តើបុគ្គលវិញ្ញាណមានឥទ្ធិពលយ៉ាងណាមកលើយើង?
សូមរៀនពីបណ្ដាំរបស់ព្រះ
តើបុគ្គលវិញ្ញាណមានឥទ្ធិពលយ៉ាងណាមកលើយើង?
អត្ថបទនេះឆ្លើយសំណួរមួយចំនួនដែលលោកអ្នកប្រហែលជាធ្លាប់លើកឡើង ហើយបង្ហាញចម្លើយដែលលោកអ្នកអាចអានពីគម្ពីររបស់លោកអ្នក។ សាក្សីព្រះយេហូវ៉ានឹងរីករាយពិភាក្សាចម្លើយទាំងនេះជាមួយនឹងលោកអ្នក។
១. តើពួកទេវតាជាអ្នកណា?
ពួកទេវតាជាបុគ្គលវិញ្ញាណដែលរស់នៅស្ថានសួគ៌។ ពួកគេមានជីវិតដែលខ្ពស់ជាងជីវិតមនុស្សនៅផែនដី។ ព្រះពិតក៏ជាបុគ្គលវិញ្ញាណដែរ លោកបានបង្កើតទេវតាមុនពេលដែលលោកបានបង្កើតផែនដី។ (យ៉ូប ៣៨:៤, ៧; ម៉ាថាយ ១៨:១០) ព្រះយេហូវ៉ាមានទេវតាស្មោះត្រង់រាប់លាននាក់ដែលនៅជុំវិញលោក។—សូមអាន ទំនុកតម្កើង ១០៣:២០, ២១; ដានីយ៉ែល ៧:៩, ១០
២. តើពួកទេវតាជួយមនុស្សឬទេ?
ទេវតាបានជួយឡុតដែលជាបុរសស្មោះត្រង់ម្នាក់។ គាត់រស់នៅទីក្រុងដែលព្រះបានសម្រេចថានឹងបំផ្លាញចោល ដោយសារមនុស្សនៅទីក្រុងនោះធ្វើអំពើអាក្រក់។ ទេវតាពីររូបបានព្រមានឡុតនិងគ្រួសាររបស់គាត់ឲ្យរត់ចេញពីទីក្រុងនោះ។ មនុស្សខ្លះចាត់ទុកការព្រមាននោះថាជារឿងលេងសើច ហើយមិនយកចិត្តទុកដាក់ទេ។ ប៉ុន្តែ ឡុតនិងកូនស្រីរបស់គាត់បានរួចជីវិត ដោយសារពួកគេស្ដាប់តាមការព្រមានដែលព្រះបានប្រាប់តាមរយៈទេវតាទាំងនោះ។—សូមអាន លោកុប្បត្តិ ១៩:១, ១៣-១៧, ២៦
គម្ពីរប្រាប់ថា ពួកទេវតាកំពុងជួយមនុស្សនៅសព្វថ្ងៃនេះ ដោយដឹកនាំកិច្ចការរបស់ពួកអ្នកស្មោះត្រង់ដែលផ្សព្វផ្សាយដំណឹងល្អអំពីរាជាណាចក្រព្រះ។ (ម៉ាថាយ ២៤:១៤) ដំណឹងល្អក៏មានការព្រមានដែរ ហើយការព្រមាននោះមិនមែនជារឿងលេងសើចទេ ដូចការព្រមានដែលឡុតបានទទួលមិនមែនជារឿងលេងសើចដែរ។ ព្រោះការព្រមាននោះមកពីព្រះតាមរយៈទេវតា។—សូមអាន ការបើកបង្ហាញ ១:១; ១៤:៦, ៧
ពេលដែលយើងជួបប្រទះនឹងការលំបាកផ្សេងៗ នោះព្រះអាចចាត់ពួកទេវតាឲ្យមកពង្រឹងកម្លាំងយើង។ លោកក៏ធ្លាប់ចាត់ទេវតាឲ្យមកពង្រឹងកម្លាំងលោកយេស៊ូដែរ។—សូមអាន លូកា ២២:៤១-៤៣
មិនយូរប៉ុន្មានទៀត ព្រះនឹងចាត់ពួកទេវតាតាមរបៀបមួយផ្សេងទៀត ដើម្បីបំផ្លាញមនុស្សអាក្រក់ដែលបណ្ដាលឲ្យមានទុក្ខវេទនា។ នេះពិតជានាំឲ្យមនុស្សជាតិធូរស្បើយក្នុងចិត្តមែន។—សូមអាន ថែស្សាឡូនិចទី២ ១:៦-៨
៣. តើពួកវិញ្ញាណកំណាចមានឥទ្ធិពលមកលើយើង យ៉ាងដូចម្ដេច?
ដូចមានមនុស្សជាច្រើននៅផែនដីដែលធ្វើអំពើអាក្រក់ដោយមិនស្ដាប់បង្គាប់ព្រះ នោះទេវតាជាច្រើននៅស្ថានសួគ៌ក៏បានបះបោរប្រឆាំងនឹងព្រះដែរ។ (ពេត្រុសទី២ ២:៤) ពួកទេវតាដែលមិនស្ដាប់បង្គាប់ព្រះបានត្រូវហៅថាពួកវិញ្ញាណកំណាច។ ក្នុងចំណោមពួកវិញ្ញាណកំណាចទាំងនោះ មានមេកំណាចដែលហៅថាសាថាន។ សាថាននិងពួកវិញ្ញាណកំណាចកំពុងបំភាន់មនុស្សជាតិ។—សូមអាន ការបើកបង្ហាញ ១២:៩
សាថានមានឥទ្ធិពលទៅលើមនុស្ស តាមរយៈប្រព័ន្ធពាណិជ្ជកម្មដែលប្រើល្បិចគ្រប់យ៉ាងឲ្យតែបានកម្រៃ រដ្ឋាភិបាលរបស់មនុស្ស និងសាសនាមិនពិត ដើម្បីបង្វែរពួកគេឲ្យចេញឆ្ងាយពីព្រះ។ ដូច្នេះ សាថានជាអ្នកទទួលខុសត្រូវចំពោះភាពអយុត្ដិធម៌ អំពើឃោរឃៅ និងការឈឺចាប់ដែលបណ្ដាលឲ្យមនុស្សជាតិរងទុក្ខវេទនា។—សូមអាន យ៉ូហានទី១ ៥:១៩
៤. តើតាមរបៀបណាដែលពួកវិញ្ញាណអាក្រក់បំភាន់មនុស្ស?
សាថានបានបោកបញ្ឆោតមនុស្សជាច្រើនតាមរយៈសេចក្ដីបង្រៀនមិនពិតដែលថា មនុស្សស្លាប់ក្លាយទៅជាវិញ្ញាណដែលអាចទាក់ទងជាមួយពួកគេបាន។ ក៏ប៉ុន្តែ គម្ពីរបានរៀបរាប់ថា មនុស្សស្លាប់មិនអាចធ្វើអ្វីទាល់តែសោះ។ (សាស្ដា ៩:៥) ទោះជាយ៉ាងណាក៏ដោយ ជារឿយៗពួកវិញ្ញាណកំណាចបញ្ឆោតពួកគេដោយធ្វើសំឡេងដូចមនុស្សជាទីស្រឡាញ់ដែលបានស្លាប់ទៅ។ (អេសាយ ៨:១៩) ពួកវិញ្ញាណកំណាចបំភាន់អ្នកឯទៀតតាមរយៈគ្រូខាបព្រលឹងមនុស្សស្លាប់ គ្រូទាយ និងពួកហោរាសាស្ត្រ។ បណ្ដាំរបស់ព្រះព្រមានយើងឲ្យជៀសចេញពីការប្រព្រឹត្តទាំងនោះ។ ដូច្នេះ យើងគួរបោះបង់ចោលអ្វីក៏ដោយដែលជាប់ទាក់ទងនឹងមន្តអាគម និងពួកវិញ្ញាណកំណាច។—សូមអាន ចោទិយកថា ១៨:១០, ១១; សកម្មភាព ១៩:១៩
បើយើងស្រឡាញ់ព្រះយេហូវ៉ា យើងមិនត្រូវមានអារម្មណ៍ភ័យខ្លាចពួកវិញ្ញាណកំណាចឡើយ។ ពេលយើងសិក្សាបណ្ដាំរបស់ព្រះហើយធ្វើតាម នោះយើងអាចតស៊ូនឹងមេកំណាច ហើយចូលទៅជិតព្រះ។ ព្រះយេហូវ៉ាមានឫទ្ធានុភាពខ្លាំងជាងពួកវិញ្ញាណកំណាចឆ្ងាយណាស់។ ពួកទេវតាស្មោះត្រង់របស់លោកអាចពង្រឹងកម្លាំងយើងពេលដែលយើងត្រូវការ។—សូមអាន ទំនុកតម្កើង ៣៤:៧; យ៉ាកុប ៤:៧, ៨
ដើម្បីទទួលព័ត៌មានបន្ថែម សូមមើលជំពូកទី១០នៃសៀវភៅតើព្រះគម្ពីរពិតជាបង្រៀនយ៉ាងណា? ដែលបានត្រូវបោះពុម្ពផ្សាយដោយសាក្សីព្រះយេហូវ៉ា។
