អ្នកបំរើរបស់ព្រះយេហូវ៉ាមានសេចក្ដីសង្ឃឹមដ៏ពិត
អ្នកបំរើរបស់ព្រះយេហូវ៉ាមានសេចក្ដីសង្ឃឹមដ៏ពិត
«សំណល់នៃពួកយ៉ាកុប នឹងនៅកណ្ដាលសាសន៍ជាច្រើន ទុកដូចជាទឹកសន្សើមមកពីព្រះយេហូវ៉ា . . . ក៏មិនសង្ឃឹមដល់មនុស្សជាតិដែរ»។—មីកា ៥:៦
១. តើអ៊ីស្រាអែលខាងវិញ្ញាណជាប្រភពនៃកម្លាំងចិត្តយ៉ាងដូចម្ដេច?
ព្រះយេហូវ៉ាជាអ្នកបង្កើតដ៏ឧត្តុងឧត្តមនៃទឹកភ្លៀងនិងទឹកសន្សើម។ គឺគ្មានប្រយោជន៍ទេក្នុងការសង្ឃឹមលើមនុស្សឲ្យបង្កើតទឹកសន្សើមនិងទឹកភ្លៀងនោះ។ ព្យាការីមីកាបានសរសេរថា៖ «គ្រានោះ សំណល់នៃពួកយ៉ាកុប នឹងនៅកណ្ដាលសាសន៍ជាច្រើន ទុកដូចជាទឹកសន្សើមមកពីព្រះយេហូវ៉ា ហើយដូចជាទឹកភ្លៀងរ៉ុយៗនៅលើស្មៅ ដែលមិនរង់ចាំមនុស្សទេ ក៏មិនសង្ឃឹមដល់មនុស្សជាតិដែរ»។ (មីកា ៥:៦) តើ«សំណល់នៃពួកយ៉ាកុប»ជាអ្នកណានៅសព្វថ្ងៃនេះ? ពួកគេជាពួកអ៊ីស្រាអែលខាងវិញ្ញាណ គឺ «សាសន៍អ៊ីស្រាអែលនៃព្រះ»។ (កាឡាទី ៦:១៦) ចំពោះ«មនុស្សជាតិ»នៅលើផែនដី នោះពួកគេប្រៀបដូចជា«ទឹកសន្សើមមកពីព្រះយេហូវ៉ា» និង«ដូចជាទឹកភ្លៀងរ៉ុយៗនៅលើស្មៅ»។ ប្រាកដហើយ ពួកគ្រីស្ទានចាក់ប្រេងតាំងនៅសព្វថ្ងៃជាប្រភពនៃកម្លាំងចិត្តដែលមកពីព្រះដល់រាស្ត្រទ្រង់។ ព្រះយេហូវ៉ាប្រើពួកគេជាអ្នកប្រកាសសារព្រះរាជាណាចក្រ ដើម្បីផ្ដល់សេចក្ដីសង្ឃឹមដ៏ពិតដល់រាស្ត្រទ្រង់។
២. ហេតុអ្វីក៏យើងមានសេចក្ដីសង្ឃឹមដ៏ពិតមួយទោះជារស់នៅក្នុងពិភពលោកដែលមានបញ្ហានេះ?
២ យើងមិនភ្ញាក់ផ្អើលទេ ដែលលោកីយ៍នេះគ្មានសេចក្ដីសង្ឃឹមដ៏ពិតនោះ។ អស្ថិរភាពផ្នែកនយោបាយ ការលែងគោរពតាមគោលការណ៍សីលធម៌ ឧក្រិដ្ឋកម្ម វិបត្ដិសេដ្ឋកិច្ច ភេរវកម្ម និងសង្គ្រាម ហេតុការណ៍ទាំងនេះជាអ្វីខ្លះៗដែលមានពាសពេញជុំវិញយើងក្នុងរបបលោកីយ៍ ដែលកាន់កាប់ដោយអារក្សសាតាំង។ (យ៉ូហានទី១ ៥:១៩) មនុស្សជាច្រើនព្រួយបារម្ភអំពីអ្វីដែលអាចកើតឡើងនៅអនាគតកាល។ ប៉ុន្តែ ជាពួកអ្នកដែលថ្វាយបង្គំព្រះយេហូវ៉ា នោះយើងមិនភ័យខ្លាចទេ ពីព្រោះយើងមានសេចក្ដីសង្ឃឹមដ៏ពិតមួយចំពោះអនាគត។ សេចក្ដីសង្ឃឹមនេះមានមូលដ្ឋានទៅលើព្រះបន្ទូលរបស់ព្រះ។ យើងមានជំនឿស៊ប់ទៅលើព្រះយេហូវ៉ានិងបន្ទូលរបស់ទ្រង់ពីព្រោះអ្វីដែលទ្រង់មានបន្ទូលនោះ រមែងកើតឡើងពិតប្រាកដជានិច្ច។
៣. (ក) ហេតុអ្វីក៏ព្រះយេហូវ៉ាមានជំទាស់នឹងសាសន៍អ៊ីស្រាអែលនិងសាសន៍យូដា? (ខ) ហេតុអ្វីក៏ទំនាយរបស់មីកាទាក់ទងនឹងសម័យយើងនេះ?
៣ ទំនាយរបស់មីកាដែលព្រះបានបណ្ដាលឲ្យតែងនោះអាចជួយពង្រឹងកម្លាំងចិត្តយើង ដើម្បីដើរក្នុងព្រះនាមរបស់ព្រះយេហូវ៉ា និងផ្ដល់ឲ្យយើងនូវមូលដ្ឋាននៃសេចក្ដីសង្ឃឹមដ៏ពិតមួយ។ នៅសតវត្សទីប្រាំបីមុនស.យ. ពេលលោកមីកាបានទាយ នោះរាស្ត្រដែលមានកិច្ចព្រមព្រៀងជាមួយនឹងព្រះយេហូវ៉ាបានបែកគ្នាជាសាសន៍ពីរ គឺសាសន៍អ៊ីស្រាអែលនិងសាសន៍យូដា ហើយសាសន៍ទាំងពីរនោះមិនបានគោរពតាមកិច្ចព្រមព្រៀងរបស់ខ្លួនជាមួយនឹងព្រះយេហូវ៉ាឡើយ។ ជាលទ្ធផល ព្រះរាជាណាចក្រទាំងពីរបានប្រឡូកប្រឡាក់ទៅដោយការក្បត់ជំនឿ ការមិនគោរពតាមគោលការណ៍សីលធម៌ និងការលោភលន់ខាងទ្រព្យសម្បត្ដិជាច្រើនក្រៃលែង។ ដូច្នេះ ព្រះយេហូវ៉ាបានព្រមានសាសន៍ទាំងពីរថា ទ្រង់នឹងដាក់ទោសទៅលើពួកគេ។ ប្រាកដហើយ ការព្រមានទាំងនោះរបស់ព្រះយេហូវ៉ា គឺសំរាប់មនុស្សនៅសម័យរបស់លោកមីកា។ ប៉ុន្តែ សភាពការណ៍នៅសម័យយើងនេះនិងសម័យលោកមីកាគឺស្រដៀងគ្នាដល់ម្ល៉េះបានជាទំនាយរបស់មីកាក៏ទាក់ទងនឹងសម័យយើងផងដែរ។ ហេតុការណ៍នេះលេចធ្លោកាន់តែជាក់ស្តែងទៅៗ ពេលយើងពិចារណាចំណុចសំខាន់ៗក្នុងជំពូកទាំងប្រាំពីរនៃសៀវភៅមីកា។
សេចក្ដីសង្ខេបសៀវភៅមីកាប្រាប់យើងយ៉ាងណាខ្លះ
៤. តើមីកាពីជំពូកទី១ដល់ជំពូកទី៣ផ្ដល់ពត៌មានអ្វីខ្លះ?
៤ យើងសូមពិចារណាយ៉ាងខ្លីនូវសាច់រឿងក្នុងសៀវភៅមីកា។ ក្នុងជំពូកទី១ ព្រះយេហូវ៉ាលាតត្រដាងឲ្យឃើញនូវការបះបោររបស់សាសន៍អ៊ីស្រាអែលនិងសាសន៍យូដា។ ជាលទ្ធផល អ៊ីស្រាអែលនឹងត្រូវបំផ្លាញចោលដោយសារការបះបោរនោះ ហើយទោសរបស់សាសន៍យូដានឹងមានរហូតទៅដល់ទ្វារក្រុងយេរូសាឡិម។ ជំពូកទី២បញ្ជាក់ថា អ្នកមាននិងអ្នកកាន់អំណាចកំពុងតែជិះជាន់សង្កត់សង្កិនអ្នកតូចនិងអ្នកដែលគ្មានទីពឹង។ ក៏ប៉ុន្តែ មានសេចក្ដីសន្យាមួយពីព្រះដែរ។ រាស្ត្ររបស់ព្រះនឹងត្រូវកៀរប្រមូលគ្នាឲ្យមានសាមគ្គីភាព។ ជំពូកទី៣រាយការណ៍នូវទោសដែលព្រះយេហូវ៉ាបានជំនុំជំរះទៅលើពួកមេដឹកនាំជាតិ និងពួកព្យាការីដែលរំលងច្បាប់ទ្រង់នោះ។ ពួកមេដឹកនាំមិនប្រព្រឹត្តដោយយុត្ដិធម៌ និងពួកព្យាការីចេះតែភូតភរ។ ថ្វីដ្បិតមានស្ថានភាពបែបនេះក៏ដោយ មីកាបានទទួលកម្លាំងពីវិញ្ញាណរបស់ព្រះយេហូវ៉ាដើម្បីប្រកាសថា ព្រះយេហូវ៉ាជិតនឹងសម្រេចតាមការជំនុំជំរះរបស់ទ្រង់។
៥. តើមីកាជំពូកទី៤និងទី៥មានពត៌មានអ្វីខ្លះ?
៥ ជំពូកទី៤ទាយថា នៅថ្ងៃជាន់ក្រោយបង្អស់ គ្រប់ទាំងសាសន៍នឹងឡើងទៅឯភ្នំដ៏ខ្ពស់នៃព្រះវិហាររបស់ព្រះយេហូវ៉ា ដើម្បីទទួលការបង្ហាត់បង្រៀនពីទ្រង់។ ប៉ុន្តែ មុនពេលនោះមកដល់ សាសន៍យូដានឹងត្រូវបំបរបង់ចេញទៅស្រុកបាប៊ីឡូន ប៉ុន្តែ រួចមកព្រះយេហូវ៉ានឹងរំដោះពួកគេវិញ។ ជំពូកទី៥បើកសម្ដែងថា ព្រះមេស្ស៊ីនឹងប្រសូតមកក្នុងភូមិបេថ្លេហិមនៅស្រុកយូដា។ ព្រះមេស្ស៊ីនោះនឹងឃ្វាលរាស្ត្រទ្រង់ដោយជ័យជំនះ ហើយនឹងសង្គ្រោះរាស្ត្រនោះពីសាសន៍ទាំងឡាយដែលជិះជាន់ពួកគេ។
៦, ៧. តើមានពត៌មានអ្វីខ្លះក្នុងជំពូកទី៦និងទី៧នៃទំនាយរបស់មីកា?
៦ មីកាជំពូកទី៦មានកំណត់ហេតុអំពីចំណោទរបស់ព្រះយេហូវ៉ាទៅលើរាស្ត្រទ្រង់ ដោយមានលំនាំដូចជារឿងក្ដីក្នុងតុលាការ។ តើព្រះយេហូវ៉ាបានធ្វើអ្វី ដែលបណ្ដាលឲ្យរាស្ត្រទ្រង់បះបោរដូច្នេះ? ព្រះយេហូវ៉ាមិនបានធ្វើអ្វីសោះឡើយ។ ការពិត សេចក្ដីតម្រូវរបស់ទ្រង់គឺសមហេតុផលណាស់។ ទ្រង់ចង់ឲ្យអ្នកដែលថ្វាយបង្គំទ្រង់ព្យាយាមប្រព្រឹត្តដោយយុត្ដិធម៌ ដោយសប្បុរស និងដោយចិត្តសុភាពពេលពួកគេដើរជាមួយនឹងទ្រង់។ ជាជាងធ្វើយ៉ាងនេះ សាសន៍អ៊ីស្រាអែលនិងយូដាបានដើរតាមគន្លងជាអ្នកបះបោរប្រឆាំង ហើយពួកគេនឹងត្រូវទទួលរងនូវលទ្ធផលពីការបះបោរនោះ។
៧ នៅជំពូកចុងក្រោយ មីកាផ្ដន្ទាទោសភាពទុច្ចរិតនៃមនុស្សនៅសម័យរបស់គាត់។ ប៉ុន្តែ មីកាមិនបានធ្លាក់ទឹកចិត្តទេ។ មីកានៅប្ដេជ្ញាចិត្ត«រង់ចាំ»ព្រះយេហូវ៉ា។ (មីកា ៧:៧) សៀវភៅមីកាចប់ដោយមីកាបញ្ជាក់នូវជំនឿស៊ប់ថា ព្រះយេហូវ៉ានឹងមេត្ដាដល់រាស្ត្ររបស់ទ្រង់។ ប្រវត្ដិសាស្ត្រផ្ដល់ភស្តុតាងថា សេចក្ដីសង្ឃឹមរបស់មីកាបានក្លាយជាការពិតមែន។ នៅឆ្នាំ៥៣៧ មុនស.យ. ពេលព្រះយេហូវ៉ាកែតម្រង់រាស្ត្ររបស់ទ្រង់ចប់ស្រេចហើយ នោះទ្រង់បានបង្ហាញសេចក្ដីមេត្ដាករុណាដោយនាំសំណល់រាស្ត្រទ្រង់មួយចំនួនទៅស្រុករបស់គេវិញ។
៨. តើអ្នកអាចសង្ខេបសាច់រឿងក្នុងសៀវភៅមីកាដោយដូចម្ដេច?
៨ ព្រះយេហូវ៉ាបានផ្ដល់ពត៌មានដ៏ប្រសើរណាស់តាមរយៈព្យាការីមីកា! សៀវភៅដែលព្រះបានបណ្ដាលឲ្យសរសេរនេះ ផ្ដល់ជាគំរូដែលព្រមានយើងអំពីរបៀបព្រះយេហូវ៉ាប្រព្រឹត្តទៅលើអ្នកដែលអះអាងថាពួកគេបំរើទ្រង់ ប៉ុន្តែមិនរក្សាភាពស្មោះត្រង់ចំពោះទ្រង់ឡើយ។ សៀវភៅនោះក៏បានទាយអំពីព្រឹត្ដិការណ៍ដែលកំពុងតែកើតមានឡើងសព្វថ្ងៃនេះដែរ។ សៀវភៅនោះថែមទាំងផ្ដល់ដំបូន្មានពីព្រះអំពីរបៀបដែលយើងគួរប្រព្រឹត្តក្នុងកំឡុងគ្រាដ៏លំបាកនេះ ដើម្បីប្រាកដថាយើងនឹងទទួលសមតាមសេចក្ដីសង្ឃឹមរបស់យើងជាក់ជាពុំខាន។
ព្រះអម្ចាស់មហាក្សត្រព្រះយេហូវ៉ាមានបន្ទូល
៩. យោងទៅតាមមីកា ១:២ តើព្រះយេហូវ៉ានឹងចាត់វិធានការធ្វើអ្វី?
៩ ឥឡូវ យើងសូមពិចារណាសៀវភៅមីកាយ៉ាងល្អិតល្អន់។ នៅមីកា ១:២ យើងអានដូចតទៅថា៖ «ម្នាលជនជាតិទាំងឡាយអើយ! ចូរស្ដាប់ទាំងអស់គ្នាចុះ! ឱផែនដី នឹងសព្វសារពើដែលនៅផែនដីអើយ! ចូរប្រុងស្ដាប់ចុះ! ហើយបើកឱកាសឲ្យព្រះអម្ចាស់យេហូវ៉ា ធ្វើបន្ទាល់ទាស់នឹងឯងរាល់គ្នា គឺឲ្យព្រះអម្ចាស់ធ្វើបន្ទាល់ពីព្រះវិហារបរិសុទ្ធរបស់ទ្រង់»។ ប្រសិនបើអ្នកបានរស់នៅសម័យរបស់លោកមីកា បន្ទូលនេះច្បាស់ជានឹងធ្វើឲ្យអ្នកចាប់អារម្មណ៍ខ្លាំងណាស់។ ពិតមែនហើយ បន្ទូលនេះក៏ធ្វើឲ្យយើងចាប់អារម្មណ៍នៅសព្វថ្ងៃនេះដែរ ដោយព្រោះព្រះយេហូវ៉ាកំពុងតែមានបន្ទូលចេញពីព្រះវិហារបរិសុទ្ធរបស់ទ្រង់ មិនគ្រាន់តែទៅកាន់សាសន៍អ៊ីស្រាអែលនិងយូដាប៉ុណ្ណោះទេ ប៉ុន្តែទៅកាន់មនុស្សនៅគ្រប់ទីកន្លែង។ នៅសម័យរបស់មីកា មនុស្សបានធ្វើព្រងើយជ្រុលពេកនឹងព្រះយេហូវ៉ាដែលជាព្រះអម្ចាស់មហាក្សត្រ។ បន្ដិចទៀត អ្នកនោះនឹងលែងធ្វើដូច្នេះតទៅទៀត។ ព្រះយេហូវ៉ាបានសម្រេចព្រះទ័យចាត់វិធានការផ្ដាច់ព្រ័ត្រ។
១០. ហេតុអ្វីក៏ពាក្យនៅមីកា ១:២ មានសារៈសំខាន់ចំពោះយើង?
១០ សព្វថ្ងៃនេះក៏ដូចគ្នាដែរ។ វិវរណៈ ១៤:១៨-២០ បញ្ជាក់ថា ព្រះយេហូវ៉ាកំពុងតែមានបន្ទូលចេញពីព្រះវិហារបរិសុទ្ធរបស់ទ្រង់ម្ដងទៀត។ បន្ដិចទៀត ព្រះយេហូវ៉ានឹងចាត់វិធានការផ្ដាច់ព្រ័ត្រ ហើយក៏នឹងមានព្រឹត្ដិការណ៍សំខាន់ៗកើតឡើងម្ដងទៀតដែលនឹងពញ្ញាក់ពិភពលោកនេះ។ លើកនេះ ‹វល្លិ៍ទំពាំងបាយជូរដ៏ទុច្ចរិតនេះនៅផែនដីទាំងមូល› ត្រូវប្រទះនឹងសេចក្ដីក្រោធនៃព្រះយេហូវ៉ា ប្រៀបដូចបានបោះទៅក្នុងធុងយ៉ាងធំ ជាធុងជាន់ផ្លែទំពាំងបាយជូរ គឺត្រូវវិនាសសាបសូន្យបាត់ទៅ។
១១. តើពាក្យនៅមីកា ១:៣, ៤ មានន័យយ៉ាងណា?
១១ ចូរស្ដាប់អ្វីដែលព្រះយេហូវ៉ានឹងប្រព្រឹត្ត។ មីកា ១:៣, ៤ ចែងថា៖ «មើល! ព្រះយេហូវ៉ា ទ្រង់កំពុងយាងចេញពីទីកន្លែងរបស់ទ្រង់ ក៏នឹងយាងចុះមកជាន់លើទីខ្ពស់ទាំងប៉ុន្មាននៃផែនដីដែរ។ អស់ទាំងភ្នំនឹងរលាយពីក្រោមទ្រង់ទៅ ឯច្រកភ្នំទាំងប៉ុន្មាន នឹងសញ្ជែកចេញ ដូចជាក្រមួនដែលត្រូវភ្លើង ហើយដូចទឹកដែលចាក់ចុះតាមទីចោត»។ តើព្រះយេហូវ៉ានឹងយាងចេញពីស្ថានសួគ៌ និងជាន់ឈ្លីភ្នំនិងខ្ពង់រាបនៃស្រុកសន្យានោះពិតប្រាកដទេ? អត់ទេ! ព្រះយេហូវ៉ាមិនចាំបាច់យាងចេញពីស្ថានសួគ៌ទេ។ ទ្រង់មានតែប្រមូលអារម្មណ៍ទៅលើផែនដីប៉ុណ្ណោះ ដើម្បីសម្រេចគោលបំណងរបស់ទ្រង់។ ម្យ៉ាងទៀត មិនមែនជាផែនដីពិតប្រាកដដែលនឹងរងសេចក្ដីហិនវិនាសនេះទេ តែគឺជាមនុស្សដែលនៅលើផែនដីវិញ។ ពេលព្រះយេហូវ៉ាចាត់វិធានការនេះ លទ្ធផលនឹងទៅជាអន្តរាយសំរាប់អ្នកមិនស្មោះត្រង់នោះ ហាក់ដូចជាភ្នំបានរលាយដូចក្រមួនត្រូវភ្លើង ហើយដូចជាខ្ពង់រាបបានត្រូវប្រេះដោយរញ្ជួយដី។
១២, ១៣. សមស្របនឹងពេត្រុសទី២ ៣:១០-១២ តើអ្វីដែលធ្វើឲ្យសេចក្ដីសង្ឃឹមរបស់យើងបានពិតប្រាកដនោះ?
១២ ទំនាយនៅមីកា ១:៣, ៤ ប្រហែលជារំឭកអ្នកអំពីទំនាយមួយទៀតដែលព្រះបានបណ្ដាលឲ្យសរសេរនោះ ដោយទាយអំពីព្រឹត្ដិការណ៍អន្តរាយដែលនឹងកើតឡើងនៅលើផែនដី។ ដូចត្រូវទាយទុកនៅពេត្រុសទី២ ៣:១០ សាវ័កពេត្រុសបានសរសេរថា៖ «ថ្ងៃនៃព្រះអម្ចាស់ នោះនឹងមកដូចជាចោរប្លន់ នៅថ្ងៃនោះផ្ទៃមេឃនឹងបាត់ទៅ ដោយសូរគ្រាំគ្រេង ឯធាតុសព្វសារពើនឹងរលាយទៅ ដោយកំដៅដ៏ក្រៃលែង ហើយផែនដីនឹងការសព្វសារពើ នឹងត្រូវឆេះអស់រលីងទៅ»។ ដូចគ្នានឹងទំនាយរបស់មីកា ពាក្យសំដីរបស់ពេត្រុសមិនសំដៅទៅលើផ្ទៃមេឃនិងផែនដីពិតប្រាកដនោះទេ។ ពាក្យសំដីនោះសំដៅទៅលើសេចក្ដីវេទនាជាខ្លាំងដែលកំពុងតែឆ្ពោះមករករបបលោកីយ៍ដ៏អាក្រក់នេះ។
១៣ ទោះជាមានអន្តរាយបែបនេះកំពុងតែឆ្ពោះមកក៏ដោយ ជនគ្រីស្ទានអាចជឿជាក់ទៅលើអនាគតដូចជាលោកមីកាដែរ។ តើពួកគេអាចជឿជាក់ដោយដូចម្ដេច? ដោយអនុវត្តតាមដំបូន្មានក្នុងខជាបន្តបន្ទាប់ក្នុងសំបុត្ររបស់ពេត្រុសនោះ។ សាវ័កពេត្រុសឧទានថា៖ «តើគួរឲ្យអ្នករាល់គ្នាប្រព្រឹត្តបែបយ៉ាងណាវិញ ក្នុងកិរិយាបរិសុទ្ធ នឹងសេចក្ដីគោរពប្រតិបត្ដិ[ដល់ព្រះ] ទាំងទន្ទឹងចាំហើយខំជួយឲ្យថ្ងៃនៃព្រះបានឆាប់មកដល់ផង!»។ (ពេត្រុសទី២ ៣:១១, ១២) យើងនឹងទទួលអនាគតសមតាមសេចក្ដីសង្ឃឹមរបស់យើងយ៉ាងពិតប្រាកដ ប្រសិនបើយើងបណ្ដុះឲ្យមានចិត្តគំនិតចេះស្ដាប់បង្គាប់ និងប្រុងប្រយ័ត្នឲ្យមានចរិយាបរិសុទ្ធជានិច្ច ហើយមានរបៀបរស់នៅដែលពេញទៅដោយការគោរពប្រតិបត្ដិដល់ព្រះ ថែមទាំងចាំមិនភ្លេចថា ថ្ងៃនៃព្រះយេហូវ៉ានឹងមកដល់ពិតជាមិនខាន។
១៤. តើហេតុអ្វីក៏សាសន៍អ៊ីស្រាអែលនិងសាសន៍យូដាគួរនឹងទទួលទោស?
១៤ ព្រះយេហូវ៉ាពន្យល់នូវមូលហេតុដែលរាស្ត្ររបស់ទ្រង់គឺគួរនឹងទទួលទោស។ មីកា ១:៥ ចែងថា៖ «នេះគឺដោយព្រោះអំពើរំលងរបស់ពួកយ៉ាកុប នឹងអំពើបាបរបស់ពួកវង្សអ៊ីស្រាអែល។ អំពើរំលងរបស់ពួកយ៉ាកុបនោះជាអ្វី តើមិនមែនជាក្រុងសាម៉ារីទេឬអី? ហើយអស់ទាំងទីខ្ពស់របស់ពួកយូដាជាអ្វី តើមិនមែនជាក្រុងយេរូសាឡិមទេឬ?»។ ព្រះយេហូវ៉ាបានបង្កើតសាសន៍អ៊ីស្រាអែលនិងសាសន៍យូដា។ ប៉ុន្តែ ពួកគេបានបះបោរប្រឆាំងនឹងព្រះយេហូវ៉ាវិញ ហើយការបះបោររបស់គេមានរហូតទៅដល់ក្រុងសាម៉ារីដែលជារាជធានីនៃអ៊ីស្រាអែល និងក្រុងយេរូសាឡិមដែលជារាជធានីនៃស្រុកយូដា។
ការប្រព្រឹត្តអំពើអាក្រក់មានច្រើនពាសពេញ
១៥, ១៦. មនុស្សនៅសម័យរបស់លោកមីកាជាប់ទោសដោយការប្រព្រឹត្តដ៏អាក្រក់ណា?
១៥ ឧទាហរណ៍មួយដែលបញ្ជាក់នូវភាពទុច្ចរិតនៃមនុស្សនៅសម័យរបស់លោកមីកា ត្រូវពណ៌នាយ៉ាងជាក់ស្តែងនូវមីកា ២:១, ២៖ «វេទនាដល់ពួកអ្នកដែលគិតគូរអំពើទុច្ចរិត ហើយបង្កើតការអាក្រក់ នៅលើដំណេករបស់ខ្លួន! លុះព្រឹកភ្លឺឡើង នោះគេធ្វើការនោះទៅ ពីព្រោះគេមានកំឡាំងដៃនឹងធ្វើបាន។ គេលោភចង់បានស្រែចំការ ក៏ដណ្ដើមយកបាន ព្រមទាំងផ្ទះផង ហើយរឹបយកទៅ គេសង្កត់សង្កិនទាំងមនុស្សនឹងផ្ទះរបស់គេ គឺជាមនុស្សនឹងមរដករបស់គេដែរ»។
១៦ មនុស្សចិត្តលោភលន់ដេកគិតរកកិច្ចកលរឹបអូសយកចំការនិងផ្ទះរបស់អ្នកជិតខាងរបស់ខ្លួន។ នៅពេលព្រឹក មនុស្សលោភលន់នេះប្រញាប់ទៅធ្វើតាមផែនការអាក្រក់របស់ខ្លួន។ អ្នកនោះនឹងមិនធ្វើអ្វីដ៏ទុច្ចរិតទេ ប្រសិនបើពួកគេបាននឹកចាំពីកិច្ចព្រមព្រៀងរបស់ព្រះយេហូវ៉ា។ ក្រិត្យវិន័យលោកម៉ូសេមានវិធានការដើម្បីការពារអ្នកក្រ។ ក្រោមបង្គាប់ក្រិត្យវិន័យលោកម៉ូសេនោះ គ្មានក្រុមគ្រួសារណាដែលត្រូវបាត់បង់នូវមរតករបស់ខ្លួនឡើយ។ ប៉ុន្តែ ជនលោភលន់មិនរវល់នឹងក្រិត្យវិន័យនោះទេ។ អ្នកនោះបានធ្វើមិនដឹងមិនឮចំពោះបន្ទូលនៅលេវីវិន័យ ១៩:១៨ ដែលចែងថា៖ «ត្រូវឲ្យស្រឡាញ់អ្នកជិតខាងដូចខ្លួនឯងវិញ»។
១៧. តើអ្វីអាចកើតឡើងពេលអស់អ្នកដែលអះអាងថាខ្លួនបំរើព្រះ ទៅជាចាប់ផ្ដើមស្វែងរកវត្ថុទ្រព្យវិញនោះ?
១៧ នេះបង្ហាញនូវអ្វីដែលអាចកើតឡើង ពេលមនុស្សដែលអះអាងថាខ្លួនបំរើព្រះនោះឈប់គិតអំពីគោលដៅខាងវិញ្ញាណ និងចាប់ផ្ដើមស្វែងរកវត្ថុទ្រព្យវិញនោះ។ ប៉ុលបានព្រមានជនគ្រីស្ទាននៅសម័យរបស់គាត់ថា៖ «ពួកអ្នកដែលចង់ធ្វើជាអ្នកស្តុកស្តម្ភ នោះនឹងធ្លាក់ទៅក្នុងសេចក្ដីល្បួង នឹងអន្ទាក់ ហើយក្នុងបំណងជាច្រើន ដែលផ្ដេសផ្ដាស ហើយធ្វើទុក្ខដល់ខ្លួន ក៏ពន្លិចមនុស្សទៅក្នុងសេចក្ដីហិនវិនាស នឹងសេចក្ដីអន្តរធានវិញ»។ (ធីម៉ូថេទី១ ៦:៩) ពេលមនុស្សម្នាក់ចាត់ទុកការរកលុយជាអាទិភាពក្នុងជីវិតគាត់ តាមពិតគាត់កំពុងតែបំរើព្រះដ៏មិនពិតមួយរូប គឺជាទ្រព្យសម្បត្ដិ។ ព្រះមិនពិតនោះមិនអាចផ្ដល់នូវសេចក្ដីសង្ឃឹមដ៏ពិតចំពោះអនាគតបានឡើយ។—ម៉ាថាយ ៦:២៤
១៨. តើមនុស្សជាច្រើនដែលពឹងពាក់ទៅលើទ្រព្យសម្បត្ដិនៅសម័យមីកាត្រូវពិសោធអ្វី?
១៨ មនុស្សជាច្រើននៅសម័យមីកាបានរៀនដោយការពិសោធន៍ដ៏លំបាកថា ការពឹងពាក់ទៅលើទ្រព្យសម្បត្ដិគឺឥតប្រយោជន៍។ យោងទៅតាមមីកា ២:៤ ព្រះយេហូវ៉ាមានបន្ទូលថា៖ «នៅថ្ងៃនោះ គេនឹងចាប់តាំងប្រើពាក្យប្រៀបធៀបចាក់ដោតឯង ហើយនឹងទួញទំនួញយ៉ាងអាក់អួលដោយពាក្យថា៖ ‹យើងរាល់គ្នាត្រូវបំផ្លាញអស់រលីងហើយ! ព្រះទ្រង់បានផ្លាស់មរដករបស់សាសន៍ខ្ញុំ។ អើ! ទ្រង់បានដករើចេញពីខ្ញុំយ៉ាងណាហ្ន៎! ទ្រង់បានចែកស្រែចំការរបស់យើង ឲ្យដល់ពួកអ្នកបះបោរវិញ›»។ ពិតមែនហើយ អ្នកដែលលួចផ្ទះនិងចំការរបស់អ្នកឯទៀតក៏នឹងបាត់បង់នូវមរតកនៃក្រុមគ្រួសាររបស់ខ្លួនដែរ។ អ្នកទាំងនេះនឹងត្រូវបំបរបង់ចេញទៅប្រទេសក្រៅ និងទ្រព្យសម្បត្ដិរបស់ពួកគេនឹងក្លាយជាជ័យភ័ណ្ឌរបស់«ពួកអ្នកបះបោរ»គឺជា មនុស្សសាសន៍ដទៃ។ សេចក្ដីសង្ឃឹមរបស់អ្នកនោះដែលចង់បានអនាគតដ៏សំបូរសប្បាយនឹងត្រូវបំផ្លិចបំផ្លាញសាបសូន្យទៅ។
១៩, ២០. តើអ្វីកើតឡើងដល់ពួកយូដាដែលបានទុកចិត្តលើព្រះយេហូវ៉ា?
១៩ ប៉ុន្តែ ពួកអ្នកដែលសង្ឃឹមទៅលើព្រះយេហូវ៉ានឹងមិនខកចិត្តឡើយ។ ព្រះយេហូវ៉ាគឺស្មោះត្រង់នឹងកិច្ចព្រមព្រៀងរបស់ទ្រង់ជាមួយអ័ប្រាហាំនិងដាវីឌ ថែមទាំងមានសេចក្ដីមេត្ដាករុណាចំពោះបុគ្គលដូចជាមីកាដែរ ដែលស្រឡាញ់ព្រះនិងមានអារម្មណ៍សោកស្ដាយដោយព្រោះមនុស្សគ្នីគ្នាគ្មានទំនាក់ទំនងជាមួយនឹងទ្រង់។ នៅពេលកំណត់របស់ព្រះយេហូវ៉ា អ្វីៗនឹងត្រូវធ្វើឲ្យល្អជាថ្មីឡើងវិញសំរាប់ពួកអ្នកដែលស្រឡាញ់ទ្រង់នោះ។
២០ នេះកើតឡើងនៅឆ្នាំ៥៣៧ មុនស.យ. ក្រោយបាប៊ីឡូនរលំពីអំណាចរួចហើយនោះ មានជនសំណល់មួយចំនួនដែលបានត្រឡប់ទៅស្រុកយូដាវិញ។ នៅពេលនោះ ពាក្យរបស់មីកា ២:១២ បានសម្រេចជាលើកដំបូង។ ព្រះយេហូវ៉ាមានបន្ទូលថា៖ «ឱយ៉ាកុបអើយ! អញនឹងកៀរប្រមូលឯងទាំងអស់គ្នាមកជាពិត អញនឹងនាំសំណល់ពួកអ៊ីស្រាអែលមកប្រជុំគ្នា។ អញនឹងដាក់គេឲ្យនៅជាមួយគ្នា ដូចជាហ្វូងចៀមពីស្រុកបុសរ៉ា គឺដូចជាសត្វ១ហ្វូងនៅកណ្ដាលវាលស្មៅគេនឹងបញ្ចេញសូរអ៊ូអរជាខ្លាំង ដោយមានគ្នាច្រើន»។ ព្រះយេហូវ៉ាមានសេចក្ដីស្រឡាញ់ដ៏ជ្រាលជ្រៅណាស់! ក្រោយពីព្រះយេហូវ៉ាកែតម្រង់រាស្ត្ររបស់ទ្រង់ នោះទ្រង់អនុញ្ញាតឲ្យជនសំណល់ត្រឡប់ទៅស្រុកខ្លួននិងបំរើទ្រង់នៅស្រុកដែលទ្រង់បានប្រទានដល់ពួកឰយុកោរបស់គេ។
មានស្ថានភាពដូចគ្នាសព្វថ្ងៃនេះគួរឲ្យកត់សម្គាល់
២១. តើស្ថានភាពសព្វថ្ងៃនេះដូចស្ថានភាពនៅសម័យមីកាយ៉ាងដូចម្ដេច?
២១ ពេលយើងពិចារណាជំពូកទីមួយនិងពីរនៃសៀវភៅមីកានោះ តើអ្នកបានកត់សម្គាល់ថា មានស្ថានភាពដូចគ្នាសព្វថ្ងៃនេះដែរឬទេ? ដូចគ្នានឹងសម័យមីកា មនុស្សជាច្រើនសព្វថ្ងៃនេះអះអាងថា គេបំរើព្រះ។ ប៉ុន្តែ ដូចគ្នានឹងសាសន៍យូដានិងសាសន៍អ៊ីស្រាអែលនោះ មនុស្សទាំងនេះនៅបែកបាក់គ្នា និងរហូតដល់ធ្វើសឹកសង្គ្រាមច្បាំងគ្នានឹងគ្នាទៀតផង។ មនុស្សជាច្រើនក្នុងពិភពគ្រីស្ទសាសនាដែលជាអ្នកមាននោះ ពួកគេបានជិះជាន់អ្នកក្រ។ ជាងមុនៗទៅទៀត មេដឹកនាំសាសនាយល់ព្រមនឹងការប្រព្រឹត្តដែលព្រះបន្ទូលរបស់ព្រះហាមផ្ដាច់យ៉ាងជាក់ស្តែង។ គ្មានអ្វីប្លែកទេ ដែលព្រះយេហូវ៉ាទាយថា បន្ដិចទៀតពិភពគ្រីស្ទសាសនានឹងមកដល់ទីបញ្ចប់ ព្រមជាមួយនឹង«បាប៊ីឡូនដ៏ជាធំ»ដែលជាចក្រភពសាសនាមិនពិតទូទៅ! (វិវរណៈ ១៨:១-៥) យ៉ាងណាក៏ដោយ សមស្របទៅតាមគំរូនៅសម័យមីកានោះ ព្រះយេហូវ៉ានៅមានអ្នកបំរើស្មោះត្រង់នៅលើផែនដីនៅឡើយ។
២២. តើក្រុមពីរណាមានសេចក្ដីសង្ឃឹមលើព្រះរាជាណាចក្ររបស់ព្រះ?
២២ នៅឆ្នាំ១៩១៩ ពួកគ្រីស្ទានចាក់ប្រេងតាំងបានបំបែកខ្លួនទាំងស្រុងចេញពីពិភពគ្រីស្ទសាសនា និងបានចាប់ផ្ដើមប្រកាសដំណឹងល្អអំពីព្រះរាជាណាចក្រនៃព្រះដល់អស់ទាំងសាសន៍។ (ម៉ាថាយ ២៤:១៤) មុនដំបូង ពួកគេបានស្វែងរកអ្នកសំណល់នៃអ៊ីស្រាអែលខាងវិញ្ញាណ។ រួចមក «ចៀមឯទៀត»បានត្រូវប្រមូលមក និងក្រុមទាំងពីរបានក្លាយជា«ហ្វូងតែ១ នឹងអ្នកគង្វាលតែ១»។ (យ៉ូហាន ១០:១៦) ទោះជាអ្នកទាំងនេះកំពុងតែបំរើព្រះនៅ២៣៤ប្រទេសក៏ដោយ តែពួកអ្នកថ្វាយបង្គំដ៏ស្មោះត្រង់ទាំងអស់នេះពិតជាបានត្រូវដាក់ «ឲ្យនៅជាមួយគ្នា[ឬក៏«ឲ្យមានសាមគ្គីភាព», ព.ថ.]»។ ហើយពេលឥឡូវនេះ ក្រោលហ្វូងចៀមគឺ«អ៊ូអរជាខ្លាំង ដោយមានគ្នាច្រើន» រួមមានបុរស ស្ត្រី និងកុមារាកុមារី។ អ្នកបំរើរបស់ព្រះយេហូវ៉ាទាំងនេះមិនសង្ឃឹមទៅលើរបបលោកីយ៍នេះឡើយ តែសង្ឃឹមទៅលើព្រះរាជាណាចក្ររបស់ព្រះ ដែលបន្ដិចទៀតនឹងធ្វើឲ្យផែនដីក្លាយជាសួនមនោរម្យសារជាថ្មី។
២៣. ហេតុអ្វីបានជាអ្នកជឿស៊ប់ថាសេចក្ដីសង្ឃឹមរបស់អ្នកនឹងក្លាយជាការពិតជាក់ជាពុំខាន?
២៣ ស្តីអំពីពួកអ្នកថ្វាយបង្គំព្រះយេហូវ៉ាដែលមានចិត្តស្មោះត្រង់ នោះខចុងក្រោយក្នុងមីកាជំពូកទី២ចែងថា៖ «ស្តេចគេបានយាងនាំមុខគេ ហើយព្រះយេហូវ៉ាក៏នៅមុខគេបង្អស់»។ ក្នុងចិត្តរបស់អ្នក តើអ្នកអាចឃើញទិដ្ឋភាពដែលអ្នកកំពុងតែដើរហែក្បួនជ័យជំនះពីក្រោយព្រះយេស៊ូគ្រីស្ទជាស្តេចរបស់អ្នក និងព្រះយេហូវ៉ាជាអ្នកនាំមុខឬទេ? ប្រសិនបើអ្នកអាចឃើញមែន អ្នកអាចជឿជាក់ថា អ្នកកំពុងតែឆ្ពោះទៅរកជ័យជំនះជាស្រេច ហើយសេចក្ដីសង្ឃឹមរបស់អ្នកនឹងក្លាយជាការពិតជាក់ជាពុំខាន។ នេះនឹងកាន់តែជាក់ច្បាស់ពេលយើងពិចារណាពត៌មានសំខាន់ៗទៀតក្នុងទំនាយរបស់មីកា។
តើអ្នកនឹងឆ្លើយយ៉ាងណា?
• ហេតុអ្វីក៏ព្រះយេហូវ៉ាចាត់វិធានការប្រឆាំងនឹងសាសន៍យូដានិងសាសន៍អ៊ីស្រាអែលនៅសម័យរបស់មីកា?
• តើអ្វីអាចកើតឡើង បើពួកអ្នកដែលអះអាងថាខ្លួនបំរើព្រះ ទៅជាស្វែងរកវត្ថុទ្រព្យជាអាទិភាពក្នុងជីវិត?
• ក្រោយពីបានពិនិត្យមើលមីកាជំពូក១និងជំពូក២ ហេតុអ្វីបានជាអ្នកជឿស៊ប់ថាសេចក្ដីសង្ឃឹមរបស់អ្នកនឹងក្លាយជាការពិតជាក់ជាពុំខាន?
[សំណួរសម្រាប់អត្ថបទសិក្សា]
[រូបភាពនៅទំព័រ១៨]
ទំនាយរបស់មីកាពង្រឹងកម្លាំងយើងខាងវិញ្ញាណ
[រូបភាពនៅទំព័រ១៩]
ដូចពួកសំណល់សាសន៍យូដា នៅឆ្នាំ៥៣៧ មុនស.យ. អ៊ីស្រាអែលខាងវិញ្ញាណ និងគូកនរបស់គេក៏គាំទ្រ ការថ្វាយបង្គំពិតដែរ