គ្មានមូលហេតុឲ្យយើងខ្វល់ខ្វាយហួសហេតុពេក អំពីកន្លែងដែលបុគ្គលដែលបានត្រូវបណ្ដាច់មិត្ដភាពអង្គុយនៅសាលប្រជុំឡើយ។ ទស្សនាវដ្ដីនេះខំប្រឹងលើកទឹកចិត្ដឪពុកម្ដាយដែលជាគ្រិស្ដសាសនិកឲ្យជួយកូនដែលបានត្រូវបណ្ដាច់មិត្ដភាព ដែលនៅតែរស់នៅជាមួយពួកគាត់ ឲ្យមានចំណងមិត្ដភាពជាមួយព្រះ ប្រសិនបើសមធ្វើដូច្នេះ។ ដូចបានបញ្ជាក់នៅទស្សនាវដ្ដីប៉មយាម ថ្ងៃទី១ ខែមករា ឆ្នាំ២០០២ ទំព័រ១៥-១៧ ឪពុកម្ដាយថែមទាំងអាចសិក្សាគម្ពីរជាមួយកូនមិនទាន់គ្រប់អាយុ ដែលបានត្រូវបណ្ដាច់មិត្ដភាព ដែលបន្ដរស់នៅជាមួយពួកគាត់។ យើងសង្ឃឹមថាកូននោះនឹងទទួលការលើកទឹកចិត្ដដែលគាត់ត្រូវការដើម្បីកែប្រែការប្រព្រឹត្ដរបស់គាត់។

បើនិយាយអំពីការរៀបចំកន្លែងអង្គុយនៅសាលប្រជុំ តាមមើលទៅជាការសមហេតុផលដែលកូនដែលបានត្រូវបណ្ដាច់មិត្ដភាព ដែលមិនទាន់គ្រប់អាយុអាចអង្គុយយ៉ាងស្ងៀមស្ងាត់ជាមួយឪពុកម្ដាយរបស់គាត់។ ដោយសារមិនចាំបាច់ឲ្យបុគ្គលដែលបានត្រូវបណ្ដាច់មិត្ដភាពអង្គុយនៅខាងក្រោយគេនៅសាលប្រជុំ នោះមិនជាការខុសទេដែលកូនដែលបានត្រូវបណ្ដាច់មិត្ដភាពអង្គុយជិតឪពុកម្ដាយរបស់គាត់នៅកន្លែងណាដែលពួកគាត់អង្គុយ។ កាលដែលឪពុកម្ដាយយកចិត្ដទុកដាក់ចំពោះចំណងមិត្ដភាពរវាងកូននិងព្រះ ពួកគាត់ប្រាកដជាចង់ឲ្យកូនទទួលប្រយោជន៍ពីកិច្ចប្រជុំ។ ស្ដីអំពីរឿងនេះ ប្រហែលជាការល្អដែលឪពុកម្ដាយឲ្យកូនអង្គុយជាមួយពួកគាត់ ជាជាងទុកកូនចោលឲ្យអង្គុយនៅកន្លែងផ្សេង។

ប៉ុន្ដែចុះយ៉ាងណាបើកូនដែលបានត្រូវបណ្ដាច់មិត្ដភាពមិនរស់នៅជាមួយឪពុកម្ដាយ? តើនេះមានន័យថាគាត់មិនអាចអង្គុយជិតឪពុកម្ដាយរបស់គាត់ឬ? ពីមុនសៀវភៅរបស់យើងបានចែងយ៉ាងច្បាស់អំពីទស្សនៈត្រឹមត្រូវដែលគ្រិស្ដសាសនិកម្នាក់គួរព្យាយាមរក្សា ស្ដីអំពីការសេពគប់ជាមួយសមាជិកក្រុមគ្រួសារដែលបានត្រូវបណ្ដាច់មិត្ដភាព ដែលមិនរស់នៅជាមួយពួកគាត់។ * ប៉ុន្ដែ ករណីដែលបុគ្គលដែលបានត្រូវបណ្ដាច់មិត្ដភាព អង្គុយជិតសមាជិកក្រុមគ្រួសាររបស់គាត់ដោយស្ងៀមស្ងាត់ក្នុងអំឡុងពេលប្រជុំ គឺខុសគ្នាឆ្ងាយណាស់ពីករណីដែលសាច់ញាតិរបស់បុគ្គលនោះខំរករកឱកាសសេពគប់ជាមួយគាត់ដោយគ្មានការចាំបាច់។ ប្រសិនបើសមាជិកស្មោះត្រង់នៃក្រុមគ្រួសារនោះមានទស្សនៈត្រឹមត្រូវចំពោះសមាជិកគ្រួសារដែលបានត្រូវបណ្ដាច់មិត្ដភាព ហើយពួកគាត់ព្យាយាមធ្វើតាមឱវាទក្នុងគម្ពីរស្ដីអំពីការសេពគប់ជាមួយបុគ្គលនោះ តាមមើលទៅគឺគ្មានមូលហេតុឲ្យខ្វល់ខ្វាយអំពីកន្លែងអង្គុយរបស់ពួកគាត់ឡើយ។—១កូ. ៥:១១, ១៣; ២យ៉ូន. ១១

ទោះជាបុគ្គលដែលបានត្រូវបណ្ដាច់មិត្ដភាពអង្គុយជិតសាច់ញាតិរបស់គាត់នៅសាលប្រជុំ ឬជិតសមាជិកឯទៀតក្នុងក្រុមជំនុំក៏ដោយ នេះមិនគួរជាមូលហេតុដែលនាំឲ្យខ្វល់ខ្វាយអំពីកន្លែងអង្គុយរបស់គាត់ឡើយ ដរាបណាគាត់មានការប្រព្រឹត្ដត្រឹមត្រូវ។ ការដាក់កម្រិតឲ្យបុគ្គលម្នាក់អង្គុយនៅកន្លែងណាមួយ អាចបណ្ដាលឲ្យមានបញ្ហាផ្សេងៗ អាស្រ័យទៅលើកាលៈទេសៈ។ ប្រសិនបើអ្នកចូលរួមទាំងអស់ក្នុងកិច្ចប្រជុំ រួមទាំងសមាជិកស្មោះត្រង់នៃក្រុមគ្រួសារព្យាយាមធ្វើតាមគោលការណ៍គម្ពីរស្ដីអំពីបុគ្គលដែលបានត្រូវបណ្ដាច់មិត្ដភាព ហើយមិនធ្វើឲ្យបងប្អូនឯទៀតជំពប់ដួល គឺមិនចាំបាច់បារម្ភអំពីការរៀបចំកន្លែងអង្គុយសម្រាប់ពួកអ្នកដែលចូលរួមប្រជុំឡើយ។