មូលហេតុពួកគេទៅព្រះវិហារ
មូលហេតុពួកគេទៅព្រះវិហារ
«ឥឡូវសាធារណរដ្ឋកូរេមានអ្នកកាន់សាសនាប្រេសប៊ីធារានច្រើនជាងសហរដ្ឋអាមេរិកជិតបួនដង»។ ប្រសាសន៍នេះដែលត្រូវបានបោះពុម្ពក្នុងទស្សនាវដ្ដីមួយ(Newsweek) ប្រហែលជាបានធ្វើឲ្យអ្នកអានភ្ញាក់ផ្អើល ដោយសារមនុស្សភាគច្រើនចាត់ទុកជនជាតិកូរេជាអ្នកកាន់ព្រះពុទ្ធសាសនាឬក៏លទ្ធិខុងជឺ។ សព្វថ្ងៃនេះ ភ្ញៀវទេសចរឃើញថា មានព្រះវិហារ«គ្រីស្ទសាសនា»ច្រើនគួរសមដែរ ដែលតាមធម្មតាព្រះវិហារនិមួយៗងាយឃើញដោយសារឈើឆ្កាងមានអំពូលភ្លើងក្រហម។ តាមធម្មតា នៅថ្ងៃអាទិត្យអាចឃើញមនុស្សពីរឬបីនាក់ដើរជាមួយគ្នាទៅកាន់ព្រះវិហារទាំងកាន់ព្រះគម្ពីរក្នុងដៃ។ យោងទៅតាមការស្ទង់មតិមួយនៅឆ្នាំ១៩៩៨ ជនជាតិកូរេស្ទើរតែ៣០ភាគរយទៅព្រះវិហារសាសនាកាតូលិកឬក៏ប្រូតេស្តង់។ ចំនួននេះគឺច្រើនជាងចំនួនអ្នកដែលរាប់ខ្លួនជាអ្នកកាន់ព្រះពុទ្ធសាសនាទៀតផង។
នៅសម័យនេះ គឺចំឡែកណាស់ដែលមនុស្សច្រើនយ៉ាងនេះទៅព្រះវិហារជាទៀងទាត់ មិនថានៅប្រទេសណាក៏ដោយ។ ទោះជាចំឡែកយ៉ាងណាក្ដី ក៏មនុស្សជាច្រើនកំពុងតែធ្វើដូច្នេះនៅប្រទេសឯទៀតនាទ្វីបអាស៊ី ព្រមទាំងនៅទ្វីបអាព្រិច និងតំបន់អាមេរិកឡាតាំងទៀតផង មិនគ្រាន់តែនៅប្រទេសកូរេប៉ុណ្ណោះទេ។ ហេតុអ្វីបានជាមនុស្សច្រើនម្ល៉េះនៅតែអះអាងថាខ្លួនជឿលើព្រះ ពេលដែលមនុស្សកាន់តែច្រើនទូទាំងផែនដីគឺគ្មានចំណាប់អារម្មណ៍នឹងសាសនានោះ? ហេតុអ្វីបានជាពួកគេទៅព្រះវិហារ?
ការស្ទង់មតិប្រជាជនមួយចំនួនបានឲ្យដឹងថា ក្នុងចំណោមអ្នកដែលទៅព្រះវិហារ មានជាងពាក់កណ្ដាលដែលកំពុងតែស្វះស្វែងរកវិធីឲ្យបានសេចក្ដីសុខ មួយភាគបីសង្ឃឹមថា ខ្លួននឹងបានជីវិតជារៀងរហូតបន្ទាប់ពីស្លាប់ ហើយមានម្នាក់ក្នុងដប់នាក់ដែលសង្ឃឹមថា ខ្លួននឹងបានសុខភាពល្អ ទ្រព្យសម្បត្ដិ និងការរីកចំរើន។
មនុស្សជាច្រើននៅប្រទេសចិនចូលហូរហែក្នុងព្រះវិហារដោយសង្ឃឹមថានឹងអាចរកឃើញនូវវិធីបំពេញសេចក្ដីត្រូវការខាងវិញ្ញាណ ដែលចាប់ផ្ដើមមាននៅពេលដែលគោលដៅមូលធននិយមច្រានចោលនូវមនោគមវិជ្ជារបស់កុម្មុយនីស្តបន្ដិចម្ដងៗ។ រៀងរាល់ឆ្នាំ ព្រះគម្ពីររាប់លានក្បាលត្រូវបោះពុម្ពនៅប្រទេសចិន ហើយមនុស្សអានព្រះគម្ពីរដូចជាពួកគេធ្លាប់អានកូនសៀវភៅក្រហមរបស់លោកម៉ៅសេទុង។
ប្រជាជនខ្លះដែលកាន់សាសនាកាតូលិកនៅប្រទេសប្រេស៊ីល ជាពិសេសពួកយុវជន ពួកគេមិនចង់ឮតែសេចក្ដីសន្យាស្តីពីសុភមង្គលនៅអនាគតទេ ពួកគេចង់បានសុភមង្គលឥឡូវនេះតែម្ដង។ ទស្សនាវដ្ដីខាងពត៌មានមួយកត់សម្គាល់ថា៖ «សាសនវិទ្យាអំពីការរំដោះឲ្យរួចបានជំរុញទឹកចិត្តនិងគំនិតប្រជាជននៅទសវត្សឆ្នាំ១៩៧០ តែសព្វថ្ងៃនេះវិញ គឺសាសនវិទ្យាអំពីការរីកចំរើនឲ្យសម្បូរសប្បាយដែលជំរុញទឹកចិត្តនិងគំនិតប្រជាជនវិញ»។ (Tudo) ក្នុងការស្ទង់មតិមួយនៅប្រទេសអង់គ្លេស ប្រជាជនដែលទៅព្រះវិហារត្រូវបានគេសុំឲ្យពួកគេប្រាប់នូវអ្វីមួយដែលខ្លួនចូលចិត្តអំពីព្រះវិហាររបស់ខ្លួន។ ការសំណេះសំណាលគ្នាគឺជាអ្វីដែលពួកគេចូលចិត្តជាងគេ។
ពត៌មានទាំងអស់នេះបង្ហាញថា ទោះជាមានមនុស្សច្រើនគួរសមនៅតែជឿលើព្រះក៏ដោយ តែពួកគេភាគច្រើនគិតខ្វល់ខ្វាយពីផលប្រយោជន៍ដែលខ្លួនអាចទទួលបានភ្លាមៗនោះ ជាជាងគិតអំពីអនាគត ឬជាជាងគិតអំពីព្រះ។ តើអ្វីជាមូលហេតុត្រឹមត្រូវដែលត្រូវជឿលើព្រះ? តើអ្នកគិតយ៉ាងណា? តើព្រះគម្ពីរចែងយ៉ាងណាអំពីរឿងនេះ? អ្នកអាចរកចម្លើយក្នុងអត្ថបទជាបន្ទាប់។