តើអ្នកអាចទុកចិត្ដសេចក្ដីសន្យារបស់អ្នកណា?
តើអ្នកអាចទុកចិត្តសេចក្ដីសន្យារបស់អ្នកណា?
«ពីមុន លោកជាបុគ្គលដ៏អស្ចារ្យ ក៏ធ្លាប់សន្យាអ្វីដ៏អស្ចារ្យដែរ។ តែគ្មានការគោរពតាមពាក្យសន្យា ដូចជាគ្មានលោកដែរនៅពេលឥឡូវនេះ»។—ព្រះបាទហេនរីទី៨ និពន្ធដោយលោកវីល្លៀម សេចស្ពៀ
សេចក្ដីសន្យាដ៏អស្ចារ្យដែលលោកសេចស្ពៀចង់សំដៅទៅលើនោះ គឺជាសេចក្ដីសន្យារបស់លោកថូម៉ាស វ៉ូសលី ជាបព្វជិតសាសនាកាតូលិកមួយរូបដែលមានអំណាចខ្លាំងក្លានៅប្រទេសអង់គ្លេសនាសតវត្សរ៍ទី១៦។ អ្នកខ្លះប្រហែលជាយល់ស្របថា សេចក្ដីសន្យារបស់មនុស្សសព្វថ្ងៃនេះក៏ដូចការពណ៌នារបស់លោកសេចស្ពៀខាងលើនេះដែរ។ ម្ដងហើយម្ដងទៀត អ្នកដែលមានអំណាចតែងសន្យាអ្វីជាច្រើន តែកម្រធ្វើតាម។ ហេតុនេះ គឺមិនពិបាកយល់នូវមូលហេតុដែលមនុស្សចេះតែសង្ស័យលើសេចក្ដីសន្យាទាំងអស់។
ខកចិត្តច្រើនដងច្រើនសាហើយ
ជាឧទាហរណ៍ ក្នុងកំឡុងការប្រយុទ្ធគ្នាយ៉ាងព្រៃផ្សៃនៅតំបន់បាល់កង់នាទសវត្សរ៍នៃឆ្នាំ១៩៩០ ក្រុមប្រឹក្សាសន្ដិសុខសហប្រជាជាតិបានប្រកាសថា ភូមិស្រេបរេនិកានៅប្រទេសបូសនៀ«ជាតំបន់មានសុវត្ថិភាព»។ ពាក្យនេះស្ដាប់ទៅដូចជាគួរឲ្យទុកចិត្តណាស់ពីសំណាក់អង្គការអន្តរជាតិ។ មនុស្សដែលកាន់សាសនាអ៊ីស្លាមរាប់ពាន់នាក់ដែលបានភៀសខ្លួនទៅភូមិស្រេបរេនិកាក៏បានគិតដូច្នេះដែរ។ ក៏ប៉ុន្តែ នៅទីបំផុត សេចក្ដីសន្យានេះអំពីតំបន់ដែលមានសុវត្ថិភាពបានឃើញថា គឺមិនពិតនោះទេ។ (ទំនុកដំកើង ១៤៦:៣) នៅខែកក្កដា ឆ្នាំ១៩៩៥ កងទ័ពបានចូលមកលុកលុយភូមិស្រេបរេនិកាហើយកងទ័ពសហប្រជាជាតិដែលនៅទីនោះមិនអាចធ្វើអ្វីពួកវាបាននោះទេ។ ប្រជាជនអ៊ីស្លាមជាង៦.០០០នាក់បានបាត់ខ្លួន ហើយយ៉ាងតិចជនស៊ីវិលអ៊ីស្លាម១.២០០នាក់ត្រូវបានគេធ្វើឃាត។
ជីវិតមនុស្សគឺពោរពេញដោយសេចក្ដីសន្យាដែលមនុស្សមិនបានគោរពតាមទេ។ មនុស្សមានអារម្មណ៍ថា គេបានកេងចំណេញលើខ្លួនដោយសារ «ការផ្សាយពាណិជ្ជកម្មបោកបញ្ឆោតជាច្រើនឥតគណនា» ដែលមានរាល់តែថ្ងៃ។ ពួកគេក៏អស់សង្ឃឹមដោយសារ«អ្នកនយោបាយច្រើនរាប់មិនអស់ដែលហ៊ានសន្យាពេលឃោសនាគណបក្ស តែមិនបានធ្វើតាមនោះទេ»។ (The New Encyclopædia Britannica, ក្បាលទី១៥ ទំព័រ៣៧) អ្នកដឹកនាំសាសនាដែលប្រជាជនទុកចិត្តសន្យាថា ពួកគេនឹងថែរក្សាណែនាំគ្រីស្ទបរិស័ទ តែបែរជាធ្វើបាបបរិស័ទយ៉ាងគួរឲ្យស្អប់ខ្ពើមវិញ។ សូម្បីតែក្នុងវិស័យអប់រំនិងវេជ្ជសាស្ត្រក៏ដោយ ក៏មានអ្នកខ្លះបែរជាក្បត់អ្នកដែលទុកចិត្តពួកគេ រួចជញ្ជក់ផលប្រយោជន៍ឬរហូតដល់សម្លាប់អ្នកដែលពួកគេគួរថែរក្សា។ គ្មានអ្វីចម្លែកទេ! ដែលព្រះគម្ពីរព្រមានយើងថា កុំជឿគ្រប់ពាក្យទាំងអស់។—សុភាសិត ១៤:១៥
សេចក្ដីសន្យាដែលគេបានគោរពតាម
គឺពិតណាស់ដែលថា មានមនុស្សជាច្រើនដែលធ្វើតាមពាក្យសន្យាមែន ដោយជួនកាលរហូតដល់ហ៊ានលះបង់ប្រយោជន៍ខ្លួនទៀតផង។ (ទំនុកដំកើង ១៥:៤) ពាក្យសន្យារបស់ពួកគេគឺជាការធានា ហើយពួកគេគោរពតាមពាក្យសន្យាជានិច្ច។ ចំណែកអ្នកឯទៀតវិញ ពួកគេពិតជាចង់ធ្វើអ្វីដែលខ្លួនបានសន្យាដោយមានបំណងល្អ។ ពួកគេបម្រុងតែនឹងធ្វើអ្វីដែលបានសន្យាមែន ប៉ុន្តែគ្រាន់តែគ្មានលទ្ធភាពធ្វើតាម។ កាលៈទេសៈអាចជាឧបសគ្គដល់បំណងល្អរបស់មនុស្សដែរ។—សាស្ដា ៩:១១
មិនថាដោយសារមូលហេតុអ្វីក៏ដោយ ការពិតគឺ មនុស្សជាច្រើនពិបាកជឿលើសេចក្ដីសន្យារបស់អ្នកណាក៏ដោយ។ ដូច្នេះមានសំនួរមួយថា៖ តើមានសេចក្ដីសន្យាណាដែលយើងអាចទុកចិត្តបាន? ពិតជាមានមែន! យើងអាចទុកចិត្តសេចក្ដីសន្យារបស់ព្រះដែលមានក្នុងព្រះគម្ពីរជាព្រះបន្ទូលរបស់ទ្រង់។ សូមអញ្ជើញមើលអត្ថបទបន្ទាប់ដែលចែងអំពីរឿងនេះ។ អ្នកប្រហែលជានឹងសន្និដ្ឋានដូចមនុស្សរាប់លាននាក់ឯទៀតដែលថា យើងពិតជាអាចទុកចិត្តលើសេចក្ដីសន្យារបស់ព្រះបាន។
[អ្នកផ្ដល់សិទ្ធិឲ្យប្រើរូបភាពនៅទំព័រ៣]
AP Photo/Amel Emric