ល្ខោនដែល«មិនអាចបំភ្លេចបាន»បានមកទាន់ពេល
អនុស្សាវរីយ៍ពីសម័យមុន
ល្ខោនដែល«មិនអាចបំភ្លេចបាន»បានមកទាន់ពេល
មនុស្សជាច្រើនបានរៀបរាប់អំពី«ល្ខោននៃការបង្កើត»ថា ល្ខោននេះគឺល្អមើល«មិនអាចបំភ្លេចបាន»ឡើយ! ល្ខោននេះគឺបានមកទាន់ពេល ហើយមនុស្សមិនអាចបំភ្លេចបានទេក្រោយពីពួកគេបានមើលល្ខោននេះ។ «ល្ខោននៃការបង្កើត»ពិតជាបានជួយលើកតម្កើងនាមរបស់ព្រះយេហូវ៉ាយ៉ាងខ្លាំង មុននឹងរបបគ្រប់គ្រងរបស់ហ៊ីត្លែ បានចាប់ផ្ដើមបៀតបៀនរាស្ត្ររបស់ព្រះនៅទ្វីបអឺរ៉ុបយ៉ាងសាហាវ។ ប៉ុន្តែតើ«ល្ខោននៃការបង្កើត»ជាអ្វី?
នៅឆ្នាំ១៩១៤ មន្ទីរចាត់ការពិភពលោកនៃសាក្សីព្រះយេហូវ៉ានៅក្រុងប៊្រុគ្លីន រដ្ឋញូវយ៉ក សហរដ្ឋអាម៉េរិក បានចេញបញ្ចាំង«ល្ខោនរូបភាពនៃការបង្កើត»។ គឺជាការបញ្ចាំងរូបភាពនិងខ្សែភាពយន្តដែលមានពណ៌និងសំឡេងអស់រយៈពេញ៨ម៉ោង។ មនុស្សរាប់លាននាក់ជុំវិញពិភពលោកបានមើល«ល្ខោនរូបភាព»នេះ។ ល្ខោនរូបភាពដែលមានរយៈពេលខ្លីជាង ដែលមានចំណងជើងថា «ល្ខោនយូរីកា» ក៏បានត្រូវចេញបញ្ចាំងនៅឆ្នាំ១៩១៤ដែរ។ ប៉ុន្តែនៅទសវត្សរ៍ឆ្នាំ១៩២០ ហ្វីលរូបភាព ហ្វីលកុននិងឧបករណ៍សម្រាប់បញ្ចាំងល្ខោនបានចាស់រេចរឹលយ៉ាងខ្លាំង។ ប៉ុន្តែមនុស្សជាច្រើនចង់មើល«ល្ខោនរូបភាព»។ ជាឧទាហរណ៍បណ្ដាជននៅក្រុងលូដវិចស្បឺក ប្រទេសអាឡឺម៉ង់ បានសួរថា៖ «តើពេលណាគេបញ្ចាំង‹ល្ខោនរូបភាព›ម្ដងទៀត?»។ តើអង្គការយើងត្រូវធ្វើយ៉ាងណា?
ដើម្បីបំពេញតម្រូវការឲ្យមានការបញ្ចាំងល្ខោននេះថែមទៀត នៅទសវត្សរ៍ឆ្នាំ១៩២០ អ្នកតំណាងម្នាក់របស់ក្រុមគ្រួសារបេតអែលនៅក្រុងម៉ាកដឺបឺក ប្រទេសអាឡឺម៉ង់បានទិញហ្វីលពីក្រុមហ៊ុនខាងព័ត៌មានមួយនៅក្រុងប៉ារីស ប្រទេសបារាំង ហើយបានទិញហ្វីលរូបភាពពីក្រុមហ៊ុនខាងគូររូបភាពនៅក្រុងឡែបស៊ីកនិងក្រុងដ្រេសដេន។ ហ្វីលទាំងនេះបានត្រូវដាក់បញ្ចូលគ្នានឹងហ្វីល«ល្ខោនរូបភាព»ចាស់ដែលនៅតែអាចប្រើការបាន។
បងប្រុសអេរិច ហ្វ្រូសដែលជាតន្ត្រីករដែលមានទេពកោសល្យ បានតែងបទភ្លេងដើម្បីលេងអមនឹងការបញ្ចាំងភាពយន្តនិងការបញ្ចាំងរូបភាព។ សេចក្ដីអធិប្បាយក្នុងភាពយន្តនោះបានត្រូវដកស្រង់ចេញពីសៀវភៅរបស់យើងដែលមានចំណងជើងថា «ការបង្កើត» (Creation)។ នេះជាមូលហេតុដែល«ល្ខោនរូបភាព»បានត្រូវដាក់ចំណងជើងថ្មីថា «ល្ខោននៃការបង្កើត» (Creation Drama)។
ល្ខោនថ្មីនេះមានរយៈពេលដូចគ្នានឹង«ល្ខោនរូបភាព»ដែរ ពោលគឺ៨ម៉ោង ហើយបានត្រូវបញ្ចាំងមួយល្ងាចមួយភាគ ជាបន្តបន្ទាប់គ្នា។ ល្ខោននេះបានបង្ហាញយ៉ាងល្អិតល្អន់អំពីថ្ងៃនីមួយៗនៃការបង្កើត បានពិចារណាប្រវត្ដិសាស្ត្រគម្ពីរនិងប្រវត្ដិសាស្ត្រដែលមិនទាក់ទងនឹងសាសនា ហើយបញ្ជាក់ថា សាសនាមិនពិតបានធ្វើឲ្យមនុស្សជាតិខកចិត្ត។ «ល្ខោននៃការបង្កើត»បានត្រូវបញ្ចាំងនៅប្រទេសអូទ្រីស អាឡឺម៉ង់ លុចសំបួ ស្វីស ហើយបានបញ្ចាំងសម្រាប់អ្នកទស្សនាដែលនិយាយភាសាអាឡឺម៉ង់នៅកន្លែងឯទៀត។
បងអេរិច ហ្វ្រូសបានពន្យល់ថា៖ «នៅពេលបញ្ចាំងល្ខោននេះ ខ្ញុំបានលើកទឹកចិត្តអ្នករួមការងារជាមួយខ្ញុំ ជាពិសេសអ្នកប្រគំតន្ត្រីឲ្យប្រើពេលផ្អាកបញ្ចាំងដើម្បីទៅពីជួរមួយទៅជួរមួយដើម្បីស្នើផ្ដល់សៀវភៅនិងកូនសៀវភៅដ៏ល្អអស្ចារ្យរបស់យើងដល់ទស្សនិកជន។ ដោយធ្វើដូច្នេះ យើងបានជូនសៀវភៅច្រើនជាងពេលយើងទៅផ្សព្វផ្សាយពីផ្ទះមួយទៅផ្ទះមួយទៅទៀត»។ បងប្រុសយ៉ូហានឺស រ៉តឺ ដែលបានរៀបចំការបញ្ចាំងល្ខោននៅប្រទេសប៉ូឡូញនិងនៅប្រទេសដែលសព្វថ្ងៃនេះហៅថាសាធារណរដ្ឋឆេកូ ចាំថា មនុស្សជាច្រើននាក់ដែលបានចូលរួមទស្សនាបានឲ្យយើងនូវអាសយដ្ឋានរបស់ពួកគេដើម្បីឲ្យយើងអាចត្រឡប់ទៅជួបពួកគេវិញ។ អាសយដ្ឋានទាំងនោះបានជួយយើងឲ្យមានការត្រឡប់ទៅជួបដែលបានលទ្ធផលល្អ។
នៅទសវត្សរ៍ឆ្នាំ១៩៣០ រាល់ការបញ្ចាំង«ល្ខោននៃការបង្កើត»តែងតែមានអ្នកទស្សនាពេញរោងល្ខោន ហើយមនុស្សគ្រប់រូបនៅក្រុងនោះបាននិយាយអំពីសាក្សីព្រះយេហូវ៉ា។ នៅឆ្នាំ១៩៣៣ មនុស្សជិតមួយលាននាក់បានមកចូលរួមទស្សនាការបញ្ចាំងដែលបានរៀបចំឡើងដោយការិយាល័យសាខារបស់យើងនៅប្រទេសអាឡឺម៉ង់។ ខាទឺ ក្រោសនឹកចាំថា៖ «ដើម្បីមកមើលល្ខោននេះដែលបញ្ចាំងប្រាំថ្ងៃ ក្នុងមួយថ្ងៃទាំងទៅទាំងមកយើងបានដើរអស់២០គីឡូម៉ែត្រ (១២ម៉ៃល៍) ឆ្លងកាត់ព្រៃ ឡើងចុះភ្នំនិងជ្រលងភ្នំជាច្រើន»។ អេលហ្សឺ បៀលហាសនិយាយថា៖ «‹ល្ខោននៃការបង្កើត›បាននាំឲ្យខ្ញុំស្រឡាញ់សេចក្ដីពិត»។
អាលហ្វ្រេត អាលម៉េនឌិនងឺរៀបរាប់ថា ពេលដែលម្ដាយរបស់គាត់បានមើលការបញ្ចាំងល្ខោននេះ គាត់«បានរំភើបចិត្តខ្លាំងដល់ម្ល៉េះបានជាគាត់បានទិញគម្ពីរមួយ ហើយបើករកមើលពាក្យ‹ស្ថានមួយដែលមិនមែនជាស្ថានសួគ៌ ហើយក៏មិនមែនជាស្ថាននរក›»។ ដោយសារគាត់មិនអាចរកពាក្យនោះឃើញក្នុងគម្ពីរ គាត់បានឈប់ទៅវិហារ ហើយបានទទួលការជ្រមុជទឹក។ បងអេរិច ហ្វ្រូសបាននឹកចាំថា៖ «មនុស្សជាច្រើនរាប់មិនអស់បានចូលមកក្នុងសេចក្ដីពិតតាមរយៈ‹ល្ខោននៃការបង្កើត›»។—៣យ៉ូន. ១-៣
ពេលដែលមនុស្សកាន់តែច្រើនបានមើល«ល្ខោននៃការបង្កើត» ដំណាលគ្នានោះគណបក្សណាត្ស៊ីបានទទួលការគាំទ្រកាន់តែច្រើននៅទ្វីបអឺរ៉ុប ហើយបានបង្កឲ្យមានបញ្ហា។ នៅដើមឆ្នាំ១៩៣៣ សកម្មភាពរបស់សាក្សីព្រះយេហូវ៉ានៅប្រទេសអាឡឺម៉ង់បានត្រូវហាមឃាត់។ តាំងពីពេលនោះរហូតដល់សង្គ្រាមលោកលើកទី២បានបញ្ចប់នៅឆ្នាំ១៩៤៥ អ្នកបម្រើរបស់ព្រះយេហូវ៉ានៅទ្វីបអឺរ៉ុបបានទទួលរងការបៀតបៀនយ៉ាងខ្លាំង។ បងអេរិច ហ្វ្រូសបានជាប់គុកប្រហែលជា៨ឆ្នាំ។ ប៉ុន្តែគាត់អាចរួចជីវិត ហើយក្រោយមកបម្រើនៅបេតអែលនៅក្រុងវីសបាដិន ប្រទេសអាឡឺម៉ង់។ ជាការល្អប្រសើរណាស់ដែល«ល្ខោននៃការបង្កើត»បានមកទាន់ពេលដើម្បីពង្រឹងចិត្តក្លាហានរបស់គ្រិស្តសាសនិកជាច្រើននាក់ ពេលដែលជំនឿរបស់ពួកគេហៀបនឹងត្រូវល្បងលក្នុងអំឡុងសង្គ្រាមលោកលើកទី២! (ដកស្រង់ចេញពីអនុស្សាវរីយ៍ពីសម័យមុននៅប្រទេសអាឡឺម៉ង់)។
[រូបភាពនៅទំព័រ៣១]
រូបនេះផ្សាយអំពី«ល្ខោននៃការបង្កើត»នៅឆ្នាំ១៩៣២
[រូបភាពនៅទំព័រ៣១]
ល្ខោនថ្មីនេះយកឈ្មោះតាមសៀវភៅការបង្កើត (Schöpfung)
[រូបភាពនៅទំព័រ៣២]
បងអេរិច ហ្វ្រូសនិងអក្សរភ្លេងរបស់គាត់សម្រាប់«ល្ខោននៃការបង្កើត»
[រូបភាពនៅទំព័រ៣២]
លោកអ្នកក៏ប្រហែលជាចូលចិត្តដែរ
ទស្សនាវដ្ដី
ខ្សែភាពយន្ដសម័យមុនអំពីជំនឿដែលមានចំណាស់១០០ឆ្នាំ
ឆ្នាំនេះគឺជាខួប១០០ឆ្នាំនៃការចេញលើកដំបូងនៃ«ល្ខោនរូបភាពនៃការបង្កើត» ជាខ្សែភាពយន្ដមួយដែលបានត្រូវបង្កើតឡើងដើម្បីពង្រឹងជំនឿទៅលើគម្ពីរជាបណ្ដាំរបស់ព្រះ។
