សកម្មពលរបស់ព្រះដឹកនាំមនុស្សនៅសតវត្សរ៍ទី១និងនៅសព្វថ្ងៃនេះ

លេង

«សកម្មពលតែមួយធ្វើសកម្មភាពទាំងនេះ»។—១កូ. ១២:១១

១. តើយើងនឹងពិចារណាអំពីសំណួរអ្វីខ្លះក្នុងអត្ថបទនេះ?

ពេល ដែលអ្នកឮពាក្យថាបុណ្យថ្ងៃទី៥០ ឆ្នាំ៣៣ គ.ស. ធ្វើឲ្យអ្នកនឹកឃើញព្រឹត្ដិការណ៍មួយដ៏គួរឲ្យរំភើបចិត្តណាស់! (សកម្ម. ២:១-៤) នៅពេលនោះ ព្រះបានចាក់សកម្មពលបរិសុទ្ធ ហើយនោះបញ្ជាក់ថាលោកចាប់ផ្ដើមដឹកនាំរាស្ត្ររបស់លោកតាមរបៀបថ្មី។ នៅអត្ថបទមុន យើងបានពិចារណាអំពីវិធីខ្លះៗដែលសកម្មពលរបស់ព្រះបានជួយអ្នកបម្រើស្មោះត្រង់ពីសម័យបុរាណឲ្យបំពេញភារកិច្ចដ៏ពិបាក។ ប៉ុន្តែ តើរបៀបដែលសកម្មពលរបស់ព្រះដឹកនាំពួកអ្នកដែលរស់នៅសម័យមុនលោកយេស៊ូ ខុសគ្នាយ៉ាងណាពីរបៀបដែលសកម្មពលនោះដឹកនាំពួកអ្នកនៅសតវត្សរ៍ទី១? ហើយនៅសព្វថ្ងៃនេះ តើពួកគ្រិស្តសាសនិកអាចទទួលប្រយោជន៍ពីការដឹកនាំនៃសកម្មពលបរិសុទ្ធរបស់ព្រះយ៉ាងដូចម្ដេច? សូមឲ្យយើងពិចារណាអំពីរឿងនេះ។

«មើល! ខ្ញុំជាខ្ញុំបម្រើរបស់ព្រះយេហូវ៉ា!»

២. តើម៉ារៀបានឃើញឥទ្ធិពលនៃសកម្មពលបរិសុទ្ធតាមរបៀបណា?

^២ម៉ារៀបានមានវត្តមាននៅក្នុងបន្ទប់ខាងលើនៅទីក្រុងយេរូសាឡិម ពេលដែលសកម្មពលបរិសុទ្ធបានត្រូវចាក់មកលើពួកអ្នកកាន់តាម ដូចព្រះបានសន្យា។ (សកម្ម. ១:១៣, ១៤) ប៉ុន្តែ នាងបានឃើញសកម្មពលរបស់ព្រះយេហូវ៉ាបញ្ចេញឥទ្ធិពលតាមរបៀបដ៏ពិសេសអស់៣០ឆ្នាំមកហើយ។ ព្រះយេហូវ៉ាបានយកជីវិតរបស់លោកយេស៊ូពីស្ថានសួគ៌ឲ្យមកកើតក្នុងផ្ទៃរបស់នាងម៉ារៀនៅផែនដី ពេលដែលនាងនៅជាស្ត្រីក្រមុំបរិសុទ្ធ។ គឺ«សកម្មពលបរិសុទ្ធរបស់ព្រះ»ដែលបានធ្វើឲ្យនាងមានផ្ទៃពោះ។—ម៉ាថ. ១:២០

៣, ៤. តើម៉ារៀមានចិត្តគំនិតបែបណា? ហើយតើយើងអាចយកតម្រាប់តាមនាងយ៉ាងដូចម្ដេច?

^៣ហេតុអ្វីព្រះបានជ្រើសរើសនាងម៉ារៀ? ក្រោយពីទេវតាបានពន្យល់នាងអំពីគោលបំណងរបស់ព្រះយេហូវ៉ាចំពោះនាង ម៉ារៀបានពោលឡើងថា៖ «មើល! ខ្ញុំជាខ្ញុំបម្រើរបស់ព្រះយេហូវ៉ា! សូមឲ្យការនេះកើតឡើងដល់ខ្ញុំ តាមសេចក្ដីប្រកាសរបស់អ្នកចុះ»។ (លូក. ១:៣៨) ដោយនាងបានពោលឡើងដូច្នេះ នោះសឲ្យឃើញពីចិត្តគំនិតដែលព្រះបានកត់សម្គាល់រួចទៅហើយ។ ដោយសារនាងបានតបឆ្លើយភ្លាមៗ នេះបង្ហាញថានាងបានត្រៀមខ្លួនធ្វើតាមគោលបំណងរបស់ព្រះចំពោះរឿងនេះ។ នាងមិនបានសួរទេវតានោះអំពីអ្វីដែលមនុស្សនៅជុំវិញខ្លួននឹងគិតពេលដែលដឹងថានាងមានផ្ទៃពោះឡើយ ហើយនាងក៏មិនបានខ្លាចថាគូដណ្ដឹងរបស់នាងនឹងផ្ដាច់ពាក្យជាមួយនាងដែរ។ ដោយម៉ារៀប្រើពាក្យថាខ្ញុំបម្រើរបស់ព្រះយេហូវ៉ា នាងបានបង្ហាញថានាងទុកចិត្តទាំងស្រុងទៅលើលោកដែលជាម្ចាស់របស់នាង។

^៤ជួនកាល តើអ្នកមានអារម្មណ៍ថាទុក្ខលំបាកឬភារកិច្ចខ្លះក្នុងការបម្រើព្រះជាអ្វីដែលហួសពីសមត្ថភាពរបស់អ្នកឬទេ? ជាការល្អឲ្យយើងទាំងអស់គ្នាសួរខ្លួនយើងថា: ‹តើខ្ញុំទុកចិត្តទាំងស្រុងទៅលើព្រះយេហូវ៉ាថាលោកនឹងដោះស្រាយបញ្ហាទាំងឡាយដើម្បីសម្រេចតាមបំណងប្រាថ្នារបស់លោកឬទេ? តើខ្ញុំពិតជាស្ម័គ្រចិត្តបំពេញភារកិច្ចដែលព្រះប្រគល់ឲ្យខ្ញុំឬទេ?›។ សូមមានទំនុកចិត្តថាព្រះឲ្យសកម្មពលរបស់លោកដល់ពួកអ្នកដែលទុកចិត្តលោកយ៉ាងអស់ពីចិត្ត ហើយធ្វើតាមបំណងប្រាថ្នារបស់លោក។—សកម្ម. ៥:៣២

សកម្មពលបរិសុទ្ធបានជួយពេត្រុស

៥. មុនបុណ្យថ្ងៃទី៥០ ឆ្នាំ៣៣ គ.ស. តើពេត្រុសបានឃើញឥទ្ធិពលនៃសកម្មពលបរិសុទ្ធយ៉ាងដូចម្ដេច?

^៥ដូចនាងម៉ារៀ សាវ័កពេត្រុសបានឃើញនិងទទួលឥទ្ធិពលពីសកម្មពលរបស់ព្រះមុនបុណ្យថ្ងៃទី៥០ ឆ្នាំ៣៣ គ.ស.។ លោកយេស៊ូបានឲ្យអំណាចដល់គាត់និងសាវ័កឯទៀតដើម្បីបណ្ដេញពួកវិញ្ញាណកំណាច។ (ម៉ាក. ៣:១៤-១៦) ទោះជាបទគម្ពីរមិនបានប្រាប់ព័ត៌មានល្អិតល្អន់ក៏ដោយ តាមមើលទៅពេត្រុសទំនងជាបានប្រើអំណាចនោះ។ បន្ថែមទៅទៀត ពេលដែលលោកយេស៊ូអញ្ជើញពេត្រុសឲ្យដើរលើទឹកសមុទ្រកាលីឡេទៅរកលោក នោះពេត្រុសអាចធ្វើដូច្នេះបានដោយមានជំនួយពីសកម្មពលបរិសុទ្ធ។ (សូមអាន ម៉ាថាយ ១៤:២៥-២៩) យ៉ាងច្បាស់ណាស់ ពេត្រុសបានពឹងផ្អែកទៅលើសកម្មពលបរិសុទ្ធដើម្បីជួយគាត់ឲ្យធ្វើការអស្ចារ្យ។ ប៉ុន្តែ មិនយូរក្រោយមកសកម្មពលនេះបានបញ្ចេញឥទ្ធិពលទៅលើពេត្រុសនិងអ្នកកាន់តាមឯទៀតតាមវិធីថ្មី។

៦. ដោយមានសកម្មពលរបស់ព្រះ តើពេត្រុសអាចធ្វើអ្វីខ្លះនៅបុណ្យថ្ងៃទី៥០ ឆ្នាំ៣៣ គ.ស. និងក្រោយពីបុណ្យនោះ?

^៦នៅបុណ្យថ្ងៃទី៥០ ឆ្នាំ៣៣ គ.ស. ពេត្រុសនិងពួកអ្នកកាន់តាមឯទៀតបានទទួលសមត្ថភាពដ៏អស្ចារ្យ គឺពួកគេអាចនិយាយភាសារបស់សាសន៍ដទៃដែលធ្វើដំណើរមកក្រុងយេរូសាឡិម។ បន្ទាប់មក ពេត្រុសបាននាំមុខក្នុងការថ្លែងសុន្ទរកថាឲ្យបណ្ដាជនស្ដាប់។ (សកម្ម. ២:១៤-៣៦) ពិតមែនហើយ ជួនកាល ពេត្រុសធ្លាប់ប្រព្រឹត្តដោយមិនគិតមុខគិតក្រោយ ហើយមានអារម្មណ៍ភ័យខ្លាច តែនៅបុណ្យថ្ងៃទី៥០ ឆ្នាំ៣៣ គ.ស. គាត់បានផ្សព្វផ្សាយដោយចិត្តក្លាហាន ទោះជាមានការគំរាមកំហែងនិងការបៀតបៀនក៏ដោយ។ (សកម្ម. ៤:១៨-២០, ៣១) ព្រះបានផ្ដល់ចំណេះពិសេសឲ្យគាត់ដោយប្រើសកម្មពលរបស់លោក។ (សកម្ម. ៥:៨, ៩) គាត់ថែមទាំងបានទទួលឫទ្ធានុភាពដើម្បីប្រោសមនុស្សស្លាប់ឲ្យរស់ឡើងវិញទៀតផង។—សកម្ម. ៩:៤០

៧. តើសេចក្ដីបង្រៀនអ្វីរបស់លោកយេស៊ូដែលពេត្រុសទើបតែបានយល់ច្បាស់ក្រោយពេលដែលគាត់បានត្រូវរើសតាំង?

^៧សូម្បីតែមុនបុណ្យថ្ងៃទី៥០នោះក៏ដោយ ពេត្រុសបានយល់សេចក្ដីពិតជាច្រើនដែលលោកយេស៊ូបានបង្រៀន។ (ម៉ាថ. ១៦:១៦, ១៧; យ៉ូន. ៦:៦៨) ប៉ុន្តែ នៅពេលនោះមានចំណុចខ្លះដែលលោកយេស៊ូបានបង្រៀន ដែលគាត់មិនទាន់យល់ច្បាស់នៅឡើយទេ។ ជាឧទាហរណ៍ ពេត្រុសមិនបានយល់ថាគ្រិស្តនឹងរស់ឡើងវិញជាបុគ្គលវិញ្ញាណក្រោយបីថ្ងៃទេ ហើយគាត់ក៏មិនបានយល់ថារាជាណាចក្រនឹងនៅស្ថានសួគ៌ដែរ។ (យ៉ូន. ២០:៦-១០; សកម្ម. ១:៦) ពេត្រុសមិនបានយល់ថាមនុស្សអាចក្លាយទៅជាបុគ្គលវិញ្ញាណ ហើយគ្រប់គ្រងក្នុងរាជាណាចក្រនៅស្ថានសួគ៌ទេ។ ប៉ុន្តែ ក្រោយពីព្រះបានចាក់សកម្មពលបរិសុទ្ធទៅលើគាត់ ហើយរើសតាំងគាត់ឡើងទៅស្ថានសួគ៌ ទើបគាត់យល់សេចក្ដីបង្រៀនរបស់លោកយេស៊ូស្តីអំពីរឿងទាំងនោះ។

៨. តើពួកគ្រិស្តសាសនិកដែលបានត្រូវរើសតាំងនិង«ចៀមឯទៀត»អាចមានចំណេះអ្វី?

^៨ក្រោយពេលពួកអ្នកកាន់តាមរបស់លោកយេស៊ូទទួលសកម្មពលបរិសុទ្ធ ពួកគេអាចយល់សេចក្ដីបង្រៀនជាច្រើនដែលពួកគេមិនបានយល់កាលពីមុន។ សកម្មពលបរិសុទ្ធបានដឹកនាំពួកអ្នកសរសេរបទគម្ពីរគ្រិស្តសាសនិកភាសាក្រិចឲ្យពន្យល់សេចក្ដីពិតដ៏អស្ចារ្យអំពីគោលបំណងរបស់ព្រះយេហូវ៉ា។ (អេភ. ៣:៨-១១, ១៨) សព្វថ្ងៃនេះ ទាំងពួកគ្រិស្តសាសនិកដែលបានត្រូវរើសតាំងទាំង«ចៀមឯទៀត»អាចសិក្សានិងយល់អំពីសេចក្ដីពិតទាំងនោះបាន។ (យ៉ូន. ១០:១៦) តើអ្នកឲ្យតម្លៃចំពោះចំណេះនិងការយល់ដឹងអំពីបណ្ដាំរបស់ព្រះ ដែលសកម្មពលរបស់លោកជួយអ្នកឲ្យមានឬទេ?

ប៉ូលបាន«ពេញទៅដោយសកម្មពលបរិសុទ្ធ»

៩. តើប៉ូលអាចសម្រេចអ្វីដោយមានសកម្មពលបរិសុទ្ធ?

^៩ជាងមួយឆ្នាំក្រោយពីបុណ្យថ្ងៃទី៥០ ឆ្នាំ៣៣ គ.ស. មនុស្សម្នាក់ទៀតបានទទួលសកម្មពលបរិសុទ្ធដែលជាអំណោយពីព្រះ។ គាត់ឈ្មោះថាសុល ក្រោយមកគេបានហៅគាត់ថាប៉ូល។ សកម្មពលរបស់ព្រះបានឲ្យគាត់មានសមត្ថភាពធ្វើអ្វីៗជាច្រើនដែលនៅតែមានប្រយោជន៍សម្រាប់យើងនៅសព្វថ្ងៃនេះ។ សាវ័កប៉ូលបានត្រូវដឹកនាំឲ្យសរសេរសៀវភៅ១៤ក្បាលក្នុងគម្ពីរ។ ដូចពេត្រុសដែរ សកម្មពលរបស់ព្រះបានជួយប៉ូលឲ្យយល់និងសរសេរយ៉ាងច្បាស់អំពីសេចក្ដីសង្ឃឹមនៅស្ថានសួគ៌ជាបុគ្គលវិញ្ញាណដែលមានជីវិតអមតៈ ហើយដែលមិនអាចខូចទៅឡើយ។ ដោយមានសកម្មពលបរិសុទ្ធ ប៉ូលបានធ្វើឲ្យមនុស្សជាសះស្បើយ បណ្ដេញពួកវិញ្ញាណកំណាច ហើយថែមទាំងបានប្រោសមនុស្សស្លាប់ឲ្យរស់ឡើងវិញទៀតផង! ក៏ប៉ុន្តែ សមត្ថភាពដែលប៉ូលបានទទួលតាមរយៈសកម្មពលបរិសុទ្ធមានគោលបំណងសំខាន់ជាងនោះទៅទៀត ហើយអ្នកបម្រើទាំងអស់របស់ព្រះក៏ទទួលសមត្ថភាពដូចនេះដែរនៅសព្វថ្ងៃនេះ ទោះជាពួកគេមិនបានទទួលតាមវិធីដ៏អស្ចារ្យក៏ដោយ។

១០. តើសកម្មពលបរិសុទ្ធមានឥទ្ធិពលទៅលើសមត្ថភាពនិយាយរបស់ប៉ូលយ៉ាងដូចម្ដេច?

^១០នៅពេលមួយ ប៉ូលបាន«ពេញទៅដោយសកម្មពលបរិសុទ្ធ» ហើយគាត់បានផ្ដន្ទាទោសគ្រូធ្មប់ម្នាក់។ អភិបាលខេត្តនៃកោះគីប្រុស បានស្ដាប់ការសន្ទនានោះទាំងអស់ ហើយនេះពិតជាបានមានឥទ្ធិពលខ្លាំងទៅលើគាត់មែន! អភិបាលខេត្តនោះបានទទួលយកសេចក្ដីពិត«ព្រោះគាត់នឹកអស្ចារ្យក្នុងចិត្តនឹងសេចក្ដីបង្រៀននៃព្រះយេហូវ៉ា»។ (សកម្ម. ១៣:៨-១២) ប្រាកដហើយ ប៉ូលបានដឹងច្បាស់ថា ពេលដែលនិយាយអំពីសេចក្ដីពិត គាត់ត្រូវការសកម្មពលបរិសុទ្ធរបស់ព្រះ។ (ម៉ាថ. ១០:២០) នៅពេលក្រោយមក គាត់បានអង្វរក្រុមជំនុំនៅក្រុងអេភេសូរឲ្យអធិដ្ឋានសម្រាប់គាត់ដើម្បីឲ្យគាត់«ទទួលសមត្ថភាពនិយាយ»។—អេភ. ៦:១៨-២០

១១. តើសកម្មពលរបស់ព្រះបានដឹកនាំប៉ូលយ៉ាងដូចម្ដេច?

^១១សកម្មពលបរិសុទ្ធមិនគ្រាន់តែជួយប៉ូលក្នុងការនិយាយប៉ុណ្ណោះទេ ប៉ុន្តែជួនកាលក៏បានហាមឃាត់គាត់មិនឲ្យទៅផ្សព្វផ្សាយនៅតំបន់ខ្លះដែរ។ ពេលដែលគាត់ធ្វើដំណើរជាសាសនទូត សកម្មពលរបស់ព្រះបានដឹកនាំគាត់។ (សកម្ម. ១៣:២; សូមអាន សកម្មភាព ១៦:៦-១០) ព្រះយេហូវ៉ានៅតែដឹកនាំកិច្ចការផ្សព្វផ្សាយដោយប្រើសកម្មពលរបស់លោក។ ដូចប៉ូលដែរ ពួកអ្នកបម្រើព្រះយេហូវ៉ាទាំងអស់ដែលស្ដាប់បង្គាប់ខំប្រឹងប្រកាសសេចក្ដីពិតយ៉ាងខ្នះខ្នែងនិងដោយចិត្តក្លាហាន។ ទោះជាការណែនាំរបស់ព្រះមិនឃើញជាក់ស្តែងដូចនៅសម័យរបស់ប៉ូលក៏ដោយ យើងអាចមានទំនុកចិត្តថាព្រះយេហូវ៉ាកំពុងប្រើសកម្មពលបរិសុទ្ធរបស់លោកដើម្បីធ្វើឲ្យប្រាកដថាមនុស្សដែលសមនឹងទទួលបានឮសេចក្ដីពិត។—យ៉ូន. ៦:៤៤

«សកម្មភាពមានផ្សេងៗពីគ្នា»

១២-១៤. តើសកម្មពលរបស់ព្រះមានឥទ្ធិពលទៅលើអ្នកបម្រើទាំងអស់របស់លោកតាមវិធីដូចគ្នាឬទេ? សូមពន្យល់។

^១២ពេលដែលយើងអានអំពីរបៀបដែលព្រះយេហូវ៉ាឲ្យពរដល់ក្រុមនៃពួកអ្នកដែលបានត្រូវរើសតាំងនៅសតវត្សរ៍ទី១ នេះពិតជាលើកទឹកចិត្តយើងណាស់។ នៅសម័យនោះ សកម្មពលបរិសុទ្ធបានឲ្យពួកគ្រិស្តសាសនិកនូវសមត្ថភាពពិសេសឬ«អំណោយ»។ ប៉ូលសរសេរទៅក្រុមជំនុំនៅទីក្រុងកូរិនថូសអំពីអំណោយទាំងនេះថា៖ «ឯអំណោយ នោះផ្សេងៗពីគ្នា ប៉ុន្តែសកម្មពលមានតែមួយទេ ហើយកិច្ចបម្រើមានផ្សេងៗពីគ្នា ប៉ុន្តែមានម្ចាស់តែមួយទេ ឯសកម្មភាពមានផ្សេងៗពីគ្នា ប៉ុន្តែគឺជាព្រះតែមួយដែលធ្វើសកម្មភាពទាំងអស់ក្នុងមនុស្សគ្រប់គ្នា»។ (១កូ. ១២:៤-៦, ១១) ពិតមែន សកម្មពលបរិសុទ្ធអាចមានឥទ្ធិពលផ្សេងទៅលើអ្នកបម្រើរបស់ព្រះម្នាក់ៗសម្រាប់គោលបំណងតែមួយ។ សកម្មពលបរិសុទ្ធអាចដឹកនាំទាំង«ហ្វូងតូច»របស់គ្រិស្ត និង«ចៀមឯទៀត»របស់លោក។ (លូក. ១២:៣២; យ៉ូន. ១០:១៦) ប៉ុន្តែ សកម្មពលនេះមានឥទ្ធិពលទៅលើសមាជិកនីមួយៗក្នុងក្រុមជំនុំមិនមែនតាមវិធីដូចគ្នាឡើយ។

^១៣ជាឧទាហរណ៍ ពួកអ្នកចាស់ទុំបានត្រូវតែងតាំងដោយសកម្មពលបរិសុទ្ធ។ (សកម្ម. ២០:២៨) ប៉ុន្តែ មិនមែនគ្រិស្តសាសនិកទាំងអស់ដែលបានត្រូវរើសតាំងឲ្យឡើងទៅស្ថានសួគ៌ ជាអ្នកត្រួតពិនិត្យក្នុងក្រុមជំនុំឡើយ។ តើយើងអាចសន្និដ្ឋានយ៉ាងណាអំពីរឿងនេះ? បើនិយាយឲ្យចំទៅ សកម្មពលរបស់ព្រះមានឥទ្ធិពលទៅលើសមាជិកម្នាក់ៗក្នុងក្រុមជំនុំតាមវិធីផ្សេងៗពីគ្នា។

^១៤សកម្មពលបរិសុទ្ធដែលធ្វើឲ្យពួកអ្នកដែលបានត្រូវរើសតាំងដឹងថា ពួកគាត់«បានត្រូវទទួលជាកូន» គឺដូចគ្នានឹងសកម្មពលដែលព្រះយេហូវ៉ាបានប្រើដើម្បីប្រោសបុត្រតែមួយរបស់លោកពីស្លាប់ឲ្យទទួលជីវិតអមតៈនៅស្ថានសួគ៌។ (សូមអាន រ៉ូម ៨:១១, ១៥) នេះក៏ជាសកម្មពលតែមួយដែលព្រះយេហូវ៉ាបានប្រើដើម្បីបង្កើតសកលលោកទាំងមូលដែរ។ (លោ. ១:១-៣) ដោយប្រើសកម្មពលបរិសុទ្ធដូចគ្នានេះ ព្រះយេហូវ៉ាបានធ្វើឲ្យបេតសាលាលមានលក្ខណៈគ្រប់គ្រាន់ដើម្បីបំពេញកិច្ចការពិសេសក្នុងត្រសាលរបស់ព្រះ បានជួយឲ្យសាំសុនធ្វើអ្វីដែលតម្រូវឲ្យមានកម្លាំងខ្លាំងក្លា និងបានជួយពេត្រុសឲ្យដើរនៅលើទឹក។ ដូច្នេះ សូមកុំឲ្យយើងយល់ច្រឡំឡើយ ពេលព្រះឲ្យសកម្មពលរបស់លោកដឹកនាំយើង នោះមិនមែនដូចគ្នានឹងលោករើសតាំងយើងដោយសកម្មពលរបស់លោកទេ។ ការរើសតាំងដោយសកម្មពលរបស់ព្រះគ្រាន់តែជាវិធីដ៏ពិសេសមួយដែលសកម្មពលនោះមានសកម្មភាព។ ព្រះជាអ្នកសម្រេចថា នរណានឹងទទួលការរើសតាំងឲ្យឡើងទៅស្ថានសួគ៌។

១៥. តើការជ្រមុជក្នុងសកម្មពលរបស់ព្រះនឹងមានជារៀងរហូតឬ? សូមពន្យល់។

^១៥សកម្មពលរបស់ព្រះបានមានឥទ្ធិពលទៅលើអ្នកបម្រើស្មោះត្រង់របស់លោកតាមវិធីផ្សេងៗអស់រាប់ពាន់ឆ្នាំ មុនលោកចាប់ផ្ដើមចាក់សកម្មពលដើម្បីរើសតាំងមនុស្ស។ នៅបុណ្យថ្ងៃទី៥០ ឆ្នាំ៣៣ គ.ស. សកម្មភាពនោះបានចាប់ផ្ដើមមានឡើង ប៉ុន្តែវានឹងមិនមានជារៀងរហូតទេ។ ការជ្រមុជក្នុងសកម្មពលរបស់ព្រះឬការរើសតាំងឲ្យឡើងទៅស្ថានសួគ៌នឹងត្រូវឈប់ តែសកម្មពលនឹងបន្តមានឥទ្ធិពលទៅលើរាស្ត្ររបស់ព្រះដើម្បីឲ្យពួកគេអាចធ្វើតាមបំណងប្រាថ្នារបស់លោកជារៀងរហូត។

១៦. នៅសព្វថ្ងៃនេះ តើអ្នកបម្រើរបស់ព្រះកំពុងធ្វើអ្វីខ្លះដោយមានសកម្មពលរបស់លោក?

^១៦តាមរយៈសកម្មពលបរិសុទ្ធរបស់ព្រះ តើអ្វីកំពុងតែកើតឡើងនៅលើផែនដីសព្វថ្ងៃនេះ? ការបើកបង្ហាញ ២២:១៧បានចែងថា៖ «សកម្មពលនិងកូនក្រមុំនិយាយឥតឈប់ថា៖ ‹មកចុះ!› ហើយអ្នកណាដែលបានឮ ចូរនិយាយថា៖ ‹មកចុះ!› ហើយចូរឲ្យអ្នកណាដែលស្រេក មកចុះ ចូរឲ្យអ្នកណាដែលចង់បានទឹកដែលផ្ដល់ជីវិត មកយកដោយឥតគិតថ្លៃ»។ ដោយមានសកម្មពលរបស់ព្រះ គ្រិស្តសាសនិកសព្វថ្ងៃនេះផ្សព្វផ្សាយអំពីសេចក្ដីអញ្ជើញរបស់ព្រះយេហូវ៉ាចំពោះ«អ្នកណាដែលចង់»បានទឹកដែលផ្ដល់ជីវិត។ ពួកគ្រិស្តសាសនិកដែលបានត្រូវរើសតាំង ជាអ្នកនាំមុខក្នុងកិច្ចការនេះ។ ប៉ុន្តែ ពួកអ្នកដែលជាចៀមឯទៀតក៏ចូលរួមក្នុងការចែកចាយការអញ្ជើញនេះដែរ។ ក្រុមមនុស្សទាំងពីរនេះឲ្យសកម្មពលបរិសុទ្ធតែមួយដឹកនាំពួកគេដើម្បីបំពេញកិច្ចការនេះ។ ក្រុមមនុស្សទាំងពីរនេះបានបង្ហាញអំពីការប្រគល់ខ្លួនជូនព្រះយេហូវ៉ាដោយទទួលការជ្រមុជទឹក«ក្នុងនាមបិតាដែលស្ថិតនៅស្ថានសួគ៌ ក្នុងនាមបុត្ររបស់លោក និងក្នុងនាមសកម្មពលបរិសុទ្ធរបស់លោក»។ (ម៉ាថ. ២៨:១៩) ពួកគេទាំងអស់គ្នាក៏អនុញ្ញាតឲ្យសកម្មពលរបស់ព្រះមានឥទ្ធិពលទៅលើជីវិតរបស់ពួកគេ និងឲ្យសកម្មពលនោះបង្កើតផលផ្លែក្នុងពួកគេដែរ។ (កាឡ. ៥:២២, ២៣) ដូចពួកអ្នកដែលបានត្រូវរើសតាំង ពួកចៀមឯទៀតក៏អនុញ្ញាតឲ្យសកម្មពលរបស់ព្រះជួយពួកគេដែរ។ ដោយមានជំនួយពីសកម្មពលនោះ ពួកគេខំអស់ពីសមត្ថភាពដើម្បីបំពេញតាមតម្រូវការរបស់ព្រះយេហូវ៉ាក្នុងការរក្សាឲ្យមានភាពស្អាតបរិសុទ្ធ។—២កូ. ៧:១; បប. ៧:៩, ១៤

ចូរសុំសកម្មពលបរិសុទ្ធឥតឈប់

១៧. តើយើងអាចបង្ហាញថា យើងមានសកម្មពលរបស់ព្រះយ៉ាងដូចម្ដេច?

^១៧មិនថាសេចក្ដីសង្ឃឹមដែលព្រះប្រគល់ឲ្យអ្នកជាជីវិតដែលគ្មានទីបញ្ចប់នៅស្ថានសួគ៌ ឬនៅលើផែនដីក្ដី ព្រះយេហូវ៉ាអាចឲ្យអ្នកនូវ«ឫទ្ធានុភាពដែលលើសពីធម្មតា»ដើម្បីជួយអ្នកឲ្យរក្សាចិត្តស្មោះគ្រប់លក្ខណៈ និងទទួលរង្វាន់របស់អ្នក។ (២កូ. ៤:៧) ពេលអ្នកបន្តផ្សព្វផ្សាយដំណឹងល្អអំពីរាជាណាចក្រ អ្នកប្រហែលជាត្រូវអ្នកដទៃចំអកមើលងាយ។ ប៉ុន្តែ សូមចាំថា៖ «ប្រសិនបើគេជេរប្រមាថអ្នករាល់គ្នាដោយសារនាមរបស់គ្រិស្ត នោះអ្នករាល់គ្នាមានសុភមង្គលហើយ ពីព្រោះសកម្មពលដ៏រុងរឿងរបស់ព្រះសណ្ឋិតលើអ្នករាល់គ្នា»។—១ពេ. ៤:១៤

១៨, ១៩. តើព្រះយេហូវ៉ានឹងជួយអ្នកដោយប្រើសកម្មពលរបស់លោកយ៉ាងដូចម្ដេច? ហើយស្តីអំពីរឿងនេះ តើអ្នកតាំងចិត្តធ្វើអ្វី?

^១៨សកម្មពលបរិសុទ្ធជាអំណោយទានពីព្រះចំពោះអស់អ្នកដែលស្វែងរកយ៉ាងស្មោះអស់ពីចិត្ត។ សកម្មពលនេះមិនគ្រាន់តែបង្កើនសមត្ថភាពរបស់អ្នកប៉ុណ្ណោះទេ តែក៏អាចធ្វើឲ្យអ្នកមានបំណងកាន់តែខ្លាំងដើម្បីបំពេញកិច្ចបម្រើរបស់លោកដោយអស់ពីសមត្ថភាពផងដែរ។ គម្ពីរបានចែងថា៖ «ព្រះគឺជាអ្នកដែលកំពុងមានសកម្មភាពក្នុងអ្នករាល់គ្នាតាមដែលលោកពេញចិត្ត ដើម្បីឲ្យអ្នករាល់គ្នាមានបំណងប្រាថ្នានិងមានការប្រព្រឹត្ត»។ ដោយមានសកម្មពលបរិសុទ្ធដែលជាអំណោយដ៏ថ្លៃថ្លា រួមជាមួយនឹងការខំប្រឹងយ៉ាងស្មោះអស់ពីចិត្តក្នុងការ«កាន់ខ្ជាប់នូវបណ្ដាំនៃជីវិត»នឹងជួយយើង«បន្តធ្វើឲ្យសេចក្ដីសង្គ្រោះរបស់[យើង]បានសម្រេចដោយកោតខ្លាចញាប់ញ័រ»។—ភី. ២:១២, ១៣, ១៦

^១៩ដូច្នេះ ដោយមានទំនុកចិត្តទាំងស្រុងទៅលើសកម្មពលរបស់ព្រះ សូមអ្នកបំពេញភារកិច្ចនានាដោយអស់ពីចិត្ត ព្យាយាមឲ្យស្ទាត់ជំនាញក្នុងកិច្ចការនោះ និងសុំជំនួយពីព្រះយេហូវ៉ា។ (យ៉ា. ១:៥) លោកនឹងឲ្យអ្វីដែលអ្នកត្រូវការដើម្បីយល់បណ្ដាំរបស់លោក ដើម្បីដោះស្រាយបញ្ហាដែលមានក្នុងជីវិត និងដើម្បីផ្សព្វផ្សាយដំណឹងល្អ។ លោកយេស៊ូបានសន្យាថា៖ «ចូរសុំឥតឈប់ នោះអ្នកនឹងទទួល ចូររកឥតឈប់ នោះអ្នកនឹងរកឃើញ ចូរគោះទ្វារឥតឈប់ នោះទ្វារនឹងត្រូវបើកឲ្យ» ហើយនេះក៏រួមបញ្ចូលការទទួលសកម្មពលបរិសុទ្ធដែរ។ (លូក. ១១:៩, ១៣) ចូរបន្តអង្វរសុំព្រះយេហូវ៉ាដើម្បីឲ្យអ្នកអាចប្រព្រឹត្តដូចអ្នកបម្រើដ៏ស្មោះត្រង់នៅសម័យបុរាណនិងសព្វថ្ងៃនេះ ជាអ្នកដែលបានត្រូវដឹកនាំដោយសកម្មពលបរិសុទ្ធរបស់ព្រះ។

តើអ្នកអាចពន្យល់បានទេ?

• ដូចម៉ារៀ តើយើងអាចបង្ហាញចិត្តគំនិតបែបណាដើម្បីទទួលពរពីព្រះ?

• តើប៉ូលបានត្រូវដឹកនាំដោយសកម្មពលរបស់ព្រះក្នុងន័យអ្វី?

• នៅសព្វថ្ងៃនេះ តើអ្នកបម្រើរបស់ព្រះបានត្រូវដឹកនាំដោយសកម្មពលបរិសុទ្ធយ៉ាងដូចម្ដេច?

[សំណួរសម្រាប់វគ្គនីមួយៗ]

[រូបភាពនៅទំព័រ២៩]

សកម្មពលរបស់ព្រះបានជួយប៉ូលឲ្យយកឈ្នះឥទ្ធិពលរបស់ពួកវិញ្ញាណអាក្រក់

[រូបភាពនៅទំព័រ៣១]

សព្វថ្ងៃនេះ សកម្មពលបរិសុទ្ធអាចជួយពួកគ្រិស្តសាសនិកបានមិនថាពួកគេមានសេចក្ដីសង្ឃឹមទៅស្ថានសួគ៌ឬនៅលើផែនដីក្ដី

ទស្សនាវដ្ដីប៉មយាម