ហេតុអ្វីយើងគួរធ្វើអ្វីដែលត្រឹមត្រូវ?
ហេតុអ្វីយើងគួរធ្វើអ្វីដែលត្រឹមត្រូវ?
អ្នកប្រាជ្ញម្នាក់ធ្លាប់មានប្រសាសន៍ថា៖ «ខ្ញុំមានចិត្តចង់ធ្វើល្អជានិច្ច ប៉ុន្តែរកធ្វើមិនកើតសោះ។ ខ្ញុំមិនប្រព្រឹត្តការល្អដែលខ្ញុំចង់ធ្វើនោះទេ តែការអាក្រក់ដែលខ្ញុំមិនចង់ធ្វើ នោះបែរជាខ្ញុំធ្វើវិញ»។ ហេតុអ្វីបានជាពិបាកម្ល៉េះឲ្យគាត់ប្រព្រឹត្តការល្អដែលគាត់ចង់ធ្វើនោះ? គាត់ពន្យល់ថា៖ «ខ្ញុំឃើញច្បាប់១នេះថា ឯខ្ញុំដែលចង់ប្រព្រឹត្តតែសេចក្ដីល្អ នោះចេះតែមានសេចក្ដីអាក្រក់ជាប់នៅនឹងខ្ញុំជានិច្ច ដ្បិតតាមប៉ែកខាងក្នុងខ្ញុំត្រេកអរចំពោះក្រិត្យវិន័យរបស់ព្រះ តែខ្ញុំឃើញមានអំណាច១ទៀតក្នុងអស់ទាំងអវយវៈរបស់រូបកាយខ្ញុំដែលច្បាំងនឹងអំណាចនៃគំនិតខ្ញុំ ទាំងចាប់នាំខ្ញុំទៅជាប់ក្រោមអំណាចអំពើបាបដែលនៅក្នុងអវយវៈនៃខ្លួនខ្ញុំទាំងប៉ុន្មានផង»។—រ៉ូម ៧:១៨, ១៩, ២១-២៣
ពាក្យទាំងនេះដែលសាវ័កប៉ុលបានសរសេរជិត២០០០ឆ្នាំមុននេះបញ្ជាក់នូវមូលហេតុដែលពិបាកម្ល៉េះឲ្យមនុស្សមិនគ្រប់លក្ខណ៍ធ្វើអ្វីដែលត្រឹមត្រូវ។ បើយើងចង់ធ្វើអ្វីដែលត្រឹមត្រូវ យើងត្រូវមានកម្លាំងចិត្តក្នុងការធ្វើតាមគោលការណ៍សីលធម៌ ជាពិសេសពេលជួបប្រទះទុក្ខលំបាក។ ដូច្នេះ យកល្អឲ្យយើងសួរថា តើអ្វីជាមូលហេតុចម្បងដែលគួរជំរុញយើងឲ្យធ្វើអ្វីដែលត្រឹមត្រូវ?
សូមពិចារណាមើលអ្វីដែលព្រះគម្ពីររៀបរាប់អំពីអនាគតរបស់មនុស្សទៀងត្រង់។ នៅសៀវភៅទំនុកដំកើង ៣៧:៣៧, ៣៨ យើងអានថា៖ «ចូរចំណាំមើលមនុស្សគ្រប់លក្ខណ៍វិញ ហើយពិចារណាមើលមនុស្សទៀងត្រង់ចុះ ដ្បិតចុងបំផុតនៃមនុស្សនោះមានសេចក្ដីសាន្តត្រាណ។ ឯពួកមនុស្សរំលងច្បាប់នឹងត្រូវវិនាសទៅជាមួយគ្នា។ ឯចុងបំផុតនៃមនុស្សអាក្រក់ នោះនឹងត្រូវកាត់ចេញវិញ»។ សៀវភៅសុភាសិត ២:២១, ២២ ប្រាប់យើងថា៖ «មនុស្សទៀងត្រង់នឹងអាស្រ័យនៅផែនដី ហើយមនុស្សគ្រប់លក្ខណ៍នឹងបាននៅជាប់ តែមនុស្សអាក្រក់នឹងត្រូវកាត់ឲ្យសូន្យចេញពីផែនដីវិញ ហើយមនុស្សប្រទូសរ៉ាយនឹងត្រូវរំលើងចេញពីស្រុកទៅ»។
សេចក្ដីសន្យាទាំងនេះនិងសេចក្ដីសន្យាឯទៀតក្នុងព្រះគម្ពីរពិតជាផ្ដល់ហេតុឲ្យយើងចង់ធ្វើអ្វីដែលផ្គាប់ព្រះហឫទ័យព្រះមែន ប៉ុន្តែនេះមិនមែនជាមូលហេតុចម្បងដែលជំរុញយើងឲ្យធ្វើដូច្នេះឡើយ។ មូលហេតុសំខាន់បំផុតដែលជំរុញយើងឲ្យចង់ធ្វើអ្វីដែលត្រឹមត្រូវ គឺសំដៅទៅលើការចោទប្រកាន់មួយដែលទាក់ទងមនុស្សនិងទេវតាគ្រប់រូប។ អត្ថបទបន្ទាប់នឹងប្រាប់ឲ្យដឹងអំពីការចោទប្រកាន់នេះ ហើយពន្យល់ថា តើរឿងនេះជាប់ទាក់ទងនឹងយើងយ៉ាងដូចម្ដេច?