ចូរផ្សាយក្នុងបំណងបញ្ចុះបញ្ចូលឲ្យមានសិស្ស
ចូរផ្សាយក្នុងបំណងបញ្ចុះបញ្ចូលឲ្យមានសិស្ស
«កាលអ័គីឡា នឹងព្រីស៊ីលបានឮ[អ័ប៉ុឡូស] នោះក៏នាំទៅពន្យល់ពីផ្លូវព្រះ ឲ្យរឹតតែច្បាស់ទៅទៀត»។—កិច្ចការ ១៨:២៦
១. ទោះជាអ័ប៉ុឡូស«មានចិត្តឧស្សាហ៍»ដោយសារព្រះវិញ្ញាណក៏ពិតមែន តែតើគាត់ត្រូវការអ្វី?
ព្រីស៊ីលនិងអ័គីឡា គូស្វាមីភរិយាដែលជាគ្រីស្ទាននៅសតវត្សទីមួយបានស្ដាប់អ័ប៉ុឡូសថ្លែងសុន្ទរកថាមួយនៅសាលាប្រជុំនៅទីក្រុងអេភេសូរ។ អ័ប៉ុឡូសបានធ្វើឲ្យអ្នកស្ដាប់ជក់ចិត្តដោយគាត់បញ្ចេញវោហារនិងប្រើវិធីសាស្ត្របញ្ចុះបញ្ចូល។ អ័ប៉ុឡូស«មានចិត្តឧស្សាហ៍»ដោយសារព្រះវិញ្ញាណ ហើយបាន«បង្រៀនយ៉ាងត្រឹមត្រូវ ពីអស់ទាំងសេចក្ដីខាងឯ[ព្រះយេស៊ូ]»។ ក៏ប៉ុន្តែ ព្រីស៊ីលនិងអ័គីឡាឃើញថាអ័ប៉ុឡូស«ស្គាល់តែបុណ្យជ្រមុជរបស់លោកយ៉ូហាន»ប៉ុណ្ណោះ។ អ័ប៉ុឡូសបានផ្សព្វផ្សាយអ្វីដែលជាសេចក្ដីពិតអំពីព្រះគ្រីស្ទមែន តែបញ្ហាគឺ ចំណេះរបស់គាត់អំពីព្រះគ្រីស្ទមិនបានស៊ីជំរៅទេ។ អ័ប៉ុឡូសត្រូវតែបង្កើនចំណេះរបស់គាត់អំពីតួនាទីរបស់ព្រះយេស៊ូគ្រីស្ទក្នុងការសម្រេចនូវគោលបំណងរបស់ព្រះយេហូវ៉ា។—កិច្ចការ ១៨:២៤-២៦
២. ទោះជាពិបាកក៏ដោយ តើព្រីស៊ីលនិងអ័គីឡាបានសុខចិត្តធ្វើអ្វី?
២ ដោយមិនស្ទាក់ស្ទើរ ព្រីស៊ីលនិងអ័គីឡាបានស្នើសុំជួយអ័ប៉ុឡូសឲ្យកាន់តាម«គ្រប់ទាំងសេចក្ដី»ដែលព្រះគ្រីស្ទបានបង្គាប់។ (ម៉ាថាយ ២៨:១៩, ២០)។ កំណត់ហេតុនេះចែងថា ពួកគាត់នាំអ័ប៉ុឡូស«ទៅពន្យល់ពីផ្លូវព្រះ ឲ្យរឹតតែច្បាស់ទៅទៀត»។ ក៏ប៉ុន្តែ អ័ប៉ុឡូសមានលក្ខណៈខ្លះៗដែលប្រហែលជានាំឲ្យជនគ្រីស្ទានខ្លះស្ទាក់ស្ទើរមិនចង់បង្រៀនគាត់ទេ។ តើគាត់មានលក្ខណៈអ្វីខ្លះ? ហើយតើការព្យាយាមរបស់ព្រីស៊ីលនិងអ័គីឡាក្នុងការពន្យល់បទគម្ពីរដល់អ័ប៉ុឡូសផ្ដល់មេរៀនអ្វីសំរាប់ពួកយើង? តើការពិចារណាកំណត់ហេតុប្រវត្ដិសាស្ត្រនេះជួយយើងផ្ដោតអារម្មណ៍ទៅលើការចាប់ផ្ដើមការសិក្សាព្រះគម្ពីរតាមផ្ទះយ៉ាងដូចម្ដេច?
ផ្ដោតអារម្មណ៍ចំពោះសេចក្ដីត្រូវការរបស់មនុស្ស
៣. ហេតុអ្វីបានជាសាវតាររបស់អ័ប៉ុឡូសមិនបាននាំឲ្យព្រីស៊ីលនិងអ័គីឡារាថយមិនចង់បង្រៀនគាត់?
៣ តាមមើលទៅ អ័ប៉ុឡូសជាជនជាតិយូដាដែលត្រូវចិញ្ចឹមអប់រំនៅទីក្រុងអ័លេក្សានទ្រា។ នៅសម័យនោះ ទីក្រុងអ័លេក្សានទ្រាជារាជធានីនៃប្រទេសអេស៊ីប ជាមណ្ឌលនៃការអប់រំជាន់ខ្ពស់ ហើយជាទីក្រុងល្បីដោយសារមានបណ្ណាល័យដ៏ធំមួយនៅទីនោះ។ ជនជាតិយូដាជាច្រើននាក់ព្រមទាំងបណ្ឌិតមួយចំនួនបានរស់នៅទីក្រុងនោះដែរ។ ហេតុនេះ សេចក្ដីបកប្រែភាសាក្រិចនៃបទគម្ពីរភាសាហេព្រើរដែលហៅថាសេបទូជីន ត្រូវបានបកប្រែនៅទីក្រុងនោះ។ ដូច្នេះគ្មានអ្វីចំឡែកទេដែលអ័ប៉ុឡូស«ចេះស្ទាត់ក្នុងគម្ពីរ»! ចំណែកអ័គីឡានិងព្រីស៊ីលជាជាងត្រសាល។ តើវោហារកោសល្យរបស់អ័ប៉ុឡូសធ្វើឲ្យពួកគាត់គិតថាខ្លួនគ្មានសមត្ថភាពជួយគាត់ឬទេ? អត់ទេ! សេចក្ដីស្រឡាញ់បានជំរុញពួកគាត់ឲ្យគិតពីសេចក្ដីត្រូវការរបស់អ័ប៉ុឡូស និងរបៀបដែលអាចជួយគាត់បាន។
៤. ជំនួយដែលអ័ប៉ុឡូសត្រូវការ តើគាត់អាចទទួលបាននៅកន្លែងណា? ហើយតើគាត់ទទួលបានយ៉ាងដូចម្ដេច?
៤ មិនថាអ័ប៉ុឡូសមានវោហារយ៉ាងណាក្ដី គាត់នៅតែត្រូវការការណែនាំថែមទៀត។ ជំនួយដែលគាត់ត្រូវការមិនអាចទទួលបានពីសកលវិទ្យាល័យណាមួយនោះទេ តែអាចទទួលពីចំណោមសមាជិកគ្នីគ្នាក្នុងក្រុមជំនុំវិញ។ អ័ប៉ុឡូសនឹងរៀនចំណុចផ្សេងៗដែលនឹងជួយឲ្យគាត់យល់ដឹងយ៉ាងត្រឹមត្រូវជាងអំពីការរៀបចំរបស់ព្រះសំរាប់សេចក្ដីសង្គ្រោះ។ ព្រីស៊ីលនិងអ័គីឡា«នាំ[អ័ប៉ុឡូស]ទៅពន្យល់ពីផ្លូវព្រះ ឲ្យរឹតតែច្បាស់ទៅទៀត»។
៥. តើព្រីស៊ីលនិងអ័គីឡាមានភាពខាងវិញ្ញាណយ៉ាងណា?
៥ ព្រីស៊ីលនិងអ័គីឡាមានភាពរឹងមាំខាងវិញ្ញាណក៏មានជំនឿមុតមាំដែរ។ ពួកគាត់ទំនងជា‹ប្រុងប្រៀបជានិច្ច ដើម្បីនឹងតបឆ្លើយដល់អ្នកណាដែលសួរពីហេតុនៃសេចក្ដីសង្ឃឹមរបស់ពួកគាត់› មិនថាអ្នកដែលសួរជាអ្នកមាន អ្នកក្រ បណ្ឌិត ឬទាសករក្ដី។ (ពេត្រុសទី១ ៣:១៥) អ័គីឡានិងភរិយារបស់គាត់មានសមត្ថភាព‹កាត់ស្រាយព្រះបន្ទូលរបស់ព្រះយ៉ាងត្រឹមត្រូវ›។ (ធីម៉ូថេទី២ ២:១៥) តាមមើលទៅ ពួកគាត់ទំនងជាយកចិត្តទុកដាក់យ៉ាងខ្លាំងក្នុងការសិក្សាបទគម្ពីរ។ ការណែនាំដែលមានមូលដ្ឋានលើ‹ព្រះបន្ទូលនៃព្រះដែលរស់នៅ ហើយពូកែផង›ក៏បានមានអានុភាពខ្លាំងលើចិត្តរបស់អ័ប៉ុឡូស។—ហេព្រើរ ៤:១២
៦. តើយើងអាចដឹងដូចម្ដេចថា អ័ប៉ុឡូសបានអបអរនឹងជំនួយដែលគាត់បានទទួល?
៦ អ័ប៉ុឡូសបានអបអរនឹងគំរូនៃអ្នកបង្រៀនទាំងពីររបស់គាត់ ហើយជាលទ្ធផលគាត់មានសមត្ថភាពរឹតតែច្រើនក្នុងការបញ្ចុះបញ្ចូលឲ្យមានសិស្ស។ អ័ប៉ុឡូសបានប្រើចំណេះរបស់គាត់ដោយប្រសិទ្ធភាពខ្ពស់បំផុតក្នុងការប្រកាសដំណឹងល្អ ជាពិសេសក្នុងចំណោមជនជាតិយូដា។ គាត់បានជួយយ៉ាងច្រើនក្នុងការបញ្ចុះបញ្ចូលជនជាតិយូដាឲ្យជឿលើព្រះគ្រីស្ទ។ ដោយ«ចេះស្ទាត់ក្នុងគម្ពីរ»គាត់បានបង្ហាញភស្តុតាងឲ្យពួកគេយល់ថា ព្យាការីគ្រប់រូបពីបុរាណក៏បានទាយអំពីការយាងមកដល់នៃព្រះគ្រីស្ទដែរ។ (កិច្ចការ ១៨:២៤) កំណត់ហេតុនោះក៏ថា អ័ប៉ុឡូសបានទៅតំបន់អាខៃ ហើយទីនោះ«គាត់ក៏ជួយយ៉ាងសន្ធឹក ដល់ពួកអ្នកដែលជឿដោយព្រះគុណ ព្រោះគាត់ជជែកផ្ចាញ់ពួកសាសន៍យូដា នៅកណ្ដាលជំនុំ ដោយប៉ិនប្រសប់ ទាំងបង្ហាញតាមគម្ពីរថា ព្រះយេស៊ូវជាព្រះគ្រីស្ទមែន»។—កិច្ចការ ១៨:២៧, ២៨
ចូររៀនពីគំរូរបស់អ្នកបង្រៀនឯទៀត
៧. តើអ័គីឡានិងព្រីស៊ីលបានទៅជាអ្នកបង្រៀនដ៏ចំណានយ៉ាងដូចម្ដេច?
៧ តើអ័គីឡានិងព្រីស៊ីលបានទៅជាអ្នកដែលបង្រៀនព្រះបន្ទូលរបស់ព្រះយ៉ាងប៉ិនប្រសប់ដោយដូចម្ដេច? ក្រៅពីការព្យាយាមសិក្សាផ្ទាល់ខ្លួននិងចូលរួមកិច្ចប្រជុំនោះ ការសេពគប់យ៉ាងជិតស្និទ្ធជាមួយសាវ័កប៉ុលទំនងជាបានជួយយ៉ាងច្រើន។ អស់១៨ខែ ប៉ុលបានស្នាក់នៅផ្ទះរបស់ព្រីស៊ីលនិងអ័គីឡានៅទីក្រុងកូរិនថូស។ ពួកគាត់ក៏បានធ្វើការជាជាងត្រសាលជាមួយគ្នាផងដែរ។ (កិច្ចការ ១៨:២, ៣) ពួកគាត់ច្បាស់ជាធ្លាប់សន្ទនាអំពីរឿងខាងវិញ្ញាណដ៏ជ្រាលជ្រៅ។ ហើយការសេពគប់យ៉ាងជិតស្និទ្ធដូច្នេះជាមួយប៉ុលពិតជាបានបង្កើនភាពខាងវិញ្ញាណរបស់ពួកគាត់ច្រើនណាស់! សុភាសិត ១៣:២០ចែងថា៖«អ្នកណាដែលដើរជាមួយនឹងមនុស្សប្រាជ្ញ នោះនឹងមានប្រាជ្ញាដែរ»។ បើមានការសេពគប់ដ៏ល្អ នោះមានឥទ្ធិពលប្រសើរទៅលើកិរិយានិងសកម្មភាពខាងវិញ្ញាណរបស់ពួកគាត់។—កូរិនថូសទី១ ១៥:៣៣
៨. ដោយសង្កេតមើលរបៀបដែលប៉ុលផ្សព្វផ្សាយនោះ តើព្រីស៊ីលនិងអ័គីឡាបានរៀនអ្វី?
៨ នៅពេលព្រីស៊ីលនិងអ័គីឡាបានមើលប៉ុលប្រកាសសារព្រះរាជាណាចក្រនោះ ពួកគាត់ឃើញអ្នកបង្រៀនម្នាក់ដែលជាគំរូល្អ។ កំណត់ហេតុនៅកិច្ចការចែងថា ប៉ុល«អធិប្បាយនៅក្នុងសាលាប្រជុំ[នៅទីក្រុងកូរិនថូស]រាល់តែថ្ងៃឈប់សំរាក ព្រមទាំងបញ្ចុះបញ្ចូលពួកសាសន៍យូដា នឹងសាសន៍ក្រេកឲ្យជឿផង»។ ក្រោយមក ពេលស៊ីឡាសនិងធីម៉ូថេបានចូលរួមជាមួយនឹងគាត់ ប៉ុល«មានសេចក្ដីបង្ខំក្នុងចិត្ត ឲ្យផ្សាយព្រះបន្ទូល ក៏ធ្វើបន្ទាល់អស់ពីចិត្តដល់សាសន៍យូដាថា ព្រះយេស៊ូវជាព្រះគ្រីស្ទពិត»។ ពេលឃើញថាអ្នកនៅសាលាប្រជុំមិនសូវចាប់អារម្មណ៍ប៉ុន្មានទេ នោះព្រីស៊ីលនិងអ័គីឡាបានកត់សម្គាល់ថាប៉ុលប្ដូរទៅកន្លែងល្អជាងដើម្បីផ្សាយ គឺផ្ទះមួយដែលជាប់សាលាប្រជុំតែម្ដង។ ទីនោះប៉ុលបានជួយគ្រីសប៉ុសដែលជា«មេសាលាប្រជុំ»ឲ្យទៅជាសិស្សព្រះយេស៊ូ។ ព្រីស៊ីលនិងអ័គីឡាទំនងជាបានកត់សម្គាល់ថា ការបញ្ចុះបញ្ចូលបានសិស្សមួយ ពិតជាបានមានអានុភាពខ្លាំងដែលនាំឲ្យតំបន់ផ្សាយបង្កើតផលជាច្រើន។ កំណត់ហេតុនោះចែងថា៖«គ្រីសប៉ុស . . . គាត់ជឿដល់ព្រះអម្ចាស់ ព្រមទាំងពួកគ្រួគាត់ទាំងអស់ដែរ ក៏មានពួកក្រុងកូរិនថូសបានស្ដាប់ហើយជឿជាច្រើន ទាំងទទួលបុណ្យជ្រមុជទឹកផង»។—កិច្ចការ ១៨:៤-៨
៩. តើព្រីស៊ីលនិងអ័គីឡាបានប្រព្រឹត្តតាមគំរូរបស់ប៉ុលយ៉ាងដូចម្ដេច?
៩ មនុស្សឯទៀតដែលជាអ្នកប្រកាសអំពីព្រះរាជាណាចក្របានធ្វើតាមគំរូរបស់ប៉ុលក្នុងកិច្ចផ្សាយ ដូចជាព្រីស៊ីលនិងអ័គីឡាជាដើម។ សាវ័កប៉ុលបានដាស់តឿនគ្រីស្ទានឯទៀតថា៖ «ចូរត្រាប់តាមខ្ញុំ ដូចជាខ្ញុំបានត្រាប់តាមព្រះគ្រីស្ទដែរ»។ (កូរិនថូសទី១ ១១:១) សមស្របទៅតាមគំរូរបស់ប៉ុល នោះព្រីស៊ីលនិងអ័គីឡាបានជួយអ័ប៉ុឡូសយល់ឲ្យបានត្រឹមត្រូវជាងអំពីសេចក្ដីបង្រៀនរបស់ព្រះគ្រីស្ទ។ បន្ទាប់មក អ័ប៉ុឡូសបានជួយអ្នកឯទៀត។ ព្រីស៊ីលនិងអ័គីឡាប្រាកដជាបានជួយបញ្ចុះបញ្ចូលឲ្យមានសិស្សនៅទីក្រុងរ៉ូម កូរិនថូស និងអេភេសូរផងដែរ។—កិច្ចការ ១៨:១, ២, ១៨, ១៩; រ៉ូម ១៦:៣-៥
១០. តើអ្នកបានរៀនអ្វីពីកិច្ចការជំពូកទី១៨ ដែលនឹងជួយអ្នកក្នុងការបញ្ចុះបញ្ចូលឲ្យមានសិស្ស?
១០ តើយើងអាចរៀនអ្វីដោយពិចារណាកិច្ចការជំពូកទី១៨? ដោយធ្វើតាមគំរូរបស់អ្នកដែលបង្រៀនព្រះបន្ទូលរបស់ព្រះយ៉ាងប៉ិនប្រសប់ យើងក៏អាចបង្កើនសមត្ថភាពបញ្ចុះបញ្ចូលឲ្យមនុស្សទៅជាសិស្សដែរ ដូចអ័គីឡានិងព្រីស៊ីលប្រហែលជាបានរៀនពីគំរូរបស់ប៉ុលនោះ។ យើងក៏អាចសេពគប់អ្នកដែល«មានសេចក្ដីបង្ខំក្នុងចិត្ត ឲ្យផ្សាយព្រះបន្ទូល»និងដែល«ធ្វើបន្ទាល់អស់ពីចិត្ត»ដល់អ្នកដទៃ។ (កិច្ចការ ១៨:៥) យើងអាចកត់សម្គាល់នូវរបៀបពួកគាត់ប្រើវិធីសាស្ត្របញ្ចុះបញ្ចូលដើម្បីមានអានុភាពលើចិត្តរបស់មនុស្ស។ ការប៉ិនប្រសប់បែបនេះអាចជួយយើងបញ្ចុះបញ្ចូលឲ្យមានសិស្ស។ នៅពេលមនុស្សម្នាក់កំពុងតែសិក្សាព្រះគម្ពីរជាមួយយើងៗប្រហែលជាជូនយោបល់ឲ្យគាត់អញ្ជើញសមាជិកក្រុមគ្រួសារឬអ្នកជិតខាងមកចូលរួមដែរ។ឬក៏យើងប្រហែលជាអាចសុំគាត់ប្រាប់យើងអំពីអ្នកឯទៀតដែលយើងអាចស្នើសុំបង្រៀនព្រះគម្ពីរដល់បុគ្គលនោះដែរ។—កិច្ចការ ១៨:៦-៨
ចូរបង្កើតឱកាសបញ្ចុះបញ្ចូលឲ្យមានសិស្ស
១១. តើសិស្សថ្មីអាចត្រូវរកឃើញនៅកន្លែងណាខ្លះ?
១១ ប៉ុលនិងជនគ្រីស្ទានគ្នីគ្នាបានខំព្យាយាមបញ្ចុះបញ្ចូលឲ្យមានសិស្សដោយផ្សាយពីផ្ទះមួយទៅផ្ទះមួយ នៅផ្សារ និងពេលធ្វើដំណើរ។ បើនិយាយឲ្យចំ ពួកគាត់ខំផ្សាយនៅគ្រប់ទីកន្លែង។ ក្នុងនាមជាអ្នកប្រកាសដ៏ខ្នះខ្នែងអំពីព្រះរាជាណាចក្ររបស់ព្រះដើម្បីបញ្ចុះបញ្ចូលឲ្យមានសិស្ស តើអ្នកអាចពង្រីកកិច្ចផ្សព្វផ្សាយរបស់អ្នកបានឬទេ? តើអ្នកអាចឆ្លៀតប្រយោជន៍ពីឱកាសស្វែងរកអ្នកដែលគួរនឹងទទួលដំណឹងល្អនិងផ្សាយដល់ពួកគេបានឬទេ? តើអ្នកឯទៀតដែលផ្សាយដំណឹងល្អបានរកឃើញសិស្សយ៉ាងដូចម្ដេចខ្លះ? មុនបង្អស់យើងសូមមើលការផ្សាយតាមទូរស័ព្ទ។
១២-១៤. ដើម្បីបញ្ជាក់អំពីផលប្រយោជន៍នៃការផ្សាយតាមទូរស័ព្ទ សូមរៀបរាប់អំពីបទពិសោធន៍ផ្ទាល់ខ្លួនឬបទពិសោធន៍មួយដែលមានស្រាប់ក្នុងវគ្គទាំងនេះ។
១២ ពេលផ្សាយពីផ្ទះមួយទៅផ្ទះមួយនៅប្រទេសប្រេស៊ីល គ្រីស្ទានម្នាក់ដែលយើងឲ្យនាមថាម៉ារាបានឲ្យខិត្តប័ណ្ណមួយដល់យុវនារីម្នាក់ដែលកំពុងតែចេញពីផ្ទះ។ ម៉ារាប្រើចំណងជើងខិត្តប័ណ្ណជាពាក្យផ្ដើមនិងសួរថា«តើអ្នកចង់រៀនព្រះគម្ពីរទេ?»។ យុវនារីនោះឆ្លើយថា៖«ខ្ញុំពិតជាចង់រៀនណាស់។ បញ្ហាគឺខ្ញុំជាគ្រូបង្រៀន ហើយការបង្រៀនស៊ីពេលវេលាខ្ញុំអស់រលីង»។ ម៉ារាពន្យល់ថាពួកគាត់អាចពិភាក្សាអំពីព្រះគម្ពីរតាមទូរស័ព្ទបាន។ យុវនារីនោះក៏ឲ្យលេខទូរស័ព្ទដល់ម៉ារានិងនៅល្ងាចនោះឯង គាត់ចាប់ផ្ដើមសិក្សាសៀវភៅស្តើងតើព្រះតម្រូវអ្វីពីយើង?តាមទូរស័ព្ទ។ *
១៣ នៅប្រទេសអេចូពី បងស្រីអ្នកផ្សាយពេញពេលម្នាក់កំពុងតែផ្សព្វផ្សាយតាមទូរស័ព្ទ ហើយបានភ្ញាក់ផ្អើលពេលគាត់និយាយជាមួយបុរសម្នាក់តែឮសម្លេងស្រែកឡូឡាក្នុងផ្ទះបុរសនោះ។ បុរសនោះសុំគាត់ទូរស័ព្ទមកវិញក្រោយមក។ នៅពេលបងស្រីទូរស័ព្ទទៅវិញ បុរសនោះសុំទោសហើយនិយាយថានៅពេលបងស្រីយើងទូរស័ព្ទទៅលើកមុន គាត់កំពុងតែឈ្លោះប្រកែកគ្នាជាមួយប្រពន្ធគាត់។ បងស្រីយើងប្រើសំដីនេះជាឱកាសលើកបញ្ជាក់ពីការណែនាំល្អៗក្នុងព្រះគម្ពីរស្តីអំពីបញ្ហាក្រុមគ្រួសារ។ បងស្រីយើងក៏បានប្រាប់គាត់ថា ក្រុមគ្រួសារជាច្រើនត្រូវបានជួយដោយសៀវភៅគន្លឹះនៃសុភមង្គលក្រុមគ្រួសារ ដែលជាសៀវភៅមួយបោះពុម្ពដោយស្មរបន្ទាល់ព្រះយេហូវ៉ា ប៉ុន្មានថ្ងៃបន្ទាប់ពីបងស្រីយើងបានជូនសៀវភៅទៅបុរសនោះ គាត់ទូរស័ព្ទទៅម្ដងទៀត។ បុរសនោះឧទានថា៖ «សៀវភៅនេះបានសង្គ្រោះអាពាហ៍ពិពាហ៍របស់ខ្ញុំ!»។ ការពិត បុរសនោះបានហៅក្រុមគ្រួសារមកជុំគ្នាដើម្បីប្រាប់ពីចំណុចល្អៗដែលគាត់បានអានក្នុងសៀវភៅនោះ។ បុរសនោះចាប់ផ្ដើមសិក្សាព្រះគម្ពីរ ហើយបន្ដិចក្រោយមកចាប់ផ្ដើមចូលរួមកិច្ចប្រជុំគ្រីស្ទានជាទៀងទាត់។
១៤ អ្នកផ្សាយម្នាក់នៅប្រទេសដាណឺម៉ាកដែលបានចាប់ផ្ដើមការសិក្សាព្រះគម្ពីរមួយតាមទូរស័ព្ទប្រាប់ថា៖«អ្នកត្រួតពិនិត្យកិច្ចបំរើលើកទឹកចិត្តខ្ញុំឲ្យចូលរួមផ្សាយតាមទូរស័ព្ទ។ នៅដើមដំបូងខ្ញុំបានស្ទាក់ស្ទើរដោយថា៖‹ខ្ញុំមិនសូវចូលចិត្តទេ›។ ក៏ប៉ុន្តែ នៅថ្ងៃមួយ ខ្ញុំបានប្រមូលភាពក្លាហាននិងចាប់ផ្ដើមទូរស័ព្ទទៅម្ចាស់ផ្ទះទីមួយ។ សុន្យ៉ាបានលើកទូរស័ព្ទ ហើយក្រោយយើងបានពិគ្រោះគ្នាយ៉ាងខ្លី គាត់បានយល់ព្រមទទួលប្រកាសនវត្ថុព្រះគម្ពីរ។ នៅល្ងាចមួយ យើងបានពិគ្រោះអំពីការបង្កើត ហើយគាត់ចង់បានសៀវភៅចំណងជើងថាជីវិត—បានកើតមានឡើងតាមរបៀបណា? តាមរបៀបវិវត្តន៍ឬតាមការបង្កើត? * ខ្ញុំប្រាប់គាត់ថាជាការល្អបើយើងអាចជួបគ្នាពីរនាក់ដើម្បីពិភាក្សាអំពីរឿងនោះ។ គាត់ក៏យល់ព្រម។ ពេលខ្ញុំមកដល់ សុន្យ៉ាបានត្រៀមរួចហើយសំរាប់ការសិក្សា ហើយចាប់តាំងពីពេលនោះមកយើងបានសិក្សារាល់សប្ដាហ៍»។ ចុងបញ្ចប់បងស្រីគ្រីស្ទានរបស់យើងនិយាយថា៖«អស់ជាច្រើនឆ្នាំខ្ញុំបានអធិស្ឋានឲ្យបានការសិក្សាព្រះគម្ពីរមួយ ប៉ុន្តែ ខ្ញុំមិនសង្ឃឹមថាខ្ញុំនឹងអាចរកការសិក្សាតាមទូរស័ព្ទបាននោះទេ»។
១៥, ១៦. តើអ្នកដឹងបទពិសោធន៍ណាដែលបង្ហាញពីផលប្រយោជន៍មកពីការស្វែងរករបៀបផ្សេងៗដើម្បីចាប់ផ្ដើមការសិក្សាព្រះគម្ពីរទេ?
១៥ អ្នកផ្សាយជាច្រើនទទួលបានជោគជ័យដោយសារធ្វើតាមយោបល់ដែលឲ្យធ្វើបន្ទាល់នៅកន្លែងណាដែលមានមនុស្ស។ បងស្រីម្នាក់ជាគ្រីស្ទាននៅសហរដ្ឋអាមេរិកបានចតឡាននៅក្បែរឡានដឹកជញ្ជូនមួយនៅចំណតរថយន្ត។ នៅពេលស្ត្រីក្នុងឡានដឹកជញ្ជូនឃើញបងស្រីរបស់យើង នោះបងស្រីយើងចាប់ផ្ដើមពន្យល់គាត់អំពីកិច្ចការអប់រំពីព្រះគម្ពីរ។ ស្ត្រីនោះបានស្ដាប់ហើយចេញពីឡាន និងដើរទៅរកឡានរបស់បងស្រីយើង។ គាត់និយាយថា៖«ខ្ញុំសប្បាយចិត្តណាស់ដែលអ្នកឈប់ទីនេះដើម្បីនិយាយជាមួយខ្ញុំ។ ខ្ញុំខានទទួលប្រកាសនវត្ថុព្រះគម្ពីររបស់អ្នកយូរហើយ។ ម្យ៉ាងទៀត ខ្ញុំចង់ចាប់ផ្ដើមសិក្សាព្រះគម្ពីរម្ដងទៀត។ តើអ្នកអាចបង្រៀនខ្ញុំបានទេ?»។ យ៉ាងនេះ បងស្រីរបស់យើងបានបង្កើតឱកាសល្អដើម្បីផ្សាយដំណឹងល្អ។
១៦ បងស្រីម្នាក់នៅសហរដ្ឋអាមេរិកធ្លាប់មានបទពិសោធន៍ដូចតទៅនេះពេលគាត់ទៅគ្លីនិកមួយ។ បងស្រីយើងប្រាប់នាយកនោះថាចង់ស្ម័គ្រចិត្តជួយបំពេញសេចក្ដីត្រូវការខាងវិញ្ញាណរបស់អ្នកស្នាក់នៅគ្លីនិកនោះ។ បងស្រីរបស់យើងក៏ប្រាប់ថា គាត់សប្បាយចិត្តបង្រៀនព្រះគម្ពីរដោយឥតគិតថ្លៃជារៀងរាល់សប្ដាហ៍ដល់អស់អ្នកណាដែលចង់ចូលរួម។ នាយកបានអនុញ្ញាតឲ្យបងស្រីយើងទៅបន្ទប់អ្នកស្នាក់ម្នាក់ៗ។ មិនយូរក្រោយមក បងស្រីនោះបានដឹកនាំការសិក្សាព្រះគម្ពីរបីដងក្នុងមួយសប្ដាហ៍ដោយសរុបទៅមានគ្នា២៦នាក់ចូលរួម ដែលក្នុងនោះមានម្នាក់កំពុងតែចូលរួមកិច្ចប្រជុំរបស់យើងជាទៀងទាត់។
១៧. តើវិធីណាទៀតដែលមានប្រសិទ្ធភាពច្រើនក្នុងការចាប់ផ្ដើមការសិក្សាព្រះគម្ពីរតាមផ្ទះ?
១៧ សំរាប់អ្នកខ្លះជាអ្នកប្រកាសពីព្រះរាជាណាចក្រនោះ បាននិយាយដោយចំៗស្នើសុំបង្រៀនអំពីព្រះគម្ពីរក៏ទទួលលទ្ធផលល្អដែរ។ នៅព្រឹកមួយ ក្រុមជំនុំមួយដែលមានអ្នកផ្សាយ១០៥នាក់បានព្យាយាមជាពិសេសដើម្បីស្នើសុំបង្រៀនព្រះគម្ពីរដល់ម្ចាស់ផ្ទះម្នាក់ៗដែលពួកគេជួប។ អ្នកផ្សាយ៨៦នាក់បានចូលរួម ហើយក្រោយបានចំណាយពីរម៉ោងក្នុងកិច្ចផ្សាយ ពួកគេរកបាន១៥នាក់ថ្មីដែលចង់រៀនព្រះគម្ពីរ។
ចូរបន្តស្វែងរកអ្នកដែលគួរនឹងទទួលដំណឹងល្អ
១៨, ១៩. តើយើងគួរចងចាំនូវការណែនាំអ្វីដ៏សំខាន់របស់ព្រះយេស៊ូ? ហើយដើម្បីបំពេញគោលដៅនោះតើយើងគួរតាំងចិត្តធ្វើអ្វី?
១៨ ក្នុងនាមជាអ្នកប្រកាសពីព្រះរាជាណាចក្រ អ្នកប្រហែលជាចង់សាកធ្វើតាមយោបល់ក្នុងអត្ថបទនេះ។ យកល្អ អ្នកគិតពីទំនៀមទម្លាប់តាមតំបន់ពេលកំពុងតែពិចារណាវិធីផ្សព្វផ្សាយ។ សំខាន់បំផុត ចូរយើងរំពឹងគិតអំពីការណែនាំរបស់ព្រះយេស៊ូដែលឲ្យស្វែងរកអ្នកដែលគួរនឹងទទួលដំណឹងល្អ និងជួយពួកគេទៅជាសិស្ស។—ម៉ាថាយ ១០:១១; ២៨:១៩
១៩ ដើម្បីសម្រេចគោលដៅនោះ ចូរយើង«កាត់ស្រាយព្រះបន្ទូលនៃសេចក្ដីពិតយ៉ាងត្រឹមត្រូវ»។ យើងអាចធ្វើដូច្នេះដោយប្រើវិធីសាស្ត្របញ្ចុះបញ្ចូលដែលមានមូលដ្ឋានរឹងមាំទៅលើបទគម្ពីរ។ នេះនឹងជួយយើងមានអានុភាពទៅលើចិត្តរបស់អ្នកដែលព្រមស្ដាប់និងក៏ជំរុញពួកគេឲ្យធ្វើតាម។ ពេលយើងអធិស្ឋានពឹងទៅលើជំនួយរបស់ព្រះយេហូវ៉ា យើងអាចចូលរួមជួយមនុស្សខ្លះទៅជាសិស្សរបស់ព្រះយេស៊ូគ្រីស្ទ។ ហើយកិច្ចការនេះពិតជានាំឲ្យពេញចិត្តណាស់! ហេតុនេះចូរយើង«ខំប្រឹងនឹងថ្វាយខ្លួនដល់ព្រះ» ដោយលើកកិត្ដិយសចំពោះព្រះយេហូវ៉ានិងធ្វើជាអ្នកប្រកាសដ៏ខ្នះខ្នែងអំពីព្រះរាជាណាចក្ររបស់ព្រះ ដែលផ្សព្វផ្សាយដោយមានបំណងបញ្ចុះបញ្ចូលឲ្យមានសិស្ស។—ធីម៉ូថេទី២ ២:១៥
[កំណត់សម្គាល់]
^ វគ្គ 12 បោះពុម្ពដោយស្មរបន្ទាល់ព្រះយេហូវ៉ា
^ វគ្គ 14 បោះពុម្ពដោយស្មរបន្ទាល់ព្រះយេហូវ៉ា។
តើអ្នកអាចនឹកចាំទេ?
• ហេតុអ្វីបានជាអ័ប៉ុឡូសត្រូវការមានគេពន្យល់ពីផ្លូវរបស់ព្រះឲ្យបានច្បាស់ថែមទៀត?
• តើព្រីស៊ីលនិងអ័គីឡាបានរៀនពីគំរូរបស់ប៉ុលយ៉ាងដូចម្ដេច?
• ពីកិច្ចការជំពូកទី១៨ តើអ្នកបានរៀនអ្វីខ្លះអំពីកិច្ចការបញ្ចុះបញ្ចូលឲ្យមានសិស្ស?
• តើអ្នកអាចបង្កើតឱកាសបញ្ចុះបញ្ចូលឲ្យមានសិស្សយ៉ាងដូចម្ដេច?
[សំណួរសម្រាប់អត្ថបទសិក្សា]
[រូបភាពនៅទំព័រ៣០]
ប៉ុលបានផ្សព្វផ្សាយនៅគ្រប់កន្លែងដែលគាត់ទៅ
[រូបភាពនៅទំព័រ៣២]
ចូរបង្កើតឱកាសដើម្បីផ្សព្វផ្សាយ