើឲ្យមនុស្សនៅពេលនោះ គឺមានគោលបំណងខុសគ្នាពីបុណ្យជ្រមុជទឹកដែលអ្នកកាន់តាមព្រះយេស៊ូបានធ្វើនោះ។ (យ៉ូហាន ៤:១, ២) យ៉ូហានបានធ្វើបុណ្យជ្រមុជទឹកឲ្យមនុស្សដើម្បីបង្ហាញជាចំហថា គេបានប្រែចិត្តចំពោះអំពើបាបរបស់គេ ដែលបានប្រព្រឹត្តខុសនឹងក្រិត្យវិន័យលោកម៉ូសេ។ a (លូកា ៣:៣) ប៉ុន្តែ បុណ្យជ្រមុជទឹករបស់សិស្សព្រះយេស៊ូមានលក្ខណៈថ្មី។ នៅបុណ្យថ្ងៃទី៥០ នាឆ្នាំ៣៣ ស.យ. សាវ័កពេត្រុសបានជំរុញទឹកចិត្តអ្នកស្ដាប់ឲ្យ«ប្រែចិត្តចុះ ហើយទទួលបុណ្យជ្រមុជទឹកទាំងអស់គ្នា ដោយនូវព្រះនាមព្រះយេស៊ូវគ្រីស្ទ ប្រយោជន៍ឲ្យបានរួចពីបាប»។ (កិច្ចការ ២:៣៧-៤១) ទោះជាពេត្រុសកំពុងតែនិយាយទៅកាន់ជនរួមជាតិសាសន៍យូដា និងអ្នកដែលបានផ្លាស់សាសនាមកកាន់តាមសាសន៍យូដាក៏ដោយ គាត់មិនចង់និយាយអំពីការទទួលបុណ្យជ្រមុជទឹកដើម្បីបង្ហាញពីការប្រែចិត្តចំពោះអំពើបាបខុសនឹងក្រិត្យវិន័យទេ ហើយគាត់ក៏មិនចង់និយាយថា ការទទួលបុណ្យជ្រមុជទឹកដោយនូវព្រះនាមព្រះយេស៊ូតំណាងការលាងបាបនោះដែរ។—កិច្ចការ ២:១០
៧ នៅគ្រានោះ ពេត្រុសបានប្រើ«កូនសោ»ទីមួយ«នៃនគរស្ថានសួគ៌»។ តើត្រូវប្រើកូនសោនោះសំរាប់អ្វី? ដើម្បីបើកសម្ដែងនូវចំណេះដឹងឲ្យអ្នកស្ដាប់យល់អំពីឱកាសដែលអាចចូលក្នុងព្រះរាជាណាចក្រស្ថានសួគ៌។ (ម៉ាថាយ ១៦:១៩) ដោយព្រោះសាសន៍យូដាមិនព្រមទទួលស្គាល់ព្រះយេស៊ូជាព្រះមេស្ស៊ីនោះ ការប្រែចិត្តនិងការអនុវត្តជំនឿទៅលើទ្រង់គឺជាលក្ខណៈថ្មីមួយដែលត្រូវការជាចាំបាច់ដើម្បីស្វែងរកការអត់ឱនទោសពីព្រះ។ ពួកគេផ្ដល់ភស្តុតាងជាសាធារណៈថា គេមានជំនឿបែបនេះ ដោយត្រូវពន្លិចរូបកាយទាំងមូលទៅក្នុងទឹកដោយនូវព្រះនាមព្រះយេស៊ូគ្រីស្ទ។ តាមវិធីនេះ ពួកគេអាចបង្ហាញថាគេបានថ្វាយខ្លួនចំពោះព្រះតាមរយៈព្រះគ្រីស្ទ។ សព្វថ្ងៃនេះ អស់អ្នកដែលចង់ពេញព្រះហឫទ័យព្រះត្រូវអនុវត្តជំនឿដូចគ្នាដែរ ដោយថ្វាយខ្លួនគេចំពោះព្រះយេហូវ៉ា ហើយទទួលបុណ្យជ្រមុជទឹកគ្រីស្ទានដើម្បីបង្ហាញពីការថ្វាយខ្លួនមិនទើសទាល់ចំពោះព្រះដ៏ខ្ពស់បំផុត។
ចំណេះត្រឹមត្រូវគឺត្រូវការជាចាំបាច់
៨. ហេតុអ្វីបានជាបុណ្យជ្រមុជទឹកគ្រីស្ទានមិនមែនសំរាប់មនុស្សទាំងអស់?
៨ បុណ្យជ្រមុជទឹកគ្រីស្ទានមិនមែនសំរាប់មនុស្សទាំងអស់នោះទេ។ ព្រះយេស៊ូបានបង្គាប់អ្នកកាន់តាមទ្រង់ថា៖ «ចូរទៅបញ្ចុះបញ្ចូលឲ្យមានសិស្សនៅគ្រប់ទាំងសាសន៍ ព្រមទាំងធ្វើបុណ្យជ្រមុជទឹកឲ្យ ដោយនូវព្រះនាមព្រះវរបិតា ព្រះរាជបុត្រា នឹងព្រះវិញ្ញាណបរិសុទ្ធចុះ ហើយបង្រៀន ឲ្យគេកាន់តាមគ្រប់ទាំងសេចក្ដី ដែលខ្ញុំបានបង្គាប់មកអ្នករាល់គ្នាផង»។ (ម៉ាថាយ ២៨:១៩, ២០) មុនដែលមនុស្សអាចទទួលបុណ្យជ្រមុជទឹក គេត្រូវ‹រៀនឲ្យកាន់តាមគ្រប់ទាំងសេចក្ដីដែលព្រះយេស៊ូបានបង្គាប់សិស្សទ្រង់›។ ដូច្នេះ ការបង្ខំមនុស្សឲ្យទទួលបុណ្យជ្រមុជទឹក ពេលគេគ្មានជំនឿដែលមានមូលដ្ឋានលើចំណេះត្រឹមត្រូវពីព្រះបន្ទូលរបស់ព្រះនោះ នេះឈ្មោះថាបុណ្យជ្រមុជទឹកអត់ប្រយោជន៍ និងផ្ទុយស្រឡះពីបញ្ជាដែលព្រះយេស៊ូបានបង្គាប់ដល់អ្នកកាន់តាមដ៏ពិតរបស់ទ្រង់។—ហេព្រើរ ១១:៦
៩. តើការទទួលបុណ្យជ្រមុជទឹក«ដោយនូវព្រះនាមព្រះវរបិតា»មានន័យយ៉ាងណា?
៩ តើការទទួលបុណ្យជ្រមុជទឹក«ដោយនូវព្រះនាមព្រះវរបិតា» មានន័យយ៉ាងណា? (កំណែជាអក្សរទ្រេត) នេះបានសេចក្ដីថាអ្នកដែលទទួលបុណ្យជ្រមុជទឹកទទួលស្គាល់ឋានៈរបស់ព្រះវរបិតាសួគ៌ារបស់គេ និងទទួលស្គាល់អំណាចទ្រង់។ យ៉ាងនេះ គេទទួលស្គាល់ព្រះយេហូវ៉ាជាអ្នកបង្កើត និងជា«ព្រះដ៏ខ្ពស់បំផុតលើផែនដីទាំងមូល» ព្រមទាំងជាព្រះមហាក្សត្រសកលលោកទាំងមូល។—ទំនុកដំកើង ៨៣:១៨; អេសាយ ៤០:២៨; កិច្ចការ ៤:២៤
១០. តើការទទួលបុណ្យជ្រមុជទឹក‹ដោយនូវព្រះនាមព្រះរាជបុត្រា›មានន័យអ្វី?
១០ ការទទួលបុណ្យជ្រមុជទឹក‹ដោយនូវព្រះនាមព្រះរាជបុត្រា› បានសេចក្ដីថាមនុស្សម្នាក់ទទួលស្គាល់ឋានៈរបស់ព្រះយេស៊ូនិងអំណាចរបស់ទ្រង់ជារាជបុត្រាតែមួយគត់ដែលព្រះបង្កើតផ្ទាល់។ (យ៉ូហានទី១ ៤:៩) អស់អ្នកដែលមានលក្ខណៈគ្រប់គ្រាន់ដើម្បីទទួលបុណ្យជ្រមុជទឹក គឺគេទទួលស្គាល់ព្រះយេស៊ូជាខ្សែរយៈដែលព្រះប្រើដើម្បីផ្ដល់«ថ្លៃលោះមនុស្សជាច្រើន»។ (ម៉ាថាយ ២០:២៨; ធីម៉ូថេទី១ ២:៥, ៦) អ្នកដែលនឹងទទួលបុណ្យជ្រមុជទឹកក៏ត្រូវទទួលស្គាល់ថា«ព្រះបានលើកទ្រង់ឡើងយ៉ាងខ្ពស់»។—ភីលីព ២:៨-១១; វិវរណៈ ១៩:១៦
១១. តើការទទួលបុណ្យជ្រមុជទឹក‹ដោយនូវព្រះនាមវិញ្ញាណបរិសុទ្ធ›បានន័យអ្វី?
១១ តើការទទួលបុណ្យជ្រមុជទឹក‹ដោយនូវព្រះនាមវិញ្ញាណបរិសុទ្ធ› មានមានន័យអ្វី? នេះបានន័យថា អ្នកដែលនឹងទទួលបុណ្យជ្រមុជទឹកទទួលស្គាល់ថា វិញ្ញាណបរិសុទ្ធគឺជាសកម្មពលរបស់ព្រះយេហូវ៉ា ដែលទ្រង់ប្រើតាមវិធីផ្សេងៗសមស្របទៅតាមគោលបំណងរបស់ទ្រង់។ (លោកុប្បត្តិ ១:២; សាំយូអែលទី២ ២៣:១, ២; ពេត្រុសទី២ ១:២១) អ្នកដែលមានលក្ខណៈគ្រប់គ្រាន់ដើម្បីទទួលបុណ្យជ្រមុជទឹក ក៏ទទួលស្គាល់ថា វិញ្ញាណបរិសុទ្ធតែងជួយគេយល់ដឹងនូវ«សេចក្ដីជ្រាលជ្រៅនៃព្រះ» និងជួយគេបន្តផ្សព្វផ្សាយសារព្រះរាជាណាចក្រ ហើយសម្ដែងផលផ្លែនៃវិញ្ញាណនោះ ដែលរួមមាន«សេចក្ដីស្រឡាញ់ អំណរអរ មេត្រីភាព អត់ធ្មត់ សុភាព សប្បុរស ស្មោះត្រង់ ស្លូតបូត ហើយដឹងខ្នាត»។—កូរិនថូសទី១ ២:១០; កាឡាទី ៥:២២, ២៣; យ៉ូអែល ២:២៨, ២៩
សារៈសំខាន់នៃការប្រែចិត្តនិងការផ្លាស់ប្រែគន្លងជីវិត
១២. តើបុណ្យជ្រមុជទឹកគ្រីស្ទានជាប់ទាក់ទងនឹងការប្រែចិត្តយ៉ាងដូចម្ដេចខ្លះ?
១២ ពិធីបុណ្យជ្រមុជទឹកជាពិធីមួយដែលព្រះសព្វព្រះហឫទ័យ និងដែលទាក់ទងនឹងការប្រែចិត្ត លើកលែងតែក្នុងករណីបុណ្យជ្រមុជទឹករបស់ព្រះយេស៊ូដែលមនុស្សម្នាក់គ្មានបាបទេ។ ពេលយើងប្រែចិត្ត យើងសោកស្ដាយយ៉ាងខ្លាំង ឬក៏សោកសង្រេងដោយព្រោះអ្វីដែលយើងបានធ្វើ ឬក៏បានអាក់ខានធ្វើ។ សាសន៍យូដានៅសតវត្សទីមួយដែលចង់ពេញព្រះហឫទ័យព្រះ នោះត្រូវប្រែចិត្តពីអំពើបាបរបស់គេដែលប្រឆាំងនឹងព្រះគ្រីស្ទ។ (កិច្ចការ ៣:១១-១៩) អ្នកជឿខ្លះៗពីចំណោមសាសន៍ដទៃនៅទីក្រុងកូរិនថូស បានប្រែចិត្តពីអំពីសហាយស្មន់ ការថ្វាយបង្គំរូបព្រះ ការលួច និងបាបធ្ងន់ធ្ងរឯទៀត។ ដោយព្រោះគេបានប្រែចិត្តដូច្នេះ ពួកគេបានត្រូវ«លាងស្អាត»ដោយព្រះលោហិតរបស់ព្រះយេស៊ូ ហើយបានត្រូវ«ញែកជាបរិសុទ្ធ»សំរាប់កិច្ចបំរើព្រះ និងត្រូវ«រាប់ជាសុចរិត»ដោយនូវព្រះនាមព្រះគ្រីស្ទនិងតាមរយៈវិញ្ញាណបរិសុទ្ធ។ (កូរិនថូសទី១ ៦:៩-១១) ការប្រែចិត្តគឺជាជំហានដ៏សំខាន់មួយ ឈានឆ្ពោះទៅរកការទទួលមនសិការជ្រះថ្លា និងព្រះរំដោះគេឲ្យរួចពីទោសដែលមកពីបាបរបស់ខ្លួន។—ពេត្រុសទី១ ៣:២១
១៣. ស្តីអំពីពិធីបុណ្យជ្រមុជទឹក តើការផ្លាស់ប្រែគន្លងជីវិតតម្រូវឲ្យយើងធ្វើអ្វីខ្លះ?
១៣ មុនដែលមនុស្សម្នាក់អាចទទួលបុណ្យជ្រមុជទឹកជាស្មរបន្ទាល់ព្រះយេហូវ៉ា គាត់ត្រូវផ្លាស់ប្រែគន្លងជីវិតគាត់ជាមុនសិន។ ការផ្លាស់ប្រែគន្លងជីវិតជាអ្វីដែលជនម្នាក់ត្រូវធ្វើដោយស្ម័គ្រពីចិត្តនិងដោយចិត្តសេរីផងដែរ ពីព្រោះគាត់បានសម្រេចចិត្តដោយមិនទើសទាល់ក្នុងការកាន់តាមព្រះគ្រីស្ទ។ បុគ្គលបែបនេះបានលះចោលជ្រះស្រឡះនូវការប្រព្រឹត្តដ៏ខុសឆ្គងរបស់គេពីមុនមក ហើយប្ដេជ្ញាចិត្តធ្វើអ្វីដ៏ត្រឹមត្រូវតាមទស្សនៈរបស់ព្រះវិញ។ តាមបទគម្ពីរ កិរិយាស័ព្ទជាភាសាហេព្រើរនិងភាសាក្រិចដែលសំដៅទៅលើការផ្លាស់ប្រែគន្លងជីវិតនោះបានសេចក្ដីថា បែរមកវិញ។ សកម្មភាពនេះបញ្ជាក់នូវការត្រឡប់ពីការប្រព្រឹត្តខុសបែរមកឯព្រះវិញ។ (ពង្សាវតារក្សត្រទី១ ៨:៣៣, ៣៤) ការផ្លាស់ប្រែគន្លងជីវិតត្រូវមានការ«ប្រព្រឹត្តបែបសំណំនឹងការប្រែចិត្ត»។ (កិច្ចការ ២៦:២០) ដូច្នេះ យើងត្រូវបោះបង់ចោលការថ្វាយបង្គំមិនពិត ហើយប្រព្រឹត្តតាមបញ្ញត្ដិរបស់ព្រះ និងថ្វាយបង្គំព្រះយេហូវ៉ាតែមួយអង្គប៉ុណ្ណោះ។ (ចោទិយកថា ៣០:២, ៨-១០; សាំយូអែលទី១ ៧:៣) ការផ្លាស់ប្រែគន្លងជីវិតបណ្ដាលឲ្យយើងផ្លាស់ប្រែគំនិត គោលបំណង និងលក្ខណៈសម្បត្ដិរបស់យើង។ (អេសេគាល ១៨:៣១) គឺប្រៀបដូចជាយើងបែរមកពេលដែលលក្ខណៈសម្បត្ដិចាស់ត្រូវជំនួសដោយលក្ខណៈសម្បត្ដិថ្មីវិញ។—កិច្ចការ ៣:១៩; អេភេសូរ ៤:២០-២៤; កូល៉ុស ៣:៥-១៤
ការថ្វាយខ្លួនអស់ពីចិត្តគឺជាអ្វីដ៏ចាំបាច់
១៤. ពេលអ្នកកាន់តាមព្រះយេស៊ូថ្វាយខ្លួននោះ តើនេះបញ្ជាក់ពីអ្វី?
១៤ អ្នកកាន់តាមព្រះយេស៊ូក៏ត្រូវថ្វាយខ្លួនអស់ពីចិត្តចំពោះព្រះ មុនដែលគេទទួលបុណ្យជ្រមុជទឹក។ ការថ្វាយខ្លួនតំណាងការញែកទុកដោយឡែកសំរាប់គោលបំណងដ៏វិសុទ្ធ។ ជំហាននេះគឺសំខាន់ដ៏ម្ល៉េះបានជា យើងត្រូវអធិស្ឋានទូលព្រះយេហូវ៉ាថា យើងបានសម្រេចចិត្តថ្វាយបង្គំទ្រង់តែមួយព្រះអង្គជានិច្ច។ (ចោទិយកថា ៥:៩) យ៉ាងច្បាស់ហើយ យើងមិនបានថ្វាយខ្លួនចំពោះកិច្ចការមួយ ឬក៏ថ្វាយដល់មនុស្សណាម្នាក់ទេ តែយើងបានថ្វាយខ្លួនចំពោះព្រះទេតើ។
១៥. ហេតុអ្វីបានជាអ្នកដែលទទួលបុណ្យជ្រមុជទឹកត្រូវពន្លិចរូបកាយទាំងមូលទៅក្នុងទឹក?
១៥ ពេលយើងថ្វាយខ្លួនចំពោះព្រះតាមរយៈព្រះគ្រីស្ទនោះ យើងបង្ហាញពីការប្ដេជ្ញាចិត្តដែលត្រូវប្រើជីវិតយើងសមស្របទៅតាមព្រះហឫទ័យរបស់ព្រះ ដូចដែលបង្ហាញយ៉ាងចំក្នុងបទគម្ពីរ។ អ្នកដែលទទួលបុណ្យជ្រមុជទឹកត្រូវពន្លិចរូបកាយទាំងមូលទៅក្នុងទឹកតែម្ដង នេះតំណាងការថ្វាយខ្លួនរបស់គេ ដូចជាព្រះយេស៊ូបានទទួលបុណ្យជ្រមុជទឹកក្នុងទន្លេយ័រដាន់ ដើម្បីបង្ហាញថាទ្រង់បានប្រគល់អង្គទ្រង់ថ្វាយព្រះ។ (ម៉ាថាយ ៣:១៣) គួរឲ្យកត់សម្គាល់ដែរថា នៅគ្រាសំខាន់នោះព្រះយេស៊ូកំពុងតែអធិស្ឋានផងដែរ។—លូកា ៣:២១, ២២
១៦. ពេលយើងមើលឃើញបុគ្គលទទួលបុណ្យជ្រមុជទឹក តើយើងអាចបង្ហាញអំណររបស់យើងយ៉ាងណាដែលសមគួរ?
១៦ បុណ្យជ្រមុជទឹករបស់ព្រះយេស៊ូគឺជាពិធីដ៏សំខាន់និងមានភាពថ្លៃថ្នូរ តែក៏ជាគ្រាសប្បាយផងដែរ។ បុណ្យជ្រមុជទឹកគ្រីស្ទានសព្វថ្ងៃនេះក៏ដូចគ្នាដែរ។ ពេលយើងឃើញបុគ្គលដែលចង់បង្ហាញពីការថ្វាយខ្លួនរបស់គេចំពោះព្រះនោះ យើងអាចសម្ដែងអំណររបស់យើងដោយទះដៃបែបបង្ហាញការគោរព និងដោយសរសើរគេយ៉ាងកក់ក្ដៅ។ ប៉ុន្តែ ការស្រែកអបអរ និងការហួចជាដើម ដាច់ខាតត្រូវជៀសវាងដោយគិតពីភាពពិសិដ្ឋនៃពិធីនេះ ដែលជាការបង្ហាញនូវជំនឿរបស់ខ្លួន។ យើងសម្ដែងអំណររបស់យើងដោយសេចក្ដីថ្លៃថ្នូរ។
១៧, ១៨. តើអ្វីជួយអ្នកចាស់ទុំវិនិច្ឆ័យថា តើបុគ្គលម្នាក់មានលក្ខណៈគ្រប់គ្រាន់ដើម្បីទទួលបុណ្យជ្រមុជទឹក?
១៧ ស្មរបន្ទាល់ព្រះយេហូវ៉ាមិនដែលបង្ខិតបង្ខំអ្នកណាម្នាក់ឲ្យទទួលបុណ្យជ្រមុជទឹកទេ ជាហេតុធ្វើឲ្យគេខុសគ្នាឆ្ងាយពីអ្នកដែលប្រោះទឹកលើកូនង៉ា ឬមួយក៏បង្ខំដោយគាបសង្កត់មនុស្សឲ្យទទួលបុណ្យជ្រមុជទឹកជាសមូហភាព ពេលគេមិនទាន់បានទទួលចំណេះដឹងពីព្រះគម្ពីរនៅឡើយនោះ។ តាមពិត ស្មរបន្ទាល់មិនជ្រមុជទឹកឲ្យអ្នកណា ដែលគ្មានលក្ខណៈខាងវិញ្ញាណគ្រប់គ្រាន់ទេ។ សូម្បីតែមុនបុគ្គលម្នាក់អាចក្លាយជាអ្នកផ្សាយដំណឹងល្អដែលមិនទាន់ជ្រមុជទឹកក្ដី អ្នកចាស់ទុំគ្រីស្ទានធ្វើការស្ទាបស្ទង់សាកសួរឲ្យប្រាកដថា អ្នកនោះយល់សេចក្ដីបង្រៀនបឋមក្នុងព្រះគម្ពីរ និងកំពុងតែរស់សមស្របទៅតាមសេចក្ដីបង្រៀននោះ ហើយក៏ឆ្លើយយល់ព្រមតបនឹងសំនួរមួយដូចតទៅនេះថា៖ «តើអ្នកពិតជាចង់ក្លាយជាស្មរបន្ទាល់ព្រះយេហូវ៉ាម្នាក់ឬទេ?»។
១៨ ក្នុងករណីភាគច្រើន ពេលបុគ្គលម្នាក់កំពុងតែរួមចំណែកយ៉ាងល្អក្នុងកិច្ចការផ្សាយព្រះរាជាណាចក្រ និងគាត់ប្រាប់ថា គាត់ចង់ទទួលបុណ្យជ្រមុជទឹកនោះ ពេលនោះទើបអ្នកចាស់ទុំពិគ្រោះគ្នាជាមួយគាត់ឲ្យប្រាកដថា គាត់ជាអ្នកជឿដែលបានថ្វាយខ្លួនចំពោះព្រះយេហូវ៉ា ហើយបានបំពេញតម្រូវការរបស់ព្រះដែលចាំបាច់ដើម្បីទទួលបុណ្យជ្រមុជទឹក។ (កិច្ចការ ៤:៤; ១៨:៨) របៀបគេឆ្លើយដោយផ្ទាល់នូវសំនួរជាងមួយរយផ្សេងៗស្តីពីសេចក្ដីបង្រៀនព្រះគម្ពីរ នឹងជួយអ្នកចាស់ទុំវិនិច្ឆ័យថា តើអ្នកនោះបំពេញតម្រូវការព្រះគម្ពីរដើម្បីអាចទទួលបុណ្យជ្រមុជទឹកបានឬទេ? មានបុគ្គលខ្លះដែលពុំមានលក្ខណៈគ្រប់គ្រាន់ដើម្បីទទួលបុណ្យជ្រមុជទឹក ដូច្នេះគេមិនទទួលការអនុម័តឲ្យទទួលបុណ្យជ្រមុជទឹកគ្រីស្ទានទេ។
តើមានអ្វីធ្វើឲ្យអ្នកស្ទាក់ស្ទើរក្នុងចិត្តទេ?
១៩. យោងទៅតាមយ៉ូហាន ៦:៤៤ តើអ្នកណាអាចគ្រងព្រះរាជាណាចក្រជាមួយនឹងព្រះយេស៊ូ?
១៩ មនុស្សជាច្រើនដែលបានទទួលបុណ្យជ្រមុជទឹកជាសមូហភាពនោះ ប្រហែលជាត្រូវបានគេប្រាប់ជាមុនថា គេនឹងឡើងទៅស្ថានសួគ៌ក្រោយពីស្លាប់។ ប៉ុន្តែ ព្រះយេស៊ូបានមានបន្ទូលអំពីអ្នកកាន់តាមទ្រង់ថា៖ «គ្មានអ្នកណាអាចនឹងមកឯខ្ញុំបានទេ លើកតែព្រះវរបិតា ដែលចាត់ខ្ញុំឲ្យមក ទ្រង់ទាញនាំគេប៉ុណ្ណោះ»។ (យ៉ូហាន ៦:៤៤) ព្រះយេហូវ៉ាបានទាញនាំមនុស្ស១៤៤.០០០នាក់មកឯព្រះគ្រីស្ទ ហើយពួកគេនឹងគ្រងព្រះរាជាណាចក្រជាមួយទ្រង់នៅស្ថានសួគ៌។ ការបង្ខិតបង្ខំមនុស្សឲ្យទទួលបុណ្យជ្រមុជទឹក មិនដែលញែកទុកមនុស្សនោះឲ្យទទួលឋានៈដ៏រុងរឿងក្នុងការរៀបចំរបស់ព្រះឡើយ។—រ៉ូម ៨:១៤-១៧; ថែស្សាឡូនីចទី២ ២:១៣; វិវរណៈ ១៤:១
២០. តើអ្វីអាចជួយបុគ្គលខ្លះដែលមិនទាន់បានទទួលបុណ្យជ្រមុជទឹក?
២០ ជាពិសេស តាំងតែពីពាក់កណ្ដាលទសវត្សពីឆ្នាំ១៩៣០ មនុស្សច្រើនឥតគណនាដែលមានសេចក្ដីសង្ឃឹមរួចរស់ជីវិតផុតពី«គ្រាវេទនាយ៉ាងធំ»ហើយរស់នៅលើផែនដីជារៀងរហូត គេក៏បានចូលរួមជាមួយ«ចៀមឯទៀត»របស់ព្រះយេស៊ូ។ (វិវរណៈ ៧:៩, ១៤; យ៉ូហាន ១០:១៦) ពួកគេមានលក្ខណៈគ្រប់គ្រាន់ដើម្បីទទួលបុណ្យជ្រមុជទឹក ពីព្រោះគេបានរស់នៅសមស្របទៅតាមព្រះបន្ទូលរបស់ព្រះ ហើយគេស្រឡាញ់ទ្រង់«អស់អំពីចិត្ត អស់អំពីព្រលឹង អស់អំពីកម្លាំង ហើយអស់អំពីគំនិត»គេដែរ។ (លូកា ១០:២៥-២៨) ទោះជាបុគ្គលខ្លះទទួលស្គាល់ថា ស្មរបន្ទាល់ព្រះយេហូវ៉ា‹ថ្វាយបង្គំព្រះដោយវិញ្ញាណ និងសេចក្ដីពិត›យ៉ាងណាក៏ដោយ ពួកគេមិនទាន់បានធ្វើតាមគំរូព្រះយេស៊ូ ដោយទទួលបុណ្យជ្រមុជទឹកជាសាធារណៈនៅឡើយទេ ដែលនេះជាការបញ្ជាក់ពីសេចក្ដីស្រឡាញ់របស់គេចំពោះព្រះយេហូវ៉ា និងថាគេចង់ថ្វាយបង្គំទ្រង់តែមួយព្រះអង្គប៉ុណ្ណោះ។ (យ៉ូហាន ៤:២៣, ២៤; ចោទិយកថា ៤:២៤; ម៉ាកុស ១:៩-១១) ការអធិស្ឋានយ៉ាងជាក់លាក់និងអស់ពីចិត្តអំពីជំហានដ៏សំខាន់នេះ ប្រហែលជានឹងជំរុញចិត្តគេ ហើយនិងផ្ដល់សេចក្ដីក្លាហានឲ្យគេសម្របជីវិតទៅតាមព្រះបន្ទូលរបស់ព្រះ ថ្វាយខ្លួនចំពោះព្រះយេហូវ៉ាដោយមិនទើសទាល់ ហើយទទួលបុណ្យជ្រមុជទឹក។
២១, ២២. មនុស្សខ្លះស្ទាក់ស្ទើរមិនថ្វាយខ្លួននិងមិនទទួលបុណ្យជ្រមុជទឹកទេ តើដោយព្រោះមូលហេតុអ្វីខ្លះ?
២១ បុគ្គលខ្លះស្ទាក់ស្ទើរមិនថ្វាយខ្លួនហើយមិនទទួលបុណ្យជ្រមុជទឹកទេ ពីព្រោះគេរវល់តែនឹងកិច្ចការលោកីយ៍ ឬមួយក៏គេជក់ដេញតាមរកទ្រព្យសម្បត្ដិដល់ម្ល៉េះបានជាគេមិនសូវមានពេលសំរាប់អ្វីៗខាងវិញ្ញាណទេ។ (ម៉ាថាយ ១៣:២២; យ៉ូហានទី១ ២:១៥-១៧) គេនឹងអាចមានសុភមង្គលបានច្រើនណាស់! បើគេផ្លាស់ប្ដូរទស្សនៈនិងគោលដៅរបស់គេ! ការចូលទៅជិតព្រះយេហូវ៉ានឹងបង្កើនភាពខាងវិញ្ញាណរបស់គេ ក៏ជួយរំលែកទុក្ខព្រួយគេ ហើយផ្ដល់សេចក្ដីសុខកាយសប្បាយចិត្តដែលមកពីការធ្វើតាមព្រះហឫទ័យរបស់ព្រះ។—ទំនុកដំកើង ១៦:១១; ៤០:៨; សុភាសិត ១០:២២; ភីលីព ៤:៦, ៧
២២ អ្នកឯទៀតនិយាយថាគេស្រឡាញ់ព្រះយេហូវ៉ា តែគេមិនថ្វាយខ្លួននិងទទួលបុណ្យជ្រមុជទឹកទេ ពីព្រោះគេគិតថាគេនឹងអាចរួចពីភារកិច្ចធ្វើតាមព្រះបន្ទូល។ ប៉ុន្តែ ចំពោះព្រះភក្ដ្រព្រះ យើងម្នាក់ៗនឹងទទួលខុសត្រូវនឹងអ្វីៗដែលយើងធ្វើ។ យើងមានភារកិច្ចធ្វើតាមព្រះបន្ទូលព្រះយេហូវ៉ា ចាប់តាំងពីលើកដំបូងដែលយើងបានឮនូវព្រះបន្ទូលរបស់ទ្រង់។ (អេសេគាល ៣៣:៧-៩; រ៉ូម ១៤:១២) ដោយព្រោះសាសន៍អ៊ីស្រាអែលពីបុរាណជា‹រាស្ត្រព្រះយេហូវ៉ាបានរើសយក› នោះគេកើតមកក្នុងសាសន៍មួយដែលបានត្រូវថ្វាយចំពោះព្រះយេហូវ៉ាហើយ ជាហេតុធ្វើឲ្យគេមានភារកិច្ចបំរើព្រះយេហូវ៉ាយ៉ាងស្មោះត្រង់សមស្របទៅតាមគោលការណ៍របស់ទ្រង់។ (ចោទិយកថា ៧:៦, ១១) សព្វថ្ងៃនេះ គ្មាននរណាម្នាក់កើតមកក្នុងសាសន៍មួយដែលត្រូវថ្វាយចំពោះព្រះរួចទៅហើយនោះទេ ប៉ុន្តែបើសិនជាយើងបានទទួលការណែនាំត្រឹមត្រូវពីបទគម្ពីររួចទៅហើយ យើងត្រូវធ្វើតាមការណែនាំនោះដោយមានជំនឿ។
២៣, ២៤. តើបុគ្គលផ្សេងៗមិនទទួលបុណ្យជ្រមុជទឹកនោះ ដោយព្រោះខ្លាចអ្វី?
២៣ ការភិតភ័យថាខ្លួនខ្វះខាតនូវចំណេះគ្រប់គ្រាន់នោះ ប្រហែលជាហេតុធ្វើឲ្យបុគ្គលខ្លះស្ទាក់ស្ទើរមិនទទួលបុណ្យជ្រមុជទឹក។ ប៉ុន្តែ យើងទាំងអស់គ្នានៅតែមានអ្វីជាច្រើនដែលយើងត្រូវរៀន ពីព្រោះ«មនុស្សនឹងរកយល់មិនបាន ពីកិច្ចការដែលព្រះបានធ្វើ តាំងពីដើមដរាបដល់ចុងនោះឡើយ»។ (សាស្ដា ៣:១១) សូមគិតអំពីគំរូរបស់បុរសកំរៀវជនជាតិអេធីយ៉ូពី។ ដោយសារគាត់បានផ្លាស់សាសនាមកកាន់សាសនាយូដានោះ គាត់មានចំណេះដឹងអំពីបទគម្ពីរ តែគាត់មិនបានដឹងអ្វីៗទាំងអស់អំពីគោលបំណងរបស់ព្រះទេ។ ប៉ុន្តែ ក្រោយគាត់រៀនអំពីសំវិធានការរបស់ព្រះយេហូវ៉ាសំរាប់សេចក្ដីសង្គ្រោះតាមរយៈយញ្ញបូជាលោះរបស់ព្រះយេស៊ូនោះមក បុរសកំរៀវនេះបានទទួលបុណ្យជ្រមុជទឹកភ្លាមៗ។—កិច្ចការ ៨:២៦-៣៨
២៤ បុគ្គលខ្លះស្ទាក់ស្ទើរមិនថ្វាយខ្លួនចំពោះព្រះពីព្រោះគេខ្លាចថា គេមិនអាចបំពេញតាមការថ្វាយខ្លួននោះ។ ម៉ូនីកជាយុវនារីម្នាក់អាយុ១៧ឆ្នាំបានស្រដីថា៖ «ខ្ញុំស្ទាក់ស្ទើរមិនទទួលបុណ្យជ្រមុជទឹកដោយសារខ្ញុំខ្លាចថា ខ្ញុំមិនអាចបំពេញតាមការថ្វាយខ្លួននោះ»។ ប៉ុន្តែ បើសិនជាយើងទុកចិត្តទៅលើព្រះយេហូវ៉ាអស់ពីចិត្ត ‹ទ្រង់នឹងដំរង់អស់ទាំងផ្លូវច្រករបស់យើង›។ ទ្រង់នឹងជួយយើងបន្ត«ប្រព្រឹត្តតាមសេចក្ដីពិត»ជាអ្នកបំរើស្មោះត្រង់របស់ទ្រង់។—សុភាសិត ៣:៥, ៦; យ៉ូហានទី៣ ៤
២៥. តើយើងគួរនឹងរកចំលើយនៃសំនួរអ្វី?
២៥ ជារៀងរាល់ឆ្នាំ មនុស្សរាប់ពាន់នាក់ត្រូវចិត្តគេជំរុញឲ្យថ្វាយខ្លួននិងទទួលបុណ្យជ្រមុជទឹក ដោយសារគេទុកចិត្តទាំងស្រុងទៅលើព្រះយេហូវ៉ានិងស្រឡាញ់ទ្រង់អស់ពីចិត្ត។ អស់អ្នកបំរើព្រះយេហូវ៉ាដែលបានថ្វាយខ្លួនហើយ ច្បាស់ជាចង់នៅស្មោះត្រង់នឹងទ្រង់ជាប្រាកដ។ ប៉ុន្តែ យើងកំពុងតែរស់នៅគ្រាលំបាកណាស់ ហើយមានអ្វីៗជាច្រើនដែលសាកនូវភាពមុតមាំនៃជំនឿរបស់យើង។ (ធីម៉ូថេទី២ ៣:១-៥) តើយើងអាចធ្វើយ៉ាងណាដើម្បីបំពេញតាមការថ្វាយខ្លួនរបស់យើងចំពោះព្រះយេហូវ៉ា? នេះជាអ្វីដែលយើងនឹងពិចារណាក្នុងអត្ថបទជាបន្ទាប់។
[កំណត់សម្គាល់]
a ដោយព្រោះព្រះយេស៊ូគ្មានបាប នោះទ្រង់មិនបានទទួលបុណ្យជ្រមុជទឹកដើម្បីបង្ហាញពីការប្រែចិត្តទេ។ បុណ្យជ្រមុជទឹករបស់ទ្រង់មានន័យថាទ្រង់បានប្រគល់អង្គទ្រង់ដើម្បីធ្វើតាមព្រះហឫទ័យរបស់ព្រះវរបិតាទ្រង់។—ហេព្រើរ ៧:២៦; ១០:៥-១០
តើអ្នកនៅចាំទេ?
• តើបុណ្យជ្រមុជទឹកគ្រីស្ទានមានលំនាំអ្វី?
• អ្នកដែលចង់ទទួលបុណ្យជ្រមុជទឹក តើគេត្រូវមានចំណេះអ្វីខ្លះ?
• គ្រីស្ទានពិតដែលទទួលបុណ្យជ្រមុជទឹក តើគេត្រូវធ្វើតាមជំហានអ្វីខ្លះជាមុនសិន?
• ហេតុអ្វីបានជាបុគ្គលខ្លះស្ទាក់ស្ទើរមិនចង់ទទួលបុណ្យជ្រមុជទឹក? ប៉ុន្តែ តើពួកគេអាចទទួលជំនួយយ៉ាងដូចម្ដេចខ្លះ?
[សំណួរសម្រាប់អត្ថបទសិក្សា]
[រូបភាពនៅទំព័រ១៣]
ការទទួលបុណ្យជ្រមុជទឹក‹ដោយនូវព្រះនាមព្រះវរបិតា ព្រះរាជបុត្រា និងវិញ្ញាណបរិសុទ្ធ› តើអ្នកដឹងថានេះបានន័យ យ៉ាងដូចម្ដេចទេ?