តើសាសនាមានឥទ្ធិពលល្អឬក៏អាក្រក់?
តើសាសនាមានឥទ្ធិពលល្អឬក៏អាក្រក់?
«ខ្ញុំជំពាក់គ្រីស្ទសាសនាហើយក៏ជឿថា ពិភពលោករបស់យើងនេះតាំងពី២០០០ឆ្នាំមុនក៏ជំពាក់គ្រីស្ទសាសនាដែរ»។—បុព្វកថារបស់សៀវភៅចំណងជើងថាពីរពាន់ឆ្នាំ—សហស្សវត្សរ៍ដំបូង:កំណើតនៃគ្រីស្ទសាសនារហូតដល់សង្គ្រាមសាសនា
ប្រសាសន៍ខាងលើនេះគឺរបស់ជនជាតិអង់គ្លេសម្នាក់ឈ្មោះ មេលវិន ប្រាក ដែលជាអ្នកនិពន្ធនិងអ្នកផ្សាយពត៌មាន។ ប្រសាសន៍របស់លោក គាំទ្រសាសនាដែលអះអាងថាជាគ្រីស្ទសាសនា ហើយក៏ដូចជាអារម្មណ៍របស់មនុស្សរាប់លាននាក់ទៀតដែរដែលថា គេត្រូវស្មោះនឹងសាសនាណាមួយ ថែមទាំងក៏ជំពាក់សាសនានោះដែរ ដោយព្រោះសាសនានោះបានផ្ដល់ប្រយោជន៍ដល់ពួកគេ។ ពួកគេជឿជាក់ថា សាសនាបានមានឥទ្ធិពលល្អណាស់ទៅលើជីវិតពួកគេ។ ជាឧទាហរណ៍ អ្នកនិពន្ធម្នាក់សរសេរថា សាសនាអ៊ីស្លាម«បានបណ្ដាលឲ្យមានអរិយធម៌ដ៏រុងរឿង . . . [ដែលបាន]ផ្ដល់ផលប្រយោជន៍ដល់ពិភពលោកទាំងមូល»។
តើតួនាទីរបស់សាសនាគឺល្អឬក៏អាក្រក់?
ក៏ប៉ុន្តែ ប្រសាសន៍បន្តបន្ទាប់របស់លោកប្រាកនាំឲ្យឆ្ងល់ថា តើសាសនាទូទៅពិតជាមានឥទ្ធិពលល្អឬក៏យ៉ាងណា។ លោកមានប្រសាសន៍បន្ថែមថា៖ «គ្រីស្ទសាសនាក៏ជំពាក់ខ្ញុំអ្វីមួយដែរ គឺជំពាក់ខ្ញុំការពន្យល់មួយ»។ តើគាត់ចង់ឲ្យគ្រីស្ទសាសនាពន្យល់អ្វី? «គ្រីស្ទសាសនាត្រូវពន្យល់ខ្ញុំអំពីមូលហេតុដែលសាសនានោះប្រកបដោយការមិនចេះត្រាប្រណី អំពើទុច្ចរិត អំពើអមនុស្សធម៌ និងការមិនព្រមទទួលស្គាល់ការពិតស្ទើរតែតាំងពីកំណើតមកម្ល៉េះ»។
មនុស្សជាច្រើននឹងយល់ស្របថា ក្នុងប្រវត្ដិសាស្ត្រពិភពលោកការមិនចេះត្រាប្រណី អំពើទុច្ចរិត អំពើអមនុស្សធម៌ និងការមិនព្រមទទួលស្គាល់ការពិតជាលក្ខណៈធម្មតានៃសាសនាភាគច្រើន។ តាមទស្សនៈរបស់ពួកគេ សាសនាមើលទៅហាក់ដូចជាអ្វីដែលជួយផ្ដល់ផលប្រយោជន៍ដល់មនុស្សជាតិ តែគុណធម៌និងភាពបរិសុទ្ធរបស់វាគ្រាន់តែជាសំបកក្រៅទេ ការពិតវាពោរពេញដោយពុតត្បុតនិងសេចក្ដីភូតភរ។ (ម៉ាថាយ ២៣:២៧, ២៨) សព្វវចនាធិប្បាយមួយប្រាប់ថា៖ «គ្មានពាក្យណាដែលយើងឃើញជាញឹកញយក្នុងសំនេររបស់មនុស្សដូចពាក្យថា សាសនាមានតម្លៃវិសេសក្នុងអរិយធម៌ទេ។ ហើយគ្មានពាក្យណាដែលប្រវត្ដិសាស្ត្របង្ហាញថាគឺមិនពិតដូចពាក្យនោះដែរ»។—A Rationalist Encyclopædia
បើអ្នកអានកាសែតណាមួយថ្ងៃនេះ អ្នកនឹងឃើញឧទាហរណ៍ជាច្រើនរាប់ពុំអស់អំពីអ្នកដឹកនាំសាសនាដែលផ្សព្វផ្សាយពីសេចក្ដីស្រឡាញ់ សន្ដិភាព និងសេចក្ដីមេត្ដាករុណា ប៉ុន្តែក៏អុជអាលឲ្យមនុស្សស្អប់គ្នា ហើយយកព្រះនាមព្រះជាទីសំអាងនៃចំបាំងដ៏ឃោរឃៅរបស់ពួកគេ។ គ្មានអ្វីចម្លែកទេដែលមនុស្សមានអារម្មណ៍ថា សាសនាច្រើនតែមានឥទ្ធិពលអាក្រក់ទៅលើជីវិតមនុស្ស។
បើគ្មានសាសនាសោះ តើនឹងមានស្ថានភាពល្អជាងឬ?
មនុស្សខ្លះបានសន្និដ្ឋានដូចលោក បឺត្រេន រឹសិល ទស្សនវិទូជនជាតិអង់គ្លេសម្នាក់ ដែលលោកថា បើទៅមុខទៀត«លែងមានសាសនាសព្វបែបយ៉ាង»តែម្ដង គឺជាការល្អហើយ។ តាមទស្សនៈរបស់ពួកគេ ការបំបាត់ចោលគ្រប់សាសនាទាំងអស់ជាដំណោះស្រាយតែមួយគត់ចំពោះបញ្ហារបស់មនុស្សជាតិ។ ក៏ប៉ុន្តែ ពួកគេប្រហែលជាចង់បំភ្លេចថា អ្នកដែលបដិសេធសាសនាទាំងអស់ក៏អាចនាំឲ្យមានការស្អប់គ្នានិងការមិនត្រាប្រណីដូចអ្នកដែលកាន់សាសនាដែរ។ លោកស្រី ការិន អាមស្ត្រង ដែលជាអ្នកនិពន្ធអំពីរឿងសាសនា គាត់រំឭកយើងថា៖ «យ៉ាងហោចណាស់ ការសម្លាប់រង្គាលដោយលោកហ៊ីត្លែបានបង្ហាញឲ្យដឹងថា មនោគមវិជ្ជាដែលមិនទាក់ទងសាសនាក៏អាចនាំឲ្យមានការសម្លាប់គ្នាដូចសង្គ្រាមសាសនាមួយដែរ»។—The Battle for God—Fundamentalism in Judaism, Christianity and Islam
ដូច្នេះ តើសាសនាពិតជាមានឥទ្ធិពលល្អឬ? ឬមួយក៏តាមការពិត តើសាសនាជាដើមហេតុនៃបញ្ហាជាច្រើនរបស់មនុស្សជាតិទៅវិញ? តើការបំបាត់ចោលនូវសាសនាទាំងអស់ជាវិធីដោះស្រាយឬ? សូមពិចារណានូវអ្វីដែលព្រះគម្ពីរបញ្ជាក់អំពីរឿងនេះក្នុងអត្ថបទបន្តបន្ទាប់។ អ្នកប្រហែលជានឹងភ្ញាក់ផ្អើលពេលឃើញចម្លើយអំពីនេះ។