ភាគទី៩
ចូរសប្បាយនឹងជីវិតដ៏គាប់ចិត្ត នៅពេលឥឡូវនេះ និងជារៀងរហូតតទៅ!
អ្នកអាចមានជីវិតដ៏គាប់ចិត្ត បើអ្នកបណ្ដុះឲ្យមានមិត្តភាពជាមួយនឹងព្រះ
តាមប្រវត្ដិសាស្ត្រព្រះគម្ពីរ លោកអ័ប្រាហាំជាបុរសដ៏ល្បីម្នាក់ដែលមានជំនឿ បានចាកចេញពីជីវិតដ៏ធូរធារនៅទីក្រុងអ៊ើរដ៏ស្តុកស្តម្ភ។ ក្រោយពីស្នាក់នៅស្រុកខារ៉ានអស់មួយរយៈ នោះលោកបានចំណាយអស់មួយជីវិតលោក រស់នៅក្នុងត្រសាលជាមនុស្សត្រាច់ចរ ដោយឥតមានលំនៅជាអចិន្ត្រៃយ៍ឡើយ។ (លោកុប្បត្តិ ១២:១-៣; កិច្ចការ ៧:២-៧; ហេព្រើរ ១១:៨-១០) ក៏ប៉ុន្តែ ព្រះគម្ពីរបានកត់ទុកថា៖ «កាលគាត់បានអាយុវែងល្អ ព្រមទាំងស្កប់ស្កល់នឹងអាយុរបស់ខ្លួនហើយ នោះក៏ផុតដង្ហើមស្លាប់ទៅ»។ (លោកុប្បត្តិ ២៥:៨) តើអ្វីដែលបានធ្វើឲ្យជីវិតរបស់លោកមានភាពគាប់ចិត្តម្ល៉េះ? លោកមិនមែនគ្រាន់តែជាមនុស្សចាស់ជរា ដែលបានគាប់ចិត្តនឹងស្នាដៃរបស់លោកក្នុងកំឡុងពេលនៅរស់ ដែលបានស្ថាបនាពីមុនជិតស្លាប់នោះទេ។ ក្រោយមក លោកអ័ប្រាហាំបានត្រូវហៅជា‹មិត្តសំឡាញ់របស់ព្រះយេហូវ៉ា› ដោយព្រោះជំនឿដ៏អស្ចារ្យលើព្រះ។ (យ៉ាកុប ២:២៣; អេសាយ ៤១:៨) អ្វីដែលបានធ្វើឲ្យលោកអ័ប្រាហាំមានជីវិតដ៏គាប់ចិត្ត នោះគឺទំនាក់ទំនងដ៏មានអត្ថន័យជាមួយនឹងព្រះអាទិទេពរបស់លោក។
២ សព្វថ្ងៃនេះ លោកអ្នកក៏អាចប្រកបជីវិតដ៏គាប់ចិត្តដែលមានអត្ថន័យដូចជាលោកអ័ប្រាហាំធ្លាប់មានប្រមាណ៤.០០០ឆ្នាំមកហើយនោះដែរ ប្រសិនបើអ្នកបណ្ដុះឲ្យមានមិត្តភាពជាមួយនឹងព្រះនោះ។ អ្នកអាចមានអារម្មណ៍ចម្លែកចិត្ត ដោយគិតអំពីការធ្វើជាមិត្តសំឡាញ់របស់ព្រះអាទិទេពនៃសកលលោកនេះ ប៉ុន្តែគឺអាចធ្វើទៅបាន។ តើតាមរបៀបណាទៅ? អ្នកត្រូវតែផ្ដើមស្គាល់ទ្រង់ និងស្រឡាញ់ទ្រង់។ (កូរិនថូសទី១ ៨:៣; កាឡាទី ៤:៩) ការមានទំនាក់ទំនងបែបនេះជាមួយ នឹងព្រះអាទិទេព អាចធ្វើឲ្យអ្នកមានជីវិតដ៏គាប់ចិត្ត ព្រមទាំងមានអត្ថន័យទៀតផង។
៣ ចំពោះអស់អ្នកដែលសុខចិត្តទទួលយញ្ញបូជាលោះរបស់ព្រះយេស៊ូគ្រីស្ទ នោះព្រះយេហូវ៉ាបានប្រទាននូវគោលការណ៍ណែនាំដើម្បីមានជីវិតដែលប្រកបដោយសុភមង្គល។ (អេសាយ ៤៨:១៧) ចូរចងចាំថា អ័ដាមបានបះបោរប្រឆាំងព្រះ ដោយសម្រេចចិត្តផ្ទាល់ខ្លួននូវអ្វីដែលល្អនិងអាក្រក់។ ថ្វីបើព្រះយេហូវ៉ាបានលោះក្រុមគ្រួសារមនុស្សជាតិមកវិញ តាមរយៈយញ្ញបូជារបស់បុត្រទ្រង់ ដែលផ្ដល់ឲ្យគេរួចពីចំណងនៃបាបនិងសេចក្ដីស្លាប់ក៏ដោយ តែបុគ្គលម្នាក់ៗត្រូវតែទទួលយកតម្លៃលោះនោះ និងឈប់បង្កើតខ្នាតតម្រាតាមតែចិត្តខ្លួនចំពោះអ្វីដែលល្អនិងអាក្រក់។ យើងត្រូវតែចុះចូលនឹងក្រិត្យវិន័យនិងគោលការណ៍ ដែលព្រះប្រទានឲ្យដល់អស់អ្នកដែលទទួលយកយញ្ញបូជាលោះរបស់ព្រះយេស៊ូ។
៤ កាលដែលអ្នកបន្តសិក្សាព្រះគម្ពីរ និងអនុវត្តតាមគោលការណ៍ដែលមានក្នុងនោះ អ្នកនឹងប្រាកដជាមានចិត្តអបអរនូវសារៈសំខាន់នៃខ្នាតតម្រារបស់ព្រះ ស្តីអំពីអ្វីដែលល្អនិងអាក្រក់ជាពុំខាន។ (ទំនុកដំកើង ១៩:៧-៩) អ្នកនឹងត្រូវជំរុញចិត្តនិយាយអំពីព្រះ ដូចជាម៉ូសេដែលជាព្យាការីរបស់ព្រះយេហូវ៉ាបានមានប្រសាសន៍ថា៖ ‹បើទូលបង្គំប្រកបដោយព្រះគុណនៃទ្រង់ពិតមែន នោះសូមបង្ហាញអស់ទាំងផ្លូវរបស់ទ្រង់ដល់ទូលបង្គំផង ដើម្បីឲ្យទូលបង្គំបានស្គាល់ទ្រង់›។ (និក្ខមនំ ៣៣:១៣; ទំនុកដំកើង ២៥:៤) ព្រះគម្ពីរផ្ដល់ឲ្យគោលការណ៍នានា ដើម្បីណែនាំយើងឲ្យឆ្លងកាត់បញ្ហាដោយព្រោះ«នៅជាន់ក្រោយបង្អស់ នឹងមានគ្រាលំបាកណាស់»។ (ធីម៉ូថេទី២ ៣:១) អ្នកនឹងមានការអបអរច្រើនឡើង ដែលនាំឲ្យអ្នកស្គាល់ព្រះយេហូវ៉ាប្រសើរឡើងទៀត និងពង្រឹងមិត្តភាពរបស់អ្នកជាមួយនឹងទ្រង់។
៥ លោកអ័ប្រាហាំបានស្លាប់ក្នុងកាលដែលលោកមាន«អាយុវែងល្អ ព្រមទាំងស្កប់ស្កល់» ប៉ុន្តែឲ្យតែយើងនៅតែស្លាប់ នោះជីវិតគឺនៅតែខ្លីដដែល។ សេចក្ដីប្រាថ្នាចង់រស់គឺមានក្នុងយើងពីកំណើត ទោះជាមានអាយុចាស់យ៉ាងណាក៏ដោយ។ នេះគឺពីព្រោះ«ទ្រង់ក៏ធ្វើឲ្យចិត្តគេសង្ឃឹមដល់អស់កល្បទៅមុខ យ៉ាងនោះមនុស្សនឹងរកយល់មិនបាន ពីកិច្ចការដែលព្រះបានធ្វើ តាំងពីដើមដរាបដល់ចុងនោះឡើយ»។ (សាស្ដា ៣:១១) ទោះជារស់នៅជារៀងរហូតតទៅ ក៏យើងនឹងមិនអាចយល់ពីការបង្កើតទាំងអស់របស់ព្រះយេហូវ៉ាបានដែរ។ អ្វីដែលយើងអាចសង្កេតមើល និងសិក្សាស្រាវជ្រាវ ថែមទាំងពេញចិត្តនឹងកិច្ចការដ៏អស្ចារ្យរបស់ព្រះយេហូវ៉ា នោះគឺគ្មានកំរិតទេ!—ទំនុកដំកើង ១៩:១-៤; ១០៤:២៤; ១៣៩:១៤
៦ អ្នកប្រហែលជាមិនមានចិត្តចង់រស់នៅជារៀងរហូតទេ បើផែនដីនេះនឹងមានពេញដោយបញ្ហានានា ដែលយើងឃើញសព្វថ្ងៃនេះ។ ប៉ុន្តែ នេះមិនមែនជាបុព្វហេតុចំពោះសេចក្ដីខ្វល់ខ្វាយនោះទេ។ ព្រះគម្ពីរសន្យាថា៖ «តាមសេចក្ដីសន្យារបស់ទ្រង់ នោះយើងរាល់គ្នាទន្ទឹងចាំផ្ទៃមេឃថ្មី និងផែនដីថ្មី ដែលមានសុទ្ធតែសេចក្ដីសុចរិតវិញ»។ (ពេត្រុសទី២ ៣:១៣) ពាក្យ«ផ្ទៃមេឃថ្មី»សំដៅទៅរដ្ឋាភិបាលថ្មីមួយនៅស្ថានសួគ៌ ដែលជាព្រះរាជាណាចក្រនៃព្រះ ដែលនឹងគ្រប់គ្រងទៅលើផែនដីទាំងមូល។ «ផែនដីថ្មី»ជាសង្គមមនុស្សថ្មី ជាអស់អ្នកដែលចេះស្ដាប់បង្គាប់តាមការគ្រប់គ្រងនៃព្រះរាជាណាចក្រនោះ។ ដើម្បីធ្វើឲ្យនេះមានភាពប្រាកដប្រជា នោះមិនយូរប៉ុន្មានទៀតទេ ព្រះយេហូវ៉ានឹងចាត់វិធានការទាស់នឹងអស់អ្នកដែល«បង្ខូចផែនដី»។—វិវរណៈ ១១:១៨; ពេត្រុសទី២ ៣:១០
៧ តើយូរប៉ុន្មានទៀតទៅ? ជាផ្នែកនៃ‹ទីសំគាល់ពីគ្រាចុងបញ្ចប់នៃរបបលោកីយ៍› នោះព្រះយេស៊ូគ្រីស្ទបានរួមបញ្ចូលសង្គ្រាមនានាដែលទាក់ទងជាមួយសាសន៍ជាច្រើន ដោយមានបន្ទូលថា៖ «នឹងកើតមានអំណត់ . . . និងកក្រើកដីនៅកន្លែងផ្សេងៗ»។ ‹រោគរាតត្បាត› និង«ការទទឹងច្បាប់នឹងចំរើនជាច្រើនឡើង»។ (ម៉ាថាយ ២៤:៣-១៣; លូកា ២១:១០, ១១; ធីម៉ូថេទី២ ៣:១-៥) រួចមក ទ្រង់បានទាយថា៖ «កាលណាអ្នករាល់គ្នាឃើញការទាំងនេះកើតមក នោះត្រូវដឹងថា នគរព្រះជិតដល់ហើយយ៉ាងដូច្នោះដែរ»។ (លូកា ២១:៣១) ប្រាកដហើយ ពេលវេលាដែលព្រះយេហូវ៉ានឹងកំទេចចោលមនុស្សអាក្រក់ គឺកាន់តែជិតមកដល់មែនហើយ។ a
៨ ក្រោយពី«ថ្ងៃដ៏ធំរបស់ព្រះដ៏មានព្រះចេស្ដាបំផុត» ពេលដែលព្រះយេហូវ៉ានឹងបោសសំអាតអំពើអាក្រក់ជួជាតិចេញពីផែនដី នោះផែនដីយើងនេះនឹងបានទៅជាសួនមនោរម្យ។ (វិវរណៈ ១៦:១៤, ១៦; អេសាយ ៥១:៣) រួចមក «ពួកអ្នកសុចរិតនឹងបានស្រុកទុកជាមរដក ហើយនឹងនៅក្នុងស្រុកនោះជានិច្ច»។ (ទំនុកដំកើង ៣៧:២៩) ក៏ប៉ុន្តែ ចុះយ៉ាងណាវិញចំពោះអស់អ្នកដែលបានស្លាប់ទៅហើយនោះ? ព្រះយេស៊ូបានមានបន្ទូលថា៖ «កុំឲ្យឆ្ងល់ពីសេចក្ដីនេះឡើយ ដ្បិតមានពេលវេលាមក ដែលអស់ទាំងខ្មោចនៅក្នុងផ្នូរ នឹងឮសំឡេងទ្រង់ ហើយនឹងចេញមក គឺពួកអ្នកដែលបានប្រព្រឹត្តល្អ គេនឹងរស់ឡើងវិញឲ្យបានជីវិត ឯពួកអ្នកដែលបានប្រព្រឹត្តអាក្រក់វិញ គេនឹងរស់ឡើង ឲ្យជាប់មានទោស»។ (យ៉ូហាន ៥:២៨, ២៩) ព្រះយេហូវ៉ាដែលមានព្រះទ័យចាប់អារម្មណ៍នឹងបុគ្គលម្នាក់ៗ ប្រាថ្នាចង់ប្រោសជីវិតអស់អ្នកដែលបានស្លាប់ទៅហើយនោះ។ ពួកអ្នកវិទ្យាសាស្ត្រអាចខំបង្កើតមនុស្សតាមរយៈបច្ចេកទេសខាងហ្សែន ចំណែកឯព្រះអាទិទេពវិញ ទ្រង់មិនចាំបាច់ធ្វើអ៊ីចឹងទេ។ ទ្រង់មានសមត្ថភាពចងចាំពត៌មានទាំងអស់អំពីបុគ្គលម្នាក់ និងធ្វើឲ្យបុគ្គល ម្នាក់ៗមានជីវិតឡើងវិញបានដែរ។ ត្រូវហើយ អ្នកមានសេចក្ដីសង្ឃឹមជួបអ្នកជាទីស្រឡាញ់ដែលបានស្លាប់ទៅហើយនោះ នៅលើផែនដីមនោរម្យ!
៩ តើជីវិតនៅក្នុងសួនមនោរម្យនឹងទៅជាយ៉ាងណា? ផែនដីនេះនឹងមានពេញដោយមនុស្សប្រុសស្រីដ៏សប្បាយ ដែលមានឯកភាពគ្នាក្នុងការថ្វាយបង្គំព្រះអាទិទេព។ «ពួកអ្នកដែលនៅក្នុងក្រុងគេនឹងមិនថា៖ ‹ខ្ញុំឈឺ›ទៀតឡើយ»។ (អេសាយ ៣៣:២៤; ៥៤:១៣) គ្មានអ្នកណាម្នាក់ដែលនឹងជួបប្រទះភាពតានតឹងដ៏អួអាប់ ឬមានជម្ងឺខាងផ្លូវចិត្តនិងជម្ងឺសរសៃប្រសាទឡើយ។ មនុស្សទាំងអស់គ្នានឹងមានម្ហូបអាហារបរិបូរដើម្បីបរិភោគ ហើយគាប់ចិត្តនឹងកិច្ចការដែលស្របតាមបំណងព្រះហឫទ័យរបស់ព្រះ។ (ទំនុកដំកើង ៧២:១៦; អេសាយ ៦៥:២៣) ពួកគេនឹងមានភាពសុខសាន្តជាមួយនឹងសត្វព្រមទាំងជាមួយមនុស្សគ្នីគ្នា ហើយអ្វីដ៏សំខាន់បំផុត គឺ«បានមេត្រីនឹងព្រះ»។—រ៉ូម ៥:១; ទំនុកដំកើង ៣៧:១១; ៧២:៧; អេសាយ ១១:៦-៩
១០ តើអ្នកត្រូវតែធ្វើយ៉ាងណា ដើម្បីឲ្យបាននៅក្នុងសួនមនោរម្យ ហើយទទួលជីវិតដ៏គាប់ចិត្តបំផុតនោះ? ព្រះយេស៊ូគ្រីស្ទបានមានបន្ទូលថា៖ «នេះជាជីវិតអស់កល្បជានិច្ច គឺឲ្យគេមានចំណេះអំពីទ្រង់ដ៏ជាព្រះពិតតែមួយ និងព្រះយេស៊ូគ្រីស្ទ ដែលទ្រង់បានចាត់ឲ្យមកផង»។ (យ៉ូហាន ១៧:៣, ព.ថ.) ដូច្នេះ ចូរបន្តទទួលយកចំណេះអំពីព្រះយេហូវ៉ានិងព្រះយេស៊ូគ្រីស្ទ ដោយរៀនឲ្យដឹងអ្វីដែលព្រះតម្រូវពីអ្នកចុះ! រួចមក អ្នកអាចផ្គាប់ព្រះហឫទ័យរបស់ព្រះយេហូវ៉ា ហើយនេះនឹងធ្វើឲ្យអ្នកមានជីវិតដ៏គាប់ចិត្តជាទីបំផុត។
a អ្នកអាចរៀនថែមទៀតអំពីទំនាយនេះក្នុងជំពូកទី១១ នៃសៀវភៅ ចំណេះដែលនាំទៅដល់ជីវិតអស់កល្បជានិច្ច បោះពុម្ពដោយសមាគមប៉មយាមខាងព្រះគម្ពីរនិងខិត្តប័ណ្ណនៃរដ្ឋញូវយ៉ក។