តើលុយនាំឲ្យមានសុភមង្គលពិតឬទេ?
តើលុយនាំឲ្យមានសុភមង្គលពិតឬទេ?
សូន្យាបានកើតនៅប្រទេសអេស្ប៉ាញ។ កាលនាងនៅក្មេង នាងធ្លាប់ចូលរួមប្រជុំរបស់សាក្សីព្រះយេហូវ៉ាជាមួយនឹងម្ដាយនាង។ ប៉ុន្តែពេលនាងធំឡើង នាងបានរើទៅនៅក្រុងឡុងដ៍នាប្រទេសអង់គ្លេស។ ក្រោយមកនាងចាប់ផ្ដើមធ្វើការលក់ដូរភាគហ៊ុន។
សូន្យាស្រឡាញ់ការងាររបស់គាត់។ គាត់រកលុយបានច្រើន ហើយលក់ដូរភាគហ៊ុនធំៗឲ្យអតិថិជន។ គាត់សប្បាយនឹងការងាររបស់គាត់ ហើយស្ទាត់ជំនាញនឹងការងារនោះ។ ជាទៀងទាត់សូន្យាបានធ្វើការ១៨ម៉ោងក្នុងមួយថ្ងៃ ហើយយប់ខ្លះគេងតែពីរឬបីម៉ោងប៉ុណ្ណោះ។ ការងាររបស់គាត់ជាអ្វីដ៏សំខាន់បំផុតក្នុងជីវិតរបស់គាត់។ ក្រោយមក ជីវិតរបស់គាត់បានផ្លាស់ប្ដូរយ៉ាងខ្លាំងក្នុងមួយរំពេច។ សូន្យាបានដាច់សរសៃឈាមខួរក្បាល ប្រហែលជាមកពីធ្វើការហួសកម្លាំង។ ពេលនោះ គាត់មានអាយុតែ៣០ឆ្នាំប៉ុណ្ណោះ។
សូន្យាស្លាប់មួយចំហៀងខ្លួន ហើយគ្រូពេទ្យមិនប្រាកដថាគាត់នឹងអាចនិយាយបានឡើងវិញទេ។ ភ្លាមនោះ ម្ដាយគាត់បានធ្វើដំណើរទៅប្រទេសអង់គ្លេសដើម្បីថែរក្សាគាត់។ កាលណាសូន្យាចាប់ផ្ដើមដើរបានឡើងវិញ នោះម្ដាយគាត់ប្រាប់គាត់ថា៖ «ម៉ាក់នឹងទៅប្រជុំក្រុមជំនុំ ហើយកូនត្រូវមកជាមួយម៉ាក់ពីព្រោះកូនមិនអាចនៅម្នាក់ឯងទេ»។ សូន្យាព្រមទៅប្រជុំ។ តើមានលទ្ធផលយ៉ាងណា?
សូន្យាប្រាប់ថា៖ «គឺអស្ចារ្យមែន អ្វីដែលខ្ញុំបានឮនៅកិច្ចប្រជុំស្ដាប់ទៅ ជាសេចក្ដីពិត។ ខ្ញុំព្រមរៀនគម្ពីរជាមួយបងប្អូនម្នាក់ក្នុងចំណោមបងប្អូនច្រើននាក់ដែលបានមកសួរសុខទុក្ខខ្ញុំ ពេលខ្ញុំទៅសាលប្រជុំជាលើកដំបូង។ អ្នកដែលធ្លាប់រាប់អានខ្ញុំពីមុនឈប់មកលេងខ្ញុំ តែមិត្តភក្ដិថ្មីៗរបស់ខ្ញុំយកចិត្តទុកដាក់នឹងខ្ញុំដោយសេចក្ដីស្រឡាញ់»។
បន្ដិចម្ដងៗ សូន្យានិយាយបានឡើងវិញ ហើយគាត់មានជំនឿនយ៉ាងឆាប់ក្នុងការរៀនគម្ពីរដែរ។ មិនដល់មួយឆ្នាំផង គាត់បានទទួលការជ្រមុជទឹក។ មិត្តភក្ដិថ្មីរបស់គាត់ជាច្រើននាក់ជាអ្នកផ្សព្វផ្សាយពេញពេលអំពីបណ្ដាំរបស់ព្រះ ហើយគាត់ឃើញថាពួកគេសប្បាយមែន។ សូន្យាបានគិតថា៖ ‹ខ្ញុំចង់សប្បាយដូចពួកគេដែរ។ ខ្ញុំចង់បម្រើព្រះយេហូវ៉ាអស់ពីសមត្ថភាពរបស់ខ្ញុំ!›។ ឥឡូវនេះ សូន្យាកំពុងផ្សព្វផ្សាយពេញពេលអំពីបណ្ដាំរបស់ព្រះ។
តើសូន្យាបានទាញមេរៀនអ្វី ពីអ្វីដែលគាត់បានឆ្លងកាត់? «ទោះជាខ្ញុំបានរកលុយច្រើនក៏ដោយ ខ្ញុំបានព្រួយបារម្ភ ហើយមិនសប្បាយ ពីព្រោះការងារនោះនាំឲ្យខ្ញុំស្ថិតក្រោមការបង្ខិតបង្ខំខ្លាំង ហើយមិនដឹងថាមានការងារនោះជាប់លាប់ឬទេ។ ឥឡូវខ្ញុំដឹងថា អ្វីសំខាន់បំផុតក្នុងជីវិត គឺចំណងមិត្តភាពជិតស្និទ្ធជាមួយនឹងព្រះយេហូវ៉ាដែលជាបិតាស្ថានសួគ៌របស់ខ្ញុំ។ ឥឡូវខ្ញុំមានសុភមង្គលពិត»។
សាវ័កប៉ូលបានសរសេរថា៖ «ការស្រឡាញ់ប្រាក់ជាឫសគល់មួយនៃអំពើអាក្រក់សព្វបែបយ៉ាង ហើយដោយបណ្ដុះឲ្យមានសេចក្ដីស្រឡាញ់បែបនោះ អ្នកខ្លះបានត្រូវបង្វែរចេញពីជំនឿ ហើយបានចាក់ទម្លុះខ្លួនគ្រប់កន្លែងដោយទុក្ខវេទនាជាច្រើន»។ (ធីម៉ូថេទី១ ៦:១០) សូន្យាជាសាក្សីថាពាក្យទាំងនេះជាការពិត។