ភាគ២០
លោកយេស៊ូគ្រិស្ដត្រូវគេសម្លាប់
លោកយេស៊ូផ្ដួចផ្ដើមពិធីថ្មីមួយ។ លោកត្រូវគេក្បត់ ហើយព្យួរលើបង្គោល
ក្រោយពីផ្សព្វផ្សាយនិងបង្រៀនអស់បីឆ្នាំកន្លះ លោកយេស៊ូបានដឹងថា ជីវិតរបស់លោកនៅផែនដីគឺជិតដល់ទីបញ្ចប់ហើយ។ ពួកមេដឹកនាំសាសនាយូដាបានប្រឹក្សាគ្នាដើម្បីសម្លាប់លោក ប៉ុន្ដែពួកគេខ្លាចក្រែងបណ្ដាជនកើតចលាចល ពីព្រោះបណ្ដាជនចាត់ទុកលោកជាអ្នកប្រកាសទំនាយ។ ចន្លោះពេលនោះ សាថានបានធ្វើឲ្យសាវ័កម្នាក់ក្នុងចំណោមសាវ័ក១២នាក់របស់លោកយេស៊ូក្បត់លោក។ អ្នកនោះគឺយូដាសអ៊ីស្ការីយ៉ុត។ ពួកមេដឹកនាំសាសនាយូដាបានឲ្យយូដាស៣០កាក់ធ្វើពីប្រាក់ដើម្បីក្បត់លោកយេស៊ូ។
នៅយប់ចុងក្រោយ លោកយេស៊ូបានប្រមូលពួកសាវ័កដើម្បីធ្វើពិធីបុណ្យរំលង។ ក្រោយពីឲ្យយូដាសចេញទៅ លោកបានប្រារព្ធពិធីថ្មីមួយ ពោលគឺអាហារល្ងាចរបស់លោកម្ចាស់។ លោកបានយកនំប៉័ងមួយដុំ អធិដ្ឋានអរគុណព្រះ រួចកាច់ឲ្យពួកសាវ័ក១១នាក់។ លោកមានប្រសាសន៍ថា៖ «នេះជាតំណាងរូបកាយរបស់ខ្ញុំដែលនឹងត្រូវប្រគល់ឲ្យ ដើម្បីអ្នករាល់គ្នា។ ចូរបន្ដធ្វើដូច្នេះ ដើម្បីរំលឹកដល់ខ្ញុំ»។ លោកយកពែងនោះធ្វើបែបដូច្នោះដែរ ដោយមានប្រសាសន៍ថា៖ «ពែងនេះជាតំណាងកិច្ចព្រមព្រៀងថ្មី ដែលមានមូលដ្ឋានលើឈាមរបស់ខ្ញុំ»។—លូកា ២២:១៩, ២០
លោកយេស៊ូមានរឿងច្រើនដើម្បីប្រាប់ពួកសាវ័កលោកនៅយប់នោះ។ លោកបានឲ្យបញ្ញត្ដិថ្មីដល់ពួកគាត់ ពោលគឺឲ្យពួកគាត់បង្ហាញសេចក្ដីស្រឡាញ់ដល់គ្នាទៅវិញទៅមកដោយមិនគិតប្រយោជន៍ខ្លួន។ លោកមានប្រសាសន៍ថា៖ «យ៉ាងនេះ មនុស្សគ្រប់គ្នានឹងដឹងថាអ្នករាល់គ្នាជាអ្នកកាន់តាមខ្ញុំ បើអ្នករាល់គ្នាស្រឡាញ់គ្នា»។ (យ៉ូហាន ១៣:៣៤, ៣៥) លោកបានដាស់តឿនពួកគាត់កុំឲ្យខ្វល់ចិត្ដដោយសារព្រឹត្ដិការណ៍ខ្លោចផ្សាដែលហៀបនឹងកើតឡើងនោះ។ លោកយេស៊ូបានអធិដ្ឋានយ៉ាងស្មោះអស់ពីចិត្ដឲ្យពួកគាត់។ ពួកគាត់បានច្រៀងសរសើរព្រះ ហើយក៏ចេញទៅសួនហ្គេតសេម៉ានីក្នុងយប់នោះ។
នៅក្នុងសួនហ្គេតសេម៉ានី លោកយេស៊ូបានលុតជង្គង់អធិដ្ឋានអង្វរព្រះយ៉ាងស្មោះអស់ពីចិត្ដ។ បន្ដិចក្រោយមក មនុស្សមួយក្រុមដែលមានពួកទាហាន ពួកសង្ឃនិងពួកអ្នកឯទៀតបានមកដល់ទាំងកាន់អាវុធដើម្បីចាប់លោក។ យូដាសចូលមក ហើយបង្ហាញពួកគេថានរណាជាលោកយេស៊ូ ដោយថើបលោក។ កាលដែលពួកទាហានចងលោកយេស៊ូ នោះពួកសាវ័ករត់ចេញអស់។
នៅមុខតុលាការជាន់ខ្ពស់សាសន៍យូដា លោកយេស៊ូបានបញ្ជាក់ឲ្យគេស្គាល់ថាលោកជាបុត្ររបស់ព្រះ។ តុលាការនេះបានចាត់ទុកលោកថាមានទោសជាអ្នកប្រមាថព្រះ ហើយគួរតែស្លាប់។ រួចមក គេយកលោកយេស៊ូទៅជួបអភិបាលជាជនជាតិរ៉ូមឈ្មោះប៉ុនទាស ពីឡាត។ ទោះជាគាត់បានទទួលស្គាល់ថាលោកយេស៊ូគ្មានទោសក៏ដោយ តែគាត់បានប្រគល់លោកយេស៊ូទៅហ្វូងមនុស្សដែលទាមទារឲ្យប្រហារជីវិតលោក។
គេបានយកលោកយេស៊ូទៅកុលកូថា នៅទីនោះពួកទាហានជាតិរ៉ូមបានបោះដែកគោលភ្ជាប់លោកនឹងបង្គោល។ ដោយអព្ភូតហេតុ ថ្ងៃភ្លឺចែសបានទៅជាងងឹត។ ក្រោយមកក្នុងរសៀលថ្ងៃនោះ លោកយេស៊ូបានទទួលមរណភាព ហើយក៏មានការរញ្ជួយដីយ៉ាងខ្លាំង។ គេបានដាក់សពលោកក្នុងរូងថ្ម។ ស្អែកឡើង ពួកសង្ឃបានបិទត្រាទីបញ្ចុះសពនោះ ហើយបានដាក់ឲ្យគេយាមមាត់រូង។ តើលោកយេស៊ូនឹងនៅក្នុងទីបញ្ចុះសពនោះឬ? ទេ។ អព្ភូតហេតុដ៏អស្ចារ្យបំផុតមួយបានហៀបនឹងកើតឡើង។
—មានមូលដ្ឋានលើសៀវភៅម៉ាថាយ ជំពូកទី២៦និង២៧ ម៉ាកុស ជំពូកទី១៤និង១៥ លូកា ជំពូកទី២២និង២៣ យ៉ូហាន ជំពូកទី១២ដល់១៩។
^ វគ្គ 15 ដើម្បីដឹងអំពីតម្លៃនៃមរណភាពរបស់លោកយេស៊ូ សូមមើលសៀវភៅតើគម្ពីរអាចបង្រៀនយើងអំពីអ្វី? ជំពូកទី៥។
លោកអ្នកក៏ប្រហែលជាចូលចិត្តដែរ
ចូរចូលទៅជិតព្រះយេហូវ៉ា
ព្រះយេហូវ៉ាប្រទាន«ថ្លៃលោះមនុស្សជាច្រើន»
សេចក្ដីបង្រៀនដ៏ស្រួលយល់ តែពេញដោយខ្លឹមសារជ្រាលជ្រៅនេះអាចជួយអ្នកចូលទៅកាន់តែជិតព្រះ។
