១. តើគ្រិស្ដសាសនិកមានការពិបាកអ្វីខ្លះក្នុងកិច្ចការផ្សព្វផ្សាយ?

ជាង១៣០ឆ្នាំមុន ពេលរាស្ដ្ររបស់ព្រះយេហូវ៉ាបានចាប់ផ្ដើមផ្សព្វផ្សាយដំណឹងល្អ ពួកគេបានប្រឈមមុខនឹងទុក្ខលំបាកជាច្រើន។ * (សូមមើលកំណត់សម្គាល់) ដូចគ្រិស្ដសាសនិកនៅសតវត្សរ៍ទី១ ពួកគេជាក្រុមតូចមួយ ហើយពួកគេបានផ្សព្វផ្សាយដំណឹងដែលមនុស្សជាច្រើនមិនចូលចិត្ដ។ មនុស្សខ្លះបានគិតថាពួកគេមិនបានរៀនសូត្រជ្រៅជ្រះទេ។ ក្រោយមក ពេលសាថានបានត្រូវបោះទម្លាក់មកផែនដី ពួកគេបានទទួលការបៀតបៀន។ (ការបើកបង្ហាញ ១២:១២) តាំងពីពេលនោះមក ពួកគេបានផ្សព្វផ្សាយក្នុងអំឡុង«គ្រាចុងក្រោយបង្អស់»ដែល«លំបាកណាស់»។—ធីម៉ូថេទី២ ៣:១

២. តើព្រះយេហូវ៉ាបានធ្វើអ្វីដើម្បីជួយយើងផ្សព្វផ្សាយ?

^២ ប៉ុន្ដែ ព្រះយេហូវ៉ាបានជួយរាស្ដ្ររបស់លោក។ លោកចង់ឲ្យពួកគេផ្សព្វផ្សាយដំណឹងល្អនៅទូទាំងផែនដី ហើយលោកនឹងមិនអនុញ្ញាតឲ្យអ្វីណាក៏ដោយបញ្ឈប់កិច្ចការនោះ ឡើយ។ លោកបានជួយរាស្ដ្ររបស់លោកឲ្យគោរពប្រណិប័តន៍លោកតាមរបៀបដែលលោកពេញចិត្ដ ដោយញែកពួកគេចេញពីសាសនាមិនពិត។ លោកក៏បានធ្វើដូច្នេះដែរនៅអតីតកាល ពេលលោករំដោះជនជាតិអ៊ីស្រាអែលពីបាប៊ីឡូន។ (ការបើកបង្ហាញ ១៨:១-៤) ម្យ៉ាងទៀត អ្វីដែលព្រះយេហូវ៉ាបង្រៀនយើងផ្ដល់ប្រយោជន៍ដល់យើងផ្ទាល់។ លោកជួយយើងឲ្យរស់នៅដោយមានសេចក្ដីសុខសាន្ដជាមួយគ្នា ហើយលោកបង្ហាត់បង្រៀនយើងដើម្បីយើងអាចបង្រៀនអ្នកឯទៀតអំពីលោក។ (សូមអាន អេសាយ ៤៨:១៦-១៨) ទោះជាព្រះយេហូវ៉ាដឹកនាំកិច្ចការរបស់យើងក៏ដោយ នេះមិនមានន័យថាលោកតែងតែផ្លាស់ប្ដូរព្រឹត្ដិការណ៍ពិភពលោកដើម្បីជួយយើងផ្សព្វផ្សាយឡើយ។ គឺជាការពិតដែលស្ថានភាពខ្លះក្នុងពិភពលោកបានជួយយើងស្រួលផ្សព្វផ្សាយជាង។ ប៉ុន្ដែ យើងនៅតែជួបការបៀតបៀន ហើយប្រឈមមុខនឹងបញ្ហាឯទៀតដែលមកពីពិភពលោករបស់សាថាន។ ហេតុនេះ យើងអាចផ្សព្វផ្សាយបាន ដោយមានជំនួយពីព្រះយេហូវ៉ាប៉ុណ្ណោះ។—អេសាយ ៤១:១៣; យ៉ូហានទី១ ៥:១៩

៣. តើតាមរបៀបណាទំនាយរបស់ដានីយ៉ែលបានកើតឡើង?

^៣ ដានីយ៉ែលបានប្រកាសទុកជាមុនថានៅគ្រាចុងក្រោយបង្អស់ មនុស្សជាច្រើននឹងយល់សេចក្ដីពិតពីគម្ពីរ។ (សូមអាន ដានីយ៉ែល ១២:៤) មិនយូរមុន«គ្រាចុងបំផុត»បានចាប់ផ្ដើម ព្រះយេហូវ៉ាបានជួយរាស្ដ្ររបស់លោកយល់អំពីសេចក្ដីបង្រៀនសំខាន់ៗក្នុងគម្ពីរ ហើយបដិសេធសេចក្ដីបង្រៀនមិនពិតរបស់ពិភពគ្រិស្ដសាសនា។ សព្វថ្ងៃនេះ រាស្ដ្ររបស់លោកកំពុងបង្រៀនសេចក្ដីពិតពីគម្ពីរទូទាំងពិភពលោក។ យើងអាចឃើញយ៉ាងច្បាស់ថា ទំនាយនៅសៀវភៅដានីយ៉ែលបានកើតឡើងមែន។ មនុស្សជិត៨លាននាក់បានរៀនសេចក្ដីពិត ហើយកំពុងបង្រៀនសេចក្ដីពិតនោះដល់អ្នកឯទៀត។ ដូច្នេះ តើមានកត្ដាអ្វីខ្លះដែលបានជួយរាស្ដ្ររបស់ព្រះយេហូវ៉ាផ្សព្វផ្សាយទូទាំងពិភពលោក?

៤. ក្នុងអំឡុងសតវត្សរ៍ទី១៩ តើគម្ពីរបានត្រូវបកប្រែជាប៉ុន្មានភាសា?

^៤ សព្វថ្ងៃនេះ មនុស្សជាច្រើនមានគម្ពីរ ហើយនេះជួយយើងឲ្យបង្រៀនពួកគេអំពីដំណឹងល្អ។ ប៉ុន្ដែ ពីមុនគឺមិនតែងតែដូច្នោះទេ។ អស់រយៈពេលរាប់រយឆ្នាំ បព្វជិតពិភពគ្រិស្ដសាសនាមិនចង់ឲ្យមនុស្សអានគម្ពីរទេ។ ពួកគេថែមទាំងបានបៀតបៀនពួកអ្នកដែលអានគម្ពីរ ហើយបានសម្លាប់មនុស្សខ្លះដែលបានបកប្រែគម្ពីរទៀតផង។ ប៉ុន្ដែ ក្រោយមកក្នុងអំឡុងសតវត្សរ៍ទី១៩ អង្គការខ្លះបានបកប្រែ ឬបោះពុម្ពគម្ពីរ ឬផ្នែកខ្លះនៃគម្ពីរប្រហែលជា៤០០ភាសា។ មកដល់ឆ្នាំ១៩០០ មនុស្សជាច្រើនមានគម្ពីរ។ ទោះជាយ៉ាងនេះក៏ដោយ ពួកគេមិនយល់អ្វីដែលគម្ពីរបង្រៀនទេ។

៥. តើសាក្សីព្រះយេហូវ៉ាបានធ្វើអ្វីដើម្បីឲ្យមនុស្សជាច្រើនមានគម្ពីរ?

^៥ រាស្ដ្ររបស់ព្រះយេហូវ៉ាបានដឹងថាពួកគេត្រូវប្រាប់មនុស្សឯទៀតអំពីអ្វីដែលគម្ពីរបង្រៀន ហើយនោះគឺជាអ្វីដែលពួកគេបានធ្វើ។ ដំបូងឡើយ ពួកគេបានប្រើសេចក្ដីបកប្រែគម្ពីរដែលបានត្រូវបោះពុម្ពរួចហើយ ហើយពួកគេបានស្នើផ្ដល់ដល់មនុស្ស។ តាំងពីឆ្នាំ១៩៥០ ពួកគេបានចេញផ្សាយសេចក្ដីបកប្រែពិភពលោកថ្មីពីបទគម្ពីរបរិសុទ្ធ ឬផ្នែកខ្លះនៃបទគម្ពីរបរិសុទ្ធ ជាង១២០ភាសា។ នៅឆ្នាំ២០១៣ ពួកគេបានចេញផ្សាយសេចក្ដីបកប្រែពិភពលោកថ្មីដែលបានត្រូវកែសម្រួលឡើងវិញ។ សេចក្ដីបកប្រែនេះគឺស្រួលយល់ជាង ហើយក៏ស្រួលបកប្រែជាងដែរ។ ម្យ៉ាងទៀត ពេលយើងប្រើគម្ពីរដែលមនុស្សអាចយល់បាន យើងស្រួលបង្រៀនសេចក្ដីពិតដល់ពួកគេជាង។

៦, ៧. (ក) តើមានសង្គ្រាមអ្វីខ្លះក្នុងអំឡុង១០០ឆ្នាំកន្លងទៅនេះ? (ខ) នៅប្រទេសខ្លះ តើគ្រាដែលមានសន្ដិភាពបានជួយយើងយ៉ាងណាដើម្បីផ្សព្វផ្សាយ?

^៦ ក្នុងអំឡុង១០០ឆ្នាំកន្លងទៅនេះ មានសង្គ្រាមជា ច្រើន រួមទាំងសង្គ្រាមលោកលើកទី១និងទី២។ មនុស្សរាប់លាននាក់បានស្លាប់។ ដូច្នេះ តើមានសន្ដិភាពយ៉ាងដូចម្ដេច ហើយតើតាមតាមរបៀបណាសន្ដិភាពនោះបានជួយរាស្ដ្ររបស់ព្រះយេហូវ៉ាឲ្យផ្សព្វផ្សាយ? ក្នុងអំឡុងសង្គ្រាមលោកលើកទី២ បងណេថិន ន័រ បាននាំមុខកិច្ចការរបស់សាក្សីព្រះយេហូវ៉ា។ នៅមហាសន្និបាតនាឆ្នាំ១៩៤២ គាត់បានថ្លែងសុន្ទរកថាដ៏គួរឲ្យរំភើបចិត្ដដែលមានចំណងជើងថា «តើសន្ដិភាពអាចនៅស្ថិតស្ថេរឬទេ?»។ បងន័របានពន្យល់អំពីទំនាយនៅសៀវភៅការបើកបង្ហាញ ជំពូកទី១៧ ហើយបានផ្ដល់ទីសំអាងពីទំនាយនោះថាសង្គ្រាមហាម៉ាគេដូនមិនទាន់មកនៅឡើយទេ។ ក្រោយសង្គ្រាមនោះនឹងមានគ្រាដែលមានសន្ដិភាព។—ការបើកបង្ហាញ ១៧:៣, ១១

^៧ នេះមិនមានន័យថាបន្ទាប់ពីសង្គ្រាមនោះនឹងមានសន្ដិភាពគ្រប់កន្លែងឡើយ។ តាំងពីសង្គ្រាមលោកលើកទី២ មនុស្សរាប់លាននាក់បានស្លាប់ក្នុងសង្គ្រាមផ្សេងទៀត។ ប៉ុន្ដែ ប្រទេសជាច្រើនមានគ្រាដែលមានសន្ដិភាព ហើយនោះបានធ្វើឲ្យរាស្ដ្ររបស់ព្រះយេហូវ៉ាស្រួលផ្សព្វផ្សាយជាង។ តើមានលទ្ធផលយ៉ាងណា? ក្នុងអំឡុងសង្គ្រាមលោកលើកទី២ មានសាក្សីព្រះយេហូវ៉ាតិចជាង១១០.០០០នាក់។ ប៉ុន្ដែ សព្វថ្ងៃនេះមានជិត៨លាននាក់! (សូមអាន អេសាយ ៦០:២២) ពិតមែន នៅគ្រាដែលមានសន្ដិភាព យើងអាចផ្សព្វផ្សាយដំណឹងល្អដល់មនុស្សច្រើនជាង។

៨, ៩. តើមានការរីកចម្រើនអ្វីខ្លះក្នុងមធ្យោបាយធ្វើដំណើរ ហើយហេតុអ្វីនេះជួយយើងក្នុងកិច្ចការរបស់យើង?

^៨ ពេលរាស្ដ្ររបស់ព្រះយេហូវ៉ាបានចាប់ផ្ដើមផ្សព្វផ្សាយនៅសហរដ្ឋអាម៉េរិក ពួកគេមិនស្រួលធ្វើដំណើរទេ។ ប្រហែលជា២១ឆ្នាំបន្ទាប់ពីពួកគេបានចាប់ផ្ដើមបោះពុម្ពទស្សនាវដ្ដីប៉មយាម ពោលគឺនៅឆ្នាំ១៩០០ មានរថយន្ដប្រហែលជា៨.០០០គ្រឿងប៉ុណ្ណោះ ហើយមានផ្លូវល្អតែប៉ុន្មានប៉ុណ្ណោះក្នុងប្រទេសនោះ។ ប៉ុន្ដែ សព្វថ្ងៃនេះ មានរថយន្ដជាង១.៥០០លានគ្រឿងទូទាំងពិភពលោក ហើយមានផ្លូវល្អជាច្រើននៅកន្លែងភាគច្រើន។ ដូច្នេះ យើងអាចប្រើរថយន្ដនិងផ្លូវដើម្បីធ្វើដំណើរ ហើយផ្សព្វផ្សាយដល់មនុស្សនៅកន្លែងដែលឆ្ងាយពីទីក្រុង ហើយដែលពិបាកទៅដល់។ ប៉ុន្ដែ ទោះជាយើងរស់នៅកន្លែងដែលពិបាកធ្វើដំណើរ ហើយយើងត្រូវដើរឆ្ងាយក៏ដោយ យើងខំអស់ពីសមត្ថភាពដើម្បីទៅផ្សព្វផ្សាយដល់មនុស្ស ទោះជាពួកគេនៅកន្លែងណាក៏ដោយ។—ម៉ាថាយ ២៨:១៩, ២០

^៩ យើងក៏ប្រើយានជំនិះប្រភេទផ្សេងទៀតដែរ។ យើងបញ្ជូនគម្ពីរនិងសៀវភៅផ្សេងទៀតតាមរថយន្ដធុនធំ កប៉ាល់ និងរថភ្លើង។ នេះមានន័យថាក្នុងប៉ុន្មានសប្ដាហ៍ប៉ុណ្ណោះយើងអាចបញ្ជូនសៀវភៅផ្សេងៗឲ្យបងប្អូនរបស់យើងដែលនៅតំបន់ដាច់ស្រយាល។ អ្នកត្រួតពិនិត្យប្រចាំមណ្ឌល សមាជិកគណៈកម្មាធិការការិយាល័យសាខា សាសនទូត និងបងប្អូនឯទៀត ធ្វើដំណើរតាមយន្ដហោះដើម្បីទៅថ្លែងសុន្ទរកថានៅមហាសន្និបាត និងដើម្បីជួយក្រុមជំនុំ។ សមាជិកគណៈអភិបាលនិងបងប្រុសឯទៀតដែលមកពីមន្ទីរចាត់ការពិភពលោកក៏ធ្វើដំណើរតាមយន្ដហោះទៅប្រទេសជាច្រើន ដើម្បីលើកទឹកចិត្ដនិងបង្ហាត់បង្រៀនបងប្អូនរបស់ពួកគាត់ដែរ។ អ្វីទាំងអស់នេះជួយរាស្ដ្ររបស់ព្រះយេហូវ៉ាមានសាមគ្គីភាព។—ទំនុកតម្កើង ១៣៣:១-៣

១០. នៅទូទាំងពិភពលោក តើភាសាអង់គ្លេសបានត្រូវប្រើក្នុងផ្នែកអ្វីខ្លះ?

^១០ នៅសតវត្សរ៍ទី១ មនុស្សជាច្រើនដែលនៅចក្រភពរ៉ូមនិយាយភាសាក្រិច។ សព្វថ្ងៃនេះ មនុស្សជាច្រើនទូទាំងពិភពលោកនិយាយភាសាអង់គ្លេស។ តាមការពិត សៀវភៅមួយចែងថា ប្រហែលជា១ភាគបួននៃចំនួនប្រជាជនក្នុងពិភពលោកនិយាយ ឬយល់ភាសាអង់គ្លេស (English as a Global Language)។ មនុស្សជាច្រើនរៀនភាសាអង់គ្លេស ដោយសារភាសានេះបានត្រូវប្រើទូទាំងពិភពលោកក្នុងពាណិជ្ជកម្ម នយោបាយ វិទ្យាសាស្ដ្រ និងបច្ចេកវិទ្យា។

១១. តើភាសាអង់គ្លេសបានជះឥទ្ធិពលយ៉ាងណាលើកិច្ចការរបស់រាស្ដ្រព្រះយេហូវ៉ា?

^១១ ការប្រើភាសាអង់គ្លេសនៅច្រើនកន្លែងបានជួយធ្វើឲ្យសេចក្ដីពិតបានឮសុសសាយ។ កាលពីមុន សៀវភៅផ្សេងៗរបស់យើងចេញដំបូងជាភាសាអង់គ្លេស។ មនុស្សជាច្រើនបានអានសៀវភៅទាំងនោះ ដោយសារភាសាអង់គ្លេសជាភាសាដែលគេនិយាយទូទាំងពិភពលោក។ ភាសាអង់គ្លេសក៏បានត្រូវប្រើនៅមន្ទីរចាត់ការពិភពលោកដែរ។ ម្យ៉ាងទៀត បងប្អូនដែលមកពីប្រទេសផ្សេងៗ និងដែលយល់ភាសាអង់គ្លេសទទួលការបង្ហាត់បង្រៀននៅសាលារបស់យើងនាក្រុងផាតឺសិន រដ្ឋញូវយ៉ក។

១២. តើយើងបានបកប្រែសៀវភៅរបស់យើងប៉ុន្មានភាសា ហើយតើកម្មវិធីកុំព្យូទ័របានជួយយើងឲ្យសម្រេចកិច្ចការបកប្រែនេះយ៉ាងដូចម្ដេច?

^១២ ប៉ុន្ដែ យើងមានភារកិច្ចផ្សព្វផ្សាយដំណឹងល្អដល់មនុស្សទូទាំងពិភពលោក។ នោះជាមូលហេតុដែលយើងបកប្រែសៀវភៅរបស់យើងជាង៧០០ភាសា។ តើយើងអាចធ្វើដូច្នេះបានយ៉ាងដូចម្ដេច? កុំព្យូទ័រនិងកម្មវិធីកុំព្យូទ័រ ដូចជាប្រព័ន្ធអេឡិចត្រូនិកដើម្បីបោះពុម្ពជាភាសាផ្សេងៗ(MEPS) បានជួយយើងក្នុងកិច្ចការបកប្រែ។ គម្ពីរចែងថា៖ «នៅគ្រានោះ ខ្ញុំនឹងឲ្យជនជាតិទាំងឡាយ និយាយភាសាបរិសុទ្ធ ដើម្បីឲ្យពួកគេបានអំពាវនាវដល់នាមព្រះយេហូវ៉ាទាំងអស់គ្នា ហើយព្រមចិត្ដគ្នានឹងគោរពដល់លោក»។ ជាលទ្ធផល សាក្សីព្រះយេហូវ៉ាជុំវិញពិភពលោកអាចយល់ភាសាបរិសុទ្ធនៃសេចក្ដីពិតពីគម្ពីរ ហើយមានសាមគ្គីភាព។—សេផានា ៣:៩, ព.ថ.

១៣, ១៤. តើច្បាប់និងការសម្រេចក្ដីរបស់តុលាការបានជួយយើងយ៉ាងណា?

^១៣ គ្រិស្ដសាសនិកនៅសតវត្សរ៍ទី១បានទទួលប្រយោជន៍ជា ច្រើនពីច្បាប់រ៉ូមពេលពួកគេផ្សព្វផ្សាយ។ សព្វថ្ងៃនេះ ក៏ដូចគ្នាដែរ ច្បាប់នៅប្រទេសជាច្រើនជួយយើងកាលដែលយើងផ្សព្វផ្សាយ។ ជាឧទាហរណ៍ ច្បាប់នៅសហរដ្ឋអាម៉េរិកផ្ដល់ឲ្យមនុស្សនូវសិទ្ធិជ្រើសរើសសាសនារបស់ខ្លួន និយាយអំពីជំនឿរបស់ពួកគេ និងប្រជុំគ្នា។ នេះមានន័យថាយើងមានសេរីភាពប្រជុំគ្នានិងផ្សព្វផ្សាយក្នុងប្រទេសនោះ។ យើងក៏មានសេរីភាពចាត់ចែងកិច្ចការផ្សព្វផ្សាយទូទាំងពិភពលោកពីមន្ទីរចាត់ការពិភពលោកនៅសហរដ្ឋអាម៉េរិកដែរ។ មានពេលខ្លះយើងត្រូវប្ដឹងទៅតុលាការដើម្បីការពារសិទ្ធិរបស់យើងក្នុងការផ្សព្វផ្សាយដំណឹងល្អ។ (ភីលីព ១:៧) ម្យ៉ាងទៀត ពេលចៅក្រមនិងគណៈវិនិច្ឆ័យក្នុងរឿងក្ដីទាំងនោះព្យាយាមបំបិទសិទ្ធិរបស់យើងក្នុងការផ្សព្វផ្សាយ យើងបានប្ដឹងទៅតុលាការជាន់ខ្ពស់ជាកន្លែងដែលយើងច្រើនតែឈ្នះក្ដី។

^១៤ នៅប្រទេសផ្សេងទៀតក៏ដូចគ្នាដែរ យើងបានប្ដឹងទៅតុលាការដើម្បីការពារសេរីភាពរបស់យើងក្នុងការផ្សព្វផ្សាយនិងក្នុងការគោរពប្រណិប័តន៍ព្រះយេហូវ៉ា។ ពេលយើងចាញ់ក្ដី យើងបានប្ដឹងទៅតុលាការអន្ដរជាតិ។ ជាឧទាហរណ៍ យើងច្រើនតែបានប្ដឹងទៅតុលាការសិទ្ធិមនុស្សនៅទ្វីបអឺរ៉ុប។ មកដល់ខែមិថុនា ឆ្នាំ២០១៤ យើងបានឈ្នះរឿងក្ដី៥៧ដងក្នុងតុលាការនោះ ហើយប្រទេសភាគច្រើននៅទ្វីបអឺរ៉ុបត្រូវតែធ្វើតាមការសម្រេចក្ដីរបស់តុលាការនោះ។ ទោះជា«ប្រជាជាតិទាំងឡាយនឹងស្អប់»យើងក៏ដោយ ច្បាប់នៅប្រទេសជាច្រើនបានអនុញ្ញាតឲ្យយើងគោរពប្រណិប័តន៍ព្រះយេហូវ៉ាដោយមានសេរីភាព។—ម៉ាថាយ ២៤:៩

១៥. តើមានការជឿនលឿនយ៉ាងណាខាងការបោះពុម្ព ហើយតើអ្វីទាំងនេះបានជួយយើងយ៉ាងដូចម្ដេច?

^១៥ របៀបបោះពុម្ពថ្មីៗបានជួយយើងផ្សព្វផ្សាយដំណឹងល្អដល់មនុស្សកាន់តែច្រើន។ អស់រយៈពេលរាប់រយឆ្នាំ មនុស្សបានប្រើរបៀបបោះពុម្ពម្យ៉ាងដែលបានត្រូវបង្កើតឡើងដោយយ៉ូហាន ហ្គូតេនប៊ឹក ប្រហែលជាក្នុងឆ្នាំ១៤៥០។ ប៉ុន្ដែកាលពី២០០ឆ្នាំមុន ការបោះពុម្ពបានប្រសើរឡើងតាមរបៀបជាច្រើន។ របៀបបោះពុម្ពម្យ៉ាងដែលគេហៅថារបៀបបោះពុម្ពអុហ្វសិតបានត្រូវបង្កើតឡើង។ ក្រោយមក  ការបោះពុម្ពគឺលឿនជាង ហើយគុណភាពក៏ល្អជាងដែរ។ ម្យ៉ាងទៀត ការធ្វើក្រដាសនិងការចងក្រងសៀវភៅគឺថោកជាង។ តើការជឿនលឿនទាំងនេះជួយយើងក្នុងការបោះពុម្ពសៀវភៅយ៉ាងដូចម្ដេច? នៅឆ្នាំ១៨៧៩ ទស្សនាវដ្ដីប៉មយាមដំបូងបានត្រូវបោះពុម្ពជាភាសាអង់គ្លេសប៉ុណ្ណោះ។ ទស្សនាវដ្ដីទាំងនោះគ្មានរូបភាព ហើយបានត្រូវបោះពុម្ព៦.០០០ក្បាល។ សព្វថ្ងៃនេះ ទស្សនាវដ្ដីទាំងនោះបានត្រូវបោះពុម្ពជាង២០០ភាសា ហើយមានរូបភាពស្អាតៗដែលមានព័ណ៌។ ម្យ៉ាងទៀត ទស្សនាវដ្ដីលេខនីមួយៗបានត្រូវបោះពុម្ពច្រើនជាង៥០លានក្បាល។

១៦. តើការបង្កើតថ្មីៗណាខ្លះរបស់មនុស្សបានជួយយើងផ្សព្វផ្សាយទូទាំងពិភពលោក? (សូមមើលរូបភាពនៅដើមអត្ថបទ)

^១៦ ការបង្កើតថ្មីៗជាច្រើនរបស់មនុស្សក្នុងអំឡុង២០០ឆ្នាំមុនបានជួយរាស្ដ្ររបស់ព្រះយេហូវ៉ាផ្សព្វផ្សាយដំណឹងល្អ។ យើងបានរៀបរាប់អំពីរថភ្លើង រថយន្ដនិងយន្ដហោះរួចហើយ។ ប៉ុន្ដែ ក៏មានកង់ ម៉ាស៊ីនអង្គុលីលេខ ម៉ាស៊ីនបោះពុម្ពសម្រាប់មនុស្សងងឹតភ្នែក ទូរលេខ ទូរស័ព្ទ ម៉ាស៊ីនថតរូប ម៉ាស៊ីនថតសំឡេង ម៉ាស៊ីនថតវីដេអូ វិទ្យុ ទូរទស្សន៍ ភាពយន្ដ កុំព្យូទ័រ និងអ៊ីនធឺណិតដែរ។ ទោះជារាស្ដ្ររបស់ព្រះយេហូវ៉ាមិនបានបង្កើតរបស់ទាំងនេះក៏ដោយ ពួកគេប្រើរបស់ទាំងនេះដើម្បីផលិតគម្ពីរ ព្រមទាំងសៀវភៅឯទៀតជាច្រើនភាសា និងដើម្បីផ្សព្វផ្សាយទូទាំងពិភពលោក។ តាមរបៀបនេះ ពួកគេ«បឺតជញ្ជក់ទឹកដោះនៃអស់ទាំងសាសន៍» ដូចទំនាយដែលបានចែងក្នុងគម្ពីរ។—សូមអាន អេសាយ ៦០:១៦

១៧. (ក) ស្ដីអំពីកិច្ចការផ្សព្វផ្សាយ តើយើងឃើញច្បាស់អំពីអ្វី? (ខ) ហេតុអ្វីព្រះយេហូវ៉ាចង់ឲ្យយើងធ្វើការជាមួយនឹងលោក?

^១៧ យើងឃើញច្បាស់ថាព្រះយេហូវ៉ាកំពុងដឹកនាំកិច្ចការផ្សព្វផ្សាយរបស់យើង។ ព្រះយេហូវ៉ាបានផ្ដល់ឲ្យយើងនូវកិច្ចការនេះ មិនមែនដោយសារលោកមិនអាចធ្វើកិច្ចការនេះដោយគ្មានជំនួយរបស់យើងទេ ប៉ុន្ដែដោយសារលោកស្រឡាញ់យើង ហើយចង់ឲ្យយើងធ្វើការជាមួយនឹងលោក។ តាមរយៈកិច្ចផ្សព្វផ្សាយ យើងបង្ហាញលោកថាយើងស្រឡាញ់លោក ហើយថាយើងស្រឡាញ់មនុស្សឯទៀត។ (ម៉ាកុស ១២:២៨-៣១; កូរិនថូសទី១ ៣:៩) យើងដឹងគុណព្រះយេហូវ៉ាណាស់ដែលលោកកំពុងជួយយើងផ្សព្វផ្សាយទូទាំងផែនដី។ ដូច្នេះ សូមឲ្យយើងប្រើគ្រប់ឱកាសដែលយើងមានដើម្បីផ្សព្វផ្សាយអំពីព្រះយេហូវ៉ានិងរាជាណាចក្ររបស់លោក!