លោកយេស៊ូ តើលោកមានរបៀបរស់នៅបែបណា?
លោកយេស៊ូ តើលោកមានរបៀបរស់នៅបែបណា?
«អាហាររបស់ខ្ញុំ គឺខ្ញុំធ្វើតាមបំណងប្រាថ្នារបស់លោកដែលបានចាត់ខ្ញុំឲ្យមក ព្រមទាំងបង្ហើយកិច្ចការដែលលោកបានផ្ដល់ឲ្យ»។—យ៉ូហាន ៤:៣៤
បរិបទនៃប្រសាសន៍របស់លោកយេស៊ូខាងលើនេះបង្ហាញយ៉ាងច្រើនអំពីអ្វីដែលសំខាន់បំផុតក្នុងជីវិតរបស់លោក។ លោកនិងពួកអ្នកកាន់តាមលោកបានដើរពេញមួយព្រឹកកាត់តំបន់ដែលមានទីទួលជាច្រើនក្នុងស្រុកសាម៉ារី។ (យ៉ូហាន ៤:៦, កំណត់សម្គាល់) នៅពេលនោះ ពួកអ្នកកាន់តាមលោកបានអញ្ជើញលោកឲ្យពិសាអាហារ ដោយគិតថាលោកប្រាកដជាឃ្លានហើយ។ (យ៉ូហាន ៤:៣១-៣៣) ក្នុងពាក្យតបឆ្លើយរបស់លោក នោះលោកបានសង្ខេបអំពីគោលបំណងក្នុងជីវិតលោក ពោលគឺការបំពេញកិច្ចការរបស់ព្រះសំខាន់ជាងការបរិភោគអាហារទៅទៀត។ តាមរយៈពាក្យសម្ដីនិងការប្រព្រឹត្ត នោះលោកយេស៊ូបានរស់នៅដើម្បីធ្វើតាមបំណងប្រាថ្នារបស់ព្រះ។ តើការធ្វើដូច្នេះរួមបញ្ចូលអ្វីខ្លះ?
▪ ផ្សព្វផ្សាយនិងបង្រៀនមនុស្សអំពីរាជាណាចក្ររបស់ព្រះ គម្ពីរពន្យល់អំពីកិច្ចការរបស់លោកយេស៊ូដោយចែងថា៖ «លោកបានធ្វើដំណើរពេញស្រុកកាលីឡេទាំងមូល ដោយបង្រៀន . . . និងផ្សព្វផ្សាយដំណឹងល្អអំពីរាជាណាចក្រ»។ (ម៉ាថាយ ៤:២៣) លោកយេស៊ូមិនគ្រាន់តែផ្សព្វផ្សាយអំពីរាជាណាចក្ររបស់ព្រះប៉ុណ្ណោះទេ តែលោកក៏បានបង្រៀនពួកគេដែរ ពោលគឺលោកបានណែនាំ ពន្យល់ និងនាំឲ្យពួកគេជឿដោយចេះវែកញែកហេតុផល។ រាជាណាចក្ររបស់ព្រះជាប្រធានបទនៃដំណឹងរបស់លោក។
ក្នុងកិច្ចបម្រើផ្សាយរបស់លោកទាំងមូល លោកបានបង្រៀនពួកអ្នកស្ដាប់លោកថា អ្វីទៅជារាជាណាចក្ររបស់ព្រះ និងអ្វីដែលរាជាណាចក្រនោះនឹងធ្វើ។ សូមកត់សម្គាល់សេចក្ដីពិតអំពីរាជាណាចក្ររបស់ព្រះ និងខគម្ពីរដែលមានប្រសាសន៍របស់លោកយេស៊ូ ដូចតទៅនេះ:
▪ រាជាណាចក្ររបស់ព្រះជារដ្ឋាភិបាលមួយនៅស្ថានសួគ៌ ហើយព្រះយេហូវ៉ាបានតែងតាំងលោកយេស៊ូឲ្យធ្វើជាស្តេច។—ម៉ាថាយ ៤:១៧; យ៉ូហាន ១៨:៣៦
▪ រាជាណាចក្រនេះនឹងធ្វើឲ្យនាមរបស់ព្រះបានបរិសុទ្ធ ហើយក៏នឹងធ្វើឲ្យបំណងប្រាថ្នារបស់លោកបានសម្រេចនៅផែនដីដូចនៅស្ថានសួគ៌ដែរ។—ម៉ាថាយ ៦:៩, ១០
▪ ក្រោមការគ្រប់គ្រងរបស់រាជាណាចក្រព្រះ ផែនដីទាំងមូលនឹងត្រូវក្លាយទៅជាសួនឧទ្យាន។—លូកា ២៣:៤២, ៤៣
▪ បន្ដិចទៀត រាជាណាចក្ររបស់ព្រះនឹងមកដល់ ហើយសម្រេចបំណងប្រាថ្នារបស់ព្រះនៅផែនដី។ *—ម៉ាថាយ២៤:៣, ៧-១២
▪ ធ្វើការដែលប្រកបដោយឫទ្ធានុភាព លោកយេស៊ូបានត្រូវគេស្គាល់ជាទូទៅថាជា«លោកគ្រូ»។ (យ៉ូហាន ១៣:១៣) ក៏ប៉ុន្តែ ក្នុងអំឡុងបីឆ្នាំកន្លះដែលលោកធ្វើកិច្ចបម្រើផ្សាយ លោកបានធ្វើការដែលប្រកបដោយឫទ្ធានុភាពមួយចំនួន។ យ៉ាងហោចណាស់ លោកបានធ្វើការទាំងនោះដោយមានមូលហេតុពីរយ៉ាង។ ទី១ ការទាំងនោះជួយបញ្ជាក់ថាព្រះពិតជាបានចាត់លោកឲ្យមកផែនដីមែន។ (ម៉ាថាយ ១១:២-៦) ទី២ ការទាំងនោះបង្ហាញឲ្យឃើញទុកជាមុនអំពីកិច្ចការដ៏អស្ចារ្យជាងដែលលោកនឹងធ្វើនៅពេលអនាគត ក្នុងនាមជាស្តេចនៃរាជាណាចក្ររបស់ព្រះ។ សូមកត់សម្គាល់អំពីកិច្ចការអស្ចារ្យខ្លះដែលលោកបានធ្វើដែលមានដូចតទៅនេះ:
▪ លោកបានធ្វើឲ្យសមុទ្រនិងខ្យល់ព្យុះមានភាពស្ងប់ស្ងាត់។—ម៉ាកុស ៤:៣៩-៤១
▪ លោកបានធ្វើឲ្យមនុស្សឈឺជាសះស្បើយ ដែលមានដូចជាមនុស្សងងឹតភ្នែក មនុស្សថ្លង់ និងមនុស្សខ្វិនជាដើម។—លូកា ៧:២១, ២២
▪ លោកបានធ្វើឲ្យមានអាហារជាច្រើន យ៉ាងនេះលោកបានផ្ដល់អាហារគ្រប់គ្រាន់សម្រាប់មនុស្សមួយក្រុមធំដែលស្រេកឃ្លាន។—ម៉ាថាយ ១៤:១៧-២១; ១៥:៣៤-៣៨
▪ យ៉ាងហោចណាស់មានបីករណីដែលលោកបានប្រោសមនុស្សស្លាប់ឲ្យរស់ឡើងវិញ។—លូកា ៧:១១-១៥; ៨:៤១-៥៥; យ៉ូហាន ១១:៣៨-៤៤
សូមស្រមៃគិតថា យើងនឹងមានជីវិតសប្បាយយ៉ាងណាទៅហ្ន៎ពេលស្ថិតក្រោមការគ្រប់គ្រងរបស់ស្តេចដែលមានឫទ្ធានុភាពបែបនេះ!
▪ បង្ហាញឲ្យឃើញពីបុគ្គលិកលក្ខណៈរបស់ព្រះយេហូវ៉ា ក្នុងការបង្រៀនមនុស្សអំពីព្រះយេហូវ៉ា នោះគ្មានអ្នកណាមានលក្ខណៈគ្រប់គ្រាន់ជាងលោកយេស៊ូគ្រិស្តដែលជាបុត្ររបស់ព្រះនោះទេ។ ក្នុងនាមជា«បុត្រច្បងក្នុងចំណោមអ្វីៗទាំងអស់ដែលព្រះបានបង្កើត» នោះលោកយេស៊ូបានរស់នៅជាមួយព្រះយេហូវ៉ានៅស្ថានសួគ៌យូរជាងបុគ្គលវិញ្ញាណឯទៀតទាំងអស់។ (កូឡុស ១:១៥) សូមគិតអំពីឱកាសដែលលោកយេស៊ូមានដើម្បីយល់យ៉ាងពេញលេញអំពីគំនិតរបស់បិតាលោក និងឱកាសដើម្បីរៀនអំពីបំណងប្រាថ្នា ខ្នាតតម្រា ថែមទាំងផ្លូវរបស់បិតាលោកដែរ។
ហេតុនេះហើយបានជាលោកយេស៊ូអាចមានប្រសាសន៍យ៉ាងត្រឹមត្រូវថា៖ «គ្មានអ្នកណាស្គាល់បុត្ររបស់ព្រះច្បាស់ជាងព្រះដែលជាបិតា ហើយគ្មានអ្នកណាស្គាល់ព្រះដែលជាបិតាច្បាស់ជាងបុត្ររបស់លោក និងអ្នកដែលបុត្ររបស់លោកសុខចិត្តបើកសម្ដែងឲ្យស្គាល់នោះទេ»។ (លូកា ១០:២២) ពេលនៅផែនដី លោកយេស៊ូសុខចិត្តថែមទាំងសប្បាយចិត្តក្នុងការបើកសម្ដែងឲ្យអ្នកឯទៀតស្គាល់បិតារបស់លោក។ ពាក្យសម្ដីនិងការបង្រៀនរបស់លោកអំពីព្រះគឺល្អជាងគេបំផុត ពីព្រោះលោកយេស៊ូបាននឹកចាំអំពីអ្វីៗដែលលោកបានឃើញនិងធ្វើនៅស្ថានសួគ៌ ក៏នឹកចាំអំពីពេលលោកនៅចំពោះមុខព្រះដ៏ខ្ពស់បំផុតផងដែរ។—យ៉ូហាន ៨:២៨
ពេលនៅផែនដី លោកយេស៊ូបានយកអ្វីដែលលោកបានរៀនអំពីបិតារបស់លោកនៅស្ថានសួគ៌ មកបង្រៀនតាមវិធីដែលនាំឲ្យមនុស្សងាយយល់និងស្រួលអនុវត្តតាមវិញ។
សូមពិចារណាអំពីវិធីពីរយ៉ាងដ៏សំខាន់ដែលលោកយេស៊ូបានបើកសម្ដែងឲ្យស្គាល់បិតារបស់លោក។
▪ ក្នុងការបង្រៀនរបស់លោក លោកយេស៊ូបានសម្ដែងឲ្យគេស្គាល់សេចក្ដីពិតអំពីព្រះយេហូវ៉ា ពោលគឺអំពីនាមរបស់លោក គោលបំណងរបស់លោក និងផ្លូវរបស់លោក។—យ៉ូហាន ៣:១៦; ១៧:៦, ២៦
▪ តាមការប្រព្រឹត្តរបស់លោកយេស៊ូ លោកបានបង្ហាញអំពីបុគ្គលិកលក្ខណៈរបស់ព្រះយេហូវ៉ាដែលមានគុណសម្បត្ដិដ៏ល្អប្រពៃជាច្រើន។ លោកយេស៊ូបានធ្វើដូច្នេះយ៉ាងល្អឥតខ្ចោះដល់ម្ល៉េះ ដែលលោកហាក់ដូចជាអាចមានប្រសាសន៍ថា៖ ‹បើអ្នកចង់ស្គាល់បិតារបស់ខ្ញុំ សូមមើលខ្ញុំចុះ›។—យ៉ូហាន ៥:១៩; ១៤:៩
យើងពិតជាកោតស្ងើចចំពោះរបៀបរស់នៅរបស់លោកយេស៊ូណាស់។ ប៉ុន្តែ បើយើងពិនិត្យមើលអំពីមូលហេតុដែលលោកស្លាប់ និងប្រព្រឹត្តស្របតាមអ្វីដែលយើងរៀន នោះយើងអាចទទួលប្រយោជន៍ច្រើនថែមទៀតដែលគណនាពុំបានឡើយ។
[កំណត់សម្គាល់]
^ វគ្គ 9 ដើម្បីរៀនបន្ថែមអំពីរាជាណាចក្ររបស់ព្រះ និងអំពីរបៀបដែលយើងអាចដឹងថា រាជាណាចក្រនេះនឹងមកដល់នៅពេលបន្ដិចទៀត សូមមើលជំពូកទី៨ដែលមានចំណងជើង «តើព្រះរាជាណាចក្ររបស់ព្រះជាអ្វី?» និងជំពូកទី៩ដែលមានចំណងជើង «តើយើងកំពុងតែរស់នៅ‹ជាន់ក្រោយបង្អស់›ឬ?» ពីសៀវភៅតើព្រះគម្ពីរពិតជាបង្រៀនយ៉ាងណា? ដែលបានត្រូវបោះពុម្ពផ្សាយដោយសាក្សីព្រះយេហូវ៉ា។