អញ្ជើញ«មកតាមខ្ញុំចុះ»
អញ្ជើញ«មកតាមខ្ញុំចុះ»
«បើអ្នកណាចង់មកតាមខ្ញុំ ត្រូវឲ្យអ្នកនោះលះកាត់ចិត្តខ្លួនឯង . . . ហើយមកតាមខ្ញុំចុះ!»។—លូ. ៩:២៣
១, ២. (ក) តើព្រះយេស៊ូបានផ្ដល់សេចក្ដីអញ្ជើញអ្វីដ៏សប្បុរស? (ខ) ចំពោះសេចក្ដីអញ្ជើញរបស់ព្រះយេស៊ូ តើអ្នកបានតបឆ្លើយយ៉ាងណា?
នៅជិតដំណាច់កិច្ចបម្រើផ្សាយរបស់ព្រះយេស៊ូ ទ្រង់កំពុងតែផ្សព្វផ្សាយនៅតំបន់ស្រុកប៉េរ៉េ ជាភូមិភាគមួយនៅត្រើយម្ខាងទន្លេយ័រដាន់ ដែលស្ថិតនៅខាងជើងឆៀងខាងកើតស្រុកយូដា។ បុរសក្មេងម្នាក់បានសួរទ្រង់ថា តើគាត់ត្រូវធ្វើអ្វីដើម្បីទទួលជីវិតដែលគ្មានទីបញ្ចប់? បន្ទាប់ពីជ្រាបថាបុរសក្មេងនោះបានកាន់តាមក្រឹត្យវិន័យម៉ូសេយ៉ាងស្មោះត្រង់ នោះព្រះយេស៊ូបានផ្ដល់សេចក្ដីអញ្ជើញដ៏អស្ចារ្យមួយ។ ទ្រង់មានប្រសាសន៍ថា៖ «ត្រូវទៅលក់របស់ទ្រព្យទាំងប៉ុន្មាន ចែកទានឲ្យដល់ពួកអ្នកក្រទៅ នោះអ្នកនឹងបានទ្រព្យសម្បត្ដិនៅលើស្ថានសួគ៌វិញ រួច . . . មកតាមខ្ញុំចុះ»។ (ម៉ាក. ១០:២១) សូមគិតមើល ព្រះយេស៊ូ បុត្រតែមួយរបស់ព្រះដ៏ខ្ពស់បំផុតបានអញ្ជើញគាត់ឲ្យមកតាមទ្រង់!
២ បុរសក្មេងនោះមិនបានមកតាមសេចក្ដីអញ្ជើញរបស់ព្រះយេស៊ូទេ តែអ្នកឯទៀតព្រមមកតាមទ្រង់។ មិនយូរមុនព្រះយេស៊ូជួបបុរសក្មេងនោះ ទ្រង់មានប្រសាសន៍ទៅកាន់ភីលីពថា៖ «ចូរតាមខ្ញុំមក»។ (យ៉ូន. ១:៤៣) ភីលីពបានមកតាម ហើយក្រោយមកបានក្លាយទៅជាសាវ័កម្នាក់។ ព្រះយេស៊ូក៏បានអញ្ជើញម៉ាថាយ ហើយគាត់ក៏មកតាមដែរ។ (ម៉ាថ. ៩:៩; ១០:២-៤) ពិតមែនហើយ ព្រះយេស៊ូបានផ្ដល់សេចក្ដីអញ្ជើញទៅអស់អ្នកដែលស្រឡាញ់សេចក្ដីសុចរិត ពេលដែលទ្រង់មានប្រសាសន៍ថា៖ «បើអ្នកណាចង់មកតាមខ្ញុំ ត្រូវឲ្យអ្នកនោះលះកាត់ចិត្តខ្លួនឯង . . . ហើយមកតាមខ្ញុំ[ជាដរាប]ចុះ»។ (លូ. ៩:២៣) ដូច្នេះ អ្នកណាក៏ដោយ ឲ្យតែចង់មកតាមទ្រង់ពិតមែន នោះអាចធ្វើជាសិស្សរបស់ព្រះយេស៊ូបាន។ តើអ្នកចង់ធ្វើជាសិស្សរបស់ព្រះយេស៊ូទេ? យើងភាគច្រើនបានមកតាមសេចក្ដីអញ្ជើញដ៏សប្បុរសរបស់ព្រះយេស៊ូរួចទៅហើយ។ ណាមួយទៀត នៅក្នុងកិច្ចបម្រើផ្សាយ យើងក៏ប្រាប់មនុស្សថាព្រះយេស៊ូអញ្ជើញពួកគេឲ្យមកតាមទ្រង់ដែរ។
៣. តើយើងអាចជៀសវាងពីការរសាត់ចេញពីការកាន់តាមព្រះយេស៊ូយ៉ាងដូចម្ដេច?
៣ គួរឲ្យស្ដាយណាស់! អ្នកខ្លះចាប់អារម្មណ៍ទៅលើសេចក្ដីពិតដែលមានក្នុងគម្ពីរ ប៉ុន្តែ ពួកគេមិនបានបន្តរៀនទេ។ ផ្ទុយទៅវិញ ពួកគេបានឈប់រៀន ហើយនៅទីបំផុត«រសាត់ចេញ»ពីការកាន់តាមព្រះយេស៊ូ។ (ហេ. ២:១) តើអ្នកអាចជៀសវាងពីការធ្លាក់ចូលក្នុងអន្ទាក់នោះយ៉ាងដូចម្ដេច? យកល្អប្រសិនបើយើងសួរខ្លួនឯងសំណួរដូចតទៅនេះ: ‹ហេតុអ្វីយើងសម្រេចចិត្តកាន់តាមព្រះយេស៊ូនៅដើមដំបូង? តើការកាន់តាមព្រះយេស៊ូមានន័យអ្វី?›។ ដោយចាំចម្លើយចំពោះសំណួរទាំងពីរនេះនឹងជួយយើងឲ្យស្ថិតនៅក្នុងផ្លូវដ៏ត្រឹមត្រូវដែលយើងបានជ្រើសរើស ហើយជួយយើងឲ្យលើកទឹកចិត្តអ្នកឯទៀតឲ្យមកតាមព្រះយេស៊ូដែរ។
ហេតុអ្វីគួរធ្វើជាសិស្សរបស់ព្រះយេស៊ូ?
៤, ៥. ហេតុអ្វីព្រះយេស៊ូមានលក្ខណៈគ្រប់គ្រាន់ដើម្បីនាំមុខយើង?
៤ យេរេមា ជាអ្នកប្រកាសទំនាយម្នាក់បានពោលថា៖ «ឱព្រះយេហូវ៉ាអើយ ទូលបង្គំដឹងថា ផ្លូវរបស់មនុស្សមិនស្រេចនៅខ្លួនគេទេ ហើយដែលដំរង់ជំហានរបស់ខ្លួន នោះក៏មិនស្រេចនៅមនុស្សដែលដើរដែរ»។ (យេ. ១០:២៣) ត្រង់ចំណុចនេះ ប្រវត្ដិសាស្ត្រនៃមនុស្សលោកបានបញ្ជាក់ពីសច្ចភាពនៃពាក្យរបស់យេរេមា។ យើងឃើញកាន់តែច្បាស់ឡើងៗថា មនុស្សដែលមិនល្អឥតខ្ចោះគ្មានជោគជ័យក្នុងការតម្រង់ឬគ្រប់គ្រងខ្លួនឯងឡើយ។ យើងព្រមមកតាមព្រះយេស៊ូ ដោយសារយើងរៀនដឹងថាទ្រង់មានលក្ខណៈគ្រប់គ្រាន់ដើម្បីធ្វើជាអ្នកនាំមុខយើង។ ហើយទ្រង់នាំមុខយើងតាមរបៀបដែលគ្មានមនុស្សណាអាចយកតម្រាប់តាមបានឡើយ។ សូមពិចារណាមូលហេតុខ្លះៗដែលបញ្ជាក់ថាព្រះយេស៊ូមានលក្ខណៈគ្រប់គ្រាន់ដើម្បីនាំមុខយើង។
៥ មុនដំបូង ព្រះយេហូវ៉ាអង្គទ្រង់ផ្ទាល់បានជ្រើសរើសព្រះយេស៊ូជាមេស្ស៊ីដែលជាអ្នកនាំមុខ។ មានតែព្រះដែលជាអ្នកបង្កើត អាចដឹងថាត្រូវតែងតាំងបុគ្គលមួយណាជាអ្នកនាំមុខយើង មែនទេ? ទី២ ព្រះយេស៊ូមានលក្ខណៈសម្បត្ដិដែលយើងគួរកោតស្ងើចនិងអាចយកតម្រាប់តាម។ (សូមអាន អេសាយ ១១:២, ៣) ទ្រង់ជាគំរូដ៏ល្អឥតខ្ចោះ។ (១ពេ. ២:២១) ទី៣ ព្រះយេស៊ូយកចិត្តទុកដាក់យ៉ាងខ្លាំងចំពោះអស់អ្នកដែលកាន់តាមទ្រង់ ដូចទ្រង់បានបង្ហាញពេលស៊ូស្លាប់ដើម្បីពួកគាត់។ (សូមអាន យ៉ូហាន ១០:១៤, ១៥) ណាមួយទៀត ទ្រង់បង្ហាញថាខ្លួនជាគង្វាលម្នាក់ដែលយកចិត្តទុកដាក់ កាលដែលទ្រង់ណែនាំយើងឲ្យមានសុភមង្គលក្នុងជីវិតឥឡូវ និងនាំយើងឲ្យមានអនាគតដ៏អស្ចារ្យដែលគ្មានទីបញ្ចប់។ (យ៉ូន. ១០:១០, ១១; វិវរ. ៧:១៦, ១៧) ដោយមូលហេតុទាំងនេះនិងមូលហេតុឯទៀត យើងបានធ្វើការសម្រេចចិត្តដ៏ត្រឹមត្រូវពេលយើងជ្រើសរើសមកតាមទ្រង់។ ប៉ុន្តែ តើការមកតាមព្រះយេស៊ូរួមបញ្ចូលអ្វីខ្លះ?
៦. តើការកាន់តាមព្រះយេស៊ូរួមបញ្ចូលអ្វី?
ម៉ាថាយ ៧:២១-២៣) ពេលមនុស្សបង្ហាញចំណាប់អារម្មណ៍ទៅលើសេចក្ដីអញ្ជើញឲ្យកាន់តាមព្រះយេស៊ូ នោះយើងបង្ហាញថាជីវភាពរស់នៅគ្រប់ផ្នែករបស់គ្រិស្តសាសនិកពិត ត្រូវតែសមស្របតាមសេចក្ដីបង្រៀននិងគំរូរបស់ទ្រង់ ហើយត្រូវតែអនុវត្តតាមជារៀងរាល់ថ្ងៃដែរ។ ដើម្បីបញ្ជាក់អំពីអត្ថន័យនេះ សូមពិចារណាចំណុចខ្លះៗដែលយើងដឹងអំពីព្រះយេស៊ូ។
៦ ការធ្វើជាអ្នកកាន់តាមព្រះយេស៊ូគឺមិនគ្រាន់តែហៅខ្លួនជាគ្រិស្តសាសនិកប៉ុណ្ណោះឡើយ។ សព្វថ្ងៃនេះ មនុស្សប្រមាណជាពីរពាន់លាននាក់អះអាងថាខ្លួនជាគ្រិស្តសាសនិក។ ប៉ុន្តែ ការប្រព្រឹត្តរបស់ពួកគេបង្ហាញថាខ្លួនជា«ពួកទទឹងច្បាប់»ទៅវិញ។ (សូមអានចូរមានប្រាជ្ញាដូចព្រះយេស៊ូចុះ
៧, ៨. (ក) តើប្រាជ្ញាជាអ្វី? ហេតុអ្វីបានជាព្រះយេស៊ូមានប្រាជ្ញាច្រើនម្ល៉េះ? (ខ) តើព្រះយេស៊ូបង្ហាញប្រាជ្ញាយ៉ាងដូចម្ដេច? ហើយតើយើងអាចយកតម្រាប់តាមទ្រង់យ៉ាងដូចម្ដេច?
៧ ព្រះយេស៊ូបានសម្ដែងលក្ខណៈសម្បត្ដិដ៏ល្អប្រសើរជាច្រើន។ ប៉ុន្តែ យើងនឹងប្រមូលអារម្មណ៍ទៅលើលក្ខណៈសម្បត្ដិតែបួនប៉ុណ្ណោះ ពោលគឺប្រាជ្ញា ចិត្តរាបទាប ចិត្តខ្នះខ្នែង និងសេចក្ដីស្រឡាញ់។ មុនដំបូង សូមគិតអំពីប្រាជ្ញារបស់ទ្រង់ ដែលជាភាពប៉ិនប្រសប់ក្នុងការប្រើចំណេះ និងការយល់ដឹងតាមរបៀបដែលផ្ដល់ប្រយោជន៍។ សាវ័កប៉ុលបានសរសេរថា៖ «មានគ្រប់ទាំងផលថ្លៃវិសេសនៃប្រាជ្ញា នឹងសេចក្ដីចេះដឹងលាក់ទុកក្នុង[ព្រះយេស៊ូ]»។ (កូល. ២:៣) តើព្រះយេស៊ូមានប្រាជ្ញាបែបនេះពីណាមក? អង្គទ្រង់ផ្ទាល់មានប្រសាសន៍ថា៖ «គឺខ្ញុំនិយាយសេចក្ដីទាំងនេះ តាមដែលព្រះវរបិតាបានបង្រៀនខ្ញុំ»។ (យ៉ូន. ៨:២៨) ត្រូវហើយ ព្រះយេហូវ៉ាផ្ដល់ប្រាជ្ញាឲ្យព្រះយេស៊ូ។ ដូច្នេះ យើងមិនភ្ញាក់ផ្អើលពីការគិតពិចារណាដ៏ត្រឹមត្រូវរបស់ទ្រង់ឡើយ។
៨ ជាឧទាហរណ៍ ព្រះយេស៊ូបានគិតពិចារណាយ៉ាងត្រឹមត្រូវក្នុងការជ្រើសរើសគន្លងជីវិតរបស់ខ្លួន។ ទ្រង់បានសម្រេចចិត្តរក្សាឲ្យមានរបៀបរស់នៅដ៏សាមញ្ញធម្មតា ហើយផ្ចង់អារម្មណ៍ទៅលើអ្វីតែមួយគត់ ពោលគឺការធ្វើតាមបំណងប្រាថ្នារបស់ព្រះ។ ដោយប្រាជ្ញា ទ្រង់បានចំណាយពេលវេលានិងកម្លាំងដើម្បីចម្រើនផលប្រយោជន៍នៃរាជាណាចក្ររបស់ព្រះ។ យើងយកតម្រាប់តាមព្រះយេស៊ូដោយខំរក្សាឲ្យមាន‹ភ្នែកល្អ›។ ដូច្នេះហើយ យើងជៀសវាងពីរបស់របរខ្លះដែលមិនចាំបាច់ ដែលអាចក្លាយទៅជាបន្ទុកធ្ងន់ស៊ីអស់ទាំងកម្លាំងទាំងស្មារតីរបស់យើង។ (ម៉ាថ. ៦:២២) គ្រិស្តសាសនិកជាច្រើនបានចាត់វិធានការឲ្យមានរបៀបរស់នៅដ៏សាមញ្ញធម្មតា ដើម្បីអាចចំណាយពេលច្រើនជាងក្នុងកិច្ចបម្រើផ្សាយ។ បងប្អូនខ្លះបានចាប់ផ្ដើមធ្វើជាអ្នកត្រួសត្រាយ។ ប្រសិនបើបងប្អូនស្ថិតក្នុងចំណោមអ្នកដែលបានចាប់ផ្ដើមធ្វើជាអ្នកត្រួសត្រាយ នេះជាការដ៏គួរឲ្យសរសើរណាស់! ការ‹ស្វែងរកនគរព្រះជាមុនសិន›នាំឲ្យមានសុភមង្គលនិងសេចក្ដីស្កប់ស្កល់ជាច្រើន។—ម៉ាថ. ៦:៣៣
ចូរមានចិត្តរាបទាបដូចព្រះយេស៊ូចុះ
៩, ១០. តើព្រះយេស៊ូបានបង្ហាញចិត្តរាបទាបយ៉ាងដូចម្ដេច?
៩ ទិដ្ឋភាពទី២នៃបុគ្គលិកលក្ខណៈរបស់ព្រះយេស៊ូដែលយើងនឹងពិចារណាគឺចិត្តរាបទាបរបស់ទ្រង់។ កាលណាមនុស្សមិនល្អឥតខ្ចោះទទួលអំណាចណាមួយ នោះជារឿយៗ ពួកគាត់ចាប់មានចិត្តធំ។ ប៉ុន្តែ ព្រះយេស៊ូខុសស្រឡះពីនេះ! ទោះបើទ្រង់មានភារកិច្ចសំខាន់បំផុតក្នុងការសម្រេចគោលបំណងរបស់ព្រះយេហូវ៉ាក៏ពិតមែន តែព្រះយេស៊ូមិនបង្ហាញចិត្តក្រអឺតសោះ សូម្បីតែបន្ដិចក៏មិនមានដែរ។ ហើយយើងត្រូវបានលើកទឹកចិត្តឲ្យមានចិត្តរាបទាបដូចទ្រង់ដែរ។ សាវ័កប៉ុលបានសរសេរថា៖ «ត្រូវតែមានគំនិតគិតដូចជាព្រះគ្រីស្ទយេស៊ូវវិញ ដែលទោះបើទ្រង់មានរូបអង្គជាព្រះក៏ដោយ គង់តែមិនបានរាប់សេចក្ដីដែលស្មើនឹងព្រះនោះ ទុកជាសេចក្ដីដែលគួរកាន់ខ្ជាប់ឡើយ គឺទ្រង់បានលះបង់ព្រះអង្គទ្រង់ មកយករូបភាពជាបាវបំរើវិញ ព្រមទាំងប្រសូតមកមានរូបជាមនុស្សផង»។ (ភី. ២:៥-៧) តើនេះរួមបញ្ចូលអ្វីខ្លះ?
១០ ព្រះយេស៊ូមានឯកសិទ្ធិដ៏រុងរឿងក្នុងការគង់ជាមួយបិតានៅស្ថានសួគ៌ តែទ្រង់បានស្ម័គ្រចិត្ត«លះបង់ព្រះអង្គទ្រង់»វិញ។ ជីវិតរបស់ព្រះយេស៊ូបានផ្ទេរមកក្នុងផ្ទៃនាងព្រហ្មចារីសាសន៍យូដាម្នាក់ ហើយក្នុងរយៈពេលប្រាំបួនខែ ទ្រង់បានលូតលាស់ធំធាត់រហូតដល់ទ្រង់បានកើតមកជាទារកក្មេងខ្ចី នៅក្នុងគ្រួសារជាងឈើដ៏សាមញ្ញមួយ។ ក្នុងផ្ទះរបស់យ៉ូសែប ព្រះយេស៊ូបានធំចម្រើនឡើងជាក្មេងចេះដើរតេសតាស រួចមកជាកុមារមួយរូប ហើយទីបំផុតជាយុវជនម្នាក់។ ព្រះយេស៊ូមិនមានអំពើខុសឆ្គងទេ តែយ៉ាងណាក៏ដោយ ពីទារករហូតដល់យុវវ័យ នោះទ្រង់
ស្ថិតនៅក្រោមការគ្រប់គ្រងរបស់មាតាបិតាដែលជាមនុស្សមិនល្អឥតខ្ចោះ។ (លូ. ២:៥១, ៥២) នេះជាភាពរាបទាបដែលមិនមានពីរទេ!១១. តើយើងអាចយកតម្រាប់តាមព្រះយេស៊ូតាមរបៀបណាខ្លះ?
១១ នៅពេលដែលយើងស្ម័គ្រចិត្តទទួលភារកិច្ចដែលជួនកាលមើលទៅហាក់ដូចជាថោកទាប នោះបានន័យថាយើងយកតម្រាប់តាមចិត្តរាបទាបរបស់ព្រះយេស៊ូហើយ។ ជាឧទាហរណ៍ សូមពិចារណាពីភារកិច្ចរបស់យើងក្នុងការផ្សព្វផ្សាយដំណឹងល្អ។ កិច្ចការបែបនោះមើលទៅឃើញដូចជាថោកទាប ជាពិសេសនៅពេលដែលម្ចាស់ផ្ទះធ្វើព្រងើយកន្តើយ សើចចំអកដាក់ ឬជំទាស់នឹងយើង។ យ៉ាងណាក្ដី ការស៊ូទ្រាំក្នុងកិច្ចការផ្សព្វផ្សាយ គឺជាការជួយអ្នកឯទៀតឲ្យមកតាមព្រះយេស៊ូស្របទៅតាមសេចក្ដីអញ្ជើញរបស់ទ្រង់។ ដូច្នេះយើងអាចជួយសង្គ្រោះជីវិត។ (សូមអាន ធីម៉ូថេទី២ ៤:១-៥) ឧទាហរណ៍មួយទៀតគឺជាការថែទាំសម្អាតសាលប្រជុំរបស់យើង។ នេះរួមបញ្ចូលភារកិច្ចខ្លះដែលមើលទៅហាក់ដូចជាថោកទាប! ដូចជាការប្រមូលយកសំរាមពីធុងទៅចោល ឬបោសជូតកម្រាលឥដ្ឋការ៉ូជាដើម។ ក៏ប៉ុន្តែ យើងទទួលស្គាល់ថា ការថែទាំសម្អាតសាលប្រជុំ ដែលជាមណ្ឌលនៃការថ្វាយបង្គំពិត គឺជាផ្នែកមួយនៃកិច្ចបម្រើបរិសុទ្ធរបស់យើង។ ដោយស្ម័គ្រចិត្តបំពេញភារកិច្ចដែលមើលទៅហាក់ដូចជាថោកទាប នោះយើងបង្ហាញចិត្តរាបទាប ហើយធ្វើដូច្នេះបានន័យថាយើងកំពុងដើរតាមលំអានដានលោកគ្រិស្ត។
ចូរមានចិត្តខ្នះខ្នែងដូចព្រះយេស៊ូចុះ
១២, ១៣. (ក) តើព្រះយេស៊ូបង្ហាញចិត្តខ្នះខ្នែងយ៉ាងដូចម្ដេច? តើអ្វីជំរុញទឹកចិត្តទ្រង់ឲ្យធ្វើដូច្នេះ? (ខ) តើអ្វីដែលនឹងជំរុញទឹកចិត្តយើងឲ្យមានចិត្តខ្នះខ្នែងក្នុងកិច្ចបម្រើផ្សាយ?
១២ សូមយើងពិចារណាអំពីចិត្តខ្នះខ្នែងរបស់ព្រះយេស៊ូនៅក្នុងកិច្ចបម្រើផ្សាយ។ ព្រះយេស៊ូបានធ្វើកិច្ចការច្រើនណាស់ពេលទ្រង់នៅផែនដី។ ពេលទ្រង់នៅក្មេងទ្រង់បានធ្វើជាជាងឈើជាមួយយ៉ូសែបដែលជាឪពុកចិញ្ចឹម។ ក្នុងអំឡុងកិច្ចបម្រើ ទ្រង់បានធ្វើអព្ភូតហេតុជាច្រើនមានទាំងការព្យាបាលជំងឺ ហើយនិងការប្រោសមនុស្សស្លាប់ឲ្យរស់ឡើងវិញ។ ក៏ប៉ុន្តែ កិច្ចការចម្បងរបស់ទ្រង់គឺជាការផ្សព្វផ្សាយដំណឹងល្អ និងបង្រៀនអស់អ្នកដែលមានចិត្តចង់ស្ដាប់។ (ម៉ាថ. ៤:២៣) ក្នុងឋានៈជាអ្នកកាន់តាមទ្រង់ យើងក៏ត្រូវធ្វើកិច្ចការដូចនេះដែរ។ ដូច្នេះ តើតាមរបៀបណាដែលយើងអាចយកតម្រាប់តាមទ្រង់? របៀបមួយគឺ យើងអាចបណ្ដុះឲ្យមានបំណងចិត្តដូចព្រះយេស៊ូ។
១៣ អ្វីដែលសំខាន់នោះ គឺជាសេចក្ដីស្រឡាញ់ចំពោះព្រះដែលបានជំរុញទឹកចិត្តព្រះយេស៊ូឲ្យផ្សព្វផ្សាយនិងបង្រៀនមនុស្ស។ ក៏ប៉ុន្តែ ព្រះយេស៊ូក៏ស្រឡាញ់សេចក្ដីពិតដែលទ្រង់បង្រៀនដែរ។ ចំពោះព្រះយេស៊ូ សេចក្ដីពិតដែលទ្រង់ប្រកាសផ្សាយដល់មនុស្សទូទៅជាអ្វីដែលមានតម្លៃបំផុត ហើយទ្រង់មានចិត្តខ្នះខ្នែងចង់ផ្សព្វផ្សាយដល់ពួកគេ។ យើងក៏មានគំនិតដូចទ្រង់ដែរ ក្នុងនាមជា‹គ្រូបង្រៀន›បណ្ដាំរបស់ព្រះ។ សូមគិតអំពីសេចក្ដីពិតដ៏មានតម្លៃខ្លះៗដែលយើងបានរៀនពីបណ្ដាំរបស់ព្រះ! យើងដឹងរឿងស្តីអំពីអ្នកណាដែលមានសិទ្ធិគ្រប់គ្រងសកលលោកទាំងមូល ហើយពីរបៀបដែលនឹងត្រូវដោះស្រាយ។ យើងយល់យ៉ាងច្បាស់នូវអ្វីដែលគម្ពីរបានបង្រៀនស្តីអំពីស្ថានភាពរបស់មនុស្សស្លាប់ និងអំពីពរដែលរាជាណាចក្ររបស់ព្រះនឹងនាំមកក្នុងពិភពលោកថ្មីរបស់ទ្រង់។ សេចក្ដីពិតទាំងអស់នេះនៅតែមានតម្លៃដដែល មិនថាយើងទើបតែបានរៀន ឬក៏ធ្លាប់បានរៀនយូរមកហើយក្ដី។ សេចក្ដីពិតបែបនេះមានតម្លៃកាត់ថ្លៃមិនម៉ាថាយ ១៣:៥២) ដោយផ្សព្វផ្សាយដំណឹងល្អដែលផុសចេញពីចិត្តសាទរ នោះយើងផ្ទេរសេចក្ដីស្រឡាញ់ចំពោះអ្វីដែលព្រះយេហូវ៉ាបានបង្រៀនយើងទៅអ្នកឯទៀត។
បានឡើយ។ (សូមអាន១៤. តើយើងអាចយតម្រាប់តាមរបៀបដែលព្រះយេស៊ូបង្រៀនយ៉ាងដូចម្ដេច?
១៤ សូមកត់សម្គាល់អំពីរបៀបដែលព្រះយេស៊ូបង្រៀនដែរ។ ទ្រង់តែងតែទាក់ទាញអារម្មណ៍អ្នកស្ដាប់ទៅលើបទគម្ពីរ។ ពេលលើកចំណុចសំខាន់មួយ ទ្រង់តែងតែមានប្រសាសន៍ថា៖ «មានសេចក្ដីចែងទុកមកដូច្នេះ»។ (ម៉ាថ. ៤:៤; ២១:១៣) គម្ពីរបានកត់ទុកពាក្យរបស់ព្រះយេស៊ូ ហើយបានបង្ហាញថាទ្រង់លើកខគម្ពីរចំៗឬតាមរបៀបប្រយោល ជាង៥០ភាគរយពីបទគម្ពីរភាសាហេព្រើរ។ ដូចព្រះយេស៊ូដែរ ក្នុងកិច្ចបម្រើផ្សាយ យើងពឹងផ្អែកទាំងស្រុងទៅលើគម្ពីរ ហើយយើងព្យាយាមលើកបទគម្ពីរឲ្យបានច្រើនបំផុត។ តាមរបៀបនោះ មនុស្សដែលមានចិត្តគំនិតត្រឹមត្រូវអាចឃើញដោយខ្លួនឯង ថាយើងបង្រៀនគំនិតរបស់ព្រះមិនមែនគំនិតរបស់យើងទេ។ យើងមានចិត្តសប្បាយមែន! ពេលអ្នកណាម្នាក់យល់ព្រមឲ្យយើងអានពីគម្ពីរ និងព្រមពិភាក្សា ស្តីអំពីប្រយោជន៍ និងអត្ថន័យនៃបណ្ដាំរបស់ព្រះ។ នៅទីបំផុត យើងមានអំណរខ្លាំងណាស់បើមនុស្សនោះសុខចិត្តកាន់តាមព្រះយេស៊ូ។
ការកាន់តាមព្រះយេស៊ូមានន័យថាយើងស្រឡាញ់អ្នកដទៃ
១៥. តើលក្ខណៈសម្បត្ដិដ៏អស្ចារ្យរបស់ព្រះយេស៊ូជាអ្វី? ហើយតើការសញ្ជឹងគិតអំពីលក្ខណៈសម្បត្ដិនេះមានឥទ្ធិពលមកលើយើងយ៉ាងដូចម្ដេច?
១៥ ទិដ្ឋភាពចុងក្រោយនៃបុគ្គលិកលក្ខណៈរបស់ព្រះយេស៊ូដែលយើងនឹងពិភាក្សាគឺសេចក្ដីស្រឡាញ់ចំពោះមនុស្ស ជាអ្វីដែលធ្វើឲ្យយើងមានភាពកក់ក្ដៅក្នុងចិត្តជាទីបំផុត។ សាវ័កប៉ុលបានសរសេរថា៖ «សេចក្ដីស្រឡាញ់របស់ព្រះគ្រីស្ទបង្ខំ[ឬ«ជំរុញ»]យើងខ្ញុំ»។ (២កូ. ៥:១៤; ២ករ. ៥:១៤, ខ.ស.) កាលណាយើងសញ្ជឹងគិតអំពីសេចក្ដីស្រឡាញ់ដែលព្រះយេស៊ូមានចំពោះមនុស្សជាតិជាទូទៅ និងចំពោះយើងម្នាក់ៗ នោះយើងមានភាពកក់ក្ដៅក្នុងចិត្ត ហើយជំរុញយើងឲ្យយកតម្រាប់តាមទ្រង់។
១៦, ១៧. តើព្រះយេស៊ូបង្ហាញសេចក្ដីស្រឡាញ់ដល់អ្នកឯទៀតតាមរបៀបណាខ្លះ?
១៦ តើព្រះយេស៊ូបង្ហាញសេចក្ដីស្រឡាញ់ដល់អ្នកឯទៀតយ៉ាងដូចម្ដេច? ការដែលទ្រង់ស្ម័គ្រចិត្តប្ដូរជីវិតជំនួសយើង នោះជាការបង្ហាញសេចក្ដីស្រឡាញ់ដ៏ខ្លាំងបំផុត។ (យ៉ូន. ១៥:១៣) ក៏ប៉ុន្តែក្នុងអំឡុងកិច្ចបម្រើរបស់ទ្រង់ ព្រះយេស៊ូក៏បានបង្ហាញសេចក្ដីស្រឡាញ់តាមរបៀបផ្សេងៗដែរ។ ជាឧទាហរណ៍ ទ្រង់មានចិត្តអាណិតអាសូរចំពោះអ្នកដែលរងទុក្ខលំបាក។ ពេលទ្រង់បានឃើញម៉ារានិងពួកអ្នកដែលនៅជាមួយនឹងនាងកំពុងយំសោក ដោយព្រោះតែឡាសារស្លាប់ ព្រះយេស៊ូមានសេចក្ដីរំជួលទាំងវិលវល់ក្នុងចិត្ត។ ថ្វីដ្បិតតែទ្រង់ហៀបនឹងប្រោសគាត់ឲ្យរស់ឡើងវិញក្ដី ព្រះយេស៊ូរំជួលចិត្តខ្លាំងពេកក៏ធ្វើឲ្យ«ទ្រង់ព្រះកន្សែង»។—យ៉ូន. ១១:៣២-៣៥
១៧ ពេលព្រះយេស៊ូចាប់ផ្ដើមកិច្ចបម្រើផ្សាយ នោះមានមនុស្សឃ្លង់ម្នាក់មកឯទ្រង់ ហើយនិយាយថា៖ «បើទ្រង់សព្វព្រះហឫទ័យ ទ្រង់អាចនឹងប្រោសឲ្យទូលបង្គំជាស្អាតបាន»។ តើព្រះយេស៊ូតបឆ្លើយយ៉ាងណា? កំណត់ហេតុចែងថា៖ «ទ្រង់មានព្រះហឫទ័យក្ដួលអាណិត»។ រួចហើយទ្រង់ធ្វើការអស្ចារ្យមួយ។ ទ្រង់«លូកព្រះហស្តទៅពាល់គាត់ដោយបន្ទូលថា៖ ‹ខ្ញុំចង់ដែរ ឲ្យជាស្អាតទៅ›។ ស្រាប់តែរោគឃ្លង់ចេញពីគាត់បាត់ទៅ ហើយគាត់បានជាស្អាត»។ យោងទៅតាមក្រឹត្យវិន័យលោកម៉ូសេ គេចាត់ទុកមនុស្សឃ្លង់ថាមិនស្អាត។ ព្រះយេស៊ូប្រាកដជាអាចព្យាបាលមនុស្សឃ្លង់នោះពីចម្ងាយដោយមិនបាច់ប៉ះពាល់គាត់ផង។ ក៏ប៉ុន្តែ កាលដែលព្រះយេស៊ូព្យាបាលមនុស្សឃ្លង់នោះ ទ្រង់អនុញ្ញាតឲ្យគាត់ពាល់ដៃទ្រង់ ប្រហែលនេះជាលើកដំបូងដែលគាត់ពាល់មនុស្សឯទៀតក្នុងរយៈម៉ាក. ១:៤០-៤២
ពេលយូរឆ្នាំមកហើយ។ នេះពិតជាទង្វើដែលបង្ហាញចិត្តអាណិតអាសូរដែលគួរឲ្យអស្ចារ្យមែន!—១៨. តើយើងអាចបង្ហាញចិត្ត«អាណិតអាសូរ»យ៉ាងដូចម្ដេច?
១៨ ក្នុងឋានៈជាអ្នកកាន់តាមគ្រិស្តយើងត្រូវតែចេះបង្ហាញការយល់ចិត្តដែរ ដោយបង្ហាញ«ចិត្តអាណិតអាសូរ»។ (១ពេ. ៣:៨) មិនមែនជាការងាយស្រួលឲ្យយើងយល់ពីអារម្មណ៍របស់បងប្អូនរួមជំនឿដែលមានជំងឺរ៉ាំរ៉ៃ ឬការធ្លាក់ទឹកចិត្តឡើយ ជាពិសេសដោយសារយើងមិនដែលពិសោធសេចក្ដីឈឺចាប់បែបនោះផ្ទាល់ខ្លួន។ ទោះជាយ៉ាងណាក៏ដោយ ព្រះយេស៊ូយល់ពីអារម្មណ៍របស់អ្នកជំងឺសូម្បីតែទ្រង់មិនដែលឈឺក្ដី។ តើតាមរបៀបណាដែលយើងអាចបណ្ដុះឲ្យចេះយល់អារម្មណ៍អ្នកឯទៀតដូចទ្រង់បាន? យើងត្រូវប្រុងស្ដាប់ដោយចិត្តអត់ធ្មត់ពេលដែលអ្នករងទុក្ខណាម្នាក់ទុកចិត្តយើង ហើយចង់ប្រាប់យើងដោយអស់ពីចិត្តអស់ពីថ្លើមរបស់គេ។ គួរគប្បីឲ្យយើងសួរខ្លួនថា ‹ប្រសិនបើខ្ញុំស្ថិតនៅក្នុងស្ថានភាពបែបនោះ តើខ្ញុំនឹងមានអារម្មណ៍យ៉ាងណា?›។ ប្រសិនបើយើងខំយល់អារម្មណ៍អ្នកឯទៀតឲ្យបានកាន់តែច្រើន យើងនឹងអាច«ជួយកំសាន្តដល់ពួកអ្នកណាដែលមានសេចក្ដីទន់ក្រំចិត្ត»បានកាន់តែល្អដែរ។ (១ថែ. ៥:១៤) នោះយើងកំពុងដើរតាមលំអានដានព្រះយេស៊ូពិតមែន។
១៩. តើគំរូរបស់ព្រះយេស៊ូមានឥទ្ធិពលលើយើងតាមរបៀបណាខ្លះ?
១៩ ការសិក្សាពីពាក្យនិងការប្រព្រឹត្តរបស់ព្រះយេស៊ូពិតជាអ្វីដែលធ្វើឲ្យយើងរំភើបចិត្តណាស់! ព្រោះថាបើយើងរៀនកាន់តែច្រើនអំពីទ្រង់ នោះយើងក៏កាន់តែចង់ធ្វើឲ្យដូចទ្រង់ មិនត្រឹមតែប៉ុណ្ណោះយើងក៏កាន់តែចង់ឲ្យអ្នកឯទៀតធ្វើដូចទ្រង់ដែរ។ ដូច្នេះ ចូរយើងមានចិត្តអរសប្បាយក្នុងការយកតម្រាប់តាមមេស្ស៊ីដែលជាស្តេចនៅពេលឥឡូវ និងនៅពេលអនាគតផងដែរ!
តើអ្នកអាចពន្យល់បានទេ?
• តើយើងអាចបង្ហាញប្រាជ្ញាដូចព្រះយេស៊ូយ៉ាងដូចម្ដេច?
• តើយើងអាចបង្ហាញចិត្តរាបទាបតាមរបៀបណាខ្លះ?
• តើយើងអាចបណ្ដុះឲ្យមានចិត្តខ្នះខ្នែងក្នុងកិច្ចបម្រើផ្សាយយ៉ាងដូចម្ដេច?
• តើយើងអាចយកតម្រាប់តាមព្រះយេស៊ូក្នុងការបង្ហាញសេចក្ដីស្រឡាញ់ដល់អ្នកឯទៀតយ៉ាងដូចម្ដេច?
[សំណួរសម្រាប់អត្ថបទសិក្សា]
[ប្រអប់នៅទំព័រ១០]
សៀវភៅថ្មី
ក្នុងអំឡុងកម្មវិធីមហាសន្និបាតតាមតំបន់ឆ្នាំ២០០៧ យើងបានទទួលសៀវភៅថ្មីមួយជាភាសាអង់គ្លេស។ សៀវភៅនេះមាន១៩២ទំព័រ ហើយមានចំណងជើងថា ‹អញ្ជើញមកតាមខ្ញុំចុះ›។ សៀវភៅថ្មីនេះត្រូវបានរៀបចំដើម្បីជួយគ្រិស្តសាសនិកឲ្យផ្ដោតអារម្មណ៍ទៅលើព្រះយេស៊ូ ជាពិសេសលើលក្ខណៈសម្បត្ដិនិងការប្រព្រឹត្តរបស់ទ្រង់។ ក្រោយពីពីរជំពូកដំបូងដែលជាពាក្យផ្ដើម នោះផ្នែកទី១នៃសៀវភៅនេះរៀបរាប់អំពីលក្ខណៈសម្បត្ដិដ៏អស្ចារ្យរបស់ព្រះយេស៊ូ ដូចជាចិត្តរាបទាប ចិត្តក្លាហាន ប្រាជ្ញា ការស្ដាប់បង្គាប់ និងការស៊ូទ្រាំរបស់ព្រះយេស៊ូជាដើម។
បន្ទាប់ពីនេះ មានផ្នែកផ្សេងៗដែលទាក់ទងនឹងសកម្មភាពរបស់ព្រះយេស៊ូក្នុងឋានៈជាអ្នកបង្រៀន និងអ្នកផ្សាយដំណឹងល្អ ព្រមទាំងវិធីខ្លះៗដែលទ្រង់បានបង្ហាញសេចក្ដីស្រឡាញ់ដ៏ធំធេង។ ជាទូទៅក្នុងសៀវភៅនេះ មានព័ត៌មានដែលត្រូវបានរៀបចំដើម្បីជួយគ្រិស្តសាសនិកឲ្យយកតម្រាប់តាមព្រះយេស៊ូ។
យើងជឿជាក់ថាសៀវភៅថ្មីនេះនឹងជំរុញទឹកចិត្តយើងគ្រប់គ្នាឲ្យពិនិត្យមើលខ្លួនឯងហើយសួរថា ‹តើខ្ញុំពិតជាកាន់តាមព្រះយេស៊ូទេ? តើខ្ញុំអាចកាន់តាមទ្រង់ឲ្យបានដិតដល់ជាងយ៉ាងដូចម្ដេច?›។ សៀវភៅថ្មីនេះក៏នឹងជួយអ្នកដទៃដែលមានចិត្តស្មោះឲ្យកាន់តាមព្រះយេស៊ូជាមួយយើងដែរ។
[រូបភាពនៅទំព័រ៩]
ព្រះយេស៊ូស្ម័គ្រចិត្តមកផែនដី ហើយកើតជាទារកក្មេងខ្ចី។ តើនេះតម្រូវឲ្យទ្រង់មានលក្ខណៈសម្បត្ដិអ្វី?
[រូបភាពនៅទំព័រ១១]
តើអ្វីនឹងជំរុញយើងឲ្យមានចិត្តខ្នះខ្នែងក្នុងកិច្ចបម្រើផ្សាយ?