១-៣. ហេតុអ្វីប៉ូលជឿជាក់ថាគាត់អាចទុកចិត្ដព្រះយេហូវ៉ា? (សូមមើលរូបភាពនៅដើមអត្ថបទ)

បើអ្នកជាគ្រិស្ដសាសនិកនាក្រុងរ៉ូមនៅសតវត្សរ៍ទី១ នោះអ្នកកំពុងរស់នៅគ្រាមួយដែលអ្នកអាចជួបគ្រោះថ្នាក់។ គ្រិស្ដសាសនិកបានត្រូវជនជាតិរ៉ូមបៀតបៀនយ៉ាងឃោរឃៅ។ ជនជាតិរ៉ូមបានទម្លាក់កំហុសទៅលើគ្រិស្ដសាសនិកថាជាអ្នកធ្វើឲ្យមានភ្លើងឆេះយ៉ាងសន្ធោសន្ធៅនៅក្រុងរ៉ូម ហើយបានចោទប្រកាន់ពួកគាត់ថាមិនរាប់រកមនុស្សឯទៀតទេ។ បងប្អូនគ្រិស្ដសាសនិកជាច្រើននាក់របស់អ្នកបានត្រូវគេចាប់ខ្លួន។ ពួកគាត់ខ្លះបានត្រូវសត្វហែកស៊ី។ បងប្អូនផ្សេងទៀតបានត្រូវគេព្យួរលើបង្គោលឈើ ហើយបន្ទាប់មកគេដុតពួកគាត់ទាំងរស់ដើម្បីធ្វើជាពន្លឺនៅពេលរាត្រី។ រាល់ថ្ងៃអ្នកដឹងថាអ្វីមួយក្នុងចំណោមអ្វីទាំងនេះអាចកើតឡើងចំពោះអ្នក។

^២ ក្នុងអំឡុងពេលដ៏ពិបាកនោះ សាវ័កប៉ូលបានត្រូវគេចាប់ដាក់គុក។ គាត់ប្រហែលជាឆ្ងល់ថា បងប្អូនគ្រិស្ដសាសនិកនឹងជួយគាត់ ឬមិនជួយ ដោយសារគាត់បានចាំថាលើកមុនពេលគាត់ជួបបញ្ហាគ្មានអ្នកណាជួយគាត់ទេ។ ប៉ុន្ដែ ប៉ូលបានទទួលជំនួយពីព្រះយេហូវ៉ាតាមរយៈលោកម្ចាស់យេស៊ូ។ គាត់បានសរសេរថា៖ «លោកម្ចាស់បានឈរក្បែរខ្ញុំ ហើយពង្រឹងកម្លាំងខ្ញុំ»។ លោកយេស៊ូបានផ្ដល់កម្លាំងដែលគាត់ត្រូវការ។ ប៉ូលថែម ទាំងបានសរសេរថា គាត់«បានត្រូវសង្គ្រោះឲ្យរួចពីមាត់តោ»ទៀតផង * (សូមមើលកំណត់សម្គាល់)។—ធីម៉ូថេទី២ ៤:១៦, ១៧

^៣ ប៉ូលបានចាំអំពីរបៀបដែលព្រះយេហូវ៉ាបានជួយគាត់កាលពីមុន។ ដូច្នេះ គាត់បានជឿជាក់ថាព្រះយេហូវ៉ានឹងផ្ដល់កម្លាំងដែលគាត់ត្រូវការដើម្បីស៊ូទ្រាំនឹងស្ថានភាពដែលគាត់កំពុងជួបប្រទះនៅឥឡូវនេះ និងដើម្បីស៊ូទ្រាំការពិបាកណាក៏ដោយដែលអាចកើតមាននៅអនាគត។ គាត់ប្រាកដដល់ម៉្លេះបានជាគាត់សរសេរថា៖ «លោកម្ចាស់នឹងសង្គ្រោះខ្ញុំឲ្យរួចពីការអាក្រក់គ្រប់យ៉ាង»។ (ធីម៉ូថេទី២ ៤:១៨) ប៉ូលបានដឹងថាទោះជាក្នុងស្ថានភាពដែលបងប្អូនមិនអាចជួយគាត់ក៏ដោយ គាត់អាចទុកចិត្ដជានិច្ចថាព្រះយេហូវ៉ានិងលោកយេស៊ូនឹងជួយគាត់។ គាត់មិនសង្ស័យទាល់តែសោះ។

៤, ៥. (ក) តើអ្នកណាអាចជួយអ្នកជានិច្ចពេលដែលអ្នកត្រូវការជំនួយ? (ខ) តើតាមរបៀបណាអ្នកអាចធ្វើឲ្យចំណងមិត្ដភាពរវាងអ្នកនិងព្រះយេហូវ៉ាកាន់តែរឹងមាំ?

^៤ តើអ្នកធ្លាប់មានបញ្ហាពិបាក ហើយមានអារម្មណ៍ថាគ្មានអ្នកណាជួយអ្នកឬទេ? ប្រហែលជាអ្នកបានបាត់បង់ការងារ ឬមានការបង្ខិតបង្ខំនៅសាលា។ ប្រហែលជាអ្នកមានជំងឺធ្ងន់ធ្ងរ ឬមានទុក្ខលំបាកផ្សេងទៀត។ អ្នកប្រហែលជាបានសុំជំនួយពីអ្នកឯទៀត ប៉ុន្ដែអ្នកខកចិត្ដដោយសារពួកគេមិនបានជួយអ្នកដូចដែលអ្នកត្រូវការ។ មានបញ្ហាខ្លះមនុស្សជាតិមិនអាចដោះស្រាយបានទេ។ នៅពេលនោះ តើអ្នកនឹងធ្វើយ៉ាងណា? គម្ពីរប្រាប់យើងឲ្យ«ពឹង[ទុកចិត្ដ]ដល់ព្រះយេហូវ៉ា»។ (សុភាសិត ៣:៥, ៦) ប៉ុន្ដែ តើអ្នកអាចប្រាកដថាលោកនឹងជួយអ្នកឬទេ? ពិតជាអាចមែន! យើងអាចរៀនអំពីគំរូជាច្រើនក្នុងគម្ពីរដែលឲ្យយើងជឿជាក់ថាព្រះយេហូវ៉ាពិតជាជួយរាស្ដ្ររបស់លោកមែន។

^៥ សូមកុំខឹងពេលអ្នកឯទៀតមិនផ្ដល់ជំនួយដែលអ្នកត្រូវការ។ ផ្ទុយទៅវិញ ដូចប៉ូលដែរ សូមចាត់ទុកថាទុក្ខលំបាកនោះគឺជាឱកាសដែលអ្នកត្រូវទុកចិត្ដព្រះយេហូវ៉ាទាំងស្រុង។ ទុក្ខលំបាកនោះក៏ជាឱកាសដែលអ្នកអាចឃើញអំពីរបៀបដែលលោកថែរក្សាអ្នកដែរ។ នេះនឹងពង្រឹងទំនុកចិត្ដរបស់អ្នកលើព្រះយេហូវ៉ា ហើយជួយធ្វើឲ្យចំណងមិត្ដភាពរវាងអ្នកនិងលោកកាន់តែរឹងមាំ។

៦. ពេលយើងមានបញ្ហាពិបាក ហេតុអ្វីយើងប្រហែលជាមិនងាយស្រួលទុកចិត្ដព្រះយេហូវ៉ា?

^៦ អ្នកប្រហែលជាមានបញ្ហាពិបាកដែលធ្វើឲ្យអ្នកខ្វល់ចិត្ដ។ អ្នកបានខំប្រឹងអស់ពីសមត្ថភាពដើម្បីដោះស្រាយបញ្ហានោះ ហើយអ្នកបានអធិដ្ឋានសុំជំនួយពីព្រះយេហូវ៉ា។ ឥឡូវនេះ តើអ្នកអាចមានចិត្ដស្ងប់ដោយសារអ្នកទុកចិត្ដថាលោកនឹងជួយអ្នកឬទេ? អ្នកអាចមានចិត្ដស្ងប់មែន! (សូមអាន ទំនុកតម្កើង ៦២:៨; ពេត្រុសទី១ ៥:៧) បើអ្នកចង់មានចំណងមិត្ដភាពដ៏ល្អជាមួយនឹងព្រះយេហូវ៉ា ជាការសំខាន់ដែលអ្នកត្រូវរៀនឲ្យចេះទុកចិត្ដលោក។ ប៉ុន្ដែ ការធ្វើដូច្នេះគឺមិនតែងតែងាយស្រួលឡើយ។ ហេតុអ្វី? មូលហេតុមួយគឺព្រះយេហូវ៉ាប្រហែលជាមិនតបឆ្លើយសេចក្ដីអធិដ្ឋានរបស់អ្នកភ្លាមៗទេ។—ទំនុកតម្កើង ១៣:១, ២; ៧៤:១០; ៨៩:៤៦; ៩០:១៣; ហាបាគុក ១:២

៧. ហេតុអ្វីព្រះយេហូវ៉ាមិនតែងតែតបឆ្លើយសេចក្ដីអធិដ្ឋានរបស់យើងភ្លាមៗ?

^៧ ហេតុអ្វីបានជាព្រះយេហូវ៉ាមិនតែងតែតបឆ្លើយសេចក្ដីអធិដ្ឋានរបស់យើងភ្លាមៗ? គម្ពីរចែងថាព្រះយេហូវ៉ាគឺជា បិតារបស់យើង ហើយយើងគឺជាកូនរបស់លោក។ (ទំនុកតម្កើង ១០៣:១៣) ជាឧទាហរណ៍ ឪពុកមិនឲ្យកូននូវអ្វីទាំងអស់ដែលកូនសុំ ឬឲ្យអ្វីនោះដល់កូនភ្លាមៗទេ។ ឪពុកដឹងថាកូនប្រហែលជាឃើញអ្វីមួយភ្លាមចង់បានភ្លាម ហើយក្រោយមកលែងចង់បានវិញ។ ឪពុកក៏ដឹងដែរនូវអ្វីដែលល្អបំផុតសម្រាប់កូន ហើយគាត់ដឹងថានោះអាចមានឥទ្ធិពលលើអ្នកឯទៀតឬយ៉ាងណា។ គាត់ដឹងអំពីអ្វីដែលកូនត្រូវការ ហើយពេលណាដែលកូនគួរមានអ្វីនោះ។ បើឪពុកចេះតែឲ្យកូនភ្លាមៗនូវអ្វីៗដែលកូនសុំ ឪពុកនោះនឹងក្លាយទៅជាអ្នកបម្រើរបស់កូន។ ព្រះយេហូវ៉ាដែលជាបិតានៅស្ថានសួគ៌ស្រឡាញ់យើង។ ក្នុងនាមជាអ្នកបង្កើតដែលប្រកបដោយប្រាជ្ញា លោកដឹងនូវអ្វីដែលយើងត្រូវការ ហើយលោកសម្រេចចិត្ដថាពេលណាជាពេលល្អបំផុតដែលលោកគួរឲ្យនូវអ្វីដែលយើងសុំ។ ជាការល្អដែលយើងគួរចាំមើលថាព្រះយេហូវ៉ាតបឆ្លើយយ៉ាងណានឹងសេចក្ដីអធិដ្ឋានរបស់យើង។—សូមពិនិត្យបន្ថែម អេសាយ ២៩:១៦; ៤៥:៩

៨. តើព្រះយេហូវ៉ាបានសន្យាអ្វីស្ដីអំពីសមត្ថភាពស៊ូទ្រាំរបស់យើង?

^៨ សូមចាំដែរថាព្រះយេហូវ៉ាដឹងអំពីសមត្ថភាពស៊ូទ្រាំរបស់មនុស្សម្នាក់ៗ។ (ទំនុកតម្កើង ១០៣:១៤) ហេតុនេះ លោកផ្ដល់កម្លាំងដែលយើងត្រូវការ។ ពិតមែនតែពេលខ្លះយើងប្រហែលជាមានអារម្មណ៍ថាយើងមិនអាចស៊ូទ្រាំបានទៀតទេ ប៉ុន្ដែព្រះយេហូវ៉ាសន្យាថាបើយើងរងទុក្ខលំបាកហួសពីសមត្ថភាពស៊ូទ្រាំរបស់យើង នោះលោកនឹង«រៀបចំផ្លូវចេញ»។ (សូមអាន កូរិនថូសទី១ ១០:១៣) យើងពិតជាទទួលការសម្រាលទុក្ខមែន ពេលយើងដឹងថាយើងអាចមានទំនុកចិត្ដថាព្រះយេហូវ៉ាស្គាល់សមត្ថភាពស៊ូទ្រាំរបស់យើង។

៩. បើយើងអធិដ្ឋានសុំជំនួយពីព្រះយេហូវ៉ា ប៉ុន្ដែលោកមិនបានតបឆ្លើយភ្លាមៗទេ តើយើងគួរធ្វើអ្វី?

^៩ បើយើងអធិដ្ឋានសុំជំនួយពីព្រះយេហូវ៉ា ប៉ុន្ដែលោកមិនបានតបឆ្លើយភ្លាមៗទេ សូមមានចិត្ដអត់ធ្មត់។ សូមចាំថាព្រះយេហូវ៉ាពិតជាចង់ជួយយើងខ្លាំងណាស់ ប៉ុន្ដែដោយចិត្ដអត់ធ្មត់ លោករង់ចាំពេលដ៏ល្អបំផុតដើម្បីផ្ដល់ឲ្យយើងនូវអ្វីដែលយើងត្រូវការ។ គម្ពីរប្រាប់យើងថា៖ «ព្រះយេហូវ៉ាទ្រង់រង់ចាំឱកាស[ដោយចិត្ដអត់ធ្មត់]នឹងផ្ដល់ព្រះគុណដល់ឯងរាល់គ្នា» ហើយ«ដើម្បីឲ្យទ្រង់មានសេចក្ដីអាណិតមេត្ដាដល់ឯងពីព្រោះព្រះយេហូវ៉ាទ្រង់ជាព្រះដ៏ប្រកបដោយយុត្ដិធម៌។ មានពរហើយ អស់អ្នកណាដែលរង់ចាំទ្រង់»។—អេសាយ ៣០:១៨

១០-១២. (ក) តើអ្វីប្រហែលជាធ្វើឲ្យយើងពិបាកមើលថែរក្សាសមាជិកគ្រួសារដែលឈឺ? (ខ) កាលដែលអ្នកទុកចិត្ដព្រះយេហូវ៉ាក្នុងគ្រាលំបាក តើនេះនឹងមានឥទ្ធិពលយ៉ាងណាទៅលើចំណងមិត្ដភាពរវាងអ្នកនិងលោក? សូមលើកឧទាហរណ៍មួយ។

^១០ ស្ថានភាពរបស់អ្នកប្រហែលជាពិបាកខ្លាំងដល់ម៉្លេះបានជាអ្នកមានអារម្មណ៍ដូចប៉ូល ហើយត្រូវការគេជួយសង្គ្រោះអ្នកឲ្យរួចពី«មាត់តោ»។ (ធីម៉ូថេទី២ ៤:១៧) ក្នុងអំឡុងគ្រាដ៏ពិបាកទាំងនេះ ជាការសំខាន់បំផុតដែលអ្នកត្រូវទុកចិត្ដព្រះយេហូវ៉ា។ ជាឧទាហរណ៍ អ្នកប្រហែលជាត្រូវថែរក្សាសមាជិកក្រុមគ្រួសារម្នាក់ដែលឈឺ។ អ្នកបានអធិដ្ឋានទៅព្រះយេហូវ៉ាសុំលោកជួយអ្នកឲ្យធ្វើការសម្រេចចិត្ដត្រឹមត្រូវ ហើយសុំលោកពង្រឹងកម្លាំងរបស់អ្នក។ * (សូមមើលកំណត់សម្គាល់) ឥឡូវអ្នកប្រហែលជាមានអារម្មណ៍ថាអ្នកមានសេចក្ដីសុខសាន្ដក្នុងចិត្ដ ពេលអ្នកនឹកចាំថាព្រះយេហូវ៉ា ឃើញ ហើយយល់អំពីអ្នក ព្រមទាំងស្ថានភាពរបស់អ្នក។ លោកនឹងជួយអ្នកឲ្យស៊ូទ្រាំ ហើយជួយអ្នកឲ្យនៅស្មោះត្រង់ចំពោះលោក។—ទំនុកតម្កើង ៣២:៨

^១១ ប៉ុន្ដែ ក្នុងស្ថានភាពខ្លះមើលទៅហាក់ដូចជាព្រះយេហូវ៉ាមិនបានជួយអ្នកទេ។ ជាឧទាហរណ៍ វេជ្ជបណ្ឌិតផ្សេងៗឲ្យយោបល់ខុសៗគ្នាស្ដីអំពីអ្វីដែលអ្នកគួរធ្វើ ឬក៏អ្នកសង្ឃឹមថាសាច់ញាតិរបស់អ្នកនឹងសម្រាលទុក្ខអ្នក ផ្ទុយទៅវិញ ពួកគេហាក់ដូចជាធ្វើឲ្យស្ថានភាពរបស់អ្នកកាន់តែពិបាកជាងមុន។ សូមពឹងផ្អែកលើព្រះយេហូវ៉ាជានិច្ចដើម្បីឲ្យលោកផ្ដល់កម្លាំងដល់អ្នក។ ចូរបន្ដចូលទៅជិតលោក។ (សូមអាន សាំយូអែលទី១ ៣០:៣, ៦) ក្រោយមក ពេលអ្នកទទួលស្គាល់អំពីរបៀបដែលព្រះយេហូវ៉ាបានជួយអ្នក នោះចំណងមិត្ដភាពរវាងអ្នកនិងលោកនឹងកាន់តែរឹងមាំ។

^១២ បងស្រីលីនដាក៏មានអារម្មណ៍បែបនេះដែរ។ * (សូមមើលកំណត់សម្គាល់) គាត់ត្រូវមើលថែរក្សាឪពុកម្ដាយរបស់គាត់ដែលមានជំងឺអស់មួយរយៈពេលយូរមុនពួកគាត់ស្លាប់។ គាត់និយាយថា៖ «នៅពេលនោះ ខ្ញុំ ប្ដីខ្ញុំ និងប្អូនប្រុសខ្ញុំ យើងច្រើនតែពិបាកដឹងនូវអ្វីដែលយើងត្រូវធ្វើ។ ជួនកាល យើងមានអារម្មណ៍ថាគ្មានអ្នកណាជួយយើងសោះ។ ប៉ុន្ដែ ពេលយើងគិតអំពីអ្វីដែលនៅអតីតកាល យើងយល់កាន់តែច្បាស់អំពីរបៀបដែលព្រះយេហូវ៉ាបានបង្ហាញថាលោកនៅជាមួយនឹងយើង។ លោកបានពង្រឹងកម្លាំងយើង ហើយបានផ្ដល់នូវអ្វីដែលយើងត្រូវការ ទោះជាពេលដែលយើងហាក់ដូចជាគ្មានជម្រើសក៏ដោយ»។

១៣. តើតាមរបៀបណាការទុកចិត្ដព្រះយេហូវ៉ាបានជួយបងរ៉នដាឲ្យស៊ូទ្រាំនឹងរឿងខ្លោចផ្សាមួយហើយមួយទៀត?

^១៣ ពេលយើងទុកចិត្ដព្រះយេហូវ៉ាទាំងស្រុង នេះក៏នឹងជួយយើងឲ្យស៊ូទ្រាំរឿងខ្លោចផ្សាផ្សេងៗដែរ។ នេះជាអ្វីដែលបងស្រីរ៉នដាបានឆ្លងកាត់។ ប្ដីរបស់គាត់ដែលមិនមែនជាសាក្សីព្រះយេហូវ៉ាបានលែងលះគាត់។ ក្នុងអំឡុងពេលនោះ ប្អូនប្រុសរបស់គាត់បានត្រូវពិនិត្យឃើញថាមានជំងឺធ្ងន់ធ្ងរម្យ៉ាង។ ប៉ុន្មានខែក្រោយមក ប្រពន្ធរបស់ប្អូនប្រុសគាត់បានស្លាប់។ ពេលបងរ៉នដាចាប់ផ្ដើមមានអារម្មណ៍ធូរស្រាលឡើងវិញពីរឿងដ៏គួរឲ្យខ្លោចផ្សាទាំងនេះ គាត់បានចាប់ផ្ដើមធ្វើជាអ្នកត្រួសត្រាយពេញពេល។ មិនយូរក្រោយមកម្ដាយរបស់គាត់បានស្លាប់។ តើបងរ៉នដាអាចស៊ូទ្រាំនឹងរឿងខ្លោចផ្សាទាំងនេះបានយ៉ាងដូចម្ដេច? គាត់និយាយថា៖ «ខ្ញុំប្រស្រ័យទាក់ទងជាមួយនឹងព្រះយេហូវ៉ារាល់ថ្ងៃ សូម្បីតែក្នុងការសម្រេចចិត្ដតូចតាចក្ដី។ នេះបានធ្វើឲ្យព្រះយេហូវ៉ាទៅជាបុគ្គលពិតចំពោះខ្ញុំ ហើយក៏បានបង្រៀនខ្ញុំឲ្យពឹងផ្អែកលើលោកជាជាងខ្លួនឯង ឬអ្នកឯទៀត។ ម្យ៉ាងទៀត លោកពិតជាបានជួយខ្ញុំមែន ពោលគឺលោកបានបំពេញរាល់សេចក្ដីត្រូវការរបស់ខ្ញុំ។ ជាលទ្ធផល ខ្ញុំមានបទពិសោធន៍ធ្វើការយ៉ាងជិតស្និទ្ធជាមួយនឹងព្រះយេហូវ៉ា»។

១៤. បើសមាជិកគ្រួសាររបស់អ្នកបានត្រូវបណ្ដាច់មិត្ដភាព តើព្រះយេហូវ៉ាអាចជួយអ្នកយ៉ាងដូចម្ដេច?

^១៤ សូមគិតអំពីស្ថានភាពដ៏ពិបាកមួយទៀត។ ប្រហែលជាមានសមាជិកគ្រួសារម្នាក់របស់អ្នកបានត្រូវបណ្ដាច់មិត្ដភាព។ អ្នកដឹងអ្វីដែលគម្ពីរចែងអំពីរបៀបដែលត្រូវប្រព្រឹត្ដចំពោះបុគ្គលដែលបានត្រូវបណ្ដាច់មិត្ដភាព។ (កូរិនថូសទី១ ៥:១១; យ៉ូហានទី២ ១០) ប៉ុន្ដែ ដោយសារអ្នកស្រឡាញ់បុគ្គលនោះ អ្នកប្រហែលជាមានអារម្មណ៍ថាពិបាកធ្វើតាមបង្គាប់ក្នុងគម្ពីរ ឬថែមទាំងមានអារម្មណ៍ថាអ្នកមិនអាចធ្វើតាមបង្គាប់នោះទៀតផង។ តើអ្នកនឹងទុកចិត្ដថាបិតាដែលនៅស្ថានសួគ៌នឹងផ្ដល់កម្លាំងឲ្យអ្នកដើម្បីស្តាប់បង្គាប់លោកដោយស្មោះត្រង់ឬទេ? តើអ្នកនឹងចាត់ទុកស្ថានភាពនេះថាជាឱកាសដែលអ្នកអាចចូលកាន់តែជិតព្រះយេហូវ៉ាឬទេ?

១៥. ហេតុអ្វីអាដាមមិនបានស្តាប់បង្គាប់ព្រះយេហូវ៉ា?

 ^១៥ តើយើងអាចប្រដូចស្ថានភាពនេះទៅនឹងស្ថានភាពរបស់អាដាមដែលជាបុរសទី១យ៉ាងដូចម្ដេច? តើគាត់ជឿថាគាត់អាចឈប់ស្តាប់បង្គាប់ព្រះយេហូវ៉ា ហើយរស់តទៅទៀតឬ? មិនមែនទេ ពីព្រោះគម្ពីរចែងថា អាដាម«មិនបានត្រូវបោកបញ្ឆោត»ឡើយ។ (ធីម៉ូថេទី១ ២:១៤) ដូច្នេះ ហេតុអ្វីបានជាគាត់មិនស្តាប់បង្គាប់ព្រះយេហូវ៉ា? ដោយសារអាដាមស្រឡាញ់ប្រពន្ធរបស់គាត់ជាងព្រះយេហូវ៉ា គាត់បានបរិភោគផ្លែឈើដែលនាងបានឲ្យគាត់។ គាត់បានស្តាប់ប្រពន្ធរបស់គាត់ជាជាងស្តាប់បង្គាប់ព្រះយេហូវ៉ា។—លោកុប្បត្ដិ ៣:៦, ១៧

១៦. តើយើងគួរស្រឡាញ់អ្នកណាខ្លាំងជាងគេ ហើយហេតុអ្វី?

^១៦ តើនេះមានន័យថាយើងមិនគួរស្រឡាញ់សាច់ញាតិរបស់យើងយ៉ាងខ្លាំងឬ? មិនមែនទេ។ ប៉ុន្ដែ យើងគួរស្រឡាញ់ព្រះយេហូវ៉ាខ្លាំងជាងគេ។ (សូមអាន ម៉ាថាយ ២២:៣៧, ៣៨) ម្យ៉ាងទៀត ពេលយើងស្រឡាញ់ព្រះយេហូវ៉ាខ្លាំងជាងគេ យើងអាចជួយសាច់ញាតិរបស់យើងតាមរបៀបដែលល្អបំផុត ទោះជាពួកគេកំពុងបម្រើព្រះយេហូវ៉ា ឬមិនបម្រើក៏ដោយ។ ដូច្នេះ ចូរបន្ដស្រឡាញ់និងទុកចិត្ដព្រះយេហូវ៉ាកាន់តែខ្លាំង។ បើអ្នកបារម្ភអំពីសមាជិកដែលបានត្រូវបណ្ដាច់មិត្ដភាព ចូរអធិដ្ឋានទៅព្រះយេហូវ៉ា ហើយជម្រាបលោកអំពីអារម្មណ៍របស់អ្នកក្នុងគ្រប់រឿងទាំងអស់។ * (សូមមើលកំណត់សម្គាល់) (រ៉ូម ១២:១២; ភីលីព ៤:៦, ៧) ទោះជាអ្នកកំពុងរងទុក្ខយ៉ាងខ្លាំងក៏ដោយ ចូរចាត់ទុកស្ថានភាពនេះថាជាឱកាសមួយដែលអ្នកអាចធ្វើឲ្យចំណងមិត្ដភាពរវាងអ្នកនិងព្រះយេហូវ៉ាកាន់តែរឹងមាំថែមទៀត។ ក្រោយមក អ្នកនឹងអាចទុកចិត្ដលោក ហើយដឹងថាការស្តាប់បង្គាប់លោកនឹងនាំឲ្យមានលទ្ធផលល្អបំផុត។

១៧. បើយើងបន្ដជាប់រវល់ក្នុងកិច្ចការផ្សព្វផ្សាយ តើយើងអាចទុកចិត្ដថាព្រះយេហូវ៉ានឹងធ្វើអ្វី?

^១៧ ហេតុអ្វីព្រះយេហូវ៉ាបានសង្គ្រោះប៉ូលពី«មាត់តោ»? ប៉ូលនិយាយថា៖ «ដើម្បីឲ្យខ្ញុំផ្សព្វផ្សាយយ៉ាងសព្វគ្រប់»។ (ធីម៉ូថេទី២ ៤:១៧) ព្រះយេហូវ៉ាក៏បានឲ្យយើងនូវកិច្ចការផ្សព្វផ្សាយ«ដំណឹងល្អ»ដែរ ហើយលោកហៅយើងថាជា«អ្នករួមការងារ»ជាមួយនឹងលោក។ (ថែស្សាឡូនិចទី១ ២:៤; កូរិនថូសទី១ ៣:៩) បើយើងបន្ដជាប់រវល់ក្នុងកិច្ចការផ្សព្វផ្សាយ យើងអាចទុកចិត្ដថាព្រះយេហូវ៉ានឹងផ្ដល់ឲ្យយើងនូវអ្វីទាំងអស់ដែលយើងត្រូវការ។ (ម៉ាថាយ ៦:៣៣) ម្យ៉ាងទៀត បើយើងធ្វើដូច្នេះ យើងនឹងងាយស្រួលជាងក្នុងការរង់ចាំព្រះយេហូវ៉ាធ្វើតាមសេចក្ដីអធិដ្ឋានរបស់យើង។

១៨. តើតាមរបៀបណាអ្នកអាចមានទំនុកចិត្ដលើព្រះយេហូវ៉ាកាន់តែខ្លាំង ហើយធ្វើឲ្យចំណងមិត្ដភាពរវាងអ្នកនិងលោកកាន់តែរឹងមាំ?

^១៨ ដូច្នេះជារៀងរាល់ថ្ងៃ ចូរធ្វើឲ្យចំណងមិត្ដភាពរវាងអ្នកនិងព្រះយេហូវ៉ាកាន់តែរឹងមាំ។ ពេលអ្នកជួបប្រទះស្ថានភាពណាដែលនាំឲ្យអ្នកខ្វល់ចិត្ដ ចូរប្រើស្ថានភាពនោះដើម្បីចូលកាន់តែជិតព្រះយេហូវ៉ា។ ចូរអាន សិក្សា និងរំពឹងគិតអំពីគម្ពីរដែលជាបណ្ដាំរបស់ព្រះ។ ចូរអធិដ្ឋានទៅព្រះយេហូវ៉ាជានិច្ច ហើយបន្ដជាប់រវល់ក្នុងការបម្រើលោក។ បើអ្នកធ្វើអ្វីទាំងអស់នេះ អ្នកអាចទុកចិត្ដថាព្រះយេហូវ៉ានឹងជួយអ្នកឲ្យស៊ូទ្រាំនឹងទុក្ខលំបាកទាំងអស់ដែលអ្នកមាននៅឥឡូវនេះ និងទុក្ខលំបាកណាក៏ដោយដែលប្រហែលជាកើតឡើងនៅអនាគត។