«ក្ដីស្រមៃរបស់ខ្ញុំបានក្លាយជាការពិត»
«ក្ដីស្រមៃរបស់ខ្ញុំបានក្លាយជាការពិត»
កាលពី១៥ឆ្នាំមុន អេមីលៀបានបម្រើជាអ្នកត្រួសត្រាយពេញពេល។ ប៉ុន្តែ ក្រោយមកនាងត្រូវឈប់បម្រើពេញពេល។ នៅពេលថ្មីៗនេះ នាងបានចាប់ផ្ដើមគិតអំពីគ្រាដ៏សប្បាយបំផុតក្នុងជីវិតរបស់នាង ពេលដែលនាងធ្វើជាអ្នកត្រួសត្រាយ ហើយនាងចង់ចាប់ផ្ដើមត្រួសត្រាយម្ដងទៀត។
ក៏ប៉ុន្តែ ការងាររបស់អេមីលៀតម្រូវឲ្យនាងចំណាយពេលច្រើន ហើយនេះបានធ្វើឲ្យនាងបាត់បង់អំណរ។ ថ្ងៃមួយ នៅមុខបុគ្គលិកឯទៀតនាងបាននិយាយថា៖ «ខ្ញុំចង់ធ្វើការតិចម៉ោងជាង!»។ ប្រធានរបស់នាងបានឮអំពីរឿងនេះ ហើយបានទៅជួបដើម្បីសួរនាងថារឿងនេះពិតឬមិនពិត។ អេមីលៀបានប្រាប់គាត់ថានេះជាការពិត។ ប៉ុន្តែ ក្រុមហ៊ុនតម្រូវឲ្យបុគ្គលិកធ្វើការពេញពេល។ ដូច្នេះ អេមីលៀត្រូវទៅជួបនាយកដើម្បីសុំការអនុញ្ញាតធ្វើការតិចម៉ោងជាង។ នាងបានរៀបចំដើម្បីជួបនាយក ហើយបានអធិដ្ឋានដើម្បីមានអារម្មណ៍ស្ងប់និងចិត្តក្លាហានដើម្បីនិយាយ។
ក្នុងអំឡុងជំនួបនោះ អេមីលៀនិយាយដោយស្លូតបូតប៉ុន្តែដោយក្លាហាន ដើម្បីសុំកាត់បន្ថយម៉ោងធ្វើការ។ នាងបានពន្យល់ថានាងយកពេលដែលនាងមិនធ្វើការទៅជួយអ្នកឯទៀត។ នាងប្រាប់គាត់ថានាងជាសាក្សីព្រះយេហូវ៉ាម្នាក់ ហើយនាងជួយបង្រៀនគម្ពីរដល់អ្នកឯទៀត។ នាងបាននិយាយថែមទៀតថាសព្វថ្ងៃនេះ មនុស្សជាច្រើនមិនដឹងថាអ្វីដែលត្រឹមត្រូវនិងអ្វីដែលខុសនោះទេ ហើយពួកគេត្រូវការប្រាជ្ញាពីគម្ពីរដើម្បីជួយពួកគេឲ្យចេះសម្រេចចិត្តត្រឹមត្រូវ។ អេមីលៀបានធានាចំពោះប្រធាននាងថានាងនឹងបន្តធ្វើជាបុគ្គលិកល្អសម្រាប់ក្រុមហ៊ុន ប៉ុន្តែនាងចង់ធ្វើការតិចម៉ោងជាងដើម្បីមានពេលច្រើនជាងសម្រាប់ជួយអ្នកឯទៀត។
នាយកក្រុមហ៊ុនបានស្ដាប់នាងយ៉ាងយកចិត្តទុកដាក់ ហើយនិយាយថាគាត់ធ្លាប់គិតចង់ធ្វើការងារសប្បុរសធម៌។ គាត់បានយល់ពីមូលហេតុដែលអេមីលៀចង់កាត់បន្ថយម៉ោងធ្វើការ ហើយបានអនុញ្ញាតឲ្យនាងធ្វើដូច្នេះ។ ប៉ុន្តែគាត់បានសួរនាងថា៖ «តើអ្នកដឹងថាអ្នកនឹងបានប្រាក់ខែតិចជាងឬទេ?»។ អេមីលៀបាននិយាយថានាងបានដឹងអំពីរឿងនេះ ប៉ុន្តែនាងអាចរៀនរស់នៅដោយមានលុយតិចជាង។ នាងបាននិយាយបន្ថែមទៀតថានាងសប្បាយចិត្តពេលជួយអ្នកឯទៀត។ នាយកក្រុមហ៊ុនបានប្រាប់នាងថា៖ «ខ្ញុំពិតជាស្ងើចសរសើរមនុស្សដែលលះបង់ពេលវេលាសម្រាប់អ្នកឯទៀតដោយមិនគិតអំពីប្រយោជន៍ផ្ទាល់ខ្លួន»។
គ្មានបុគ្គលិកណាម្នាក់នៅក្រុមហ៊ុននោះធ្លាប់បានក្រុមហ៊ុនអនុញ្ញាតឲ្យកាត់បន្ថយម៉ោងធ្វើការនោះទេ។ ឥឡូវនេះក្រុមហ៊ុនបានអនុញ្ញាតឲ្យអេមីលៀធ្វើការតែបួនថ្ងៃប៉ុណ្ណោះក្នុងមួយសប្ដាហ៍។ អ្វីដែលធ្វើឲ្យនាងភ្ញាក់ផ្អើលបំផុតនោះគឺ ក្រុមហ៊ុនបានដំឡើងប្រាក់ខែឲ្យនាង ហើយនាងទទួលបានប្រាក់ខែដូចពីមុន! នាងនិយាយថា៖ «ក្ដីស្រមៃរបស់ខ្ញុំបានក្លាយជាការពិត ហើយខ្ញុំអាចត្រួសត្រាយពេញពេលម្ដងទៀតបាន!»។
តើអ្នកធ្លាប់គិតកែប្រែស្ថានភាពរបស់អ្នក ដើម្បីត្រួសត្រាយឬត្រួសត្រាយម្ដងទៀតឬទេ?
[ឃ្លាអក្សរធំនៅទំព័រ៣២]
នាយកក្រុមហ៊ុនបានប្រាប់នាងថា៖ «ខ្ញុំពិតជាស្ងើចសរសើរមនុស្សដែលលះបង់ពេលវេលាសម្រាប់អ្នកឯទៀតដោយមិនគិតពីប្រយោជន៍ផ្ទាល់ខ្លួន»