«សូមឲ្យយើងត្រឡប់មកវិញ»
ចូរចូលទៅជិតព្រះ
«សូមឲ្យយើងត្រឡប់មកវិញ»
កាលពីមុន តើអ្នកធ្លាប់បម្រើព្រះយេហូវ៉ាឬទេ? តើអ្នកធ្លាប់គិតចង់បម្រើលោកម្ដងទៀត ប៉ុន្តែមិនដឹងថាលោកនឹងទទួលអ្នកវិញឬទេ? សូមអានអត្ថបទនេះ និងអត្ថបទ«គម្ពីរជួយមនុស្សឲ្យកែប្រែជីវិត»យ៉ាងយកចិត្តទុកដាក់។ អត្ថបទទាំងពីរនេះបានត្រូវរៀបចំឡើងជាពិសេសសម្រាប់អ្នក។
ស្ត្រីម្នាក់ដែលបានធំឡើងជាគ្រិស្តសាសនិក តែបានបោះបង់ចោលជំនឿនោះ បានពោលថា៖ «ខ្ញុំបានអធិដ្ឋានសុំព្រះយេហូវ៉ាឲ្យខ្ញុំត្រឡប់មកវិញ ហើយសុំលោកលើកលែងទោសឲ្យខ្ញុំ ដោយសារខ្ញុំបានធ្វើឲ្យលោកឈឺចិត្ត»។ តើអ្នកអាណិតនាងឬទេ? តើអ្នកឆ្ងល់ទេថា‹ព្រះមានអារម្មណ៍យ៉ាងណាចំពោះពួកអ្នកដែលធ្លាប់បម្រើលោកនោះ? តើលោកនៅចាំពួកគេឬទេ? តើលោកចង់ឲ្យពួកគេ«ត្រឡប់មកវិញ»ឬយ៉ាងណា?›។ ដើម្បីឆ្លើយសំណួរទាំងអស់នោះ សូមឲ្យយើងពិចារណាពាក្យដែលបានកត់ទុកដោយយេរេមា។ ចម្លើយចំពោះសំណួរទាំងនោះប្រាកដជានឹងធ្វើឲ្យអ្នកកក់ក្ដៅក្នុងចិត្តណាស់។—សូមអាន យេរេមា ៣១:១៨-២០
សូមពិចារណាអំពីមូលហេតុដែលយេរេមាសរសេរពាក្យទាំងនេះ។ រាប់ទសវត្សរ៍មុនសម័យយេរេមា គឺក្នុងឆ្នាំ៧៤០ មុនគ.ស. ព្រះយេហូវ៉ាបានអនុញ្ញាតឲ្យជនជាតិអាសស៊ើរវាយលុករាជាណាចក្រដែលមានកុលសម្ព័ន្ធ១០របស់អ៊ីស្រាអែល ហើយចាប់ពួកគេជាឈ្លើយសឹក។ * ដោយសាររាស្ត្ររបស់លោកបានប្រព្រឹត្តអំពើខុសឆ្គងដ៏ធ្ងន់ធ្ងរ ហើយពួកគេមិនព្រមស្ដាប់អ្នកប្រកាសទំនាយដែលព្រមានពួកគេម្ដងហើយម្ដងទៀត នោះព្រះបានអនុញ្ញាតឲ្យមានអន្តរាយនេះកើតឡើងដើម្បីជាការដាក់ទោស។ (ពង្សាវតារក្សត្រទី២ ១៧:៥-១៨) កាលដែលពួកគេត្រូវនៅដាច់ឆ្ងាយពីព្រះនិងត្រូវរស់នៅឆ្ងាយពីស្រុកកំណើត តើបណ្ដាជននេះបានកែប្រែចិត្តគំនិតដោយសារជួបការពិបាកដែលត្រូវរស់នៅជាឈ្លើយសឹកឬទេ? តើព្រះយេហូវ៉ាបំភ្លេចពួកគេឬ? តើលោកនឹងស្វាគមន៍ពួកគេឲ្យត្រឡប់មកវិញឬយ៉ាងណា?
«ទូលបង្គំនឹកស្ដាយកំហុស»
ពេលដែលពួកគេត្រូវចាប់ជាឈ្លើយសឹក នោះបណ្ដាជនបានភ្ញាក់ខ្លួន និងបានប្រែចិត្ត។ ព្រះយេហូវ៉ាបានកត់សម្គាល់ថា ពួកគេបានប្រែចិត្តយ៉ាងស្មោះ។ សូមពិនិត្យមើលនូវពាក្យដែលព្រះយេហូវ៉ាបានពណ៌នាអំពីចិត្តគំនិត និងអារម្មណ៍របស់បណ្ដាជនអ៊ីស្រាអែលដែលបានត្រូវចាប់ទៅជាឈ្លើយ។ ក្នុងខទាំងនេះ អេប្រាអ៊ីមសំដៅទៅជនជាតិអ៊ីស្រាអែលទាំងឡាយដែលបានត្រូវនិរទេស។
ព្រះយេហូវ៉ាបានមានប្រសាសន៍ថា៖ ‹ខ្ញុំឮអេប្រាអ៊ីមយំរៀបរាប់›។ (យេរេមី [យេរេមា] ៣១:១៨, ខ.ស.) លោកបានឮបណ្ដាជនអ៊ីស្រាអែល កាលដែលពួកគេសោកស្ដាយចំពោះលទ្ធផលដែលបណ្ដាលមកពីអំពើខុសឆ្គងរបស់ពួកគេ។ បណ្ឌិតម្នាក់បានរៀបរាប់ថា ពាក្យ«យំរៀបរាប់»អាចមានន័យថា «ការញ័រខ្លួនឬយោលខ្លួន»។ ពួកគេប្រៀបដូចជាកូនដែលប្រព្រឹត្តខុសគ្រវីក្បាលយំស្ដាយចំពោះបញ្ហាដែលកើតឡើងដល់ខ្លួន ហើយគាត់ចង់ត្រឡប់មកផ្ទះវិញ។ (លូកា ១៥:១១-១៧) តើបណ្ដាជនទាំងនោះបាននិយាយយ៉ាងណា?
«ព្រះអង្គបានដាក់ទោសទូលបង្គំ . . . ដូចកូនគោដែលមិនទាន់ផ្សាំង»។ (យេរេមី [យេរេមា] ៣១:១៨, ខ.ស.) បណ្ដាជនបានទទួលស្គាល់ថា ពួកគេសមទទួលទោសមែន។ បន្ថែមទៅទៀត ពួកគេប្រៀបដូចជាកូនគោដែលមិនទាន់ផ្សាំង។ យោងទៅតាមឯកសារយោងមួយ ការប្រៀបធៀបនេះប្រហែលជាមានន័យថា ពួកគេប្រៀបដូចជាកូនគោនោះ ព្រោះ«បើកូនគោព្រមឲ្យគេផ្សាំង នោះគេមិនចាំបាច់ចាក់វានឹងជន្លួញទេ»។
«សូមនាំទូលបង្គំអោយវិលមកវិញ នោះទូលបង្គំនឹងវិលមកវិញ ដ្បិតព្រះអង្គជា[ព្រះយេហូវ៉ា]និងជាព្រះរបស់ទូលបង្គំ»។ (យេរេមី [យេរេមា] ៣១:១៨, ខ.ស.) បណ្ដាជនមានចិត្តរាបទាបឡើងវិញ ហើយសុំជំនួយពីព្រះ។ ពួកគេបានបែរចេញពីព្រះទៅប្រព្រឹត្តអំពើខុសឆ្គង ប៉ុន្តែឥឡូវនេះ ពួកគេបានអង្វរសុំឲ្យព្រះជួយពួកគេត្រឡប់មកធ្វើអ្វីដែលលោកពេញចិត្តវិញ។ ក្នុងសេចក្ដីបកប្រែមួយទៀត ខនេះចែងថា៖ «លោកជាព្រះរបស់យើង សូមឲ្យយើងត្រឡប់មកវិញផង» (Contemporary English Version)។
«ទូលបង្គំវិលមកវិញ ទាំងនឹកស្ដាយកំហុស . . . ហើយអៀនខ្មាស។ ទូលបង្គំបាក់មុខ»។ (យេរេមី [យេរេមា] ៣១:១៩, ខ.ស.) ពួកបណ្ដាជនបានស្ដាយក្រោយដែលបានប្រព្រឹត្តអំពើខុសឆ្គង។ ពួកគេព្រមទទួលស្គាល់ថាខ្លួនខុស ហើយបានសារភាពកំហុស។ ពួកគេហាក់ដូចជាគក់ទ្រូងដោយមានអារម្មណ៍ស្ដាយ ហើយបាក់មុខ។—លូកា ១៥:១៨, ១៩, ២១
បណ្ដាជនអ៊ីស្រាអែលបានប្រែចិត្ត។ ពួកគេបានស្ដាយក្រោយយ៉ាងខ្លាំង និងបានសារភាពកំហុសចំពោះព្រះ ហើយឈប់ធ្វើអាក្រក់ទៀត។ តើការប្រែចិត្តរបស់ពួកគេបានធ្វើឲ្យព្រះយេហូវ៉ាទន់ចិត្តឬទេ? តើលោកបានឲ្យពួកគេត្រឡប់មកឯលោកវិញឬយ៉ាងណា?
‹ខ្ញុំនឹងអាណិតមេត្ដាដល់ពួកគេជាមិនខាន›
ព្រះយេហូវ៉ាមានទំនាក់ទំនងយ៉ាងពិសេសជាមួយនឹងបណ្ដាជនអ៊ីស្រាអែល។ លោកបានមានប្រសាសន៍ថា៖ ‹ខ្ញុំជាឱពុកដល់សាសន៍អ៊ីស្រាអែល ហើយពួកអេប្រាអិមជាកូនច្បងរបស់ខ្ញុំ›។ (យេរេមា ៣១:៩) តើឪពុកម្នាក់ដែលមានសេចក្ដីស្រឡាញ់អាចមិនទទួលកូនដែលបានស្ដាយក្រោយយ៉ាងស្មោះយ៉ាងដូចម្ដេចបាន? សូមកត់សម្គាល់នូវរបៀបដែលព្រះយេហូវ៉ារៀបរាប់អំពីអារម្មណ៍របស់លោកក្នុងនាមជាបិតាម្នាក់។
‹តើអេប្រាអិមជាកូនសំឡាញ់របស់ខ្ញុំឬ? តើជាកូនសំណប់ឬអី? ដ្បិតដែលខ្ញុំនិយាយទាស់នឹងវាវេលាណា នោះខ្ញុំក៏នឹករឭកដល់វានៅវេលានោះឯង›។ (ខ២០) ពាក្យទាំងនោះពិតជាគួរឲ្យលើកទឹកចិត្តមែន! ដូចជាឪពុកដែលស្រឡាញ់កូន ប៉ុន្តែម៉ឺងម៉ាត់ នោះព្រះចាំបាច់ត្រូវតែនិយាយ«ទាស់នឹង»កូនៗដែលធ្វើខុស ដោយព្រមានពួកគេអំពីអំពើខុសឆ្គងរបស់ពួកគេ។ ពេលពួកគេក្បាលរឹងមិនព្រមស្ដាប់ លោកអនុញ្ញាតឲ្យពួកគេក្លាយទៅជាឈ្លើយសឹក ដែលធ្វើឲ្យពួកគេឃ្លាតឆ្ងាយពីផ្ទះរបស់ពួកគេ។ ប៉ុន្តែ ទោះជាលោកដាក់ទោសពួកគេក៏ដោយ លោកមិនបានភ្លេចពួកគេឡើយ។ លោកមិនដែលធ្វើដូច្នេះទេ។ បិតាដែលស្រឡាញ់កូនមិនដែលភ្លេចកូនរបស់ខ្លួនឡើយ។ ប៉ុន្តែ តើព្រះយេហូវ៉ាមានអារម្មណ៍យ៉ាងណាពេលលោកឃើញកូនៗរបស់លោកប្រែចិត្តយ៉ាងស្មោះនោះ?
‹ខ្ញុំមានចិត្តរំជួលដល់ពួកគេ ហើយនឹងអាណិតមេត្ដាដល់ពួកគេជាមិនខាន›។ (ខ២០) ព្រះយេហូវ៉ាស្រឡាញ់កូនៗរបស់លោកយ៉ាងខ្លាំង។ ការប្រែចិត្តយ៉ាងស្មោះរបស់ពួកគេធ្វើឲ្យលោករំជួលចិត្ត ហើយលោកចង់ឲ្យពួកគេត្រឡប់មកឯលោកវិញណាស់។ ដូចឪពុកក្នុងឧទាហរណ៍របស់លោកយេស៊ូអំពីកូនបង្ហិនទ្រព្យ ព្រះយេហូវ៉ា«មានចិត្តក្ដួលអាណិត» ហើយចង់ទទួលស្វាគមន៍កូនៗរបស់លោកឲ្យត្រឡប់មកវិញ។—លូកា ១៥:២០
«ព្រះយេហូវ៉ាបានឲ្យខ្ញុំត្រឡប់មកវិញ!»
ពាក្យនៅយេរេមា ៣១:១៨-២០ ជួយយើងឲ្យយល់អំពីសេចក្ដីអាណិតមេត្ដា របស់ព្រះយេហូវ៉ា។ ព្រះមិនភ្លេចពួកអ្នកដែលធ្លាប់បម្រើលោកនោះទេ។ ចុះយ៉ាងណាបើអ្នកដែលធ្លាប់បម្រើលោកចង់ត្រឡប់មកឯលោកវិញ? ព្រះ«បំរុងតែនឹងអត់ទោស»។ (ទំនុកតម្កើង ៨៦:៥) លោកនឹងមិនបែរខ្នងដាក់ពួកអ្នកដែលមកឯលោកដោយប្រែចិត្តយ៉ាងស្មោះឡើយ។ (ទំនុកតម្កើង ៥១:១៧) ផ្ទុយទៅវិញ លោករីករាយនឹងទទួលពួកគេឲ្យត្រឡប់មកវិញ។—លូកា ១៥:២២-២៤
ស្ត្រីម្នាក់ដែលបានរៀបរាប់ពីខាងដើមអត្ថបទនេះបានចាត់វិធានការដើម្បីត្រឡប់មកឯព្រះយេហូវ៉ាវិញ ហើយគាត់បានចូលរួមកិច្ចប្រជុំរបស់សាក្សីព្រះយេហូវ៉ាដែលមាននៅក្នុងតំបន់នោះ។ មុនដំបូង គាត់ត្រូវយកឈ្នះអារម្មណ៍អវិជ្ជមានរបស់គាត់។ គាត់បានរៀបរាប់ថា៖ «ខ្ញុំមានអារម្មណ៍ថា ខ្លួនគ្មានតម្លៃទេ»។ ប៉ុន្តែ ពួកអ្នកចាស់ទុំក្នុងក្រុមជំនុំបានលើកទឹកចិត្តគាត់ ហើយជួយគាត់ឲ្យមានចំណងមិត្តភាពជាមួយនឹងព្រះយេហូវ៉ាឡើងវិញ។ ដោយមានចិត្តដឹងគុណយ៉ាងជ្រាលជ្រៅ គាត់បានពោលថា៖ «នេះពិតជាអស្ចារ្យណាស់ដែលព្រះយេហូវ៉ាបានឲ្យខ្ញុំត្រឡប់មកវិញ!»។
បើកាលពីមុនអ្នកធ្លាប់បម្រើព្រះយេហូវ៉ា ហើយបានគិតថាចង់បម្រើលោកម្ដងទៀត យើងសូមអញ្ជើញអ្នកឲ្យចូលរួមកិច្ចប្រជុំរបស់សាក្សីព្រះយេហូវ៉ាដែលនៅក្នុងតំបន់របស់អ្នក។ សូមចាំថា ព្រះយេហូវ៉ានឹងបង្ហាញសេចក្ដីអាណិតមេត្ដា ពេលមនុស្សដែលប្រែចិត្តសុំលោកថា៖ «សូមឲ្យយើងត្រឡប់មកវិញ»។
ក្នុងខែមេសា លោកអ្នកអាចអាន:
[កំណត់សម្គាល់]
^ វគ្គ 5 ជាងពីរសតវត្សរ៍មុននោះ គឺនៅឆ្នាំ៩៩៧ មុនគ.ស. អ៊ីស្រាអែលបានត្រូវបែងចែកជារាជាណាចក្រពីរ។ រាជាណាចក្រមួយនៅទិសខាងត្បូងដែលមានកុលសម្ព័ន្ធពីរ បានត្រូវហៅថារាជាណាចក្រយូដា។ រាជាណាចក្រមួយទៀតនៅទិសខាងជើងដែលមានកុលសម្ព័ន្ធ១០ បានត្រូវហៅថារាជាណាចក្រអ៊ីស្រាអែល ហើយក៏បានត្រូវហៅថាអេប្រាអ៊ីម ព្រោះនេះជាកុលសម្ព័ន្ធដែលធំបំផុត។
