តើសង្គ្រាមហាម៉ាគេដូននឹងកើតឡើងនៅពេលណា?
តើសង្គ្រាមហាម៉ាគេដូននឹងកើតឡើងនៅពេលណា?
«មើល! ខ្ញុំឃើញមនុស្សមួយក្រុមធំ ដែលគ្មានមនុស្សណាម្នាក់អាចរាប់ចំនួនបានឡើយ។ ពួកគេចេញពីគ្រប់ប្រជាជាតិគ្រប់កុលសម្ព័ន្ធ គ្រប់ជាតិសាសន៍ និងគ្រប់ភាសា . . . [ពួកគេ]ចេញផុតពីគ្រាទុក្ខវេទនាដ៏ខ្លាំង»។—ការបើកបង្ហាញ ៧:៩, ១៤
ស្ថានភាពសព្វថ្ងៃនេះ គឺត្រៀមទុកសម្រាប់សង្គ្រាមហាម៉ាគេដូន។ តើតាមរបៀបណា?
សព្វថ្ងៃនេះ នៅទូទាំងពិភពលោក មានមនុស្សដែលកំពុងបម្រើព្រះយេហូវ៉ា ហើយរស់នៅស្របតាមខ្នាតតម្រាដ៏ខ្ពង់ខ្ពស់ក្នុងគម្ពីរ។ ដោយមានការគាំទ្រពីព្រះ មនុស្សរាប់លាននាក់ពីគ្រប់ជាតិសាសន៍ គ្រប់កុលសម្ព័ន្ធ និងគ្រប់ភាសាបានរួបរួមគ្នាជាបងប្អូនរួមជំនឿដែលប្រកបដោយសេចក្ដីស្រឡាញ់និងមានភាពសុខដុមរមនា។ ពួកគេជាសាក្សីព្រះយេហូវ៉ា។—យ៉ូហាន ១៣:៣៥
ឆាប់ៗខាងមុខនេះ សាថាននឹងប្រមូលកងទ័ពរបស់វាហើយចាប់ផ្ដើមវាយប្រហារយ៉ាងខ្លាំងបំផុតទៅលើសាក្សីព្រះយេហូវ៉ាដែលជាអ្នកស្រឡាញ់សន្ដិភាព ហើយមើលទៅដូចជាពួកគេមិនអាចការពារខ្លួនបាន។ (អេសេគាល ៣៨:៨-១២; ការបើកបង្ហាញ ១៦:១៣, ១៤, ១៦) តើតាមរបៀបណាដែលលោកអ្នកអាចប្រាកដថារឿងនោះគឺជាការពិត? គម្ពីរប្រាប់អំពីព្រឹត្ដិការណ៍ដ៏ជាក់លាក់មួយចំនួនដែលជួយយើងឲ្យដឹងថា តើសង្គ្រាមហាម៉ាគេដូននឹងកើតឡើងនៅពេលណា? ព្រឹត្ដិការណ៍មួយចំនួនកំពុងកើតឡើងរួចហើយ។
ព្រឹត្ដិការណ៍ដែលលោកអ្នកឃើញ
អ្នកកាន់តាមលោកយេស៊ូបានសួរអំពីសញ្ញាសម្គាល់ដែលមនុស្សនឹងដឹងថា «គ្រាចុងបញ្ចប់នៃរបៀបរបបពិភពលោក»នឹងមកដល់នៅពេលណា។ (ម៉ាថាយ ២៤:៣) លោកយេស៊ូបានឆ្លើយដោយប្រាប់អំពីគ្រាដែល«ប្រជាជាតិមួយនឹងលើកទ័ពទៅច្បាំងនឹងប្រជាជាតិមួយ ហើយរាជាណាចក្រមួយនឹងលើកទ័ពទៅច្បាំងនឹងរាជាណាចក្រមួយ ក៏នឹងមានរញ្ជួយដីពីកន្លែងមួយទៅកន្លែងមួយ ថែមទាំងមានការអត់ឃ្លានទៀតផង»។ រួចលោកបានបន្តថា៖ «ការទាំងនេះគឺជាការចាប់ផ្ដើមនៃគ្រាលំបាក»។ (ម៉ាថាយ ២៤:៧, ៨) សាវ័កប៉ូលក៏បានបញ្ជាក់ដែរថា គ្រាដដែលនេះជា«គ្រាចុងក្រោយបង្អស់» ហើយថាគ្រានោះនឹង«លំបាកណាស់»។ (ធីម៉ូថេទី២ ៣:១) តើលោកអ្នកគិតថាទំនាយទាំងនោះរៀបរាប់អំពីព្រឹត្ដិការណ៍ដែលកំពុងតែកើតឡើងនៅសព្វថ្ងៃនេះឬទេ?
ហេតុអ្វីគ្រានេះនឹងពិបាកម្ល៉េះ? សាវ័កយ៉ូហានប្រាប់អំពីមូលហេតុនេះថា សាថាននិងពួកវិញ្ញាណកំណាចរបស់វាមាន«ពេលតែបន្ដិចបន្តួច»ប៉ុណ្ណោះ ដើម្បីធ្វើសកម្មភាពរបស់វានៅលើផែនដី។ គាត់បានរៀបរាប់ថា សាថានមាន«កំហឹងយ៉ាងខ្លាំង»ក្នុងអំឡុងគ្រានេះ។ (ការបើកបង្ហាញ ១២:៧-១២) តើលោកអ្នកឃើញឬទេថា សព្វថ្ងៃនេះមនុស្សមានចិត្តគំនិតដែលបង្ហាញនូវកំហឹងនិងមានការប្រព្រឹត្តដ៏ឃោរឃៅ មិនគ្រាន់តែនៅតំបន់មួយប៉ុណ្ណោះ តែនៅទូទាំងពិភពលោក?
លោកយេស៊ូក៏បានមានប្រសាសន៍ដែរថា នៅគ្រាដ៏ពិបាកនេះ កិច្ចការដ៏ល្អប្រសើរមួយនឹងត្រូវសម្រេច។ លោកបាននិយាយថា៖ «ដំណឹងល្អនេះអំពីរាជាណាចក្រ[ព្រះ]នឹងត្រូវផ្សព្វផ្សាយនៅគ្រប់ទីអាស្រ័យនៅផែនដី ដើម្បីឲ្យប្រជាជាតិទាំងឡាយបានឮ រួចទីបញ្ចប់នឹងមកដល់»។ (ម៉ាថាយ ២៤:១៤) សព្វថ្ងៃនេះ នៅជាង២៣៥ប្រទេស សាក្សីព្រះយេហូវ៉ាផ្សព្វផ្សាយដំណឹងល្អអំពីរាជាណាចក្រព្រះជាង៥០០ភាសា។ ទស្សនាវដ្ដីពីរដែលមានមូលដ្ឋានលើគម្ពីរ ដែលពួកគេបានបោះពុម្ពផ្សាយ ពោលគឺទស្សនាវដ្ដីប៉មយាម និងទស្សនាវដ្ដីភ្ញាក់រលឹក! (Awake!) ជាទស្សនាវដ្ដីដែលបានត្រូវចែកចាយច្រើនជាងគេបំផុតលើពិភពលោក។ សាក្សីព្រះយេហូវ៉ាក៏បានបកប្រែគម្ពីរប្រហែលជា១០០ភាសាដែរ។ កិច្ចការរបស់ពួកគេបានធ្វើឡើងដោយអ្នកស្ម័គ្រចិត្ត ហើយបានត្រូវគាំទ្រទាំងស្រុងដោយវិភាគទានស្ម័គ្រចិត្ត។ តើការផ្សព្វផ្សាយដែលគួរឲ្យកត់សម្គាល់នេះកំពុងសម្រេចទំនាយរបស់លោកយេស៊ូឬទេ?
គម្ពីរក៏បញ្ជាក់អំពីព្រឹត្ដិការណ៍ដែលនឹងនាំទៅដល់សង្គ្រាមរវាងព្រះយេហូវ៉ានិងអ្នកដែលប្រឆាំងនឹងលោកដែរ។ សូមពិចារណាទំនាយបីដែលលោកអ្នកនឹងឃើញអំពីការសម្រេច។
ព្រឹត្ដិការណ៍ដែលលោកអ្នកនឹងឃើញនៅពេលឆាប់ៗខាងមុខនេះ
ទំនាយទី១: គម្ពីរប្រាប់ថា ប្រជាជាតិនានានឹងចេញសេចក្ដីប្រកាសដ៏សំខាន់មួយថា«មានសន្ដិភាពនិងសន្ដិសុខហើយ»។ ពួកគេប្រហែលជាគិតថា ពួកគេហៀបនឹងដោះស្រាយបញ្ហាធំៗ។ ក៏ប៉ុន្តែ ព្រឹត្ដិការណ៍ដែលកើតឡើងបន្ទាប់ពីសេចក្ដីប្រកាសនេះនឹងមិននាំឲ្យមានសន្ដិភាពសោះឡើយ។—ថែស្សាឡូនិចទី១ ៥:១-៣
ទំនាយទី២: បន្ទាប់មក រដ្ឋាភិបាលផ្សេងៗនឹងសម្រេចចិត្តចាត់វិធានការវាយប្រហារអង្គការសាសនាទាំងឡាយទូទាំងពិភពលោក។ នៅក្នុងគម្ពីរ មានសត្វសាហាវមួយដែលតំណាងឲ្យរដ្ឋាភិបាលទាំងនោះ ហើយស្ត្រីដែលជិះលើខ្នងនៃសត្វសាហាវនេះ តំណាងឲ្យសាសនាមិនពិតទាំងឡាយនៅក្នុងពិភពលោកនេះ។ (ការបើកបង្ហាញ ១៧:៣, ១៥-១៨) ដោយមិនដឹងខ្លួន សត្វសាហាវក្នុងន័យធៀបនេះនឹងធ្វើតាមបំណងរបស់ព្រះ ដោយបំផ្លាញសាសនាទាំងអស់ដែលអះអាងដោយមិនពិតថាជាតំណាងរបស់ព្រះ។
ដោយប្រើនិមិត្តរូប សាវ័កយ៉ូហានបានរៀបរាប់អំពីព្រឹត្ដិការណ៍នេះថា៖ «ស្នែងទាំងដប់ដែលអ្នកឃើញ និងសត្វសាហាវនឹងស្អប់ស្ត្រីពេស្យានោះ ហើយនឹងបំផ្លាញនាងព្រមទាំងធ្វើឲ្យនាងនៅអាក្រាត ក៏នឹងស៊ីសាច់នាង ហើយដុតនាងចោលក្នុងភ្លើង។ ព្រោះព្រះបណ្ដាលចិត្តពួកគេឲ្យធ្វើតាមគំនិតរបស់លោក»។—ការបើកបង្ហាញ ១៧:១៦, ១៧
ទំនាយទី៣: បន្ទាប់ពីការវាយប្រហារដោយជោគជ័យទៅលើសាសនាមិនពិត សាថាននឹងបណ្ដាលឲ្យប្រជាជាតិនានាវាយប្រហារអ្នកដែលគោរពប្រណិប័តន៍ព្រះយេហូវ៉ា។—ការបើកបង្ហាញ ៧:១៤; ម៉ាថាយ ២៤:២១
តើសង្គ្រាមនេះនឹងមានឥទ្ធិពលយ៉ាងណាទៅលើលោកអ្នក?
បើលោកអ្នកមិនទាន់មានឱកាសដើម្បីសិក្សាគម្ពីរឲ្យដិតដល់នៅឡើយ លោកអ្នកប្រហែលជាពិបាកជឿថាព្រឹត្ដិការណ៍ដែលបានរៀបរាប់ខាងលើនេះនឹងកើតឡើង។ ប៉ុន្តែ យើងមានមូលហេតុត្រឹមត្រូវដើម្បីជឿថា ទំនាយទាំងអស់នឹងត្រូវសម្រេចទាំងស្រុង ហើយថាព្រឹត្ដិការណ៍ទាំងនេះនឹងកើតឡើងនៅពេលអនាគតឆាប់ៗខាងមុខនេះ។ ដោយសារទំនាយជាច្រើនក្នុងគម្ពីរបានសម្រេចរួចហើយ នោះអាចជួយយើងឲ្យជឿជាក់បាន។ *
សូមចំណាយពេលខ្លះដើម្បីស្វែងយល់អំពីមូលហេតុដែលសាក្សីព្រះយេហូវ៉ាជឿជាក់ថា«សង្គ្រាមដែលនឹងកើតឡើងនៅថ្ងៃដ៏ធំរបស់ព្រះដែលមានឫទ្ធានុភាពខ្លាំងក្លាបំផុត»គឺជិតណាស់ហើយ និងអំពីមូលហេតុដែលលោកអ្នកមិនត្រូវខ្លាចសង្គ្រាមនោះទេ។ សូមឲ្យពួកគេពិភាក្សាជាមួយលោកអ្នកអំពីអ្វីដែលគម្ពីរប្រាប់លោកអ្នកឲ្យធ្វើ ដើម្បីឲ្យលោកអ្នកអាចនៅក្នុងចំណោមពួកអ្នកដែលព្រះយេហូវ៉ាការពារ។ (ការបើកបង្ហាញ ១៦:១៤) អ្វីដែលលោកអ្នករៀនប្រហែលជាផ្លាស់ប្ដូរទស្សនៈរបស់លោកអ្នកអំពីអនាគត។
[កំណត់សម្គាល់]
^ វគ្គ 17 ដើម្បីដឹងអំពីទីសំអាងដែលបញ្ជាក់ថាទំនាយក្នុងគម្ពីរបានសម្រេច សូមមើលជំពូកទី២ និងទី៩នៃសៀវភៅតើព្រះគម្ពីរពិតជាបង្រៀនយ៉ាងណា? បោះពុម្ពដោយសាក្សីព្រះយេហូវ៉ា។
[ឃ្លាអក្សរធំនៅទំព័រ៨]
តើកិច្ចការរបស់សាក្សីព្រះយេហូវ៉ាអាចជាការសម្រេចមួយនៃទំនាយក្នុងគម្ពីរឬទេ?
