ការរស់នៅស្របតាមខ្នាតតម្រាក្នុងគម្ពីរ តើមានប្រយោជន៍ឬទេ?
ការរស់នៅស្របតាមខ្នាតតម្រាក្នុងគម្ពីរ តើមានប្រយោជន៍ឬទេ?
តើអ្វីដែលគម្ពីរចែងអំពីការរួមភេទគឺហួសសម័យនិងតឹងរ៉ឹងពេកឬ? មិនមែនទេ។ ផ្ទុយទៅវិញ អ្វីដែលគម្ពីរបង្រៀនអំពីការរួមភេទអាចជួយយើងឲ្យជៀសវាងពី:
▪ ជំងឺកាមរោគ
▪ ការមានកូនដែលឥតខាន់ស្លា
▪ ការឈឺចាប់ដែលមកពីការបែកបាក់គូអាពាហ៍ពិពាហ៍
▪ ការបន្ទោសខ្លួនឯង
▪ ការបាត់បង់ភាពថ្លៃថ្នូររបស់ខ្លួនដោយសារគេប្រើយើងជាឧបករណ៍ដើម្បីចម្អែតតណ្ហារបស់គេ
ព្រះយេហូវ៉ា *ដែលជាអ្នកបង្កើតយើង លោកចង់ឲ្យយើងរីករាយ និងទទួលប្រយោជន៍ពីអំណោយរបស់លោក។ ព្រះជា‹អ្នកដែលបង្រៀនឲ្យយើងបានទទួលប្រយោជន៍›។ (អេសាយ ៤៨:១៧) អ្នកដែលរស់នៅស្របតាមការណែនាំដែលមានក្នុងគម្ពីរស្តីអំពីរឿងរួមភេទអាចទទួល:
▪ ការពេញចិត្តពីព្រះ
▪ សេចក្ដីសុខសាន្តក្នុងចិត្ត
▪ ចំណងអាពាហ៍ពិពាហ៍រឹងមាំ
▪ កេរ្ដិ៍ឈ្មោះល្អ
▪ ភាពថ្លៃថ្នូរ
ប៉ុន្តែ ចុះបើឥឡូវនេះលោកអ្នកមិនរស់នៅស្របតាមខ្នាតតម្រាសីលធម៌ដែលមានក្នុងគម្ពីរ? តើលោកអ្នកអាចផ្លាស់ប្ដូររបៀបរស់នៅរបស់លោកអ្នកឬទេ? តើព្រះនឹងយកការប្រព្រឹត្តដែលលោកអ្នកធ្លាប់ធ្វើពីមុនមកកាត់ទោសលោកអ្នកឬ?
សូមពិចារណាអំពីហេតុការណ៍ពិតនេះ: មនុស្សខ្លះដែលជាសមាជិកក្នុងក្រុមជំនុំគ្រិស្តសាសនិកនៅសតវត្សរ៍ទី១ជាអ្នកដែលធ្លាប់ប្រព្រឹត្តអំពើប្រាសចាកសីលធម៌ខាងផ្លូវភេទ អ្នកផិតក្បត់ និងអ្នកដែលរួមដំណេកជាមួយមនុស្សភេទដូចគ្នា។ ពួកគេសម្រេចចិត្តផ្លាស់ប្ដូររបៀបរស់នៅរបស់ពួកគេ ហើយពួកគេបានទទួលប្រយោជន៍យ៉ាងច្រើន។ (កូរិនថូសទី១ ៦:៩-១១) សព្វថ្ងៃនេះ មនុស្សរាប់ពាន់នាក់ទូទាំងពិភពលោកបាន ជ្រើសរើសធ្វើដូច្នេះ។ ពួកគេឈប់រស់នៅជាអ្នកដែលរួមភេទមិនរើសមុខ និងទទួលប្រយោជន៍ពីការរស់នៅស្របតាមខ្នាតតម្រាដែលមានក្នុងគម្ពីរ។ ជាឧទាហរណ៍ សូមកត់សម្គាល់អំពីបទពិសោធន៍របស់សារ៉ាដែលបានរៀបរាប់នៅអត្ថបទដំបូងនៃទស្សនាវដ្ដីនេះ។
«ខ្ញុំធូរអារម្មណ៍ភ្លាមៗ»
សារ៉ាបានយល់ឃើញថាជីវិតដែលមានតណ្ហាពុះកញ្ជ្រោលរបស់នាងមិនបានធ្វើឲ្យនាងមានសេរីភាពនិងការស្កប់ចិត្តដូចដែលនាងចង់បាននោះទេ។ នាងបាននិយាយថា៖ «ខ្ញុំមានអារម្មណ៍ថាចិត្តខ្ញុំលែងព្រមានខ្ញុំទៀតហើយ។ ខ្ញុំខ្មាសខ្លួនឯងនិងព្រួយបារម្ភថាខ្ញុំអាចមានផ្ទៃពោះឬក៏មានជំងឺកាមរោគណាមួយ។ ខ្ញុំមិនដែលឈប់ជឿថាមានព្រះនោះទេ ហើយខ្ញុំបានដឹងថាគន្លងជីវិតរបស់ខ្ញុំបានធ្វើឲ្យលោកឈឺចិត្ត។ ខ្ញុំមានអារម្មណ៍ថាខ្លួនស្មោកគ្រោក ហើយវាបានធ្វើឲ្យខ្ញុំពិបាកចិត្តរហូត»។
នៅទីបំផុត សារ៉ាបានទទួលកម្លាំងដើម្បីកែប្រែរបៀបរស់នៅរបស់នាង។ នាងបានសុំជំនួយពីឪពុកម្ដាយរបស់នាងដែលជាសាក្សីព្រះយេហូវ៉ា។ នាងក៏បានសុំជំនួយពីអ្នកចាស់ទុំដែលមានលក្ខណៈគ្រប់គ្រាន់ក្នុងក្រុមជំនុំដែរ។ សារ៉ាបានរៀបរាប់ថា៖ «ខ្ញុំបានរំភើបចិត្តដោយសារភាពកក់ក្ដៅនិងសេចក្ដីស្រឡាញ់ដែលឪពុកម្ដាយរបស់ខ្ញុំនិងអ្នកចាស់ទុំក្នុងក្រុមជំនុំបានបង្ហាញដល់ខ្ញុំ ហើយនេះបានធ្វើឲ្យខ្ញុំធូរអារម្មណ៍ភ្លាមៗ»។
សព្វថ្ងៃនេះ សារ៉ាមានកូនពីរនាក់ ហើយនាងបាននិយាយថា៖ «ខ្ញុំប្រាប់កូនៗរបស់ខ្ញុំដោយឥតលាក់លៀមអំពីអ្វីដែលខ្ញុំបានធ្វើ។ ខ្ញុំចង់ឲ្យពួកគេយល់អំពីរបៀបដែលការមិនធ្វើតាមខ្នាតតម្រារបស់ព្រះជះឥទ្ធិពលមកលើខ្ញុំ។ ខ្ញុំមានគោលដៅចង់ជួយពួកគេឲ្យមានចិត្តដឹងគុណចំពោះប្រយោជន៍ខាងផ្លូវកាយ ខាងផ្លូវចិត្ត និងខាងអារម្មណ៍ដែលមកពីការរស់នៅស្របតាមខ្នាតតម្រារបស់ព្រះស្តីអំពីរឿងរួមភេទ។ ខ្ញុំជឿជាក់ថាព្រះឲ្យខ្នាតតម្រាសីលធម៌នេះដល់យើងពីព្រោះលោកមិនចង់ឃើញយើងឈឺចាប់»។
លោកអ្នកក៏អាចទទួលប្រយោជន៍ដែលមកពីការធ្វើតាមការណែនាំដែលប្រកបដោយសេចក្ដីស្រឡាញ់របស់ព្រះដែរ។ គម្ពីរបានសន្យាថា៖ «សេចក្ដីបញ្ញត្ដិរបស់ព្រះយេហូវ៉ាសុទ្ធតែទៀងត្រង់ ក៏បណ្ដាលឲ្យចិត្តរីករាយសប្បាយ ក្រឹត្យក្រមនៃព្រះយេហូវ៉ាជាសុទ្ធសាធ ក៏បំភ្លឺភ្នែក . . . ហើយដែលកាន់តាម នោះក៏មានរង្វាន់យ៉ាងធំ»។—ទំនុកតម្កើង ១៩:៨, ១១ *
[កំណត់សម្គាល់]
^ វគ្គ 8 យេហូវ៉ាជាឈ្មោះរបស់ព្រះដែលមានក្នុងគម្ពីរ។
^ វគ្គ 20 ដើម្បីរៀនបន្ថែមអំពីឱវាទដ៏មានប្រយោជន៍ដែលមានក្នុងគម្ពីរ សូមលោកអ្នកទាក់ទងជាមួយសាក្សីព្រះយេហូវ៉ានៅតំបន់របស់លោកអ្នក។ ឬក៏លោកអ្នកអាចសរសេរសំបុត្រទៅកាន់អាសយដ្ឋានដែលមាននៅទំព័រ៤ក្នុងទស្សនាវដ្ដីនេះ ឬបើកមើលគេហទំព័ររបស់យើងwww.watchtower.org។
[ឃ្លាអក្សរនៅទំព័រ៨]
ពួកអ្នកដែលមិនធ្វើតាមខ្នាតតម្រាក្នុងគម្ពីរច្រើនតែធ្វើឲ្យអ្នកឯទៀតឈឺចិត្ត
[ឃ្លាអក្សរនៅទំព័រ៩]
ពួកអ្នកដែលរស់នៅស្របតាមខ្នាតតម្រាក្នុងគម្ពីរមានចំណងអាពាហ៍ពិពាហ៍កាន់តែរឹងមាំ ហើយចិត្តរបស់ពួកគេមិនស្តីបន្ទោសពួកគេឡើយ