ចូរខំប្រឹងឲ្យមានទស្សនៈដូចព្រះចំពោះអ្នកដទៃ
ចូរខំប្រឹងឲ្យមានទស្សនៈដូចព្រះចំពោះអ្នកដទៃ
«ព្រះទ្រង់មិនទតចំពោះសេចក្ដី [បែបដូច]ដែលមនុស្សលោកពិចារណាមើលទេ»។—សាំយូអែលទី១ ១៦:៧
១, ២. តើទស្សនៈរបស់ព្រះយេហូវ៉ានិងសាំយូអែលខុសគ្នាយ៉ាងណាស្តីអំពីអេលាប? ហើយតើនេះបង្រៀនយើងពីអ្វីខ្លះ?
នៅសតវត្សទី១១មុនស.យ. ព្រះយេហូវ៉ាបានចាត់ព្យាការីសាំយូអែលឲ្យទៅបំពេញបេសកកម្មសម្ងាត់មួយ។ ទ្រង់បានបង្គាប់សាំយូអែលឲ្យទៅផ្ទះបុរសម្នាក់ឈ្មោះអ៊ីសាយ ហើយចាក់ប្រេងតែងតាំងកូនប្រុសម្នាក់របស់គាត់ឲ្យធ្វើជាស្តេចនៃសាសន៍អ៊ីស្រាអែលនៅពេលអនាគត។ ពេលដែលសាំយូអែលឃើញអេលាបជាកូនច្បងរបស់អ៊ីសាយ នោះសាំយូអែលបានប្រាកដក្នុងចិត្តថា នេះហើយជាបុរសមួយរូបដែលព្រះយេហូវ៉ាបានជ្រើសរើស។ ប៉ុន្តែ ព្រះយេហូវ៉ាបានមានបន្ទូលថា៖ «កុំឲ្យមើលតែឫកពាខាងក្រៅ ឬកំពស់ខ្លួននោះឡើយ ដ្បិតអញមិនទទួលអ្នកនេះទេ ពីព្រោះព្រះទ្រង់មិនទតចំពោះសេចក្ដី [បែបដូច]មនុស្សលោកពិចារណាមើលទេ ឯមនុស្សលោក តែងមើលតែឫកពាខាងក្រៅប៉ុណ្ណោះ តែព្រះយេហូវ៉ាទ្រង់ទតចំពោះក្នុងចិត្តវិញ»។ (សាំយូអែលទី១ ១៦:៦, ៧) សាំយូអែលមិនបានពិចារណាមើលអេលាបដោយមានទស្សនៈដូចព្រះយេហូវ៉ាឡើយ។ *
២ មនុស្សយើងអាចវាយតម្លៃមនុស្សឯទៀតខុសបានយ៉ាងងាយខុស! នេះអាចជាហេតុដែលយើងងាយចាញ់បោកមនុស្សដែលមើលទៅដូចជាគួរឲ្យទុកចិត្ត តែបែរជាខ្វះសីលធម៌វិញ។ ផ្ទុយទៅវិញ ប្រហែលជាយើងមានទស្សនៈតឹងរឹងឬកាចក៏មិនដឹង ពេលវាយតម្លៃមនុស្សដែលមានលក្ខណៈសម្បត្ដិធ្វើឲ្យយើងមួម៉ៅចិត្ត។
៣, ៤. (ក) បើមានបញ្ហាផ្ទុះឡើងរវាងបងប្អូនគ្រីស្ទានពីរនាក់ តើពួកគេម្នាក់ៗគួរប្ដេជ្ញាចិត្តធ្វើអ្វី? (ខ) ពេលដែលយើងមានទំនាស់ជាខ្លាំងនឹងបងប្អូនរួមជំនឿជាមួយយើង តើយើងគួរដណ្ដឹងសួរខ្លួននូវសំនួរអ្វីខ្លះ?
៣ ការឆាប់វិនិច្ឆ័យអ្នកដទៃ សូម្បីតែពួកអ្នកដែលយើងធ្លាប់ស្គាល់យូរយារមកហើយនោះក៏ដោយ នេះអាចបង្កឲ្យមានបញ្ហាមែន។ អ្នកប្រហែលជាធ្លាប់មានទំនាស់យ៉ាងខ្លាំងជាមួយបងប្អូនគ្រីស្ទានណាម្នាក់ដែលពីមុនជាមិត្តជិតស្និទ្ធរបស់អ្នក។ តើអ្នកចង់ជានានឹងគ្នាវិញទេ? តើមានជំនួយអ្វីដើម្បីជួយឲ្យអាចធ្វើបាន?
៤ សូមពិចារណាមើលបងប្អូននោះឲ្យបានដិតដល់ហើយយូរបន្ដិច ដោយសម្គាល់លក្ខណៈល្អៗរបស់គាត់។ សូមពិចារណាមើលគាត់ដូច្នេះទាំងនឹកចាំបន្ទូលរបស់ព្រះយេស៊ូដែលថា៖ «គ្មានអ្នកណាអាចនឹងមកឯខ្ញុំបានទេ លើកតែព្រះវរបិតា ដែលចាត់ខ្ញុំឲ្យមក ទ្រង់ទាញនាំគេប៉ុណ្ណោះ»។ (យ៉ូហាន ៦:៤៤) រួចមក សូមដណ្ដឹងសួរខ្លួនថា៖ ‹ហេតុអ្វីបានជាព្រះយេហូវ៉ាទាញនាំគាត់មកឯរាជបុត្រទ្រង់ដូច្នេះ? តើគាត់មានលក្ខណៈសម្បត្ដិអ្វីខ្លះ? តើខ្ញុំមិនអើពើឬមើលងាយនូវគុណសម្បត្ដិល្អៗរបស់គាត់ឬ? ពីដំបូងនោះ ហេតុដូចម្ដេចបានជាយើងក្លាយជាមិត្តសំឡាញ់ដូច្នេះ? តើអ្វីបានទាក់ចិត្តទាញអារម្មណ៍ខ្ញុំឲ្យស្រឡាញ់គាត់?›។ មុនដំបូងអ្នកប្រហែលជាពិបាកសម្គាល់លក្ខណៈល្អៗរបស់គាត់ ជាពិសេសបើអ្នកបានចងគំនុំនឹងគាត់ជាយូរមកហើយ។ ប៉ុន្តែ ការសម្គាល់លក្ខណៈល្អៗនៃបងប្អូនយើងជាជំហានសំខាន់ណាស់ ដើម្បីឲ្យបានជានានឹងគ្នាឡើងវិញ។ ដើម្បីបង្ហាញពីរបៀបសម្គាល់នូវលក្ខណៈសម្បត្ដិរបស់បងប្អូនយើងនោះ យើងសូមពិនិត្យមើលគំរូរបស់បុរសពីរនាក់ដែលជួនកាលបានត្រូវលើកឡើងជាគំរូមិនល្អដែរ។ បុរសពីរនាក់នេះគឺព្យាការីយ៉ូណាសនិងសាវ័កពេត្រុស។
ការពិនិត្យមើលលោកយ៉ូណាស ដោយមិនលំអៀង
៥. តើយ៉ូណាសទទួលភារកិច្ចអ្វី? ហើយតើគាត់ធ្វើយ៉ាងណា?
៥ យ៉ូណាសបានបំរើជាព្យាការីនៅក្នុងព្រះរាជាណាចក្រអ៊ីស្រាអែលខាងជើង នៅគ្រាដែលស្តេចយេរ៉ូបោមទី២ជារាជបុត្រយ៉ូអាសទ្រង់បានសោយរាជ្យ។ (ពង្សាវតារក្សត្រទី២ ១៤:២៣-២៥) នៅថ្ងៃមួយ ព្រះយេហូវ៉ាបានបង្គាប់យ៉ូណាសឲ្យចេញពីស្រុកអ៊ីស្រាអែលហើយធ្វើដំណើរទៅទីក្រុងនីនីវេដែលជារាជធានីនៃមហាអំណាចសាសន៍អាសស៊ើរដ៏ខ្លាំងក្លា។ តើយ៉ូណាសមានភារកិច្ចអ្វី? យ៉ូណាសត្រូវព្រមានពួកអ្នកនៅទីក្រុងនីនីវេថា ទីក្រុងដ៏ធំរបស់ពួកគេនោះត្រូវទទួលសេចក្ដីហិនវិនាស។ (យ៉ូណាស ១:១, ២) ជាជាងធ្វើតាមបង្គាប់របស់ព្រះយេហូវ៉ា យ៉ូណាសបានរត់គេចវិញ! យ៉ូណាសបានចុះនាវាដែលមានទិសដៅទៅតំបន់តើស៊ីសដែលមានចំងាយឆ្ងាយពីក្រុងនីនីវេ។—យ៉ូណាស ១:៣
៦. ហេតុដូចម្ដេចបានជាព្រះយេហូវ៉ាជ្រើសរើសយ៉ូណាសឲ្យទៅទីក្រុងនីនីវេ?
៦ ពេលដែលអ្នកគិតអំពីលោកយ៉ូណាស តើអ្នកគិតអំពីអ្វី? តើអ្នកនឹកគិតថា យ៉ូណាសជាព្យាការីមួយរូបដែលមិនស្ដាប់បង្គាប់ព្រះឬ? បើយើងពិចារណាមើលគាត់ដោយត្រួសៗនោះ យើងប្រហែលជាសន្និដ្ឋានដូច្នេះមែន។ ប៉ុន្តែ តើព្រះយេហូវ៉ាចាត់តាំងយ៉ូណាសជាព្យាការីដោយព្រោះគាត់ជាអ្នកមិនស្ដាប់បង្គាប់ឬ? មិនមែនទេ! ដូច្នេះ យ៉ូណាសពិតជាមានគុណសម្បត្ដិល្អៗផងដែរ។ សូមពិចារណាមើលជីវប្រវត្ដិរបស់យ៉ូណាសជាព្យាការីមួយរូបនេះ។
៧. តើយ៉ូណាសបំរើព្រះយេហូវ៉ានៅស្រុកអ៊ីស្រាអែលក្រោមកាលៈទេសៈណាខ្លះ? ដោយដឹងអំពីកាលៈទេសៈនោះ តើអ្នកមានទស្សនៈយ៉ាងណាអំពីលោកយ៉ូណាស?
៧ តាមពិតយ៉ូណាសបានធ្វើការយ៉ាងស្មោះអស់ពីចិត្តនៅស្រុកអ៊ីស្រាអែល ជាតំបន់ផ្សាយដែលប្រជាជនមិនសូវយកចិត្តទុកដាក់ស្ដាប់ទេ។ ព្យាការីអេម៉ុសបានរស់នៅគ្រាដំណាលនឹងយ៉ូណាសដែរ ហើយអេម៉ុសបានពណ៌នាអំពីពួកអ៊ីស្រាអែលនៅជំនាន់នោះថា ជាមនុស្សដែលស្រឡាញ់តែវត្ថុទ្រព្យនិងការសប្បាយប៉ុណ្ណោះ។ * នៅក្នុងស្រុកនោះមានអំពើអាក្រក់ជួជាតិ ប៉ុន្តែ ពួកអ៊ីស្រាអែលមិនបានអើពើនឹងស្ថានភាពនេះឡើយ។ (អេម៉ុស ៣:១៣-១៥; ៤:៤; ៦:៤-៦) យ៉ាងណាក្ដី យ៉ូណាសបានបំពេញតាមមុខនាទីរបស់គាត់ទាំងមានចិត្តស្មោះត្រង់ ដោយគាត់ផ្សព្វផ្សាយដល់ប្រជាជនអ៊ីស្រាអែលជាទៀងទាត់។ ប្រសិនបើអ្នកជាអ្នកប្រកាសផ្សាយនូវដំណឹងល្អដែរ អ្នកមុខជាដឹងថា ការពិគ្រោះជាមួយមនុស្សដែលបង្ហាញភាពកន្តើយព្រមទាំងមនុស្សដែលមានជីវិតគាប់ចិត្តហើយ នោះមិនមែនជាការស្រួលប៉ុន្មានទេ។ ដូច្នេះ ទោះជាយើងទទួលស្គាល់អំពីភាពខ្សោយរបស់យ៉ូណាសក៏ដោយ នោះកុំឲ្យយើងភ្លេចនូវភាពស្មោះត្រង់និងការស៊ូទ្រាំរបស់គាត់ឡើយ ពេលគាត់ផ្សព្វផ្សាយដល់ពួកអ៊ីស្រាអែលដែលមិនមានភាពស្មោះត្រង់នោះ។
៨. តើព្យាការីជនជាតិអ៊ីស្រាអែលមួយរូបអាចជួបប្រទះការពិបាកអ្វីខ្លះនៅទីក្រុងនីនីវេ?
៨ ភារកិច្ចដែលយ៉ូណាសទទួលដែលតម្រូវឲ្យគាត់ទៅទីក្រុងនីនីវេនោះ រឹតតែពិបាកទៅទៀត។ យ៉ូណាសត្រូវដើរប្រមាណ៨០០គីឡូម៉ែត្រទើបគាត់ទៅដល់ទីក្រុងនោះ ហើយនេះគឺជាការធ្វើដំណើរដ៏ពិបាកប្រហែលជាអស់រយៈពេលមួយខែ។ ពេលទៅដល់ទីក្រុងនោះ យ៉ូណាសត្រូវផ្សព្វផ្សាយដល់ប្រជាជនអាសស៊ើរដែលមានឈ្មោះល្បីជាមនុស្សកាចសាហាវ។ ពេលធ្វើសង្គ្រាម ពួកអាសស៊ើរនិយមធ្វើទារុណកម្មយ៉ាងឃោរឃៅដល់ពួកខ្មាំងសត្រូវ។ ពួកអាសស៊ើរក៏បានអួតអាងអំពីភាពសាហាវយង់ឃ្នងរបស់ពួកគេដែរ។ ដោយហេតុនេះហើយបានជាទីក្រុងនោះបានត្រូវហៅយ៉ាងសមថា «ទីក្រុង ដែលប្រឡាក់ដោយឈាម»។—ណាហ៊ុម ៣:១, ៧
៩. ពេលមានខ្យល់ព្យុះយ៉ាងខ្លាំងដែលគំរាមកំហែងដល់ជីវិតរបស់ពួកអ្នកជិះនាវានោះ តើយ៉ូណាសបង្ហាញនូវគុណសម្បត្ដិអ្វីខ្លះ?
៩ យ៉ូណាសបានគេចមិនព្រមធ្វើតាមបង្គាប់របស់ព្រះយេហូវ៉ា ដូច្នេះគាត់បានចុះនាវាដែលមានទិសដៅផ្ទុយហើយឆ្ងាយពីកន្លែងដែលព្រះចាត់ឲ្យទៅ។ យ៉ាងណាក៏ដោយ ព្រះយេហូវ៉ាមិនមានព្រះទ័យអស់សង្ឃឹមនឹងព្យាការីនេះឡើយ ហើយទ្រង់ក៏មិនបានចាត់ឲ្យមានមនុស្សមួយរូបទៀតទៅជំនួសគាត់ទេ។ ផ្ទុយទៅវិញ ព្រះយេហូវ៉ាបានចាត់វិធានការដើម្បីដាស់ស្មារតីយ៉ូណាស។ ព្រះបានបណ្ដាលឲ្យមានខ្យល់ព្យុះយ៉ាងខ្លាំងនៅសមុទ្រ។ នាវាដែលយ៉ូណាសជិះនោះត្រូវរលកសមុទ្រផាត់ចុះឡើង។ មនុស្សប៉ុន្មាននាក់ដែលគ្មានទោសអ្វីសោះនោះ ហៀបនឹងស្លាប់ដោយសារយ៉ូណាសរត់ចោលការងាររបស់ខ្លួន! (យ៉ូណាស ១:៤) តើយ៉ូណាសមានអារម្មណ៍យ៉ាងណា? យ៉ូណាសមិនចង់ឲ្យពួកអ្នកជិះនាវានោះស្លាប់ដោយសារកំហុសផ្ទាល់ខ្លួនរបស់គាត់ទេ ដូច្នេះគាត់បានប្រាប់ពួកគេថា៖ «ចូរចាប់ខ្ញុំបោះទៅក្នុងសមុទ្រចុះ! នោះសមុទ្រនឹងស្ងប់ដល់អ្នករាល់គ្នាហើយ»។ (យ៉ូណាស ១:១២) យ៉ូណាសគ្មានហេតុគិតស្មានថា ព្រះយេហូវ៉ានឹងសង្គ្រោះគាត់ពីមហាសាគរពេលពួកនាវិកបោះគាត់ចេញពីនាវានោះឡើយ។ (យ៉ូណាស ១:១៥) យ៉ាងណាក៏ដោយ យ៉ូណាសសុខចិត្តលះបង់ជីវិតខ្លួន ដើម្បីកុំឲ្យពួកអ្នកជិះក្នុងនាវានោះស្លាប់ដែរ។ អាកប្បកិរិយារបស់យ៉ូណាសនេះបង្ហាញនូវគុណសម្បត្ដិដូចជាចិត្តក្លាហាន ចិត្តរាបទាប និងសេចក្ដីស្រឡាញ់ មែនទេ?
១០. តើអ្វីបានកើតឡើងក្រោយពីព្រះយេហូវ៉ាបង្គាប់យ៉ូណាសម្ដងទៀតឲ្យបំពេញកិច្ចការរបស់គាត់?
១០ នៅទីបំផុតព្រះយេហូវ៉ាបានសង្គ្រោះយ៉ូណាស។ តើយ៉ូណាសបាត់បង់សិទ្ធិធ្វើជាអ្នកតំណាងព្រះជារៀងរហូត ដោយសារអ្វីដែលគាត់ទើបតែបានប្រព្រឹត្តនោះឬ? មិនមែនទេ! ព្រះយេហូវ៉ាបានបង្ហាញសេចក្ដីមេត្ដាករុណានិងសេចក្ដីស្រឡាញ់ ហើយបានបង្គាប់យ៉ូណាសម្ដងទៀតឲ្យទៅផ្សព្វផ្សាយដល់ពួកនីនីវេ។ នៅពេលដែលយ៉ូណាសចូលទៅក្នុងទីក្រុងនីនីវេ គាត់បានប្រាប់ពួកអ្នកក្រុងនោះដោយចិត្តក្លាហានថា ព្រះបានទតឃើញអំពើអាក្រក់របស់ពួកគេ ហើយ៤០ថ្ងៃទៀតទីក្រុងរបស់ពួកគេត្រូវវិនាសទៅ។ (យ៉ូណាស ១:២; ៣:៤) ពេលពួកនីនីវេឮនូវសាររបស់យ៉ូណាសដែលប្រាប់យ៉ាងចំៗនោះ ពួកគេបានប្រែចិត្តហើយទីក្រុងរបស់គេក៏បានរួចពីសេចក្ដីហិនវិនាសដែរ។
១១. តើអ្វីបង្ហាញថា យ៉ូណាសបានរៀនមេរៀនដ៏សំខាន់មួយ?
១១ យ៉ូណាសនៅតែមានទស្សនៈមិនត្រឹមត្រូវនៅឡើយ។ ប៉ុន្តែ ព្រះយេហូវ៉ាបានបង្ហាញព្រះទ័យអត់ធ្មត់ដោយលើកគំរូមួយដើម្បីជួយបង្រៀនយ៉ូណាសឲ្យដឹងថា ព្រះទ្រង់ចេះទតមើលវែងឆ្ងាយ មិនត្រឹមតែទតមើលអាការៈក្រៅប៉ុណ្ណោះទេ។ ព្រះយេហូវ៉ាទ្រង់ពិចារណាមើលក្នុងចិត្តវិញ។ (យ៉ូណាស ៤:៥-១១) កំណត់ហេតុដែលយ៉ូណាសបានសរសេរខ្លួនឯងដោយឥតលាក់លៀមនោះបង្ហាញថា គាត់បានរៀនមេរៀនដ៏សំខាន់មួយ។ ការស្ម័គ្រចិត្តសរសេរអំពីកំហុសរបស់ខ្លួនទាំងការរៀបរាប់លំអិតនូវចំណុចដ៏គួរខ្មាសផង ជាភស្តុតាងថែមទៀតដែលបញ្ជាក់ពីចិត្តរាបទាបរបស់យ៉ូណាស។ ការទទួលស្គាល់កំហុសរបស់ខ្លួនពិតជាតម្រូវឲ្យមានចិត្តក្លាហានមែន!
១២. (ក) តើដូចម្ដេចបានជាយើងដឹងថា ព្រះយេស៊ូមានទស្សនៈដូចព្រះយេហូវ៉ាអំពីមនុស្សជាតិ? (ខ) ពេលយើងផ្សព្វផ្សាយដំណឹងល្អ តើយើងគួរមានទស្សនៈយ៉ាងណាចំពោះមនុស្សដែលយើងជួបនោះ? (សូមមើលប្រអប់នៅទំព័រ២០)
១២ រាប់សតវត្សក្រោយមក ព្រះយេស៊ូមានបន្ទូលដែលលើកកិត្ដិយសដល់យ៉ូណាស ពេលទ្រង់សំដៅទៅលើព្រឹត្ដិការណ៍មួយក្នុងជីវិតរបស់គាត់។ ព្រះយេស៊ូមានបន្ទូលថា៖ «ដែលលោកយ៉ូណាសបាននៅក្នុងពោះត្រីធំ អស់៣ថ្ងៃ៣យប់យ៉ាងណា កូនមនុស្សក៏នឹងនៅក្នុងផ្ទៃផែនដី៣ថ្ងៃ៣យប់យ៉ាងនោះដែរ»។ (ម៉ាថាយ ១២:៤០) នៅពេលអនាគតក្រោយពីយ៉ូណាសនឹងទទួលជីវិតរស់ឡើងវិញនោះ គាត់នឹងដឹងថា ព្រះយេស៊ូបានប្រៀបរយៈពេលដែលទ្រង់នៅក្នុងផ្នូរ ទៅនឹងមួយរយៈពេលដែលព្យាការីយ៉ូណាសឥតមានសកម្មភាពផងដែរ។ យើងពិតជាសប្បាយចិត្តបំរើព្រះមួយអង្គដែលមានព្រះទ័យអត់ធ្មត់ចំពោះអ្នកបំរើទ្រង់ ពេលដែលពួកគេធ្វើខុសនោះ មែនទេ? អ្នកតែងបទទំនុកដំកើងបានសរសេរថា៖ «ព្រះយេហូវ៉ាទ្រង់មានព្រះហឫទ័យអាណិតដល់អស់អ្នក ដែលកោតខ្លាចទ្រង់ ដូចជាឪពុកមានចិត្តអាសូរដល់កូនរបស់ខ្លួនដែរ។ ដ្បិតទ្រង់ស្គាល់រាងកាយរបស់យើង ក៏នឹកចាំថា យើងគ្រាន់តែជាធូលីដីប៉ុណ្ណោះ»។ (ទំនុកដំកើង ១០៣:១៣, ១៤) ពិតណាស់! «ធូលីដី»ដែលរួមបញ្ចូលមនុស្សមិនគ្រប់ល័ក្ខណ៍សព្វថ្ងៃនេះ អាចសម្រេចការជាច្រើនដ៏អស្ចារ្យមែន ដោយមានវិញ្ញាណបរិសុទ្ធរបស់ព្រះជួយគាំទ្រ។
ការពិនិត្យមើលពេត្រុស ដោយមិនលំអៀង
១៣. ពេលគិតអំពីពេត្រុស តើអ្នកនឹកគិតអំពីចរិតណាខ្លះរបស់គាត់? តែហេតុអ្វីបានជាព្រះយេស៊ូជ្រើសរើសគាត់ជាសាវ័កម្នាក់?
១៣ ឥឡូវសូមពិចារណាមើលដោយសង្ខេបនូវគំរូទីពីរ គឺគំរូរបស់សាវ័កពេត្រុស។ បើអ្នកត្រូវពិពណ៌នាអំពីពេត្រុស តើអ្នកនឹកគិតភ្លាមៗអំពីចរិតរហ័សធ្វើអ្វីដោយពុំគិតជាមុន ឬរហូតដល់បំពានសិទ្ធិឬ? ម្ដងម្កាលពេត្រុសបានប្រព្រឹត្តបែបដូច្នេះមែន។ ក៏ប៉ុន្តែ តើព្រះយេស៊ូនឹងជ្រើសរើសពេត្រុសឲ្យធ្វើជាសាវ័កម្នាក់ក្នុងចំណោម១២នាក់នោះ បើគាត់ពិតជាមានចរិតរហ័សធ្វើអ្វីដោយពុំគិតជាមុនឬជាបុរសម្នាក់ដែលបំពានសិទ្ធិនោះ? (លូកា ៦:១២-១៤) មិនមែនសោះឡើយ! ព្រះយេស៊ូច្បាស់ជាបានទតឃើញគុណសម្បត្ដិល្អៗរបស់ពេត្រុស មិនមែនកំហុសរបស់គាត់ប៉ុណ្ណោះទេ។
១៤. (ក) តើប្រហែលជាមានមូលហេតុអ្វីខ្លះ ដែលបណ្ដាលឲ្យពេត្រុសហ៊ាននិយាយម្ល៉េះ? (ខ) ហេតុដូចម្ដេចបានជាយើងគួរអបអរនឹងពេត្រុសដែលសួរសំនួរជាញឹកញាប់នោះ?
១៤ យូរៗម្ដងពេត្រុសបានធ្វើជាអ្នកនាំពាក្យជំនួសពួកសាវ័កឯទៀត។ មនុស្សខ្លះអាចចាត់ទុកនេះជាទីសំអាងថា ពេត្រុសគ្មានចិត្តរាបទាបសោះ។ តើពិតជាដូច្នេះមែនឬ? មនុស្សខ្លះយល់ថា ពេត្រុសប្រហែលជាមានវ័យចាស់ជាងសាវ័កឯទៀត ក៏ប្រហែលជាចាស់ជាងព្រះយេស៊ូទៀតផង។ បើដូច្នេះមែន នេះអាចជាមូលហេតុមួយដែលពេត្រុសនិយាយមុនគេជាញឹកញយ។ (ម៉ាថាយ ១៦:២២) ប៉ុន្តែ មានកត្ដាមួយទៀតដែលយើងត្រូវពិចារណាមើលជាមុនសិន។ ពេត្រុសជាបុរសម្នាក់ដែលយកចិត្តទុកដាក់រឿងខាងវិញ្ញាណ។ ដោយសារពេត្រុសមានការស្រេកឃ្លាននូវចំណេះ នេះជំរុញឲ្យគាត់សួរសំនួរជាច្រើន។ យើងក៏ទទួលប្រយោជន៍ពីសំនួររបស់គាត់ដែរ ដ្បិតព្រះយេស៊ូមានបន្ទូលប្រាប់ចំណុចសំខាន់ៗដែលជាចម្លើយចំពោះសំនួររបស់ពេត្រុសប៉ុន្មានដងមកហើយ និងចម្លើយទាំងនោះបានត្រូវទុកជាកំណត់ហេតុក្នុងព្រះគម្ពីរ។ ជាឧទាហរណ៍ ព្រះយេស៊ូបានមានបន្ទូលអំពី«នាយដំរួតការដែលស្មោះត្រង់» នេះជាចម្លើយទាក់ទងនឹងអ្វីដែលពេត្រុសបានលើកមកនិយាយម្ដង។ (លូកា ១២:៤១-៤៤) ហើយសូមគិតពិចារណាពីសំនួររបស់ពេត្រុសពេលដែលគាត់សួរថា៖ «យើងខ្ញុំបានលះចោលទាំងអស់មកតាមទ្រង់ហើយ ដូច្នេះ តើយើងខ្ញុំនឹងបានអ្វីខ្លះ?»។ នេះបានបណ្ដាលឲ្យព្រះយេស៊ូពង្រឹងកម្លាំងយើងដោយទ្រង់សន្យាថា៖ «អស់អ្នកណាដែលលះចោលផ្ទះសំបែង ឬបងប្អូនប្រុសស្រី ឪពុកម្ដាយ ប្រពន្ធកូនឬស្រែចំការ ដោយយល់ដល់ឈ្មោះខ្ញុំ នោះនឹងបានជា១រយភាគឡើងវិញ ហើយនឹងបានគ្រងជីវិតអស់កល្បជានិច្ច ទុកជាមរដកដែរ»។—ម៉ាថាយ ១៥:១៥; ១៨:២១, ២២; ១៩:២៧-២៩
១៥. ហេតុអ្វីបានជាយើងអាចសន្និដ្ឋានថា ពេត្រុសមានចិត្តស្មោះភក្ដីមែន?
១៥ ពេត្រុសបានបង្ហាញគុណសម្បត្ដិដ៏ល្អមួយទៀត ពោលគឺចិត្តស្មោះភក្ដី។ នៅពេលដែលសិស្សជាច្រើនរបស់ព្រះយេស៊ូបានឈប់ដើរតាមទ្រង់ដោយព្រោះពួកគេមិនយល់សេចក្ដីបង្រៀនមួយរបស់ទ្រង់ នោះពេត្រុសជាអ្នកនិយាយជំនួសសាវ័ក១២នាក់ថា៖ «ព្រះអម្ចាស់អើយ! តើយើងខ្ញុំនឹងទៅឯអ្នកណាវិញ? គឺទ្រង់ហើយ ដែលមានព្រះបន្ទូលនៃជីវិតដ៏នៅអស់កល្បជានិច្ច»។ (យ៉ូហាន ៦:៦៦-៦៨) ព្រះយេស៊ូច្បាស់ជាមានព្រះទ័យកក់ក្ដៅឡើងវិញមែន! ពេលទ្រង់សណ្ដាប់ពំនោលនោះ។ ក្រោយមក ពេលដែលមនុស្សមួយហ្វូងបានមកចាប់ព្រះអង្គម្ចាស់នោះ សាវ័កភាគច្រើនបានរត់ចោលព្រះយេស៊ូ។ ប៉ុន្តែ ពេត្រុសបានដើរតាមមនុស្សមួយហ្វូងនោះពីចំងាយ ហើយក៏បានចូលទៅក្នុងទីលាននៅផ្ទះរបស់សម្ដេចសង្ឃ។ ចិត្តក្លាហានបានជំរុញឲ្យគាត់ចូលទៅទីនោះ ដ្បិតគាត់មិនមានភាពកំសាកឡើយ។ នៅពេលដែលគេចោទសួរព្រះយេស៊ូនោះ ពេត្រុសបាននៅក្នុងចំណោមសាសន៍យូដាមួយក្រុមដែលប្រមូលគ្នាអាំងភ្លើងដែលភ្លឺចែស។ បាវម្នាក់របស់សម្ដេចសង្ឃនោះបានស្គាល់មុខពេត្រុសហើយបានចោទថា ពេត្រុសជាអ្នកនៅជាមួយព្រះយេស៊ូ។ ត្រូវមែន ពេត្រុសបានប្រកែកថាខ្លួនមិនស្គាល់ព្រះអង្គម្ចាស់ទេ ប៉ុន្តែសូមកុំឲ្យយើងភ្លេចដែរថា ចិត្តស្មោះភក្ដីនិងការយកចិត្តទុកដាក់ចំពោះព្រះយេស៊ូបាននាំឲ្យពេត្រុសសុខចិត្តប្រថុយជីវិតដោយមានវត្តមាននៅទីនោះ ហើយនេះជាអ្វីដែលសាវ័កភាគច្រើនមិនហ៊ានធ្វើទេ។—យ៉ូហាន ១៨:១៥-២៧
១៦. ហេតុអ្វីបានជាការពិចារណាមើលគុណសម្បត្ដិល្អៗរបស់យ៉ូណាសនិងពេត្រុសនោះមានប្រយោជន៍?
១៦ ពេត្រុសពិតជាមានគុណសម្បត្ដិល្អៗច្រើនជាងភាពខ្សោយដែលគាត់មានទៅទៀត។ យ៉ូណាសក៏មានលក្ខណៈសម្បត្ដិដូចគ្នាដែរ។ តាមធម្មតាយើងប្រហែលជាមិនសូវចាប់អារម្មណ៍ទៅលើគុណសម្បត្ដិល្អៗរបស់យ៉ូណាសនិងពេត្រុសដូចយើងបានពិនិត្យមើលអំបាញ់មិញនេះទេ ហើយយើងក៏ត្រូវបង្ហាត់បង្រៀនខ្លួនឲ្យពិចារណាមើលគុណសម្បត្ដិល្អៗរបស់បងប្អូនខាងវិញ្ញាណរបស់យើងសព្វថ្ងៃនេះដូចគ្នាដែរ។ ទង្វើនេះនឹងបណ្ដាលឲ្យយើងមានចំណងមេត្រីភាពកាន់តែល្អជាមួយនឹងពួកគេ។ ហេតុអ្វីបានជាយើងគួរធ្វើដូចនេះជាចាំបាច់នោះ?
ការយកមេរៀននេះមកអនុវត្តតាមនៅសព្វថ្ងៃ
១៧, ១៨. (ក) តើអ្វីអាចបណ្ដាលឲ្យទំនាក់ទំនងរបស់បងប្អូនគ្រីស្ទានប្រេះឆា? (ខ) តើមានដំបូន្មានអ្វីខ្លះក្នុងព្រះគម្ពីរដែលអាចជួយឲ្យយើងមានភាពស្រុះស្រួលចំពោះបងប្អូនដែលរួមជំនឿជាមួយយើង?
១៧ មនុស្សប្រុសស្រីនិងក្មេងៗពីគ្រប់ស្រទាប់នៃវណ្ណៈកំពុងតែមូលគ្នាមានសាមគ្គីភាពក្នុងការបំរើព្រះយេហូវ៉ាសព្វថ្ងៃនេះ មិនថាមានសញ្ជាតិផ្សេងៗ បានទទួលការអប់រំខ្ពស់ឬទាប ឬមានប្រាក់ចំណូលខុសពីគ្នាក៏ដោយ។ (វិវរណៈ ៧:៩, ១០) ក្នុងក្រុមជំនុំគ្រីស្ទានយើងអាចឃើញបងប្អូនមានបុគ្គលិកលក្ខណៈផ្សេងៗច្រើនណាស់! អាស្រ័យដោយយើងមានភាពស្និទ្ធស្នាលនឹងគ្នាក្នុងការបំរើព្រះយេហូវ៉ា នោះម្ដងម្កាលយើងមុខជានឹងមានទំនាស់បន្ដិចបន្តួចមែន។—រ៉ូម ១២:១០; ភីលីព ២:៣
១៨ យើងមិនមែនខ្វាក់ភ្នែកដែលមើលមិនឃើញកំហុសរបស់បងប្អូនយើងនោះឡើយ តែយើងមិនផ្ដោតអារម្មណ៍ទៅលើកំហុសនោះដែរ។ ផ្ទុយទៅវិញ យើងខំយកតម្រាប់តាមគំរូរបស់ព្រះយេហូវ៉ា ហើយអ្នកតែងបទទំនុកដំកើងបានច្រៀងអំពីទ្រង់ថា៖ «ឱព្រះយេហូវ៉ាអើយ! បើសិនជាទ្រង់កត់ចំណាំអស់ទាំងអំពើទុច្ចរិត នោះ ឱព្រះអម្ចាស់អើយ! តើអ្នកណានឹងធន់នៅបាន?»។ (ទំនុកដំកើង ១៣០:៣) ជាជាងគិតតែអំពីលក្ខណៈណាដែលអាចធ្វើឲ្យទំនាក់ទំនងរបស់យើងប្រេះឆានោះ យើងគួរ«ដេញតាមអស់ទាំងសេចក្ដី ដែលនាំឲ្យមេត្រីគ្នា នឹងសេចក្ដីទាំងប៉ុន្មានដែលជួយស្អាងចិត្តគ្នាទៅវិញទៅមកវិញ»។ (រ៉ូម ១៤:១៩) យើងត្រូវខំឲ្យមានទស្សនៈដូចព្រះយេហូវ៉ាអំពីបុគ្គលឯទៀត ដោយសម្គាល់គុណសម្បត្ដិល្អៗរបស់ពួកគេ មិនមែនកំហុសរបស់គេនោះទេ។ ពេលដែលយើងធ្វើដូច្នេះ នេះអាចជួយយើងឲ្យ«ទ្រាំទ្រគ្នា»ផងដែរ។—កូល៉ុស ៣:១៣
១៩. សូមរៀបរាប់អំពីជំហានផ្សេងៗដែលគ្រីស្ទានម្នាក់អាចធ្វើបាន ដើម្បីដោះស្រាយនូវទំនាស់។
១៩ ចុះយ៉ាងណាបើមានការទាស់ទែងគ្នាដែលយើងមិនអាចដោះស្រាយដោយខ្លួនឯងក្នុងចិត្តយើងផ្ទាល់នោះ? (ទំនុកដំកើង ៤:៤) តើអ្នកនិងបងប្អូនរួមជំនឿណាម្នាក់មានទំនាស់មួយដែលមិនទាន់បានដោះស្រាយនៅឡើយឬ? សូមព្យាយាមដោះស្រាយរឿងនោះចុះ! (លោកុប្បត្តិ ៣២:១៣-១៥) មុនដំបូង ចូរអធិស្ឋានទូលថ្វាយព្រះយេហូវ៉ាដើម្បីសុំការណែនាំពីទ្រង់។ រួចមក ចូរទៅជួបបងប្អូននោះដោយចងចាំនូវលក្ខណៈល្អៗរបស់គាត់ ព្រមទាំង«ប្រព្រឹត្ត ដោយសេចក្ដីសុភាពនៃប្រាជ្ញាចុះ!»។ (យ៉ាកុប ៣:១៣) ចូរប្រាប់គាត់ថា អ្នកចង់ជានាជាមួយគាត់វិញ។ សូមចងចាំនូវឱវាទមកពីព្រះដែលថា៖ «ចូរឲ្យគ្រប់គ្នាបានឆាប់នឹងស្ដាប់ ក្រនឹងនិយាយ ហើយយឺតនឹងខឹងដែរ»។ (យ៉ាកុប ១:១៩) យោបល់នេះដែលឲ្យយើង«យឺតនឹងខឹង»នោះ អាចបានសេចក្ដីថា បងប្អូននោះប្រហែលជានឹងនិយាយឬប្រព្រឹត្តអ្វីមួយដែលធ្វើឲ្យអ្នកមានកំហឹង។ បើមានមែន ចូរសុំជំនួយពីព្រះយេហូវ៉ាដើម្បីអាចទប់ចិត្តជានិច្ច។ (កាឡាទី ៥:២២, ២៣) ចូរអនុញ្ញាតឲ្យបងប្អូននោះនិយាយអស់ពីចិត្តហើយប្រុងស្ដាប់គាត់ចុះ! កុំនិយាយកាត់គាត់ឡើយ សូម្បីតែគាត់និយាយអ្វីខ្លះដែលអ្នកមិនយល់ព្រមក៏ដោយ។ ទស្សនៈរបស់គាត់ប្រហែលជាខុសមែន ប៉ុន្តែនោះនៅតែជាទស្សនៈរបស់គាត់នៅឡើយ។ សូមខំយល់អំពីបញ្ហានោះតាមទស្សនៈរបស់គាត់វិញ។ នេះប្រហែលជាតម្រូវឲ្យអ្នកមានទស្សនៈអំពីខ្លួនអ្នកដោយយល់អំពីទស្សនៈរបស់គាត់ចំពោះអ្នកវិញ។—សុភាសិត ១៨:១៧
២០. ពេលដែលយើងចង់ដោះស្រាយបញ្ហារវាងគ្នានោះ តើយើងអាចធ្វើអ្វីទៀតដែលប្រហែលជានឹងជួយយើងជានានឹងគ្នាឡើងវិញ?
២០ កាលណាអ្នកមានឱកាសនិយាយតបទៅវិញនោះ ចូរប្រើពាក្យសំដីទន់ភ្លន់ចុះ! (កូឡូស ៤:៦, ព្រះគម្ពីរភាសាខ្មែរសម្រាយ) ចូរប្រាប់បងប្អូននោះអំពីលក្ខណៈសម្បត្ដិខ្លះរបស់គាត់ដែលអ្នកស្រឡាញ់។ ចូរសុំទោសអំពីកំហុសរបស់អ្នកក្នុងការភាន់ច្រឡំនោះ។ បើអ្នកខិតខំដោយចិត្តរាបទាបហើយអាចជានានឹងគ្នាឡើងវិញនោះ ចូរអរព្រះគុណថ្វាយព្រះយេហូវ៉ាផងដែរ។ បើអ្នកព្យាយាមតែមិនអាចជានានឹងគាត់ឡើងវិញបានទេ ចូរសុំការណែនាំពីព្រះយេហូវ៉ាតទៅទៀតកាលដែលអ្នករកឱកាសដើម្បីឲ្យស្រុះស្រួលនឹងគ្នាវិញ។—រ៉ូម ១២:១៨
២១. តើការពិគ្រោះនេះបានជួយអ្នកឲ្យមានទស្សនៈដូចព្រះយេហូវ៉ាចំពោះអ្នកដទៃបានយ៉ាងណា?
២១ ព្រះយេហូវ៉ាមានព្រះទ័យស្រឡាញ់អ្នកបំរើទាំងឡាយរបស់ទ្រង់។ ទ្រង់សព្វព្រះហឫទ័យឲ្យយើងទាំងអស់គ្នាធ្វើកិច្ចបំរើទ្រង់ទោះជាយើងមានភាពមិនគ្រប់ល័ក្ខណ៍យ៉ាងណាក៏ដោយ។ ពេលដែលយើងរៀនកាន់តែច្រើនអំពីទស្សនៈរបស់ព្រះយេហូវ៉ាចំពោះអ្នកដទៃ នោះយើងនឹងស្រឡាញ់បងប្អូនប្រុសស្រីទាំងឡាយកាន់តែខ្លាំងឡើងផងដែរ។ បើសេចក្ដីស្រឡាញ់របស់យើងចំពោះបងប្អូនគ្រីស្ទានណាម្នាក់បានរសាយបាត់ នោះយើងអាចបង្កាត់ឲ្យមានភាពកក់ក្ដៅឡើងវិញបាន បើយើងខំប្រឹងឲ្យមានទស្សនៈល្អចំពោះអ្នកដទៃ ពោលគឺមានទស្សនៈដូចព្រះយេហូវ៉ា នោះយើងនឹងទទួលពរយ៉ាងវិសេសជាពុំខាន!
[កំណត់សម្គាល់]
^ វគ្គ 1 ក្រោយៗមក មានព្រឹត្ដិការណ៍ដែលបានសឲ្យឃើញថា អេលាបមិនមានលក្ខណៈគ្រប់គ្រាន់ឲ្យធ្វើជាស្តេចល្អនៃសាសន៍អ៊ីស្រាអែលឡើយ។ ពេលកូលីយ៉ាតជាជនជាតិភីលីស្ទីនដែលមានមាឌធំខ្ពស់នោះបានបបួលជនអ៊ីស្រាអែលឲ្យមកប្រកួតនឹងវា នោះអេលាបនិងបុរសសាសន៍អ៊ីស្រាអែលឯទៀតបានពួនខ្លួនដោយព្រោះមានចិត្តភ័យខ្លាច។—សាំយូអែលទី១ ១៧:១១, ២៨-៣០
^ វគ្គ 7 តាមមើលទៅ ស្តេចយេរ៉ូបោមទី២បានចំរើនភោគទ្រព្យនៅក្នុងព្រះរាជាណាចក្រខាងជើងនោះ ដោយសារមានជ័យជំនះក្នុងចំបាំងដ៏ធំខ្លះៗ ហើយអតីតតំបន់ខ្លះៗរបស់ព្រះរាជាណាចក្រនោះបានត្រូវស្ដារឡើងវិញ ហើយដំណាលគ្នាប្រមូលសួយអាករផងដែរ។—សាំយូអែលទី២ ៨:៦; ពង្សាវតារក្សត្រទី២ ១៤:២៣-២៨; របាក្សត្រទី២ ៨:៣, ៤; អេម៉ុស ៦:២
តើអ្នកនឹងឆ្លើយយ៉ាងណា?
• តើព្រះយេហូវ៉ាមានទស្សនៈយ៉ាងណាចំពោះកំហុសរបស់ពួកអ្នកបំរើស្មោះត្រង់របស់ទ្រង់?
• តើយ៉ូណាសនិងពេត្រុសមានលក្ខណៈសម្បត្ដិអ្វីខ្លះ?
• តើអ្នកបានតាំងចិត្តរក្សាឲ្យមានទស្សនៈបែបណាចំពោះបងប្អូនគ្រីស្ទានរបស់អ្នក?
[សំណួរសម្រាប់អត្ថបទសិក្សា]
[ប្រអប់នៅទំព័រ២០]
ចូរគិតថា តើព្រះមានទស្សនៈយ៉ាងណាអំពីអ្នកដទៃ?
កាលដែលអ្នករំពឹងគិតពីកំណត់ហេតុលោកយ៉ូណាសក្នុងព្រះគម្ពីរ តើអ្នកទទួលស្គាល់ថា អ្នកគួរពិនិត្យមើលទស្សនៈរបស់ខ្លួនសាជាថ្មី ចំពោះមនុស្សដែលអ្នកជួបជាញឹកញយក្នុងកិច្ចការផ្សព្វផ្សាយដំណឹងល្អនោះ? មនុស្សទាំងនោះមើលទៅដូចជាគាប់ចិត្តនឹងជីវិតរបស់គេហើយ ឬពួកគេក៏មិនអើពើដូចពួកអ៊ីស្រាអែលដែរ ឬរហូតដល់ប្រឆាំងនឹងសារពីព្រះក៏មាន។ យ៉ាងណាក៏ដោយ តើព្រះយេហូវ៉ាមានទស្សនៈយ៉ាងណាចំពោះពួកគេ? សូម្បីតែអ្នកខ្លះក្នុងរបបលោកីយ៍នេះដែលមានមុខមាត់ក្ដី នៅថ្ងៃណាមួយប្រហែលពួកគេអាចបែរមករកព្រះយេហូវ៉ា ដូចស្តេចនៃទីក្រុងនីនីវេបានប្រែចិត្តដោយធ្វើតាមសារដែលយ៉ូណាសបានប្រកាស។—យ៉ូណាស ៣:៦, ៧
[រូបភាពនៅទំព័រ១៨]
ព្រះយេស៊ូបានលើកកិត្ដិយស ដល់យ៉ូណាស ដោយលើកឡើង នូវអ្វីដែលគាត់បានពិសោធ