ចំណុចហាត់រៀនទី២
របៀបនិយាយដូចជាការសន្ទនា
កូរិនថូសទី២ ២:១៧
សេចក្ដីសង្ខេប: សូមនិយាយតាមរបៀបធម្មតានិងដោយចិត្តស្មោះ ដើម្បីបង្ហាញថាអ្នកមានអារម្មណ៍យ៉ាងណាចំពោះអ្នកស្ដាប់ និងចំពោះប្រធានបទរបស់អ្នក។
របៀបអនុវត្ត:
-
សូមអធិដ្ឋាន ហើយរៀបចំយ៉ាងដិតដល់។ សូមអធិដ្ឋានសុំព្រះជួយអ្នកប្រមូលអារម្មណ៍ទៅលើព័ត៌មាន ជាជាងខ្លួនអ្នក។ អ្នកត្រូវយល់ច្បាស់អំពីចំណុចសំខាន់ៗដែលអ្នកត្រូវពន្យល់។ សូមថ្លែងដោយប្រើពាក្យរបស់ខ្លួន មិនមែនថ្លែងដោយប្រើពាក្យដែលបានទន្ទេញពីកំណត់ឬសៀវភៅឡើយ។
-
សូមនិយាយចេញពីចិត្ត។ សូមគិតអំពីមូលហេតុដែលព័ត៌មាននោះគឺសំខាន់ចំពោះអ្នកស្ដាប់។ សូមប្រមូលអារម្មណ៍ទៅលើពួកគាត់។ ដោយធ្វើដូច្នេះ អ្នកនឹងបង្ហាញភាពកក់ក្ដៅ ចិត្តស្មោះ និងភាពរាក់ទាក់ ដោយឥរិយាបថ កាយវិការ និងទឹកមុខរបស់អ្នក។
-
មើលអ្នកស្ដាប់។ ពេលថ្លែង សូមមើលអ្នកស្ដាប់ បើនោះជារឿងធម្មតាក្នុងវប្បធម៌របស់អ្នក។ ពេលអ្នកថ្លែងសុន្ទរកថា សូមមើលបុគ្គលម្នាក់ក្នុងចំណោមអ្នកស្ដាប់ រួចមក មើលម្នាក់ទៀត ជាជាងងាកមើលអ្នកស្ដាប់ទាំងឡាយចុះឡើងពីខាងនេះទៅខាងនោះ។
