ហេតុអ្វីមនុស្សចាប់អារម្មណ៍ការគ្រប់គ្រងរបស់ព្រះ?
អត្ថបទអំពីក្របទស្សនាវដ្ដី | ការគ្រប់គ្រងរបស់ព្រះ តើផ្ដល់ប្រយោជន៍អ្វីខ្លះដល់លោកអ្នក?
ហេតុអ្វីមនុស្សចាប់អារម្មណ៍ការគ្រប់គ្រងរបស់ព្រះ?
ក្នុងគម្ពីរបរិសុទ្ធ ការគ្រប់គ្រងរបស់ព្រះសំដៅទៅលើរាជាណាចក្ររបស់ព្រះ។ តើរាជាណាចក្រព្រះជាអ្វី? គឺជារដ្ឋាភិបាលមួយដែលមានអ្នកគ្រប់គ្រងដែលព្រះបានតែងតាំង។ មនុស្សរាប់លាននាក់ក្នុងពិភពលោកសង្ឃឹមទៅលើរាជាណាចក្រព្រះ។ ពួកគេអធិដ្ឋានតាមសេចក្ដីអធិដ្ឋានគំរូដែលលោកយេស៊ូបានបង្រៀនអ្នកកាន់តាមលោក ដែលថា៖ «សូមឲ្យរាជាណាចក្ររបស់លោកបានមកដល់។ សូមឲ្យបំណងប្រាថ្នារបស់លោកបានសម្រេចនៅផែនដី»។—ម៉ាថាយ ៦:១០
ពិតមែនមនុស្សជាច្រើនចាប់អារម្មណ៍យ៉ាងខ្លាំងទៅលើរាជាណាចក្រព្រះ តែសាសនាភាគច្រើនហាក់បីដូចជាមិនសូវចាប់អារម្មណ៍នឹងរឿងនោះទេ។ ស្តីអំពីរឿងនេះ ប្រវត្ដិវិទូម្នាក់ឈ្មោះហឺបឺត ជោច វេល បានកត់សម្គាល់ថា៖ ‹ក្នុងសេចក្ដីបង្រៀនរបស់លោកយេស៊ូ គឺគួរឲ្យចាប់អារម្មណ៍ណាស់ ព្រោះលោកបានផ្ដោតអារម្មណ៍យ៉ាងខ្លាំងទៅលើរាជាណាចក្រស្ថានសួគ៌ឬនគរស្ថានសួគ៌។ ប៉ុន្តែក្នុងសេចក្ដីបង្រៀនរបស់វិហារគ្រិស្តសាសនាភាគច្រើន ពួកគេមិនសូវផ្ដោតអារម្មណ៍ទៅលើរាជាណាចក្រស្ថានសួគ៌ទេ›។
ចំណែកយើងជាសាក្សីព្រះយេហូវ៉ា យើងលើកបញ្ជាក់យ៉ាងខ្លាំងទៅលើរាជាណាចក្រព្រះ។ សូមគិតអំពីទស្សនាវដ្ដីនេះដែលលោកអ្នកកំពុងអាន នេះជាទស្សនាវដ្ដីដ៏សំខាន់របស់យើង ដែលបានត្រូវបោះពុម្ពជា២២០ភាសា។ ក្នុងមួយលេខៗ ទស្សនាវដ្ដីនេះបានត្រូវបោះពុម្ពជិត៤៦លានច្បាប់។ ដោយហេតុនេះ ទស្សនាវដ្ដីនេះបានត្រូវចែកចាយច្រើនជាងគេបំផុតលើពិភពលោក។ តើទស្សនាវដ្ដីនេះផ្ដោតទៅលើព័ត៌មានដ៏សំខាន់អ្វី? សូមមើលឈ្មោះពេញរបស់ទស្សនាវដ្ដីនេះគឺ ទស្សនាវដ្ដីប៉មយាមប្រកាសអំពីរាជាណាចក្ររបស់ព្រះយេហូវ៉ា។ *
ហេតុអ្វីសាក្សីព្រះយេហូវ៉ាខំព្យាយាមខ្លាំងម្ល៉េះ ដើម្បីប្រកាសផ្សាយអំពីរាជាណាចក្រព្រះ? មូលហេតុមួយ គឺយើងជឿថារាជាណាចក្រព្រះជាគោលរឿងដ៏ចម្បងក្នុងគម្ពីរបរិសុទ្ធ ដែលជាសៀវភៅសំខាន់បំផុតលើពិភពលោក។ មូលហេតុមួយទៀត យើងជឿជាក់ថារាជាណាចក្រព្រះជាដំណោះស្រាយតែមួយគត់ចំពោះបញ្ហាមនុស្សជាតិនៅសព្វថ្ងៃនេះ។
សាក្សីព្រះយេហូវ៉ាខំព្យាយាមធ្វើតាមគំរូរបស់លោកយេស៊ូក្នុងការជួយមនុស្សឲ្យផ្ដោតអារម្មណ៍ទៅលើរាជាណាចក្រព្រះ។ ពេលលោកយេស៊ូនៅផែនដី លោកចាត់ទុករាជាណាចក្រព្រះជាអ្វីដ៏សំខាន់បំផុតក្នុងជីវិតនិងកិច្ចបម្រើផ្សាយរបស់លោក។ (លូកា ៤:៤៣) ហេតុអ្វីរាជាណាចក្រព្រះគឺសំខាន់ម្ល៉េះចំពោះលោកយេស៊ូ? តើរាជាណាចក្រព្រះអាចផ្ដល់ប្រយោជន៍អ្វីខ្លះដល់លោកអ្នក? យើងសូមអញ្ជើញលោកអ្នកឲ្យពិចារណាចម្លើយចំពោះសំណួរទាំងនេះក្នុងគម្ពីរ ដែលមាននៅអត្ថបទបន្ទាប់។
[កំណត់សម្គាល់]
^ វគ្គ 5 យេហូវ៉ាគឺជានាមរបស់ព្រះដែលមានក្នុងគម្ពីរ។
