សំបុត្រពីគណៈអភិបាល
«អ្នករាល់គ្នាគួរធ្វើជាអ្នកបង្រៀនគេ»។ (ហេ. ៥:១២) សូមស្រមៃគិតទៅមើល! ព្រះយេហូវ៉ាដែលជាអ្នកបង្រៀនដ៏ល្អបំផុតក្នុងសកលលោក អញ្ជើញយើងឲ្យបង្រៀនអ្នកឯទៀតអំពីលោក! ភារកិច្ចបង្រៀនសេចក្ដីពិតអំពីព្រះយេហូវ៉ា គឺជាឯកសិទ្ធិដ៏ខ្ពង់ខ្ពស់ ហើយក៏ជាភារកិច្ចធ្ងន់ធ្ងរដែរ ទោះជាយើងបង្រៀនក្នុងក្រុមគ្រួសារ ក្រុមជំនុំ ឬក្នុងកិច្ចបម្រើផ្សាយក៏ដោយ។ តើយើងអាចសម្រេចការនេះយ៉ាងដូចម្ដេច?
ចម្លើយគឺមានក្នុងពាក្យដែលសាវ័កប៉ូលបានសរសេរទៅកាន់ធីម៉ូថេ ដែលថា៖ «ចូរបន្តព្យាយាមក្នុងការអានឲ្យអ្នកឯទៀតស្ដាប់ ការបំផុសទឹកចិត្ត និងការបង្រៀន»។ ប៉ូលបានបន្ថែមថា៖ «ព្រោះដោយធ្វើដូច្នេះ អ្នកនឹងសង្គ្រោះទាំងខ្លួនអ្នក ទាំងពួកអ្នកដែលស្ដាប់អ្នក»។ (១ធី. ៤:១៣, ១៦) ដំណឹងដែលបងប្អូនផ្សាយអាចសង្គ្រោះជីវិត។ ដូច្នេះគឺសំខាន់ចាំបាច់ដែលបងប្អូនព្យាយាមអាននិងបង្រៀនឲ្យបានប្រសើរជាង។ សៀវភៅស្តើងនេះបានត្រូវរៀបចំដើម្បីជួយបងប្អូនឲ្យធ្វើដូច្នោះ។ សូមពិចារណាលក្ខណៈខ្លះក្នុងសៀវភៅស្តើងនេះ។
នៅក្នុងទំព័រនីមួយៗ មានបទគម្ពីរមួយដែលមានគោលការណ៍ទាក់ទងនឹងចំណុចហាត់រៀន ឬមានគំរូអំពីអ្នកដែលបានអនុវត្តចំណុចនេះ
ព្រះយេហូវ៉ាគឺជាគ្រូបង្រៀនដែលប្រៀបផ្ទឹមពុំបាន។ (យ៉ូប ៣៦:២២) សៀវភៅស្តើងនេះនឹងជួយបងប្អូនឲ្យកាន់តែប៉ិនប្រសប់ក្នុងការអាននិងការបង្រៀន។ ប៉ុន្តែសូមចាំថា ព្រះយេហូវ៉ាគឺជាប្រភពនៃព័ត៌មានដែលយើងផ្សាយ ហើយថាលោកជាអ្នកដែលទាញនាំមនុស្សឲ្យមកឯលោក។ (យ៉ូន. ៦:៤៤) ដូច្នេះ សូមអធិដ្ឋានជារឿយៗសុំសកម្មពលបរិសុទ្ធពីព្រះ ហើយប្រើបណ្ដាំរបស់លោកជាញឹកញាប់។ សូមជួយអ្នកឯទៀតឲ្យប្រមូលអារម្មណ៍ទៅលើព្រះយេហូវ៉ា មិនមែនមកលើបងប្អូនឡើយ។ សូមព្យាយាមធ្វើឲ្យចិត្តរបស់អ្នកស្ដាប់ស្រឡាញ់លោកយ៉ាងជ្រាលជ្រៅ។
បងប្អូនបានត្រូវអញ្ជើញឲ្យបង្រៀនអ្វីដ៏សំខាន់បំផុតដែលព្រះចង់ឲ្យមនុស្សរៀន។ យើងមានទំនុកចិត្តថាកាលដែលបងប្អូនពឹងផ្អែក«លើកម្លាំងដែលព្រះផ្ដល់ឲ្យ» នោះបងប្អូននឹងសម្រេចការនេះយ៉ាងល្អប្រសើរ។—១ពេ. ៤:១១
ពីអ្នកបង្រៀនដែលរួមការងារជាមួយនឹងបងប្អូន
Governing Body of Jehovah’s Witnesses
(គណៈអភិបាលនៃសាក្សីព្រះយេហូវ៉ា)