តើអ្នកដឹងឬទេ?
តើអ្នកដឹងឬទេ?
តើឈ្មោះដែលគេបានបោះត្រាលើដីឥដ្ឋនៅសម័យបុរាណ ដូចឈ្មោះដែលមានក្នុងគម្ពីរឬទេ?
▪ កាលពីសម័យបុរាណ អ្នកដែលកាន់ឯកសាររបស់រដ្ឋដែលមានជាផ្លូវការ គាត់មូលឯកសារនោះ ចងខ្សែ ដាក់ដីឥដ្ឋសើមមួយដុំលើចំណង ហើយបោះត្រាលើដីឥដ្ឋនោះ។ ធម្មតាក្នុងត្រានីមួយៗគេឆ្លាក់សញ្ញាផ្សេងៗ ហើយនេះគឺដើម្បីសម្គាល់ជាហត្ថលេខា ជាសាក្សី និងបញ្ជាក់ថាឯកសារនោះត្រឹមត្រូវតាមច្បាប់។
សញ្ញាដែលគេឆ្លាក់ក្នុងត្រាជួនកាលគេក៏ឆ្លាក់ក្នុងចិញ្ចៀនដែរ ហើយនេះបានចាត់ទុកថាជាអ្វីដែលមានតម្លៃណាស់។ (លោកុប្បត្តិ ៣៨:១៨; នាងអេសធើរ ៨:៨; យេរេមា ៣២:៤៤) ជាច្រើនដង សញ្ញានោះមានឈ្មោះរបស់ម្ចាស់ត្រា ឋានៈ និងឈ្មោះរបស់ឪពុកគាត់។
ក្រុមពួកអ្នកស្រាវជ្រាវបានរកឃើញស្នាមដែលមានសញ្ញារបស់ត្រាពីសម័យបុរាណរាប់រយ ដែលគេហៅថាប៊ូលឡា។ ស្នាមដែលមានសញ្ញារបស់ត្រាខ្លះមានឈ្មោះរបស់អ្នកដែលបានកត់សរសេរក្នុងគម្ពីរ។ ជាឧទាហរណ៍ បុរាណវត្ថុវិទូបានរកឃើញស្នាមដែលមានសញ្ញារបស់ត្រាដែលពួកគេជឿជាក់ថាជារបស់ស្តេចយូដាពីរអង្គ។ ស្នាមត្រាមួយមានអក្សរថា«ជារបស់ផងអ័ហាស [បុត្ររបស់]យេហូថាម[ឬយ៉ូថាម] ជាស្តេចយូដា»។ ស្នាមត្រាមួយទៀតមានអក្សរថា«ជារបស់ផងហេសេគា [បុត្ររបស់]អ័ហាស ជាស្តេចយូដា»។ (ពង្សាវតារក្សត្រទី២ ១៦:១, ២០) ស្តេចអ័ហាសនិងហេសេគាបានសោយរាជ្យក្នុងអំឡុងសតវត្សរ៍ទី៨ មុនគ.ស.។
ពួកអ្នកប្រាជ្ញបានពិនិត្យមើលសញ្ញារបស់ស្នាមត្រាមួយចំនួនទៀតដែលពួកគេជឿជាក់ថាជារបស់បុគ្គលខ្លះក្នុងគម្ពីរ។ ក្នុងចំណោមនោះក៏មានមនុស្សដែលយេរេមាបានរៀបរាប់ក្នុងសំនេររបស់គាត់ដែរ ដូចជាបារូក(ជាស្មៀនរបស់យេរេមា) កេម៉ារា(«ជាកូនសាផាន») យេរ៉ាម្អែល(‹ជាកូនស្តេច›) យេហ៊ូកាល(«ជាកូនសេលេមា») សេរ៉ាយ៉ា(បងឬប្អូនប្រុសរបស់បារូក)។—យេរេមា ៣២:១២; ៣៦:៤, ១០, ២៦; ៣៨:១; ៥១:៥៩
[រូបភាពនៅទំព័រ៣២]
ស្នាមត្រាលើដីឥដ្ឋដែលមានឈ្មោះរបស់ស្តេចហេសេគានិងអ័ហាស (ខាងមុខ)អាចជារបស់បារូក (ខាងក្រោយ)
[អ្នកផ្ដល់សិទ្ធិឲ្យប្រើនៅទំព័រ៣២]
Back: Courtesy of Israel Museum, Jerusalem Front: www.BibleLandPictures .com / Alamy