ជីវិតដែលត្រូវកាន់កាប់ដោយជំនឿឆ្វេង
ជីវិតដែលត្រូវកាន់កាប់ដោយជំនឿឆ្វេង
ឧបមាថា អ្នកជួបមនុស្សម្នាក់ដោយចៃដន្យពេលដែលអ្នកចេញពីផ្ទះ។ ឧបមាថាអ្នកជំពប់ជើងនឹងថ្ម ឬឮសត្វស្លាបណាមួយយំពេលយប់ ឬមួយក៏យល់សប្ដិឃើញអ្វីដដែលៗជាច្រើនដង។ មនុស្សជាច្រើនចាត់ទុកហេតុការណ៍ទាំងនេះជាការធម្មតាគ្មានគ្រោះថ្នាក់អ្វីទេ។ ប៉ុន្តែ ចំពោះជនជាតិអាព្រិចខ្លះ ហេតុការណ៍ទាំងនេះត្រូវចាត់ទុកជាប្រផ្នូល បុព្វនិមិត្ត ឬក៏ពត៌មានបញ្ជូនមកពីស្ថានមនុស្សស្លាប់។ ពួកអ្នកទាំងនេះយល់ថា ខ្លួនគេនឹងមានសំណាងល្អឬមួយក៏អន្តរាយនៅពេលខាងមុខ នេះអាស្រ័យលើប្រផ្នូលនិងអត្ថន័យនៃប្រផ្នូលនោះ។
តាមពិត ជំនឿឆ្វេងក៏មាននៅប្រទេសឯទៀតក្រៅពីទ្វីបអាព្រិចផងដែរ។ គឺចំលែកណាស់ ដែលមនុស្សជាច្រើននៅប្រទេសចិន និងបណ្ដាសាធារណរដ្ឋនៃអតីតសហភាពសូវៀត ក៏នៅតែជឿទៅលើជំនឿឆ្វេង ទោះជាការបដិសេធថាគ្មានព្រះជាជំនឿជាតិនៃប្រទេសទាំងនោះតាំងពីយូរយារមកហើយក៏ដោយ។ នៅប្រទេសជឿនលឿន មនុស្សជាច្រើនពឹងផ្អែកលើយោបល់ហោរាសាស្ត្រ ភ័យខ្លាចពេលថ្ងៃទី១៣ចំថ្ងៃសុក្រ ហើយជៀសវាងពីឆ្មាពណ៌ខ្មៅ។ មនុស្សខ្លះនៅភូមិភាគអឌ្ឍគោលខាងជើងចាត់ទុកថាបាតុភូតធម្មជាតិមួយដែលនាំឲ្យមានពន្លឺខុសពីធម្មតាគឺជាប្រផ្នូលមួយថានឹងកើតមានសង្គ្រាមនិងជំងឺរាតត្បាត។ នៅប្រទេសឥណ្ឌា ជំងឺអេដស៍កំពុងតែឆ្លងរាលដាលតាមរយៈអ្នកបើកឡានដឹកទំនិញដែលជឿថាពួកគេត្រូវតែរួមភេទ ដើម្បីឲ្យត្រជាក់ខ្លួននៅពេលថ្ងៃក្ដៅ។ នៅប្រទេសជប៉ុន អ្នកធ្វើការសាងសង់ផ្លូវរូងជឿថា ពួកគេនឹងស៊យកាលបើមានស្ត្រីណាម្នាក់ចូលក្នុងរូងនោះមុនសង់រួច។ កីឡាករក៏មានជំនឿឆ្វេងដែរ។ កីឡាករបាល់ទះម្នាក់បានអះអាងថា គាត់បានឈ្នះជាច្រើនលើកផ្ទួនៗគ្នាដោយសារគាត់ពាក់ស្រោមជើងពណ៌ខ្មៅជាជាងពាក់ពណ៌ស។ នេះបង្ហាញថា ជំនឿឆ្វេងគឺមានច្រើនរាប់ពុំអស់។
ចុះអ្នកវិញ តើអ្នកមានខ្លាចអ្វីមួយដែលអ្នកពន្យល់មិនបានឬទេ? តើអ្នកទទួលឥទ្ធិពលពីអ្វីដែលអ្នក«ជឿទាំងស្រុង ឬជឿខ្លះៗ ឬមួយក៏ប្រព្រឹត្តដោយគ្មានហេតុសមទំនង»ឬទេ? នេះជានិយមន័យដែលឯកសារយោងមួយបកស្រាយសំរាប់ពាក្យថាជំនឿឆ្វេង។ ចំលើយរបស់អ្នកចំពោះសំនួរទាំងនេះអាចបង្ហាញថា តើជីវិតរបស់អ្នកត្រូវកាន់កាប់ដោយជំនឿឆ្វេងឬក៏មិនមែន។
បើមនុស្សម្នាក់អនុញ្ញាតឲ្យជំនឿឆ្វេងមានឥទ្ធិពលទៅលើការសម្រេចចិត្ត និងជីវិតប្រចាំថ្ងៃរបស់គាត់ នោះគាត់កំពុងតែអនុញ្ញាតឲ្យខ្លួនគាត់ត្រូវកាន់កាប់ដោយអ្វីដែលគាត់មិនយល់នោះទេ។ តើនេះជាអ្វីដែលគួរធ្វើឬទេ? តើយើងគួរចុះចូលតាមជំនឿមួយដ៏ស្រពិចស្រពិល និងអាចនាំទៅដល់ក្ដីអន្តរាយឬទេ? តើការជឿលើជំនឿឆ្វេងគ្រាន់តែជាចំណុចខ្សោយមួយដែលមិនសំខាន់របស់មនុស្សឬ? ឬមួយក៏ផ្ទុយទៅវិញ តើជំនឿឆ្វេងជាអ្វីដែលបង្កប់នូវគ្រោះថ្នាក់ដ៏គួរឲ្យខ្លាចទៅវិញទេ?