ក្ដីស្រឡាញ់របស់គ្រិស្ដជំរុញយើងឲ្យបង្ហាញក្ដីស្រឡាញ់
ក្ដីស្រឡាញ់របស់គ្រិស្តជំរុញយើងឲ្យបង្ហាញក្ដីស្រឡាញ់
«លោក[យេស៊ូ]ស្រឡាញ់ពួកអ្នកដែលជារបស់លោក ដែលនៅក្នុងពិភពលោកនេះ . . . លោកស្រឡាញ់ពួកគាត់រហូតដល់ទីបំផុត»។—យ៉ូន. ១៣:១
១, ២. (ក) ហេតុអ្វីបានជាក្ដីស្រឡាញ់ដែលលោកយេស៊ូបង្ហាញគឺអស្ចារ្យម្ល៉េះ? (ខ) ក្នុងអត្ថបទនេះ តើយើងនឹងពិភាក្សាលក្ខណៈអ្វីខ្លះនៃក្ដីស្រឡាញ់?
លោកយេស៊ូទុកគំរូល្អឥតខ្ចោះឲ្យយើងស្តីអំពីការបង្ហាញក្ដីស្រឡាញ់។ សេចក្ដីបង្រៀននិងមរណភាពរបស់លោកដែលជាគ្រឿងបូជា ព្រមទាំងប្រសាសន៍និងការប្រព្រឹត្តរបស់លោក សុទ្ធតែបង្ហាញពីក្ដីស្រឡាញ់។ ពេលលោកយេស៊ូនៅផែនដី លោកបានបង្ហាញក្ដីស្រឡាញ់ចំពោះមនុស្សដែលលោកជួប ហើយជាពិសេសចំពោះអ្នកកាន់តាមរបស់លោក។ លោកបានធ្វើដូច្នេះរហូតដល់លោកផុតដង្ហើមទៅ។
២ គំរូដ៏អស្ចារ្យរបស់លោកយេស៊ូក្នុងការបង្ហាញក្ដីស្រឡាញ់ ទុកខ្នាតតម្រាខ្ពស់ឲ្យអ្នកកាន់តាមលោកធ្វើតាម។ គំរូរបស់លោកក៏ជំរុញយើងឲ្យបង្ហាញក្ដីស្រឡាញ់ស្រដៀងគ្នាដែរចំពោះបងប្អូនរួមជំនឿ ថែមទាំងចំពោះអ្នកឯទៀតផង។ ក្នុងអត្ថបទនេះ យើងនឹងពិចារណាអ្វីដែលអ្នកចាស់ទុំក្នុងក្រុមជំនុំអាចរៀនពីលោកយេស៊ូស្តីអំពីការបង្ហាញក្ដីស្រឡាញ់ចំពោះបុគ្គលដែលធ្វើខុស សូម្បីតែកំហុសនោះធ្ងន់ធ្ងរក៏ដោយ។ យើងក៏នឹងពិភាក្សាអំពីវិធីដែលក្ដីស្រឡាញ់របស់លោកយេស៊ូជំរុញពួកគ្រិស្តសាសនិកឲ្យជួយបងប្អូនរួមជំនឿពេលមានមហន្តរាយ ជំងឺ ឬបញ្ហាខាងសេដ្ឋកិច្ច។
៣. ទោះជាពេត្រុសធ្វើខុសធ្ងន់ធ្ងរក៏ដោយ តើលោកយេស៊ូបានប្រព្រឹត្តយ៉ាងណាទៅលើគាត់?
៣ នៅរាត្រីមុនគេសម្លាប់លោកយេស៊ូ សាវ័កពេត្រុសបានបដិសេធមិនទទួលស្គាល់លោកអស់បីដង។ (ម៉ាក. ១៤:៦៦-៧២) ប៉ុន្តែ ពេលពេត្រុសបានប្រែចិត្តដូចលោកយេស៊ូបានទាយទុក នោះលោកបានអភ័យទោសឲ្យគាត់។ លោកយេស៊ូបានប្រគល់ភារកិច្ចសំខាន់ដល់ពេត្រុស។ (លូក. ២២:៣២; សកម្ម. ២:១៤; ៨:១៤-១៧; ១០:៤៤, ៤៥) តើយើងទាញមេរៀនអ្វីអំពីចិត្តគំនិតរបស់លោកយេស៊ូក្នុងការប្រព្រឹត្តទៅលើបុគ្គលដែលបានធ្វើខុស?
បង្ហាញចិត្តគំនិតដូចគ្រិស្តពេលប្រព្រឹត្តទៅលើបុគ្គលដែលធ្វើខុស
៤. តើកាលៈទេសៈណាតម្រូវឲ្យយើងបង្ហាញចិត្តគំនិតដូចគ្រិស្ត?
៤ ក្នុងចំណោមកាលៈទេសៈជាច្រើនដែលតម្រូវឲ្យយើងបង្ហាញចិត្តគំនិតដូចគ្រិស្ត កាលៈទេសៈមួយដែលពិតជាធ្វើឲ្យយើងពិបាកចិត្ត គឺពេលសមាជិកគ្រួសារយើងឬសមាជិកក្រុមជំនុំប្រព្រឹត្តអំពើខុសឆ្គង។ គួរឲ្យស្ដាយណាស់ ដែលចិត្តគំនិតរបស់មនុស្សក្នុងពិភពលោកបានធ្វើឲ្យសីលធម៌កាន់តែអាប់ឱនទៅៗ កាលដែលរបៀបរបបពិភពលោករបស់សាថានជិតមកដល់ទីបញ្ចប់។ មនុស្សក្នុងពិភពលោកនេះមានចិត្តគំនិតអាក្រក់ឬមិនខ្ចីអើពើចំពោះសីលធម៌ ហើយនេះអាចជះឥទ្ធិពលទៅលើមនុស្សគ្រប់វ័យ ព្រមទាំងអាចនាំឲ្យការតាំងចិត្តរបស់ពួកគេក្នុងការធ្វើអ្វីៗដែលត្រឹមត្រូវកាន់តែអន់ថយ។ នៅសតវត្សរ៍ទី១ អ្នកខ្លះបានត្រូវបណ្ដាច់មិត្តភាពពីក្រុមជំនុំ ហើយខ្លះទៀតបានត្រូវប្រដៅតម្រង់។ សព្វថ្ងៃក៏ដូចគ្នាដែរ។ (១កូ. ៥:១១-១៣; ១ធី. ៥:២០) យ៉ាងណាក្ដី ពេលពួកអ្នកចាស់ទុំដែលពិនិត្យមើលរឿងទាំងនេះបង្ហាញក្ដីស្រឡាញ់ដូចគ្រិស្ត នោះអាចមានឥទ្ធិពលខ្លាំងទៅលើបុគ្គលដែលធ្វើខុស។
៥. តើពួកអ្នកចាស់ទុំគួរយកតម្រាប់តាមចិត្តគំនិតរបស់គ្រិស្តយ៉ាងណាក្នុងការប្រព្រឹត្តទៅលើអ្នកដែលធ្វើខុស?
៥ ដូចលោកយេស៊ូ ពួកអ្នកចាស់ទុំត្រូវតែគាំទ្រខ្នាតតម្រាដ៏សុចរិតរបស់ព្រះយេហូវ៉ានៅគ្រប់ពេលវេលា។ ដោយធ្វើដូចនេះ ពួកគេបង្ហាញចិត្តស្លូត ក្ដីសប្បុរស និងក្ដីស្រឡាញ់របស់ព្រះយេហូវ៉ា។ ពេលបុគ្គលម្នាក់ពិតជាប្រែចិត្ត ហើយមាន«ចិត្តសង្រេង» និង«វិញ្ញាណទន់ទាប»ដោយសារកំហុសរបស់ខ្លួន នោះប្រហែលជាស្រួលឲ្យពួកអ្នកចាស់ទុំ«កែតម្រង់អ្នកនោះដោយចិត្តស្លូតបូត»។ (ទំនុក. ៣៤:១៨; កាឡ. ៦:១) ប៉ុន្តែ តើពួកអ្នកចាស់ទុំគួរប្រព្រឹត្តយ៉ាងណាទៅលើបុគ្គលដែលរឹងរូសនិងមិនសូវស្ដាយកំហុស?
៦. តើពួកអ្នកចាស់ទុំមិនគួរប្រព្រឹត្តយ៉ាងណាទៅលើអ្នកដែលធ្វើខុស? ហើយហេតុអ្វី?
១កូ. ២:១៦; សូមអាន យ៉ាកុប ១:១៩, ២០) នៅសម័យលោកយេស៊ូ លោកបានព្រមានមនុស្សខ្លះយ៉ាងចំៗ តែលោកមិនដែលនិយាយប្រមាថមើលងាយឬបញ្ឈឺចិត្តគេឡើយ។ (១ពេ. ២:២៣) ផ្ទុយទៅវិញ តាមរយៈសម្ដីនិងការប្រព្រឹត្តរបស់លោក លោកបានបញ្ជាក់ច្បាស់ថា អ្នកដែលធ្វើខុសអាចប្រែចិត្ត ហើយអាចផ្គាប់ចិត្តព្រះយេហូវ៉ាម្ដងទៀត។ ប្រាកដហើយ មូលហេតុមួយដែលលោកយេស៊ូបានចូលក្នុងពិភពលោក គឺដើម្បី«សង្គ្រោះអ្នកដែលប្រព្រឹត្តអំពើខុសឆ្គង»។—១ធី. ១:១៥
៦ កាលណាអ្នកដែលប្រព្រឹត្តអំពើខុសឆ្គងមិនព្រមទទួលដំបូន្មានពីគម្ពីរឬខំទម្លាក់កំហុសទៅលើអ្នកដទៃ នោះប្រហែលជាពួកអ្នកចាស់ទុំនិងអ្នកឯទៀតទាស់ចិត្ត។ ដោយដឹងអំពីបញ្ហាដែលបុគ្គលនោះបានបង្កឡើង ប្រហែលជាពួកអ្នកចាស់ទុំចង់និយាយប្រាប់បុគ្គលនោះត្រង់ៗអំពីអារម្មណ៍របស់ខ្លួនស្តីអំពីការប្រព្រឹត្តនិងចិត្តគំនិតរបស់គាត់។ ប៉ុន្តែ កំហឹងនាំឲ្យបាត់បង់ប្រយោជន៍ហើយមិនបង្ហាញ«ចិត្តគំនិតរបស់គ្រិស្ត»ទេ។ (៧, ៨. ពេលពួកអ្នកចាស់ទុំវិនិច្ឆ័យករណីអំពើខុសឆ្គង តើពួកគាត់គួរចងចាំអ្វី?
៧ តើគំរូរបស់លោកយេស៊ូគួរមានឥទ្ធិពលយ៉ាងណាលើចិត្តគំនិតរបស់យើងចំពោះបុគ្គលដែលត្រូវទទួលការទូន្មានប្រដៅពីពួកអ្នកចាស់ទុំក្នុងក្រុមជំនុំ? សូមចងចាំថា គម្ពីរបានណែនាំឲ្យអ្នកចាស់ទុំវិនិច្ឆ័យករណីអំពើខុសឆ្គងដើម្បីការពារបងប្អូនក្នុងក្រុមជំនុំ ហើយប្រហែលជាជំរុញអ្នកធ្វើខុសដែលទទួលការទូន្មានប្រដៅឲ្យប្រែចិត្តវិញ។ (២កូ. ២:៦-៨) គួរឲ្យស្ដាយណាស់ដែលបុគ្គលខ្លះមិនប្រែចិត្ត ហើយត្រូវបណ្ដាច់មិត្តភាព។ ប៉ុន្តែ គួរឲ្យលើកទឹកចិត្តណាស់ដោយដឹងថា ក្រោយមកមនុស្សជាច្រើនដែលបានត្រូវបណ្ដាច់មិត្តភាព បានត្រឡប់មកព្រះយេហូវ៉ានិងក្រុមជំនុំរបស់លោកវិញ។ ពេលពួកអ្នកចាស់ទុំបង្ហាញចិត្តគំនិតដូចគ្រិស្ត ពួកគេធ្វើឲ្យបុគ្គលនោះស្រួលប្រែចិត្តជាង ហើយនៅទីបំផុតត្រឡប់មកវិញ។ នៅថ្ងៃអនាគត អ្នកដែលបានធ្វើខុសនឹងពិតជាចាំថា ពួកអ្នកចាស់ទុំគោរពនិងប្រព្រឹត្តទៅលើគាត់ដោយក្ដីស្រឡាញ់ ទោះជាគាត់ប្រហែលជាមិនចាំដំបូន្មានទាំងអស់ដែលពួកអ្នកចាស់ទុំជូនតាមគម្ពីរក៏ដោយ។
៨ ហេតុនេះហើយបានជាពួកអ្នកចាស់ទុំត្រូវមាន«ផលដែលបង្កើតដោយសកម្មពលរបស់ព្រះ» ជាពិសេសក្ដីស្រឡាញ់ដូចគ្រិស្ត ទោះជាអ្នកដែលធ្វើខុសមិនព្រមទទួលដំបូន្មានពីគម្ពីរក៏ដោយ។ (កាឡ. ៥:២២, ២៣) មិនគប្បីឲ្យពួកអ្នកចាស់ទុំរហ័សបណ្ដាច់មិត្តភាពអ្នកដែលប្រព្រឹត្តអំពើខុសឆ្គងទេ។ ពួកគេត្រូវបង្ហាញថា ពួកគេចង់ឲ្យអ្នកដែលធ្វើខុសត្រឡប់មកព្រះយេហូវ៉ាវិញ។ យ៉ាងនេះ ពេលបងប្អូនជា ច្រើនដែលប្រព្រឹត្តអំពើខុសឆ្គងបានប្រែចិត្តក្រោយមក ពួកគាត់ប្រហែលជាដឹងគុណណាស់ចំពោះព្រះយេហូវ៉ានិង«អំណោយជាមនុស្ស»ដែលបានធ្វើឲ្យពួកគាត់ស្រួលត្រឡប់មកក្រុមជំនុំជាង។—អេភ. ៤:៨, ១១, ១២
បង្ហាញក្ដីស្រឡាញ់ដូចគ្រិស្តនៅគ្រាចុងបំផុត
៩. សូមលើកឧទាហរណ៍មួយដែលបញ្ជាក់ថា លោកយេស៊ូប្រព្រឹត្តដោយក្ដីស្រឡាញ់ទៅលើអ្នកកាន់តាមលោក។
៩ លូកាបានកត់ទុកព្រឹត្ដិការណ៍ដ៏អស្ចារ្យមួយដែលបញ្ជាក់ថាលោកយេស៊ូប្រព្រឹត្តដោយក្ដីស្រឡាញ់។ លោកយេស៊ូបានជ្រាបថា ទាហានរ៉ូមនឹងឡោមព័ទ្ធក្រុងយេរូសាឡិមជាមិនខាន ហើយនឹងគ្មាននរណាអាចរត់ចេញពីទីក្រុងនោះបានទេ។ លោកបានព្រមានអ្នកកាន់តាមដោយក្ដីស្រឡាញ់ថា៖ «ពេលដែលអ្នករាល់គ្នាឃើញកងទ័ពបោះជំរំជុំវិញក្រុងយេរូសាឡិម ចូរដឹងថានាងជិតត្រូវបំផ្លិចបំផ្លាញហើយ»។ តើពួកគេត្រូវធ្វើអ្វី? លោកយេស៊ូបានផ្ដល់ការណែនាំជាក់លាក់ទុកជាមុនថា៖ «ចូរឲ្យអ្នកដែលនៅតំបន់យូឌាចាប់ផ្ដើមរត់ទៅតំបន់ភ្នំ ចូរឲ្យពួកអ្នកដែលនៅក្នុងនាងចេញឲ្យឆ្ងាយ ហើយកុំឲ្យពួកអ្នកដែលនៅជនបទចូលក្នុងនាងឡើយ ព្រោះនោះជាគ្រាសម្រាប់ការសងសឹក យ៉ាងនោះអ្វីៗទាំងអស់ដែលបានត្រូវសរសេរអាចសម្រេចបាន»។ (លូក. ២១:២០-២២) ក្រោយកងទ័ពរ៉ូមបោះជំរំជុំវិញក្រុងយេរូសាឡិមនៅឆ្នាំ៦៦ គ.ស. អ្នកដែលចេះស្ដាប់បង្គាប់ធ្វើតាមការណែនាំទាំងនេះ។
១០, ១១. ប្រសិនបើយើងពិចារណាអំពីពួកគ្រិស្តសាសនិកសម័យដើមរត់ចេញពីក្រុងយេរូសាឡិម តើនេះអាចជួយយើងឲ្យត្រៀមខ្លួនសម្រាប់«ទុក្ខវេទនាជាខ្លាំង»យ៉ាងដូចម្ដេច?
១០ ក្នុងអំឡុងពេលដែលពួកគ្រិស្តសាសនិករត់ចេញពីក្រុងយេរូសាឡិម ពួកគេត្រូវការបង្ហាញក្ដីស្រឡាញ់ចំពោះគ្នាទៅវិញទៅមក ដូចលោកយេស៊ូបានបង្ហាញក្ដីស្រឡាញ់ចំពោះពួកគេដែរ។ ពួកគេពិតជាត្រូវចែកអ្វីដែលពួកគេមានជាមួយគ្នា។ ប៉ុន្តែ ទំនាយរបស់លោកយេស៊ូមិនគ្រាន់តែទាក់ទងនឹងសេចក្ដីហិនវិនាសរបស់ក្រុងបុរាណនោះប៉ុណ្ណោះទេ តែទាក់ទងនឹងអ្វីដ៏ធំជាងនេះទៅទៀត។ លោកបានទាយថា៖ «នៅគ្រានោះ នឹងមានទុក្ខវេទនាជាខ្លាំង ដែលមិនធ្លាប់មានតាំងពីកំណើតពិភពលោករហូតដល់ឥឡូវនេះ ហើយក៏នឹងមិនមានដូច្នោះទៀតឡើយ»។ (ម៉ាថ. ២៤:១៧, ១៨, ២១) មុននិងក្នុងអំឡុង«ទុក្ខវេទនាជាខ្លាំង»ដែលនឹងមាននៅថ្ងៃខាងមុខ យើងក៏ប្រហែលជាប្រឈមមុខទុក្ខលំបាកនិងការខ្វះខាតដែរ។ ដោយមានចិត្តគំនិតដូចគ្រិស្ត នេះនឹងជួយយើងឲ្យស៊ូទ្រាំបាន។
១១ នៅពេលនោះ យើងនឹងត្រូវធ្វើតាមគំរូរបស់លោកយេស៊ូដោយបង្ហាញក្ដីស្រឡាញ់ដែលមិនគិតពីប្រយោជន៍របស់ខ្លួន។ ដោយជាប់ពាក់ព័ន្ធនឹងចំណុចនេះ ប៉ូលបានជូនឱវាទថា៖ «ចូរយើងទាំងអស់គ្នាបំពេញចិត្តអ្នកជិតខាងដោយការល្អដែលពង្រឹងជំនឿរបស់គេ។ ព្រោះសូម្បីតែគ្រិស្តមិនបានរកបំពេញចិត្តខ្លួនលោកដែរ . . . សូមព្រះដែលផ្ដល់សមត្ថភាពស៊ូទ្រាំនិងការសម្រាលទុក្ខ អនុគ្រោះឲ្យអ្នកទាំងអស់គ្នាមានចិត្តគំនិតដូចគ្រិស្តយេស៊ូ»។—រ៉ូម ១៥:២, ៣, ៥
១២. ឥឡូវ តើយើងត្រូវមានក្ដីស្រឡាញ់បែបណា? ហើយហេតុអ្វី?
១២ ស្រដៀងគ្នាដែរ ពេត្រុសដែលបានទទួលក្ដីស្រឡាញ់ពីលោកយេស៊ូ បានដាស់តឿនពួកគ្រិស្តសាសនិកឲ្យ«ស្រឡាញ់គ្នាជាបងប្អូនដោយគ្មានពុតត្បុត» ហើយ«ស្ដាប់បង្គាប់សេចក្ដីពិត»។ ពួកគេត្រូវ«ស្រឡាញ់គ្នាឲ្យខ្លាំងដោយស្មោះពីចិត្ត»។ (១ពេ. ១:២២) សព្វថ្ងៃ យើងត្រូវបណ្ដុះឲ្យមានលក្ខណៈដូចគ្រិស្តជាងមុនៗទៅទៀត។ សូម្បីតែឥឡូវនេះ រាស្ត្ររបស់ព្រះត្រូវគេបង្ខិតបង្ខំកាន់តែច្រើន។ វិបត្ដិសេដ្ឋកិច្ចដែលមានក្នុងពិភពលោកនៅពេលថ្មីៗនេះបានបង្ហាញថា មិនគប្បីឲ្យអ្នកណាមានទំនុកចិត្តទៅលើផ្នែកណាមួយនៃពិភពលោកនេះឡើយ។ (សូមអាន យ៉ូហានទី១ ២:១៥-១៧) ផ្ទុយទៅវិញ កាលដែលទីបញ្ចប់នៃរបៀបរបបពិភពលោកនេះជិតមកដល់ យើងត្រូវចូលកាន់តែជិតព្រះយេហូវ៉ានិងបងប្អូនរួមជំនឿ ថែមទាំងបណ្ដុះចំណងមិត្តភាពជិតស្និទ្ធជាមួយគ្នា។ ប៉ូលបានជូនឱវាទថា៖ «ចូរស្រឡាញ់គ្នាជាបងប្អូនដោយមនោសញ្ចេតនាយ៉ាងជ្រាលជ្រៅ។ ក្នុងការលើកកិត្ដិយសគ្នាទៅវិញទៅមក ចូរលើកកិត្ដិយសគេមុន»។ (រ៉ូម ១២:១០) ហើយពេត្រុសបានដៅបញ្ជាក់ចំណុចនេះថែមទៀតដោយពោលថា៖ «ជាពិសេស ចូរស្រឡាញ់គ្នាទៅវិញទៅមកឲ្យខ្លាំង ពីព្រោះសេចក្ដីស្រឡាញ់គ្របបាំងការខុសឆ្គងជាច្រើន»។—១ពេ. ៤:៨
១៣-១៥. តើបងប្អូនរួមជំនឿខ្លះបង្ហាញក្ដីស្រឡាញ់ដូចគ្រិស្តយ៉ាងដូចម្ដេចក្រោយពីមហន្តរាយ?
១៣ ទូទាំងពិភពលោក គេស្គាល់សាក្សីព្រះយេហូវ៉ាថាជាពួកដែលបង្ហាញក្ដីស្រឡាញ់ពិត។ សូមគិតអំពីសាក្សីព្រះយេហូវ៉ាដែលស្ម័គ្រចិត្តផ្ដល់ជំនួយ ក្រោយមានខ្យល់ព្យុះបង្ហិនបង្ហោចតំបន់ធំមួយនៅសហរដ្ឋអាម៉េរិកខាងត្បូងនៅឆ្នាំ២០០៥។ មានសាក្សីព្រះយេហូវ៉ាជាង២០.០០០នាក់បានស្ម័គ្រចិត្តទៅជួយបងប្អូនរួមជំនឿដែលរងទុក្ខ ដោយសារគំរូរបស់លោកយេស៊ូបានជំរុញទឹកចិត្តពួកគេ ហើយច្រើននាក់បានលះបង់ផ្ទះ ភាពស្រណុកសុខស្រួលនិងការងាររបស់ខ្លួនដើម្បីអាចទៅជួយ។
១៤ នៅតំបន់មួយខ្យល់ព្យុះបានបង្កើតឲ្យមានរលកធំៗកម្ពស់១០ម៉ែត្រ ដែលបានធ្វើឲ្យទឹកសមុទ្រឡើងហួសពីឆ្នេររហូតដល់៨០គីឡូម៉ែត្រ។ ពេលទឹកស្រក ផ្ទះនិងអគារទាំងអស់នៅតំបន់នោះចំនួន៣០ភាគរយបានហិនហោច។ សាក្សីព្រះយេហូវ៉ាមួយចំនួនពីប្រទេសក្រៅ ដែលខ្លះមានជំនាញ បានមកជួយព្រមទាំងយកប្រដាប់ប្រដានិងគ្រឿងសំណង់មកសាងសង់ផ្ទះ ហើយសុខចិត្តធ្វើកិច្ចការទាំងអស់ដើម្បីជួយបងប្អូនរួមជំនឿ។ បងប្អូនបង្កើតពីរនាក់ដែលនៅមេម៉ាយ បានរៀបអីវ៉ាន់របស់ពួកគេដាក់ក្នុងឡានដឹកទំនិញតូចមួយ ហើយបើកឡាននោះជាង៣.០០០គីឡូម៉ែត្រដើម្បីទៅជួយនៅទីនោះ។ សព្វថ្ងៃ ពួកគាត់ម្នាក់នៅតែរស់ក្នុងតំបន់នោះ ហើយនៅតែជួយគណៈកម្មាធិការផ្ដល់ជំនួយ ព្រមទាំងកំពុងបម្រើជាអ្នកត្រួសត្រាយពេញពេលផងដែរ។
១៥ ផ្ទះជាង៥.៦០០ខ្នងរបស់សាក្សីព្រះយេហូវ៉ានិងមនុស្សឯទៀតនៅតំបន់នោះបានត្រូវជួសជុលឬសង់ឡើងវិញ។ តើសាក្សីព្រះយេហូវ៉ានៅតំបន់នោះមានអារម្មណ៍យ៉ាងណាស្តីអំពីការទទួលក្ដីស្រឡាញ់ដ៏អស្ចារ្យនេះ? បងស្រីម្នាក់ដែលផ្ទះគាត់បានត្រូវបំផ្លាញដោយមហន្តរាយនោះដែរ បានរើទៅនៅបន្ទប់តូចមួយដែលមានដំបូលលិចទឹកហើយចង្ក្រានខូច។ បងប្អូនរួមជំនឿបានសាងសង់ផ្ទះតូចស្អាតមួយឲ្យគាត់។ ពេលឈរនៅមុខផ្ទះថ្មីរបស់គាត់ គាត់យំដោយមានចិត្តរំភើបពីព្រោះគាត់ដឹងគុណព្រះយេហូវ៉ានិងបងប្អូនរួមជំនឿ។ នៅករណីជាច្រើនឯទៀត សាក្សីព្រះយេហូវ៉ាដែលបាត់បង់ផ្ទះ បានបន្តស្នាក់នៅបណ្ដោះអាសន្ននៅកន្លែងមួយរហូតដល់មួយឆ្នាំឬយូរជាង ទោះជាផ្ទះពួកគាត់បានសង់ហើយក៏ដោយ។ ហេតុអ្វី? ដើម្បីឲ្យបងប្អូនដែលស្ម័គ្រចិត្តមកជួយ អាចរស់នៅផ្ទះថ្មីនោះបណ្ដោះអាសន្ន។ នេះពិតជាគំរូល្អមែន! ក្នុងការបង្ហាញចិត្តគំនិតដូចគ្រិស្ត។
បង្ហាញចិត្តគំនិតដូចគ្រិស្តចំពោះអ្នកជំងឺ
១៦, ១៧. តើយើងអាចបង្ហាញចិត្តគំនិតដូចគ្រិស្តចំពោះអ្នកជំងឺតាមវិធីណាខ្លះ?
១៦ មិនសូវមានសាក្សីព្រះយេហូវ៉ាច្រើនទេដែលធ្លាប់រងគ្រោះដោយមហន្តរាយធម្មជាតិធំៗ។ ប៉ុន្តែ យើងទាំងអស់គ្នាត្រូវប្រឈមមុខបញ្ហាសុខភាព រួមទាំងសមាជិកគ្រួសារដែរ។ ចិត្តគំនិតរបស់លោកយេស៊ូចំពោះអ្នកជំងឺជាគំរូសម្រាប់យើង។ ក្ដីស្រឡាញ់របស់លោកជំរុញលោកឲ្យមានចិត្តអាណិតអាសូរចំពោះអ្នកជំងឺ។ កាលដែលមនុស្សមួយក្រុមបាននាំអ្នកជំងឺមកជួបលោក នោះ«អស់អ្នកដែលមានជំងឺ លោកក៏បានធ្វើឲ្យជាសះស្បើយ»។—ម៉ាថ. ៨:១៦; ១៤:១៤
១៧ សព្វថ្ងៃ ពួកគ្រិស្តសាសនិកមិនមានអំណាចដូចលោកយេស៊ូដើម្បីធ្វើឲ្យមនុស្សជាដោយអព្ភូតហេតុទេ តែពួកគេមានចិត្តអាណិតអាសូរដូចលោកចំពោះអ្នកជំងឺ។ តើចិត្តអាណិតអាសូរនេះបានត្រូវសឲ្យឃើញយ៉ាងណា? ពួកអ្នកចាស់ទុំបង្ហាញទីសំអាងដែលថាពួកគេមានចិត្តគំនិតដូចគ្រិស្ត ដោយរៀបចំផ្ដល់ជំនួយដល់អ្នកជំងឺក្នុងក្រុមជំនុំ ហើយដោយធ្វើឲ្យប្រាកដថាអ្នកជំងឺទទួលជំនួយទាំងនោះ ថែមទាំងប្រព្រឹត្តដូចដែលបានរៀបរាប់នៅសៀវភៅម៉ាថាយ ២៥:៣៩, ៤០។ (សូមអាន)
១៨. តើបងស្រីពីរនាក់បានបង្ហាញក្ដីស្រឡាញ់ចំពោះបងស្រីម្នាក់ទៀតតាមវិធីណា? ហើយតើមានលទ្ធផលអ្វី?
១៨ សូម្បីតែយើងមិនមែនជាអ្នកចាស់ទុំ ក៏យើងអាចធ្វើល្អដល់អ្នកឯទៀតដែរ។ សូមគិតអំពីបងស្រីអាយុ៤៤ឆ្នាំឈ្មោះសាលីន ដែលមានជំងឺមហារីក ហើយគ្រូពេទ្យបានប្រាប់គាត់ថា គាត់អាចរស់តែ១០ថ្ងៃទៀតទេ។ បងស្រីរួមជំនឿពីរនាក់ឈ្មោះសារុននិងនិកូលេតបានឃើញថា បងសាលីនត្រូវការជំនួយ ហើយក៏ឃើញថាប្ដីរបស់សាលីនអស់កម្លាំងខ្លាំងពីការថែទាំប្រពន្ធ នោះពួកគេទាំងពីរបានស្ម័គ្រចិត្តនៅកំដរបងសាលីន។ បងស្រីពីរនាក់បានបង្ហាញក្ដីស្រឡាញ់ចំពោះបងសាលីនរហូតដល់គាត់ស្លាប់ ហើយបានថែទាំគាត់មិនគ្រាន់តែអស់១០ថ្ងៃទេ តែបានអូសបន្លាយរហូតដល់៦សប្ដាហ៍។ បងសារុនបាននិយាយថា៖ «ពេលយើងដឹងថាអ្នកជំងឺនឹងត្រូវស្លាប់ នោះជាការពិបាកណាស់ តែព្រះយេហូវ៉ាបានពង្រឹងកម្លាំងយើង។ បទពិសោធន៍នេះធ្វើឲ្យយើងជិតស្និទ្ធនឹងលោកហើយបងប្អូនរួមជំនឿដែរ»។ ប្ដីរបស់បងសាលីនបានពោលថា៖ «បងស្រីពីរនាក់បានជួយយើងដោយសប្បុរស ហើយខ្ញុំចាំមិនភ្លេចគុណបំណាច់របស់ពួកគាត់។ ពួកគេមានបំណងចិត្តល្អនិងទស្សនៈល្អ ហើយនេះបានជួយប្រពន្ធដ៏ស្មោះត្រង់របស់ខ្ញុំឲ្យស្រួលស៊ូទ្រាំជាងនូវក្ដីលំបាកចុងក្រោយនេះ ហើយក៏ជួយឲ្យខ្ញុំធូរស្រាលខាងរាងកាយនិងផ្លូវចិត្តដែលខ្ញុំត្រូវការជាចាំបាច់។ ខ្ញុំដឹងគុណពួកគេជានិច្ច។ ពួកគេបានលះបង់ប្រយោជន៍ខ្លួន ហើយនេះបានពង្រឹងជំនឿខ្ញុំទៅលើព្រះយេហូវ៉ា និងក្ដីស្រឡាញ់របស់ខ្ញុំចំពោះបងប្អូនរួមជំនឿទាំងអស់គ្នា»។
១៩, ២០. (ក) តើយើងបានពិចារណាលក្ខណៈប្រាំយ៉ាងអ្វីស្តីអំពីចិត្តគំនិតរបស់លោកយេស៊ូ? (ខ) តើអ្នកតាំងចិត្តធ្វើអ្វី?
១៩ ក្នុងអត្ថបទនេះនិងអត្ថបទមុនទាំងពីរ យើងបានពិចារណាលក្ខណៈប្រាំយ៉ាងនៃចិត្តគំនិតរបស់លោកយេស៊ូ ហើយវិធីដែលយើងអាចគិតនិងប្រព្រឹត្តដូចលោក។ ចូរឲ្យយើងធ្វើជាមនុស្ស«ស្លូតក៏មានចិត្តរាបទាប»ដូចលោកយេស៊ូ។ (ម៉ាថ. ១១:២៩) សូមឲ្យយើងព្យាយាមប្រព្រឹត្តលើអ្នកឯទៀតដោយក្ដីសប្បុរសដែរ ទោះជាភាពមិនល្អឥតខ្ចោះនិងកំហុសរបស់ពួកគេលេចធ្លោក៏ដោយ។ សូមឲ្យយើងធ្វើតាមតម្រូវការទាំងអស់របស់ព្រះយេហូវ៉ាយ៉ាងក្លាហាន ទោះបីរងទុក្ខលំបាកក្ដី។
២០ នៅចុងបំផុត សូមឲ្យយើងបង្ហាញក្ដីស្រឡាញ់ដូចគ្រិស្តចំពោះបងប្អូនរួមជំនឿរហូត«ដល់ទីបំផុត» ដូចលោកយេស៊ូបានធ្វើចំពោះអ្នកកាន់តាមលោក។ សេចក្ដីស្រឡាញ់បែបនេះសម្គាល់យើងជាអ្នកកាន់តាមពិតរបស់លោកយេស៊ូ។ (យ៉ូន. ១៣:១, ៣៤, ៣៥) ត្រូវហើយ«ចូរបន្តស្រឡាញ់គ្នាជាបងប្អូន»។ (ហេ. ១៣:១) កុំស្ទាក់ស្ទើរឡើយ! ចូរតាំងចិត្តប្រើជីវិតដើម្បីសរសើរព្រះយេហូវ៉ានិងជួយអ្នកឯទៀត! ព្រះយេហូវ៉ានឹងឲ្យពរដល់ការខំប្រឹងយ៉ាងស្មោះរបស់អ្នក។
តើអ្នកអាចពន្យល់បានទេ?
• តើពួកអ្នកចាស់ទុំអាចបង្ហាញចិត្តគំនិតដូចគ្រិស្តយ៉ាងណាពេលប្រព្រឹត្តលើបុគ្គលដែលធ្វើខុស?
• ហេតុអ្វីបានជាការយកតម្រាប់តាមក្ដីស្រឡាញ់របស់គ្រិស្តសំខាន់ក្នុងគ្រាចុងបំផុតនេះ?
• តើយើងអាចបង្ហាញចិត្តគំនិតដូចគ្រិស្តចំពោះអ្នកជំងឺយ៉ាងដូចម្ដេច?
[សំណួរសម្រាប់អត្ថបទសិក្សា]
[រូបភាពនៅទំព័រ២០]
ពួកអ្នកចាស់ទុំចង់ជួយបុគ្គលដែលធ្វើខុសឲ្យត្រឡប់មកព្រះយេហូវ៉ាវិញ
[រូបភាពនៅទំព័រ២២]
តើពួកគ្រិស្តសាសនិកដែលរត់ចេញពីក្រុងយេរូសាឡិមបង្ហាញចិត្តគំនិតដូចគ្រិស្តយ៉ាងណា?
[រូបភាពនៅទំព័រ២៣]
សាក្សីព្រះយេហូវ៉ាត្រូវបានគេស្គាល់ជាអ្នកដែលប្រព្រឹត្តដោយក្ដីស្រឡាញ់ដូចគ្រិស្ត