តើអ្នកស្អប់ការប្រឆាំងច្បាប់ឬទេ?
តើអ្នកស្អប់ការប្រឆាំងច្បាប់ឬទេ?
«អ្នក[លោកយេស៊ូ] . . . បានស្អប់ការប្រឆាំងច្បាប់»។—ហេ. ១:៩
១. ស្តីអំពីសេចក្ដីស្រឡាញ់ តើលោកយេស៊ូបានបង្រៀនអ្វីខ្លះ?
លោក យេស៊ូបានបញ្ជាក់អំពីសារៈសំខាន់នៃសេចក្ដីស្រឡាញ់ដោយប្រាប់ពួកអ្នកកាន់តាមលោកថា៖ «ខ្ញុំឲ្យបញ្ញត្ដិថ្មីមួយដល់អ្នករាល់គ្នា គឺអ្នករាល់គ្នាត្រូវស្រឡាញ់គ្នាទៅវិញទៅមក។ អ្នករាល់គ្នាត្រូវស្រឡាញ់គ្នាទៅវិញទៅមក ដូចខ្ញុំបានស្រឡាញ់អ្នករាល់គ្នាដែរ។ យ៉ាងនេះ មនុស្សគ្រប់គ្នានឹងដឹងថាអ្នករាល់គ្នាជាអ្នកកាន់តាមខ្ញុំ បើអ្នករាល់គ្នាស្រឡាញ់គ្នា»។ (យ៉ូន. ១៣:៣៤, ៣៥) លោកយេស៊ូបានបង្គាប់ពួកអ្នកកាន់តាមលោកឲ្យបង្ហាញសេចក្ដីស្រឡាញ់ដែលសុខចិត្តលះបង់ប្រយោជន៍ខ្លួនចំពោះគ្នាទៅវិញទៅមក។ មនុស្សនឹងដឹងថាពួកគេជាអ្នកកាន់តាមលោកដោយសារសេចក្ដីស្រឡាញ់នេះ។ លោកយេស៊ូក៏បានដាស់តឿនពួកគេដែរថា៖ «ចូរបន្តស្រឡាញ់សត្រូវរបស់អ្នក ហើយអធិដ្ឋានដើម្បីអ្នកដែលបៀតបៀនអ្នក»។—ម៉ាថ. ៥:៤៤
២. តើពួកអ្នកកាន់តាមគ្រិស្តត្រូវរៀនឲ្យចេះស្អប់អ្វី?
២ ក៏ប៉ុន្តែ ក្រៅពីបង្រៀនពួកអ្នកកាន់តាមលោកអំពីសេចក្ដីស្រឡាញ់ លោកយេស៊ូក៏បានបង្រៀននូវអ្វីដែលពួកគេត្រូវស្អប់ដែរ។ បទគម្ពីរបានចែងអំពីលោកយេស៊ូថា៖ «អ្នកបានស្រឡាញ់សេចក្ដីសុចរិត ហើយបានស្អប់ការប្រឆាំងច្បាប់[ការទុច្ចរិត]»។ (ហេ. ១:៩; ទំនុក. ៤៥:៧) នេះបង្ហាញឲ្យយើងដឹងថា យើងមិនគ្រាន់តែត្រូវបណ្ដុះឲ្យមានសេចក្ដីស្រឡាញ់ចំពោះសេចក្ដីសុចរិតប៉ុណ្ណោះទេ តែយើងក៏ត្រូវរៀនឲ្យចេះស្អប់អំពើខុសឆ្គង ឬការប្រឆាំងច្បាប់ដែរ។ គួរឲ្យកត់សម្គាល់ដែលសាវ័កយ៉ូហានបាននិយាយយ៉ាងចំៗថា៖ «អ្នកណាដែលប្រព្រឹត្តអំពើខុសឆ្គង មានន័យថាប្រព្រឹត្តប្រឆាំងច្បាប់។ ដូច្នេះ អំពើខុសឆ្គងគឺជាអំពើប្រឆាំងច្បាប់»។—១យ៉ូន. ៣:៤
៣. ស្តីអំពីការស្អប់ការប្រឆាំងច្បាប់ តើអត្ថបទនេះនឹងពិចារណាអំពីចំណុចណាខ្លះ?
៣ ដូច្នេះ ក្នុងនាមជាគ្រិស្តសាសនិក ជាការល្អឲ្យយើងដណ្ដឹងសួរ
ខ្លួនយើងថា‹តើខ្ញុំស្អប់ការប្រឆាំងច្បាប់ឬទេ?›។ សូមឲ្យយើងពិនិត្យមើលអំពីរបៀបដែលយើងអាចបង្ហាញថាយើងស្អប់អ្វីៗដែលអាក្រក់ក្នុងទិដ្ឋភាពបួនយ៉ាងនៃជីវិតរបស់យើង។ (១) ចិត្តគំនិតរបស់យើងចំពោះការផឹកគ្រឿងស្រវឹងហួសប្រមាណ (២) ទស្សនៈរបស់យើងចំពោះអ្វីៗដែលពាក់ព័ន្ធនឹងមន្តអាគម (៣) ចិត្តគំនិតរបស់យើងចំពោះអំពើប្រាសចាកសីលធម៌ (៤) ទស្សនៈរបស់យើងចំពោះពួកអ្នកដែលមិនស្អប់ការប្រឆាំងច្បាប់។ចិត្តគំនិតត្រឹមត្រូវចំពោះគ្រឿងស្រវឹង
៤. ហេតុអ្វីលោកយេស៊ូអាចនិយាយដោយក្លាហានពេលលោកជូនឱវាទអំពីការផឹកស្រាហួសប្រមាណ?
៤ យូរៗម្ដង លោកយេស៊ូបានផឹកស្រាទំពាំងបាយជូរ ហើយលោកបានទទួលស្គាល់ថានេះជាអំណោយមួយដែលមកពីព្រះ។ (ទំនុក. ១០៤:១៤, ១៥) ប៉ុន្តែ លោកមិនដែលប្រើអំណោយនេះក្នុងផ្លូវខុសដោយផឹកស្រាហួសប្រមាណនោះទេ។ (សុភ. ២៣:២៩-៣៣) ហេតុនេះ លោកយេស៊ូអាចនិយាយដោយក្លាហានពេលលោកជូនឱវាទដល់អ្នកឯទៀតស្តីអំពីរឿងនេះ។ (សូមអាន លូកា ២១:៣៤) ការផឹកគ្រឿងស្រវឹងហួសប្រមាណអាចនាំឲ្យប្រព្រឹត្តអំពើខុសឆ្គងធ្ងន់ធ្ងរឯទៀត។ យ៉ាងនេះ សាវ័កប៉ូលបានសរសេរថា៖ «កុំស្រវឹងស្រាឡើយ ព្រោះនោះនាំឲ្យប្រព្រឹត្តអំពើអបាយមុខ តែចូរឲ្យបានពេញទៅដោយសកម្មពលរបស់ព្រះជានិច្ច»។ (អេភ. ៥:១៨) គាត់ក៏បានលើកទឹកចិត្តស្ត្រីវ័យចាស់ក្នុងក្រុមជំនុំកុំឲ្យ«ញៀនស្រា»ដែរ។—ទីត. ២:៣
៥. តើពួកអ្នកដែលសម្រេចចិត្តផឹកគ្រឿងស្រវឹងគួរសួរខ្លួននូវសំណួរអ្វីខ្លះ?
៥ បើអ្នកសម្រេចចិត្តផឹកគ្រឿងស្រវឹង អ្នកគួរសួរខ្លួនថា‹តើខ្ញុំមានចិត្តគំនិតដូចលោកយេស៊ូចំពោះការផឹកគ្រឿងស្រវឹងហួសប្រមាណឬទេ? បើខ្ញុំត្រូវជូនឱវាទដល់អ្នកឯទៀត តើខ្ញុំអាចនិយាយដោយក្លាហានអំពីរឿងនេះឬទេ? តើខ្ញុំផឹកគ្រឿងស្រវឹងដើម្បីបំបាត់ទុក្ខ ឬដើម្បីបន្ធូរការតានតឹងចិត្តឬទេ? តើខ្ញុំផឹកគ្រឿងស្រវឹងច្រើនប៉ុណ្ណាក្នុងមួយសប្ដាហ៍? តើខ្ញុំមានអារម្មណ៍យ៉ាងណាពេលដែលមាននរណាម្នាក់ប្រាប់ថាខ្ញុំផឹកច្រើនពេក? តើខ្ញុំអាក់អន់ចិត្តឬខឹងនឹងគេឬទេ?›។ ការអនុញ្ញាតឲ្យខ្លួនញៀនគ្រឿងស្រវឹង អាចមានឥទ្ធិពលទៅលើសមត្ថភាពរិះគិតនិងសមត្ថភាពធ្វើការសម្រេចចិត្តយ៉ាងត្រឹមត្រូវរបស់យើង។ យើងដែលជាអ្នកកាន់តាមគ្រិស្តព្យាយាមការពារគំនិតវាងវៃឬសមត្ថភាពរិះគិតរបស់ខ្លួន។—សុភ. ៣:២១, ២២
ជៀសចេញពីអ្វីៗដែលពាក់ព័ន្ធនឹងមន្តអាគម
៦, ៧. (ក) តើលោកយេស៊ូបានប្រព្រឹត្តយ៉ាងណាចំពោះសាថាននិងពួកវិញ្ញាណកំណាច? (ខ) នៅសព្វថ្ងៃនេះ ហេតុអ្វីបានជាអ្វីៗដែលពាក់ព័ន្ធនឹងមន្តអាគមរីករាលដាលយ៉ាងខ្លាំង?
៦ ពេលដែលលោកយេស៊ូរស់នៅផែនដី លោកបានតស៊ូយ៉ាងខ្លាំងចំពោះសាថាននិងពួកវិញ្ញាណកំណាចរបស់វា។ សាថានបានព្យាយាមល្បួងលោកឲ្យបោះបង់ចោលភក្ដីភាពរបស់លោកចំពោះព្រះ តែលោកយេស៊ូមិនព្រមធ្វើដូច្នេះឡើយ។ (លូក. ៤:១-១៣) លោកក៏បានកត់សម្គាល់និងទប់ទល់ចំពោះអ្វីៗដែលអាចជះឥទ្ធិពលទៅលើគំនិតនិងការប្រព្រឹត្តរបស់លោក ទោះជាអ្វីទាំងនោះបានត្រូវធ្វើឡើងក្នុងបំណងល្អក៏ដោយ។ (ម៉ាថ. ១៦:២១-២៣) លោកយេស៊ូបានជួយអ្នកដែលសមនឹងទទួលជំនួយឲ្យរួចពីការគាបសង្កត់ដ៏គ្មានមេត្ដារបស់ពួកវិញ្ញាណកំណាច។—ម៉ាក. ៥:២, ៨, ១២-១៥; ៩:២០, ២៥-២៧
៧ ក្រោយពីលោកយេស៊ូចាប់ផ្ដើមគ្រប់គ្រងជាស្តេចនៅឆ្នាំ១៩១៤ លោកបានសម្អាតស្ថានសួគ៌ពីឥទ្ធិពលអាក្រក់របស់សាថាននិងពួកវិញ្ញាណកំណាច។ ជាលទ្ធផល សាថានបានប្ដេជ្ញាចិត្តខ្លាំងជាងមុនទៅទៀតដើម្បី«បំភាន់ពិភពលោកទាំងមូល»។ (បប. ១២:៩, ១០) ហេតុនេះ យើងមិនគួរភ្ញាក់ផ្អើលទេដែលចំណាប់អារម្មណ៍ចំពោះអ្វីៗដែលពាក់ព័ន្ធនឹងមន្តអាគមកំពុងតែរីករាលដាលនៅគ្រប់ទីកន្លែង។ តើយើងអាចធ្វើអ្វីដើម្បីការពារខ្លួនយើងពីអ្វីៗទាំងនេះ?
៨. ស្តីអំពីការជ្រើសរើសការកម្សាន្ត តើយើងម្នាក់ៗគួរពិចារណាអ្វីខ្លះក្នុងចិត្តរបស់យើង?
៨ គម្ពីរព្រមានយ៉ាងច្បាស់អំពីគ្រោះថ្នាក់ដែលមកពីមន្តអាគម។ (សូមអាន ចោទិយកថា ១៨:១០-១២) សព្វថ្ងៃ សាថាននិងពួក វិញ្ញាណកំណាចមានឥទ្ធិពលទៅលើគំនិតរបស់មនុស្សតាមរយៈខ្សែភាពយន្ត សៀវភៅ ហ្គេមវីដេអូ ដែលលើកស្ទួយអ្វីៗដែលពាក់ព័ន្ធនឹងមន្តអាគម។ ដូច្នេះ ពេលជ្រើសរើសការកម្សាន្ត យើងម្នាក់ៗគួរសួរខ្លួនថា‹ប៉ុន្មានខែកន្លងទៅនេះ ដើម្បីកែកម្សាន្ត តើខ្ញុំសម្រេចចិត្តមើលកុន កម្មវិធីទូរទស្សន៍ ហ្គេមវីដេអូ សៀវភៅ ឬសៀវភៅតុក្កតាដែលមានអ្វីៗដែលទាក់ទងនឹងមន្តអាគមឬ? តើខ្ញុំយល់ថាគឺសំខាន់ណាស់ដែលខ្ញុំបដិសេធចំពោះអ្វីដែលពាក់ព័ន្ធនឹងមន្តអាគមឬទេ? ឬក៏ខ្ញុំមើលស្រាលចំពោះរឿងនេះវិញ? ស្តីអំពីការកម្សាន្តរបស់ខ្ញុំ តើខ្ញុំបានគិតអំពីអារម្មណ៍របស់ព្រះយេហូវ៉ាឬទេ? បើខ្ញុំបានឲ្យឥទ្ធិពលរបស់សាថានជ្រៀតចូលក្នុងជីវិតខ្ញុំ តើសេចក្ដីស្រឡាញ់របស់ខ្ញុំចំពោះព្រះយេហូវ៉ានិងគោលការណ៍ដ៏សុចរិតរបស់លោក នឹងជំរុញទឹកចិត្តខ្ញុំឲ្យចាត់វិធានការយ៉ាងម៉ឺងម៉ាត់ដើម្បីបដិសេធអ្វីៗទាំងនោះឬទេ?›។—សកម្ម. ១៩:១៩, ២០
ធ្វើតាមការព្រមានរបស់លោកយេស៊ូស្តីអំពីអំពើប្រាសចាកសីលធម៌
៩. តើមនុស្សម្នាក់អាចបណ្ដុះឲ្យមានចិត្តស្រឡាញ់ការប្រឆាំងច្បាប់យ៉ាងដូចម្ដេច?
៩ លោកយេស៊ូបានគាំទ្រខ្នាតតម្រារបស់ព្រះយេហូវ៉ាស្តីអំពីសីលធម៌ខាងផ្លូវភេទ។ លោកបានមានប្រសាសន៍ថា៖ «តើអ្នករាល់គ្នាមិនធ្លាប់អានទេថា លោកដែលបានបង្កើតមនុស្សជាតិដំបូង បានបង្កើតពួកគេជាប្រុសនិងស្រី ហើយមានប្រសាសន៍ថា៖ ‹ហេតុនេះហើយ បុរសនឹងចាកចេញពីឪពុកនិងម្ដាយខ្លួន ហើយនឹងនៅជាប់ជាមួយនឹងប្រពន្ធរបស់គាត់ រួចពួកគេទាំងពីរនាក់នឹងទៅជាសាច់ឈាមតែមួយ›នោះ? ដូច្នេះ ពួកគេលែងជាពីរទៀតហើយ ប៉ុន្តែជាសាច់ឈាមតែមួយវិញ។ ម្ល៉ោះហើយ កុំឲ្យអ្នកណាពង្រាត់គូដែលព្រះបានផ្សំផ្គុំឡើយ»។ (ម៉ាថ. ១៩:៤-៦) លោកយេស៊ូបានដឹងថាអ្វីៗដែលយើងមើលឃើញអាចមានឥទ្ធិពលទៅលើចិត្តរបស់យើង។ ហេតុនេះ ក្នុងសុន្ទរកថារបស់លោកនៅលើភ្នំ លោកបានមានប្រសាសន៍ថា៖ «អ្នករាល់គ្នាធ្លាប់ឮគេថា៖ ‹អ្នកមិនត្រូវផិតក្បត់ឲ្យសោះ›។ ប៉ុន្តែ ខ្ញុំប្រាប់អ្នករាល់គ្នាថា អ្នកណាដែលសម្លឹងមើលស្រីរហូតដល់កើតមានចិត្តស្រើបស្រាល អ្នកនោះបានផិតក្បត់ជាមួយនឹងនាងនៅក្នុងចិត្តរួចហើយ»។ (ម៉ាថ. ៥:២៧, ២៨) តាមពិត ពួកអ្នកដែលមិនអើពើនឹងការព្រមានរបស់លោកយេស៊ូ កំពុងបណ្ដុះឲ្យមានចិត្តស្រឡាញ់ការប្រឆាំងច្បាប់រួចទៅហើយ។
១០. សូមរៀបរាប់ឧទាហរណ៍មួយដែលបង្ហាញថាបុគ្គលម្នាក់អាចយកឈ្នះពីការមើលរូបអាសអាភាស។
១០ សាថាននាំឲ្យមនុស្សប្រព្រឹត្តអំពើប្រាសចាកសីលធម៌តាមរយៈរូបអាសអាភាស។ ក្នុងរបៀបរបបពិភពលោកនេះ រូបបែបនេះមាននៅគ្រប់ទីកន្លែង។ ពួកអ្នកដែលមើលរូបអាសអាភាសពិបាកនឹងបំភ្លេច ហើយក៏អាចញៀនមើលរូបទាំងនោះដែរ។ សូមគិតអំពីអ្វីដែលបានកើតឡើងដល់គ្រិស្តសាសនិកម្នាក់។ គាត់បានស្រដីថា៖ «ខ្ញុំបានមើលរូបអាសអាភាសដោយលួចលាក់ ហើយខ្ញុំបានលង់ក្នុងការរវើរវាយបែបនេះ។ ទោះជាខ្ញុំដឹងថាការប្រព្រឹត្តនេះគឺខុសក៏ដោយ តែខ្ញុំនៅតែប្រាប់ខ្លួនឯងថា ព្រះនៅតែពេញចិត្តនឹងកិច្ចបម្រើរបស់ខ្ញុំ»។ តើអ្វីបានជួយបងប្រុសនេះឲ្យផ្លាស់ប្ដូរគំនិតរបស់គាត់? គាត់បាននិយាយថា៖ «ខ្ញុំបានសម្រេចចិត្តប្រាប់ពួកអ្នកចាស់ទុំអំពីបញ្ហារបស់ខ្ញុំ ទោះជានេះជាអ្វីដ៏ពិបាកបំផុតដែលខ្ញុំត្រូវធ្វើក៏ដោយ»។ នៅទីបំផុត បងប្រុសនេះបានយកឈ្នះទម្លាប់អាក្រក់នោះ។ គាត់បានសារភាពថា៖ «ក្រោយពីបានសម្អាតជីវិតខ្ញុំពីអំពើខុសឆ្គងបែបនេះ ខ្ញុំមានអារម្មណ៍ថាខ្ញុំពិតជាមានសមត្ថភាពវិនិច្ឆ័យដែលមិនផ្ដន្ទាទោសមែន»។ ដូច្នេះ ពួកអ្នកដែលស្អប់ការប្រឆាំងច្បាប់ត្រូវរៀនស្អប់រូបអាសអាភាសដែរ។
១១, ១២. ពេលជ្រើសរើសបទចម្រៀង តើយើងអាចបង្ហាញយ៉ាងណាថាយើងស្អប់ការប្រឆាំងច្បាប់?
១១ ចម្រៀងនិងពាក្យនៃចម្រៀងអាចមានឥទ្ធិពលយ៉ាងខ្លាំងទៅលើអារម្មណ៍ និងចិត្តរបស់យើង។ ចម្រៀងគឺជាអំណោយមួយពីព្រះ ហើយបានត្រូវប្រើក្នុងការគោរពប្រណិប័តន៍ពិតតាំងពីយូរយារមកហើយ។ (និក្ខ. ១៥:២០, ២១; អេភ. ៥:១៩) ប៉ុន្តែ ពិភពលោកដ៏អាក្រក់របស់សាថានពេញចិត្តនឹងចម្រៀងដែលលើកតម្កើងអំពើប្រាសចាកសីលធម៌។ (១យ៉ូន. ៥:១៩) តើអ្នកអាចដឹងយ៉ាងដូចម្ដេចថាចម្រៀងដែលអ្នកស្ដាប់កំពុងធ្វើឲ្យអ្នកមិនស្អាតបរិសុទ្ធនោះ?
ម៉ាថ. ១៥:១៨, ១៩; សូមពិនិត្យបន្ថែម យ៉ាកុប ៣:១០, ១១
១២ អ្នកអាចដឹងដោយសួរខ្លួនអ្នកថា‹តើចម្រៀងដែលខ្ញុំស្ដាប់នោះលើកតម្កើងអំពើឃាតកម្ម ផិតក្បត់ អំពើប្រាសចាកសីលធម៌ខាងផ្លូវភេទ និងមានពាក្យប្រមាថព្រះឬទេ? បើខ្ញុំអានពាក្យនៃចម្រៀងណាមួយឲ្យអ្នកឯទៀតស្ដាប់ តើអ្នកនោះនឹងគិតថា ខ្ញុំស្អប់ការប្រឆាំងច្បាប់ឬទេ? ឬក៏តើពាក្យនៃចម្រៀងនោះបង្ហាញថាចិត្តគំនិតរបស់ខ្ញុំមិនស្អាតបរិសុទ្ធទៅវិញ?›។ យើងមិនអាចអះអាងថាយើងស្អប់ការប្រឆាំងច្បាប់ ស្របពេលដែលយើងកំពុងស្ដាប់ចម្រៀងដែលលើកតម្កើងអ្វីៗទាំងនោះទេ។ លោកយេស៊ូបានមានប្រសាសន៍ថា៖ «អ្វីៗដែលចេញមកពីមាត់ នោះចេញពីក្នុងចិត្តមក ហើយគឺអ្វីៗទាំងនោះដែលធ្វើឲ្យមនុស្សមិនស្អាតបរិសុទ្ធ។ ជាឧទាហរណ៍ គំនិតអាក្រក់ ឃាតកម្ម ការផិតក្បត់ អំពើប្រាសចាកសីលធម៌ខាងផ្លូវភេទ ការលួច ការធ្វើជាសាក្សីក្លែងក្លាយ និងពាក្យប្រមាថ សុទ្ធតែចេញពីក្នុងចិត្តមក»។—ចូរមានទស្សនៈដូចលោកយេស៊ូចំពោះពួកអ្នកដែលមិនស្អប់ការប្រឆាំងច្បាប់
១៣. តើលោកយេស៊ូបានមានទស្សនៈយ៉ាងណាចំពោះពួកអ្នកដែលប្រព្រឹត្តអំពើខុសឆ្គងដែលមិនប្រែចិត្ត?
១៣ លោកយេស៊ូបានមានប្រសាសន៍ថាលោកមកដើម្បីហៅពួកអ្នកប្រព្រឹត្តអំពើខុសឆ្គងឬពួកអ្នកដែលប្រឆាំងច្បាប់ឲ្យប្រែចិត្ត។ (លូក. ៥:៣០-៣២) ប៉ុន្តែ តើលោកមានទស្សនៈយ៉ាងណាចំពោះពួកអ្នកដែលប្រព្រឹត្តអំពើខុសឆ្គងដែលមិនប្រែចិត្ត? លោកយេស៊ូបានផ្ដល់ការព្រមានយ៉ាងខ្លាំងដើម្បីកុំឲ្យយើងទទួលឥទ្ធិពលពីមនុស្សបែបនេះ។ (ម៉ាថ. ២៣:១៥, ២៣-២៦) លោកក៏មានប្រសាសន៍យ៉ាងច្បាស់ថា៖ «មិនមែនអស់អ្នកដែលនិយាយមកខ្ញុំថា៖ ‹លោកម្ចាស់! លោកម្ចាស់!› នឹងចូលក្នុងរាជាណាចក្រស្ថានសួគ៌ឡើយ តែគឺអ្នកណាដែលធ្វើតាមបំណងប្រាថ្នានៃបិតារបស់ខ្ញុំដែលស្ថិតនៅស្ថានសួគ៌វិញ។ នៅថ្ងៃនោះ[ពេលព្រះវិនិច្ឆ័យទោស] មនុស្សជាច្រើននឹងនិយាយមកខ្ញុំថា៖ ‹លោកម្ចាស់! លោកម្ចាស់! តើយើងមិនបានប្រកាសទំនាយតាងនាមលោក ហើយបណ្ដេញវិញ្ញាណកំណាចតាងនាមលោក ថែមទាំងធ្វើការដែលប្រកបដោយឫទ្ធានុភាពជាច្រើនតាងនាមលោកទេឬ?›»។ ប៉ុន្តែ លោកនឹងបដិសេធពួកអ្នកដែលប្រឆាំងច្បាប់ដែលមិនព្រមប្រែចិត្ត ដោយមានប្រសាសន៍ថា៖ «ចូរទៅឆ្ងាយពីខ្ញុំទៅ»។ (ម៉ាថ. ៧:២១-២៣) ហេតុអ្វីពួកគេនឹងទទួលការវិនិច្ឆ័យទោសបែបនេះ? ពីព្រោះការប្រឆាំងច្បាប់របស់ពួកគេបង្ខូចកិត្ដិយសព្រះនិងបណ្ដាលឲ្យអ្នកឯទៀតមានគ្រោះថ្នាក់ទៀតផង។
១៤. ហេតុអ្វីពួកអ្នកដែលប្រព្រឹត្តអំពើខុសឆ្គងដែលមិនប្រែចិត្តត្រូវដកចេញពីក្រុមជំនុំ?
១៤ បណ្ដាំរបស់ព្រះបង្គាប់ឲ្យដកពួកអ្នកដែលប្រព្រឹត្តអំពើខុសឆ្គងដែលមិនប្រែចិត្តចេញពីក្រុមជំនុំ។ (សូមអាន កូរិនថូសទី១ ៥:៩-១៣) យ៉ាងហោចណាស់មានមូលហេតុបីយ៉ាងដែលចាំបាច់ឲ្យក្រុមជំនុំធ្វើដូច្នេះ (១) រក្សានាមរបស់ព្រះយេហូវ៉ាពីការមើលងាយ (២) ការពារក្រុមជំនុំពីអ្វីដែលមិនស្អាតស្អំ និង(៣) ដើម្បីជួយអ្នកដែលប្រព្រឹត្តអំពើខុសឆ្គងឲ្យប្រែចិត្តបើអាចធ្វើបាន។
១៥. បើយើងចង់រក្សាភក្ដីភាពចំពោះព្រះយេហូវ៉ា តើយើងគួរសួរខ្លួនយើងនូវសំណួរសំខាន់ៗអ្វីខ្លះ?
១៥ តើយើងមានចិត្តគំនិតដូចលោកយេស៊ូចំពោះពួកអ្នកដែលមានទម្លាប់ប្រព្រឹត្តអំពើប្រឆាំងច្បាប់ឬទេ? យើងត្រូវតែពិចារណានូវសំណួរទាំងនេះ‹តើខ្ញុំនឹងសម្រេចចិត្តសេពគប់ជាទៀងទាត់ជាមួយនឹងមនុស្សម្នាក់ដែលបានបណ្ដាច់មិត្តភាព ឬអ្នកដែលដកខ្លួនចេញពីក្រុមជំនុំគ្រិស្តសាសនិកឬទេ? ចុះយ៉ាងណាបើគាត់ជាសាច់ញាតិជិតដិតដែលមិនរស់នៅជាមួយនឹងខ្ញុំទៀតនោះ?›។ កាលៈទេសៈបែបនេះអាចល្បងលសេចក្ដីស្រឡាញ់របស់យើងចំពោះសេចក្ដីសុចរិត និងភក្ដីភាពរបស់យើងចំពោះព្រះ។ *
១៦, ១៧. តើម្ដាយម្នាក់ដែលជាគ្រិស្តសាសនិកប្រឈមមុខនឹងការពិបាកអ្វី? ស្តីអំពីការបណ្ដាច់មិត្តភាពពួកអ្នកដែលប្រព្រឹត្តអំពើខុសឆ្គងដែលមិនប្រែចិត្ត តើអ្វីបានជួយបងស្រីនេះឲ្យគាំទ្ររបៀបរៀបចំនោះ?
១៦ សូមពិចារណាបទពិសោធន៍របស់បងស្រីម្នាក់ដែលមានកូនប្រុស
ពេញវ័យ ដែលកូននោះធ្លាប់ស្រឡាញ់ព្រះយេហូវ៉ា។ ប៉ុន្តែ ក្រោយមកកូននោះសម្រេចចិត្តប្រព្រឹត្តការប្រឆាំងច្បាប់ដោយមិនប្រែចិត្ត ហើយបានត្រូវបណ្ដាច់មិត្តភាពពីក្រុមជំនុំ។ បងស្រីយើងស្រឡាញ់ព្រះយេហូវ៉ា តែគាត់ក៏ស្រឡាញ់កូនដែរ ហើយពិបាកណាស់ឲ្យគាត់ធ្វើតាមបង្គាប់ក្នុងគម្ពីរដែលថាគាត់ត្រូវឈប់សេពគប់ជាមួយកូន។១៧ បើអ្នកជួបបងស្រីនេះ តើអ្នកអាចឲ្យឱវាទអ្វីដល់គាត់? អ្នកចាស់ទុំម្នាក់បានជួយគាត់ឲ្យដឹងថាព្រះយេហូវ៉ាយល់អំពីការឈឺចាប់របស់គាត់។ បងប្រុសនោះបានសុំឲ្យគាត់គិតអំពីការឈឺចាប់ដែលព្រះយេហូវ៉ាមាន ពេលពួកទេវតាដែលជាកូនៗរបស់លោកបានបះបោរនោះ។ បងប្រុសនោះបានវែកញែកហេតុផលជាមួយគាត់ថា ទោះជាព្រះយេហូវ៉ាដឹងថាកាលៈទេសៈរបស់គាត់នាំឲ្យឈឺចាប់ខ្លាំងយ៉ាងណាក៏ដោយ តែលោកតម្រូវឲ្យបណ្ដាច់មិត្តភាពពួកអ្នកដែលប្រព្រឹត្តអំពើខុសឆ្គងដែលមិនប្រែចិត្ត។ គាត់បានស្ដាប់ការរំលឹកនេះ ហើយបានគាំទ្រការរៀបចំនេះដោយមានភក្ដីភាព។ * ការបង្ហាញភក្ដីភាពបែបនេះធ្វើឲ្យព្រះយេហូវ៉ាពេញចិត្តណាស់។—សុភ. ២៧:១១
១៨, ១៩. (ក) ដោយលែងមានទំនាក់ទំនងជាមួយបុគ្គលដែលប្រព្រឹត្តអំពើប្រឆាំងច្បាប់ តើនេះបង្ហាញភ័ស្តុតាងថាយើងស្អប់អ្វី? (ខ) តើមានលទ្ធផលអ្វីពេលយើងមានចិត្តស្មោះភក្ដីចំពោះព្រះនិងការរៀបចំរបស់លោក?
១៨ ប្រសិនបើអ្នកមានកាលៈទេសៈស្រដៀងគ្នានេះ សូមចាំមិនភ្លេចថាព្រះយេហូវ៉ាយល់ចិត្តរបស់អ្នក។ ដោយលែងមានទំនាក់ទំនងជាមួយបុគ្គលដែលបានត្រូវបណ្ដាច់មិត្តភាពឬបុគ្គលដែលបានដកខ្លួនចេញពីក្រុមជំនុំគ្រិស្តសាសនិក អ្នកបង្ហាញថាអ្នកស្អប់ចិត្តគំនិតនិងការប្រព្រឹត្តដែលនាំឲ្យមានលទ្ធផលបែបនោះ។ ប៉ុន្តែ អ្នកក៏បង្ហាញដែរថាអ្នកស្រឡាញ់ពួកគាត់ខ្លាំងណាស់ ដែលអ្នកចង់ធ្វើអ្វីៗដែលនាំឲ្យគាត់ទទួលប្រយោជន៍ច្រើនបំផុត។ ភក្ដីភាពដែលអ្នកបង្ហាញចំពោះព្រះយេហូវ៉ានឹងផ្ដល់លទ្ធភាពកាន់តែច្រើនឲ្យបុគ្គលដែលទទួលការប្រៀនប្រដៅឲ្យប្រែចិត្ត ហើយវិលមករកព្រះយេហូវ៉ាវិញ។
១៩ មនុស្សម្នាក់ដែលបានត្រូវបណ្ដាច់មិត្តភាព ហើយក្រោយមកបានត្រូវទទួលស្គាល់ជាសមាជិកក្រុមជំនុំឡើងវិញ បានសរសេរថា៖ «ខ្ញុំសប្បាយចិត្តណាស់ ដោយសារព្រះយេហូវ៉ាស្រឡាញ់រាស្ត្ររបស់លោកខ្លាំងដល់ម្ល៉េះ ដែលលោកចង់ឲ្យអង្គការរបស់លោកស្អាតស្អំជានិច្ច។ ចំពោះការបណ្ដាច់មិត្តភាពប្រហែលជាធ្វើឲ្យមនុស្សឯទៀតគិតថាតឹងរ៉ឹងពេក ប៉ុន្តែតាមការពិតគឺជាតម្រូវការដ៏ចាំបាច់ ហើយក៏ប្រកបដោយសេចក្ដីស្រឡាញ់ដែរ»។ ប្រសិនបើសមាជិកក្នុងក្រុមជំនុំ រួមទាំងសមាជិកក្នុងក្រុមគ្រួសាររបស់គាត់តែងតែទាក់ទងជាមួយគាត់ក្នុងអំឡុងពេលដែលគាត់បណ្ដាច់មិត្តភាពនោះ តើអ្នកគិតថានេះនឹងជួយគាត់ឲ្យសន្និដ្ឋានដូច្នេះឬទេ? ការគាំទ្ររបស់យើងចំពោះការរៀបចំដែលមានមូលដ្ឋានលើបទគម្ពីរស្តីអំពីការបណ្ដាច់មិត្តភាព បង្ហាញភ័ស្តុតាងថាយើងស្រឡាញ់សេចក្ដីសុចរិត ហើយទទួលស្គាល់ថាព្រះយេហូវ៉ាមានសិទ្ធិដើម្បីតាំងខ្នាតតម្រាចំពោះការប្រព្រឹត្តរបស់យើង។
«ស្អប់ការអាក្រក់»
២០, ២១. ហេតុអ្វីជាការសំខាន់ដែលយើងរៀនឲ្យចេះស្អប់ការប្រឆាំងច្បាប់?
២០ សាវ័កពេត្រុសបានព្រមានថា៖ «ចូរដឹងខ្លួនជានិច្ច ហើយប្រុងប្រយ័ត្នចុះ»។ ហេតុអ្វី? ពីព្រោះ«មេកំណាច ដែលជាសត្រូវរបស់អ្នករាល់គ្នា ដើរក្រវែលដូចតោដែលកំពុងគ្រហឹមរកលេបត្របាក់អ្នកណាម្នាក់»។ (១ពេ. ៥:៨) តើអ្នកនោះអាចជារូបអ្នកឬទេ? នេះគឺអាស្រ័យទៅលើរបៀបដែលអ្នករៀនឲ្យចេះស្អប់ការប្រឆាំងច្បាប់បានខ្លាំងប៉ុណ្ណា។
២១ ការរៀនឲ្យចេះស្អប់អ្វីដែលអាក្រក់មិនងាយស្រួលទេ។ យើងកើតមកដោយមានភាពខុសឆ្គង ហើយយើងរស់នៅក្នុងពិភពលោកដែលលើកទឹកចិត្តយើងឲ្យធ្វើតាមសេចក្ដីប៉ងប្រាថ្នាខុសឆ្គងនោះ។ (១យ៉ូន. ២:១៥-១៧) ប៉ុន្តែ បើយើងយកតម្រាប់តាមលោកយេស៊ូគ្រិស្ត ហើយបណ្ដុះឲ្យមានសេចក្ដីស្រឡាញ់យ៉ាងជ្រាលជ្រៅចំពោះព្រះយេហូវ៉ា យើងអាចមានជោគជ័យក្នុងការបណ្ដុះឲ្យមានចិត្តស្អប់ការប្រឆាំងច្បាប់បាន។ ដូច្នេះ សូមឲ្យយើងតាំងចិត្ត«ស្អប់ការអាក្រក់» ហើយមានទំនុកចិត្តទាំងស្រុងថាព្រះយេហូវ៉ា«ទំនុកបំរុង . . . ពួកអ្នកបរិសុទ្ធរបស់ទ្រង់ ក៏ជួយគេឲ្យរួចពីកណ្ដាប់ដៃនៃពួកមនុស្សអាក្រក់»។—ទំនុក. ៩៧:១០
[កំណត់សម្គាល់]
^ វគ្គ 15 ដើម្បីទទួលព័ត៌មានល្អិតល្អន់អំពីរឿងនេះ សូមមើល កិច្ចបម្រើព្រះរាជាណាចក្រយើង ខែសីហា ឆ្នាំ២០០២ ទំព័រ៣-៤។
^ វគ្គ 17 សូមមើលបន្ថែមនូវទស្សនាវដ្ដីប៉មយាម ថ្ងៃទី១ ខែមករា ឆ្នាំ២០០២ ទំព័រ១៥, ១៦ វគ្គ១២-១៦។
តើអ្នកនឹងឆ្លើយយ៉ាងណា?
• តើអ្វីនឹងជួយយើងឲ្យពិចារណាអំពីចិត្តគំនិតរបស់យើងចំពោះគ្រឿងស្រវឹង?
• តើយើងអាចធ្វើយ៉ាងណាដើម្បីការពារខ្លួនយើងពីអ្វីៗដែលពាក់ព័ន្ធនឹងមន្តអាគម?
• ហេតុអ្វីការមើលរូបអាសអាភាសនាំឲ្យមានគ្រោះថ្នាក់?
• ពេលបុគ្គលម្នាក់បានត្រូវបណ្ដាច់មិត្តភាព តើយើងបង្ហាញថាយើងស្អប់ការប្រឆាំងច្បាប់យ៉ាងដូចម្ដេច?
[សំណួរសម្រាប់វគ្គនីមួយៗ]
[រូបភាពនៅទំព័រ២៧]
ប្រសិនបើអ្នកសម្រេចចិត្តផឹកគ្រឿងស្រវឹង តើអ្នកគួរពិចារណាអំពីអ្វីខ្លះ?
[រូបភាពនៅទំព័រ២៨]
ចូរប្រយ័ត្ននឹងឥទ្ធិពលរបស់សាថានដែលមានក្នុងខ្សែភាពយន្ត
[រូបភាពនៅទំព័រ២៩]
តើអ្នកដែលមើលរូបអាសអាភាសបណ្ដុះឲ្យមានចិត្តស្រឡាញ់អ្វី?