សេចក្ដីសប្បុរសធ្វើឲ្យកំហឹងរលាយទៅ
សេចក្ដីសប្បុរសធ្វើឲ្យកំហឹងរលាយទៅ
ស្ត្រីវ័យចាស់ម្នាក់មិនបានរាក់ទាក់ទេ ពេលដែលសាក្សីព្រះយេហូវ៉ាពីរនាក់នៅប្រទេសហូឡង់ឈ្មោះចចនិងម៉ាណុង បានផ្សាយដំណឹងល្អអំពីរាជាណាចក្រព្រះដល់គាត់។ ពួកគាត់បានដឹងថាប្ដីពីរនាក់និងកូនប្រុសម្នាក់របស់ស្ត្រីនោះបានស្លាប់ ហើយគាត់មានជំងឺសន្លាក់ឆ្អឹងយ៉ាងធ្ងន់ធ្ងរ។ ទោះជាស្ត្រីនោះអន់ខឹងក្នុងអំឡុងពេលសន្ទនាគ្នាក៏ដោយ តែគាត់នៅតែមិនរាក់ទាក់ទេ។
ប៉ុន្តែ ចចបានឲ្យយោបល់ទៅម៉ាណុងថាពួកគាត់គួរត្រឡប់ទៅវិញ ហើយទិញផ្កាមួយបាច់ឲ្យស្ត្រីនោះ ដោយសារមើលទៅហាក់ដូចជាគាត់កណ្ដោចកណ្ដែង មួម៉ៅនិងមិនសប្បាយចិត្ត។ ពេលដែលពួកគាត់ត្រឡប់មកវិញ ស្ត្រីវ័យចាស់នោះដែលឈ្មោះរីអា បានភ្ញាក់ផ្អើលហើយសប្បាយចិត្ត។ ប៉ុន្តែ នៅពេលនោះគាត់ជាប់រវល់ ដូច្នេះគាត់បានណាត់ជួបគ្នាលើកក្រោយ។ ពេលចចនិងម៉ាណុងត្រឡប់មកវិញតាមពេលណាត់ គ្មានអ្នកណាបើកទ្វារទេ។ ទោះជាពួកគាត់ព្យាយាមមកវិញនៅពេលផ្សេងក៏ដោយ ក៏មិនអាចជួបរីអាម្ដងទៀតបានទេ។ ពួកគាត់ថែមទាំងចាប់ផ្ដើមគិតថាស្ត្រីនោះប្រហែលជាគេចមិនឲ្យជួបពួកគាត់។
នៅទីបំផុតចចបានជួបរីអានៅផ្ទះ។ រីអាបានសុំអភ័យទោសដែលគាត់មិនបាននៅផ្ទះតាមការណាត់ ហើយបានពន្យល់ថាពេលនោះគាត់សម្រាន្តនៅមន្ទីរពេទ្យ។ គាត់បាននិយាយថា៖ «ដឹងទេ! តាំងពីអ្នកទាំងពីរបានចេញទៅ ខ្ញុំបានចាប់ផ្ដើមអានគម្ពីរ!»។ ភ្លាមៗនោះ មានការពិភាក្សាគ្នាដ៏ល្អ ហើយរីអាបានចាប់ផ្ដើមសិក្សាគម្ពីរ។
ពេលដែលរីអាបានសិក្សាគម្ពីរ គាត់បានកែប្រែពីមនុស្សដែលមួម៉ៅនិងមិនសប្បាយចិត្ត ទៅជាស្ត្រីដែលមានចិត្តសប្បុរស ហើយសប្បាយរីករាយ។ ទោះជាគាត់មិនអាចចេញពីផ្ទះក៏ដោយ គាត់បានចាប់ផ្ដើមផ្សព្វផ្សាយភ្លាមៗអំពីជំនឿថ្មីរបស់គាត់ ដល់អ្នកដែលបានទៅលេងគាត់។ ដោយសារសុខភាពរបស់គាត់មានបញ្ហា នោះគាត់មិនអាចចូលរួមកិច្ចប្រជុំជារឿយៗទេ ប៉ុន្តែគាត់សប្បាយដោយសារបងប្អូនប្រុសស្រីទៅលេងគាត់។ ពេលដែលគាត់មានអាយុ៨២ឆ្នាំ គាត់បានចូលរួមសន្និបាតប្រចាំមណ្ឌល ហើយបានទទួលការជ្រមុជទឹកដែលជាតំណាងការប្រគល់ខ្លួនគាត់ជូនព្រះ។
ពីរបីខែក្រោយពីគាត់បានស្លាប់ គេបានរកឃើញកំណាព្យមួយដែលគាត់បានសរសេរ។ នៅក្នុងកំណាព្យនោះ គាត់បានរៀបរាប់អំពីទុក្ខលំបាកដោយសារគាត់មានអារម្មណ៍កណ្ដោចកណ្ដែងក្នុងវ័យចាស់ ហើយបានលើកបញ្ជាក់អំពីសារៈសំខាន់នៃចិត្តសប្បុរស។ ម៉ាណុងបាននិយាយថា៖ «ពេលអានកំណាព្យនោះ ខ្ញុំពិតជារំជួលចិត្តមែន ហើយខ្ញុំសប្បាយចិត្តណាស់ដែលព្រះយេហូវ៉ាជួយយើងឲ្យបង្ហាញចិត្តសប្បុរសចំពោះគាត់»។
គំរូរបស់ព្រះយេហូវ៉ាជំរុញយើងឲ្យបង្ហាញសេចក្ដីស្រឡាញ់និងចិត្តសប្បុរសដូចនេះ។ (អេភ. ៥:១, ២) កិច្ចបម្រើផ្សាយរបស់យើងនឹងបង្កើតផល ពេលដែលយើង«បង្ហាញឲ្យឃើញថាយើងជាអ្នកបម្រើរបស់ព្រះ . . . ដោយសេចក្ដីសប្បុរស»។—២កូ. ៦:៤, ៦