«លោកបាន . . . បើកសម្ដែង ឲ្យកូនតូចៗយល់»
ចូរចូលទៅជិតព្រះ
«លោកបាន . . . បើកសម្ដែង ឲ្យកូនតូចៗយល់»
តើលោកអ្នកចង់ដឹងសេចក្ដីពិតអំពីព្រះទេ? ជាឧទាហរណ៍ តើលោកជាអ្នកណា? តើលោកស្រឡាញ់និងស្អប់អ្វី? ហើយតើអ្វីជាបំណងប្រាថ្នារបស់លោក? ក្នុងគម្ពីរដែលជាបណ្ដាំរបស់លោក ព្រះយេហូវ៉ាបានបើកសម្ដែងការពិតទាំងអស់អំពីលោក។ ប៉ុន្តែ មិនមែនមនុស្សទាំងអស់ដែលអានគម្ពីរ ហើយអាចយល់សេចក្ដីពិតយ៉ាងពេញលេញនោះទេ។ ហេតុអ្វី? ពីព្រោះការយល់សេចក្ដីពិតទាំងនេះជាឯកសិទ្ធិមួយ មិនមែនមនុស្សគ្រប់រូបអាចទទួលបានទេ។ សូមឲ្យយើងពិចារណាប្រសាសន៍របស់លោកយេស៊ូស្តីអំពីរឿងនេះ។—សូមអាន ម៉ាថាយ ១១:២៥
ខគម្ពីរនោះចាប់ផ្ដើមដោយពាក្យថា «នៅពេលនោះ លោកយេស៊ូមានប្រសាសន៍ថា»។ ដូច្នេះ អ្វីដែលលោកយេស៊ូមានប្រសាសន៍ប្រហែលជាការតបឆ្លើយនឹងអ្វីដែលទើបនឹងបានកើតឡើង។ លោកទើបតែមានប្រសាសន៍ទៅមនុស្សដែលរស់នៅទីក្រុងបីក្នុងស្រុកកាលីឡេជាកន្លែងដែលលោកបានធ្វើការអស្ចារ្យដែលប្រកបដោយឫទ្ធានុភាព។ លោកបានស្តីបន្ទោសពួកគេដោយសារពួកគេមិនព្រមស្ដាប់លោកទេ។ (ម៉ាថាយ ១១:២០-២៤) លោកអ្នកប្រហែលជាឆ្ងល់ថា ‹ហេតុអ្វីបានជាអ្នកដែលឃើញការអស្ចារ្យរបស់លោកយេស៊ូមិនព្រមជឿសេចក្ដីពិតដែលលោកបង្រៀន ហើយធ្វើតាមលោក?›។ បណ្ដាជនមិនព្រមធ្វើតាមលោកយេស៊ូទេ ដោយសារពួកគេមានចិត្តរឹង។—ម៉ាថាយ ១៣:១០-១៥
លោកយេស៊ូដឹងថា ដើម្បីយល់សេចក្ដីពិតអំពីព្រះដែលមានក្នុងគម្ពីរ យើងត្រូវការអ្វីពីរយ៉ាង ពោលគឺជំនួយពីព្រះនិងចិត្តគំនិតត្រឹមត្រូវ។ លោកយេស៊ូបានអធិដ្ឋានថា៖ «ឱបិតា ជាម្ចាស់ស្ថានសួគ៌និងផែនដី ខ្ញុំសូមសរសើរលោកនៅមុខមនុស្ស ពីព្រោះលោកបានលាក់អ្វីៗទាំងនេះពីអ្នកប្រាជ្ញនិងអ្នកចេះដឹង តែបានបើកសម្ដែងឲ្យកូនតូចៗយល់វិញ»។ តើលោកអ្នកយល់មូលហេតុដែលអាចនិយាយថា ការយល់សេចក្ដីពិតក្នុងគម្ពីរជាឯកសិទ្ធិទេ? ដោយសារព្រះយេហូវ៉ាជា«ម្ចាស់ស្ថានសួគ៌និងផែនដី» លោកមានសិទ្ធិសម្រេចថា អ្នកណាដែលលោកនឹងបើកសម្ដែងឲ្យស្គាល់សេចក្ដីពិត។ ប៉ុន្តែ លោកធ្វើដូច្នេះដោយមានមូលហេតុ។ តើមានមូលហេតុអ្វីដែលលោកបើកសម្ដែងសេចក្ដីពិតដល់មនុស្សខ្លះប៉ុណ្ណោះ?
ព្រះយេហូវ៉ាពេញចិត្តនឹងមនុស្សដែលមានចិត្តរាបទាប មិនមែនមនុស្សក្រអឺតក្រទមទេ។ (យ៉ាកុប ៤:៦) លោកលាក់សេចក្ដីពិតពី«អ្នកប្រាជ្ញនិងអ្នកចេះដឹង» គឺពួកអ្នកប្រាជ្ញក្នុងពិភពលោកនេះ និងអ្នកចេះដឹងដែលអួតខ្លួន ហើយអ្នកដែលពឹងលើសមត្ថភាពឬកម្លាំងរបស់ខ្លួន និងគិតថាពួកគេមិនត្រូវការជំនួយពីលោកទេ។ (កូរិនថូសទី១ ១:១៩-២១) តែលោកបើកសម្ដែងសេចក្ដីពិតដល់«កូនតូចៗ» គឺអ្នកដែលចង់ស្គាល់លោកដោយចិត្តស្មោះដែលមានចិត្តរាបទាបដូចកូនតូច។ (ម៉ាថាយ ១៨:១-៤; កូរិនថូសទី១ ១:២៦-២៨) លោកយេស៊ូដែលជាបុត្ររបស់ព្រះស្គាល់ចិត្តគំនិតរបស់មនុស្សទាំងពីរប្រភេទនោះ។ ពួកអ្នកដឹកនាំសាសនាជាច្រើនដែលមានអំណួត និងមានចំណេះដឹងខ្ពស់មិនបានយល់អត្ថន័យនៃសេចក្ដីបង្រៀនរបស់លោកយេស៊ូទេ តែពួកអ្នកនេសាទត្រីដែលមានចិត្តរាបទាបបានយល់វិញ។ (ម៉ាថាយ ៤:១៨-២២; ២៣:១-៥; សកម្មភាព ៤:១៣) នៅដំណាលគ្នានោះ អ្នកមាននិងអ្នកចេះដឹងខ្លះដែលបង្ហាញចិត្តរាបទាបយ៉ាងស្មោះបានក្លាយទៅជាអ្នកកាន់តាមលោកយេស៊ូ។—លូកា ១៩:១, ២, ៨; សកម្មភាព ២២:១-៣
យើងសូមសួរលោកអ្នកនូវសំណួរដែលបានលើកឡើងនៅវគ្គទី១ម្ដងទៀតថា តើលោកអ្នកចង់ដឹងសេចក្ដីពិតអំពីព្រះទេ? បើចង់ដឹងមែន លោកអ្នកនឹងសប្បាយចិត្តដោយដឹងថា ព្រះមិនពេញចិត្តឲ្យចំណេះអំពីសេចក្ដីពិតដល់អ្នកដែលចាត់ទុកខ្លួនថាជាអ្នកប្រាជ្ញនៃពិភពលោកនេះឡើយ។ ផ្ទុយទៅវិញ លោកពេញចិត្តនឹងអ្នកដែលប្រហែលជាទទួលការមើលងាយពីអ្នកប្រាជ្ញក្នុងពិភពលោកនេះ។ បើលោកអ្នកសិក្សាបណ្ដាំរបស់ព្រះដោយមានចិត្តគំនិតត្រឹមត្រូវ និងចិត្តរាបទាប លោកអ្នកប្រហែលជានឹងស្ថិតក្នុងចំណោមអ្នកដែលព្រះយេហូវ៉ាផ្ដល់នូវអំណោយដ៏ពិសេស ពោលគឺការយល់សេចក្ដីពិតអំពីលោក។ ការយល់សេចក្ដីពិតនឹងធ្វើឲ្យជីវិតលោកអ្នកកាន់តែមានន័យខ្លឹមសារនៅឥឡូវនេះ និងអាចនាំទៅ«ជីវិតដ៏ពិតប្រាកដ» ជាជីវិតដែលគ្មានទីបញ្ចប់ក្នុងពិភពលោកថ្មីដ៏សុចរិតដែលនឹងមកដល់ក្នុងពេលឆាប់ៗ តាមសេចក្ដីសន្យារបស់ព្រះ។ *—ធីម៉ូថេទី១ ៦:១២, ១៩; ពេត្រុសទី២ ៣:១៣
អំណានគម្ពីរក្នុងខែមករា:
[កំណត់សម្គាល់]
^ វគ្គ 7 សាក្សីព្រះយេហូវ៉ាពេញចិត្តជួយលោកអ្នកឲ្យរៀនសេចក្ដីពិតអំពីព្រះនិងគោលបំណងរបស់លោក។ ពួកគេស្នើសុំបង្រៀនគម្ពីរដោយឥតគិតថ្លៃនៅផ្ទះរបស់លោកអ្នក ដោយប្រើសៀវភៅតើព្រះគម្ពីរពិតជាបង្រៀនយ៉ាងណា?
