សាលព្រះរាជាណាចក្រសូមស្វាគមន៍មនុស្សគ្រប់រូប
របាយការណ៍ពីពួកអ្នកប្រកាសព្រះរាជាណាចក្រ
សាលព្រះរាជាណាចក្រសូមស្វាគមន៍មនុស្សគ្រប់រូប
ក្នុងពេលព្រះយេស៊ូគ្រីស្ទបង្ហាត់បង្រៀនសិស្សរបស់ទ្រង់ឲ្យធ្វើកិច្ចបំរើផ្សាយសាធារណៈ នោះទ្រង់បានលើកទឹកចិត្តពួកសិស្សឲ្យ «ថ្លែងប្រាប់ពីលើដំបូលផ្ទះ»។ (ម៉ាថាយ ១០:២៧) មែនហើយ ពួកសិស្សត្រូវបំពេញកិច្ចបំរើផ្សាយគ្រីស្ទានជាសាធារណៈ។ ស្មរបន្ទាល់ព្រះយេហូវ៉ាក៏ធ្វើតាមឱវាទនេះដែរ ហើយកិច្ចការរបស់គេគឺធ្វើឡើងជាសាធារណៈ។ ដោយសារស្មរបន្ទាល់ធ្វើកិច្ចបំរើព្រះដោយឥតលាក់លៀមដូច្នេះ នេះក៏ធ្វើឲ្យពួកគេយកឈ្នះនូវការប្រឆាំង ហើយថែមទាំងទទួលការសរសើរពីសាធារណជនដែរ។
ទោះជាការប្រជុំក្នុងក្រុមជំនុំរបស់ស្មរបន្ទាល់ព្រះយេហូវ៉ាទទួលស្វាគមន៍មនុស្សគ្រប់រូបក៏ដោយ តែដោយសារមនុស្សខ្លះប្រកាន់សាសនានោះ បានជាពួកគេមិនហ៊ានចូលសាលព្រះរាជាណាចក្រទេ។ រឿងនេះបានកើតឡើងក្នុងប្រទេសហ្វាំងឡង់។ អ្នកខ្លះមិនហ៊ានទៅកន្លែងថ្មីៗសូម្បីតែម្ដងប៉ុណ្ណោះ។ ពេលសាងសង់សាលព្រះរាជាណាចក្រថ្មី ឬក៏ជួសជុលសាលព្រះរាជាណាចក្រណាមួយ គឺមានការរៀបចំឲ្យមនុស្សគ្រប់គ្នាដែលរស់នៅក្បែរៗនោះមកទស្សនាកន្លែងនោះ។ គឺមានការខំប្រឹងយ៉ាងពិសេសដើម្បីអញ្ជើញអ្នកជិតខាងឲ្យមកទស្សនាសាលព្រះរាជាណាចក្រ ដើម្បីឲ្យបានស្គាល់កិច្ចការរបស់ស្មរបន្ទាល់ព្រះយេហូវ៉ា។
នៅកន្លែងមួយ ពេលអញ្ជើញឲ្យមនុស្សគ្រប់គ្នាមកទស្សនាសាលព្រះរាជាណាចក្រថ្មីនេះ នោះស្មរបន្ទាល់បានរៀបចំផ្ដល់ឲ្យនូវទស្សនាវដ្ដីនៅក្នុងថ្ងៃនោះតែម្ដង។ ស្មរបន្ទាល់ពីរនាក់បានជួបបុរសចំណាស់ម្នាក់ដែលបានពោលថា គាត់សប្បាយរីករាយនឹងអានទស្សនាវដ្ដីប៉មយាម និងទស្សនាវដ្ដីភ្ញាក់រឭក! ណាស់ បងប្អូនយើងសុំអញ្ជើញគាត់មកទស្សនាសាលព្រះរាជាណាចក្រនោះ ហើយបានសុំជូនគាត់ទៅតែម្ដង។ បុរសចំណាស់នេះបានពោលថា គាត់សប្បាយចិត្តចង់ទៅជាមួយ។ ភរិយារបស់គាត់បានស្ដាប់នូវអ្វីដែលពួកគេបាននិយាយ ក៏ពោលឡើងថា៖ «ខ្ញុំចង់ទៅដែរ!»។
ពេលបុរសនេះចូលសាលព្រះរាជាណាចក្រ គាត់បានមើលជុំវិញ ក៏ពោលថា៖ «សាលប្រជុំនេះមិនមែនពណ៌ខ្មៅទេ តែមានពណ៌ស្អាតណាស់។ គេប្រាប់ខ្ញុំថា សាលប្រជុំពណ៌ខ្មៅ!»។ ស្វាមីភរិយានេះបាននៅលេងយ៉ាងយូរ និងសុំប្រកាសនវត្ថុខ្លះៗដែលមាននៅទីនោះ។
ក្រុមជំនុំមួយចង់ប្រកាសក្នុងសារពត៌មានអំពីសេចក្ដីអញ្ជើញឲ្យមនុស្សគ្រប់រូបមកចូលរួម ពេលមានការប្រារព្ធពិធីសម្ពោធន៍សាលព្រះរាជាណាចក្ររបស់ពួកគេ។ ចាងហ្វាងកាសែតម្នាក់បានទទួលដំណឹងអំពីពិធីសម្ពោធន៍នេះ គាត់ក៏បានឲ្យយោបល់ថា គួរសរសេរអត្ថបទមួយអំពីប្រធាននេះ។ បងប្អូនយើងបានយល់ព្រមធ្វើដូច្នេះ ហើយមិនយូរប៉ុន្មានក្រោយមកអត្ថបទមួយដ៏ល្អ មាននៅពាក់កណ្ដាលទំព័រចេញផ្សាយក្នុងកាសែតដែលរៀបរាប់អំពីពិធីសម្ពោធន៍នេះ និងពណ៌នាអំពីកិច្ចការរបស់ស្មរបន្ទាល់ព្រះយេហូវ៉ាក្នុងតំបន់នោះ។
ក្រោយពីអត្ថបទនេះបានបោះពុម្ពផ្សាយហើយ នោះបងស្រីស្មរបន្ទាល់វ័យចំណាស់ម្នាក់បានជួបអ្នកជិតខាងគាត់ម្នាក់ ដែលប្រាប់គាត់ថា៖ «ក្នុងកាសែតថ្ងៃនេះ គឺមានអត្ថបទដ៏ល្អមួយអំពីស្មរបន្ទាល់ព្រះយេហូវ៉ា!»។ បងស្រីយើងមានឱកាសផ្សព្វផ្សាយប្រាប់អ្នកជិតខាងនោះនិងក្រោយមកក៏ជូនឲ្យសៀវភៅស្តើង ស្មរបន្ទាល់ព្រះយេហូវ៉ានៅសតវត្សទី២០។
បន្ថែមពីលើការបញ្ជាក់នូវការភាន់ច្រឡំអំពីស្មរបន្ទាល់ព្រះយេហូវ៉ា នោះការរៀបចំអញ្ជើញមនុស្សគ្រប់គ្នាឲ្យមកទស្សនានិងចូលរួមពិធីសម្ពោធន៍សាលព្រះរាជាណាចក្រថ្មី ក៏បានជំរុញទឹកចិត្តបងប្អូនដែលជាអ្នកផ្សព្វផ្សាយ ដោយលើកទឹកចិត្តពួកគាត់ឲ្យអញ្ជើញមនុស្សជាច្រើនទៀតមកចូលរួមកិច្ចប្រជុំ។ ត្រូវហើយ នៅប្រទេសជាច្រើនរួមបញ្ចូលប្រទេសហ្វាំងឡង់ដែរ មនុស្សបានរៀនដឹងថា សាលព្រះរាជាណាចក្រនៃស្មរបន្ទាល់ព្រះយេហូវ៉ាសូមស្វាគមន៍មនុស្សគ្រប់រូប។