លោកយេស៊ូ តើលោកមកពីណា?
លោកយេស៊ូ តើលោកមកពីណា?
«[ពីឡាត]បានចូលក្នុងវិមានរបស់អភិបាលម្ដងទៀត ហើយនិយាយទៅកាន់លោកយេស៊ូថា៖ ‹តើអ្នកមកពីណា?› ប៉ុន្តែលោកយេស៊ូមិនឆ្លើយទេ»។—យ៉ូហាន ១៩:៩
ប៉ុនទាសពីឡាតដែលជាអភិបាលស្រុកជនជាតិរ៉ូមបានសួរសំណួរនោះ ពេលកំពុងកាត់ទោសដល់ជីវិតលោកយេស៊ូ។ ពីឡាតដឹងរួចទៅហើយអំពីតំបន់ដែលលោកយេស៊ូរស់នៅ។ (លូកា ២៣:៦, ៧) គាត់ក៏ដឹងដែរថាលោកយេស៊ូមិនមែនជាមនុស្សធម្មតាឡើយ។ ដូច្នេះ តើពីឡាតកំពុងឆ្ងល់ថាលោកយេស៊ូធ្លាប់មានជីវិតរស់នៅពីមុនឬ? តើអ្នកគ្រប់គ្រងនេះពិតជាសុខចិត្តទទួល និងប្រព្រឹត្តតាមសេចក្ដីពិតឬទេ? មិនថាពីឡាតបានសួរដោយមានបំណងចិត្តបែបណាក៏ដោយ លោកយេស៊ូមិនព្រមឆ្លើយទេ ហើយមិនយូរក្រោយមក ពីឡាតបានបង្ហាញច្បាស់ថាគាត់គិតអំពីមុខមាត់របស់គាត់ជាជាងសេចក្ដីពិតនិងយុត្ដិធម៌វិញ។—ម៉ាថាយ ២៧:១១-២៦
ប៉ុន្តែ ចំពោះពួកអ្នកដែលចង់ដឹងយ៉ាងស្មោះ គឺស្រួលណាស់ឲ្យពួកគេយល់ថា តើលោកយេស៊ូមកពីណា? គម្ពីរបរិសុទ្ធបង្ហាញអំពីដើមកំណើតរបស់លោកយេស៊ូគ្រិស្ត។ សូមពិចារណាចំណុចដូចតទៅនេះ:
▪ តើលោកកើតនៅឯណា? លោកយេស៊ូបានកើតមកក្រោមស្ថានភាពដ៏សាមញ្ញមួយនៅភូមិបេថ្លេហិមក្នុងតំបន់យូឌា។ នៅគ្រានោះ សេសារ អូគូសបានចេញក្រឹត្យឲ្យមនុស្សទាំងអស់ទៅចុះបញ្ជី ហើយនេះជំរុញឲ្យយ៉ូសែបនិងម៉ារៀធ្វើដំណើរទៅភូមិបេថ្លេហិមដែលជាកន្លែងនៃពូជពង្សវង្សត្រកូលរបស់យ៉ូសែប។ នៅពេលនោះ នាងម៉ារៀមាន«ផ្ទៃពោះជិតគ្រប់ខែ»ហើយ។ ប៉ុន្តែ ដោយសារផ្ទះសម្នាក់អស់បន្ទប់ ហើយមានមនុស្សកកកុញនៅភូមិនោះ ពួកគាត់បានស្នាក់នៅក្នុងក្រោលសត្វ ជាកន្លែងដែលលោកយេស៊ូបានកើតមក រួចពួកគាត់ផ្ដេកទារកយេស៊ូក្នុងស្នូក។—លូកា ២:១-៧
រាប់រយឆ្នាំមុន ទំនាយមួយក្នុងគម្ពីរបានទាយទុកអំពីកន្លែងដែលលោកយេស៊ូត្រូវកើតមកថា៖ «តែឯង ឱបេថ្លេហិម អេប្រាតាអើយ ឯងដែលតូចនៅក្នុងពួកយូដាទាំងពាន់ៗ នឹងមានម្នាក់កើតចេញពីឯងមកឲ្យអញ អ្នកនោះត្រូវឡើងជាអ្នកគ្រប់គ្រងលើអ៊ីស្រាអែល»។ * (មីកា ៥:១) តាមមើលទៅ ភូមិបេថ្លេហិមជាភូមិមួយដែលតូចពេកដើម្បីរាប់បញ្ចូលក្នុងចំណោមក្រុងនានានៅស្រុកយូដា។ ប៉ុន្តែ ភូមិដ៏តូចនេះនឹងមានកិត្ដិយសពិសេសមួយ គឺមេស្ស៊ីដែលបានត្រូវសន្យាឬគ្រិស្តនឹងត្រូវកើតមកក្នុងភូមិនោះ។—ម៉ាថាយ ២:៣-៦; យ៉ូហាន ៧:៤០-៤២
▪ តើលោកបានធំឡើងនៅឯណា? ក្រោយពីបានរស់នៅអស់មួយរយៈពេលខ្លីនៅប្រទេសអេស៊ីប ក្រុមគ្រួសាររបស់លោកយេស៊ូបានរើទៅរស់នៅក្រុងណាសារ៉ែត ស្រុកកាលីឡេ ប្រហែលជា៩៦គីឡូម៉ែត្រនៅទិសខាងជើងពីក្រុងយេរូសាឡិម។ នៅពេលនោះ លោកយេស៊ូមានអាយុតិចជាងបីឆ្នាំ។ តំបន់នៃក្រុងណាសារ៉ែតគឺស្អាតណាស់ដែលមានពួកកសិករ ពួកគង្វាល និងពួកអ្នកនេសាទប្រកបមុខរបររបស់ពួកគេរៀងៗខ្លួន គឺនៅទីនោះហើយដែលលោកយេស៊ូបានធំឡើងក្នុងក្រុមគ្រួសារដ៏ធំ ដែលទំនងជាក្រុមគ្រួសារដ៏សាមញ្ញមួយ។—ម៉ាថាយ ១៣:៥៥, ៥៦
ច្រើនសតវត្សរ៍មុន គម្ពីរបានទាយទុកថាមេស្ស៊ីនឹងជា«អ្នកក្រុងណាសារ៉ែត»។ ម៉ាថាយដែលជាអ្នកសរសេរម្នាក់នៃសៀវភៅដំណឹងល្អបានស្រដីថា ក្រុមគ្រួសាររបស់លោកយេស៊ូបានរស់នៅក្រុង«ណាសារ៉ែត ដើម្បីសម្រេចនូវពាក្យរបស់អ្នកប្រកាសទំនាយ ដែលបានទាយថា៖ ‹លោកនឹងត្រូវគេហៅជាអ្នកក្រុងណាសារ៉ែត›»។ (ម៉ាថាយ ២:១៩-២៣) តាមមើលទៅឈ្មោះណាសារ៉ែតជាប់ទាក់ទងនឹងពាក្យហេប្រឺដែលប្រើសម្រាប់ពាក្យ«មែក»។ ម៉ាថាយបានសំដៅទៅលើទំនាយមួយរបស់អេសាយដែលបានហៅមេស្ស៊ីថា«មែក១»ដែលចេញពីអ៊ីសាយ ដែលនេះមានន័យថាមេស្ស៊ីនឹងត្រូវជាកូនចៅរបស់អ៊ីសាយដែលជាឪពុករបស់ស្តេចដាវីឌ។ (អេសាយ ១១:១) នេះជាការពិត ព្រោះលោកយេស៊ូជាកូនចៅរបស់អ៊ីសាយតាមរយៈដាវីឌប្រាកដមែន!—ម៉ាថាយ ១:៦, ១៦; លូកា ៣:២៣, ៣១, ៣២
▪ តើលោកធ្លាប់រស់នៅឯណាមុនកើតជាមនុស្ស? គម្ពីរបង្រៀនថាលោកយេស៊ូមានជីវិតរស់នៅយូរយារមុនលោកកើតមកក្នុងក្រោលសត្វនៅភូមិបេថ្លេហិមទៅទៀត។ ទំនាយនៅសៀវភៅមីកាដែលបានត្រូវដកស្រង់ពីខាងលើ បន្តចែងថា៖ «ដើមកំណើតរបស់[លោក]បានចាប់តាំងពីបុរាណ គឺពីអស់កល្បរៀងមក»។ (មីកា ៥:១) ក្នុងនាមជាកូនច្បងរបស់ព្រះ លោកយេស៊ូធ្លាប់ជាបុគ្គលវិញ្ញាណនៅស្ថានសួគ៌មុនលោកកើតជាមនុស្សនៅផែនដី។ លោកបានមានប្រសាសន៍អំពីខ្លួនលោកថា៖ «ខ្ញុំបានចុះមកពីស្ថានសួគ៌»។ (យ៉ូហាន ៦:៣៨; ៨:២៣) តើនេះបានកើតឡើងយ៉ាងដូចម្ដេច?
តាមរយៈសកម្មពលបរិសុទ្ធ ព្រះយេហូវ៉ាបានធ្វើការអស្ចារ្យមួយដោយបញ្ជូនជីវិតរបស់បុត្រលោកនៅស្ថានសួគ៌ទៅដាក់ក្នុងផ្ទៃរបស់ស្ត្រីក្រមុំបរិសុទ្ធជនជាតិយូដាម្នាក់ឈ្មោះនាងម៉ារៀ ដើម្បីឲ្យបុត្រលោកកើតមកជាមនុស្សដែលល្អឥតខ្ចោះ។ * សម្រាប់ព្រះយេហូវ៉ាដែលមានឫទ្ធានុភាពខ្លាំងក្លាបំផុត មិនជាការពិបាកក្នុងការធ្វើការអស្ចារ្យបែបនេះទេ។ នេះស្របតាមពាក្យសម្ដីរបស់ទេវតាដែលបានពន្យល់ទៅនាងម៉ារៀថា៖ «គ្មានប្រសាសន៍ណារបស់ព្រះ ដែលលោកពុំអាចសម្រេចបានឡើយ»។—លូកា ១:៣០-៣៥, ៣៧
គម្ពីរមិនគ្រាន់តែប្រាប់យើងអំពីដើមកំណើតរបស់លោកយេស៊ូប៉ុណ្ណោះទេ តែក្នុងសៀវភៅម៉ាថាយ ម៉ាកុស លូកា និងយ៉ូហានក៏បានប្រាប់យើងយ៉ាងច្រើនអំពីរបៀបរស់នៅរបស់លោកដែរ។
[កំណត់សម្គាល់]
^ វគ្គ 6 អេប្រាតាជាឈ្មោះដំបូងរបស់ភូមិបេថ្លេហិម។—លោកុប្បត្តិ ៣៥:១៩
^ វគ្គ 10 យេហូវ៉ាជាឈ្មោះរបស់ព្រះដែលមានក្នុងគម្ពីរបរិសុទ្ធ។