តើអ្នកចាំឬទេ?
តើអ្នកចាំឬទេ?
តើអ្នកបានអានដោយយកចិត្តទុកដាក់នូវទស្សនាវដ្ដីប៉មយាមលេខថ្មីៗឬទេ? សូមសាកឆ្លើយសំណួរជាបន្តបន្ទាប់នេះ:
តើតាមរបៀបណាយើងអាចទប់ស្កាត់បញ្ហាដែលបណ្ដាលមកពីការមិនចេះគ្រប់គ្រងពាក្យសម្ដី?
យើងគួរពិនិត្យមើលចិត្តរបស់យើង។ ជាជាងរិះគន់បងប្អូនម្នាក់ យើងគួរពិចារណាអំពីចិត្តគំនិតរបស់យើង ហើយរកឲ្យឃើញនូវមូលហេតុដែលយើងរិះគន់គាត់។ តើយើងប្រហែលជារិះគន់គាត់ដើម្បីឲ្យគេគិតថាយើងប្រសើរជាងគាត់ឬទេ? ម្យ៉ាងទៀត ការរិះគន់អ្នកឯទៀតអាចនាំឲ្យស្ថានភាពកាន់តែតឹងតែង។—១៥/៨ ទំព័រ២១
តើច្បាប់ដែលព្រះយេហូវ៉ាបានឲ្យជនជាតិអ៊ីស្រាអែលបង្ហាញថាលោកមានទស្សនៈយ៉ាងណាចំពោះស្ត្រី?
ស្ត្រីជនជាតិអ៊ីស្រាអែលមានសេរីភាពជាច្រើន ហើយពួកគេមានសិទ្ធិទទួលការអប់រំ។ ច្បាប់របស់ព្រះតម្រូវឲ្យគោរព និងផ្ដល់កិត្ដិយសដល់ស្ត្រី ថែមទាំងការពារសិទ្ធិរបស់ពួកគេផងដែរ។—១/៩ ទំព័រ៥-៧ ជាភាសាអង់គ្លេស
តើនឹងមានអ្វីកើតឡើងមុននឹងទីបញ្ចប់មកដល់?
នឹងមានការប្រកាសថា៖ «មានសន្ដិភាពនិងសន្ដិសុខហើយ!»។ ប្រជាជាតិនានានឹងវាយប្រហារ ហើយបំផ្លាញបាប៊ីឡូនដ៏ខ្លាំងក្លា។ បន្ទាប់មក ពួកគេនឹងវាយប្រហារទៅលើរាស្ត្ររបស់ព្រះ។ សង្គ្រាមហាម៉ាគេដូននឹងផ្ទុះឡើង ហើយក្រោយមក សាថាននិងពួកវិញ្ញាណកំណាចរបស់វានឹងត្រូវបោះទៅក្នុងទីជ្រៅបំផុត។—១៥/៩ ទំព័រ៤
តើយើងទទួលប្រយោជន៍អ្វីខ្លះពីការមិនដឹងអំពីពេលដែលទីបញ្ចប់នឹងមកដល់?
ការមិនដឹងថ្ងៃឬម៉ោងជាក់លាក់អនុញ្ញាតឲ្យយើងបង្ហាញពីអ្វីដែលមានក្នុងចិត្តរបស់យើង។ នេះក៏ផ្ដល់ឱកាសឲ្យយើងធ្វើឲ្យព្រះយេហូវ៉ាសប្បាយចិត្តដែរ។ នេះលើកទឹកចិត្តយើងកុំឲ្យគិតតែពីប្រយោជន៍ផ្ទាល់ខ្លួន និងជួយយើងឲ្យទុកចិត្តព្រះនិងបណ្ដាំរបស់លោកកាន់តែខ្លាំង។ ម្យ៉ាងទៀត នេះអនុញ្ញាតឲ្យទុក្ខលំបាកដែលយើងជួបនាពេលបច្ចុប្បន្នសម្រិតសម្រាំងយើង។—១៥/៩ ទំព័រ២៤-២៥
តើតាមរបៀបណាយើងអាចប្រើបទគម្ពីរនៅសៀវភៅលោកុប្បត្តិ ៣:១៩ ដើម្បីវែកញែកជាមួយបុគ្គលម្នាក់ដែលជឿអំពីភ្លើងនរក?
ខនេះរៀបរាប់ថាពេលអ័ដាមស្លាប់ គាត់នឹងត្រឡប់ទៅជាធូលីដីវិញ មិនមែនទៅនរកដែលមានភ្លើងឆេះនោះទេ។—១/១០ ទំព័រ១៣ ជាភាសាអង់គ្លេស
តើអ្នកណាជាតំណាង«ផ្កាយប្រាំពីរ»ក្នុងដៃស្ដាំរបស់លោកយេស៊ូដែលបានរៀបរាប់នៅសៀវភៅការបើកបង្ហាញ ១:១៦, ២០?
ផ្កាយទាំងនេះជាតំណាងអ្នកត្រួតពិនិត្យដែលបានត្រូវរើសតាំងដោយសកម្មពលរបស់ព្រះ ហើយនេះក៏រួមបញ្ចូលអ្នកត្រួតពិនិត្យទាំងអស់ក្នុងក្រុមជំនុំផងដែរ។—១៥/១០ ទំព័រ១៤
តើប្ដីនិងប្រពន្ធអាចធ្វើយ៉ាងណាពេលដែលពួកគេជំពាក់បំណុល?
គូអាពាហ៍ពិពាហ៍គួរពិភាក្សាគ្នាដោយត្រង់ៗ និងដោយចិត្តស្ងប់អំពីបំណុលរបស់ពួកគេ។ បើពួកគេពិចារណាអំពីចំណូលនឹងចំណាយរបស់ខ្លួន នេះនឹងជួយពួកគេ។ តើពួកគេអាចបង្កើនចំណូលឬក៏បន្ថយចំណាយក្នុងគ្រួសារបានឬទេ? ពួកគេគួរសម្រេចចិត្តថាបំណុលណាខ្លះដែលពួកគេគួរព្យាយាមសងជាមុនសិន ប្រហែលជាដោយពិគ្រោះគ្នាជាមួយម្ចាស់បំណុលរបស់ពួកគេអំពីការសងបំណុល។ ប៉ុន្តែ ពួកគួរទទួលស្គាល់ការពិតអំពីស្ថានភាពរបស់ខ្លួន ហើយមានទស្សនៈត្រឹមត្រូវអំពីលុយ។ (១ធី. ៦:៨)—១/១១ ទំព័រ១៩-២១ ជាភាសាអង់គ្លេស
ដូចសៀវភៅអេសាយ ៥០:៤, ៥បានរៀបរាប់ តើលោកយេស៊ូបានបង្ហាញចិត្តរាបទាបយ៉ាងដូចម្ដេច?
ខទាំងនោះរៀបរាប់ថា អ្នកដែល«មានវោហារដូចជាអ្នកដែលបានរៀនសូត្រ» នឹងមិន«បែរក្រោយឡើយ»។ លោកយេស៊ូបានបង្ហាញចិត្តរាបទាប ដោយយកចិត្តទុកដាក់យ៉ាងខ្លាំងចំពោះអ្វីដែលបិតាលោកបានបង្រៀនលោក។ លោកយេស៊ូចង់រៀនយ៉ាងខ្លាំងពីព្រះយេហូវ៉ា ហើយលោកសង្កេតមើលយ៉ាងដិតដល់នូវគំរូរបស់ព្រះយេហូវ៉ាស្តីអំពីចិត្តរាបទាប ពេលលោកបង្ហាញសេចក្ដីមេត្ដាករុណាចំពោះមនុស្សជាតិដែលមានភាពខុសឆ្គង។—១៥/១១ ទំព័រ១១
តើតែមប្រៃសណីយ៍សម្រាប់ជាការរំលឹក បញ្ជាក់អំពីចិត្តស្មោះគ្រប់លក្ខណៈរបស់សាក្សីព្រះយេហូវ៉ាយ៉ាងដូចម្ដេច?
នៅឆ្នាំ២០០៧ មន្ទីរប្រៃសណីយ៍ជាតិបានចេញតែមមួយដែលលើកបញ្ជាក់អំពីការប្រល័យពូជសាសន៍ក្នុងរបបស្ដាលីន នៅប្រទេសអេស្តូនី។ តែមនោះមានលេខ៣៨២ ដែលសំដៅទៅលើចំនួននៃសាក្សីព្រះយេហូវ៉ានិងកូនរបស់ពួកគេដែលបានត្រូវនិរទេសនៅឆ្នាំ១៩៥១ ទៅជំរំឃុំឃាំងនៅប្រទេសរុស្ស៊ី ដែលនៅឆ្ងាយពីផ្ទះរបស់ពួកគេនៅប្រទេសអេស្តូនី។—១/១២ ទំព័រ២៧-២៨ ជាភាសាអង់គ្លេស