ចូរទទួលបានជោគជ័យពិតប្រាកដក្នុងជីវិត
ចូរទទួលបានជោគជ័យពិតប្រាកដក្នុងជីវិត
«ឯងនឹងបានកើតការនៅគ្រប់ទាំងផ្លូវឯង ហើយនឹងបានចំរើនឡើង»។—យ៉ូស. ១:៨
តើអ្នកនឹងឆ្លើយយ៉ាងណា?
តើសាឡូម៉ូនទទួលជោគជ័យយ៉ាងដូចម្ដេច?
តើតាមរបៀបណាប៉ូលទទួលបានជោគជ័យពិតប្រាកដ?
តើតាមរបៀបណាអ្នកអាចទទួលជោគជ័យដែលនៅស្ថិតស្ថេរ?
១, ២. (ក) តើមនុស្សជាច្រើនគិតថាជោគជ័យក្នុងជីវិតសំដៅទៅលើអ្វី? (ខ) តើតាមរបៀបណាអ្នកអាចដឹងអំពីទស្សនៈរបស់អ្នកអំពីជោគជ័យ?
តើការមានជោគជ័យក្នុងជីវិតមានន័យយ៉ាងណា? ប្រសិនបើអ្នកសួរមនុស្សអំពីសំណួរនេះ នោះអ្នកនឹងទទួលចម្លើយខុសគ្នាយ៉ាងខ្លាំង។ ជាឧទាហរណ៍ មនុស្សជាច្រើនគិតថា មនុស្សម្នាក់មានជោគជ័យប្រសិនបើគាត់មានលុយច្រើន មានការងារល្អ ឬក៏មានកម្រិតវប្បធម៌ខ្ពង់ខ្ពស់។ អ្នកខ្លះទៀតនិយាយថា ដើម្បីមានជោគជ័យ ពួកគេក៏ត្រូវមានទំនាក់ទំនងល្អជាមួយក្រុមគ្រួសារ មិត្តភក្ដិ ឬអ្នករួមការងារដែរ។ អ្នកខ្លះដែលបម្រើព្រះយេហូវ៉ាប្រហែលជាគិតថាបុគ្គលម្នាក់បានជោគជ័យ បើគាត់ទទួលភារកិច្ចខ្លះក្នុងក្រុមជំនុំ ឬក៏បានលទ្ធផលល្អក្នុងកិច្ចផ្សព្វផ្សាយ។
២ ដើម្បីដឹងនូវទស្សនៈរបស់អ្នកអំពីជោគជ័យក្នុងជីវិត អ្នកប្រហែលជាអាចសរសេរឈ្មោះមនុស្សខ្លះដែលអ្នកចាត់ទុកថាជាអ្នកដែលបានជោគជ័យ ពោលគឺមនុស្សដែលអ្នកកោតសរសើរនិងគោរពខ្លាំងបំផុត។ តើពួកគេជាមនុស្សបែបណា? តើពួកគេជាអ្នកមានឬជាមនុស្សល្បីឈ្មោះឬទេ? តើពួកគេជាអ្នកមានមុខមាត់ឬ? ចម្លើយចំពោះសំណួរទាំងនេះ ប្រហែលជាបង្ហាញយ៉ាងច្បាស់អំពីអ្វីដែលមានក្នុងចិត្តរបស់អ្នក ហើយនេះអាចមានឥទ្ធិពលយ៉ាងខ្លាំងទៅលើការជ្រើសរើសនិងគោលដៅរបស់អ្នក។—លូក. ៦:៤៥
៣. (ក) តើយ៉ូស្វេបានធ្វើអ្វីដើម្បីទទួលជោគជ័យ? (ខ) តើឥឡូវនេះយើងនឹងពិចារណាអំពីអ្វី?
៣ អ្វីដែលសំខាន់បំផុតគឺព្រះយេហូវ៉ាចាត់ទុកថាយើងមានជោគជ័យ ពីព្រោះយើងអាចមានជីវិតដែលគ្មានទីបញ្ចប់ បើយើងទទួលការពេញចិត្តពីលោក។ ពេលព្រះយេហូវ៉ាប្រគល់ភារកិច្ចដ៏ធ្ងន់ធ្ងរឲ្យយ៉ូស្វេដឹកនាំបណ្ដាជនអ៊ីស្រាអែលចូលក្នុងស្រុកដែលព្រះបានសន្យា លោកបានប្រាប់គាត់ឲ្យអានច្បាប់របស់ម៉ូសេ«ទាំងយប់ទាំងថ្ងៃ» ហើយធ្វើតាមអ្វីដែលបានត្រូវសរសេរក្នុងច្បាប់នោះដោយយកចិត្តទុកដាក់។ ព្រះបានធានាចំពោះគាត់ថា៖ «ឯងនឹងបានកើតការនៅគ្រប់ទាំងផ្លូវឯង ហើយនឹងបានចំរើនឡើង»។ (យ៉ូស. ១:៧, ៨) ដូច្នេះ យ៉ូស្វេពិតជាបានទទួលជោគជ័យមែន។ ចុះយើងវិញ? តើយើងអាចដឹងថាទស្សនៈរបស់យើងស្តីអំពីជោគជ័យគឺស្របគ្នានឹងទស្សនៈរបស់ព្រះយ៉ាងដូចម្ដេច? ដើម្បីដឹងអំពីរឿងនេះ សូមពិចារណាអំពីជីវិតរបស់បុរសពីរនាក់ដែលគម្ពីរបានរៀបរាប់។
តើសាឡូម៉ូនមានជោគជ័យក្នុងជីវិតឬទេ?
៤. ហេតុអ្វីយើងអាចនិយាយថាសាឡូម៉ូនទទួលបានជោគជ័យ?
៤ សាឡូម៉ូនបានទទួលជោគជ័យខ្លាំងណាស់ តាមរបៀបជាច្រើន។ ហេតុអ្វី? ពីព្រោះគាត់បានកោតខ្លាច ហើយស្ដាប់បង្គាប់ព្រះយេហូវ៉ាអស់ជាច្រើនឆ្នាំ ហើយលោកបានឲ្យពរជាច្រើនដល់គាត់។ សូមចាំថា ពេលព្រះយេហូវ៉ាឲ្យសាឡូម៉ូនសុំអ្វីដែលគាត់ចង់បាន នោះគាត់បានសុំឲ្យមានប្រាជ្ញាដើម្បីដឹកនាំបណ្ដាជន។ ហេតុនេះព្រះបានឲ្យពរគាត់ ដោយឲ្យគាត់មានទាំងប្រាជ្ញាទាំងទ្រព្យសម្បត្ដិ។ (សូមអាន ពង្សាវតារក្សត្រទី១ ៣:១០-១៤) ប្រាជ្ញារបស់សាឡូម៉ូនគឺ«លើសហួសជាងប្រាជ្ញារបស់អស់ទាំងពួកស្រុកខាងកើត ហើយនឹងអស់ទាំងប្រាជ្ញារបស់ស្រុកអេស៊ីព្ទ»។ កេរ្ដិ៍ឈ្មោះរបស់សាឡូម៉ូនបានល្បីដល់«គ្រប់ទាំងនគរនៅជុំវិញ»។ (១ព. ៤:៣០, ៣១) ស្តីអំពីទ្រព្យសម្បត្ដិ ចំណូលរបស់សាឡូម៉ូនជាមាសប៉ុណ្ណោះមានទម្ងន់ប្រហែលជា២៥តោនក្នុងមួយឆ្នាំ! (២រប. ៩:១៣) គាត់ប៉ិនប្រសប់ខាងការទូត ខាងការសាងសង់ និងខាងមុខជំនួញ។ ក្នុងអំឡុងពេលដែលគាត់រក្សាចំណងមិត្តភាពជាមួយព្រះ នោះគាត់ទទួលបានជោគជ័យ។—២រប. ៩:២២-២៤
៥. តើសាឡូម៉ូនបានសន្និដ្ឋានយ៉ាងណាស្តីអំពីពួកអ្នកដែលព្រះចាត់ទុកថាមានជោគជ័យ?
៥ អ្វីដែលសាឡូម៉ូនបានសរសេរក្នុងសៀវភៅសាស្ដាបង្ហាញថាគាត់មានទស្សនៈត្រឹមត្រូវអំពីជោគជ័យ។ គាត់មិនបានគិតថាមានតែអ្នកមាន ឬអ្នកមានអំណាចប៉ុណ្ណោះទេដែលអាចមានជោគជ័យនិងមានអំណរ។ គាត់បានសរសេរថា «យើងដឹងហើយថាគ្មានអ្វីសំរាប់គេ ដែលវិសេសជាងមានចិត្តរីករាយ ហើយរកបានសេចក្ដីល្អដល់ខ្លួនអស់វេលាដែលមានជីវិតរស់នៅនោះទេ ហើយការដែលគ្រប់មនុស្សបានស៊ីហើយផឹក ព្រមទាំងរីករាយដោយផលល្អដែលកើតពីអស់ទាំងការនឿយហត់របស់ខ្លួន នោះហើយជាអំណោយទាននៃព្រះទេ»។ (សាស្ដ. ៣:១២, ១៣) គាត់បានដឹងថាអំណរបែបនេះពិតជាសំខាន់ចំពោះអ្នកដែលព្រះពេញចិត្ត និងអ្នកដែលមានចំណងមិត្តភាពល្អជាមួយលោក។ សាឡូម៉ូនបានពោលយ៉ាងត្រឹមត្រូវថា៖ «សេចក្ដីនេះចប់តែប៉ុណ្ណោះ ទាំងអស់បានសំដែងទុកហើយ ដូច្នេះចូរកោតខ្លាចដល់ព្រះ ហើយកាន់តាមបញ្ញត្តទ្រង់ចុះ ដ្បិតប៉ុណ្ណេះឯងជាកិច្ចទាំងមូលដែលមនុស្សត្រូវធ្វើ»។—សាស្ដ. ១២:១៣
៦. តើតាមរបៀបណាគំរូរបស់សាឡូម៉ូនជួយយើងឲ្យយល់ថាអ្វីជាជោគជ័យពិតប្រាកដ?
៦ អស់ជាច្រើនឆ្នាំ សាឡូម៉ូនបានរស់នៅដោយកោតខ្លាចព្រះ។ គម្ពីរចែងថាគាត់បន្ត«ស្រឡាញ់ដល់ព្រះយេហូវ៉ា ហើយបានកាន់តាមបញ្ញត្តទាំងប៉ុន្មានរបស់ដាវីឌជាព្រះវរបិតាទ្រង់»។ (១ព. ៣:៣) តើអ្នកអាចចាត់ទុកនេះជាជោគជ័យពិតប្រាកដឬទេ? ក្រោមការណែនាំពីព្រះ សាឡូម៉ូនបានសង់វិហារដ៏អស្ចារ្យមួយសម្រាប់ការគោរពប្រណិប័តន៍ពិត ហើយបានសរសេរសៀវភៅបីនៃគម្ពីរបរិសុទ្ធ។ យើងមិនអាចធ្វើដូចសាឡូម៉ូនបានទេ ប៉ុន្តែគំរូរបស់គាត់ពេលដែលគាត់នៅស្មោះត្រង់នឹងព្រះ អាចជួយយើងឲ្យយល់ថាអ្វីជាជោគជ័យពិតប្រាកដ និងអ្វីដែលយើងត្រូវធ្វើដើម្បីទទួលជោគជ័យ។ ស្តីអំពីរឿងនេះ សូមចាំថាក្រោមការដឹកនាំរបស់ព្រះ សាឡូម៉ូនបានសរសេរថាទ្រព្យសម្បត្ដិ ប្រាជ្ញា កេរ្ដិ៍ឈ្មោះនិងអំណាចដែលមនុស្សភាគច្រើនសព្វថ្ងៃនេះចាត់ទុកថាជាជោគជ័យ នោះគឺឥតប្រយោជន៍ទេ។ អ្វីៗទាំងនេះពិតជា«អសារឥតការទទេ»។ មនុស្សជាច្រើនដែលស្រឡាញ់ទ្រព្យសម្បត្ដិចង់បានទ្រព្យសម្បត្ដិថែមទៀត ហើយពួកគេច្រើនតែបារម្ភអំពីអ្វីដែលពួកគេមាន។ ម្យ៉ាងទៀត ថ្ងៃណាមួយទ្រព្យសម្បត្ដិទាំងនេះនឹងបានទៅអ្នកផ្សេងវិញ។—សូមអាន សាស្ដា ២:៨-១១, ១៧; ៥:១០-១២
៧, ៨. តើតាមរបៀបណាសាឡូម៉ូនលែងស្មោះត្រង់នឹងព្រះ ហើយតើគាត់ទទួលលទ្ធផលអ្វី?
៧ អ្នកក៏បានដឹងហើយថា នៅទីបំផុតសាឡូម៉ូនមិនបាននៅស្មោះត្រង់នឹងព្រះទេ។ បណ្ដាំរបស់ព្រះចែងថា៖ «ដ្បិតកាលសាឡូម៉ូនទ្រង់ចាស់ហើយ នោះភរិយាទ្រង់បានបង្វែរព្រះទ័យទ្រង់ឲ្យទៅតាមព្រះដទៃវិញ ហើយព្រះទ័យទ្រង់មិនបានស្មោះត្រង់ នៅចំពោះព្រះយេហូវ៉ាជាព្រះនៃទ្រង់ដូចជាព្រះទ័យរបស់ដាវីឌជាបិតាទ្រង់ទេ . . . សាឡូម៉ូនក៏ប្រព្រឹត្តការដែលអាក្រក់នៅព្រះនេត្រនៃព្រះយេហូវ៉ា»។—១ព. ១១:៤-៦
៨ ព្រះយេហូវ៉ាប្រាកដជាមិនពេញចិត្តនឹងសាឡូម៉ូនឡើយ ហើយលោកបានប្រាប់គាត់ថា៖ «ដោយព្រោះឯង . . . មិនបានរក្សាសេចក្ដីសញ្ញារបស់អញ នឹងបញ្ញត្តដែលអញបានបង្គាប់ដល់ឯង នោះបានជាអញនឹងកន្ដ្រាក់យករាជ្យពីឯងវិញជាពិត ហើយឲ្យទៅអ្នកបំរើរបស់ឯងវិញ»។ (១ព. ១១:១១) នេះជាអ្វីដែលគួរឲ្យសោកស្ដាយណាស់! ទោះជាសាឡូម៉ូនធ្លាប់បានទទួលជោគជ័យតាមរបៀបជាច្រើនក៏ដោយ ក្រោយមកគាត់បានធ្វើឲ្យព្រះយេហូវ៉ាខកចិត្ត។ សាឡូម៉ូន មិនបានជោគជ័យ ដោយសារគាត់មិនបានបន្តធ្វើអ្វីដែលសំខាន់បំផុតក្នុងជីវិតរបស់គាត់ ពោលគឺនៅស្មោះត្រង់នឹងព្រះយេហូវ៉ា។ យើងម្នាក់ៗអាចសួរខ្លួនយើងថា៖ ‹តើខ្ញុំតាំងចិត្តដើម្បីធ្វើឲ្យប្រាកដថាអ្វីដែលខ្ញុំបានរៀនពីជីវិតរបស់សាឡូម៉ូន នឹងជួយខ្ញុំឲ្យទទួលជោគជ័យឬទេ?›។
ជោគជ័យពិតប្រាកដក្នុងជីវិត
៩. ហេតុអ្វីមនុស្សជាច្រើនគិតថាប៉ូលមិនបានទទួលជោគជ័យ?
៩ ជីវិតរបស់សាវ័កប៉ូលគឺខុសគ្នាឆ្ងាយណាស់នឹងជីវិតរបស់ស្តេចសាឡូម៉ូន។ ប៉ូលគ្មានបល្ល័ង្កដែលធ្វើពីភ្លុក ហើយក៏មិនធ្លាប់បានជប់លៀងជាមួយនឹងស្តេចដែរ។ ផ្ទុយទៅវិញ មានពេលខ្លះគាត់ធ្លាប់ស្រេកឃ្លាន រងា និងគ្មានសម្លៀកបំពាក់។ (២កូ. ១១:២៤-២៧) នៅពេលដែលគាត់បានទទួលស្គាល់លោកយេស៊ូជាមេស្ស៊ី ប៉ូលគ្មានឋានៈធំដុំក្នុងសាសនាយូដាទៀតទេ។ ផ្ទុយទៅវិញ ពួកអ្នកដឹកនាំសាសនាយូដាបានស្អប់គាត់។ ប៉ូលបានជាប់គុក ត្រូវគេវាយ ត្រូវគេវាយនឹងដំបង ហើយត្រូវគេគប់នឹងដុំថ្ម។ ប៉ូលបានទទួលស្គាល់ថាគាត់និងបងប្អូនគ្រិស្តសាសនិកឯទៀតបានត្រូវគេជេរប្រមាថ បៀតបៀន ហើយត្រូវគេបង្កាច់បង្ខូច។ គាត់បានបន្ថែមថា៖ «យើងបានក្លាយទៅជាសំរាមរបស់ពិភពលោក និងកម្អែលនៃអ្វីៗទាំងអស់ រហូតដល់ឥឡូវនេះ»។—១កូ. ៤:១១-១៣
១០. ហេតុអ្វីមនុស្សប្រហែលជាគិតថាប៉ូលបានបោះបង់ឱកាសដើម្បីទទួលជោគជ័យ?
១០ នៅពេលដែលសាវ័កប៉ូលនៅក្មេងនៅឡើយ គាត់មានឈ្មោះថាសូល។ ប៉ូលមានអ្វីៗជាច្រើនដែលអាចនាំឲ្យគាត់មានអនាគតល្អ។ ដោយសារប៉ូលប្រហែលជាបានកើតក្នុងក្រុមគ្រួសារដែលមានមុខមាត់ នោះគាត់បានរៀនជាមួយនឹងកាម៉ាលាលដែលជាគ្រូបង្រៀនដ៏ល្បីឈ្មោះ ហើយក្រោយមកគាត់បានសរសេរថា៖ «ខ្ញុំកាន់តាមសាសនាយូដាបានប្រសើរជាងមនុស្សជាច្រើនដែលជាជនរួមជាតិរបស់ខ្ញុំនិងអ្នកដែលស្រករខ្ញុំ»។ (កាឡ. ១:១៤) សូលនិយាយភាសាហេប្រឺនិងភាសាក្រិចយ៉ាងស្ទាត់ ហើយគាត់មានសញ្ជាតិរ៉ូម ដែលអនុញ្ញាតឲ្យគាត់មានសិទ្ធិពិសេសនិងសិទ្ធិផ្សេងៗទៀតដែលមនុស្សជាច្រើនចង់បានយ៉ាងខ្លាំង។ បើគាត់សម្រេចចិត្តបន្តស្វែងរកជោគជ័យក្នុងពិភពលោកនេះ គាត់ទំនងជាអាចមានមុខមានមាត់ ហើយក៏មានលុយច្រើនជាងដែរ។ ផ្ទុយទៅវិញ គាត់ជ្រើសរើសយកគន្លងជីវិតដែលអ្នកឯទៀត ឬប្រហែលជាសូម្បីតែសាច់ញាតិខ្លះរបស់គាត់ចាត់ទុកថាជាការល្ងង់ខ្លៅសុទ្ធសាធ។ ហេតុអ្វីគាត់ធ្វើដូច្នេះ?
១១. តើប៉ូលឲ្យតម្លៃទៅលើអ្វី តើអ្វីជាគោលដៅរបស់គាត់ ហើយហេតុអ្វី?
១១ ប៉ូលស្រឡាញ់ព្រះយេហូវ៉ា ហើយគាត់ចង់បានការពេញចិត្តពីព្រះជាងទ្រព្យសម្បត្ដិនិងការមានមុខមាត់ក្នុងចំណោមមនុស្ស។ ដោយសារប៉ូលបានទទួលចំណេះត្រឹមត្រូវអំពីសេចក្ដីពិត គាត់បានឲ្យតម្លៃទៅលើថ្លៃលោះរបស់គ្រិស្ត និងកិច្ចបម្រើជាគ្រិស្តសាសនិក ព្រមទាំងសេចក្ដីសង្ឃឹមអំពីជីវិតនៅស្ថានសួគ៌ ពោលគឺអ្វីដែលមនុស្សភាគច្រើនក្នុងពិភពលោកនេះមិនចាប់អារម្មណ៍។ ប៉ូលបានដឹងថាមានបញ្ហាមួយដែលត្រូវដោះស្រាយ។ សាថានបានចោទថា វាអាចធ្វើឲ្យមនុស្សលែងបម្រើព្រះ។ (យ៉ូប ១:៩-១១; ២:៣-៥) ដូច្នេះ គោលដៅ របស់ប៉ូលគឺបន្តគោរពប្រណិប័តន៍ព្រះពិតយ៉ាងស្មោះត្រង់ ទោះជាគាត់ត្រូវស៊ូទ្រាំនឹងទុក្ខលំបាកយ៉ាងណាក៏ដោយ។ នេះជាគោលដៅមួយដែលមនុស្សភាគច្រើនក្នុងពិភពលោកនេះ ដែលចង់ទទួលជោគជ័យមិនមាន។
១២. តើគ្រិស្តសាសនិកសង្ឃឹមទៅលើអ្នកណា?
១២ តើអ្នកបានតាំងចិត្តធ្វើដូចប៉ូលឬទេ? ទោះជាការរស់នៅដោយគោរពប្រណិប័តន៍ព្រះយ៉ាងស្មោះត្រង់គឺមិនតែងតែងាយស្រួលក៏ដោយ យើងដឹងថានេះនាំឲ្យយើងទទួលពរនិងការពេញចិត្តពីព្រះយេហូវ៉ា ហើយនេះជាអ្វីដែលធ្វើឲ្យមនុស្សទទួលជោគជ័យពិតក្នុងជីវិត។ (សុភ. ១០:២២) ដោយធ្វើដូច្នេះយើងអាចទទួលប្រយោជន៍នៅពេលឥឡូវនេះ ហើយយើងប្រាកដជាអាចទទួលពរនាពេលអនាគត។ (សូមអាន ម៉ាកុស ១០:២៩, ៣០) ដូច្នេះ មានមូលហេតុគ្រប់គ្រាន់ដែលយើងសង្ឃឹម«លើព្រះ ដែលផ្គត់ផ្គង់អ្វីៗទាំងអស់ដល់យើង ដើម្បីឲ្យយើងបានសប្បាយ» «មិនមែនលើទ្រព្យដែលមិនទៀង»នោះឡើយ។ យើង‹រក្សាគ្រឹះដ៏ល្អមួយសម្រាប់អនាគតរបស់យើង ទុកជាទ្រព្យសម្បត្ដិ។ ធ្វើដូច្នេះ យើងនឹងចាប់យ៉ាងជាប់នូវជីវិតដ៏ពិតប្រាកដ›។ (១ធី. ៦:១៧-១៩) យើងអាចប្រាកដថា ចាប់ពីឥឡូវនេះរហូតដល់មួយរយឆ្នាំ សូម្បីតែមួយពាន់ឆ្នាំទៀត ឬច្រើនជាងនេះ យើងអាចគិត ហើយនិយាយថា៖ «ខ្ញុំច្បាស់ជាបានជ្រើសរើសយកគន្លងជីវិតដែលមានជោគជ័យពិតប្រាកដមែន!»។
តើទ្រព្យសម្បត្ដិរបស់អ្នកនៅកន្លែងណា?
១៣. តើលោកយេស៊ូបានឲ្យឱវាទអ្វីស្តីអំពីការប្រមូលទ្រព្យសម្បត្ដិទុក?
១៣ លោកយេស៊ូបានមានប្រសាសន៍អំពីទ្រព្យសម្បត្ដិថា៖ «ឈប់ប្រមូលទ្រព្យសម្បត្ដិទុកសម្រាប់ខ្លួននៅផែនដី ជាកន្លែងដែលសត្វល្អិតនិងច្រែះស៊ីបំផ្លាញ និងចោរចូលលួច។ ចូរប្រមូលទ្រព្យសម្បត្ដិទុកសម្រាប់ខ្លួននៅឯស្ថានសួគ៌វិញ ជាកន្លែងដែលសត្វល្អិតនិងច្រែះមិនស៊ីបំផ្លាញ ហើយចោរមិនអាចចូលលួចឡើយ។ ព្រោះទ្រព្យសម្បត្ដិរបស់អ្នកនៅកន្លែងណា ចិត្តរបស់អ្នកក៏នៅកន្លែងនោះដែរ»។—ម៉ាថ. ៦:១៩-២១
១៤. ហេតុអ្វីការស្វែងរកទ្រព្យសម្បត្ដិក្នុងពិភពលោកនេះមិនមែនជាគំនិតឈ្លាសវៃ?
១៤ ទ្រព្យសម្បត្ដិរបស់មនុស្សនៅផែនដីគឺប្រហែលជាមិនត្រឹមតែជាលុយប៉ុណ្ណោះទេ។ ក្នុងន័យម្យ៉ាង នេះអាចរួមបញ្ចូលនូវអ្វីៗទាំងអស់ដែលសាឡូម៉ូនបានសរសេរ ដែលមនុស្សចាត់ទុកថាជាជោគជ័យ ពោលគឺការមានមុខមាត់ ភាពល្បីល្បាញ ឬអំណាច។ លោកយេស៊ូបានមានប្រសាសន៍ស្រដៀងគ្នានឹងអ្វីដែលសាឡូម៉ូនបានសរសេរនៅសៀវភៅសាស្ដា ពោលគឺទ្រព្យសម្បត្ដិនៅក្នុងពិភពលោកនេះមិនស្ថិតស្ថេរទេ។ ដូចអ្វីដែលអ្នកទំនងជាបានឃើញនៅជុំវិញអ្នក ទ្រព្យសម្បត្ដិបែបនេះគឺអាចខូច ហើយអាចងាយបាត់បង់។ សាស្ដ្រាចារ្យម្នាក់ឈ្មោះអេហ្វ ដេល ប៊្រូណឺបានសរសេរអំពីទ្រព្យសម្បត្ដិបែបនេះថា៖ «គេដឹងជាទូទៅថាភាពល្បីល្បាញគឺមិនជាប់លាប់នោះទេ។ បុគ្គលដែលល្បីឈ្មោះនៅសព្វថ្ងៃនេះ ប្រហែលជានឹងត្រូវគេភ្លេចយ៉ាងឆាប់រហ័ស។ មនុស្សដែលរកលុយបានច្រើននៅឆ្នាំនេះ អាចបាត់បង់ទៅវិញនៅឆ្នាំក្រោយ។ ដោយសារលោកយេស៊ូស្រឡាញ់មនុស្សជាតិ លោកបានព្រមានពួកគេថាភាពល្បីល្បាញអាចបាត់ទៅវិញយ៉ាងឆាប់រហ័ស ហើយធ្វើឲ្យពួកគេអស់សង្ឃឹម។ លោកយេស៊ូមិនចង់ឲ្យអ្នកកាន់តាមលោកខកចិត្តឡើយ។ ‹ជារៀងរាល់ថ្ងៃ មនុស្សដែលគិតថាពួកគេបានពិភពលោកនេះ តែពិភពលោកបែរជាក្រឡាប់ចាក់ទៅវិញ›»។ មនុស្សភាគច្រើននឹងយល់ស្របនឹងពាក្យរបស់សាស្ដ្រាចារ្យនេះ។ ប៉ុន្តែ តើមនុស្សប៉ុន្មាននាក់ឲ្យពាក្យរបស់លោកយេស៊ូមានឥទ្ធិពលទៅលើរបៀបរស់នៅរបស់ពួកគេ? ចុះអ្នកវិញ?
១៥. តើយើងគួរខំប្រឹងឲ្យបានជោគជ័យបែបណា?
១៥ អ្នកដឹកនាំសាសនាខ្លះបានផ្សាយថា ការខំប្រឹងឲ្យបានជោគជ័យគឺជាអ្វីដែលមិនត្រឹមត្រូវ ហើយថាមនុស្សគួរឈប់ព្យាយាមធ្វើដូច្នេះ។ ប៉ុន្តែ សូមកត់សម្គាល់ថា លោកយេស៊ូមិនបានផ្ដន្ទាទោសការខំព្យាយាមបែបនេះទេ។ ផ្ទុយទៅវិញ លោកបានលើកទឹកចិត្តអ្នកកាន់តាមលោក ឲ្យខំព្យាយាមក្នុងរឿងផ្សេងទៀត ហើយលោកបានដាស់តឿនពួកគេឲ្យប្រមូលអ្វីដែលមិនចេះខូច ពោលគឺ«ទ្រព្យសម្បត្ដិ . . . នៅឯស្ថានសួគ៌»។ អ្វីដែលយើងចង់បានខ្លាំងបំផុត គឺចង់ឲ្យព្រះយេហូវ៉ាចាត់ទុកថាយើងបានជោគជ័យ។ ប្រសាសន៍របស់លោកយេស៊ូរំលឹកយើងថា យើងអាចជ្រើសរើសអ្វីដែលយើងនឹងផ្ចង់អារម្មណ៍ទៅលើ។ ប៉ុន្តែ តាមការពិតយើងនឹងផ្ចង់អារម្មណ៍ទៅលើអ្វីដែលមានក្នុងចិត្តរបស់យើង និងអ្វីដែលយើងចាត់ទុកថាមានតម្លៃ។
១៦. តើយើងអាចមានទំនុកចិត្តទាំងស្រុងទៅលើអ្វី?
១៦ ប្រសិនបើយើងចង់ធ្វើឲ្យព្រះយេហូវ៉ាពេញចិត្ត យើងអាចទុកចិត្តថាលោកនឹងធ្វើយ៉ាងណាដើម្បីឲ្យយើងមានអ្វីដែលយើងត្រូវការ។ ដូចសាវ័កប៉ូលដែរ ជួនកាលយើងប្រហែលជាគ្មានអ្វីបរិភោគឬផឹកសោះ។ (១កូ. ៤:១១) ទោះជាយ៉ាងនេះក្ដី យើងអាចមានទំនុកចិត្តទាំងស្រុងទៅលើឱវាទដែលប្រកបដោយប្រាជ្ញារបស់លោកយេស៊ូដែលថា៖ «កុំខ្វល់ខ្វាយឲ្យសោះថា៖ ‹តើយើងនឹងបានអ្វីបរិភោគ?› ឬ‹តើយើងនឹងបានអ្វីផឹក?› ឬក៏‹តើយើងនឹងបានអ្វីស្លៀកពាក់?› ព្រោះរបស់ទាំងនេះជាអ្វីដែលជនជាតិដទៃកំពុងស្វះស្វែងរក។ បិតារបស់អ្នកដែលស្ថិតនៅស្ថានសួគ៌ដឹងថាអ្នកត្រូវការរបស់ទាំងនេះ។ ដូច្នេះ ចូរបន្តស្វែងរករាជាណាចក្រនិងសេចក្ដីសុចរិតរបស់ព្រះជាមុន ហើយលោកនឹងផ្ដល់របស់ទាំងនេះឲ្យអ្នក»។—ម៉ាថ. ៦:៣១-៣៣
ចូរទទួលបានជោគជ័យតាមទស្សនៈរបស់ព្រះ
១៧, ១៨. (ក) តើជោគជ័យពិតប្រាកដអាស្រ័យទៅលើអ្វី? (ខ) តើជោគជ័យពិតប្រាកដមិនអាស្រ័យទៅលើអ្វី?
១៧ ចំណុចសំខាន់ក្នុងខនេះគឺ ជោគជ័យពិតប្រាកដរបស់យើងមិនអាស្រ័យលើការសម្រេចកិច្ចការដ៏ធំឬអាស្រ័យលើឋានៈដែលយើងមានក្នុងពិភពលោកនេះទេ។ ម្យ៉ាងទៀត ជោគជ័យពិតប្រាកដក៏មិនអាស្រ័យលើការមានភារកិច្ចច្រើនក្នុងក្រុមជំនុំដែរ។ ប៉ុន្តែយើងបានពរបែបនេះ គឺដោយសារយើងស្ដាប់បង្គាប់ ហើយស្មោះត្រង់នឹងព្រះ។ លោកធានាចំពោះយើងថា៖ «អ្នកបម្រើដែលទទួលការតែងតាំងឲ្យមើលការខុសត្រូវនោះ ត្រូវតែជាអ្នកស្មោះត្រង់»។ (១កូ. ៤:២) យើងត្រូវស៊ូទ្រាំដើម្បីនៅស្មោះត្រង់នឹងព្រះ។ លោកយេស៊ូបានមានប្រសាសន៍ថា៖ «អ្នកណាដែលស៊ូទ្រាំរហូតដល់ទីបញ្ចប់ អ្នកនោះនឹងទទួលសេចក្ដីសង្គ្រោះ»។ (ម៉ាថ. ១០:២២) អ្នកក៏យល់ស្របដែរថា ការទទួលសេចក្ដីសង្គ្រោះគឺជាភ័ស្តុតាងជាក់ស្តែងនៃការមានជោគជ័យពិតប្រាកដ។
១៨ ពេលអ្នករំពឹងគិតអំពីអ្វីដែលបានរៀបរាប់ខាងលើនេះ អ្នកអាចឃើញថាភាពស្មោះត្រង់ចំពោះព្រះមិនអាស្រ័យទៅលើការមានមុខមាត់ ចំណេះដឹងខ្ពង់ខ្ពស់ មានលុយច្រើនឬមានឋានៈក្នុងសង្គមនោះទេ ហើយក៏មិនអាស្រ័យទៅលើប្រាជ្ញា ការប៉ិនប្រសប់ ឬក៏សមត្ថភាពដែរ។ ទោះជាយើងប្រហែលជាស្ថិតក្នុងស្ថានភាពណាក៏ដោយ យើងអាចរក្សាភាពស្មោះត្រង់នឹងព្រះ។ ក្នុងចំណោមរាស្ត្ររបស់ព្រះនៅសតវត្សរ៍ទី១ អ្នកខ្លះជាអ្នកមាន ហើយអ្នកខ្លះទៀតជាអ្នកក្រ។ ប៉ូលបានប្រាប់គ្រិស្តសាសនិកដែលជាអ្នកមានថា ពួកគេក៏ត្រូវ«ព្យាយាមធ្វើអំពើល្អ ហើយធ្វើជាអ្នកការល្អប្រសើរ ដោយប្រុងប្រៀបចែករំលែកជានិច្ច»ដែរ។ ទាំងអ្នកមានទាំងអ្នកក្រ អាច«ចាប់យ៉ាងជាប់នូវជីវិតដ៏ពិតប្រាកដ»។ (១ធី. ៦:១៧-១៩) សព្វថ្ងៃនេះក៏ដូច្នោះដែរ។ យើងទាំងអស់គ្នាមានឱកាសនិងភារកិច្ចដូចគ្នា។ យើងត្រូវនៅស្មោះត្រង់ ហើយ«ធ្វើជាអ្នកមានខាងការល្អប្រសើរ»។ បើយើងធ្វើដូច្នោះ ព្រះដែលជាអ្នកបង្កើតនឹងចាត់ទុកថាយើងទទួលជោគជ័យ ហើយយើងនឹងមានអំណរដោយដឹងថាយើងកំពុងធ្វើឲ្យលោកពេញចិត្ត។—សុភ. ២៧:១១
១៩. ដើម្បីទទួលជោគជ័យ តើអ្នកតាំងចិត្តធ្វើអ្វី?
១៩ អ្នកប្រហែលជាមិនអាចផ្លាស់ប្ដូរស្ថានភាពរបស់អ្នកទាំងស្រុងបានទេ តែអ្នកអាចផ្លាស់ប្ដូររបៀបដែលអ្នកប្រព្រឹត្តក្នុងស្ថានភាពនោះ។ សូមខំព្យាយាមនៅស្មោះត្រង់ទោះជាអ្នកស្ថិតក្នុងស្ថានភាពណាក៏ដោយ។ អ្នកនឹងទទួលលទ្ធផលល្អបើអ្នកខំព្យាយាម។ សូមទុកចិត្តថាព្រះយេហូវ៉ានឹងឲ្យពរដ៏វិសេសវិសាលដល់អ្នកនៅឥឡូវនេះ និងជារៀងរហូត។ សូមកុំភ្លេចពាក្យដែលលោកយេស៊ូបានមានប្រសាសន៍ទៅកាន់គ្រិស្តសាសនិកដែលបានត្រូវរើសតាំងថា៖ «ចូររក្សាសេចក្ដីស្មោះត្រង់រហូតដល់ស្លាប់ ហើយខ្ញុំនឹងឲ្យមកុដនៃជីវិត»។ (បប. ២:១០) នេះជាជោគជ័យពិតប្រាកដមែន!
[សំណួរសម្រាប់វគ្គនីមួយៗ]
[រូបភាពនៅទំព័រ៦]
មនុស្សជាច្រើនគិតថាសូលអាចទទួលជោគជ័យក្នុងពិភពលោក
[រូបភាពនៅទំព័រ៧]
ប៉ូលបានបង្ហាញថាគាត់ទទួលជោគជ័យពិតប្រាកដ