តើអ្នកដឹងឬទេ?
តើអ្នកដឹងឬទេ?
នៅសម័យគម្ពីរ ក្រៅពីស្រាទំពាំងបាយជូរ តើគេធ្វើភេសជ្ជៈណាខ្លះ ដែលមានជាតិស្រា?
▪ ក្នុងគម្ពីរមានពាក្យ«ស្រា ឬគ្រឿងស្រវឹង» (ឬ«ស្រាទំពាំងបាយជូរ ឬគ្រឿងផឹក») ជាញឹកញាប់។ (ចោទិយកថា ១៤:២៦; លូកា ១:១៥) ពាក្យដែលថា«គ្រឿងស្រវឹង»មិនមានន័យថាភេសជ្ជៈទាំងនោះផលិតមកពីការចំហុយយកញើសឲ្យស្រក់ចុះក្នុងតម្រងឲ្យកើតបានជាស្រាឡើយ ពីព្រោះវិធីនេះមិនទាន់បង្កើតឡើងនៅសម័យនោះទេ។ គេមិនគ្រាន់តែបានធ្វើភេសជ្ជៈដែលមានជាតិស្រាពីផ្លែឈើដូចជាទំពាំងបាយជូរ ផ្លែលម៉ើ ល្វា ប៉ោម និងផ្លែទទឹមប៉ុណ្ណោះទេ តែក៏ធ្វើពីទឹកឃ្មុំដែរ។
តាមពិត ពាក្យដែលបានត្រូវបកប្រែថា«គ្រឿងស្រវឹង»ក៏អាចសំដៅទៅលើស្រាបៀរដែរ។ ពាក្យភាសាហេប្រឺដែលបកប្រែថា«គ្រឿងស្រវឹង»ជាប់ទាក់ទងនឹងពាក្យជនជាតិអាកាឌដែលសំដៅទៅលើស្រាបៀរដែលគេធ្វើពីស្រូវបេឡេនៅស្រុកមេសូប៉ូតាមៀ។ ស្រាបៀរនោះមិនសូវមានជាតិស្រាទេ តែអាចនាំឲ្យស្រវឹងបើពិសាច្រើនពេក។ (សុភាសិត ២០:១) នៅក្នុងផ្នូរបុរាណរបស់ជនជាតិអេស៊ីប គេបានរកឃើញគំរូដីឥដ្ឋតូចៗនៃកន្លែងដែលគេធ្វើស្រា និងគំនូរអំពីអ្នកបិតស្រា។ នៅស្រុកបាប៊ីឡូន ស្រាបៀរជាភេសជ្ជៈដែលគេពិសារាល់ថ្ងៃនៅរាជវាំងនិងក្នុងផ្ទះអ្នកក្រ។ ពួកភីលីស្ទីនក៏ចូលចិត្តពិសាស្រាបៀរស្រដៀងគ្នាដែរ។ នៅទូទាំងស្រុកប៉ាឡេស្ទីន ពួកបុរាណវត្ថុវិទូបានរកឃើញថូដែលមានចំពួយតម្រង។ ថូទាំងនោះត្រងស្រាបៀរ កុំឲ្យអ្នកផឹកលេបស្របកស្រូវបេឡេដែលគេធ្វើស្រាបៀរនោះ។
នៅសម័យសាវ័កប៉ូល ហេតុអ្វីការបើកសំពៅនៅក្នុងអំឡុងពេលខ្លះ នាំឲ្យមានគ្រោះថ្នាក់ជាងពេលឯទៀត?
▪ ដោយសារមានខ្យល់ខ្លាំង សំពៅដែលសាវ័កប៉ូលធ្វើដំណើរត្រូវបើកអស់ពេលជាច្រើនទៅទិសខាងលិចតាមឆ្នេរតំបន់អាស៊ី។ កំណត់ហេតុគម្ពីរចែងថាមកដល់កន្លែងមួយសំពៅ«អាចមានគ្រោះថ្នាក់បើបន្តដំណើរទៅមុខទៀត ពីព្រោះថ្ងៃតមអាហារនិងជម្រះការខុសឆ្គងបានកន្លងផុតទៅហើយ»។ ប៉ូលបានប្រាប់អ្នកធ្វើដំណើរជាមួយគាត់ថា បើពួកគេបន្តដំណើរទៅមុខទៀត ពួកគេនឹងទទួលការបាត់បង់យ៉ាងសម្បើម «មិនត្រឹមតែទំនិញនិងសំពៅប៉ុណ្ណោះទេ តែទាំងជីវិតរបស់[ពួកគេ]ផង»។—សកម្មភាព ២៧:៤-១០
ថ្ងៃតមអាហារនិងជម្រះការខុសឆ្គងត្រូវចំចុងខែកញ្ញាឬដើមខែតុលា។ នាវិកជនជាតិរ៉ូមដឹងថាការធ្វើដំណើរតាមសមុទ្រពីថ្ងៃទី២៧ ខែឧសភាដល់ថ្ងៃទី១៤ ខែកញ្ញា ជាទូទៅមានសុវត្ថិភាព។ ពីថ្ងៃទី១៤ ខែកញ្ញាដល់ថ្ងៃទី១១ ខែវិច្ឆិកា ការបើកសំពៅជាការប្រថុយនឹងគ្រោះថ្នាក់ ហើយពីថ្ងៃទី១១ ខែវិច្ឆិកាដល់ថ្ងៃទី១០ ខែមីនា គេគិតថាលែងធ្វើដំណើរតាមសមុទ្រពីព្រោះអាចមានគ្រោះថ្នាក់ខ្លាំង។ មូលហេតុមួយគឺអស្ថិរភាពនៃធាតុអាកាសដូចបានបញ្ជាក់ក្នុងបទពិសោធន៍របស់សាវ័កប៉ូល។ (សកម្មភាព ២៧:១៣-៤៤) អ្នកបើកសំពៅអាចប្រឈមមុខនឹងខ្យល់ព្យុះធំៗព្រមទាំងការពិបាកបើកបរសំពៅ។ ពពកបាំងព្រះអាទិត្យនៅពេលថ្ងៃ ហើយបាំងផ្កាយនៅពេលយប់។ អ័ព្ទនិងភ្លៀងក៏ធ្វើឲ្យគេពិបាកឃើញ ហើយបាំងអ្វីដែលអាចនាំឲ្យមានគ្រោះថ្នាក់ដល់សំពៅ។
[រូបភាពនៅទំព័រ១៣]
គំរូដបស្រាបៀរ នៅប្រទេសអេស៊ីប ដែលគេធ្វើពីឈើ
[អ្នកផ្ដល់សិទ្ធិនៅទំព័រ១៣]
Erich Lessing/Art Resource, NY
[រូបភាពនៅទំព័រ១៣]
សំពៅជនជាតិរ៉ូមសម្រាប់ដឹកទំនិញ ប្រហែលនៅ ឆ្នាំ១០០-២០០គ.ស.
[អ្នកផ្ដល់សិទ្ធិនៅទំព័រ១៣]
Pictorial Archive (Near Eastern History) Est.