ការស្វែងរករដ្ឋាភិបាលដ៏ល្អមួយ
ការស្វែងរករដ្ឋាភិបាលដ៏ល្អមួយ
«ការពឹងពាក់គ្នាទៅវិញទៅមករវាងប្រទេសទូទាំងផែនដី បានបង្កនូវបញ្ហាពិភពលោកមួយចំនួនដែលប្រទេសនិមួយៗមិនអាចដោះស្រាយដោយខ្លួនឯងតទៅទៀតបានឡើយ។ មានតែការសហការគ្នារវាងប្រទេសទាំងឡាយទើបអាចជួយយើងដោះស្រាយនូវបញ្ហាលំបាក និងគ្រោះថ្នាក់កាន់តែច្រើនដែលមនុស្សជាតិកំពុងតែប្រឈមមុខ»។—លោកគូឡាម អ៊ូម៉ា អ្នកវិភាគនយោបាយនៅប្រទេសប៉ាគីស្ថាន
ពិភពលោកសព្វថ្ងៃនេះស្ថិតក្នុងសភាពមួយដែលមិនទំនងទាល់តែសោះ។ នៅសម័យនេះដែលមានការចំរុងចំរើនសម្បូរសប្បាយនោះ មនុស្សជាច្រើនត្រូវរកព្រឹកស៊ីល្ងាចទាំងលំបាក។ ពិតថាមនុស្សនៅសម័យទំនើបនេះប្រហែលជាមានការអប់រំខ្ពស់និងចំណេះដឹងច្រើនជាងជំនាន់ណាផ្សេងទៀតមែន តែមនុស្សកាន់តែច្រើនឡើងៗពិបាករកការងារធ្វើដ៏ស្ថិតស្ថេរ។ ទោះបីមើលទៅដូចជាមនុស្សមានសេរីភាពច្រើនជាងសម័យមុនៗក៏ពិតមែន តែមនុស្សរាប់លាននាក់រស់ក្នុងបរិយាកាសមួយប្រកបដោយការភិតភ័យ និងអស្ថេរភាព។ យើងមានឱកាសល្អៗជាច្រើនឲ្យរីកចំរើនលើកស្ទួយជីវភាព តែអំពើពុករលួយនិងការទទឹងច្បាប់នៅគ្រប់ជាន់ថ្នាក់នៃសង្គមបាននាំឲ្យមនុស្សជាច្រើនអស់សង្ឃឹម។
បញ្ហាទាំងប៉ុន្មានដែលមនុស្សជាតិកំពុងតែប្រឈមមុខគឺធំដល់ម្ល៉េះ គ្មានប្រទេសណាមួយអាចដោះស្រាយបានឡើយ មិនថាពួកគេព្យាយាមដោះស្រាយដោយខ្លួនឯងឬសហការជាមួយប្រទេសពីរបីទៀតក៏ដោយ។ ហេតុនេះ អ្នកសង្កេតការណ៍បានសន្និដ្ឋានថា ប្រទេសទាំងឡាយត្រូវរួមគ្នាបង្កើតរដ្ឋាភិបាលតែមួយ ទើបមានសន្ដិភាពនិងសន្ដិសុខទូទាំងពិភពលោក។ ជាឧទាហរណ៍ លោក អាលប៊ឺត អាំងស្ដាំងបានផ្សព្វផ្សាយមតិនេះតាំងពីយូរមកហើយ។ នៅឆ្នាំ១៩៤៦ លោកបានមានប្រសាសន៍៖ «ខ្ញុំជឿជាក់ថា មនុស្សភាគច្រើនក្នុងពិភពលោកចង់រស់នៅដោយមានសន្ដិភាពនិងសន្ដិសុខ . . . វិធីតែមួយគត់ដើម្បីបំពេញចិត្តប្រាថ្នាឲ្យបានសន្ដិភាពនោះ គឺដោយបង្កើតរដ្ឋាភិបាលពិភពលោកមួយ»។
ឥឡូវជាង៥០ឆ្នាំមកហើយ រដ្ឋាភិបាលដែលចាំបាច់នេះមិនទាន់បានបង្កើតទេ។ នៅទីក្រុងប៉ារីស នាប្រទេសបារាំង អត្ថបទមួយបោះពុម្ពក្នុងកាសែតបានរៀបរាប់អំពីឧបសគ្គផ្សេងៗដែលត្រូវពុះពារក្នុងសតវត្សរ៍ទី២១ថា៖ «របៀបដោះស្រាយគឺត្រូវស្ថាបនាមូលដ្ឋានសំរាប់ច្បាប់ រដ្ឋបាល និងរដ្ឋធម្មនុញ្ញនៃរដ្ឋាភិបាលអន្តរជាតិមួយ ដែលអាចធ្វើអន្តរាគមន៍ភ្លាមៗពីគ្រប់កន្លែងនៅផែនដី បើមានករណីការប្រល័យពូជសាសន៍។ ដំណោះស្រាយនេះក៏រួមបញ្ចូលការទទួលស្គាល់ថា ចាប់ពីពេលនោះតទៅ ផែនដីគឺជាប្រទេសតែមួយទេ»។ (Le Monde) តើអ្នកណាឬអង្គការណាមានអំណាចនិងសមត្ថភាពអាចបង្កើតរដ្ឋាភិបាលពិភពលោកមួយ ដែលអាចធានាឲ្យមនុស្សជាតិមានសន្ដិភាពនៅអនាគត?
តើសហប្រជាជាតិអាចដោះស្រាយបញ្ហានេះបានទេ?
មនុស្សជាច្រើនសង្ឃឹមលើអង្គការសហប្រជាជាតិ ដោយជឿថាអង្គការនោះអាចនាំឲ្យមានសន្ដិភាពពិភពលោក។ តើអង្គការសហប្រជាជាតិជារដ្ឋាភិបាលដែលអាចនាំឲ្យមានសន្ដិភាពនិងសន្ដិសុខដ៏ពិតទូទាំងពិភពលោកទេ? ពិតមែនថា ពេលសមាជិកនៃអង្គការនោះបញ្ចេញវោហារអំពីរឿងនយោបាយ នោះស្ដាប់ទៅគួរឲ្យទុកចិត្ត ហើយក៏បង្កើតនូវសេចក្ដីសង្ឃឹមក្នុងចិត្តរបស់ជនានុជន។ ជា
ឧទាហរណ៍ ក្នុង«សេចក្ដីប្រកាសប្រចាំសហស្សវត្សរ៍»សំរាប់ឆ្នាំ២០០០នោះ មហាសន្និបាតរបស់អង្គការសហប្រជាជាតិបានតាំងជំហរមាំមួនថា៖ «យើងនឹងព្យាយាមអស់ពីសមត្ថភាពដើម្បីរំដោះប្រជារាស្ត្ររបស់យើងឲ្យរួចពីការយាយីពីសង្គ្រាមទាំងក្នុងប្រទេសខ្លួនទាំងរវាងប្រទេសផ្សេងៗទៀតផង ដែលបានធ្វើឲ្យបាត់បង់ជីវិតមនុស្ស៥លាននាក់ក្នុងកំឡុង១០ឆ្នាំមុន»។ សេចក្ដីប្រកាសបែបនេះបាននាំឲ្យមនុស្សគ្រប់មជ្ឈដ្ឋានសរសើរថែមទាំងបង្ហាញនូវក្ដីពេញចិត្តចំពោះអង្គការសហប្រជាជាតិ ហើយអង្គការនោះក៏បានទទួលនូវពានរង្វាន់ណូបែលនៅឆ្នាំ២០០១ទៀតផង។ ដោយលើកតម្កើងសហប្រជាជាតិ គណៈកម្មាធិការណូបែលប្រចាំប្រទេសណ័រវែសមានប្រសាសន៍ថា៖ «មាគ៌ាតែមួយគត់ដែលអាចឆ្ពោះទៅរកសន្ដិភាពពិភពលោកនិងការសហការគឺត្រូវតាមរយៈអង្គការសហប្រជាជាតិ»។យ៉ាងណាក៏ដោយ តើអង្គការសហប្រជាជាតិដែលបានត្រូវបង្កើតនៅឆ្នាំ១៩៤៥ដែលធ្វើជារដ្ឋាភិបាលអាចនាំឲ្យមានសន្ដិភាពដ៏ពិតនិងស្ថិតស្ថេរទូទាំងពិភពលោកឬទេ? អត់ទេ! ដ្បិតការរកប្រយោជន៍ផ្ទាល់ខ្លួនហើយគោលដៅជាតិនិយមបានរាំងស្កាត់ការព្យាយាមរបស់អង្គការនោះ។ បើយោងទៅតាមសំនេររបស់អ្នកពិនិត្យផ្ទៀងផ្ទាត់កាសែតមួយរូបបានឲ្យដឹងថា ប្រជាមតិស្តីអំពីអង្គការសហប្រជាជាតិគឺ អង្គការនោះគ្រាន់តែជា«យន្តការវាស់ស្ទង់ប្រជាមតិទូទាំងពិភពលោក» ហើយថា«របៀបវារៈរបស់ពួកគេសុទ្ធតែជាបញ្ហាដែលបានជជែកគ្នាយូរឆ្នាំហើយ តែការបោះជំហានឆ្ពោះទៅរកដំណោះស្រាយស្ទើរតែគ្មានសោះ»។ ដោយដូច្នេះ នៅតែមានសំនួរថា៖ តើនឹងមានថ្ងៃមួយដែលប្រទេសទាំងឡាយទូទាំងពិភពលោកពិតជានឹងមានសាមគ្គីគ្នាទេ?
ព្រះគម្ពីរបញ្ជាក់ថា បន្ដិចទៀតប្រទេសទាំងឡាយនឹងសាមគ្គីគ្នាមែន។ តើនេះនឹងកើតឡើងយ៉ាងដូចម្ដេច? តើរដ្ឋាភិបាលមួយណានឹងនាំឲ្យមានសាមគ្គីភាពនោះ? ដើម្បីបានចម្លើយ សូមអានអត្ថបទបន្តបន្ទាប់។
[រូបភាពនៅទំព័រ៣]
លោកអាំងស្ដាំង បានផ្សព្វផ្សាយថា មនុស្សជាតិត្រូវការ រដ្ឋាភិបាលពិភពលោកមួយ
[អ្នកផ្ដល់សិទ្ធិ]
Einstein: U.S. National Archives photo