តើអ្នកចេះរៀបរាប់ពីអ្វីក្នុងចិត្ដទេ?
តើអ្នកចេះរៀបរាប់ពីអ្វីក្នុងចិត្តទេ?
«អក្ខរាថ្លែងពីក្ដីស្នេហ៍ដោយបុរសអាយុ៦០ឆ្នាំម្នាក់»។ នោះគឺជាឈ្មោះនៃកម្មវិធីប្រឡងសរសេរសំបុត្រដែលបានរៀបចំឡើងដោយធនាគារមួយនៅប្រទេសជប៉ុន ពីរបីឆ្នាំមុន។ កម្មវិធីនេះធ្វើឡើងដើម្បីលើកទឹកចិត្តជនជាតិជប៉ុនក្នុងអាយុខ្ទង់៥០ទៅ៧០ឆ្នាំ ឲ្យរៀបរាប់អំពី«អារម្មណ៍ដ៏ស្មោះ»របស់ពួកគាត់ចំពោះគូរៀងៗខ្លួន។ មានបេក្ខជនម្នាក់បានសរសេរជូនប្រពន្ធគាត់ថា៖ «អ្នកប្រហែលជាអស់សំណើច ប៉ុន្តែ ខ្ញុំនឹងសោកស្ដាយបើខ្ញុំមិនបានពោលពាក្យទាំងនោះ ដូច្នេះ ខ្ញុំសូមបញ្ជាក់ពីអារម្មណ៍ដ៏ស្មោះរបស់ខ្ញុំយ៉ាងច្បាស់ អរគុណណាស់ដែលព្រមរៀបការជាមួយខ្ញុំ»។
នៅប្រទេសមួយចំនួនរួមបញ្ចូលប្រទេសខ្លះនាភូមិភាគអាស៊ី ការរៀបរាប់ពីអារម្មណ៍ខ្លួន ត្រូវបានគេចាត់ទុកជាអ្វីដែលមិនគួរធ្វើ។ ទោះជាយ៉ាងនេះក៏ដោយ នៅប្រទេសជប៉ុន មានជាង១៥.០០០នាក់ដែលបានចូលរួមប្រកួតប្រជែងក្នុងការប្រឡងសរសេរសំបុត្រថ្លែងពីក្ដីស្នេហ៍។ ដោយមនុស្សជាច្រើនចូលចិត្ត កម្មវិធីនេះបានរៀបចំឡើងម្ដងទៀត ហើយមានសៀវភៅជាច្រើនក្បាលបានបោះពុម្ពផ្សាយជាសាធារណៈដោយផ្អែកលើសំបុត្រទាំងនោះ។ នេះបង្ហាញថា មនុស្សច្រើននាក់ចង់រៀបរាប់ពីអ្វីក្នុងចិត្តចំពោះគូគាប់របស់ខ្លួនខ្លាំងណាស់។ ក៏ប៉ុន្តែ អ្នកឯទៀតមិនហ៊ានធ្វើដូច្នោះឡើយ។ ហេតុអ្វី? ប្រហែលជាដោយហេតុថា ពួកគាត់ត្រូវតែខំប្រឹងប្រែង និងត្រូវប៉ិនប្រសប់ដើម្បីធ្វើឲ្យអ្នកដែលជាគូគាប់យល់ពីអារម្មណ៍របស់ខ្លួន។
លោក ហ៊ីតូស៊ី កាតូ ជាអ្នកនិពន្ធសៀវភៅមួយស្តីអំពីការចូលនិវត្តន៍ មានប្រសាសន៍ថា ពេលដែលគូស្វាមីភរិយាវ័យចំណាស់នៅប្រទេសជប៉ុនលែងលះគ្នានោះ ច្រើនតែជាភរិយាដែលបានផ្ដើមគំនិតមុន ដោយសារពួកគាត់បានលាក់ទុកយូរឆ្នាំពេកនូវការអាក់អន់ចិត្តដែលចាក់ឫសសែនជ្រៅ។ លោក ហ៊ីតូស៊ី កាតូ បន្តថា៖ «នេះក៏ដោយសារគូស្វាមីភរិយាមិនបានរៀបរាប់ពីអ្វីក្នុងចិត្តប្រាប់គ្នាទៅវិញទៅមកនៅពេលដែលមានបញ្ហាកើតឡើងដែរ»។
នៅពេលចូលនិវត្តន៍ ស្វាមីមួយរូបប្រហែលជាភ្ញាក់ផ្អើល ដោយភរិយារបស់គាត់ជូនពាក្យបណ្ដឹងសុំលែងលះ។ គូស្វាមីភរិយាប្រហែលជាមិនដែលបានប្រាប់អំពីអារម្មណ៍របស់ខ្លួនទៅវិញទៅមកអស់រយៈពេលច្រើនឆ្នាំហើយ។ ស្វាមីនិងភរិយាធ្លាប់បានខិតខំរៀបរាប់ពីអារម្មណ៍របស់ខ្លួនដែរ ក៏ប៉ុន្តែ ពួកគាត់មិនអាចជៀសវាងពីការនិយាយអំពីអ្វីដែលនាំឲ្យអាក់អន់ចិត្តគ្នាបានឡើយ។ ដូច្នេះការសន្ទនាបានក្លាយទៅជាការឈ្លោះប្រកែកគ្នាវិញ ជាជាងកសាងឲ្យមានទំនាក់ទំនងកាន់តែជិតស្និទ្ធឡើង។
តើស្វាមីនិងភរិយាអាចដោះស្រាយការខ្វែងគំនិតគ្នាដោយសន្ដិវិធី ព្រមទាំងរៀបរាប់ពីអ្វីក្នុងចិត្តដោយអារម្មណ៍ស្រួលយ៉ាងដូចម្ដេច? គួរឲ្យចាប់អារម្មណ៍ណាស់ថាការណែនាំដែលមានប្រយោជន៍បំផុត មិនមែនមកពីសៀវភៅដែលទើបតែសរសេរដោយអ្នកផ្ដល់ឱវាទស្តីពីរឿងអាពាហ៍ពិពាហ៍ទេ តែពីសៀវភៅចាស់បុរាណមួយដ៏មានតម្លៃបំផុតអស់រាប់សតវត្សរ៍មកហើយ ពោលគឺសៀវភៅព្រះគម្ពីរ។