ទស្សនាវដ្ដីប៉មយាមស្រួលយល់ ហេតុអ្វីមានទស្សនាវដ្ដីនេះ?
ទស្សនាវដ្ដីប៉មយាមស្រួលយល់ ហេតុអ្វីមានទស្សនាវដ្ដីនេះ?
អស់ជាច្រើនទសវត្សរ៍មកហើយ បុរសនិងស្ត្រីជុំវិញពិភពលោកចូលចិត្តទស្សនាវដ្ដីប៉មយាម ហើយពួកគេបានទទួលប្រយោជន៍ពីព័ត៌មានដែលមានមូលដ្ឋានលើគម្ពីរដែលបានត្រូវបោះពុម្ពផ្សាយក្នុងទស្សនាវដ្ដីនេះ។ នៅខែកក្កដា ឆ្នាំ២០១១ ទស្សនាវដ្ដីប៉មយាមស្រួលយល់លេខទី១ បានត្រូវបោះពុម្ពផ្សាយជាភាសាអង់គ្លេស។ ទស្សនាវដ្ដីលេខទី១នេះពន្យល់ថា៖ «យើងសាកល្បងបោះពុម្ពផ្សាយទស្សនាវដ្ដីថ្មីនេះក្នុងរយៈពេលមួយឆ្នាំសិន ប្រសិនបើមានប្រយោជន៍ យើងនឹងបន្តបោះពុម្ពតទៅទៀត»។
ឥឡូវនេះយើងមានសេចក្ដីរីករាយប្រកាសថា យើងបានសម្រេចចិត្តបន្តបោះពុម្ពទស្សនាវដ្ដីនេះ។ ក្រោយមក ទស្សនាវដ្ដីប៉មយាមស្រួលយល់នឹងមានជាភាសាបារាំង ព័រទុយហ្គាល់ និងអេស្ប៉ាញ។
មូលហេតុដែលបងប្អូនចូលចិត្ត
ក្រោយពីបានទទួលទស្សនាវដ្ដីប៉មយាមស្រួលយល់នេះ បងប្អូនមួយចំនួននៅតំបន់ប៉ាស៊ីហ្វិកខាងត្បូងបានប្រាប់ថា៖ «ឥឡូវបងប្អូនយើងពិតជាអាចយល់អត្ថន័យក្នុងទស្សនាវដ្ដីប៉មយាមទាំងស្រុងបាន»។ បងស្រីម្នាក់ពីប្រទេសផ្សេងទៀតបានសរសេរថា ពីមុនគាត់និងក្រុមគ្រួសាររបស់គាត់តែងតែចំណាយពេលជាច្រើនដើម្បីបើកមើលអត្ថន័យនៃពាក្យក្នុងវចនានុក្រម និងដើម្បីពន្យល់ឃ្លាក្នុងអត្ថបទសម្រាប់សិក្សា។ ប៉ុន្តែឥឡូវពួកគេប្រើពេលទាំងនេះដើម្បីយល់បទគម្ពីរដែលបានដកស្រង់និងមូលហេតុដែលគេប្រើបទគម្ពីរទាំងនេះក្នុងអត្ថបទ។
បងស្រីម្នាក់ដែលបានសិក្សានៅមហាវិទ្យាល័យនៅសហរដ្ឋអាម៉េរិកបាននិយាយថា អស់រយៈពេល១៨ឆ្នាំ គាត់បាននិយាយនិងសរសេរតាមរបៀបដែលមានតែមនុស្សដែលបានរៀននៅមហាវិទ្យាល័យប៉ុណ្ណោះទើបអាចយល់បាន។ គាត់បាននិយាយថា៖ «ខ្ញុំបានចាប់ផ្ដើមមានទម្លាប់និយាយនិងគិតតាមរបៀបស្មុគស្មាញដែលមិនចាំបាច់។ ខ្ញុំបានដឹងថាខ្ញុំត្រូវកែប្រែយ៉ាងខ្លាំងនូវរបៀបដែលខ្ញុំគិតនិងនិយាយ»។ ឥឡូវនេះជាអ្នកផ្សព្វផ្សាយដំណឹងល្អដ៏មានប្រសិទ្ធភាពម្នាក់ គាត់សរសេរថា «ទស្សនាវដ្ដីប៉មយាមស្រួលយល់បានជួយខ្ញុំយ៉ាងច្រើន។ របៀបដែលគេសរសេរក្នុងទស្សនាវដ្ដីនេះ ជាគំរូល្អសម្រាប់ខ្ញុំស្តីអំពីរបៀបនិយាយដែលស្រួលយល់»។
បងស្រីម្នាក់នៅប្រទេសអង់គ្លេសដែលបានទទួលការជ្រមុជទឹកនៅឆ្នាំ១៩៧២ បានសរសេរអំពីទស្សនាវដ្ដីប៉មយាមស្រួលយល់ថា «ពេលខ្ញុំអានទស្សនាវដ្ដីនេះលេខទី១ ខ្ញុំមានអារម្មណ៍ហាក់ដូចជាព្រះយេហូវ៉ាកំពុងអង្គុយជិតខ្ញុំ ដោយកៀកស្មាខ្ញុំ ហើយយើងបានអានទស្សនាវដ្ដីនេះជាមួយគ្នា។ នេះគឺហាក់ដូចជាឪពុកម្នាក់អានសៀវភៅរឿងឲ្យកូនស្ដាប់មុនពេលកូនចូលគេង»។
បងស្រីម្នាក់ដែលបម្រើនៅបេតអែលនៅសហរដ្ឋអាម៉េរិកដែលបានទទួលការជ្រមុជទឹកជាង៤០ឆ្នាំមុន បាននិយាយថាទស្សនាវដ្ដីប៉មយាមស្រួលយល់ បានជួយគាត់ឲ្យយល់អំពីគម្ពីរច្បាស់ជាង។ គាត់បាននិយាយអំពីកិច្ចប្រជុំរៀងរាល់សប្ដាហ៍ថា៖ «ទោះជាក្មេងម្នាក់អានចម្លើយពីទស្សនាវដ្ដីប៉មយាមស្រួលយល់ក៏ដោយ ពាក្យក្នុងទស្សនាវដ្ដីនេះគឺខុសគ្នាពីពាក្យក្នុងទស្សនាវដ្ដីប៉មយាមធម្មតា។ ដូច្នេះ ចម្លើយរបស់គាត់ធ្វើឲ្យអ្នកស្ដាប់ចាប់អារម្មណ៍»។
បងស្រីម្នាក់ទៀតដែលបម្រើនៅបេតអែលបានសរសេរថា៖ «ខ្ញុំទន្ទឹងរង់ចាំស្ដាប់ចម្លើយរបស់ប្អូនតូចៗក្នុងក្រុមជំនុំ។ ទស្សនាវដ្ដីប៉មយាមស្រួលយល់បានជួយពួកគេឲ្យឆ្លើយចម្លើយដោយបង្ហាញការជឿជាក់។ ចម្លើយរបស់ពួកគេបានលើកទឹកចិត្តខ្ញុំ»។
បងស្រីម្នាក់ដែលបានទទួលការជ្រមុជទឹកនៅឆ្នាំ១៩៨៤ បានប្រាប់អំពីតម្លៃដែលទស្សនាវដ្ដីប៉មយាមស្រួលយល់មានចំពោះគាត់ ដោយនិយាយថា៖ «ខ្ញុំមានអារម្មណ៍ថាទស្សនាវដ្ដីនេះបានត្រូវសរសេរសម្រាប់ខ្ញុំ។ ទស្សនាវដ្ដីនេះស្រួលយល់មែនពេលខ្ញុំអាន។ ឥឡូវនេះខ្ញុំមានទំនុកចិត្តថា ខ្ញុំអាចឆ្លើយក្នុងអំឡុងការសិក្សាទស្សនាវដ្ដីប៉មយាម»។
ទស្សនាវដ្ដីដែលជាទីពេញចិត្តរបស់ឪពុកម្ដាយ
ម្ដាយម្នាក់ដែលមានកូនប្រុសអាយុ៧ឆ្នាំបាននិយាយថា ពីមុនការរៀបចំការសិក្សាទស្សនាវដ្ដីប៉មយាម ជាមួយកូនតែងតែជាការនឿយហត់ ដោយសារគាត់ត្រូវចំណាយពេលច្រើនដើម្បីពន្យល់ឃ្លាផ្សេងៗដល់កូន។ តើទស្សនាវដ្ដីប៉មយាមស្រួលយល់បានជួយគាត់យ៉ាងណា? គាត់បានសរសេរថា៖ «ខ្ញុំភ្ញាក់ផ្អើលពេលឃើញថាកូនខ្ញុំអាចអានវគ្គនិងអាចយល់អត្ថន័យ។ ដោយសារពាក្យមិនសូវពិបាក ហើយឃ្លាគឺខ្លីជាងមុង គាត់មិនភ័យទេ។ គាត់បានចាប់ផ្ដើមរៀបចំចម្លើយសម្រាប់កិច្ចប្រជុំដោយខ្លួនគាត់ ហើយគាត់ប្រមូលអារម្មណ៍ទៅលើអត្ថបទក្នុងអំឡុងការសិក្សាទស្សនាវដ្ដី»។
ម្ដាយម្នាក់ដែលមានកូនស្រីម្នាក់អាយុ៩ឆ្នាំបានសរសេរថា «ពីមុនយើងត្រូវជួយកូនរៀបចំចម្លើយ។ ឥឡូវនេះគាត់រៀបចំដោយខ្លួនគាត់។ កម្រណាស់ដែលយើងត្រូវចំណាយពេលពន្យល់ព័ត៌មានក្នុងទស្សនាវដ្ដី ដោយសារគាត់អាចយល់បាន។ ឥឡូវនេះគាត់កាន់តែចូលចិត្តសិក្សាទស្សនាវដ្ដីប៉មយាម»។
តើប្អូនៗវ័យក្មេងមានអារម្មណ៍យ៉ាងណា?
ប្អូនៗវ័យក្មេងជាច្រើននាក់មានអារម្មណ៍ថាទស្សនាវដ្ដីប៉មយាមស្រួលយល់បានត្រូវរៀបចំឡើងជាពិសេសសម្រាប់ពួកគេ។ ប្អូនស្រីរេបិកាដែលមានអាយុ១២ឆ្នាំមានសំណូមពរថា «សូមបន្តបោះពុម្ពទស្សនាវដ្ដីប៉មយាមស្រួលយល់តទៅទៀត!»។ នាងបានបន្ថែមថា៖ «ខ្ញុំចូលចិត្តផ្នែកដែលមានចំណងជើងថា ‹ការពន្យល់ពាក្យខ្លះ›។ ផ្នែកនេះគឺស្រួលយល់ណាស់សម្រាប់ក្មេងៗ»។
ប្អូនស្រីម្នាក់ឈ្មោះនីកូឡេតដែលមានអាយុ៧ឆ្នាំមានអារម្មណ៍ស្រដៀងគ្នាថា «ពីមុនខ្ញុំពិបាកយល់ទស្សនាវដ្ដីប៉មយាម។ ឥឡូវខ្ញុំអាចឆ្លើយច្រើនជាងដោយខ្លួនខ្ញុំ»។ ប្អូនស្រីអេមម៉ាដែលមានអាយុ៩ឆ្នាំបានសរសេរថា «ទស្សនាវដ្ដីនេះបានជួយខ្ញុំនិងប្អូនប្រុសខ្ញុំអាយុ៦ឆ្នាំច្រើនណាស់។ យើងអាចយល់បានច្រើនជាងពីមុន! សូមអរគុណ!»។
មនុស្សជាច្រើនទទួលប្រយោជន៍ពីទស្សនាវដ្ដីប៉មយាម ដែលប្រើពាក្យនិងឃ្លាដែលពួកគាត់ស្រួលយល់។ ទស្សនាវដ្ដីប៉មយាមស្រួលយល់នេះបានជួយមនុស្សជាច្រើនឲ្យយល់បទគម្ពីរច្បាស់ជាង ហើយនឹងបន្តបោះពុម្ពជាមួយនឹងទស្សនាវដ្ដីប៉មយាមធម្មតាដែលបានជួយមនុស្សជាច្រើនតាំងពីឆ្នាំ១៨៧៩មក។
[ឃ្លាអក្សរធំនៅទំព័រ៣០]
ពេលវេលាដែលពីមុនចំណាយដើម្បីបើកមើលអត្ថន័យនៃពាក្យក្នុងវចនានុក្រម ឥឡូវអាចប្រើដើម្បីយល់បទគម្ពីរដែលបានដកស្រង់និងមូលហេតុដែលគេប្រើបទគម្ពីរទាំងនេះក្នុងអត្ថបទ
[ឃ្លាអក្សរធំនៅទំព័រ៣១]
«ខ្ញុំភ្ញាក់ផ្អើលពេលឃើញថាកូនខ្ញុំអាចអានវគ្គនិងអាចយល់អត្ថន័យ»
