មេរៀនទី១
អាថ៌កំបាំងមួយដែលយើងពិតជាចង់ដឹង
តើធ្លាប់មាននរណាម្នាក់ប្រាប់រឿងអាថ៌កំបាំងមួយដល់កូនទេ?— * គម្ពីរបានប្រាប់រឿងអាថ៌កំបាំងដ៏ពិសេសមួយដែលហៅថា«អាថ៌កំបាំងដ៏ពិសិដ្ឋ»។ នេះជាអ្វីដ៏ពិសិដ្ឋដោយសារមកពីព្រះ ហើយយើងហៅថាជាអាថ៌កំបាំងដោយសារមនុស្សមិនបានដឹងអំពីរឿងនេះទេ។ សូម្បីតែពួកទេវតាក៏ចង់ដឹងថែមទៀតអំពីរឿងនេះដែរ។ តើអាថ៌កំបាំងនោះជាអ្វី? តើកូនចង់ដឹងទេ?—
តើកូនគិតថាពួកទេវតាចង់ដឹងអំពីអ្វី?
ជាយូរយារមកហើយ ព្រះបានបង្កើតបុរសនិងស្ដ្រីដំបូង។ ពួកគាត់មានឈ្មោះថាអាដាមនិងអេវ៉ា។ ព្រះបានឲ្យពួកគាត់រស់នៅក្នុងសួនដ៏ស្អាតមួយហៅថា សួនអេដែន។ បើអាដាមនិងអេវ៉ាបានស្តាប់បង្គាប់ព្រះ ពួកគាត់និងកូនចៅរបស់ពួកគាត់អាចធ្វើឲ្យផែនដីទាំងមូលក្លាយទៅជាសួនឧទ្យាន ដូចសួនអេដែន។ ម្យ៉ាងទៀត ពួកគេអាចរស់នៅក្នុងសួនឧទ្យានជារៀងរហូត។ ប៉ុន្ដែ តើអាដាមនិងអេវ៉ាបានធ្វើអ្វី? តើកូនចាំទេ?—
អាដាមនិងអេវ៉ាមិនបានស្តាប់បង្គាប់ព្រះទេ។ នេះជាមូលហេតុដែលសព្វថ្ងៃនេះយើងមិនបានរស់នៅក្នុងសួនឧទ្យាន។ ប៉ុន្ដែព្រះបានមានប្រសាសន៍ថា លោកនឹងធ្វើឲ្យផែនដីទាំងមូលស្អាតឡើងវិញ ហើយមនុស្សទាំងអស់នឹងរស់ជារៀងរហូត ថែមទាំងសប្បាយរីករាយផងដែរ។ តើលោកនឹងធ្វើដូច្នេះតាមរបៀបណា? អស់ជាច្រើនឆ្នាំមកហើយ មនុស្សមិនបានដឹងទេ ពីព្រោះនេះជាអាថ៌កំបាំង។
ពេលលោកយេស៊ូមកផែនដី លោកបានបង្រៀនមនុស្សច្រើនថែមទៀតអំពីអាថ៌កំបាំងនេះ។ លោកបានមានប្រសាសន៍ថា អាថ៌កំបាំងនេះគឺជារាជាណាចក្ររបស់ព្រះ។ លោកយេស៊ូបានប្រាប់មនុស្សឲ្យអធិដ្ឋានសុំឲ្យរាជាណាចក្រនេះបានមកដល់។ រាជាណាចក្រនេះនឹងធ្វើឲ្យផែនដីក្លាយទៅជាសួនឧទ្យានដ៏ស្រស់ស្អាត។
តើកូនរំភើបចិត្ដចង់ដឹងអំពីអាថ៌កំបាំងនេះឬទេ?— សូមចាំថា មានតែអ្នកដែលស្តាប់បង្គាប់ព្រះយេហូវ៉ាប៉ុណ្ណោះដែលនឹងរស់នៅក្នុងសួនឧទ្យាន។ គម្ពីរប្រាប់យើងនូវរឿងជាច្រើនអំពីបុរសនិងស្ដ្រីដែលបានស្តាប់បង្គាប់ព្រះយេហូវ៉ា។ តើកូនចង់រៀនអំពីពួកគាត់ឬទេ?— សូមឲ្យយើងពិនិត្យមើលថា តើពួកគាត់ជាអ្នកណា ហើយតើតាមរបៀបណាយើងអាចធ្វើដូចពួកគាត់?
សូមអានពីគម្ពីរ
^ វគ្គ 3 ក្នុងរឿងទាំងអស់នៃសៀវភៅនេះ អ្នកនឹងឃើញសញ្ញាដូចនេះ (—) នៅក្រោយសំណួរមួយចំនួន។ ជាការល្អឲ្យអ្នកផ្អាកនិងទុកឲ្យកូនឆ្លើយ។
