‹អស់ទាំងសាសន៍នឹងដឹងថា ខ្ញុំជាព្រះយេហូវ៉ា›
ចូរចូលទៅជិតព្រះ
‹អស់ទាំងសាសន៍នឹងដឹងថា ខ្ញុំជាព្រះយេហូវ៉ា›
តើលោកអ្នកនឹងមានអារម្មណ៍យ៉ាងណាបើមានគេចោទប្រកាន់ថាលោកអ្នកបានប្រព្រឹត្តបទឧក្រិដ្ឋ ដែលលោកអ្នកមិនបានធ្វើ? ហើយចុះយ៉ាងណាវិញ បើបទឧក្រិដ្ឋនោះបានធ្វើឲ្យអ្នកឯទៀត រួមទាំងជនស្លូតត្រង់ជាច្រើននាក់រងទុក្ខវេទនាយ៉ាងខ្លាំងនោះ? លោកអ្នកច្បាស់ជាចង់បង្ហាញថាលោកអ្នកគ្មានទោសទេ មែនទេ? តើលោកអ្នកដឹងទេថា ព្រះយេហូវ៉ាកំពុងប្រឈមមុខការពិបាកដែលស្រដៀងគ្នានឹងនេះដែរ? សព្វថ្ងៃនេះ មនុស្សជាច្រើនចោទប្រកាន់ព្រះដោយមិនពិតថា អំពើអយុត្ដិធម៌និងទុក្ខវេទនាក្នុងពិភពលោកគឺមកពីលោក។ តើព្រះយេហូវ៉ាពិតជាចង់បង្ហាញថាលោកគ្មានទោសឬទេ? លោកចង់បង្ហាញមែន! សូមពិចារណាអំពីអ្វីដែលគម្ពីរបានចែងនៅសៀវភៅអេសេគាល។—សូមអាន អេសេគាល ៣៩:៧
ព្រះយេហូវ៉ាមានប្រសាសន៍ថា៖ ‹ខ្ញុំនឹងមិនឲ្យឈ្មោះបរិសុទ្ធរបស់ខ្ញុំត្រូវបង្អាប់ទៀត›។ ពេលដែលមនុស្សចោទប្រកាន់ព្រះថាលោកជាអ្នកធ្វើឲ្យមានអំពើអយុត្ដិធម៌ នោះពួកគេកំពុងបង្អាប់នាមរបស់លោក។ តើបង្អាប់យ៉ាងដូចម្ដេច? ច្រើនដងក្នុងគម្ពីរ ពាក្យ«ឈ្មោះ»សំដៅទៅលើកេរ្ដិ៍ឈ្មោះ។ សៀវភៅស្រាវជ្រាវមួយបញ្ជាក់ថា នាមរបស់ព្រះសំដៅទៅ«អ្វីដែលអ្នកឯទៀតដឹងអំពីលោក អ្វីដែលលោកបានបើកបង្ហាញឲ្យដឹងអំពីខ្លួនលោកផ្ទាល់ ហើយក៏រួមបញ្ចូលកិត្ដិនាមនិងកិត្ដិយសរបស់លោកដែរ»។ នាមរបស់ព្រះយេហូវ៉ារួមបញ្ចូលកេរ្ដិ៍ឈ្មោះរបស់លោក។ ស្តីអំពីអំពើអយុត្ដិធម៌ តើយើងដឹងអ្វីខ្លះអំពីព្រះយេហូវ៉ា? យើងដឹងថាលោកស្អប់អំពើអយុត្តធម៌ណាស់! លោកថែមទាំងអាណិតអាសូរដល់អ្នកដែលរងគ្រោះដោយសារអំពើអយុត្ដិធម៌។ (និក្ខមនំ ២២:២២-២៤) ពេលដែលមនុស្សនិយាយថាព្រះជាអ្នកធ្វើឲ្យមានអំពើអយុត្ដិធម៌ដែលជាអ្វីដែលលោកស្អប់ នោះពួកគេកំពុងបង្ខូចកេរ្ដិ៍ឈ្មោះរបស់លោក។ ដោយធ្វើដូច្នេះ ពួកគេ«ប្រមាថដល់ព្រះនាមទ្រង់»។—ទំនុកតម្កើង ៧៤:១០
សូមកត់សម្គាល់ថា ព្រះយេហូវ៉ាប្រើពាក្យ‹ឈ្មោះបរិសុទ្ធរបស់ខ្ញុំ›ចំនួនពីរដង។ (ខ៧) ច្រើនដងក្នុងគម្ពីរ នាមរបស់ព្រះយេហូវ៉ាមានភ្ជាប់ជាមួយនឹងពាក្យ«បរិសុទ្ធ»។ ពាក្យ«បរិសុទ្ធ»បញ្ជាក់អត្ថន័យថាបានត្រូវញែកចេញដោយឡែក ថែមទាំងស្អាតស្អំ និងឥតសៅហ្មង។ នាមរបស់ព្រះយេហូវ៉ាគឺបរិសុទ្ធដោយសារលោកបរិសុទ្ធ ពោលគឺមិនពាក់ព័ន្ធនឹងអ្វីដែលស្មោកគ្រោកឬខុសឆ្គងឡើយ។ ដូច្នេះ តើលោកអ្នកអាចយល់អំពីមូលហេតុនៃការទម្លាក់កំហុសទៅលើព្រះយេហូវ៉ាដែលថា លោកជាអ្នកធ្វើឲ្យមានអំពើទុច្ចរិត នោះជាការតិះដៀល«ឈ្មោះបរិសុទ្ធ»របស់លោកខ្លាំងបំផុតឬទេ?
ព្រះយេហូវ៉ាមានគោលបំណងស្ដារកេរ្ដិ៍ឈ្មោះរបស់លោកតាមរយៈរាជាណាចក្ររបស់លោក។ នេះហើយជាគោលរឿងសំខាន់បំផុតក្នុងគម្ពីរ។ ចំណុចនេះបានត្រូវលើកបញ្ជាក់ក្នុងសៀវភៅអេសេគាល ដែលបានរៀបរាប់ឡើងវិញថា៖ ‹អស់ទាំងសាសន៍នឹងដឹងថា ខ្ញុំជាព្រះយេហូវ៉ា›។ (អេសេគាល ៣៦:២៣; ៣៧:២៨; ៣៨:២៣; ៣៩:៧) សូមកត់សម្គាល់ថា អស់ទាំងសាសន៍នឹងគ្មានសិទ្ធិជ្រើសរើសថាពួកគេចង់ស្គាល់ឬមិនចង់ស្គាល់ព្រះយេហូវ៉ានោះទេ។ ផ្ទុយទៅវិញ ពួកគេ«នឹង[ត្រូវ]ដឹងថា»លោកជាអ្នកណា។ បើនិយាយឲ្យចំទៅ ព្រះយេហូវ៉ានឹងចាត់វិធានការដើម្បីបង្ខំឲ្យប្រជាជាតិទាំងឡាយនៅផែនដីឲ្យទទួលស្គាល់ថាលោកពិតជាព្រះយេហូវ៉ា ជាម្ចាស់ដ៏ឧត្តមបំផុត ដែលនាមរបស់លោករួមបញ្ចូលអ្វីៗទាំងអស់ដែលបរិសុទ្ធនិងស្អាតស្អំ។
សេចក្ដីសន្យាក្នុងគម្ពីរដែលថា៖ ‹អស់ទាំងសាសន៍នឹងដឹងថា ខ្ញុំជាព្រះយេហូវ៉ា›មានច្រើនដង។ ពាក្យនេះជាដំណឹងល្អសម្រាប់អស់អ្នកដែលពិតជាចង់ឲ្យអំពើអយុត្ដិធម៌និងទុក្ខវេទនាលែងមានទៀត។ មិនយូរទៀត ព្រះយេហូវ៉ានឹងធ្វើតាមសេចក្ដីសន្យានោះ ហើយលោកនឹងស្ដារកេរ្ដិ៍ឈ្មោះរបស់លោកឡើងវិញ។ លោកនឹងបំបាត់ចោលអំពើទុច្ចរិតគ្រប់យ៉ាងនិងអស់អ្នកដែលគាំទ្រអំពើនោះ តែលោកនឹងទុកជីវិតដល់អស់អ្នកដែលទទួលស្គាល់និងគោរពនាមរបស់លោកព្រមទាំងអ្វីដែលនាមនោះរួមបញ្ចូល។ (សុភាសិត ១៨:១០) តើនេះជំរុញចិត្តលោកអ្នកឲ្យចូលទៅជិតព្រះយេហូវ៉ាជាព្រះដែលបរិសុទ្ធ និងដែល«សព្វព្រះទ័យនឹងសេចក្ដីយុត្ដិធម៌»ឬទេ?—ទំនុកតម្កើង ៣៧:៩-១១, ២៨
