តើអ្នកបានកំណត់ពេលដើម្បីសិក្សាគម្ពីរឬទេ?
តើអ្នកបានកំណត់ពេលដើម្បីសិក្សាគម្ពីរឬទេ?
ឆ្នាំមុនគណៈអភិបាលបានប្រកាសការផ្លាស់ប្ដូរក្នុងកិច្ចប្រជុំក្រុមជំនុំ ដើម្បីទុកពេលច្រើនជាងសម្រាប់ការសិក្សាគម្ពីរ និងការពិភាក្សាជាគ្រួសារ។ បើអ្នកជាមេគ្រួសារ កុំខានសិក្សាគម្ពីរជាទៀងទាត់ជាមួយនឹងប្រពន្ធកូនតាមរបៀបដែលមានប្រយោជន៍សម្រាប់ទាំងអស់គ្នា។ ប្ដីប្រពន្ធដែលគ្មានកូនគួរប្រើពេលនេះដើម្បីរៀនគម្ពីរជាមួយគ្នា។ បងប្អូនប្រុសស្រីដែលនៅលីវហើយគ្មានភារកិច្ចគ្រួសារអាចប្រើពេលនេះឲ្យបានប្រយោជន៍ ដោយសិក្សាគម្ពីររៀងខ្លួន។
បងប្អូនច្រើននាក់បានសម្ដែងអំណរគុណចំពោះការរៀបចំឲ្យមានល្ងាចមួយដើម្បីគោរពប្រណិប័តន៍ជាក្រុមគ្រួសារ។ ជាឧទាហរណ៍ បងប្រុសម្នាក់ជាអ្នកចាស់ទុំឈ្មោះខេវ៉ិនបានសរសេរថា៖ «យើងដែលនៅក្នុងក្រុមជំនុំមិនអាចរកពាក្យឲ្យសមនឹង‹អំណរគុណ›របស់យើងទេ។ ជាពួកអ្នកចាស់ទុំ យើងបានពិភាក្សាគ្នាអំពីរបៀបដែលយើងកំពុងប្រើល្ងាចដែលទំនេរនោះដើម្បីសិក្សាជាមួយនឹងក្រុមគ្រួសារយើង ដូចគណៈអភិបាលបានប្រាប់»។
បងស្រីម្នាក់ឈ្មោះចូឌីជាប្រពន្ធអ្នកចាស់ទុំបានសរសេរថា៖ «យើងមានកូនស្រីបីនាក់អាយុ១៥ ១១ និង២ឆ្នាំ។ ពេលថ្មីៗនេះ យើងបានរើទៅក្រុមជំនុំភាសាគ។ យើងត្រូវចំណាយពេល និងកម្លាំងច្រើនដើម្បីរៀបចំសម្រាប់កិច្ចប្រជុំ។ ដោយសារមានការរៀបចំនេះ ឥឡូវយើងមានល្ងាចមួយទៀតដើម្បីផ្ចង់អារម្មណ៍ទៅលើការគោរពប្រណិប័តន៍ជាក្រុមគ្រួសារ»។
បងប្រុសឈ្មោះចននិងប្រពន្ធគាត់ឈ្មោះចូអានដែលកំពុងបម្រើជាអ្នកត្រួសត្រាយពេញពេលបានសរសេរថា៖ «យើងសិក្សាគម្ពីរជាក្រុមគ្រួសារមិនទៀងទាត់ទេ ដោយសារយើងត្រូវធ្វើនៅចន្លោះកិច្ចការជាច្រើនរបស់ក្រុមជំនុំ។ ការរៀបចំថ្មីនេះជាអំណោយមួយពីព្រះយេហូវ៉ាដែលធ្វើឲ្យយើងមានកម្លាំងចិត្តឡើងវិញក្នុងកិច្ចបម្រើព្រះ បើយើងប្រើពេលនោះដោយត្រឹមត្រូវ»។
ថូនីបងប្រុសម្នាក់ដែលនៅលីវ អាយុ២០ឆ្នាំប្លាយបានទុកពេលល្ងាចថ្ងៃអង្គារដើម្បីសិក្សា។ គាត់រៀបចំសម្រាប់ប្រជុំក្រុមជំនុំនៅថ្ងៃផ្សេងទៀត។ ក៏ប៉ុន្តែ គាត់និយាយថា៖ «ខ្ញុំទន្ទឹងរង់ចាំថ្ងៃអង្គារដោយចិត្តសប្បាយ»។ ហេតុអ្វី? «នៅល្ងាចពិសេសនោះខ្ញុំមានអារម្មណ៍ថាខ្ញុំមានពេលនៅជាមួយនឹងព្រះយេហូវ៉ាតែពីរនាក់ប៉ុណ្ណោះ»។ ថូនីពន្យល់ថា៖ «នៅពេលនោះ ខ្ញុំសិក្សាប្រធានបទផ្សេងៗអស់ពីរម៉ោង ដែលធ្វើឲ្យខ្ញុំមានចំណងមិត្តភាពជាមួយនឹងព្រះយេហូវ៉ាកាន់តែជិតស្និទ្ធ។ ដោយមានពេលច្រើនជាងដើម្បីសិក្សាគម្ពីរ នោះខ្ញុំអាចរំពឹងគិតទៅលើខគម្ពីរដែលខ្ញុំអាន»។ តើនោះមានលទ្ធផលយ៉ាងណា? «ឱវាទរបស់ព្រះយេហូវ៉ាមានឥទ្ធិពលលើចិត្តរបស់ខ្ញុំខ្លាំងជាងមុន»។ គាត់លើកឧទាហរណ៍មួយថា៖ «ក្នុងសៀវភៅការយល់ធ្លុះជ្រៅ(ជាភាសាអង់គ្លេស)ខ្ញុំបានអានអំពីមិត្តភាពរវាងដាវីឌនិងយ៉ូណាថាន។ ខ្ញុំបានទាញមេរៀនច្រើនពីរបៀបដែលយ៉ូណាថានបានបង្ហាញចិត្តគំនិតមិនគិតប្រយោជន៍ខ្លួន។ គំរូរបស់គាត់បានជួយខ្ញុំឲ្យយល់ច្បាស់ជាងថា មិត្តល្អជាមិត្តបែបណា។ ខ្ញុំទន្ទឹងរង់ចាំដោយចិត្តសប្បាយនូវឱកាសរៀនចំណុចថ្មីៗថែមទៀត ដែលប្រៀបដូចជាកំណប់ទ្រព្យ នៅល្ងាចថ្ងៃអង្គារ!»។
អ្នកបម្រើទាំងអស់របស់ព្រះយេហូវ៉ា ពិតជានឹងទទួលប្រយោជន៍យ៉ាងច្រើនដោយយកពេលដែលបានត្រូវបន្ថែមឲ្យដើម្បីសិក្សាគម្ពីរ និងគោរពប្រណិប័តន៍ជាក្រុមគ្រួសារយ៉ាងដិតដល់។